သစ္စာရှိသောဘဏ္ဍာစိုးများအနေနှင့် နယ်လှည့်ကြီးကြပ်မှူးများ အမှုဆောင်ကြပုံ

“သင်တို့သည် ဆုကျေးဇူးတော်ကို အသီးအသီးခံရကြသည်နှင့်အညီ၊ ဘုရားသခင်၏အထူးထူးအပြားပြားသောကျေးဇူးတော် ဘဏ္ဍာစိုးကောင်းကဲ့သို့၊ အချင်းချင်းဝေငှပေးကမ်းကြလော့။”—၁ ပေတရု ၄:၁၀။

၁၊ ၂။ (က) “ဘဏ္ဍာစိုး” ဟူသောစကားလုံးကို သင်မည်သို့အနက်ဖွင့်မည်နည်း။ (ခ) ဘုရားသခင်အသုံးပြုတော်မူသည့် ဘဏ္ဍာစိုးများထဲတွင် မည်သူများပါဝင်သနည်း။

ယဟောဝါရှင်သည် သစ္စာရှိသောခရစ်ယာန်အားလုံးကို ဘဏ္ဍာစိုးများအဖြစ် အသုံးပြုတော်မူသည်။ ဘဏ္ဍာစိုးတစ်ယောက်မည်သည် အိမ်ထောင်စု၏ တာဝန်ခံအမှုထမ်းဖြစ်လေ့ရှိသည်။ သူသည် မိမိသခင်၏လုပ်ငန်းကိုင်ငန်းကိစ္စများကိုလည်း စီမံခန့်ခွဲပေးရဖွယ်ရှိသည်။ (လုကာ ၁၆:၁-၃; ဂလာတိ ၄:၁၊ ၂) ယေရှုက သစ္စာတည်ကြည်သော ကမ္ဘာပေါ်ရှိ မိမိ၏ဘိသိက်ခံအဖွဲ့ကို ‘သစ္စာရှိသောဘဏ္ဍာစိုး’ ဟုခေါ်ထားတော်မူသည်။ ကိုယ်တော်သည် ထိုဘဏ္ဍာစိုးကို ဘုရားသခင့်နိုင်ငံတော် ကြေညာခြင်းလုပ်ငန်းများအပါအဝင် ‘မိမိပိုင်ထိုက်သမျှအပေါ်တွင်’ တာဝန်ပေးတော်မူခဲ့သည်။—လုကာ ၁၂:၄၂-၄၄၊ သမ; မဿဲ ၂၄:၁၄၊ ၄၅။

^၂ ခရစ်ယာန်အားလုံးသည် နည်းလမ်းအသွယ်သွယ်ဖြင့် ဖော်ပြတော်မူသော ဘုရားသခင့်မခံစားထိုက်သောကြင်နာမှု၏ဘဏ္ဍာစိုးများ ဖြစ်ကြသည်ဟု တမန်တော်ပေတရု ဆိုခဲ့သည်။ ခရစ်ယာန်ယောက်တိုင်းတွင် သစ္စာရှိသောဘဏ္ဍာစိုးအရာကို သယ်ပိုးထမ်းရွက်နိုင်သည့် အဆင့်ရှိသည်။ (၁ ပေတရု ၄:၁၀) ခန့်အပ်ခံခရစ်ယာန်အကြီးအကဲများသည် ဘဏ္ဍာစိုးများဖြစ်ကြပြီး သူတို့ထဲတွင် နယ်လှည့်ကြီးကြပ်မှူးများ ပါဝင်သည်။ (တိတု ၁:၇) ထိုနယ်လှည့်အကြီးအကဲများသည် မည်သို့ရှုမြင်ခံရဖို့ဖြစ်သနည်း။ မည်သည့်အရည်အသွေးများနှင့် ရည်မှန်းချက်များ သူတို့တွင်ရှိသင့်သနည်း။ သူတို့သည် အကျိုးအရှိဆုံးဖြစ်ရန် မည်သို့လုပ်ဆောင်နိုင်သနည်း။

သူတို့၏လုပ်ဆောင်မှုအတွက် ကျေးဇူးတင်

၃။ နယ်လှည့်ကြီးကြပ်မှူးတို့ကို “ဘဏ္ဍာစိုးကောင်း” ဟုအဘယ်ကြောင့် ခေါ်နိုင်သနည်း။

^၃ နယ်လှည့်ကြီးကြပ်မှူးနှင့် သူ့ဇနီးဖြစ်သူတို့ထံ ရေးသားရာတွင် ခရစ်ယာန်မောင်နှံတစ်စုံက “အသင်တို့ ကျွန်ုပ်တို့အတွက်ပေးခဲ့တဲ့ အချိန်၊ ထားခဲ့တဲ့မေတ္တာတရားတို့အတွက် ကျေးဇူးတင်ကြောင်း ဖော်ပြလိုပါတယ်။ မိသားစုတစ်စုအနေနဲ့ ကျွန်ုပ်တို့ဟာ သင်တို့ရဲ့ အားပေးမှုနဲ့ အကြံဉာဏ်အားလုံးကနေ အကျိုးများစွာရလိုက်ပါတယ်။ ကျွန်ုပ်တို့ဟာ ဝိညာဉ်ရေးမှာ ဆက်ပြီးတိုးတက်လာရမယ်ဆိုတာ သိပါတယ်၊ ဒါပေမဲ့ ယေဟောဝါရဲ့ထောက်မမှုနဲ့ သင်တို့ကဲ့သို့သော ညီအစ်ကိုညီအစ်မတွေကြောင့် တိုးပွားလာတဲ့နာကျင်မှုတွေကို သက်သာစေပါတယ်” ဟုဆိုခဲ့ကြသည်။ နယ်လှည့်ကြီးကြပ်မှူးတို့သည် အိမ်ထောင်၏လိုအပ်ရာများအတွက် ကောင်းစွာဂရုစိုက်သော ဘဏ္ဍာစိုးကောင်းကဲ့သို့ ယုံကြည်သူချင်းတို့ကို တစ်ဦးချင်းဂရုစိုက်ကြသောကြောင့် ဤကဲ့သို့သော ထုတ်ဖော်ပြောဆိုမှုမျိုးမှာ အကြိမ်ကြိမ်ရှိသည်။ အချို့မှာ ထူးချွန်ပြောင်မြောက်သောဟောပြောချက်ပေးသူများဖြစ်သည်။ အခြားသူများမှာ လှိုက်လှဲမှုနှင့် အကြင်နာတရားရှိမှုတို့ကြောင့် နာမည်သတင်းမွှေးနေစဉ် များစွာသောသူများမူ ဟောပြောခြင်းလုပ်ငန်း၌ အလွန်တော်ကြသည်။ အခြားသူများအတွက် အကျိုးဆောင်ပေးရာတွင် အဆိုပါဆုကျေးဇူးများကို ပြုစုပျိုးထောင်ကာ အသုံးပြုခြင်းကြောင့် နယ်လှည့်ကြီးကြပ်မှူးတို့ကို “ဘဏ္ဍာစိုးကောင်း” များဟု ထိုက်ထိုက်တန်တန်ခေါ်ဆိုနိုင်ပါသည်။

