အောင်မြင်သောကျောင်းသားများမှ အောင်မြင်သော သာသနာပြုများသို့

“ဒီအခွင့်အရေးရလိုက်တယ်ဆိုတာ မယုံနိုင်အောင်ဖြစ်နေဆဲပါပဲ” ဟု ဝေးလ်ကဆိုသည်၊ သူနှင့်သူ၏ဇနီး ပဲ့တ်စီတို့ ၁၀၃ ကြိမ်မြောက် ကင်းမျှော်စင်ကျမ်းစာဂိလဒ်ကျောင်း၏ ကျောင်းသားများအဖြစ် တက်ပြီးခါစသင်တန်းကို ရည်ညွှန်းနေခြင်းဖြစ်သည်။ ဇာဟက်နှင့် ဂျီနီတို့ကလည်း သဘောတူသည်။ “ဒီမှာရောက်နေရတာကို ဂုဏ်ယူမိတယ်” ဟုသူတို့ကဆိုသည်။ ကျောင်းတွင် ကျောင်းသားအားလုံး ကြိုးစားခဲ့ကြသည်။ ယခု သူတို့သည် သာသနာပြုများအဖြစ် သူတို့၏ရာသက်ပန်လုပ်ငန်းကို စတင်ရန် စိတ်စောနေကြလေသည်။ သို့သော် ဦးဆုံး ၁၉၉၇ စက်တင်ဘာ ၆ ရက်နေ့ ဘွဲ့နှင်းသဘင်အစီအစဉ်၌ သူတို့၏သာသနာပြုရန် တာဝန်ကျရာနေရာများတွင် အောင်မြင်ကြစေရန် သူတို့အားထောက်ကူမည့် မေတ္တာပါသော သွန်သင်ချက်ကို ခံယူခဲ့ကြရသည်။

အစီအစဉ်သဘာပတိမှာ အုပ်ချုပ်ရေးအဖွဲ့ဝင် သီအိုဒေါဂျဲရက်ဇ်ဖြစ်သည်။ ဗေသလမိသားစုနှင့်အတူ ကင်းမျှော်စင်းအသင်းဌာနခွဲ ၄၈ ခုမှကိုယ်စားလှယ်အပါအဝင် ကနေဒါ၊ ဥရောပ၊ ပွာတိုရီကိုနှင့် အမေရိကန်ပြည်ထောင်စုတို့မှ မိတ်သင်္ဂဟနှင့်ဆွေမျိုးဉာတိများက ကျောင်းသားများအား သူတို့၏ထောက်ခံမှုနှင့် မေတ္တာကို စိတ်ချစေဖို့ တက်ရောက်လာကြကြောင်း သူထောက်ပြောခဲ့သည်။ ခရစ်ယာန်ဘောင်မှစေလွှတ်လိုက်သည့် သာသနာပြုများသည် များသောအားဖြင့် သူတို့၏သာသနာပြုလုပ်ငန်းမှ သွေဖည်သွားကာ ပညာရေးဘက်တွင် အကြီးအကျယ်လိုက်စားခဲ့ခြင်း သို့မဟုတ် နိုင်ငံရေးတွင် ဝင်ရောခဲ့ကြသည့်အထိပင်ပြုခဲ့ကြကြောင်း ညီအစ်ကို ဂျဲရက်ဇ်က ပြောသည်။ ဂိလဒ်ကျောင်းဆင်းများမူ ထိုသို့မဟုတ်ဘဲ လုပ်ရန်လေ့ကျင့်ပေးထားသည့်အလုပ်ကိုသာ လုပ်ဆောင်ကြပါသည်။ လူများကို သူတို့ကျမ်းစာသင်ပေးကြသည်။

