စစ်မှန်သောဘုရားသခင်ကို ကြောက်ရွံ့ခြင်း၏ အကျိုးကျေးဇူးများ

“ငါသည် သင်၏အကျိုးနှင့်ယှဉ်သောအရာကို သွန်သင်၍ သင်သွားအပ်သောလမ်းဖြင့် ပို့ဆောင်သော သင်၏ဘုရားသခင် ထာဝရဘုရားဖြစ်၏။”—ဟေရှာယ ၄၈:၁၇။

၁ ဘုရားရေးရာကြောက်ရွံ့ခြင်းအားဖြင့် မည်သည့်ဘေးဒုက္ခများကို ရှောင်ရှားနိုင်ခဲ့မည်ဖြစ်သနည်း။

အာဒံသာ ဘုရားရေးရာကြောက်ရွံ့ခြင်းကို ပြုစုပျိုးထောင်ခဲ့ပါက သူကိုယ်တိုင် ထာဝရသေရခြင်းနှင့် သူ၏သားစဉ်မြေးဆက်များ နှစ်ထောင်ပေါင်းများစွာ ပူဆွေးဒုက္ခခံစားရခြင်းတို့ကို ဖြစ်စေသောအပြစ်ပြုခြင်းမှ ရှောင်လွဲနိုင်ခဲ့ပေမည်။ မိမိအားကြောက်ရွံ့ရန်နှင့် ချစ်ရန် ယေဟောဝါ၏သွန်သင်ချက်ကို ဣသရေလလူမျိုးသာ လိုက်နာခဲ့ပါက ထိုလူမျိုးသည် ဗာဗုလုန်သို့ သုံ့ပန်းများအဖြစ် ခေါ်ဆောင်ခံရမည်မဟုတ်သကဲ့သို့ ဘုရားသခင်၏သားတော်ကို ငြင်းပယ်ပြီး ကိုယ်တော့်အသွေးသွန်းခြင်းအပြစ်ကိုလည်း ပြုကြမည်မဟုတ်ချေ။ ယနေ့လူ့ဘောင်သည် ဘုရားသခင်ကိုသာကြောက်ရွံ့ပါက အုပ်ချုပ်မှုများ သို့မဟုတ် လုပ်ငန်းကိုင်ငန်းများတွင် စာရိတ္တယိုယွင်းခြင်း၊ ရာဇဝတ်မှုများ၊ စစ်ပွဲများ ရှိကြလိမ့်မည်မဟုတ်ချေ။—သု. ၃:၇။

၂။ ကျွန်ုပ်တို့ဝန်းကျင်လောက၏ အခြေအနေများကြားမှ ဘုရားရေးရာကြောက်ရွံ့ခြင်းကို အဘယ်ကြောင့် ကျွန်ုပ်တို့ပြုစုပျိုးထောင်သင့်သနည်း။

^၂ သို့သော် ကျွန်ုပ်တို့ပတ်ဝန်းကျင်လောကတွင် မည်သို့ပင်ဖြစ်နေပါစေ ကျွန်ုပ်တို့တစ်ဦးချင်းအနေနှင့်၊ မိသားစုလိုက်အနေနှင့်၊ ယေဟောဝါကျေးကျွန်များ၏ အသင်းတော်များအနေနှင့် မှန်သောဘုရားသခင်အား ကြောက်ရွံ့ခြင်းကို ပြုစုပျိုးထောင်ခြင်းမှ အကျိုးကျေးဇူးရရှိနိုင်သည်။ ယင်းသည် ဣသရေလလူမျိုးအား မောရှေပေးသော သတိပေးချက်နှင့် ညီညွတ်သည်– “အိုဣသရေလအမျိုး၊ သင်၏ဘုရားသခင်ထာဝရဘုရားကို ကြောက်ရွံ့၍ လမ်းတော်သို့လိုက်သွားခြင်း၊ သင်၏ဘုရားသခင်ထာဝရဘုရားကို စိတ်နှလုံးအကြွင်းမဲ့ချစ်၍ အမှုတော်ကိုဆောင်ရွက်ခြင်း၊ သင်၏အကျိုးကိုထောက်၍ . . . ထာဝရဘုရား၏ပညတ်တော်ကို စောင့်ရှောက်ခြင်းမှတစ်ပါး သင်၏ဘုရားသခင်ထာဝရဘုရားသည် အဘယ်အမှုကို တောင်းတော်မူသနည်း။” (တရားဟောရာ ၁၀:၁၂၊ ၁၃) မှန်သောဘုရားသခင်ယေဟောဝါအား ကြောက်ရွံ့ခြင်းမှ ကျွန်ုပ်တို့ရရှိသည့် အကျိုးကျေးဇူးအချို့ကား အဘယ်နည်း။

ဉာဏ်ပညာ—ရွှေထက်သာ၍အဖိုးထိုက်

၃။ (က) ကျွန်ုပ်တို့ ဦးဆုံးခံစားရသော အကျိုးကျေးဇူးကား အဘယ်နည်း။ (ခ) ဆာလံ ၁၁၁:၁၀ ၏အဓိပ္ပာယ်ကား အဘယ်နည်း။

^၃ ဦးဆုံးသောအကျိုးကျေးဇူးမှာ စစ်မှန်သောဉာဏ်ပညာဖြစ်သည်။ ဆာလံ ၁၁၁:၁၀ က ဤသို့ကြေညာထားသည်– “ထာဝရဘုရားကိုကြောက်ရွံ့သောသဘောသည် [ဉာဏ်] ပညာ၏အချုပ်အခြာဖြစ်၏။” ယင်းသည် မည်သို့အဓိပ္ပာယ်ရှိသနည်း။ ဉာဏ်ပညာဟူသည် ပြဿနာဖြေရှင်းရန်၊ အန္တရာယ်ကိုရှောင်ကွင်းရန်၊ တစ်စုံတစ်ခုသောပန်းတိုင်ကို လက်လှမ်းရန် အသိပညာကို အောင်မြင်စွာအသုံးချနိုင်သည့် အရည်အချင်းဖြစ်သည်။ ထိုသို့သောဉာဏ်ပညာ၏ အစပထမနှင့် အခြေခံအုတ်မြစ်မှာ ယေဟောဝါအားကြောက်ရွံ့ခြင်းဖြစ်သည်။ အဘယ်ကြောင့်နည်း။ အကြောင်းမှာ ဖန်ဆင်းရာအားလုံးသည် ကိုယ်တော့်လက်ရာတော်များဖြစ်ကြသည်။ ကိုယ်တော်အား မှီခိုကြရသည်။ ကိုယ်တော်သည် လူသားအား လွတ်လပ်စွာရွေးချယ်ပိုင်ခွင့်ပေးသော်လည်း မိမိ၏လမ်းညွှန်မှုမှကင်းလွတ်၍ ကိုယ့်ခြေလှမ်းကိုယ်အောင်မြင်စွာထိန်းသိမ်းနိုင်သော အရည်အချင်းကို မပေးထားပါ။ (ယောရှု ၂၄:၁၅; ယေရမိ ၁၀:၂၃) အသက်နှင့်ပတ်သက်သော အခြေခံကျသည့်အဖြစ်မှန်များကို နားလည်သဘောပေါက်ပြီး ယင်းတို့နှင့်အညီ အသက်ရှင်မှသာလျှင် ထာဝရအောင်မြင်မှုကို ကျွန်ုပ်တို့ရရှိနိုင်ကြမည်။ ဘုရားသခင့်အလိုတော်သည် မလွဲဧကန်အောင်မြင်မှုရနိုင်ပြီး သစ္စာစောင့်သိမှုကို ဆုချနိုင်သည့် ကိုယ်တော့်ကတိတော်များနှင့် အရည်အချင်းတော်များသည် သေချာမှုရှိကြောင်း ယေဟောဝါနှင့်ပတ်သက်သော ကျွန်ုပ်တို့၏အသိပညာက ကျွန်ုပ်တို့အား မယိမ်းယိုင်သည့်ယုံကြည်စိတ်ချမှုကိုပေးလျှင် ဘုရားရေးရာကြောက်ရွံ့ခြင်းက ကျွန်ုပ်တို့အား ပညာရှိစွာကျင့်ကြံရန် လှုံ့ဆော်ပေးနေခြင်းဖြစ်သည်။—သု. ၃:၂၁-၂၆; ဟေဗြဲ ၁၁:၆။

