ဘုရားသခင့်နှုတ်မြွက်စကားတော်ကိုသင်မည်မျှချစ်မြတ်နိုးသနည်း

“ကိုယ်တော်၏တရားကို အကျွန်ုပ်သည်အလွန်နှစ်သက်ပါ၏။ တစ်နေ့လုံး ဆင်ခြင်အောက်မေ့လျက်နေပါ၏။”—ဆာလံ ၁၁၉:၉၇။

၁။ ဘုရားသခင်ကိုကြောက်ရွံ့သူတို့ ဘုရားသခင့်နှုတ်မြွက်စကားတော်ကိုချစ်မြတ်နိုးကြောင်း ဖော်ပြသည့်နည်းတစ်နည်းကား အဘယ်နည်း။

သန်းပေါင်းများစွာသောအမျိုးသားအမျိုးသမီးများမှာ ကိုယ်ပိုင်သမ္မာကျမ်းစာရှိကြသည်။ သို့သော် ကိုယ်ပိုင်သမ္မာကျမ်းစာရှိခြင်းနှင့် ဘုရားသခင့်နှုတ်မြွက်စကားတော်ကိုချစ်မြတ်နိုးခြင်းသည် မတူပါ။ ဘုရားသခင့်နှုတ်မြွက်စကားတော်ကို ဖတ်ရှုခဲလျှင် ယင်းကိုချစ်မြတ်နိုးသည်ဟု အမှန်ဆိုနိုင်ပါမည်လော။ မဆိုနိုင်ပါ! ယင်းနှင့်ခြားနားစွာ သမ္မာကျမ်းစာကို တစ်ချိန်က စိတ်ဝင်စားမှုမရှိခဲ့သူအချို့သည် ယခုအခါ ယင်းကိုနေ့တိုင်းဖတ်နေကြသည်။ သူတို့သည် ဘုရားသခင့်နှုတ်မြွက်စကားတော်ကိုချစ်မြတ်နိုးတတ်လာကြပြီး ဆာလံဆရာကဲ့သို့ ယခုအခါ ဘုရားသခင့်နှုတ်မြွက်စကားတော်ကို “တစ်နေ့လုံး” ဆင်ခြင်အောက်မေ့လျက်နေကြသည်။—ဆာလံ ၁၁၉:၉၇။

၂။ ခဲယဉ်းသောအခြေအနေများအကြား ယေဟောဝါသက်သေတစ်ဦး၏ယုံကြည်ခြင်းသည် မည်သို့ထောက်မခံခဲ့ရသနည်း။

^၂ ဘုရားသခင့်နှုတ်မြွက်စကားတော်ကို ချစ်မြတ်နိုးတတ်လာသူတစ်ဦးမှာ နာရှို ဒိုရီဖြစ်သည်။ ယုံကြည်သူချင်းများနှင့်အတူ သူ၏ဇာတိဖြစ်သော အယ်လ်ဘေးနီးယားအတွင်းတွင် ယေဟောဝါ၏အမှုဆောင်လျက် ခံရပ်နေသည်မှာ ဆယ်စုနှစ်များစွာရှိခဲ့ပြီ။ ထိုအချိန်အများစုအတွင်း ယေဟောဝါသက်သေများသည် ပိတ်ပင်ခံခဲ့ကြရပြီး ဤသစ္စာရှိခရစ်ယာန်များသည် ကျမ်းစာစာပေအနည်းငယ်သာရရှိခဲ့ကြသည်။ သို့တိုင် ညီအစ်ကိုဒိုရီ၏ယုံကြည်ခြင်းသည် သန်မာဆဲဖြစ်၏။ မည်သို့အားဖြင့်နည်း။ “ကျွန်တော့်ပန်းတိုင်ကတော့ ကျမ်းစာကို တစ်နေ့အနည်းဆုံးတစ်နာရီဖတ်ဖို့ဖြစ်တယ်။ ကျွန်တော့်မျက်စိမမှုန်ခင် အနှစ် ၆၀ လောက် အဲဒီလိုဖတ်ခဲ့တယ်” ဟုသူပြောပြသည်။ ကျမ်းစာတစ်အုပ်လုံးကို အယ်လ်ဘေးနီးယားဘာသာစကားဖြင့်ရသည်မှာ မကြာသေးချေ၊ သို့သော် ညီအစ်ကိုဒိုရီသည် ငယ်စဉ်ကတည်းက ဂရိဘာသာစကားကိုသင်ယူခဲ့၍ ယင်းဘာသာဖြင့် သမ္မာကျမ်းစာကိုဖတ်ရှုခဲ့သည်။ ကျမ်းစာကိုမှန်မှန်ဖတ်ရှုခြင်းက ညီအစ်ကိုဒိုရီကို စမ်းသပ်မှုအမျိုးမျိုးကြား ထောက်မခဲ့၍ ကျွန်ုပ်တို့ကိုလည်း ထောက်မပေးနိုင်သည်။

ဘုရားသခင့်နှုတ်မြွက်စကားတော်ကို“အလွန်လိုချင်သောစိတ်ရှိကြလော့”

၃။ ဘုရားသခင့်နှုတ်မြွက်စကားတော်အပေါ် အဘယ်သဘောထားကို ခရစ်ယာန်များပျိုးထောင်သင့်သနည်း။

^၃ ‘နှုတ်[မြွက်]တရား၏နို့စစ်ကို ဖွားစသူငယ်ကဲ့သို့ အလွန်လိုချင်သောစိတ်ရှိကြလော့’ ဟုတမန်တော်ပေတရုကရေးခဲ့သည်။ (၁ ပေတရု ၂:၃) ကလေးငယ်တစ်ဦးသည် မိခင်၏နို့ကိုတောင့်တသကဲ့သို့ပင် မိမိတို့၏ဝိညာဉ်ရေးလိုအပ်ရာကိုသိရှိသောခရစ်ယာန်များသည် ဘုရားသခင့်နှုတ်မြွက်စကားတော်ဖတ်ရှုခြင်း၌ အလွန်မွေ့လျော်ကြသည်။ ဤသို့သင်ခံစားရသလော။ မခံစားရလျှင် စိတ်ပျက်မသွားပါနှင့်။ သင်သည်လည်း ဘုရားသခင့်နှုတ်မြွက်စကားတော်ကို အလွန်လိုချင်သောစိတ်ရှိလာရန် ပြုစုပျိုးထောင်နိုင်ပါသည်။