ထို့နောက် အဖွဲ့အစည်း၏ဘရွတ်ကလင်ရုံးမှ ရောဘတ်ဘတ်တလာက “သင့်လမ်းစဉ်ကိုအောင်မြင်စေပါ” ခေါင်းစဉ်ဖြင့် ဟောပြောခဲ့သည်။ လူများသည် အောင်မြင်မှုကို ငွေကြေး သို့မဟုတ် အခြားပုဂ္ဂိုလ်ရေးဆိုင်ရာ တိုးပွားမှုတို့ဖြင့် တိုင်းတာသတ်မှတ်တတ်ကြသော်လည်း အောင်မြင်မှုကို ဘုရားသခင်တိုင်းတာသတ်မှတ်ပုံကား အမှန်ပင်အရေးကြီးသည်ဟု သူရှင်းပြသည်။ ယေရှု၏ဓမ္မအမှုအောင်မြင်ခြင်းမှာ လူများများကို ဘာသာပြောင်းဝင်အောင်လုပ်နိုင်သောကြောင့်မဟုတ်ဘဲ မိမိ၏တာဝန်ကို သစ္စာရှိရှိလုပ်ဆာင်ခဲ့သောကြောင့်ဖြစ်သည်။ ယေရှုသည် ယေဟောဝါ၏ဘုန်းတော်ကို ထင်ရှားစေခဲ့ပြီး လောက၏ညစ်စွန်းမှုနှင့်ကင်းအောင်နေတော်မူခဲ့သည်။ (ယောဟန် ၁၆:၃၃; ၁၇:၄) ယင်းတို့သည် ခရစ်ယာန်တိုင်းလုပ်နိုင်သည့်အရာများဖြစ်သည်။

အရှေ့တိုင်းဒေသတွင် သာသနာပြုတစ်ဦးဖြစ်ခဲ့ဖူးသူ ရောဘတ်ပက်ဗီက “လူခပ်သိမ်း၏ကျွန်များဖြစ်ပါ” ဟု အကြံပြုခဲ့သည်။ တမန်တော်ပေါလုသည် အောင်မြင်သောသာသနာပြုတစ်ဦးဖြစ်သည်။ သူ၏သော့ချက်ကားအဘယ်နည်း။ သူသည် မိမိကိုယ်ကို လူခပ်သိမ်း၏ကျွန်ဖြစ်စေခဲ့သည်။ (၁ ကောရိန္သု ၉:၁၉-၂၃) ဟောပြောသူက ဤသို့ရှင်းပြသည်– “ထိုစိတ်ထားရှိသူသည် သာသနာပြုလုပ်ငန်းကို ဘဝတက်လမ်းတစ်မျိုး၊ အဖွဲ့အစည်းတွင် သာ၍အရေးပါသောနေရာများကိုရဖို့ တက်လှမ်းစရာတစ်ခုအဖြစ် ယူမှတ်မည်မဟုတ်ပါ။ သာသနာပြုတစ်ဦးသည် မိမိတာဝန်ကျရာနေရာကို ရည်ရွယ်ချက်တစ်ခုတည်းဖြစ်သည့် ကျွန်များနည်းတူ အစေခံရန်အတွက် သွားတတ်သည်။”