၄၊ ၅။ (က) လူငယ်တစ်ဦး၏ တက္ကသိုလ်ပညာက အဘယ်ကြောင့် သူ့အား စစ်မှန်သောဉာဏ်ပညာမပေးသနည်း။ (ခ) ဤလူနှင့်သူ့ဇနီးတို့သည် နောက်ပိုင်းတွင် စစ်မှန်သောဉာဏ်ပညာကို မည်သို့ဆည်းပူးခဲ့သနည်း။ ယင်းက သူတို့၏အသက်တာကို မည်သည့်နည်းဖြင့် ပြောင်းလဲပေးခဲ့သနည်း။

^၄ ဥပမာတစ်ခုကိုစဉ်းစားကြည့်ပါ။ လွန်ခဲ့သည့်ဆယ်စုနှစ်အနည်းငယ်ခန့်က လူငယ်တစ်ဦးသည် ကနေဒါနိုင်ငံရှိ စပ်စ်ကက်ချူဝမ်တက္ကသိုလ်တွင် ကျောင်းတက်နေသည်။ ကျောင်းသင်ရိုးတွင် ဇီဝဗေဒဘာသာရပ်ပါဝင်ပြီး ဆင့်ကဲဖြစ်စဉ်ကို သင်ယူရသည်။ သူဘွဲ့ရသောအခါ အဏုမြူရူပဗေဒပညာရပ်ကို အထူးတတ်ကျွမ်းပြီး တိုရန်တိုတက္ကသိုလ်တွင် ဆက်လက်ပညာသင်ရန် ပညာသင်စရိတ်ကိုရသည်။ လေ့လာမှုပြုစဉ် အဏုမြူ၏ဖွဲ့စည်းပုံတွင် အစီအစဉ်ကျနခြင်းနှင့် ပုံစံတို့၏ အံ့ချီးဖွယ်အထောက်အထားကို သူတွေ့မြင်လာသည်။ သို့သော် အောက်ပါမေးခွန်းများ၏အဖြေကိုမူ မရရှိခဲ့ချေ– ဤအရာအားလုံးကို မည်သူပုံစံပြုခဲ့သနည်း။ မည်သည့်အချိန်ကနည်း။ မည်သည့်အကြောင်းကြောင့်နည်း။ ယင်းအဖြေများမရဘဲနှင့် ထိုအချိန်တွင် စစ်ကြီးဖြစ်နေသောလောက၌ သူ၏အသိပညာများကို ပညာရှိစွာအသုံးချနိုင်မည်လော။ မည်သည့်အရာက သူ့အားလမ်းညွှန်မည်နည်း။ လူမျိုးရေးဝါဒကလော။ ရုပ်ပစ္စည်းဆိုင်ရာ အကျိုးအမြတ်ရလိုသည့် ဆန္ဒကလော။ သူသည် စစ်မှန်သောဉာဏ်ပညာကို အမှန်ပင်ရရှိခဲ့သလော။

^၅ ဘွဲ့ရပြီးမကြာမီမှာပင် ထိုလူငယ်နှင့် သူ၏ဇနီးတို့သည် ယေဟောဝါသက်သေများနှင့် ကျမ်းစာစတင်လေ့လာသည်။ ယခင်က သူတို့မရခဲ့သည့်အဖြေများကို ဘုရားသခင်ကိုယ်တော်တိုင်၏ နှုတ်ကပါဌ်တော်တွင် ရရှိစပြုလာသည်။ ဖန်ဆင်းရှင် ယေဟောဝါဘုရားသခင်ကို သူတို့သိရှိလာကြသည်။ ပင်လယ်နီမှ မောရှေအကြောင်းနှင့် ဗာဗုလုန်မှ ဒံယေလနှင့် သူ၏အပေါင်းအဖော်များအကြောင်းကို သူတို့လေ့လာသောအခါ လူကိုမဟုတ်ဘဲ ဘုရားသခင်ကိုကြောက်ရွံ့ရန် အရေးကြီးကြောင်း သူတို့သိရှိလာကြသည်။ (ထွက်မြောက်ရာ ၁၄:၁၀-၃၁; ဒံယေလ ၃:၈-၃၀) ယေဟောဝါကိုချစ်သောမေတ္တာနှင့် တွဲဖက်သည့် ထိုဘုရားရေးရာကြောက်ရွံ့ခြင်းက သူတို့ကို လှုံ့ဆော်စပြုလာသည်။ မကြာမီ သူတို့၏အသက်တာလမ်းစဉ်တစ်ခုလုံး ပြောင်းလဲသွားသည်။ နောက်ဆုံးတွင် ထိုလူငယ်သည် ဇီဝဗေဒပညာတွင် မိမိလေ့လာခဲ့သည့်အရာများ၏ လက်ရာရှင်ကို သိရှိလာသည်။ သူလေ့လာခဲ့သောရူပဗေဒပညာတွင် ထင်ဟပ်သည့် သူသိမြင်ခဲ့ရသောဉာဏ်ပညာ၏ ဉာဏ်တော်ရှင့် ရည်ရွယ်တော်မူချက်များကို သူနားလည်စပြုလာသည်။ မိမိ၏အသိပညာကိုအသုံးချပြီး လူသားချင်းပျက်စီးစေနိုင်သည့် ပစ္စည်းကိရိယာများကို ထုတ်လုပ်မည့်အစား သူနှင့်သူ့ဇနီးတို့သည် အခြားသူများအား ဘုရားသခင်နှင့် ကိုယ်နှင့်စပ်ဆိုင်သူများကို ချစ်တတ်ရန် ကူညီပေးလိုကြသည်။ သူတို့သည် ဘုရားသခင့်နိုင်ငံတော်ကြွေးကြော်သူများအဖြစ် အချိန်ပြည့်လုပ်ငန်းတွင် စာရင်းသွင်းလိုက်ကြသည်။ နောက်ပိုင်းတွင် သူတို့သည် ဂိလဒ်ကင်းမျှော်စင်ကျမ်းစာသင်ကျောင်းကို တက်ရောက်ခဲ့ကြပြီး သာသနာပြုများအဖြစ် စေလွှတ်ခံခဲ့ကြရသည်။