၄။ ကျမ်းစာဖတ်ရှုခြင်းကို နေ့စဉ်အကျင့်တစ်ခုဖြစ်စေရာ၌ အဘယ်အရာပါဝင်သနည်း။

^၄ ထိုသို့ဖြစ်စေရန် ကျမ်းစာဖတ်ရှုခြင်းကို ဖြစ်နိုင်မည်ဆိုလျှင် တစ်နေ့တစ်ကြိမ် မှန်မှန်ဖတ်သည့်အကျင့်ရှိရန် ဦးဆုံး သင့်ကိုသင်ကြပ်မတ်ပေးပါ။ (တမန်တော် ၁၇:၁၁) သင်သည် နာရှိုဒိုရီကဲ့သို့ ကျမ်းစာကိုနေ့စဉ်တစ်နာရီ ဖတ်နိုင်ချင်မှဖတ်နိုင်မည်။ သို့သော် ဘုရားသခင့်နှုတ်မြွက်စကားတော်ကိုသုံးသပ်ဖို့ နေ့စဉ် အချိန်အချို့ သတ်မှတ်ထားနိုင်ပေသည်။ ခရစ်ယာန်များစွာသည် ကျမ်းစာကိုမိနစ်အနည်းငယ်ဆင်ခြင်ရန် နံနက်စောစောထကြသည်။ တစ်နေ့တာကိုထိုသို့စတင်ခြင်းထက် သာ၍ကောင်းသည့်နည်းရှိပါဦးမည်လော။ အခြားသူများသည် အိပ်ရာမဝင်မီလေးတွင် ကျမ်းစာဖတ်ရှုခြင်းဖြင့် တစ်နေ့တာကိုနိဂုံးချုပ်လိုကြသည်။ အခြားအဆင်ပြေသည့်အချိန်တွင် ကျမ်းစာကိုဖတ်လိုသူများလည်းရှိကြသည်။ အရေးကြီးသည်မှာ ကျမ်းစာကိုမှန်မှန်ဖတ်ရန်ဖြစ်သည်။ ထို့နောက် သင်ဖတ်ပြီးသည့်အရာကိုဆင်ခြင်ဖို့ မိနစ်အနည်းငယ်အချိန်ယူပါ။ ဘုရားသခင့်နှုတ်မြွက်စကားတော်ကို ဖတ်ရှုဆင်ခြင်ခြင်းမှ အကျိုးရရှိခဲ့သူတို့၏ပုံသက်သေတချို့ကို သုံးသပ်ကြည့်ကြစို့။

ဘုရားသခင့်တရားတော်ကိုနှစ်သက်ခဲ့သည့်ဆာလံဆရာတစ်ဦး

၅၊ ၆။ ဆာလံ ၁၁၉ ရေးသူ၏အမည်ကို ကျွန်ုပ်တို့သိမည်မဟုတ်ကြသော်လည်း သူရေးသားခဲ့ရာကိုဖတ်ရှုဆင်ခြင်ခြင်းအားဖြင့် သူ့အကြောင်းအဘယ်အရာသိရှိနိုင်သနည်း။

^၅ ဆာလံ ၁၁၉ ကိုရေးသူသည် ဘုရားသခင့်နှုတ်မြွက်စကားတော်ကို အလွန်လေးမြတ်ခဲ့သည်မှာ အမှန်ပင်။ ထိုဆာလံကျမ်းကို မည်သူရေးခဲ့သနည်း။ ရေးသူကို သမ္မာကျမ်းစာတွင် ဖော်ပြမထားပါ။ သို့ရာတွင် ရှေ့နောက်စကားများအရ သူ့အကြောင်း အသေးစိတ်အချက်အလက်တချို့နှင့် သူ့ဘဝသည် ပြဿနာများနှင့်မကင်းခဲ့ကြောင်း သိရှိရ၏။ ယေဟောဝါအား ဝတ်ပြုသူများဟုယူဆရသည့် သူနှင့်အကျွမ်းတဝင်ရှိသူတချို့သည် ကျမ်းစာမူများကို ထိုဆာလံဆရာကဲ့သို့မနှစ်သက်ခဲ့ကြပါ။ သို့သော်ငြားလည်း ဆာလံဆရာသည် မှန်ရာကိုလုပ်ခြင်းမှ မိမိကိုတားဆီးရန် ထိုသူတို့၏စိတ်ထားလွှမ်းမိုးမှုကို မခံခဲ့ပါ။ (ဆာလံ ၁၁၉:၂၃) သင်သည် သမ္မာကျမ်းစာစံနှုန်းများကိုမလေးစားသူတချို့နှင့် တွဲဖက်နေထိုင်လုပ်ကိုင်ရမည်ဆိုလျှင် ဆာလံဆရာ၏အခြေအနေနှင့် သင့်အခြေအနေစပ်ကြား ဆင်တူမှုများကို သင်တွေ့ရှိနိုင်ပေသည်။