အုပ်ချုပ်ရေးအဖွဲ့မှ ဂဲရစ် လော့ရှ်က မိမိ၏သွန်သင်ချက်ကို ၂ ကောရိန္သု အခန်းကြီး ၃ နှင့် ၄ အပေါ်အခြေပြုကာ “ယေဟောဝါ၏ဘုန်းတော်ကို ကြေးမုံများကဲ့သို့ ရောင်ပြန်ဟပ်” ဖို့ကျောင်းသားများအား တိုက်တွန်းခဲ့သည်။ ဘုရားသခင်အား သိကျွမ်းခြင်းအသိပညာသည် ယင်းကိုလက်ခံဖို့နှလုံးဖွင့်ထားသည့်ခရစ်ယာန်တစ်ဦးအပေါ် ထွန်းလင်းပေးသော အလင်းအိမ်နှင့်တူကြောင်း သတိပေးခဲ့သည်။ သတင်းကောင်းဟောပြောခြင်း၊ အကျင့်အကြံကောင်းများကို ဆက်လက်ထိန်းသိမ်းခြင်းအားဖြင့် ထိုအလင်းကို ကျွန်ုပ်တို့ရောင်ပြန်ဟပ်ကြပါသည်။ “အရည်အချင်းမပြည့်မီပါလားဟု ရံဖန်ရံခါ ခံစားရမည်” ဖြစ်ကြောင်းသူအသိအမှတ်ပြုသည်။ “ဤကဲ့သို့သော ခံစားချက်များဖြစ်ပေါ်လာလျှင် ‘သာမန်ထက်ထူးကဲသော တန်ခိုးတော်သည် ဘုရားသခင်နှင့်သာဆိုင်မည်အကြောင်း ယေဟောဝါကို အားကိုးပါ။’” (၂ ကောရိန္သု ၄:၇၊ ကဘ) ၂ ကောရိန္သု ၄:၁ တွင်မှတ်တမ်းတင်ထားသည့် ပေါလု၏စကားများကို ပဲ့တင်ထပ်ကာ ညီအစ်ကို လော့ရှ်က ကျောင်းသားများအား “သင်တို့၏သာသနာပြုတာဝန်ကို မစွန့်ပါနှင့်။ သင်တို့၏ကြေးမုံကို ပြောင်လက်နေစေပါ” ဟု မေတ္တာရပ်ခံခဲ့သည်။

ဂိလဒ်ဆရာစုဝင်တစ်ဦးဖြစ်သူ ကားလ် အယ်ဒမ်က “ယေဟောဝါ အဘယ်မှာရှိသနည်း” ဟူသည့် စိတ်ဝင်စားဖွယ်အကြောင်းကို ဟောပြောခဲ့သည်။ ဤမေးခွန်းသည် စကြဝဠာတွင် ဘုရားသခင်ရှိနေသည့်နေရာကို ရည်ညွှန်းနေခြင်းမဟုတ်ဘဲ ယေဟောဝါ၏ရှုထောင့်နှင့် ကိုယ်တော့်လမ်းညွှန်ပြသမှုများကို သုံးသပ်ဖို့လိုခြင်းကို ရည်ညွှန်းနေခြင်းဖြစ်သည်။ “ဖိစီးမှုဒဏ်ခံရချိန်တွင် ယေဟောဝါ၏လုပ်ငန်းတော်၌ ကြာရှည်စွာလုပ်ဆောင်လာခဲ့သူတစ်ဦးပင် ထိုသဘောထားပျောက်နိုင်ကြောင်း” သူမြွက်ကြားခဲ့သည်။ (ယောဘ ၃၅:၁၀) ကျွန်ုပ်တို့၏မျက်မှောက်အချိန်တွင်ကော။ ၁၉၄၂ ခုနှစ်တွင် ဘုရားသခင့်လူမျိုးတော်သည် ဦးဆောင်လမ်းပြမှုလိုအပ်ခဲ့သည်။ ဟောပြောခြင်းလုပ်ငန်းကို ရပ်လိုက်ရတော့မည်လော၊ သို့မဟုတ် ပို၍လုပ်ဆောင်စရာရှိမည်လော။ မိမိလူမျိုးတော်အတွက် ယေဟောဝါ၏အလိုတော်ကားအဘယ်နည်း။ ဘုရားသခင့်မိန့်တော်မူချက်စကားများကို လေ့လာသည်နှင့်အမျှ အဖြေမှာ စ၍ရှင်းလင်းလာလေသည်။ ပြက္ခဒိန်နှစ်မကုန်မီ “ကင်းမျှော်စင်ကျမ်းစာ ဂိလဒ်ကျောင်းအတွက် အစီအစဉ်များရေးဆွဲပြီးစီးခဲ့” ကြောင်း ညီအစ်ကို အယ်ဒမ် ထုတ်ဖော်ပြောခဲ့သည်။ ယေဟောဝါသည် ဤကျောင်းထွက် သာသနာပြုများ၏လုပ်ဆောင်မှုကို အမှန်ပင်ကောင်းချီးပေးတော်မူခဲ့ပြီ။