၄။ မည်သည့်မေးခွန်းများကို ယခုသုံးသပ်ကြမည်နည်း။

^၄ “ဘဏ္ဍာစိုးမည်သည်ကား သစ္စာရှိရမည်” ဟုတမန်တော်ပေါလု ရေးသားခဲ့သည်။ (၁ ကောရိန္သု ၄:၂) တစ်ပတ်ပြီးတစ်ပတ် အသင်းတော်တစ်ခုပြီးတစ်ခုတွင် ခရစ်ယာန်ချင်းတို့အတွက် အကျိုးဆောင်ပေးရခြင်းသည် ထူးခြားသော ရွှင်လန်းဖွယ်အခွင့်ထူးဖြစ်သည်။ သို့သော် ယင်းသည် ကြီးလေးသောတာဝန်လည်းဖြစ်ပြန်သည်။ သို့ဆိုလျှင် နယ်လှည့်ကြီးကြပ်မှူးတို့သည် မိမိတို့၏ဘဏ္ဍာစိုးအရာကို သစ္စာရှိရှိနှင့် အောင်အောင်မြင်မြင်ဖြင့် မည်သို့သယ်ပိုးထမ်းဆောင်နိုင်မည်နည်း။

မိမိတို့၏ဘဏ္ဍာစိုးအရာကို အောင်အောင်မြင်မြင်ဖြင့် သယ်ပိုးထမ်းဆောင်ခြင်း

၅၊ ၆။ နယ်လှည့်ကြီးကြပ်မှူးတစ်ဦးအသက်တာတွင် ယေဟောဝါရှင်ကို စိတ်အားထက်သန်စွာ မှီခိုအားထားခြင်းသည် အဘယ်ကြောင့် အလွန်အရေးကြီးသနည်း။

^၅ နယ်လှည့်ကြီးကြပ်မှူးတို့သည် အောင်မြင်သောဘဏ္ဍာစိုးဖြစ်ဖို့ဆိုလျှင် ယေဟောဝါရှင်ကို စိတ်အားထက်သန်စွာ မှီခိုအားထားခြင်းသည် မရှိမဖြစ်လိုအပ်သည်။ သူတို့၏ဇယားနှင့် တာဝန်များစွာကြောင့် ဝန်ပိနေသည်ဟု တစ်ခါတစ်ရံ ခံစားရနိုင်သည်။ (၂ ကောရိန္သု ၅:၄ နှိုင်းယှဉ်။) ထို့ကြောင့်သူတို့သည် “ထမ်းရွက်ရသောဝန်ကို ထာဝရဘုရား၌ ချထားလော့။ သင့်ကိုမစတော်မူမည်။ ဖြောင့်မတ်သောသူကို အစဉ်အမြဲလှုပ်ရှားစေတော်မမူရာ” ဟူသည့် ဆာလံဆရာဒါဝိဒ်၏သီချင်းနှင့်အညီ ပြုမူဖို့လိုပါသည်။ (ဆာလံ ၅၅:၂၂) “ငါတို့ဝန်ကို နေ့စဉ်ထမ်းတော်မူသော အရှင်ဘုရား၊ ငါတို့ကို ကယ်တင်ပိုင်ရှင်ဘုရားသခင်သည် မင်္ဂလာရှိတော်မူပါစေသော” ဟူသည့် ဒါဝိဒ်၏စကားများကလည်း နှစ်သိမ့်မှုရရှိစေသည်။—ဆာလံ ၆၈:၁၉၊ သမ။

^၆ ပေါလုသည် မိမိ၏ဝိညာဏတာဝန်များကို အလေးထားလုပ်ဆောင်နိုင်ရန် ခွန်အားကို အဘယ်မှရခဲ့သနည်း။ “ငါ့ကိုခွန်အားနှင့်ပြည့်စုံစေတော်မူသော အရှင်အားဖြင့်၊ ခပ်သိမ်းသောအမှုကို ငါတတ်စွမ်းနိုင်၏” ဟုသူရေးခဲ့သည်။ (ဖိလိပ္ပိ ၄:၁၃၊ သမ္မာ) မှန်ပါသည်၊ ယေဟောဝါဘုရားသခင်သည် ပေါလု၏ခွန်အား အရင်းအမြစ်ဖြစ်သည်။ အလားတူစွာ ပေတရုက “သူတစ်ပါး၏အစေအပါးကို ခံသောသူသည် ထာဝရဘုရားပေးတော်မူသော စွမ်းအားကိုအမှီပြု၍ လုပ်ဆောင်ရာ၏၊ သို့မှသာ ပြုလေသမျှသောအမှုတို့တွင် သခင်ယေရှုခရစ်အားဖြင့် ထာဝရဘုရား၏ ဘုန်းအသရေ ထွန်းလင်းလိမ့်မည်” ဟုအကြံပြုခဲ့သည်။ (၁ ပေတရု ၄:၁၁၊ သတင်းကောင်း) နှစ်များစွာ နယ်လှည့်ကြီးကြပ်မှူးတာဝန်ထမ်းဆောင်ခဲ့သည့် ညီအစ်ကိုတစ်ဦးက ဘုရားသခင်ကို အားကိုးအားထားပြုဖို့လိုအပ်ချက်ကို အလေးအနက်ထားကာ “ပြဿနာတွေကို ကိုင်တွယ်မယ်ဆိုရင် ယေဟောဝါကို အမြဲမျှော်ကိုးပါ၊ ကိုယ်တော့်အဖွဲ့အစည်းရဲ့ အထောက်အကူကို ရှာယူပါ” ဟု ဖော်ပြသည်။