^၆ ဘုရားတရားကြည်ညိုသူတစ်ဦးဖြစ်သော်လည်း ဆာလံဆရာသည် ကိုယ့်ဟာနှင့်ကိုယ်ဖြောင့်မတ်နေသည်ဟု မယူဆခဲ့ပါ။ သူ၏မစုံလင်မှုများကို ပွင့်ပွင့်လင်းလင်းဝန်ခံခဲ့သည်။ (ဆာလံ ၁၁၉:၅၊ ၆၊ ၆၇) သို့ရာတွင် သူသည် အပြစ်၏ထိန်းချုပ်မှုကို မခံခဲ့ပါ။ “လူပျိုသည်မိမိသွားသောလမ်းကို အဘယ်သို့သန့်ရှင်းစေနိုင်ပါမည်နည်း” ဟုသူမေးပြီး “နှုတ်[မြွက်]တော်အတိုင်းသတိပြု” ခြင်းအားဖြင့်ဟု ဖြေဆိုခဲ့သည်။ (ဆာလံ ၁၁၉:၉) ထို့အပြင် ဘုရားသခင့်နှုတ်မြွက်စကားတော်သည် အကောင်းအတွက်တန်ခိုးပါသောစွမ်းအားဖြစ်ကြောင်းကို အလေးပေးဖော်ပြလို၍ ဆာလံဆရာက ဤသို့ထပ်ဆင့်ခဲ့သည်– “ကိုယ်တော်ကိုမပြစ်မှားဘဲနေနိုင်မည်အကြောင်း၊ ဗျာဒိတ်တော်ကို နှလုံးထဲမှာသိုထားပါပြီ။” (ဆာလံ ၁၁၉:၁၁) ဘုရားသခင်အားမပြစ်မှားရန် ကျွန်ုပ်တို့ကိုအကူအညီပေးနိုင်သည့်စွမ်းအားသည် အမှန်ပင်တန်ခိုးရှိလှသည်တကား!

၇။ လူငယ်များသည် နေ့စဉ် ကျမ်းစာဖတ်ရန်လိုအပ်ကြောင်းကို အဘယ်ကြောင့် အထူးသဖြင့် သတိပြုသင့်သနည်း။

^၇ ခရစ်ယာန်လူငယ်များသည် ဆာလံဆရာ၏စကားများကို ကောင်းစွာသုံးသပ်သင့်သည်။ ခရစ်ယာန်လူငယ်များသည် ယနေ့တိုက်ခိုက်မှုကိုခံနေကြရ၏။ စာတန်သည် ယေဟောဝါအားဝတ်ပြုသည့် တက်သစ်စလူမျိုးဆက်ကို ယိုယွင်းစေရန်လွန်စွာလိုလား၏။ စာတန်၏ပန်းတိုင်မှာ ခရစ်ယာန်လူငယ်များအား သွေးသားဆန္ဒများကိုအရှုံးပေးပြီး ဘုရားသခင်၏ပညတ်များကို ချိုးဖောက်စေရန်သွေးဆောင်ဖို့ဖြစ်သည်။ ရုပ်ရှင်နှင့် ရုပ်မြင်သံကြားအစီအစဉ်များသည် စာတန်၏အတွေးအခေါ်ကို ထင်ဟပ်လေ့ရှိသည်။ ထိုအစီအစဉ်များမှ ကျော်ကြားသူများသည် ဆွဲဆောင်မှုရှိပြီး ချစ်ခင်စရာဖြစ်ဟန်ရှိ၏; သူတို့စပ်ကြားအကျင့်ပျက်ပြားမှုကို သာမန်ကိစ္စအဖြစ် သရုပ်ဖော်ထားသည်။ အဘယ်သဘောသက်ရောက်စေသနည်း။ ‘လက်မထပ်ရသေးတဲ့လူတွေ တစ်ယောက်ကိုတစ်ယောက်တကယ်ချစ်ကြတယ်ဆိုရင် သံဝါသပြုလို့ရပါတယ်’ ဟူ၍ဖြစ်သည်။ နှစ်စဉ် ခရစ်ယာန်လူငယ်အတော်အတန်သည် ထိုသို့သောဆင်ခြေဆင်လက်၏သားကောင်ဖြစ်ခဲ့ကြခြင်းမှာ ဝမ်းနည်းစရာပင်။ အချို့သည် ယုံကြည်ခြင်းသင်္ဘောပျက်ခဲ့ကြသည်။ ဖိအားပေးမှုကားရှိနေလျက်ပင်! သို့သော် ဖိအားပေးမှုသည် လူငယ်များမအောင်မြင်နိုင်လောက်အောင် ပြင်းထန်လွန်းသလော။ လုံးဝမဟုတ်ပါ! ယေဟောဝါသည် မကောင်းသောဆန္ဒများကို ကျော်လွှားနိုင်ဖို့ ခရစ်ယာန်လူငယ်များအတွက် နည်းတစ်နည်းစီစဉ်ပေးထားသည်။ သူတို့သည် ‘နှုတ်မြွက်စကားတော်အတိုင်းသတိပြု၍ နှလုံးထဲမှာ ဘုရားသခင့်မိန့်ဆိုချက်များကိုသိုထားခြင်း’ အားဖြင့် စာတန်၏လက်နက်မှန်သမျှကို ခုခံနိုင်ပါသည်။ ကျမ်းစာဖတ်ရှုဆင်ခြင်ခြင်းကို မှန်မှန်ပြုလုပ်ဖို့အတွက် သင်မည်မျှအချိန်ကုန်ခံသနည်း။

၈။ ဤစာပိုဒ်တွင်ဖော်ပြထားသောပုံဥပမာများသည် မောရှေ၏ပညတ်ကို လေးမြတ်မှုတိုးပွားစေရန် မည်သို့ကူညီပေးနိုင်သနည်း။