၆။ ယေဟောဝါအားကြောက်ရွံ့ခြင်း၌ အခြေစိုက်နေသော ဉာဏ်ပညာရှိလျှင် အမြော်အမြင်ကင်းမဲ့သော မည်သည့်လိုက်စားရာများကို ကျွန်ုပ်တို့ရှောင်မည်နည်း။ ယင်းအစား မည်သည့်အရာကို ကျွန်ုပ်တို့လုပ်နေကြမည်နည်း။

^၆ လူတိုင်း သာသနာပြုမလုပ်နိုင်သည်တော့ မှန်ပါသည်။ သို့သော် ကျွန်ုပ်တို့အားလုံးသည် ယေဟောဝါအားကြောက်ရွံ့ခြင်းတွင် အခြေစိုက်သော ဉာဏ်ပညာ၌ မွေ့လျော်နိုင်ကြသည်။ ကျွန်ုပ်တို့သည် ထိုဉာဏ်ပညာကို ပြုစုပျိုးထောင်ပါက ဘဝနှင့်ပတ်သက်၍ ရော်ရမ်းမှန်းဆမှုမျှသာပြုနေကြသော လူသားတို့၏ အတွေးအခေါ်များတွင် စိတ်ပါဝင်စားစွာနစ်မျောနေကြမည်မဟုတ်ပေ။ ကျွန်ုပ်တို့အား ထာဝရအသက်ပေးနိုင်သည့် အသက်၏ဇာစ်မြစ်ဖြစ်သော ယေဟောဝါဘုရားသခင် မှုတ်သွင်းတော်မူသည့် သမ္မာကျမ်းစာကို လေ့လာခြင်းတွင် ကျွန်ုပ်တို့အင်တိုက်အားတိုက်ကြိုးစားကြမည်။ (ဆာလံ ၃၆:၉; ကောလောသဲ ၂:၈) ပျက်စီးခြင်းနှုတ်ခမ်းနားတွင် ယိမ်းယိုင်နေသော စီးပွားရေးစနစ်၏ ကျေးကျွန်များဖြစ်မည့်အစား ကျွန်ုပ်တို့၏ဘဝတွင် အရေးအကြီးဆုံးဖြစ်သော ဘုရားသခင်နှင့်ဆက်ဆံရေးကို တည်ဆောက်လျက် စားရန်ဝတ်ရန်ရှိသမျှဖြင့် ကျေနပ်ရောင့်ရဲရန်ဟူသည့် ယေဟောဝါ၏သွန်သင်ချက်ကို လိုက်လျှောက်ကြမည်။ (၁ တိမောသေ ၆:၈-၁၂) ကျွန်ုပ်တို့၏အနာဂတ်သည် ဤလောကတွင် အခိုင်အမာအခြေချခြင်းအပေါ် အမှီသဟဲပြုနေသည့်အလား ပြုမူကျင့်ကြံနေမည့်အစား လောကနှင့် လောကီတပ်မက်ခြင်းသည် ရွေ့သွားကွယ်ပျောက်နေကြောင်း၊ ဘုရားသခင်၏အလိုတော်နှင့်အညီ ကျင့်သောသူမူကား အစဉ်အမြဲတည်သည့်အကြောင်း ဖော်ပြသည့် ယေဟောဝါ၏နှုတ်ကပါဌ်တော်ကို ယုံကြည်ကြမည်။—၁ ယောဟန် ၂:၁၇။

၇။ (က) တန်ဖိုးနှင့်ပတ်သက်သော မျှတသည့်အမြင်ရှိရန် နယပုံပြင် ၁၆:၁၆ က ကျွန်ုပ်တို့အား မည်သို့အကူအညီပေးသနည်း။ (ခ) ဘုရားသခင်၏အလိုတော်ကို ကျွန်ုပ်၏ဘဝမဏ္ဍိုင်ဖြစ်စေခြင်းက မည်သည့်ဆုကျေးဇူးများကို ရရှိစေမည်နည်း။

^၇ နယပုံပြင်ကျမ်း ၁၆:၁၆ က ဤသို့မှန်ကန်စွာဖော်ပြခြင်းဖြင့် ကျွန်ုပ်တို့ကိုအားပေးသည်– “ရွှေကိုရတတ်ခြင်းထက် ပညာ [ယေဟောဝါအားကြောက်ရွံ့ခြင်းနှင့် အစပြုသော ဉာဏ်ပညာ] ကိုရတတ်ခြင်းသည် အလွန်ကောင်း၏။ ငွေကိုအမြတ်မထား၊ ဉာဏ် [အသိပညာ၊ ကဘ] နှင့်ပြည့်စုံခြင်းကို အမြတ်ထားစရာအလွန်ကောင်း၏။” ထိုဉာဏ်ပညာနှင့် အသိပညာတို့သည် ဘုရားသခင့်အလိုတော်ဆောင်ခြင်းကို ကျွန်ုပ်တို့ဘဝတွင် အဓိကမဏ္ဍိုင်ဖြစ်စေရန် ကျွန်ုပ်တို့ကိုလှုံ့ဆော်ပေးမည်။ လူ့သမိုင်း၏ ဤအချိန်ကာလပိုင်းတွင် မိမိ၏သက်သေများအား ဘုရားသခင်အပ်နှင်းထားသည့်အလုပ်ကား အဘယ်နည်း။ ဘုရားသခင့်နိုင်ငံတော်အကြောင်း ဟောပြောခြင်းနှင့် သဘောရိုးဖြောင့်သူများကို ခရစ်တော်၏တပည့်စစ်များ ဖြစ်လာစေရန် ကူညီခြင်းဖြစ်သည်။ (မဿဲ ၂၄:၁၄; ၂၈:၁၉၊ ၂၀) ဤလုပ်ငန်းသည် စစ်မှန်သောကျေနပ်ရောင့်ရဲမှုနှင့် များစွာသောပျော်ရွှင်မှုကို ပေးသည့်လုပ်ငန်းဖြစ်သည်။ ထို့ကြောင့် သမ္မာကျမ်းစာက ဤသို့ဆိုခြင်းသည် အကြောင်းကောင်းရှိသည်– “ဉာဏ်ပညာကိုရှာ၍ရသောသူသည် မင်္ဂလာရှိ၏။”—သု. ၃:၁၃။