မာ့ခ် နူမာသည် ဟောပြောချက်ပေးသည့် ဒုတိယပို့ချသူဖြစ်သည်။ “သင့်ငွေခွက်ကို မည်သို့အသုံးပြုမည်နည်း” ခေါင်းစဉ်ဖြင့် သူ၏ဟောပြောချက်တွင် ကျောင်းသားများသည် မိမိတို့၏တာဝန်ကျရာနေရာသစ်သို့ရောက်သည်နှင့် ဂိလဒ်ကျောင်းတွင်ရရှိခဲ့ကြသော လေ့ကျင့်မှုကို လက်တွေ့အသုံးပြုကြဖို့ တိုက်တွန်းခဲ့သည်။ “အခြားသူများကို စိတ်ဝင်စားပါ။ သူတို့နှင့်ရောပါ။ နိုင်ငံ၏ထုံးစံဓလေ့များ၊ သမိုင်းနှင့် သဘောသကန်များကို သိရှိဖို့ စိတ်စောနေပါ။ ဘာသာစကားကို သင်မြန်မြန်တတ်မြောက်လေ ပို၍အဆင်ပြေလေဖြစ်မည်” ဟု သူဆိုသည်။

ဇွဲရှိသောကျောင်းသားများ ဓမ္မအမှုတွင် ရွှင်လန်းမှုရ

ကျောင်းသားများသည် ဂိလဒ်တွင်ရှိနေစဉ် သူတို့၏သင်ခန်းစာများကို လက်တွေ့ကျင့်သုံးရကြသည့်အပြင် ဒေသခံအသင်းတော် ၁၁ ခုတွင် တာဝန်ပေးခြင်းခံရကြသည်။ အပတ်အကုန်ပိုင်းရက်တိုင်း ဟောပြောခြင်းလုပ်ငန်းတွင် ဇွဲရှိရှိဖြင့် သူတို့ပါဝင်ကြသည်။ ဂိလဒ်ဆရာစုအဖွဲ့ဝင် ဝေါလေ့စ်လစ်ဗရန့်စ်က သူတို့အများအပြားကို ပရိသတ်ရှေ့တွင် ၎င်းတို့၏တွေ့ ကြုံမှုအချို့ကို တင်ပြပြောဆိုစေခဲ့သည်။ ဈေးဝယ်ခြမ်းရေးနေရာများ၊ ကားရပ်ရန်နေရာများ၊ စီးပွားရေးရပ်ကွက်များ၊ လမ်းပေါ်နှင့် တစ်အိမ်မှတစ်အိမ် သက်သေခံကြစဉ် သူတို့တွေ့ ကြုံခဲ့ကြရသည့် တွေ့ ကြုံမှုများကိုပြန်ပြောပြချိန်တွင် သူတို့၏ရွှင်လန်းမှုကို အထင်အရှားတွေ့မြင်ခဲ့ကြရသည်။ အချို့တို့သည် မိမိတို့၏အသင်းတော်ရပ်ကွက်တွင် နေထိုင်၍အလုပ်လုပ်ကြသော နိုင်ငံခြားဘာသာစကားပြောသူများထံ ရောက်နိုင်မည့်နည်းလမ်းများကို ရှာကြံခဲ့ကြသည်။ ၁၀၃ ကြိမ်မြောက်သင်တန်းသားများသည် သူတို့၏သင်တန်းကာလ ၅ လအတွင်း အိမ်တွင်းကျမ်းစာသင်အံမှု အနည်းဆုံး ၁၀ ခုစတင်ကျင်းပခဲ့ကြသည်။

