ဂိလဒ်ကျောင်း နှစ်သက်တမ်း ၅၀ ဖြစ်၍သန်စွမ်းလျက်ပင်

“ဘုရားသခင့်နိုင်ငံတော်သတင်းကောင်း ကျယ်ကျယ်ပြန့်ပြန့် မရောက်ရသေးသည့်နေရာ မြောက်မြားစွာရှိသည်” ဟုဂိလဒ်ကျောင်းဖွင့်သည့် ၁၉၄၃ ဖေဖော်ဝါရီ ၁ ရက်နေ့တွင် ယင်းကျောင်း၏ပထမသင်တန်းသားများအား အင်န်၊ အိပ်ချ်၊ နောရ်ပြောဆိုခဲ့ပါသည်။ ဆက်လက်၍ ဤသို့ပြောပါသေးသည်။ “လယ်ကွင်းဆင်းလုပ်သား များများသာရှိမည်ဆိုလျှင် ရာပေါင်းများစွာမက ထောင်ပေါင်းများစွာသောသူတို့ကိုပင် သတင်းကြားနာစေနိုင်လိမ့်မည်။ သခင့်ကျေးဇူးတော်အားဖြင့် လုပ်သားများလာပါလိမ့်မည်။”

လုပ်သား—သန်းနှင့်ချီတိုးများလာခဲ့ပေပြီ။ ၁၉၄၃ ခုနှစ်တွင် နိုင်ငံပေါင်း ၅၄ နိုင်ငံ၌ ဘုရားသခင့်နိုင်ငံတော်ကြေညာသူ ၁၂၉,၀၇၀ ယောက်မှ ၁၉၉၂ ခုနှစ်တွင် နိုင်ငံပေါင်း ၂၂၉ နိုင်ငံတွင် ၄,၄၇၂,၇၈၇ ယောက်အထိ တိုးများလာခဲ့ပြီတကား။ ဤသို့တိုးများလာရန် ဂိလဒ်ကျောင်းက များစွာအထောက်အကူပြုခဲ့ပြီ။ နှစ်ပေါင်း ၅၀ တိုင်သည့်နောက်တွင်ပင် ကမ္ဘာ့လယ်ကွင်းတွင် လိုအပ်သည့်နေရာများ၌ အမှုတော်ထမ်းဆောင်မည့် သာသနာပြုလုပ်သားများကို လေ့ကျင့်ပေးရာတွင် ယင်းကျောင်းသည် အဓိကကဏ္ဍ၌ ဆက်လက်ဆောင်ရွက်နေဆဲရှိသည်။

၁၉၉၃ မတ် ၇ ရက်နေ့တွင် နယူးဂျာစီမြို့၊ ဂျာစီမြို့တော်စည်းဝေးပွဲခန်းမတွင် ၉၄ ကြိမ်မြောက် သင်တန်းသားများ၏ကျောင်းဆင်းပွဲအတွက် ယူအက်စ်ဗေသလအိမ်သားများနှင့် ဖိတ်ကြားခံရသောဧည့်သည်ပေါင်း ၄,၇၉၈ ယောက် စုဝေးခဲ့ကြပါသည်။ ဤအမှန်ထူးခြားသောနေ့ရက်တွင် ဂိလဒ်ကျောင်း၏ နှစ်ပေါင်း ၅၀ ကာလကို မီးမောင်းထိုး ပြန်ကြည့်နိုင်သည့်အချိန်လည်းဖြစ်ခဲ့ပါသည်။ ယင်းအစီအစဉ်အကြောင်းကို အနည်းငယ်သိလိုသလော။

အဖွင့်သီချင်းကိုသီဆိုပြီးနောက် အုပ်ချုပ်ရေးအဖွဲ့ဝင် ဂျော့ဂျ် ဒီ၊ ဂန်ဂါ့စ်သည် လှိုက်လှဲစွာဆုတောင်းပေးခဲ့သည်။ ထိုနောက် သဘာပတိ ကယ်ရီ ဒဘလျူ၊ ဘာဘာ၏ နိဒါန်းစကားများကိုကြားရပြီးသော် ကျောင်းဆင်းသူများ—နှင့်တက်ရောက်လာသူအားလုံးဟောပြောချက်တိုတစ်ခုပြီးတစ်ခုကို ဂရုစိုက်နားဆင်ခဲ့ကြပါသည်။