၇။ နယ်လှည့်ကြီးကြပ်မှူး၏အလုပ်တွင် မျှတမှုသည် မည်သို့တစ်ကဏ္ဍပါဝင်သနည်း။

^၇ အောင်မြင်သောနယ်လှည့်ကြီးကြပ်မှူးတစ်ဦးသည် မျှတမှုရှိဖို့လိုအပ်သည်။ အခြားခရစ်ယာန်များကဲ့သို့ပင် သူသည် “သာ၍အရေးကြီးသောအရာတို့ကို သေချာစေ” ရန် ကြိုးစားသွားသည်။ (ဖိလိပ္ပိ ၁:၁၀၊ ကဘ)a ဒေသခံအကြီးအကဲများတွင် ကိစ္စတစ်ခုနှင့်ပတ်သက်၍ မေးစရာများရှိသောအခါ ယင်းမေးခွန်းတို့ကို လည်ပတ်ရောက်ရှိလာသော တိုက်နယ်ကြီးကြပ်မှူးနှင့်အတူ ဆွေးနွေးခြင်းသည် ပညာရှိရာကျပါသည်။ (သု. ၁၁:၁၄; ၁၅:၂၂) သူ၏မျှတမှုရှိသော ရှုမြင်သုံးသပ်ချက်များနှင့် ကျမ်းစာသြဝါဒတို့သည် သူအသင်းတော်မှ ထွက်ခွာသွားပြီးနောက် အကြီးအကဲများက ထိုကိစ္စကို ဆက်၍ကိုင်တွယ်သောအခါ အလွန်အကူအညီဖြစ်ကြောင်း အထင်အရှားတွေ့ရလိမ့်မည်။ အဆိုပါသဘောတရားအတိုင်းပင် ပေါလုက တိမောသေကို “သက်သေခံအများရှိသည်နှင့် ငါ့ထံ၌ကြားရပြီးသောအရာတို့ကို သစ္စာနှင့်ပြည့်စုံ၍ သူတစ်ပါးတို့ကိုသွန်သင်ခြင်းငှာ တတ်စွမ်းနိုင်သောသူတို့၌ အပ်ပေးလော့” ဟုပြောခဲ့သည်။—၂ တိမောသေ ၂:၂။

၈။ ကျမ်းစာလေ့လာမှု၊ သုတေသနပြုမှုနှင့် စဉ်းစားဆင်ခြင်မှုတို့သည် အဘယ်ကြောင့်မရှိမဖြစ်လိုအပ်သနည်း။

^၈ ကျမ်းစာလေ့လာမှု၊ သုတေသနပြုမှု၊ စဉ်းစားဆင်ခြင်မှုတို့သည် ခြေမြစ်ခိုင်လုံသော ဩဝါဒပေးဖို့အတွက် မရှိမဖြစ်လိုအပ်သည်။ (သု. ၁၅:၂၈) ခရိုင်ကြီးကြပ်မှူးတစ်ဦးက “အကြီးအကဲများနှင့် ဆွေးနွေးသောအခါ မေးခွန်းတစ်ခု၏အဖြေကို ကျွန်ုပ်တို့မသိကြောင်း ဝန်ခံဖို့ မရှက်ကြောက်သင့်ပါ” ဟုပြောခဲ့သည်။ ကိစ္စတစ်ခုနှင့်ပတ်သက်၍ ‘ခရစ်တော်၏စိတ်သဘော’ ကိုနားလည်သဘောပေါက်ရန် အားသွန်ခွန်စိုက်ကြိုးစားခြင်းသည် ဘုရားသခင့်အလိုတော်ကိုလိုက်နာရန် အခြားသူများအား အကူအညီဖြစ်စေမည့် ကျမ်းစာအခြေပြုသြဝါဒကို ပေးရန် တတ်စွမ်းနိုင်စေသည်။ (၁ ကောရိန္သု ၂:၁၆) တစ်ခါတစ်ရံ နယ်လှည့်ကြီးကြပ်မှူးဖြစ်သူသည် လမ်းညွှန်ချက်အတွက် ကင်းမျှော်စင်အသင်းသို့ စာရေးရန်လိုအပ်သည်။ မည်သို့ပင်ဆိုစေ ယေဟောဝါရှင်ကိုယုံကြည်ခြင်းနှင့် အမှန်တရားကိုမြတ်နိုးခြင်းသည် သူတစ်ပါးကို စွဲမှတ်သွားစေခြင်း သို့မဟုတ် အဟောအပြောကောင်းခြင်းထက် များစွာသာ၍ အရေးကြီးပါသည်။ ပေါလုသည် “လွန်ကဲသော နှုတ်သတ္တိ၊ ဉာဏ်သတ္တိဖြင့်” လာခြင်းမဟုတ်ဘဲ “အားနည်းလျက်၊ ကြောက်ရွံ့လျက်၊ များစွာတုန်လှုပ်လျက်” ကောရိန္သုမြို့တွင် သူ၏ဓမ္မအမှုကို စတင်ခြင်းဖြစ်သည်။ ယင်းက သူ့ကို အစွမ်းအစမရှိဖြစ်သွားစေသလော။ ယင်းအစား ကောရိန္သုအသင်းတော်သားများသည် ‘လူ့ပညာ၌မဟုတ်၊ ဘုရားသခင်၏တန်ခိုးတော်၌’ ယုံကြည်ခြင်းရှိလာစေရန် ထောက်ကူပေးခဲ့သည်။—၁ ကောရိန္သု ၂:၁-၅၊ သမ။

အခြားအရေးကြီးသောအရည်အသွေးများ

၉။ နယ်လှည့်အကြီးအကဲတို့သည် စာနာမှုရှိဖို့ အဘယ်ကြောင့် လိုအပ်ပါသနည်း။

^၉ စာနာမှုသည် ရလဒ်ကောင်းများ ရရှိစေရန် နယ်လှည့်ကြီးကြပ်မှူးတို့ကို အကူအညီပေးသည်။ ပေတရုက ခရစ်ယာန်အားလုံး ‘ကိုယ်ချင်းစာနာစိတ်ကို တင်ပြ’ ကြရန် သို့မဟုတ် “စာနာတတ်” သူများဖြစ်ရန် တိုက်တွန်းထားသည်။ (၁ ပေတရု ၃:၈၊ ကဘ အောက်ခြေမှတ်ချက်) ‘အသင်းတော်တွင်ရှိသူမှန်သမျှကို စိတ်ဝင်စားရန်နှင့် အမှန်တကယ်အာရုံစိုက်ရန်’ လိုအပ်ကြောင်း တိုက်နယ်ကြီးကြပ်မှူးတစ်ဦး ယူဆထားသည်။ အလားတူစိတ်ထားဖြင့်ပင် ပေါလုက “ဝမ်းမြောက်သောသူတို့နှင့်အတူ ဝမ်းမြောက်ခြင်းကိုလည်းကောင်း၊ ငိုကြွေးသောသူတို့နှင့်အတူ ငိုကြွေးခြင်းကိုလည်းကောင်း ပြုကြလော့” ဟုရေးသားခဲ့သည်။ (ရောမ ၁၂:၁၅) ဤကဲ့သို့သောစိတ်ထားက ယုံကြည်သူချင်းတို့၏ ပြဿနာများနှင့် အခြေအနေများကို နားလည်ဖို့ အားကြိုးမာန်တက် ကြိုးစားရန် နယ်လှည့်ကြီးကြပ်မှူးတို့ကို လှုံ့ဆော်ပေးပါသည်။ သို့နှင့် သူတို့သည် လက်တွေ့ကျင့်သုံးပါက အမှန်ကောင်းကျိုးဖြစ်နိုင်သည့် တည်ဆောက်မှုပေးသော ကျမ်းစာသြဝါဒကို ပေးနိုင်ကြမည်။ အလွန်စာနာတတ်သည့် တိုက်နယ်ကြီးကြပ်မှူးတစ်ဦးသည် အီတလီနိုင်ငံ၊ တူရင်မြို့အနီးရှိအသင်းတော်တစ်ခုမှ ဤစာတစ်စောင်ကို လက်ခံရရှိခဲ့သည်– “သင်သည် စိတ်ဝင်စားမှုကို ခံလိုပါသလား၊ စိတ်ဝင်စားပေးပါ; နှစ်သက်ခံလိုပါသလား၊ နှစ်လိုဖွယ်ဖြစ်စေပါ; အချစ်ခံလိုပါသလား၊ ချစ်စရာဖြစ်စေပါ; အကူအညီရလိုပါသလား၊ ကူညီဖို့အသင့်ရှိပါ။ အဲ့ဒါဟာ ညီအစ်ကိုဆီက ကျွန်တော်တို့ရလိုက်တဲ့ သင်ခန်းစာပါပဲ။”