^၈ ဆာလံ ၁၁၉ ကိုရေးသူက “ကိုယ်တော်၏တရားကို အကျွန်ုပ်သည်အလွန်နှစ်သက်ပါ၏” ဟုဆိုသည်။ (ဆာလံ ၁၁၉:၉၇) အဘယ်တရားကို ဆိုလိုနေသနည်း။ မောရှေ၏ပညတ်ဥပဒေသအပါအဝင် ယေဟောဝါဖော်ပြသောစကားဖြစ်သည်။ ဤပညတ်ဥပဒေသများကို တချို့ကမြင်လျှင်မြင်ချင်း ခေတ်နောက်ကျသည်ဟုယူမှတ်ကာ ပယ်ကောင်းပယ်မည်ဖြစ်ပြီး ယင်းကို လူတို့မည်သို့နှစ်သက်နိုင်မည်နည်းဟု တွေးမိကြပေမည်။ သို့ရာတွင် မောရှေပညတ်၏ကဏ္ဍအမျိုးမျိုးကို ဆာလံဆရာကဲ့သို့ ဆင်ခြင်သုံးသပ်သည့်အခါ ထိုပညတ်နောက်ကွယ်ရှိဉာဏ်ပညာကို ကျွန်ုပ်တို့လေးမြတ်နိုင်ကြပါသည်။ ပညတ်တရား၏ပရောဖက်ပြုချက်ကဏ္ဍများစွာအပြင် သန့်ရှင်းမှုနှင့် ကောင်းသောကျန်းမာရေးကို တိုးပွားစေသည့် အညစ်အကြေးစွန့်ခြင်းနှင့် အစားအစာနှင့်ပတ်သက်သော စည်းကမ်းသတ်မှတ်ချက်များပါရှိသည်။ (ဝတ်ပြုရာ ၇:၂၃၊ ၂၄၊ ၂၆; ၁၁:၂-၈) ပညတ်တရားက အရောင်းအဝယ်လုပ်ငန်းများတွင် ရိုးသားမှုကိုအားပေးထားပြီး ဆင်းရဲသည့်ဝတ်ပြုသူချင်းများကို စာနာမှုပြဖို့ ဣသရေလလူများကို တိုက်တွန်းထားသည်။ (ထွက်မြောက်ရာ ၂၂:၂၆၊ ၂၇; ၂၃:၆; ဝတ်ပြုရာ ၁၉:၃၅၊ ၃၆; တရားဟောရာ ၂၄:၁၇-၂၁) တရားရေးဆုံးဖြတ်ချက်များကို မျက်နှာမလိုက်ဘဲချမှတ်ကြရန်ဖြစ်၏။ (တရားဟောရာ ၁၆:၁၉; ၁၉:၁၅) ဆာလံ ၁၁၉ ကိုရေးသူသည် ဘဝအတွေ့အကြုံရှိလာသောအခါ ဘုရားသခင့်နှုတ်မြွက်စကားတော်ကို ကျင့်သုံးသူတို့အတွက် အခြေအနေများကောင်းမွန်လာပုံကို အမှန်သိမြင်ခဲ့ပြီး ယင်းကိုပိုမိုချစ်မြတ်နိုးလာခဲ့သည်။ အလားတူ ယနေ့ခရစ်ယာန်များသည် သမ္မာကျမ်းစာမူများကိုကျင့်သုံးရာတွင် အောင်မြင်သည်နှင့်အမျှ ဘုရားသခင်၏နှုတ်မြွက်စကားတော်ကိုနှစ်သက်လေးမြတ်မှုသည် ပြင်းပြလာသည်။

ထူးခြားဝံ့ခဲ့သောမင်းသားတစ်ပါး

၉။ ဘုရားသခင့်နှုတ်မြွက်စကားတော်နှင့်ပတ်သက်၍ အဘယ်သဘောထားကို ဟေဇကိပျိုးထောင်ခဲ့သနည်း။

^၉ ဆာလံ ၁၁၉ ပါအကြောင်းအရာများသည် ဟေဇကိငယ်ရွယ်စဉ်မင်းသားဘဝနှင့်ပတ်သက်၍ ကျွန်ုပ်တို့သိရှိခဲ့ရာနှင့် အမှန်ပင်ကိုက်ညီသည်။ ထိုဆာလံကျမ်းကိုရေးသူမှာ ဟေဇကိဖြစ်သည်ဟု ကျမ်းပညာရှင်အချို့ကဆိုကြသည်။ ယင်းသည် မသေချာသော်လည်း ဟေဇကိသည် ဘုရားသခင့်နှုတ်မြွက်စကားတော်ကို အလွန်လေးမြတ်ခဲ့ကြောင်း ကျွန်ုပ်တို့သိကြရသည်။ ဆာလံ ၁၁၉:၉၇ ပါစကားသည် သူ၏စိတ်နှင့်တွေ့ကြောင်း သူ၏ဘဝပုံစံအားဖြင့်ဖော်ပြခဲ့သည်။ ဟေဇကိနှင့်ပတ်သက်၍ သမ္မာကျမ်းစာက ဤသို့ဆိုသည်– “ထာဝရဘုရား၌ဆည်းကပ်၍ နောက်တော်သို့အစဉ်အမြဲလိုက်သဖြင့် မောရှေ၌ထာဝရဘုရားထားတော်မူသော ပညတ်တော်တို့ကိုစောင့်ရှောက်လေ၏။”—၄ ဓမ္မရာဇဝင် ၁၈:၆။

၁၀။ ဘုရားတရား ကြည်ညိုသည့်မိဘများလက်အောက်တွင် ကြီးပြင်းမလာသည့် ခရစ်ယာန်များအတွက် ဟေဇကိ၏ပုံသက်သေသည် မည်သို့အားရှိစရာဖြစ်သနည်း။

^၁၀ မှတ်တမ်းအားလုံးအရ ဟေဇကိသည် ဘုရားတရားကြည်ညိုသည့်မိသားစုတွင် ကြီးပြင်းလာခဲ့သည်မဟုတ်ပါ။ သူ၏ဖခင် ဘုရင်အာခတ်သည် အနည်းဆုံးသားတစ်ဦး—ဟေဇကိ၏ညီအစ်ကိုအရင်း—ကို မှားယွင်းသောဘုရားသခင်ထံ မီးဖြင့်ပူဇော်ခဲ့သည့် ယုံကြည်ခြင်းကင်းမဲ့သော ရုပ်ပုံကိုးကွယ်သူတစ်ဦးဖြစ်ခဲ့သည်! (၄ ဓမ္မရာဇဝင် ၁၆:၃) ဤမကောင်းသောပုံသက်သေရှိလျက်ပင် ဟေဇကိသည် ဘုရားသခင့်နှုတ်မြွက်စကားတော်ကို အကျွမ်းတဝင်ရှိခြင်းဖြင့် အယူမှားသောသြဇာများမှ ‘မိမိသွားသောလမ်းကိုသန့်ရှင်း’ စေနိုင်ခဲ့သည်။—၂ ရာဇဝင်ချုပ် ၂၉:၂။