အမှားပြုခြင်းမှ အကာအကွယ်ပေး

၈။ (က) ဘုရားသခင်အားကြောက်ရွံ့ခြင်း၏ ဒုတိယအကျိုးကျေးဇူးကို ဖော်ပြပါ။ (ခ) မည်သည့်မကောင်းမှုမှ ကျွန်ုပ်တို့ကာကွယ်ခံရသနည်း။ (ဂ) ဘုရားရေးရာကြောက်ရွံ့ခြင်းသည် အားကြီးသည့်လှုံ့ဆော်မှုတစ်ခု မည်သို့ဖြစ်လာသနည်း။

^၈ ဘုရားသခင်အားကြောက်ရွံ့ခြင်း၏ ဒုတိယအကျိုးကျေးဇူးမှာ အမှားပြုခြင်းမှ ကျွန်ုပ်တို့အားအကာအကွယ်ပေးခြင်းဖြစ်သည်။ ဘုရားသခင်အား အလွန်ရိုသေကိုင်းရှိုင်းသူသည် အကောင်းနှင့်အဆိုးကို မိမိဘာသာမဆုံးဖြတ်ချေ။ ဘုရားသခင်က ကောင်းသည်ဟုပြောသောအရာကို သူတို့က ဆိုးသည်ဟုမရှုမြင်သကဲ့သို့ ဘုရားသခင်က ဆိုးသည်ဟုပြောသောအရာကို သူတို့က ကောင်းသည်ဟု မယူမှတ်ကြပါ။ (ဆာလံ ၃၇:၁၊ ၂၇; ဟေရှာယ ၅:၂၀၊ ၂၁) ထို့အပြင် ဘုရားရေးရာကြောက်ရွံ့ခြင်းအားဖြင့် လှုံ့ဆော်ခံရသူသည် ယေဟောဝါက ကောင်းသည်ဟု ပြောထားသောအရာများနှင့် ဆိုးသည်ဟု ပြောထားသောအရာများကို သိ ရုံသက်သက်ဖြင့် မကျေနပ်ချေ။ ထိုသို့သောသူသည် ယေဟောဝါ ချစ် သည့်အရာကို ချစ်ပြီးယေဟောဝါ မုန်းသည့်အရာကို မုန်းသည်။ ရလဒ်အနေနှင့် သူသည် ယေဟောဝါ၏စံနှုန်းများနှင့်အညီ ကျင့်ကြံပြုမူသည်။ သို့အားဖြင့် နယပုံပြင်ကျမ်း ၁၆:၆ တွင် ဖော်ပြထားသည့်အတိုင်း “ထာဝရဘုရားကို ကြောက်ရွံ့သောသဘောအားဖြင့် ဒုစရိုက်ကိုရှောင်တတ်၏။” ထိုသို့သော ဘုရားရေးရာကြောက်ရွံ့ခြင်းသည် လူတစ်ဦး၏ ကိုယ်ပိုင်အစွမ်းခွန်အားဖြင့် မလုပ်နိုင်သောအရာကို အောင်မြင်စွာပြီးမြောက်စေနိုင်သည့် စွမ်းအားကြီးမားသော လှုံ့ဆော်မှုဖြစ်လာသည်။

၉။ ဘုရားသခင့်မနှစ်သက်မှုကိုမပြုလိုသော ပြင်းပြသည့်ဆန္ဒက မက္ကဆီကိုနိုင်ငံရှိ အမျိုးသမီးတစ်ဦး၏ ဆုံးဖြတ်ချက်ကို မည်သို့အကျိုးသက်ရောက်ခဲ့သနည်း။ မည်သည့်အကျိုးကျေးဇူးဖြစ်ထွန်းသနည်း။

^၉ ဘုရားရေးရာကြောက်ရွံ့ခြင်းသည် လူတစ်ဦးတွင် တိုးတက်ဖြစ်ပေါ်လာခါစ၌ပင် သူ့ဘဝ၏နောက်ပိုင်းအချိန်များတွင် ပူဆွေးသောကရောက်စေမည့် အရာတစ်ခုခု လုပ်ကိုင်ခြင်းကို ရှောင်ရှားရန် သူ့အားတည်ကြည်ခိုင်မာစေနိုင်သည်။ ဥပမာ၊ မက္ကဆီကိုနိုင်ငံရှိ ကိုယ်ဝန်ဆောင်အမျိုးသမီးတစ်ဦးက သန္ဓေသားဖျက်ချခြင်းနှင့်ပတ်သက်၍ သက်သေခံတစ်ဦးအား မေးမြန်းခဲ့သည်။ သက်သေခံက ထိုအမျိုးသမီးအား ကျမ်းချက်အချို့ကို ဖတ်ပြပြီး ဤသို့ကျိုးကြောင်းဆင်ခြင်ပြသည်– “ဖန်ဆင်းရှင်အဖို့ အသက်ဟာ သိပ်အရေးကြီးတယ်။ မမွေးဖွားသေးတဲ့ကလေးရဲ့ အသက်တောင်မှ အရေးကြီးတယ်။” (ထွက်မြောက်ရာ ၂၁:၂၂၊ ၂၃; ဆာလံ ၁၃၉:၁၃-၁၆) ဆေးပညာဆိုင်ရာစမ်းသပ်မှုက သူမ၏ကလေးသည် ပုံမှန်အတိုင်းမဖြစ်နိုင်ကြောင်း ဖော်ပြသည်။ သို့သော် ဘုရားသခင့်နှုတ်ကပါဌ်တော်တွင် သူမတွေ့ရှိချက်၏ လှုံ့ဆော်မှုကြောင့် ထိုအမျိုးသမီးသည် ကလေးကိုမွေးဖွားရန် ဆုံးဖြတ်လိုက်သည်။ သူမ၏ဆရာဝန်က သူမကိုထပ်မံတွေ့ဆုံရန် ငြင်းဆိုလိုက်ပြီး သူမ၏ခင်ပွန်းကလည်း သူမကိုစွန့်ပစ်ရန် ခြိမ်းခြောက်လိုက်သည်။ သို့သော် သူမအခိုင်အမာရပ်တည်ခဲ့သည်။ အချိန်တန်သော် မိန်းကလေးတစ်ဦး—ပုံမှန်ဖြစ်ပြီး ကျန်းမာ၍ ချောမောလှပသူကလေးကို သူမမွေးဖွားခဲ့သည်။ ကျေးဇူးတင်သည့်စိတ်လှုံ့ဆော်မှုဖြင့် သက်သေခံများကို သူမရှာဖွေပြီး သူတို့နှင့်အတူ ဘုရားသခင့်နှုတ်ကပါဌ်တော်ကို စတင်လေ့လာသည်။ တစ်နှစ်အတွင်း သူမနှင့် သူမ၏ခင်ပွန်းတို့သည် နှစ်ခြင်းခံကြသည်။ နောက်နှစ်အနည်းငယ်အကြာတွင် ခရိုင်စည်းဝေးပွဲကြီးတစ်ခု၌ ပထမဆုံးသူတို့တွေ့ခဲ့သော သက်သေခံနှင့် ဝမ်းသာအယ်လဲပြန်လည်တွေ့ဆုံကြပြီး သူတို့၏ လေးနှစ်အရွယ် ချစ်စဖွယ်သမီးငယ်ကလေးကို မိတ်ဆက်ပေးကြသည်။ ဘုရားသခင်အား လျောက်ပတ်စွာရိုသေလေးစားခြင်းနှင့် ကိုယ်တော်မနှစ်သက်အောင်လုပ်ခြင်းကို ရှောင်လိုသည့် ပြင်းပြသောဆန္ဒတို့က လူတစ်ဦး၏အသက်တာတွင် အမှန်ပင် တန်ခိုးသြဇာကြီးမားစွာလွှမ်းမိုးသည်။