“သင်သည် ဘယ်သောအခါမျှ ထီးထီးတည်းမဟုတ်” အဓိကအကြောင်းကို ရောဘတ် ဒဘလျူ၊ ဝေါလန် ဦးဆုံးဟောပြောပါသည်။ ရင်းနှီးခင်မင်သောလေသံဖြင့် သူက ‘မိသားစုနှင့်မိတ်ဆွေများမှ ဝေးလံသောနေရာတွင်ရောက်နေခြင်းကြောင့် လာမည့်နေ့ရက်များတွင် သင်တို့အထီးကျန်ရသည်ဟု ခံစားရမည့်အခါပေါင်းများစွာ ကြုံကြိုက်ကြရလိမ့်မည်။’ သို့ဖြစ်၍ပင် “သင်သည် ဘယ်သောအခါမျှ ထီးထီးတည်းမရှိ” ဟုမည်သို့ဆိုနိုင်သနည်း။ သူဤသို့ရှင်းပြခဲ့သည်။ ‘အကြောင်းမှာ သင်တို့ယောက်စီယောက်တိုင်းသည် ယေဟောဝါဘုရားသခင်နှင့် ချက်ချင်းအဆက်အသွယ်ပြုနိုင်ခွင့် ရရှိထားသောကြောင့်ဖြစ်သည်။’ ဆုတောင်းခြင်းအခွင့်အရေးကို တန်ဖိုးထားကာ နေ့စဉ်အသုံးပြုကြရန် ကျောင်းဆင်းများအား သူတိုက်တွန်းခဲ့ပါသည်။ ထိုအခါ ယေရှုနည်းတူပင် “ငါသည် တစ်ကိုယ်တည်းနေသည်မဟုတ်” ဟုသူတို့ပြောဆိုနိုင်ကြမည်။ (ယောဟန် ၁၆:၃၂) ထိုစကားများသည် ကျောင်းဆင်းများအတွက် အလွန်အားတက်စရာပါတကား။

(မတ် ၇ ရက်နေ့စဉ်ကျမ်းချက်ကိုအခြေခံသည့်) “သင့်မျှော်လင့်ခြင်းကို စွဲမြဲစွာ ကိုင်စွဲထားလော့” အကြောင်းပေါ်မူတည်ပြီး အုပ်ချုပ်ရေးအဖွဲ့ဝင် လိုင်မင် အေ၊ စွင်ဂယ်လ်သည် အရည်အချင်းနှစ်ခု—ခံနိုင်ရည်နှင့်မျှော်လင့်ခြင်း—ရှိရန်လိုကြောင်းကို ဆက်ဟောပြောသွားပါသည်။ ‘ကဲ့ရဲ့ရှုတ်ချခံရခြင်း၊ ရန်ငြိုးထားခြင်း၊ မုန်းတီးခြင်း၊ ထောင်ကျခြင်းနှင့်သေခြင်းကိုပင်လျှင် ခံကြရမည့်အတွက် ခရစ်ယာန်များသည် ခံနိုင်ရည်ရှိကြရမည်။ လိုအပ်သည့်အခါ ယေဟောဝါ၏ သစ္စာရှိသက်သေခံများ အားထားမှီခိုတောင်းခံနိုင်သည့် သာမန်ထက်လွန်ကဲသောခွန်အား၌ အတိုင်းအတာမရှိပါ။ ယင်းကိုသိရှိထားရခြင်းသည် အထူးသဖြင့် အသင်ကျောင်းဆင်းသူများအတွက် အားရှိစရာ အမှန်ဖြစ်ပါသည်။’ မျှော်လင့်ခြင်းနှင့်စပ်လျဉ်း၍ကော။ ‘ခမောက်ဆောင်းသူ၏ခေါင်းအတွက် ခမောက်သည် အကာအကွယ်ဖြစ်သည်နည်းတူ ကယ်တင်ခြင်းရမည်ဟူသောမျှော်လင့်ချက်သည် ခရစ်ယာန်တစ်ဦး၏ စိတ်ဓာတ်ကို စောင့်ရှောက်ကာကွယ်ပေးသဖြင့် သမာဓိစောင့်သိစေပါသည်။—၁ သက်သာလောနိတ် ၅:၈။

