ဂိလဒ်၏ ၁၀၈ ကြိမ်မြောက် သင်တန်းသားများ မြင့်မြတ်သော လုပ်ငန်းတော်ပေးဆက်ရန် တိုက်တွန်းခံရ

သမ္မာကျမ်းစာ၌ ဘုရားသခင်အားဝတ်ပြုခြင်းကို ‘မြင့်မြတ်သောလုပ်ငန်းတော်’ ဟူသောအသုံးအနှုန်းဖြင့် ရည်ညွှန်းလေ့ရှိ၏။ ယင်းက ဘုရားသခင်၏အမှုတော်ဆောင်ခြင်းကို ရည်ညွှန်းသည့် ဂရိစကားလုံးတစ်လုံးမှ ဆင်းသက်လာသည်။ (ရောမ ၉:၄) ဂိလဒ်ကင်းမျှော်စင်သမ္မာကျမ်းစာကျောင်း၏ ၁၀၈ ကြိမ်မြောက် သင်တန်းဆင်းပွဲအစီအစဉ် ကြားနာခဲ့ကြသူ ၅,၅၆၂ ဦးသည် ယေဟောဝါဘုရားသခင်နှစ်သက်လက်ခံနိုင်မည့် မြင့်မြတ်သောလုပ်ငန်းတော်ကို သင်တန်းဆင်းများ ထမ်းဆောင်နိုင်ကြရန် သူတို့အတွက် အကူအညီဖြစ်စေမည့် လက်တွေ့ကျဆုံးမစကားများအား ဟောပြောသူတို့ပေးခဲ့ခြင်းကို ကြားနာခဲ့ကြရ၏။a

ယေဟောဝါသက်သေများ၏ အုပ်ချုပ်ရေးအဖွဲ့ဝင် သီအိုဒေါရ်ဂျဲရက်စ်က သဘာပတိအဖြစ် တာဝန်ထမ်းဆောင်ခဲ့၏။ အစီအစဉ်ကို သီချင်းနံပါတ် ၅၂၊ “တို့ဖခင်နာမတော်” နှင့်ဖွင့်လှစ်ခဲ့သည်။ ထိုသီချင်း၏ ဒုတိယအပိုဒ်က ဤသို့– “ချီးမြှောက်ဖို့ရာနည်းများရှာကြံ ပြိုင်ဘက်မရှိ မြတ်နာမ။” ၎င်းသည် (နိုင်ငံပေါင်း ၁၀ နိုင်ငံမှဖြစ်သော) သင်တန်းဆင်းများ၏ ခရစ်ယာန်သာသနာပြု တာဝန်ကျရာနေရာများဖြစ်သည့် ၁၇ နိုင်ငံ၌ သူတို့အားလေ့ကျင်ပေးခံရမှုကို အသုံးပြုရန် သူတို့၏လှိုက်လှဲသောစိတ်ဆန္ဒကို အမှန်ပင်ဖော်ပြသည်။

သူ၏နိဒါန်းတွင် ညီအစ်ကိုဂျဲရက်စ်က ကျောင်းသားများကို နိုင်ငံခြားလယ်ကွင်းတွင် အမှုဆောင်ရန် သူတို့အားအသင့်ဖြစ်စေခဲ့သော အားသွန်ခွန်စိုက် သမ္မာကျမ်းစာလေ့လာခဲ့သည့် ငါးလတာကာလကို အထူးအာရုံစိုက်စေခဲ့၏။ ယင်းက “ခပ်သိမ်းသောအရာကိုစုံစမ်း” စစ်ဆေးကြရန် အကူအညီပေးခဲ့၏၊ ဆိုလိုသည်မှာ ဘုရားသခင့်နှုတ်မြွက်စကားတော်၏အလင်း၌ ယခင်က သူတို့သိရှိခဲ့ရာကို နှိုက်နှိုက်ချွတ်ချွတ် ဆန်းစစ်ရန်ဖြစ်ပြီး “ကောင်းသောအရာကို အမြဲကိုင်စွဲ” ထားကြဖို့ဖြစ်သည်။ (၁ သက်သာလောနိတ် ၅:၂၁) သူတို့သည် ယေဟောဝါအား၊ ကိုယ်တော်၏နှုတ်မြွက်စကားတော်နှင့် သူတို့လေ့ကျင့်ခံခဲ့ရသည့် တာဝန်များကို သစ္စာရှိရှိစွဲမြဲစွာထမ်းရွက်ကြရန် သူက အားပေးခဲ့သည်။ ယင်းတို့အားလုံးကို သူတို့ပြုလုပ်ကြရာတွင် အဘယ်အရာက ကူညီပေးလိမ့်မည်နည်း။