၁၀။ နှိမ့်ချမှုရှိခြင်းနှင့်ပတ်သက်ပြီး တိုက်နယ်နှင့်ခရိုင်ကြီးကြပ်မှူးများ မည်သို့ပြောခဲ့ကြသနည်း၊ ယင်းနှင့်စပ်လျဉ်း၍ မည်သည့်ပုံသက်သေကို ယေရှုပြသခဲ့သနည်း။

^၁၀ နှိမ့်ချမှုရှိခြင်းနှင့် ချဉ်းကပ်လွယ်ခြင်းတို့သည် ကောင်းမှုများစွာပြုဖို့ နယ်လှည့်ကြီးကြပ်မှူးတို့အား အထောက်အကူပြုသည်။ တိုက်နယ်ကြီးကြပ်မှူးတစ်ဦးက “နှိမ့်ချသည့်စိတ်ထားကို ထိန်းသိမ်းထားခြင်းသည် အရေးအကြီးဆုံးဖြစ်သည်” ဟုသတိပြုမိခဲ့သည်။ သူက နယ်လှည့်ကြီးကြပ်မှူးအသစ်တို့ကို “သာ၍ကြွယ်ဝချမ်းသာသည့် ညီအစ်ကိုများက သင်တို့အား ပေးနိုင်ကမ်းနိုင်သည့်အတွက် ၎င်းတို့၏သြဇာ အလွန်အကျွံအလွှမ်းမခံဖို့နှင့် ဤကဲ့သို့သောသူများနှင့်သာ မိတ်ဖွဲ့ပေါင်းသင်းဖို့ ကန့်သတ်မထားဘဲ အခြားသူများကိုလည်း မျက်နှာမလိုက်ဘဲဆက်ဆံရန် အမြဲကြိုးစားကြဖို့” သတိပေးသည်။ (၂ ရာဇဝင်ချုပ် ၁၉:၆၊ ၇) ထို့အပြင် အမှန်တကယ် နှိမ့်ချမှုရှိသော နယ်လှည့်ကြီးကြပ်မှူးတစ်ဦး၌ အဖွဲ့အစည်း၏ကိုယ်စားလှယ်တစ်ဦးအနေနှင့် မိမိသည် အလွန့်အလွန်အရေးပါသည်ဟူသည့် သဘောထား ရှိမည်မဟုတ်ပါ။ ခရိုင်ကြီးကြပ်မှူးတစ်ဦးက “နှိမ့်ချမှုရှိပြီး ညီအစ်ကိုများပြောသည်ကို နားထောင်ဖို့အသင့်ရှိပါ။ အချိန်အခါမရွေး ချဉ်းကပ်လွယ်သူဖြစ်ပါ” ဟုမှတ်ချက်ချခဲ့သည်။ အသက်ရှင်ခဲ့သမျှတွင် အကြီးမြတ်ဆုံးဖြစ်သော ယေရှုခရစ်အနေနှင့် လူများ စိတ်ကျဉ်းကျပ်သွားအောင်လုပ်နိုင်ခဲ့သော်လည်း ကိုယ်တော်သည် ကလေးသူငယ်များပင် ကိုယ်တော့်ရှေ့တော်တွင် သက်သောင့်သက်သာရှိကြသည့်အထိ အလွန်နှိမ့်ချသူ၊ ချဉ်းကပ်လွယ်သူဖြစ်သည်။ (မဿဲ ၁၈:၅; မာကု ၁၀:၁၃-၁၆) နယ်လှည့်ကြီးကြပ်မှူးတို့သည် ကလေးများ၊ ဆယ်ကျော်သက်များ၊ အကြီးအကဲများ—အမှန်ပင် အသင်းတွင်ရှိမည်သူမဆို—သူတို့ထံ လွတ်လွတ်လပ်လပ် ချဉ်းကပ်စေလိုကြသည်။

၁၁။ လိုအပ်သည့်အခါတွင် တောင်းပန်ခြင်းကြောင့် မည်သည့်အကျိုး ရရှိနိုင်သနည်း။

^၁၁ အမှန်မှာ “ငါတို့ရှိသမျှသည် အများသောအားဖြင့် မှားတတ်ကြ” ရာ အမှားကင်းသည့် နယ်လှည့်ကြီးကြပ်မှူး တစ်ယောက်မျှမရှိပါ။ (ယာကုပ် ၃:၂) သူတို့အမှားပြုမိသောအခါ စိတ်ရင်းမှန်ဖြင့်တောင်းပန်ခြင်းသည် အခြားအကြီးအကဲများအား နှိမ့်ချမှုပုံသက်သေ တင်ပြရာရောက်သည်။ နယပုံပြင်ကျမ်း ၂၂:၄ အရ “စိတ်နှိမ့်ချခြင်း၊ ထာဝရဘုရားကို [ခန့်ညား] ကြောက်ရွံ့ခြင်းကျေးဇူးကြောင့် စည်းစိမ်၊ ဂုဏ်အသရေ၊ အသက်ကိုရ၏။” ထို့အပြင် ဘုရားသခင့်ကျေးကျွန်အားလုံးသည် ‘မိမိတို့ဘုရားသခင်နှင့်အတူ လျှောက်လှမ်းရာတွင် နှိမ့်ချမှုရှိ’ ရန် မလိုပေလော။ (မိက္ခာ ၆:၈၊ ကဘ ၁၉၅၈ တည်းဖြတ်မှု) နယ်လှည့်အကြီးအကဲသစ်တစ်ဦးအတွက် မည်သည့်အကြံဉာဏ်ပေးလိုသနည်းဟု မေးသောအခါ တိုက်နယ်ကြီးကြပ်မှူးတစ်ဦးက “ညီအစ်ကိုအားလုံးကို အလွန်လေးစားကာ အလေးထားပြီး ကိုယ့်ထက်သာသောသူများအဖြစ် ယူမှတ်ပါ။ သင်သည် ညီအစ်ကိုများထံမှ သင်ခန်းစာများစွာရလာမည်။ နှိမ့်ချလျက်နေပါ။ သင့်ပင်ကိုအတိုင်းနေပါ။ လေလုံးမထွားပါနှင့်” ဟုမှတ်ချက်ပေးသည်။—ဖိလိပ္ပိ ၂:၃။