နောက်ဆက်လက်ဟောပြောသူ ရာလ်ဖ် အီး၊ ဝါးလ်စ်က “‘ကျယ်ဝန်းရာအရပ်’ ၌လုံခြုံသည့်အခြေအနေသို့ မည်သည့်နည်းဖြင့် လွတ်မြောက်နိုင်မည်နည်း” ဟူသောစိတ်ဝင်စားဖွယ်ခေါင်းစဉ်ကို ရွေးချယ်ခဲ့ပါသည်။ ဤ “ကျယ်ဝန်းရာအရပ်” ကားအဘယ်နည်း။ (ဆာလံ ၁၈:၁၉) “စိတ်တည်ငြိမ်မှုနှင့် နှလုံးတွင်းလုံခြုံမှု ခံစားစေသောအဖြစ်သို့ ကယ်နှုတ်ခံရခြင်းတည်း” ဟုဟောပြောသူရှင်းပြခဲ့သည်။ အဘယ်အရာမှ ကျွန်ုပ်တို့ကယ်နှုတ်ခံရရန် လိုအပ်နေပါသနည်း။ ‘အသင်ကိုယ်တိုင်—သင့်အားနည်းချွတ်ချော်မှုများမှ ဖြစ်သည်။ ထို့ပြင် စာတန်လေပင့်ပေးသည့် ပြင်ပအခြေအနေများမှလည်းဖြစ်သည်’ ဟုသူဆက်ပြော၏။ (ဆာလံ ၁၁၈:၅) ကျယ်ဝန်းရာအရပ်၌ လုံခြုံသည့်အခြေအနေသို့ မည်သည့်နည်းဖြင့် လွတ်မြောက်နိုင်မည်နည်း။ ‘ကျွန်ုပ်တို့ပြုလေသမျှတွင် ယေဟောဝါ၏ မိန့်မှာချက်ကိုလိုက်နာပြီး မိမိတို့၏အရေးအကြောင်းများနှင့်စပ်လျဉ်း၍ ယေဟောဝါထံ ယုံကြည်ခြင်းအားဖြင့် ဆုပတ္ထနာပြုခြင်းဖြင့်ဖြစ်သည်။’

“ရှေ့တွင် အဘယ်အရာရှိသနည်း” ဟူသောခေါင်းစဉ်ကို ဒေါန် အေ၊ အဲဒမ်းစ် ရွေးချယ်ဟောပြောခဲ့သည်။ သာသနာပြုသစ်များရှေ့ အဘယ်အရာ အမှန်ရှိနေပါသနည်း။ ပြုပြင်ပြောင်းလဲရမည့် အချိန်ကာလဖြစ်သည်ဟု သူရှင်းပြခဲ့သည်။ “ထို့ပြင် သင်တို့ရှေ့ ကောင်းချီးများစွာလည်းရှိပါသည်။” ဥပမာအနေနှင့် တာဝန်ကျရာအရပ်တွင် အတည်တကျဖြစ်လာကြပြီးနောက် ဤသို့စာရေးအကြောင်းကြားခဲ့သော သာသနာပြုအသစ်နှစ်ဦးအကြောင်း သူပြောပြပါသည်။ “အမှုဆောင်ထွက်ခဲ့တဲ့ အပျော်ဆုံးနေ့တစ်နေ့ကို သင်သတိရအောက်မေ့လိုက်ပါ။ အဲ့ဒီလို နေ့တိုင်းဖြစ်နေတယ်။ ကျွန်တော်တို့ယူသွားတဲ့စာအုပ်စာတမ်းတွေ မလောက်နိုင်ဘူး။ နောက်လည်း သင်အံမှုလုပ်ပေးဖို့ လူအများ တစ်ချိန်လုံးတောင်းဆိုနေကြတယ်။” ဟောပြောသူသည် ကျောင်းဆင်းများ၏မိသားစုနှင့် မိတ်ဆွေများအား ဤသို့ဆိုသည်။ ‘ဤကျောင်းဆင်းများအတွက် သင်တို့စိုးရိမ်နေစရာအကြောင်းမရှိပါ။ အားပေးစာများကို သူတို့ထံရေးပို့ခြင်းဖြင့် သူတို့ကိုအကူအညီပေးနိုင်ပါလိမ့်မည်။”—သု၊ ၂၅:၂၅။