မြင့်မြတ်သောလုပ်ငန်းတော်ထမ်းဆောင်ရန် လက်တွေ့ကျအကြံပေးချက်

ဗေသလစီမံခန့်ခွဲရေးကော်မတီဝင် လော်န်စကီလင်က “ကျိုးကြောင်းညီညွတ်မှု စမ်းသပ်ချက်ကို သင်အောင်မည်လော” အကြောင်းဟောခဲ့၏။ ဘုရားသခင့်ဉာဏ်ပညာတော်ကို ထင်ဟပ်သည့် ကျိုးကြောင်းညီညွတ်မှုရှိခြင်း၏တန်ဖိုးကို သူက အလေးပေးဖော်ပြခဲ့သည်။ (ယာကုပ် ၃:၁၇) ကျိုးကြောင်းညီညွတ်မှုတွင် အလျှော့ပေးလိုက်လျောခြင်း၊ ဘက်မလိုက်ခြင်း၊ ချင့်ချိန်မှုရှိခြင်း၊ ညှာတာခြင်းနှင့် သည်းခံခြင်းတို့ပါဝင်သည်။ “ကျိုးကြောင်းညီညွတ်မှုရှိသူတို့သည် အခြားသူတို့နှင့်ဆက်ဆံရာ၌ မျှတမှုရှိ၏။ သူတို့သည် အစွန်းမရောက်ချေ” ဟုညီအစ်ကိုစကီလင်က ပြောသည်။ ခရစ်ယာန်သာသနာပြုတစ်ဦးအား ကျိုးကြောင်းညီညွတ်မှုရှိစေခြင်းငှာ အဘယ်အရာကကူညီပေးနိုင်သနည်း။ မိမိကိုယ်ကို တော်ရုံသင့်ရုံရှုမြင်တတ်ခြင်း၊ အခြားသူတို့ကို နားထောင်ပေးခြင်းအပြင် သင်ယူခြင်းအခွင့်အရေးများကို ရှာယူခြင်းနှင့် ဘုရားသခင်ရေးရာမူများကို မလျှော့ပေါ့လိုက်ဘဲ အခြားသူတို့၏ရှုမြင်ပုံတို့ကို ထည့်သွင်းစဉ်းစားပေးဖို့ တလိုတလားရှိခြင်းတို့ဖြစ်သည်။—၁ ကောရိန္သု ၉:၁၉-၂၃။

အစီအစဉ်နောက်တစ်ပိုင်း၏ “စားဖို့မမေ့ပါနှင့်” ဟူသောခေါင်းစဉ်သည် အာရုံဆွဲဆောင်နိုင်ခဲ့ပြီး အုပ်ချုပ်ရေးအဖွဲ့ဝင် နောက်တစ်ဦးဖြစ်သူ ဆယ်မြူအယ်လ် ဟာ့ဒ်ကတင်ဆက်ခဲ့သည်။ မြင့်မြတ်သောလုပ်ငန်းတော်ကိုထမ်းဆောင်ဖို့ အမြဲသင့်တော်နေရန် ဝိညာဉ်ရေးအစားအစာကောင်းများစားသုံးခြင်း၏တန်ဖိုးကို သူကအလေးပေးဖော်ပြခဲ့သည်။ “သင်၏ဟောပြောသွန်သင်ခြင်းတာဝန်၌ သင့်ကိုယ်သင်နစ်မြုပ်ထားသရွေ့ သင်၏ဝိညာဉ်ရေးရာဆောင်ရွက်မှုမှာ မကြာမီ တိုးများလာပေလိမ့်မည်။ သို့ဖြစ်၍ သင့်ခွန်အားအစွမ်း မျှတ၍ ရေချိန်ညီစေရန် ဝိညာဉ်အစာကို များများပိုစားပေးဖို့ လိုလာပေမည်” ဟူ၍ ညီအစ်ကိုဟာ့ဒ်ကဆိုသည်။ ဝိညာဉ်အစာကို ပုံမှန်စွဲစွဲမြဲမြဲစားသုံးခြင်းက ခရစ်ယာန်သာသနာပြုတစ်ဦးအား ဝိညာဉ်ရေးဘက်စိတ်ကျဝေဒနာနှင့် အိမ်ကိုလွမ်းခြင်းဝေဒနာကိုရှောင်ရှားနိုင်ဖို့ အကူအညီပေးနိုင်၏။ ယင်းက ကျေနပ်ရောင့်ရဲမှုရှိစေ၍ မြင့်မြတ်သောလုပ်ငန်းတော်ထမ်းဆောင်ရန် တာဝန်ကျရာနေရာတွင် စွဲမြဲနေဖို့ ကူညီပေးမည်။—ဖိလိပ္ပိ ၄:၁၃။