၁၀။ ဘုရားရေးရာကြောက်ရွံ့ခြင်းက လူများအား မည်သည့်မှားယွင်းမှုပုံစံများမှ ရုန်းကန်လွတ်မြောက်ရန် ခိုင်ခံ့မြဲမြံစေနိုင်သနည်း။

^၁၀ ဘုရားရေးရာကြောက်ရွံ့ခြင်းသည် အမှားပြုခြင်း၏ ကဏ္ဍအသီးသီးကိုတွန်းလှန်နိုင်ရန် ကျွန်ုပ်တို့အား ခိုင်ခံ့မြဲမြံစေသည်။ (၂ ကောရိန္သု ၇:၁) ယင်းကို ကောင်းမွန်စွာပြုစုပျိုးထောင်ပါက လူတစ်ဦးအား သူကိုယ်တိုင်နှင့် ယေဟောဝါသာလျှင် သိကြသော လျှို့ဝှက်အပြစ်ပြုခြင်းမှ ရပ်ဆိုင်းအောင် အကူအညီပေးနိုင်သည်။ အရက် သို့မဟုတ် မူးယစ်ဆေးဝါး အလွန်အကျွံသောက်သုံးခြင်း၏ ကျွန်အဖြစ်မှ လွတ်မြောက်ရန်ကူညီပေးနိုင်သည်။ တောင်အာဖရိကရှိ မူးယစ်ဆေးစွဲဖူးသူတစ်ဦး ဤသို့ရှင်းပြသည်– “ဘုရားသခင်နဲ့ဆိုင်တဲ့အသိပညာကို ကောင်းကောင်းသဘောပေါက်လာတဲ့အခါ ကိုယ်တော်ကို စိတ်နာစေမဲ့ ဒါမှမဟုတ် မနှစ်သက်စရာဖြစ်စေမဲ့အရာကို လုပ်ဖို့ ကျွန်တော်ကြောက်တတ်လာတယ်။ ကိုယ်တော်စောင့်ကြည့်နေတယ်ဆိုတာ ကျွန်တော်သိတော့ ကိုယ်တော့်အမြင်မှာ ကျွန်တော့်ကို နှစ်သက်စရာဖြစ်စေချင်တယ်။ အဲဒါက ကျွန်တော့်ရဲ့မူးယစ်ဆေးတွေကို အိမ်သာထဲထည့်လိုက်ပြီး ဖျက်ဆီးပစ်ဖို့ ကျွန်တော့်ကိုလှုံ့ဆော်တယ်။” ဘုရားရေးရာကြောက်ရွံ့ခြင်းသည် အခြားလူထောင်ပေါင်းများစွာတို့အား အလားတူနည်းဖြင့် အကူအညီပေးခဲ့ပြီ။—သု. ၅:၂၁; ၁၅:၃။

လူကိုကြောက်ရွံ့ခြင်းမှ အကာအကွယ်ရယူခြင်း

၁၁။ အကျိုးဖြစ်ထွန်းသော ယေဟောဝါအားကြောက်ရွံ့ခြင်းက ဖြစ်လေ့ရှိသော မည်သည့်ကျော့ကွင်းမှ ကျွန်ုပ်တို့ကိုကာကွယ်ပေးသနည်း။

^၁၁ အကျိုးဖြစ်ထွန်းစေသော ဘုရားသခင်အားကြောက်ရွံ့ခြင်းသည် လူကိုကြောက်ရွံ့ခြင်းမှလည်း ကျွန်ုပ်တို့ကို ကာကွယ်ပေးသည်။ လူအများစုတို့သည် အနည်းနှင့်အများဆိုသလို လူကိုကြောက်ခြင်း၏ဒုက္ခကို ခံရကြသည်။ ဂေသရှေမန်ဥယျာဉ်တွင် ယေရှုခရစ်သည် စစ်သားများ၏ဖမ်းဆီးခြင်းခံရစဉ်က တမန်တော်များပင်လျှင် ကိုယ်တော်အား စွန့်ပြေးခဲ့ကြသည်။ နောက်ပိုင်း ယဇ်ပုရောဟိတ်မင်းကြီး၏ အိမ်ဥပစာတွင် ပေတရုသည် စိတ်မတည်မငြိမ်ဖြစ်ကာ လူကိုကြောက်ရွံ့ခြင်း၏ ချုပ်ကိုင်မှုကိုခံရသောကြောင့် မိမိသည် ယေရှု၏တပည့်တော်တစ်ဦးမဟုတ်၊ ကိုယ်တော်ကို သိပင်မသိဟု ငြင်းဆန်ခဲ့သည်။ (မာကု ၁၄:၄၈-၅၀၊ ၆၆-၇၂; ယောဟန် ၁၈:၁၅-၂၇) သို့သော် တမန်တော်များသည် ဝိညာဏဟန်ချက်ပြန်လည်ရရှိရန် အကူအညီပေးခံခဲ့ရသည်။ အခြားတစ်ဖက်တွင် ယောယကိမ်မင်းလက်ထက်၌ ရှေမာယ၏သား ဥရိယသည် ကြောက်ရွံ့လွန်းအားကြီးသဖြင့် ယေဟောဝါ၏ပရောဖက်တာဝန်ကို စွန့်လွှတ်ပြီး နေရင်းပြည်မှထွက်ပြေးခဲ့သော်လည်း အဖမ်းခံရပြီး အသတ်ခံခဲ့ရသည်။—ယေရမိ ၂၆:၂၀-၂၃။