၁၁။ ဟေဇကိသတိပြုမိသည့် သစ္စာမရှိသူဖခင်၏အသက်တာသည် မည်သို့ဖြစ်ပျက်ခဲ့သနည်း။

^၁၁ ဟေဇကိကြီးပြင်းလာစဉ် ရုပ်ပုံကိုးကွယ်သောဖခင်သည် နိုင်ငံတော်ရေးရာများကို မည်သို့ကိုင်တွယ်ခဲ့ကြောင်း ကိုယ်တိုင်တွေ့မြင်ခဲ့သည်။ ယုဒပြည်ကို ရန်သူများဝန်းရံထား၏။ ရှုရိရှင်ဘုရင်ရေဇိန်သည် ဣသရေလရှင်ဘုရင်ပေကာနှင့်ပူးပေါင်းပြီး ယေရုရှလင်မြို့ကိုဝိုင်းထားခဲ့သည်။ (၄ ဓမ္မရာဇဝင် ၁၆:၅၊ ၆) ယုဒပြည်ကိုအောင်မြင်စွာတိုက်၍ ယုဒပြည်ရှိမြို့အချို့ကိုပင်သိမ်းပိုက်ခဲ့ကြသည့် ဧဒုံလူမျိုးနှင့် ဖိလိတ္တိလူမျိုးများရှိခဲ့ကြသည်။ (၂ ရာဇဝင်ချုပ် ၂၈:၁၆-၁၉) အာခတ်သည် ဤအရေးကိစ္စများကို မည်သို့ကိုင်တွယ်ဖြေရှင်းခဲ့သနည်း။ ရှုရိနိုင်ငံကိုတိုက်ခိုက်ရန် ယေဟောဝါထံ အကူအညီတောင်းခံမည့်အစား အာရှုရိဘုရင်ထံ ဗိမာန်တော်ဘဏ္ဍာအပါအဝင် ရွှေငွေများကိုလာဘ်ထိုး၍ အကူအညီတောင်းခဲ့သည်။ သို့သော် ယင်းသည် ယုဒပြည်အတွက် တည်မြဲသောငြိမ်းချမ်းရေးကို မဆောင်ကြဉ်းပေးခဲ့ပါ။—၄ ဓမ္မရာဇဝင် ၁၆:၆၊ ၈။

၁၂။ ဟေဇကိသည် အဘယ်အရာကိုပြုလုပ်ခြင်းအားဖြင့် ဖခင်ဖြစ်သူ၏အမှားများကိုမပြုမိဘဲ ရှောင်နိုင်ခဲ့မည်နည်း။

^၁၂ နောက်ဆုံးတွင် အာခတ်ကွယ်လွန်ခဲ့ပြီး ဟေဇကိသည် အသက် ၂၅ နှစ်အရွယ်တွင် ဘုရင်ဖြစ်လာခဲ့သည်။ (၂ ရာဇဝင်ချုပ် ၂၉:၁) သူသည် ငယ်ရွယ်သူဖြစ်သော်လည်း ယင်းက အောင်မြင်သောဘုရင်တစ်ပါးဖြစ်လာဖို့ မတားဆီးခဲ့ပါ။ သစ္စာမဲ့ဖခင်၏အကျင့်အကြံကိုတုပမည့်အစား ယေဟောဝါ၏ပညတ်ကို လိုက်လျှောက်ခဲ့သည်။ ယင်းတွင် ဘုရင်များအတွက် ဤအထူးမိန့်မှာချက်ပါဝင်သည်– “ထိုရှင်ဘုရင်သည် သားစဉ်မြေးဆက်နှင့်တကွ၊ ဣသရေလအမျိုး၌ အသက်တာရှည်စွာစိုးစံခြင်းအလို့ငှာ၊ သူ၏ဘုရားသခင်ကိုကြောက်ရွံ့၍ ဤပညတ်တရားစကားတော်အလုံးစုံတို့ကို ကျင့်စောင့်အောင် သွန်သင်မည်အကြောင်း . . . နန်းတော်ပေါ်မှာထိုင်သောအခါ လေဝိသားယဇ်ပုရောဟိတ်၌ရှိသော ဤဓမ္မပညတ်တရားစာကို ရေးကူး၍ လက်ခံစာကို တစ်သက်လုံးစောင့်ရှောက်ကြည့်ရှုဖတ်ရွတ်ရမည်။” (တရားဟောရာ ၁၇:၁၈-၂၀) ဘုရားသခင့်နှုတ်မြွက်စကားတော်ကို နေ့စဉ်ဖတ်ရှုခြင်းအားဖြင့် ဟေဇကိသည် ယေဟောဝါအားကြောက်ရွံ့တတ်လာမည်ဖြစ်ပြီး ဘုရားတရားမကြည်ညိုသည့်ဖခင်၏ အမှားများကိုထပ်မပြုမိရန် ရှောင်ကြဉ်နိုင်ပေမည်။

၁၃။ ခရစ်ယာန်တစ်ဦးသည် ဝိညာဉ်ရေးသဘောအရ လုပ်ဆောင်မှုမှန်သမျှအောင်မြင်မည်ဟု မည်သို့စိတ်ချနိုင်သနည်း။