ယင်းနောက် ကျောင်းတွင်ပို့ချသွန်သင်သူများ ဆက်လက်ဟောပြောကြသည်။ ဂျက်ခ် ဒီ၊ ရက်ဒဖော့ဒ်က “မည်သူ့ထံမှ မည်သည့်အရာကိုမျှ မမျှော်လင့်နှင့်” ခေါင်းစဉ်ကိုရွေးချယ်ဟောပြောသည်။ ကျောင်းဆင်းသူများရင်ဆိုင်ရမည့် စိန်ခေါ်ချက်တစ်ခုမှာ လူတို့နှင့်အသင့်အတင့်ရှိခြင်းဖြစ်လိမ့်မည်ဟု သူရှင်းပြပါသည်။ အဘယ်အရာက အကူအညီဖြစ်လိမ့်မည်နည်း။ “လူတို့၏အမှားများကို ဥပေက္ခာပြုခြင်းဖြစ်သည်။ အခြားသူများထံမှ မျှော်လင့်ချက်မကြီးမားလွန်းပါနှင့်။ သင်ရသင့်ရထိုက်သည်ဟုမှတ်သောအရာကို အပြည့်အဝရလိမ့်မည်ဟု မည်သည့်အခါမျှမစောင့်မျှော်ပါနှင့်။ အခြားသူများ၌လည်း မစုံလင်မှုများရှိသည်ကို သတိရအောက်မေ့ပါ။ ဤကြင်နာသောသဘောသည် သင့်ကိုအထောက်အကူပေးလိမ့်မည်။ အခြားသူများနှင့် သင်သင့်တင့်စွာနေနိုင်ခြင်းက သင့်ရင့်ကျက်မှုအတိုင်းအတာကို ထင်ရှားစေမည်။” (သု၊ ၁၇:၉) ဤပညာရှိ ဆုံးမစကားများကို ကျင့်သုံးခြင်းသည် တိုင်းတစ်ပါး၌ သာသနာပြုများဖြစ်ခြင်းငှာ အောင်မြင်စွာပြုပြင်ပြောင်းလဲနိုင်ဖို့အတွက် ကျောင်းဆင်းများကို များစွာအထောက်အကူဖြစ်ပါလိမ့်မည်။

“ထိုဘဏ္ဍာသည် မြေအိုးထဲမှာထည့်ထားလျက် ငါတို့၌ရှိ၏” ဟု ၂ ကောရိန္သု ၄:၇ ကဆိုသည်။ ဂိလဒ်ကျောင်း၏ မော်ကွန်းထိန်း ယူလစ္စစ် ဗွီ၊ ဂလာ့စ်သည် “သင်၏စမ်းသပ်ခံ သစ္စာရှိညီအစ်ကိုများကို ယုံကြည်စိတ်ချပါ” ဟူသည့်အဓိကအကြောင်းကို အသေးစိတ်တင်ပြဟောပြောရန် ဤကျမ်းချက်ကိုအသုံးပြု ရှင်းပြခဲ့သည်။ “မြေအိုးများ” ကားအဘယ်နည်း။ “ယင်းသည် မစုံလင်သောလူသားများဖြစ်ကြသည့် ကျွန်ုပ်တို့ကိုဆိုလိုပေမည်။” “ဘဏ္ဍာ” ကားအဘယ်နည်း။ “ကျွန်ုပ်တို့၏ ခရစ်ယာန်ဓမ္မအမှုဖြစ်သည်” ဟုသူရှင်းပြသည်။ (၂ ကောရိန္သု ၄:၁) ဤဘဏ္ဍာကို မည်သို့အသုံးပြုရမည်နည်း။ “ကျွန်ုပ်တို့ထံ၌ ယေဟောဝါအပ်နှင်းထားသောဘဏ္ဍာကို သိုဝှက်သိမ်းဆည်းထားရမည်မဟုတ်ပါ။ ထိုကြောင့် အသင်ချစ်စွာသော သာသနာပြုလောင်းများ၊ သွားလေရာရာအရပ်၌ ထိုဘဏ္ဍာကို ဖြန့်ဝေပါ။ ယင်းကို တစ်ဆင့်ဝေမျှပေးတတ်ရန် အခြားသူများအားလည်း သွန်သင်ပေးပါ။”