၁၂။ (က) လူကိုကြောက်ရွံ့ခြင်းမှ မည်သည့်အကာအကွယ်ကို နယပုံပြင် ၂၉:၂၅ က ညွှန်ပြသနည်း။ (ခ) ဘုရားသခင်အားယုံကြည်ကိုးစားခြင်းသည် မည်သို့တိုးတက်ဖြစ်ပေါ်သနည်း။

^၁၂ လူကိုကြောက်ရွံ့ခြင်းကို အနိုင်ရရန် လူတစ်ဦးအား မည်သည့်အရာက အကူအညီပေးနိုင်သနည်း။ နယပုံပြင်ကျမ်း ၂၉:၂၅ က “လူကိုကြောက်ရွံ့ခြင်းသဘောသည် ကျော့ကွင်းကိုထောင်တတ်၏” ဟု သတိပေးပြီးနောက် ဤသို့ဆက်၍ပြောသည်– “ထာဝရဘုရားကို ခိုလှုံသောသူမူကား လုံခြုံလိမ့်မည်။” ယေဟောဝါအားယုံကြည်ကိုးစားခြင်းသည် သော့ချက်ဖြစ်သည်။ ထိုယုံကြည်ကိုးစားမှုသည် အသိပညာနှင့် အတွေ့အကြုံအပေါ်တွင် အခြေပြုသည်။ ယေဟောဝါ၏နှုတ်ကပါဌ်တော်ကို လေ့လာခြင်းအားဖြင့် ကိုယ်တော့်နည်းလမ်းတော်များ၏ ဖြောင့်မတ်မှန်ကန်ကြောင်းအထောက်အထားကို ကျွန်ုပ်တို့သိရှိရသည်။ ကိုယ်တော်ကိုအားထားမှီခိုနိုင်ခြင်း၊ (ရှင်ပြန်ထမြောက်ခြင်းပါဝင်သည့်) ကတိတော်များ၏ သေချာခြင်း၊ ကိုယ်တော့်မေတ္တာတော်နှင့် အနန္တတန်ခိုးတော်တို့ကို သရုပ်သကန်ပေါ်စေသည့် အဖြစ်အပျက်များနှင့် ကျွန်ုပ်တို့အကျွမ်းတဝင်ဖြစ်လာသည်။ ထို့နောက်ကျွန်ုပ်တို့သည် ထိုအသိပညာနှင့်အညီကျင့်ကြံပြီး ကျွန်ုပ်တို့အား ယေဟောဝါညွှန်ကြားသည့်အရာများကို လုပ်ဆောင်ကာ၊ ကိုယ်တော်သတိပေးသည့်အရာများကို အခိုင်အမာငြင်းဆန်သောအခါ ကိုယ်တော်၏ မေတ္တာပါစောင့်ရှောက်မှုနှင့် အားထားမှီခိုနိုင်ခြင်းတို့ကို ကျွန်ုပ်တို့သည်စ၍တိုက်ရိုက်ခံစားလာရသည်။ ကိုယ်တော့်တန်ခိုးတော်သည် ကိုယ်တော့်အလိုတော်ပြီးမြောက်ရန် လုပ်ဆောင်သည့်သာဓကကို ကျွန်ုပ်တို့ကိုယ်တိုင် တွေ့မြင်ရသည်။ ကိုယ်တော်အား ကျွန်ုပ်တို့၏ယုံကြည်စိတ်ချမှုသည် တိုးပွားလာပြီး ယင်းအားဖြင့် ကိုယ်တော်ကိုချစ်သည့်မေတ္တာနှင့် ကိုယ်တော်မနှစ်သက်ရာကိုလုပ်ရန် ငြင်းဆန်လိုသော အားကြီးသည့်ဆန္ဒများလည်း တိုးပွားလာသည်။ ထိုသို့သော ယုံကြည်ကိုးစားမှုသည် ခိုင်မြဲသည့်အခြေအမြစ်ပေါ်တွင် တည်ဆောက်ထားသည်။ ယင်းသည် လူကိုကြောက်ရွံ့ခြင်းကို ဟန့်တားပေးသည့်အရာသဖွယ် လုပ်ဆောင်သည်။

၁၃။ ကျွန်ုပ်တို့၏ အလုပ်၊ အိမ်၊ ကျောင်းတို့တွင် ဘုရားရေးရာကြောက်ရွံ့ခြင်းက ကျွန်ုပ်တို့အား မည်သို့အကူအညီပေးသနည်း။

^၁၃ ကျွန်ုပ်တို့သည် စီးပွားရေးဆိုင်ရာ မရိုးသားသည့်လုပ်ရပ်များတွင် ပါဝင်ခြင်းကို ငြင်းဆန်သောကြောင့် ကျွန်ုပ်တို့၏အလုပ်ရှင်က အလုပ်ဖြုတ်မည်ဟု ခြိမ်းခြောက်လျှင် ဘုရားရေးရာကြောက်ရွံ့ခြင်းနှင့် ဒွန်တွဲသော ယေဟောဝါအား ယုံကြည်ကိုးစားခြင်းက အမှန်တရားဘက်ရပ်တည်ရန် ကျွန်ုပ်တို့အား ခိုင်မြဲစေမည်။ (မိက္ခာ ၆:၁၁၊ ၁၂ နှိုင်းယှဉ်။) ခရစ်ယာန်ထောင်ပေါင်းများစွာတို့သည် မယုံကြည်သူမိသားစုများ၏ ဆန့်ကျင်မှုကြားမှ စစ်မှန်သောဝတ်ပြုရေးတွင် မြဲမြံနေရန် ယင်းသို့သော ဘုရားရေးရာကြောက်ရွံ့ခြင်းက ကူညီပေးသည်။ ကျောင်းတက်နေကြသော လူငယ်များအားလည်း မိမိတို့ကိုယ်ကို ယေဟောဝါသက်သေများအဖြစ် ဖော်ပြရဲသည့်သတ္တိကိုပေးပြီး ကျမ်းစာစံနှုန်းများကို မလေးမခန့်ပြုသည့် သူတို့အတန်းဖော်များ၏ လှောင်ပြောင်မှုကို သူတို့ရင်ဆိုင်နိုင်သောခွန်အားပေးသည်။ သို့ဖြင့် ဆယ်ကျော်သက်အရွယ် သက်သေခံတစ်ဦး ဤသို့ပြောသည်– “သူတို့ဘာပဲထင်ထင် အကြောင်းမဟုတ်ပါဘူး။ ယေဟောဝါဘယ်လိုထင်တယ် ဆိုတာကသာ အရေးကြီးတာပါ။”