နှစ်ကြာသာသနာပြုများ အောင်မြင်မှု၏လျှို့ဝှက်ချက်များကို ဝေမျှ

ပျော်ရွှင်ဖွယ်ရာဤအစီအစဉ်ပိုင်းအပြီးတွင် ပက်ထရစ် လာ ဖရင့်ကာ နှင့် ဝေလျံဗန်ဒီဝူးတို့သည် ဤသင်တန်း၏အကျိုးအတွက် ဌာနခွဲကော်မတီဝင် ခုနစ်ဦးကို ဖိတ်ခေါ်ကာ ၎င်းတို့၏ တစ်သက်ပန်သာသနာပြုလုပ်ငန်းတွင် တတ်သိခဲ့သည့် သင်ခန်းစာများကို လိုရင်းအချုပ်ပြောပြစေခဲ့သည်။ မိမိတို့၏သာသနာပြုတာဝန်ကို ယေဟောဝါထံမှ လာသကဲ့သို့ ယူမှတ်ကြရန်၊ ထိုတာဝန်ကို စွဲစွဲမြဲမြဲလုပ်ဆောင်မည်ဟု စိတ်ပိုင်းဖြတ်ထားကြရန် သင်တန်းဆင်းများကို သူတို့မြွက်ကြားခဲ့ကြသည်။ ဂိလဒ်သင်တန်းဆင်းသာသနာပြုများက အခြားနိုင်ငံများတွင် လုပ်ငန်းတော်အပေါ် အပြုသဘောပါအကျိုးသက်ရောက်မှုများရှိစေခဲ့ကြောင်းကို သူတို့ပြောပြကြသည်။

ဤဌာနခွဲကော်မတီဝင်များသည် ပျော်ရွှင်ပြီး အသီးသီးသော သာသနာပြုများအဖြစ် ဆယ်စုနှစ်များချီပြီး အမှုဆောင်နိုင်ကြဖို့ အဘယ်အရာကအထောက်အကူပြုခဲ့သနည်း။ သူတို့သည် နယ်ခံညီအစ်ကိုများနှင့်အတူ အနီးကပ်တွဲဖက်အမှုဆောင်ခဲ့ကြရာ သူတို့ထံမှသင်ယူခဲ့ကြသည်။ သူတို့တာဝန်ကျရာနေရာများသို့ရောက်သည်နှင့် ဘာသာစကားကို ကြိုးစားပမ်းစားသင်ယူခဲ့ကြသည်။ ဒေသထုံးစံများနှင့် အလိုက်သင့်အလျားသင့်ဖြစ်ဖို့လည်း သင်ယူခဲ့ကြသည်။ ဂိလဒ်၏ ပထမသင်တန်းမှ သင်တန်းဆင်းတစ်ဦးဖြစ်ပြီး ၅၄ နှစ်ကြာ သာသနာပြုတစ်ဦးဖြစ်နေသူ ချားလ်စ် အိုက်စင်ဟောင်ဝါက အောင်မြင်သောသာသနာပြုများ တတ်သိခဲ့သည့် “လျှို့ဝှက်ချက်” ငါးချက်ကို ဤသို့ပြောပြခဲ့သည်– (၁) ကျမ်းစာကိုမှန်မှန်လေ့လာပါ၊ (၂) ဘာသာစကားကို လေ့လာပါ၊ (၃) ဓမ္မအမှုတွင် တက်ကြွမှုရှိပါ၊ (၄) သာသနာပြုအိမ်တွင် ငြိမ်သက်မှုရှိစေရန် ကြိုးစားပါ၊ (၅) ယေဟောဝါထံ မှန်မှန်ဆုတောင်းပါ။ ကျောင်းသားများသည် သူတို့ရရှိသော လက်တွေ့ကျအကြံဉာဏ်ကိုသာမက ယေဟောဝါ၏လုပ်ငန်းတော်တွင် ဤကျင့်သားရသာသနာပြုများခံစားရသည့် သိသာသောရွှင်လန်းမှုကြောင့်ပါ စွဲမှတ်သွားခဲ့ကြပါသည်။ အာမန်ဒိုနှင့် လူပီတို့ ဖော်ပြသည့်အတိုင်းပင် “သူတို့အသက်တာအကြောင်း ပြောပြကြတဲ့အခါ သူတို့ပျော်ကြတယ်။”