၁၂။ ခရစ်ယာန်ဓမ္မအမှုအတွက် ဇွဲရှိခြင်းသည် အဘယ်ကြောင့်ဤမျှ အရေးပါရပါသနည်း။

^၁၂ ခရစ်ယာန်ဓမ္မအမှုတွင် ဇွဲရှိခြင်းက နယ်လှည့်ကြီးကြပ်မှူးဖြစ်သူ၏စကားများကို သာ၍အလေးစီးစေသည်။ အမှန်မှာ သူနှင့်သူ၏ဇနီးတို့သည် ဧဝံဂေလိဟောပြောခြင်းလုပ်ငန်းတွင် ဇွဲရှိသောနမူနာများပြသကြလျှင် အကြီးအကဲများ၊ သူတို့ဇနီးတို့နှင့် အသင်းတော်ရှိ ကျန်သူများသည် မိမိတို့၏ဓမ္မအမှုတွင် ဇွဲတင်ပြရန် တိုက်တွန်းအားပေးခံရကြသည်။ “လုပ်ငန်းတော်အတွက် ဇွဲရှိပါ” ဟုတိုက်နယ်ကြီးကြပ်မှူးတစ်ဦး တိုက်တွန်းလိုက်သည်။ “ယေဘုယျအားဖြင့် အသင်းတော်တစ်ခုဟာ ဓမ္မအမှုမှာ ဇွဲပို၍ရှိလေလေ သူတို့ကြုံရတဲ့ပြဿနာ နည်းလေလေပဲဆိုတာ ကျွန်တော်တွေ့ရတယ်” ဟုသူဆက်၍ပြောခဲ့သည်။ နောက်တိုက်နယ်ကြီးကြပ်မှူးတစ်ဦးက “အကြီးအကဲများဟာ လယ်ကွင်းမှာ ညီအစ်ကိုညီအစ်မတွေနဲ့အတူ အမှုဆောင်ပြီး ဓမ္မအမှုမှာ ပျော်ရွှင်အောင် သူတို့ကိုထောက်မကူပံ့ပေးမယ်ဆိုရင် စိတ်ငြိမ်သက်မှုရပြီး ယေဟောဝါရဲ့အမှုတော်ဆောင်ခြင်းမှာ အကျေနပ်ကြီးကျေနပ်နေမယ်ဆိုတာ ကျွန်တော်ယုံကြည်တယ်” ဟုမှတ်ချက်ချသည်။ တမန်တော်ပေါလုသည် ‘ကြီးစွာသောတိုက်လှန်ခြင်းနှင့်တကွ ဘုရားသခင်၏ဧဝံဂေလိတရားကို သက်သာလောနိတ်အသင်းတော်သားများအား ရဲရင့်စွာဟောပြော’ ခဲ့သည်။ သူ၏လည်ပတ်မှုနှင့် ဟောပြောခြင်းလုပ်ငန်းတို့သည် သူတို့အတွက်အမှတ်တရဖြစ်သွားပြီး သူ့အား တစ်ဖန်ပြန်တွေ့လိုကြသည်မှာ အံ့ဩစရာမဟုတ်ပါ။—၁ သက်သာလောနိတ် ၂:၁၊ ၂; ၃:၆။

၁၃။ နယ်လှည့်ကြီးကြပ်မှူးတစ်ဦးသည် ခရစ်ယာန်ချင်းတို့နှင့် လယ်ကွင်းအမှုဆောင်သောအခါ မည်သည့်အရာများကို ထည့်သွင်းစဉ်းစားသနည်း။

^၁၃ နယ်လှည့်ကြီးကြပ်မှူးတစ်ဦးသည် ခရစ်ယာန်ချင်းတို့နှင့် လယ်ကွင်းဓမ္မအမှုဆောင်သောအခါ သူတို့၏အခြေအနေများနှင့် အကန့်အသတ်ဖြစ်မှုတို့ကို ထည့်သွင်းစဉ်းစားသည်။ သူ၏အကြံပြုချက်များသည် အထောက်အကူဖြစ်နိုင်သော်လည်း အချို့သောသူတို့သည် အတွေ့အကြုံများသော အကြီးအကဲတစ်ယောက်နှင့်အတူ ဟောပြောသောအခါ ရင်တထိတ်ထိတ်နှင့်စိုးရိမ်တတ်ကြကြောင်း သူသိထားသည်။ ထို့ကြောင့် အချို့ကိစ္စများတွင် သွန်သင်ချက်ပေးခြင်းထက် အားပေးခြင်းသည် သာ၍အကူအညီဖြစ်ဖွယ်ရှိသည်။ သူသည် ကြေညာသူများ သို့မဟုတ် ရှေ့ဆောင်များနှင့် ကျမ်းစာသင်အံမှုတစ်ခု လိုက်သွားသောအခါ သင်အံမှုကို သူ့အားကိုင်တွယ်ပေးစေလိုကြပေမည်။ သို့ဖြင့် မိမိတို့၏သွန်သင်နည်းစနစ်များတိုးတက်ရန် နည်းလမ်းအချို့ကို သူတို့သိရှိသွားနိုင်ဖွယ်ရှိသည်။

၁၄။ ဇွဲရှိသောနယ်လှည့်ကြီးကြပ်မှူးတို့သည် အခြားသူများအား ဇွဲရှိရန် လှုံ့ဆော်ပေးသည်ဟု အဘယ်ကြောင့်ဆိုနိုင်သနည်း။