ဂိလဒ်ကျောင်း စတင်ချိန်က ကျောင်း၏မော်ကွန်းထိန်းဖြစ်ခဲ့သူ အဲလ်ဘတ် ဒီ၊ ရှရိုဒါသည် စင်မြင့်ပေါ်သို့တက်လာချိန်သည် ရှေးအဖြစ်ဟောင်းကို သတိရမှတ်မိစေခဲ့သည်။ သူဟောပြောသည့်ခေါင်းစဉ်မှာ “ရာစုဝက်ရှိ သီအိုကရက်တစ်လေ့ကျင့်မှု” ဖြစ်သည်။ “ထိရောက်စွာ မည်သို့သွန်သင်ပေးနိုင်သည်ကို ယေဟောဝါသိရှိတော်မူ၍ ထိုသို့ပြုခဲ့ပြီ” ဟုသူဆိုသည်။ မည်သို့အားဖြင့်နည်း။ လွန်ခဲ့သောအနှစ် ၅၀ ကစတည်ထောင်ခဲ့သောကျောင်းနှစ်ကျောင်း—သီအိုကရက်တစ်ဓမ္မအမှုကျောင်းနှင့် ဂိလဒ်ကျောင်း—တို့မှရရှိခဲ့သောလေ့ကျင့်မှုကို သူကိုးကားဖော်ပြခဲ့ပါသည်။ တိကျမှန်ကန်သောအသိပညာကိုပေးသိရာတွင် အထောက်အကူများစွာပြုခဲ့သည်ကား ကမ္ဘာသစ်ဘာသာပြန်ကျမ်းဖြစ်ကြောင်း သူဖော်ပြသည်။ ကျောင်းဆင်းသူတို့အားသူက “ယေဟောဝါ၏ရည်ရွယ်ချက်များကို တိကျမှန်ကန်စွာသိရှိနိုင်ရန် အသင်းမသည် သင်တို့အားအမြဲကူညီပေးနေမည်ကို စိတ်ချလက်ချနှင့် သင်တို့သာသနာပြုရာအရပ်များထံ သွားနိုင်ကြပါသည်” ဟုအားပေးခဲ့သည်။

ကင်းမျှော်စင် သမ္မာကျမ်းစာနှင့်ဝေစာအသင်း၏ ဥက္ကဌဖြစ်သူ မီလ်တန် ဂျီ၊ ဟင်ရှယ်လ်သည် “အောင်နိုင်သူများထက်မက ဖြစ်ကြ၏” အကြောင်းဟောပြောပါသည်။ “ငါတို့ကိုချစ်တော်မူသောသူ၏ကျေးဇူးတော်ကြောင့် . . . အထူးသဖြင့်အောင်မြင်ကြ၏” ဟူသည့် ၁၉၄၃ ခုနှစ်ချုပ်ကျမ်းချက်ကို ညီအစ်ကိုဟင်ရှယ်လ် အခြေပြုဟောပြောခဲ့သည်။ (ရောမ ၈:၃၇) ဒုတိယကမ္ဘာစစ်ဖြစ်နေစဉ် နိုင်ငံပေါင်းများစွာတွင် ကျွန်ုပ်တို့၏ညီအစ်ကိုများစွာ ညှဉ်းဆဲခံနေရသောကြောင့် ယင်းကျမ်းချက်သည် အလွန်လျောက်ပတ်သည်ဟု သူရှင်းပြခဲ့သည်။ ညီအစ်ကိုဟင်ရှယ်လ်သည် ထိုနှစ်ချုပ်ကျမ်းချက်ကိုဆွေးနွေးတင်ပြထားသည့် ကင်းမျှော်စင်စာစောင်မှ ကောက်နှုတ်ချက်အချို့ကို ဖတ်ပြပြီး ရှင်းပြပေးခဲ့သည်။ “ဤကင်းမျှော်စင်ဆောင်းပါး [January 15, 1943] ကိုဖေဖော်ဝါရီလတွင် ဂိလဒ်ကျောင်း၏ ပထမသင်တန်းသားများလေ့လာခဲ့၍ ရှေ့တွင်ကြုံတွေ့ရမည့်အရာများအတွက် သူတို့ကို အသင့်ပြင်ဆင်ပေးခဲ့ပါသည်။” လွန်ခဲ့သောအနှစ် ၅၀ ကျော်က ကျောင်းဆင်းသူများစွာတို့သည် အောင်မြင်သူများဖြစ်ကြကြောင်း ထင်ရှားပြနှင့်ခဲ့ပြီဟု သူရှင်းပြပါသည်။ ၉၄ ကြိမ်မြောက်သင်တန်းသား­များကော။ “ယေဟောဝါနှင့် ပူးပူးကပ်ကပ်နေပါ။ ကိုယ်တော့်မေတ္တာတော်အောက် နေပါ။ သင့်အောင်ပွဲသည် မုချဖြစ်ပါလိမ့်မည်” ဟုသူပြောခဲ့သည်။