^၁၃ ဘုရားသခင့်နှုတ်မြွက်စကားတော်ကို မပြတ်တွေးတောဖို့ ဣသရေလဘုရင်များသာတိုက်တွန်းခံခဲ့ကြရသည်မဟုတ်ဘဲ ဘုရားသခင်ကိုကြောက်ရွံ့သည့်ဣသရေလလူအားလုံး ထိုသို့ပြုရန်တိုက်တွန်းခံခဲ့ကြရသည်။ အမှန်တကယ်ပျော်ရွှင်သူတစ်ဦးသည် “ထာဝရဘုရား၏တရားတော်၌မွေ့လျော်၍၊ တရားတော်ကို နေ့ညမပြတ်ဆင်ခြင်အောက်မေ့သောသူ” ဟုဆာလံပထမအခန်းတွင် ဖော်ပြထားသည်။ (ဆာလံ ၁:၁၊ ၂) ထိုသို့သောသူသည် “ပြုလေသမျှတို့၌ အောင်လိမ့်” မည်ဟုဆာလံဆရာကဆိုသည်။ (ဆာလံ ၁:၃) တစ်ဖက်တွင် ယေဟောဝါဘုရားသခင်၌ ယုံကြည်ခြင်းကင်းမဲ့သူတစ်ဦးကို သမ္မာကျမ်းစာက “ထိုသို့သောသူသည် စိတ်နှစ်ခွရှိသောသူ၊ ပြုလေသမျှတို့၌ မတည်ကြည်သောသူဖြစ်” ၏ဟုဆိုသည်။ (ယာကုပ် ၁:၈) ကျွန်ုပ်တို့အားလုံးသည် ပျော်ရွှင်ပြီး အောင်မြင်လိုကြ၏။ အဓိပ္ပာယ်ရှိရှိ ကျမ်းစာကို မှန်မှန်ဖတ်ရှုခြင်းသည် ကျွန်ုပ်တို့ကိုပျော်ရွှင်စေနိုင်ပါသည်။

ဘုရားသခင့်နှုတ်မြွက်စကားတော်သည်ယေရှုကိုထောက်မခဲ့

၁၄။ ယေရှုသည် ဘုရားသခင့်နှုတ်မြွက်စကားတော်ကိုချစ်မြတ်နိုးကြောင်း မည်သို့တင်ပြခဲ့သနည်း။

^၁၄ အခါသမယတစ်ခုတွင် ယေရှု၏မိဘများသည် သူတို့၏သားအား ယေရုရှလင်ဗိမာန်တော်တွင် ဆရာများအလယ်၌ထိုင်နေသည်ကို တွေ့ရှိခဲ့ကြသည်။ ဘုရားသခင့်တရားတော်ကို တတ်ကျွမ်းသူများသည် “သူ၏ပညာကိုလည်းကောင်း၊ စကားအဖြေကိုလည်းကောင်းအံ့သြ” ခဲ့ကြ၏! (လုကာ ၂:၄၆၊ ၄၇) ယင်းသည် ယေရှု ၁၂ အရွယ်တွင်ဖြစ်၏။ မှန်ပါသည်၊ ငယ်ရွယ်စဉ်ကတည်းက ကိုယ်တော်သည် ဘုရားသခင့်နှုတ်မြွက်စကားတော်ကို နှစ်သက်ခဲ့သည်မှာ ထင်ရှားသည်။ နောက်ပိုင်းတွင် ယေရှုသည် ကျမ်းချက်များကိုအသုံးပြုပြီး စာတန်ကို ဤသို့အပြစ်တင်ခဲ့သည်– “လူသည်မုန့်အားဖြင့်သာ အသက်ကိုမွေးရမည်မဟုတ်။ ဘုရားသခင်မိန့်တော်မူသမျှအားဖြင့် အသက်ကိုမွေးရမည်။” (မဿဲ ၄:၃-၁၀) ၎င်းနောက်များမကြာမီတွင် ယေရှုသည် ကျမ်းချက်များကိုအသုံးပြုကာ နာဇရက်မြို့ရှိ သူ၏မြို့သားများကို ဟောပြောခဲ့သည်။—လုကာ ၄:၁၆-၂၁။

၁၅။ အခြားသူများကို ဟောပြောသောအခါ ယေရှုသည် ပုံသက်သေတစ်ခုကို မည်သို့ထားခဲ့သနည်း။

^၁၅ ယေရှုသည် မိမိသွန်သင်ခြင်းအတွက် အထောက်အထားအဖြစ် ဘုရားသခင့်နှုတ်မြွက်စကားတော်ကို မကြာခဏကိုးကားခဲ့၏။ ကိုယ်တော့်ပရိသတ်များသည် “ဆုံးမ . . . ခြင်းကို အလွန်အံ့သြကြ၏။” (မဿဲ ၇:၂၈) အံ့သြလည်းအံ့သြစရာပါပေ၊ အကြောင်းမှာ ယေရှု၏သွန်သင်ချက်များသည် ယေဟောဝါဘုရားသခင် ကိုယ်တော်တိုင်ထံမှဖြစ်သည်! ယေရှုက ဤသို့ဆိုခဲ့သည်– “ငါဟောသော[တရား]သည် ငါ၏[တရား]မဟုတ်။ ငါ့ကိုစေလွှတ်တော်မူသောသူ၏ [တရား]ဖြစ်၏။ ကိုယ်အလိုအလျောက်ဟောပြောသောသူသည် မိမိဘုန်းအသရေကိုရှာတတ်၏။ မိမိကိုစေလွှတ်တော်မူသောသူ၏ ဘုန်းအသရေကိုရှာသောသူမူကား ယုံလောက်သောသူဖြစ်၏။ ထိုသူ၌မုသာ [“မတရားမှု၊” ကဘ] မရှိ။”—ယောဟန် ၇:၁၆၊ ၁၈။

၁၆။ ယေရှုသည် ဘုရားသခင့်နှုတ်မြွက်စကားတော်အပေါ် ချစ်မြတ်နိုးမှုကို အဘယ်အတိုင်းအတာအထိ ဖော်ပြခဲ့သနည်း။