^၁၄ ဇွဲရှိသောနယ်လှည့်ကြီးကြပ်မှူးတို့သည် အခြားသူများအား ဇွဲရှိရန်လှုံ့ဆော်ပေးသည်။ ယူဂန်ဒါရှိ တိုက်နယ်ကြီးကြပ်မှူးတစ်ဦးသည် မတိုးတက်ဘဲဖြစ်နေသော ကျမ်းစာသင်အံမှုတစ်ခုကို ညီအစ်ကိုနှင့်အတူသင်နိုင်ရန်အလို့ငှာ ထူထပ်သစ်တောကို တစ်နာရီကြာဖြတ်လျှောက်ရသည်။ သွားနေစဉ် မိုးက သဲကြီးမဲကြီးရွာချလိုက်ရာ သူတို့တစ်ကိုယ်လုံးစိုရွှဲကုန်ပါတော့သည်။ မိမိတို့၏ဧည့်သည်သည် နယ်လှည့်ကြီးကြပ်မှူးတစ်ဦးဖြစ်ကြောင်း အဆိုပါမိသားစုခြောက်ယောက် သိသွားကြသောအခါ သူတို့အလွန့်အလွန် အထင်ကြီးလေးစားသွားပါတော့သည်။ မိမိတို့၏ချာ့ချ်မှ ဓမ္မအမှုဆောင်များမူ သိုးတော်စုကို ဤမျှလောက်စိတ်ဝင်စားမှု ဘယ်သောအခါမျှပြမည်မဟုတ်ကြောင်း သူတို့သိထားကြသည်။ နောက်တနင်္ဂနွေနေ့တွင် သူတို့သည် ဦးဆုံးအကြိမ်အစည်းအဝေးတက်ကြပြီး ယေဟောဝါသက်သေများဖြစ်လိုသည့်သဘောထားကို ဖွင့်ဟကြတော့သည်။

၁၅။ မက္ကစီကိုနိုင်ငံရှိ ဇွဲရှိသောတိုက်နယ်ကြီးကြပ်မှူးတစ်ဦးသည် မည်သည့်တွေ့ကြုံမှုကောင်းကို တွေ့ကြုံခဲ့ရသနည်း။

^၁၅ မက္ကစီကိုနိုင်ငံ၊ ဝဟကပြည်နယ်ရှိ တိုက်နယ်ကြီးကြပ်မှူးတစ်ဦးသည် သူ့အား လုံးဝမျှော်လင့်မထားသည့် အားထုတ်မှုတစ်ခုကို ပြုခဲ့သည်။ သူသည် ဘုရားသခင့်နိုင်ငံတော်ကြေညာသူများဖြစ်သွားကြသည့် အကျဉ်းသားခုနစ်ဦးရှိ အုပ်စုတစ်စုထံ သွားရောက်လည်ပတ်နိုင်ဖို့ အကျဉ်းစခန်းထဲတွင် လေးညနေဖို့ စီစဉ်ခဲ့သည်။ သူသည် ရက်ပေါင်းများစွာ အဆိုပါအကျဉ်းသားတို့နှင့်အတူ အကျဉ်းခန်းတစ်ခုမှတစ်ခုသို့ သက်သေခံကာ ကျမ်းစာသင်အံမှုများ ပြုခဲ့သည်။ စိတ်ဝင်စားမှုတင်ပြသောကြောင့် ကျမ်းစာသင်အံမှုတချို့ကို ညဘက်အထိ ဆက်သင်ကြသည်။ “လည်ပတ်မှုအဆုံးမှာ အဆိုပါအကျဉ်းသားဖော်တို့နဲ့ ကျွန်တော်ဟာ အပြန်အလှန်အားပေးမှုကြောင့် ရွှင်လန်းမှုအပြည့်ရခဲ့ပါတယ်” ဟုဇွဲရှိသော အဆိုပါတိုက်နယ်ကြီးကြပ်မှူး ရေးသားလိုက်သည်။

၁၆။ နယ်လှည့်ကြီးကြပ်မှူးနှင့် သူတို့၏ဇနီးတို့သည် အားပေးတိုက်တွန်းသောအခါ အဘယ်ကြောင့်လွန်စွာအကျိုးရှိသနည်း။

^၁၆ နယ်လှည့်ကြီးကြပ်မှူးတို့သည် တိုက်တွန်းအားပေးရန် ကြိုးစားကြသည်။ ပေါလုသည် မာကေဒေါနိပြည်ရှိ အသင်းတော်များကို သွားရောက်လည်ပတ်သောအခါ ‘သူတို့အား စကားအများနှင့် တိုက်တွန်းနှိုးဆော်’ ခဲ့သည်။ (တမန်တော် ၂၀:၁၊ ၂၊ သမ္မာ) တိုက်တွန်းအားပေးသောစကားများသည် လူငယ်ကောလူကြီးပါ ဝိညာဏပန်းတိုင်များထားဖို့ လမ်းညွှန်ရာတွင် အလွန်အထောက်အကူပြုနိုင်သည်။ ကင်းမျှော်စင်အသင်း၏ ဌာနခွဲကြီးတစ်ခု၌ အလွတ်သဘောလေ့လာသုံးသပ်မှုတစ်ခုတွင် တိုက်နယ်ကြီးကြပ်မှူးတို့သည် စေတနာ့ဝန်ထမ်း ၂၀ ရာခိုင်နှုန်းနီးပါးကို အချိန်ပြည့်လုပ်ငန်းတွင်ပါဝင်ရန် တိုက်တွန်းအားပေးခဲ့ကြကြောင်း ဖော်ပြထားသည်။ နယ်လှည့်ကြီးကြပ်မှူး၏ဇနီးသည်လည်း အချိန်ပြည့်ဘုရားသခင့်နိုင်ငံတော် ကြွေးကြော်သူတစ်ယောက်အဖြစ် သူမ၏ပုံသက်သေကောင်းကြောင့် တိုက်တွန်းအားပေးမှု၏ ကြီးမားသောအရင်းအမြစ်ဖြစ်ကြောင်း ထင်ရှားသည်။

၁၇။ သက်ကြီးတိုက်နယ်ကြီးကြပ်မှူးတစ်ဦးသည် အခြားသူများအား အထောက်အကူပေးရသည့်အခွင့်ထူးနှင့်ပတ်သက်ပြီး မည်သို့ခံစားရသနည်း။

^၁၇ သက်ကြီးရွယ်အိုများနှင့် စိတ်ပျက်အားလျော့နေသည့် စိုးလ်များသည် အထူးသဖြင့် တိုက်တွန်းအားပေးမှုလိုအပ်သည်။ သက်ကြီးတိုက်နယ်ကြီးကြပ်မှူးတစ်ဦးက “ပြောမပြနိုင်လောက်အောင် အတွင်းရွှင်လန်းမှုကိုဖြစ်စေတဲ့ ကျွန်တော့်လုပ်ငန်းရဲ့ နည်းလမ်းတစ်သွယ်ကတော့ ဘုရားသခင့်သိုးတော်စုထဲမှာ မလှုပ်မရှားတဲ့သူတွေနဲ့ အားအင်ချိနဲ့နေသူတွေကို ကူညီရတဲ့အခွင့်ထူးပါပဲ။ ကျွန်တော်ဟာ ‘သူတို့ကို မြဲမြံခိုင်ခံ့စေဖို့အတွက် ဝိညာဉ်ဆုကျေးဇူးတစ်စုံတစ်ခုကို အပ်ပေး’ ရင်း ကြီးမားတဲ့တိုက်တွန်းအားပေးမှုနဲ့ ခွန်အား ရရှိလာတာနဲ့အမျှ ရောမ ၁:၁၁၊ ၁၂ ပါစကားတွေဟာ ကျွန်တော့်အတွက် အထူးအဓိပ္ပာယ်ရှိပါတယ်” ဟုရေးသားလိုက်သည်။