နံနက်ဟောပြောချက်များပြီးနောက် နိုင်ငံအသီးသီးမှရောက်လာသော နှုတ်ခွန်းဆက်လွှာများကို သဘာပတိဖတ်ပြပါသည်။ ထိုနောက် မောင်နှံစုံ ၂၄ တွဲစောင့်မျှော်ခဲ့ချိန်—ဒီပလိုမာလက်မှတ်များ ထုတ်ဝေပေးချိန်—ရောက်ရှိလာပါသည်။ ဤအချိန်တွင် ဂိလဒ်ကျောင်းသားများသည် ယခု တရားဝင် ဂိလဒ်ဘွဲ့ရ ကျောင်းဆင်းများဖြစ်လာကြသည်တကား။ သူတို့သည် နိုင်ငံပေါင်း ၅ နိုင်ငံမှရောက်လာကြ၍ ဟောင်ကောင်၊ တိုင်ဝမ်၊ မိုဇမ်ဘစ်နှင့် ဥရောပအရှေ့ပိုင်းနိုင်ငံများပါဝင်သည့် သူတို့တာဝန်ကျရာနိုင်ငံပေါင်း ၁၇ နိုင်ငံသို့ ရောက်ကြရတော့မည်။

တစ်ခဏရပ်နားပြီးနောက် မွန်းလွဲပိုင်းအစီအစဉ်ကို ကင်းမျှော်စင်သင်တန်းအတိုချုပ်ဖြင့် ရောဘတ် အယ်လ်၊ ဘတ်တလာက စတင်ပါသည်။ ထိုနောက် နယူးယောက်ပြည်နယ်၊ ဝေါလ်ကီးလ်အရပ်တွင် သက်သေခံထွက်ခဲ့ကြရာ သူတို့ရရှိခဲ့သည့် ထူးခြားသောတွေ့ကြုံမှုများကို သင်တန်းဆင်းသူများ သရုပ်ဖော်ပြခဲ့ပါသည်။ ယင်းအစီအစဉ်သည် သင်တန်းသားများအား ဂိလဒ်သို့ရောက်စေခဲ့သော အကြောင်းများအနက် တစ်ခု—လယ်ကွင်းဓမ္မအမှုကိုမြတ်နိုးသည့် သူတို့စိတ်ထား—ကိုထင်ရှားပေါ်လွင်စေခဲ့သည်။

သင်တန်းသားများအစီအစဉ်ပြီးနောက် ဂိလဒ်ကျောင်း၏ အနှစ် ၅၀ မြောက်ကာလကို အမှတ်တရဖြစ်စေရန် အထူးအစီအစဉ်တစ်ခုရှိမရှိ ပရိသတ်စောင့်မျှော်နေကြရာ စိတ်မပျက်ခဲ့ရကြပါ။—ပူးတွဲပါအကွက် “ဂိလဒ်ကျောင်း၏ အနှစ် ၅၀ ကာလကို ပြန်သုံးသပ်ခြင်း” ကိုရှု။

ညီအစ်ကိုနောရ်သည် ယုံကြည်ခြင်းအပြင် အမြော်အမြင်ရှိသူဖြစ်ကြောင်း လွန်ခဲ့သောနှစ်ပေါင်း ငါးဆယ်က တင်ပြခဲ့ပါသည်။ ပထမသင်တန်းသားများအား ပြောဆိုခဲ့သည့် သူ၏နိဒါန်းစကားတွင် ဂိလဒ်ကျောင်းမှ အောင်မြင်မှုအမှန်ရရှိမည်ကို သူစိတ်ချကြောင်း ဤသို့ဆိုခဲ့သည်။ “ယင်း၏အမည်နှင့်အညီ ဤအရပ်မှ ကမ္ဘာ့ဒေသအသီးသီးသို့ ‘သက်သေအစုအပုံ’ နှံ့ပျံ့သွားလိမ့်မည်၊ ဘုရားသခင့်ဘုန်းတော်ထင်ရှားရေးအတွက် ဖျက်ဆီး၍မရနိုင်သော ကျောက်တိုင်အဖြစ် ဤသက်သေခံချက် တည်လိမ့်မည်။ ခန့်အပ်ခံ ဓမ္မအမှုဆောင်များအဖြစ် သင်တို့သည် အနန္တတန်ခိုးရှင်ကို လုံးလုံးအားကိုးကြပါလိမ့်မည်။ သင်တို့အကူအညီလိုသည့်အခါတိုင်း ကိုယ်တော်သည် လမ်းပြညွှန်ကြားမည်၊ ကိုယ်တော်သည် ကောင်းချီးပေးတော်မူသောဘုရားဖြစ်ကြောင်း သင်တို့သိကြရလိမ့်မည်။”a