လူတွေ့မေးမြန်းခန်းများအပြီးတွင် ဟောပြောချက်တစ်ခု ကျန်သည်။ အုပ်ချုပ်ရေးအဖွဲ့ဝင် အဲလ်ဘတ် ရှရိုဒါက သူ၏အဓိကအချက်အဖြစ် “ဘုရားသခင့်စကားတော်၏ သစ္စာရှိဘဏ္ဍာစိုးဖြစ်ခြင်းက သမ္မာတရား၏အဖိုးတန်ကျောက်မျက်ကို ထင်ရှားစေ” ကိုရွေးခဲ့သည်။ ကျမ်းစာသည် ဂိလဒ်ကျောင်း၏အဓိက ကျောင်းသုံးစာအုပ်ဖြစ်သောကြောင့် ကျောင်းသားများသည် သူပြောမည့်အရာကို စိတ်ဝင်စားနေကြသည်။ လွန်ခဲ့သည့် အနှစ် ၅၀ က သန့်ရှင်းသောကျမ်းစောင်များ၏ ကမ္ဘာသစ်ဘာသာပြန်ကျမ်း ကို စတင်ပြုစုချိန်တွင် ကမ္ဘာသစ်ဘာသာပြန်ကျမ်းကော်မတီဝင် ဘိသိက်ခံတို့သည် လူတို့၏သဘောကျရေးကို မမျှော်ကိုးဘဲ သန့်ရှင်းသောဝိညာဉ်တော်၏ဦးဆောင်လမ်းညွှန်မှုကို အားထားမှီခိုခဲ့ကြောင်း ညီအစ်ကို ရှရိုဒါက ထောက်ပြခဲ့သည်။ (ယေရမိ ၁၇:၅-၈) သို့သော် မကြာသေးမီကမှ ပညာရှင်အချို့သည် ကမ္ဘာသစ်ဘာသာပြန်ကျမ်း ချမှတ်ခဲ့သည့် မြင့်မားသောစံနှုန်းကို အသိအမှတ်ပြုခဲ့ကြသည်။ အဖွဲ့အစည်းသို့ပေးစာတစ်စောင်တွင် ကျမ်းပညာရှင်တစ်ဦးက ဤသို့ရေးသားလိုက်သည်– “ကျွန်ုပ်မြင်လိုက်သည်နှင့် အရည်အသွေးမြင့်မားသောစာပေဖြစ်ကြောင်း သိလိုက်ပါသည်။ သင်တို့ရဲ့ ‘ကမ္ဘာသစ်ဘာသာပြန်ကျမ်းကော်မတီ’ သည် ယင်းကို ကောင်းကောင်းပြုစုထားပါသည်။”

ဤဟောပြောချက်အပြီးတွင် ကျောင်းသားတို့သည် ဒီပလိုမာဘွဲ့များကို ရရှိကြပြီး သူတို့တာဝန်ကျရာနေရာများကို ပရိသတ်ရှေ့တွင် ကြေညာခဲ့ပါသည်။ သင်တန်းသားများအတွက် စိတ်လှုပ်ရှားဖွယ်ကောင်းသော အခါသမယပင်။ သင်တန်းကိုယ်စားပြုသူတစ်ဦးက ကျေးဇူးတင်စာလွှာကို ဖတ်ကြားလိုက်သည့်အခါ များစွာသောသူတို့သည် လည်ချောင်းထဲတွင် ဆို့နင့်ကာ မျက်ရည်များကျလာပါတော့သည်။ အချို့ကျောင်းသားများသည် သာသနာပြုလုပ်ငန်းအတွက် နှစ်နှင့်ချီပြီး ပြင်ဆင်ခဲ့ကြသည်။ ဂိလဒ်သင်တန်းကို အင်္ဂလိပ်ဘာသာဖြင့် ပို့ချမည်ဖြစ်ကြောင်း သိရှိကြရာ အချို့တို့သည် ဘာသာစကားအသုံးအနှုန်းတိုးတက်စေရန် အင်္ဂလိပ်စကားပြော အသင်းတော်များသို့ ပြောင်းရွှေ့ခဲ့ကြသည်။ အခြားသူများမူ မိမိတို့နိုင်ငံတွင်ဖြစ်စေ၊ တိုင်းတစ်ပါးတွင်ဖြစ်စေ ရှေ့ဆောင်များ သာ၍လိုအပ်သောနေရာများသို့ ပြောင်းရွှေ့ခဲ့ကြသည်။ အခြားသူတို့ကျပြန်လျှင် တွေ့ ကြုံမှုများကို ဖတ်ခြင်း၊ သုတေသနပြုခြင်း သို့မဟုတ် အဖွဲ့အစည်း၏ မြေကြီးစွန်းတိုင် ဗီဒီယိုခွေကို အခေါက်ခေါက်ပြန်ကြည့်ခြင်းအားဖြင့် ပြင်ဆင်ခဲ့ကြသည်။