သူတို့၏ရွှင်လန်းသောလုပ်ဆောင်မှုမှရသည့် ဆုကျေးဇူးများ

၁၈။ နယ်လှည့်ကြီးကြပ်မှူးတို့တွင် မည်သည့်ကျမ်းပေးရည်မှန်းချက်များ ရှိထားကြသနည်း။

^၁၈ နယ်လှည့်ကြီးကြပ်မှူးတို့သည် ယုံကြည်သူချင်းတို့ကို စိတ်ရင်းမှန်ဖြင့် အလွန်စိတ်ဝင်စားကြသည်။ သူတို့သည် အသင်းတော်များကို အားရှိလာစေလိုပြီး ဝိညာဉ်ရေးအရ တည်ဆောက်ပေးလိုကြသည်။ (တမန်တော် ၁၅:၄၁) နယ်လှည့်ကြီးကြပ်မှူးတစ်ဦးသည် “တိုက်တွန်းအားပေးရန်၊ အားသစ်လန်းစေရန်နှင့် ဓမ္မအမှုကို ကျေပွန်ကာ သမ္မာတရားအတိုင်း ဆက်၍အသက်ရှင်လိုသည့်စိတ်ဆန္ဒကို မြှင့်တင်ပေးရန်” စွမ်းစွမ်းတမံကြိုးစားသည်။ (၃ ယောဟန် ၃) နောက်တစ်ယောက်ကမူ ယုံကြည်သူချင်းတို့ ယုံကြည်ခြင်းတွင် တည်တံ့မြဲမြံစေဖို့ ကြံဆလုပ်ဆောင်သည်။ (ကောလောသဲ ၂:၆၊ ၇) နယ်လှည့်ကြီးကြပ်မှူးသည် အခြားသူများ၏ယုံကြည်ခြင်းကို အစိုးရသော သခင်တစ်ပါးမဟုတ်ဘဲ “လုပ်ဖော်ဆောင်ဖက်စစ်” ဖြစ်ကြောင်း သတိရပါ။ (ဖိလိပ္ပိ ၄:၃; ၂ ကောရိန္သု ၁:၂၄) သူ၏လည်ပတ်မှုသည် တိုက်တွန်းအားပေးမှုနှင့် ထပ်ဆင့်လုပ်ဆောင်မှုအတွက် အခါသမယဖြစ်သည့်အပြင် အကြီးအကဲအဖွဲ့အနေနှင့် လုပ်ဆောင်ခဲ့သည့်တိုးတက်မှုကို ပြန်ဆွေးနွေးရန်နှင့် အနာဂတ်ပန်းတိုင်များကို သုံးသပ်ရန် အခွင့်အလမ်းတစ်ခုလည်းဖြစ်သည်။ သူပြောသည့်စကားနှင့်ပုံသက်သေကြောင့် အသင်းတော်ကြေညာသူများ၊ ရှေ့ဆောင်များ၊ ဓမ္မအမှုထမ်းများနှင့် အကြီးအကဲများသည် ရှေ့ဆက်လုပ်ရမည့်လုပ်ငန်းအတွက် တည်ဆောက်နှိုးဆော်ခံရရန် မျှော်လင့်နိုင်ပါသည်။ (၁ သက်သာလောနိတ် ၅:၁၁ နှိုင်းယှဉ်။) ထိုကြောင့် တိုက်နယ်ကြီးကြပ်မှူး၏လည်ပတ်မှုကို နှလုံးအပြည့်ဖြင့် ထောက်ခံပြီး ခရိုင်ကြီးကြပ်မှူးလုပ်ဆောင်သည့် လုပ်ငန်းမှ အကျိုးအပြည့်အဝရယူပါလေ။

၁၉၊ ၂၀။ နယ်လှည့်ကြီးကြပ်မှူးများနှင့် ၎င်းတို့၏ဇနီးတို့သည် မိမိတို့သစ္စာရှိရှိအမှုဆောင်ခဲ့သည့်အတွက် မည်သို့ဆုချခံရကြပြီနည်း။

^၁၉ နယ်လှည့်ကြီးကြပ်မှူးများနှင့် သူတို့၏ဇနီးတို့သည် သစ္စာရှိရှိသူတို့လုပ်ဆောင်မှုအတွက် ကြွယ်ဝစွာဆုချခံရကြပြီး ယေဟောဝါရှင်သည် သူတို့လုပ်ဆောင်သည့် ကောင်းမှုအတွက် ကောင်းချီးပေးတော်မူမည်ဖြစ်ကြောင်း ယုံကြည်စိတ်ချနိုင်ပါသည်။ (သု. ၁၉:၁၇; ဧဖက် ၆:၈) ဂေယော့ဂ်နှင့် မာ့ဂ်ဒါလေးနာတို့သည် နယ်လှည့်လုပ်ငန်းတွင် နှစ်ရှည်လများအမှုဆောင်ခဲ့ကြသည့် သက်ကြီးမောင်နှံစုံတစ်တွဲဖြစ်သည်။ လူဇင်ဘတ်မြို့ ခရိုင်စည်းဝေးကြီးတစ်ခုတွင် မာ့ဂ်ဒါလေးနာထံ လွန်ခဲ့သည် အနှစ် ၂၀ ကျော်က သူမသက်သေခံခဲ့သူတစ်ဦး ချဉ်းကပ်လာသည်။ သူမထံတွင် မာ့ဂ်ဒါလေးနာ ထားရစ်ခဲ့သည့် ကျမ်းစာစာပေက အဆိုပါဂျူးအမျိုးသမီးကို သမ္မာတရားတွင် စိတ်ဝင်စားရန် နှိုးဆွပေးခဲ့သည်။ ဂေယော့ဂ်ထံတွင်မူ လွန်ခဲ့သည့် အနှစ် ၄၀ နီးပါးက သူမအိမ်သို့ သူလည်ပတ်ခဲ့သည်ကို သတိတရဖြစ်မိသော ဝိညာဏညီအစ်မတစ်ဦး ချဉ်းကပ်လာသည်။ သတင်းကောင်းကို သူစိတ်အားထက်သန်စွာ တင်ဆက်ဟောပြောမှုကြောင့် သူမကော သူမ၏ခင်ပွန်းသည်ပါ လုံးလုံးလျားလျား သမ္မာတရားကို လက်ခံခဲ့သည်။ ဂေယော့ဂ်နှင့် မာ့ဂ်ဒါလေးနာတို့နှစ်ယောက် ပျော်မဆုံးရွှင်မဆုံးဖြစ်မည်ဆိုသည်ကို ပြောဖို့မလိုတော့ပါ။