^၁၆ ဆာလံ ၁၁၉ ကိုရေးသူနှင့်မတူဘဲ ယေရှု၌ “မတရားမှုမရှိ” ခဲ့ပါ။ ကိုယ်တော်သည် “အသေခံခြင်းတိုင်အောင် အစေကျွန်ခံ၍ ကိုယ်ကိုကိုယ်နှိမ့်ချတော်မူ” သောဘုရားသခင်၏သား အပြစ်မဲ့သူဖြစ်ခဲ့သည်။ (ဖိလိပ္ပိ ၂:၈; ဟေဗြဲ ၇:၂၆) ယေရှုသည် စုံလင်ခဲ့လင့်ကစား ဘုရားသခင့်ပညတ်တော်ကိုလေ့ကျက်နာယူခဲ့သည်။ ယင်းသည် ကိုယ်တော့်အားသစ္စာတည်ကြည်စေနိုင်ခဲ့သည့် သော့ချက်တစ်ခုဖြစ်သည်။ ပေတရုသည် မိမိသခင်ဖမ်းဆီးခြင်းမခံရရန် ကြိုးစားကာကွယ်ဖို့ ဓားကိုအသုံးပြုသောအခါ ယေရှုသည် တမန်တော်ကို အပြစ်တင်ခဲ့ပြီး ဤသို့မေးမြန်းခဲ့သည်– “ယခုပင် ငါ့အဘကိုငါတောင်းနိုင်သည်ကိုလည်းကောင်း၊ တောင်းလျှင် ကောင်းကင်တမန်တစ်ဆယ့်နှစ်တပ်မက ငါ့ထံသို့စေလွှတ်တော်မူမည်ကိုလည်းကောင်း သင်သည်မထင်သလော။ သို့ဖြစ်လျှင် ဤသို့သောအမှုအရာတို့သည် ဖြစ်ရမည်ဟူသောကျမ်းစာချက်သည် အဘယ်သို့ပြည့်စုံအံ့နည်း။” (မဿဲ ၂၆:၅၃၊ ၅၄) မှန်ပါသည်၊ ကျမ်းချက်ပြည့်စုံမှုသည် ယေရှုအတွက် ရက်ရက်စက်စက်အရှက်တကွဲသေခြင်းမှ လွတ်မြောက်ခြင်းထက်ပို အရေးကြီးခဲ့သည်။ ဘုရားသခင့်နှုတ်မြွက်စကားတော်ကို တကယ်ထူးခြားစွာချစ်မြတ်နိုးခြင်းပါတကား!

ခရစ်တော်ကိုတုပသော အခြားသူများ

၁၇။ ဘုရားသခင့်နှုတ်မြွက်စကားတော်သည် တမန်တော်ပေါလုအတွက် မည်မျှအရေးကြီးခဲ့သနည်း။

^၁၇ တမန်တော်ပေါလုက “ငါသည် ခရစ်တော်၏နည်းတူကျင့်သကဲ့သို့ သင်တို့လည်းငါ့နည်းတူကျင့်ကြလော့” ဟုခရစ်ယာန်ချင်းများထံ ရေးသားခဲ့သည်။ (၁ ကောရိန္သု ၁၁:၁) မိမိ၏သခင်ကဲ့သို့ ပေါလုသည် ကျမ်းစာကိုချစ်မြတ်နိုးတတ်လာခဲ့သည်။ သူက “ငါသည် အတွင်းလူအားဖြင့် ဘုရားသခင်၏ပညတ်တရားတော်ကို နှစ်သက်၏” ဟုဝန်ခံသည်။ (ရောမ ၇:၂၂) ပေါလုသည် ဘုရားသခင့်နှုတ်မြွက်စကားတော်ကို မကြာခဏကိုးကားခဲ့သည်။ (တမန်တော် ၁၃:၃၂-၄၁; ၁၇:၂၊ ၃; ၂၈:၂၃) သူချစ်ခင်သည့် အမှုဆောင်ဖက်ချင်းဖြစ်သော တိမောသေထံ နောက်ဆုံးညွှန်ကြားချက်များပေးသောအခါ ဘုရားသခင့်နှုတ်မြွက်စကားတော်သည် “ဘုရားသခင်၏လူ” တိုင်း၏ နေ့စဉ်အသက်တာ၌ပါဝင်သင့်သည့် အရေးကြီးသည့်အပိုင်းကို ပေါလုအလေးပေးဖော်ပြခဲ့သည်။—၂ တိမောသေ ၃:၁၅-၁၇။

၁၈။ မျက်မှောက်ခေတ်တွင် ဘုရားသခင့်နှုတ်မြွက်စကားတော်ကိုလေးစားခဲ့သည့် ပုံသက်သေတစ်ဦးကို ဖော်ပြပါ။

^၁၈ မျက်မှောက်ခေတ်တွင် ယေဟောဝါ၏သစ္စာရှိကျေးကျွန်များစွာသည် ဘုရားသခင့်နှုတ်မြွက်စကားတော်ကို ယေရှုချစ်မြတ်နိုးသကဲ့သို့ တုပခဲ့ကြပြီ။ ဤရာစုနှစ်အစောပိုင်း၌ လူငယ်တစ်ဦးသည် မိတ်ဆွေတစ်ဦးထံမှ ကျမ်းစာတစ်အုပ်ရရှိခဲ့သည်။ သူ့အပေါ် ဤအဖိုးတန်သောလက်ဆောင်၏အကျိုးသက်ရောက်မှုကို သူက ဤသို့ဖော်ပြခဲ့သည်– “နေ့စဉ်နေ့တိုင်း ကျမ်းတစ်စိတ်တစ်ပိုင်းကို မဖြစ်မနေဖတ်ဖို့ စိတ်ပိုင်းဖြတ်ခဲ့တယ်။” ထိုလူငယ်သည် ဖရက်ဒရစ်ဖရဲန့်ဇ်ဖြစ်သည်၊ သမ္မာကျမ်းစာအပေါ် သူ၏ချစ်မြတ်နိုးမှုက အသက်တာရှည်ရှည်နှင့် အောင်မြင်စွာဖြင့် ယေဟောဝါ၏လုပ်ငန်းတော်ကို ထမ်းဆောင်ခွင့်ရရှိစေခဲ့သည်။ ကျမ်းစာမှအခန်းကြီးများတစ်ခန်းလုံးကို အလွတ်ရွတ်ဆိုနိုင်သည့် သူ့မှတ်ဉာဏ်အတွက် သူ့ကိုတမ်းတသတိရလျက်ရှိကြသည်။