၁၄။ ယေဟောဝါ၏ကျေးကျွန်များသည် အသက်အန္တရာယ်ကြုံရသည်အထိဖြစ်စေကာမူ မည်သို့အောင်ပွဲဆင်နိုင်သနည်း။

^၁၄ အသက်အန္တရာယ်ရင်ဆိုင်ရသောအခါ၌ပင် ယေဟောဝါ၏နည်းလမ်းတော်များကို ခိုင်ခိုင်မြဲမြဲကိုင်စွဲရန် အလားတူလက်ခံယုံကြည်ချက်က ခရစ်ယာန်စစ်များကို အားရှိစေသည်။ လောက၏ နှိပ်စက်ညှဉ်းဆဲခြင်းကို မျှော်လင့်ထားရမည်ဖြစ်ကြောင်း သူတို့သိကြသည်။ တမန်တော်များသည် ကြိမ်ဒဏ်ခံရပြီး ယေရှုခရစ်ကိုယ်တော်တိုင်ပင် ဆိုးညစ်သူများ၏ ရိုက်နှက်ခြင်းနှင့် သတ်ဖြတ်ခြင်းကို ခံခဲ့ရကြောင်း သူတို့သဘောပေါက်ကြသည်။ (မာကု ၁၄:၆၅; ၁၅:၁၅-၃၉; တမန်တော် ၅:၄၀; ဒံယေလ ၃:၁၆-၁၈ နှိုင်းယှဉ်။) သို့သော် ယေဟောဝါသည် မိမိတို့ခံရပ်နိုင်ရန် ခွန်အားပေးနိုင်ကြောင်း; ဘုရားသခင်၏အကူအညီအားဖြင့် မိမိတို့အောင်ပွဲခံနိုင်ကြောင်း; ယေဟောဝါသည် သစ္စာရှိသူများကို—လိုအပ်ပါက မိမိ၏ကမ္ဘာသစ်တွင် ရှင်ပြန်ထမြောက်ခြင်းအားဖြင့် ဧကန်မုချဆုချတော်မူမည်အကြောင်းတို့ကို ကိုယ်တော့်ကျေးကျွန်များ အပြည့်အဝယုံကြည်စိတ်ချကြသည်။ သူတို့၏ ဘုရားရေးရာကြောက်ရွံ့ခြင်းနှင့် ဒွန်တွဲသော ဘုရားသခင်ကိုချစ်ခြင်းက ကိုယ်တော့်စိတ်တော်ငြိုငြင်စရာ မည်သည့်အရာကိုမဆို ရှောင်ရှားရန် သူတို့ကို အားကြီးစွာလှုံ့ဆော်ပေးသည်။

၁၅။ နာဇီချွေးတပ်စခန်းများတွင် ယေဟောဝါသက်သေများအား မည်သည့်အရာက သမာဓိစောင့်သိစေနိုင်ခဲ့သနည်း။

^၁၅ ထိုလှုံ့ဆော်မှုက ယေဟောဝါသက်သေများအား ၁၉၃၀ နှင့် ၁၉၄၀ ပြည့်လွန်နှစ်များအတွင်း နာဇီချွေးတပ်စခန်းများ၏ ထိတ်လန့်ကြောက်ရွံ့ဖွယ်ရာများကို ကြံ့ကြံ့ခံရင်ဆိုင်နိုင်စွမ်းပေးခဲ့သည်။ သူတို့သည် လုကာ ၁၂:၄၊ ၅ တွင်ပါသော ယေရှု၏သြဝါဒကို နှလုံးသွင်းထားကြသည်– “ငါ့အဆွေတို့၊ သင်တို့အားငါဆိုသည်ကား ကိုယ်ခန္ဓာကိုသတ်၍ နောက်တစ်ဖန် အလျှင်းမပြုနိုင်သောသူတို့ကို မကြောက်ကြနှင့်။ အဘယ်သူကိုကြောက်ရမည်နည်းဟူမူကား ကိုယ်ခန္ဓာကိုသတ်ပြီးမှ ငရဲ [ဂေဟင်နာ၊ ကဘ] ထဲသို့ချနိုင်သောသူကို ကြောက်ကြလော့။ ငါအမှန်ဆိုသည်ကား၊ ထိုသူကိုကြောက်ကြလော့။” ထို့ကြောင့် ဇပ်က်စန်ဟေအိုဇန်အကျဉ်းစခန်းတွင် ရောက်ခဲ့သော ဂူစတပ်ဗ်အယ်ဝူရှနဲရ်အမည်ရှိ သက်သေခံတစ်ဦးက နောက်ပိုင်းတွင် ဤသို့စာရေးသည်– ‘အက်စ်အက်စ်တွေက ဩဂတ်စ်ဒစ်က်မန်ကို ပစ်သတ်လိုက်ပြီး ကျန်တဲ့ကျွန်တော်တို့တစ်တွေကိုလည်း ကိုယ့်ယုံကြည်ချက်ကို စွန့်လွှတ်ကြောင်းဖော်ပြတဲ့ စာရွက်စာတမ်းကို လက်မှတ်မထိုးရင် ပစ်သတ်ဖို့ခြိမ်းခြောက်တယ်။ ကျွန်တော်တို့တစ်ယောက်မှ လက်မှတ်မထိုးကြဘူး။ သူတို့ရဲ့ကျည်ဆံတွေကိုထက် ယေဟောဝါကို ကျွန်တော်တို့ပိုကြောက်တယ်။’ လူကိုကြောက်ရွံ့ခြင်းသည် အလျော့ပေးရန်ဖြစ်စေပြီး ဘုရားသခင်ကိုကြောက်ရွံ့ခြင်းက လူတစ်ဦးကို အမှန်တရားဘက်ရပ်တည်ရန် ခိုင်မြဲစေသည်။

အသက်ကိုထိန်းသိမ်းကာကွယ်ခြင်း

၁၆။ ရေလွှမ်းမိုးခြင်းရောက်သည့်အထိ ဆယ်စုနှစ်တစ်ခုပြီးတစ်ခု နောဧအား မှန်သောလမ်းစဉ်အတိုင်း ဆက်လက်လျှောက်လှမ်းစေနိုင်သည့်အရာကား အဘယ်နည်း။ သူနှင့် သူ့အိမ်သူအိမ်သားများအတွက် မည်သည့်အကျိုးရရှိခဲ့သနည်း။