နှစ်ပေါင်းငါးဆယ်ကြာပြီးနောက် ဂိလဒ်ကျောင်းသည် သန်စွမ်းလျက်ပင်။ ၉၄ ကြိမ်မြောက်သင်တန်းမှ ကျောင်းဆင်းများသည် သူတို့အရင် ကျောင်းဆင်းခဲ့သူ ၆,၅၀၀ ကျော်တို့နည်းတူပြုလုပ်ခွင့် ယခုရရှိကြပြီဖြစ်သည်။ ‘သက်သေအစုအပုံ’ နှံ့ပျံ့သွားလိမ့်မည်၊ ယေဟောဝါဘုရားသခင့်ဘုန်းတော်ထင်ရှားရေးအတွက် ကျောက်တိုင်အဖြစ် တည်လိမ့်မည့် “သက်သေအစုအပုံ” ကိုစုပုံပေးရန် သူတို့အသီးသီးပါဝင်ဆောင်ရွက်ကြစဉ် အနန္တတန်ခိုးရှင်ဘုရားသခင်ကို လုံးလုံးလျားလျား မှီခိုအားထားကြပါစို့လေ။

[အောက်ခြေမှတ်ချက်များ]

[စာမျက်နှာ ၂၅ ပါ လေးထောင့်ကွက်]

သင်တန်းဆိုင်ရာအချက်အလက်များ

ကျောင်းသားအရေအတွက်စုစုပေါင်း– ၄၈

ကိုယ်စားပြု တက်ရောက်သည့်နိုင်ငံ အရေအတွက်– ၅

တာဝန်ပေးအပ်ခံရသည့်နိုင်ငံ အရေအတွက်– ၁၇

ပျမ်းမျှ အသက်– ၃၂

ပျမ်းမျှ သမ္မာတရားတွင်းသက်တမ်း– ၁၅.၃

ပျမ်းမျှ အချိန်-ပြည့်ဓမ္မအမှုဆောင်သက်တမ်း– ၉.၆

[စာမျက်နှာ ၂၅ ပါ ရုပ်ပုံ]

ဂိလဒ် ကင်းမျှော်စင် သမ္မာကျမ်းစာကျောင်း၏ ၉၄ ကြိမ်မြောက် သင်တန်း

အောက်ပါစာရင်းတွင် အတန်းများကို ရှေ့တန်းမှနောက်တန်းသို့ ရေတွက်ပြီး အမည်များကို အတန်းလိုက် လက်ဝဲဘက်မှ လက်ယာဘက်သို့ စီထားသည်။

(1) De La Garza, C.; Borg, E.; Arriaga, E.; Chooh, E.; Purves, D.; Fosberry, A.; Delgado, A.; Drescher, L. (2) Scott, V.; Fridlund, L.; Kettula, S.; Copeland, D.; Arriaga, J.; Thidé, J.; Berglund, A.; Jones, P. (3) Delgado, F.; Keegan, S.; Leinonen, A.; Finnigan, E.; Fosberry, F.; Holbrook, J.; Berglund, A.; Jones, P. (4) Watson, B.; Frias, C.; Chooh, B.; Holbrook, J.; Purves, J.; Finnigan, S.; Jones, A.; Cuccia, M.; (5) Scott, G.; Copeland, D.; Drescher, B.; De La Garza, R.; Leinonen, I.; Keegan, D.; Watson, T.; Kettula, M.; (6) Widegren, J.; Borg, S.; Cuccia, L.; Berglund, A.; Olsson, B.; Frias, J.; Fridlund, T.; Thidé, P.