အစပိုင်းတွင် ဖော်ပြခဲ့သည် ဝေးလ်နှင့် ပဲ့တ်စီတို့သည် ကျောင်းသားများပြသခံခဲ့ရသည့် တစ်ဦးချင်းစိတ်ဝင်စားမှုကြောင့် နှလုံးထိမိခဲ့ကြသည်။ “ကျွန်တော်တို့ကို မသိတဲ့သူတွေကတောင် သိုင်းဖက်ကြ၊ ဓာတ်ပုံရိုက်ကြနဲ့ဗျာ။ အုပ်ချုပ်ရေးအဖွဲ့ဝင်တစ်ယောက်ဆိုရင် ကျွန်တော်တို့ကို လက်ဆွဲနှုတ်ဆက်ပြီး ‘သင်တို့အတွက် ကျွန်ုပ်တို့ဂုဏ်ယူပါတယ်’ လို့ပြောခဲ့တယ်။” ၁၀၃ ကြိမ်မြောက် သင်တန်းမှ ကျောင်းသားများသည် အလွန်ချစ်အပ်သောသူများဖြစ်သည်မှာ သေချာပါသည်။ သူတို့သည် ကောင်းစွာလေ့ကျင့်မှုရထားပြီ။ ဂိလဒ်တွင် သူတို့ဆည်းပူးခဲ့သည့် ပညာက အောင်မြင်သောကျောင်းသားများမှ အောင်မြင်သောသာသနာပြုများသို့ ကူးပြောင်းမှုကို ဖြစ်စေပါလိမ့်မည်။

[စာမျက်နှာ ၂၂ ပါ လေးထောင့်ကွက်]

သင်တန်းဆိုင်ရာအချက်အလက်များ

ကိုယ်စားပြုနိုင်ငံအရေအတွက်– ၉

တာဝန်ပေးအပ်ခံရသည့် နိုင်ငံအရေအတွက်– ၁၈

ကျောင်းသား/သူအရေအတွက်– ၄၈

အိမ်ထောင်သည်စုံတွဲအရေအတွက်– ၂၄

ပျမ်းမျှအသက်– ၃၃

ပျမ်းမျှသမ္မာတရားတွင်းသက်တမ်း– ၁၆

ပျမ်းမျှအချိန်ပြည့်ဓမ္မအမှုဆောင် သက်တမ်း– ၁၂

[စာမျက်နှာ ၂၃ ပါ ရုပ်ပုံ]

ဂိလဒ်ကင်းမျှော်စင်ကျမ်းစာကျောင်း၏ ၁၀၃ ကြိမ်မြောက် ဂိလဒ်သင်တန်း

အောက်ပါစာရင်းတွင် အတန်းများကို ရှေ့တန်းမှ နောက်တန်းသို့ရေတွက်ပြီး အမည်များကို လက်ဝဲမှ လက်ယာဘက်သို့ စီထားသည်။