^၁၆ နောဧသည် ရေလွှမ်းမိုးခြင်းမတိုင်မီကာလ၏ နောက်ဆုံးနေ့ရက်များတစ်လျှောက် အသက်ရှင်ခဲ့သူဖြစ်သည်။ လူတို့၏ဆိုးသွမ်းမှုကြောင့် ယေဟောဝါသည် ထိုအချိန်က ဆိုးညစ်သည့်လောကကို ဖျက်ဆီးပစ်ရန် ဆုံးဖြတ်တော်မူခဲ့သည်။ သို့သော် တစ်ချိန်တည်းတွင် အကြမ်းဖက်မှု၊ ကြီးစွာသောစာရိတ္တယိုယွင်းမှုနှင့် ဘုရားသခင့်အလိုတော်ကို ဥပေက္ခာပြုခြင်းတို့ဖြင့် ပြည့်နှက်နေသော ထိုလောကတွင် နောဧရှိနေခဲ့သည်။ ဖြောင့်မတ်ခြင်းတရားကို နောဧဟောပြောနေသည့်ကြားမှ “ရေလွှမ်းမိုးခြင်းရောက်သဖြင့် လူခပ်သိမ်းတို့ကို သုတ်သင်ပယ်ရှင်းသည်တိုင်အောင် သတိမဲ့နေကြသည်။” (မဿဲ ၂၄:၃၉) သို့သော် နောဧသည် ဘုရားသခင်ချမှတ်ပေးသည့်အလုပ်ကို လုပ်ဆောင်ခြင်းမှ ဟန့်တားမခံခဲ့ရပေ။ သူသည် ဘုရားသခင် “မှာထားတော်မူသည်အတိုင်း . . . ပြုလေ၏” (ကမ္ဘာဦး ၆:၂၂) ရေလွှမ်းမိုးခြင်းဘေးရောက်သည့်အထိ တစ်နှစ်ပြီးတစ်နှစ် အခြေမပျက်ဆက်နေနိုင်အောင် နောဧအား မည်သည့်အရာကဖြစ်စေခဲ့သနည်း။ ဟေဗြဲ ၁၁:၇ ကအဖြေပေးသည်– “နောဧသည် မမြင်သေးသောအမှုအရာကို ဖော်ပြသော ဗျာဒိတ်တော်ကို ခံရပြီးမှ ယုံကြည်ခြင်းအားဖြင့် ကြောက်ရွံ့သောစိတ်ရှိ၍ မိမိအိမ်သူအိမ်သားတို့ကို ကယ်တင်ခြင်းငှာ သင်္ဘောကိုတည်လေ၏။” ရလဒ်အနေဖြင့် သူနှင့်သူ၏ဇနီး၊ သူ့သားများနှင့် သူ့ချွေးမများသည် ရေလွှမ်းမိုးခြင်းကာလတစ်လျှောက် ဆက်လက်အသက်ရှင်ခွင့်ရခဲ့သည်။

၁၇။ (က) အခြားသူများ မည်သည့်အရာကိုလုပ်နေပါစေ၊ မည်သည့်အရာကို ကျွန်ုပ်တို့လုပ်သင့်သနည်း။ (ခ) ယေဟောဝါအားကြောက်ရွံ့သောသူများသည် အဘယ်ကြောင့် အမှန်ဝမ်းမြောက်သောသူများဖြစ်ကြသနည်း။

^၁၇ နောဧအချိန်နှင့် အခြေအနေများစွာတူသောအချိန်တွင် ကျွန်ုပ်တို့အသက်ရှင်နေကြရသည်။ (လုကာ ၁၇:၂၆၊ ၂၇) ယခုလည်း သတိပေးချက်ကို ကြားရပြန်သည်။ ဗျာဒိတ် ၁၄:၆၊ ၇ က ကောင်းကင်တမန်တစ်ပါးသည် ကောင်းကင်တွင်ပျံဝဲလျက် လူမျိုးအားလုံးရှိလူများအား “ဘုရားသခင်ကိုကြောက်ရွံ့၍ ချီးမွမ်းကြ” ရန် တိုက်တွန်းကြောင်း ဆိုထားသည်။ သင့်ဝန်းကျင်ရှိလောကသည် မည်သည့်အရာကိုပြုနေပါစေ ထိုစကားများကိုလိုက်နာပြီး အခြားသူများအားလည်း ယင်းသို့ပြုရန်ဖိတ်ခေါ်ပါလေ။ နောဧနည်းတူ ယုံကြည်ခြင်းဖြင့်လုပ်ဆောင်ပြီး ဘုရားရေးရာကြောက်ရွံ့ခြင်းကို တင်ပြပါလေ။ သင်ထိုသို့ပြုခြင်းအားဖြင့် သင်နှင့် အခြားသူများ၏အသက်ကို ထိန်းသိမ်းကာကွယ်နိုင်သည်။ မှန်သောဘုရားသခင်ကို ကြောက်ရွံ့သောသူများ မွေ့လျော်သည့် အကျိုးကျေးဇူးများအကြောင်း ကျွန်ုပ်တို့ဆင်ခြင်သုံးသပ်လိုက်သောအခါ ဤသို့သီဆိုသော မှုတ်သွင်းခံဆာလံဆရာနှင့် သဘောတူညီကြမည်သာဖြစ်သည်– “ထာဝရဘုရားကို ကြောက်ရွံ့၍ ပညတ်တော်တို့၌ အလွန်မွေ့လျော်သောသူသည် မင်္ဂလာ [ဝမ်းမြောက်လျက်၊ ကဘ] ရှိ၏။”—ဆာလံ ၁၁၂:၁။

သင်မည်သို့ဖြေဆိုမည်နည်း

◻ မှန်သောဘုရားသခင်ကို ကြောက်ရွံ့ခြင်း၏ ထင်ရှားသော အကျိုးကျေးဇူးအချို့ကား အဘယ်နည်း။

◻ ဘုရားရေးရာကြောက်ရွံ့ခြင်းတွင် အခြေစိုက်သော ဉာဏ်ပညာက ကျွန်ုပ်တို့အား မည်သို့အကာအကွယ်ပေးနိုင်သနည်း။

◻ ဘုရားရေးရာကြောက်ရွံ့ခြင်းက အဘယ်ကြောင့် ကျွန်ုပ်တို့အား မကောင်းမှုကိုရှောင်ရှားစေသနည်း။

◻ ဘုရားရေးရာကြောက်ရွံ့ခြင်းသည် လူကိုကြောက်ရွံ့ခြင်းမှ ကျွန်ုပ်တို့အား မည်သို့ကာကွယ်သနည်း။

◻ ဘုရားရေးရာကြောက်ရွံ့ခြင်းက ကျွန်ုပ်တို့၏အနာဂတ်အသက်တာအလားအလာအပေါ် မည်သည့်အကျိုးသက်ရောက်မှုရှိသနည်း။

[စာမျက်နှာ ၁၆၊ ၁၇ ပါ ရုပ်ပုံ]

“ထာဝရဘုရားကို ကြောက်ရွံ့၍ ပညတ်တော်တို့ကို အလွန်မွေ့လျော်သောသူသည် မင်္ဂလာ [ဝမ်းမြောက်လျက်၊ ကဘ] ရှိ၏။”—ဆာလံ ၁၁၂:၁