၁၉။ လူတချို့သည် သီအိုကရက်တစ်ဓမ္မအမှုကျောင်းအတွက် ပတ်စဉ်ကျမ်းစာဖတ်ရှုခြင်းကိုပြုလုပ်ရန် မည်သို့ဇယားဆွဲကြသနည်း။

^၁၉ ယေဟောဝါသက်သေများသည် ကျမ်းစာမှန်မှန်ဖတ်ရှုခြင်းကို အလွန်အလေးအနက်ထားကြသည်။ ပတ်စဉ် ၎င်းတို့၏ခရစ်ယာန်အစည်းအဝေးတစ်ခုဖြစ်သော သီအိုကရက်တစ်ဓမ္မအမှုကျောင်းအတွက် ပြင်ဆင်ရာ၌ ကျမ်းစာအခန်းကြီးအတော်များများကို ဖတ်ရှုကြသည်။ သတ်မှတ်ထားသည့်ကျမ်းစာဖတ်ရှုခြင်း ပေါ်လွင်ချက်များကို အစည်းအဝေးတွင် ဆွေးနွေးကြသည်။ သက်သေခံတချို့သည် ပတ်စဉ်ကျမ်းစာဖတ်ရှုခြင်းကို အပိုင်းကလေးခုနစ်ပိုင်းခွဲပြီး တစ်ပိုင်းစီကိုနေ့စဉ်ဖတ်ရှုဖို့ ပို၍အဆင်ပြေကြောင်းတွေ့ရှိကြသည်။ ဖတ်ရှုကြစဉ် ထိုအကြောင်းအရာကို သူတို့ဆင်ခြင်သုံးသပ်ကြသည်။ ဖြစ်နိုင်သည့်အခါ ကျမ်းစာအခြေပြုစာပေများ၏အကူအညီဖြင့် ထပ်ဆင့်သုတေသနပြုကြသည်။

၂၀။ ကျမ်းစာမှန်မှန်ဖတ်ရှုခြင်းအတွက် အချိန်ရရန် အဘယ်အရာလိုသနည်း။

^၂၀ ကျမ်းစာကိုမှန်မှန်ဖတ်ရှုရန် အခြားလုပ်ငန်းဆောင်တာများမှ ‘အချိန်ကိုဝယ်ယူ’ ဖို့လိုပေမည်။ (ဧဖက် ၅:၁၆၊ ကဘ) သို့ရာတွင် ရရှိမည့်အကျိုးကျေးဇူးများသည် စွန့်လွှတ်လိုက်သည့်အရာမှန်သမျှထက် အလေးသာပါလိမ့်မည်။ နေ့စဉ်ကျမ်းစာဖတ်ရှုသည့်အကျင့်ရှိလာသည်နှင့်အမျှ ဘုရားသခင့်နှုတ်မြွက်စကားတော်အပေါ် သင့်ချစ်မြတ်နိုးမှုကြီးထွားလာပါလိမ့်မည်။ များမကြာမီ သင်သည် ဆာလံဆရာနှင့်အတူ “ကိုယ်တော်၏တရားကို အကျွန်ုပ်သည်အလွန်နှစ်သက်ပါ၏။ တစ်နေ့လုံးဆင်ခြင်အောက်မေ့လျက်နေပါ၏” ဟုပြောဆိုရန် လှုံ့ဆော်ခံရပါလိမ့်မည်။ (ဆာလံ ၁၁၉:၉၇) နောက်ဆောင်းပါးတွင် ဖော်ပြမည်ဖြစ်သကဲ့သို့ ထိုသို့သောသဘောထားသည် ယခုနှင့်အနာဂတ်တွင် ကြီးမားသောအကျိုးကိုရရှိစေပါလိမ့်မည်။

သင်မှတ်မိသလော

◻ ဆာလံ ၁၁၉ ကိုရေးသူသည် ဘုရားသခင့်နှုတ်မြွက်စကားတော်ကို အလွန်ချစ်မြတ်နိုးကြောင်း မည်သို့ဖော်ပြခဲ့သနည်း။

◻ ယေရှုနှင့် ပေါလုတို့၏ပုံသက်သေမှ အဘယ်သင်ခန်းစာများကို ကျွန်ုပ်တို့ရယူနိုင်သနည်း။

◻ ဘုရားသခင့်နှုတ်မြွက်စကားတော်ကို ကျွန်ုပ်တို့ကိုယ်တိုင်ချစ်မြတ်နိုးမှုတိုးပွားစေရန် မည်သို့ပြုလုပ်နိုင်သနည်း။

[စာမျက်နှာ ၁၀ ပါ ရုပ်ပုံ]

သစ္စာရှိသောဘုရင်များသည် ဘုရားသခင့်နှုတ်မြွက်စကားတော်ကို မှန်မှန်ဖတ်ခဲ့ကြရသည်။ အသင်ကော

[စာမျက်နှာ ၁၂ ပါ ရုပ်ပုံ]

ယေရှုသည် ငယ်စဉ်ကတည်းကပင် ဘုရားသခင့်နှုတ်မြွက်စကားတော်ကိုချစ်မြတ်နိုးခဲ့