^၂၀ ဧဖက်မြို့တွင် ပေါလု သစ္စာရှိရှိဓမ္မအမှုဆောင်ခြင်းကြောင့် သူရွှင်လန်းမှုရရှိခဲ့ပြီး “ခံယူခြင်းထက် ပေးကမ်းခြင်း၌ ပျော်ရွှင်မှုသာ၍ရှိ၏” ဆိုသည့် ယေရှု၏စကားများကို ကိုးကားရန် သူ့ကိုလှုံ့ဆော်ခဲ့ဖွယ်ရှိသည်။ (တမန်တော် ၂၀:၃၅၊ ကဘ) နယ်လှည့်လုပ်ငန်းသည် အစဉ်တစိုက်ပေးကမ်းခြင်းပါဝင်သောကြောင့် ယင်းတွင် လုပ်ဆောင်နေသူများသည် အထူးသဖြင့် မိမိတို့၏ကြိုးစားလုပ်ဆောင်မှုမှပေါ်ထွက်လာသည့် ရလဒ်ကောင်းများကို သတိပြုမိလာသောအခါ ပျော်ရွှင်မှု ရရှိကြသည်။ စိတ်ဓာတ်ကျနေသည့်အကြီးအကဲတစ်ယောက်ကို အကူအညီပေးခဲ့သော တိုက်နယ်ကြီးကြပ်မှူးတစ်ဦးသည် ဤသို့ပြောခဲ့သည့် စာတစ်စောင်ကိုရရှိသည်– “ညီအစ်ကိုဟာ ကျွန်တော်ရဲ့ဝိညာဏအသက်တာမှာ—ညီအစ်ကိုသိတာထက်တောင်ပိုကြီးမားတဲ့ ‘ခွန်အားရှိစေသောအထောက်အကူ’ ဖြစ်ခဲ့ပါတယ်။ . . . ညီအစ်ကိုဟာ ‘ခြေချော်လုဖြစ်သွားတဲ့’ ခေတ်သစ်အာသကို ဘယ်လောက်အကူအညီပေးခဲ့ပြီလဲဆိုတာကို ညီအစ်ကိုဘယ်တော့မှ အပြည့်အဝသိမှာမဟုတ်ပါဘူး။’”—ကောလောသဲ ၄:၁၁; ဆာလံ ၇၃:၂။

၂၁။ ၁ ကောရိန္သု ၁၅:၅၈ သည် နယ်လှည့်ကြီးကြပ်မှူးတို့၏လုပ်ဆောင်မှုနှင့် သက်ဆိုင်သည်ဟု သင်အဘယ်ကြောင့်ဆိုမည်နည်း။

^၂၁ တိုက်နယ်လုပ်ငန်းတွင် နှစ်များစွာ လုပ်ဆောင်ခဲ့သည့် သက်ကြီးခရစ်ယာန်တစ်ဦးအနေနှင့် “သင်တို့ကြိုးစားအားထုတ်ခြင်းသည် အရှင်ဘုရား၌ အချည်းနှီးမဖြစ်သည်ကိုသိမှတ်သဖြင့်၊ တည်ကြည်သောစိတ်နှင့်ပြည့်စုံ၍ မရွေ့လျော့မတိမ်းယိမ်းဘဲလျက်၊ အစဉ်ကြိုးစား၍ ဆောက်ရွက်ကြလော့” ဟူသည့် ပေါလုတိုက်တွန်းထားသည့် ၁ ကောရိန္သု ၁၅:၅၈ (သမ္မာ) ကို တွေးတောလိုကြပါသည်။ နယ်လှည့်ကြီးကြပ်မှူးတို့သည် သခင်ဘုရား၏လုပ်ငန်းတော်တွင် လုပ်ဆောင်စရာများစွာရှိကြသည်မှာအမှန်ပင်။ ဘုရားသခင်၏မခံစားထိုက်သောကြင်နာမှု၏ သစ္စာရှိဘဏ္ဍာစိုးများအနေနှင့် သူတို့အလွန်ရွှင်လန်းစွာအမှုဆောင်ခြင်းသည် ကျွန်ုပ်တို့အတွက် အလွန်ကျေးဇူးတင်စရာပါတကား!

[အောက်ခြေမှတ်ချက်များ]

သင်မည်သို့ဖြေဆိုမည်နည်း

◻ နယ်လှည့်ကြီးကြပ်မှူးတို့သည် “ဘဏ္ဍာစိုးကောင်း” အဖြစ် အဘယ်ကြောင့်ရှုမြင်ခံရနိုင်သနည်း။

◻ ကောင်းကျိုးများစွာဖြစ်မြောက်စေရန် တိုက်နယ်နှင့်ခရိုင်ကြီးကြပ်မှူးတို့အား အကူအညီဖြစ်စေသည့် အချက်အချို့ကားအဘယ်နည်း။

◻ နယ်လှည့်လုပ်ငန်းတွင်ပါဝင်သူများအတွက် နှိမ့်ချမှုနှင့်ဇွဲရှိဖို့ အဘယ်ကြောင့်အရေးကြီးသနည်း။

◻ နယ်လှည့်ကြီးကြပ်မှူးတို့တွင် မည်သည့်ရည်မှန်းချက်ကောင်းများရှိသနည်း။

[စာမျက်နှာ ၁၆ ပါ ရုပ်ပုံ]

နယ်လှည့်ကြီးကြပ်မှူးတို့သည် ယုံကြည်သူချင်းတို့ကို တိုက်တွန်းအားပေးရန် ကြိုးစားသည်

[စာမျက်နှာ ၁၇ ပါ ရုပ်ပုံ]

လူငယ်များနှင့်လူကြီးများပါ နယ်လှည့်ကြီးကြပ်မှူး၊ ၎င်းတို့၏ဇနီးတို့နှင့် ပေါင်းဖော်ခြင်းမှ အကျိုးရနိုင်သည်

[စာမျက်နှာ ၁၈ ပါ ရုပ်ပုံ]

နယ်လှည့်ကြီးကြပ်မှူး၏ ဇွဲဖြင့်ဓမ္မအမှုဆောင်ခြင်းက အခြားသူများကို ဇွဲရှိရန် တွန်းအားပေးသည်