(1) Bunn [Pron: bən], A. [Andrea] [Pron: andrēʹä] [female]; Dahlstedt [Pron: dälʹsted], M. [Malene] [Pron: mälēnʹ] [female]; Campaña [Pron: kämpänʹyä], Z. [Zayda] [Pron: zīʹdə] [female]; Boyacioglu [Pron: bȯiäjüʹəlü], R. [Rita] [Pron: rēʹtə] [female]; Ogando [Pron: ōganʹdō], G. [Geni] [Pron: jeʹnē] [female]; Nikonchuk [Pron: nikənʹchək], T. [Tine] [Pron: tēn] [nickname for Ernestine]; Melvin [Pron: melʹvən], S. [Shakira] [Pron: shakēʹrä] [female]

(2) May [Pron: mā], M. [Mary] [Pron: maʹrē] [female]; Mapula [Pron: maʹpələ], M. [Maria] [Pron: mərēʹə] [female]; Lwin [Pron: lüʹən], J. [Jennifer] [Pron: jenʹifər] [female]; Hietamaa [Pron: hītʹəmä], D. [Diana] [Pron: dīanʹə] [female]; Hernandez [Pron: hernänʹdes], C. [Cynthia] [Pron: sinʹthēə] [female]; Boyacioglu, N. [Nisan] [Pron: nēʹshən] [male]; Sturm [Pron: stərm], A. [Adelheid] [Pron: ädʹəlhīt] [female]; Melvin, K. [Keith] [Pron: kēth] [male]

(3) Thom [Pron: tȯm], J. [Jacqueline] [Pron: jakʹələn] [female]; Mapula, E. [Edward] [male]; Nault [Pron: nōl], M. [Melody] [Pron: melʹədē] [female]; Teasdale [Pron: tēzʹdāl], P. [Patricia] [Pron: pətrishʹə] [female]; Wright, P. [Pamela] [Pron: pamʹələ] [female]; Pérez [Pron: peʹrəs], L. [Lupe] [Pron: lüʹpe] [female]; Shenefelt [Pron: shenəfeltʹ], M. [Melanie] [Pron: melənʹē] [female]; Pak [Pron: pak], H. [Hee-Yun] [Pron: hē yün] [female]

(4) Murphy, M. [Melinda] [Pron: melinʹdə] [female]; Campaña, J. [Jose] [Pron: hōsāʹ] [male]; Stewart, S. [Susan] [Pron: süzʹ^ən] [female]; Cereda [Pron: chārāʹdä], M. [Morena] [Pron: mōrāʹnä]; Reed, M. [Mary] [female]; Pérez, A. [Armando] [male]; Teasdale, W. [William] [male]; Pak, J. [Joon] [Pron: jün] [male]

(5) Stewart, D. [Douglas] [Pron: dəgʹləs] [male]; Wright, A. [Alan] [Pron: alʹən] [male]; Cereda, P. [Paolo] [Pron: päʹōlō] [male]; Nikonchuk, F. [Frederick] [Pron: fredʹrik] [male]; Reed, J. [Jason] [Pron: jāsʹən] [male]; Hietamaa, K. [Kristian] [Pron: krishʹchən] [male]; Ogando, C. [Cesar] [Pron: sēʹzər] [male]; Shenefelt, R. [Roger] [Pron: räjʹər] [male]

(6) Murphy, T. [Todd] [Pron: tȯd] [male]; Hernandez, J. [Jerry] [Pron: jerʹē] [nickname for Gerardo] [male]; Nault, M. [Michel] [Pron: mīkʹəl] [male]; Bunn, B. [Bruce] [Pron: brüs] [male]; Thom, R. [Richard] [male]; Dahlstedt, T. [Tom] [Pron: tȯm] [male]; Lwin, Z. [Zahid] [Pron: zāhēdʹ] [male]; May, R. [Russell] [male]; Sturm, A. [Andreas] [Pron: ändrāʹäs] [male]

[စာမျက်နှာ ၂၄ ပါ ရုပ်ပုံ]

ကျွန်ုပ်တို့ အဘယ်ကိုသွားကြမည်နည်း