ဂိလဒ်နည်းပြဆရာတစ်ဦးဖြစ်သော လောရဲန့်စ် ဘိုဝင်န်က သင်တန်းဆင်းကျောင်းသားများကို “အစသို့ပြန်သွားကြ” ဖို့ အားပေးခဲ့သည်။ အဘယ်အရာကို သူဆိုလိုသနည်း။ သူက ပရိသတ်အား “ထာဝရဘုရားကိုကြောက်ရွံ့သောသဘောသည် ပညာ၏အချုပ်အခြာဖြစ်၏” ဟုဆိုထားသည့် နယပုံပြင် ၁:၇ ကိုဖွင့်စေခဲ့သည်။ ဟောပြောသူက ဤသို့ရှင်းပြသည်– “အဓိကအချက်ဖြစ်သော ယေဟောဝါတည်ရှိမှုကို ဥပေက္ခာပြုသည့် အဘယ်လုပ်ရပ်မဆို စစ်မှန်သောအသိပညာအဖြစ် အမှန်တကယ်အရည်အချင်းပြည့်မီနိုင်မည်မဟုတ်သကဲ့သို့ မှန်ကန်သောနားလည်မှုကိုလည်း ရရှိစေမည်မဟုတ်ချေ။” ညီအစ်ကိုဘိုဝင်န်က ဘုရားသခင့်နှုတ်မြွက်စကားတော် သမ္မာကျမ်းစာ၏ အသေးစိတ်အချက်အလက်များကို ဉာဏ်စမ်းကစားစရာ အပိုင်းအစများနှင့် နှိုင်းယှဉ်ပြခဲ့သည်။ ထိုအပိုင်းအစများကို သက်ဆိုင်သလိုပေါင်းစပ်လိုက်သောအခါ ရုပ်ပုံတစ်ပုံပေါ်လာပါသည်။ အပိုင်းအစများလာလေ ရုပ်ပုံမှာ ပိုကြီး၍ ပိုထင်ရှားလာလေဖြစ်ရာ လူတစ်ဦး၏တန်ဖိုးထားလေးမြတ်မှုသည် သာ၍တိုးများလာလေဖြစ်၏။ ယင်းက ဘုရားသခင်၏မြင့်မြတ်သောလုပ်ငန်းတော်ကို ထမ်းဆောင်ရန် လူအားလုံးကို အကူအညီပေးနိုင်သည်။

ဂိလဒ်ကျောင်း၏မော်ကွန်းထိန်းဖြစ်သူ ဝေါလ်လေးစ် လစ်ဗာရိန်စ်က အခန်းဆက်ဟောပြောချက်များကို နိဂုံးချုပ်ခဲ့သည်။ သူ၏အဓိကအချက်မှာ “ကျေးဇူးတော်ချီးမွမ်းခြင်းယဇ်ကို ဘုရားသခင်အားပူဇော်လော့” ဖြစ်၏။ လူနူဆယ်ဦးကို ယေရှုရောဂါပျောက်ကင်းစေခဲ့သော မှတ်တမ်းကို သူကအာရုံစိုက်စေခဲ့သည်။ (လုကာ ၁၇:၁၁-၁၉) တစ်ဦးသာလျှင် ဘုရားသခင်ကိုချီးမွမ်းရန်ပြန်လာပြီး ယေရှုအား ကျေးဇူးတင်ကြောင်းပြောခဲ့သည်။ “အခြားသူတို့လည်း ရောဂါကင်းစင်ခြင်းအတွက် အမှန်ဝမ်းသာခဲ့ကြမည်။ သူတို့သန့်ရှင်းသွားသည်ကို ကျေနပ်ကြမည်ဖြစ်သော်လည်း သူတို့အလိုအရှိဆုံးမှာ ယဇ်ပုရောဟိတ်က သူတို့ကို သန့်ရှင်းကြောင်း အသိအမှတ်ပြုခြင်းဖြစ်ပုံရှိသည်” ဟုညီအစ်ကိုလစ်ဗာရိန်စ်က ကောက်ချက်ချခဲ့သည်။ သမ္မာတရားကို သိလာခြင်း၏ရလဒ်အဖြစ် ဝိညာဉ်ရေးသန့်ရှင်းမှုရှိခြင်းနှင့် ကျေးဇူးတင်ခြင်းက ဘုရားသခင်၏ကောင်းမြတ်မှုအတွက် ကျေးဇူးတင်ကြောင်း ကိုယ်တော်အားဖော်ပြရန် လှုံ့ဆော်မှုဖြစ်သင့်၏။ ၁၀၈ ကြိမ်မြောက်ဂိလဒ်သင်တန်းသားများသည် သူတို့၏လုပ်ငန်းနှင့် ယဇ်သကာများကို ဘုရားသခင်အား ကျေးဇူးတင်ကြောင်း ထင်ဟပ်ပြမှုဖြစ်စေရန် ဘုရားသခင်စီရင်ဆောင်ရွက်လေသမျှနှင့် ကောင်းမြတ်တော်မူခြင်းအားလုံးတို့ကို စဉ်းစားတွေးတောဖို့ အားပေးခံခဲ့ရသည်။—ဆာလံ ၅၀:၁၄၊ ၂၃; ၁၁၆:၁၂၊ ၁၇။

မည်သို့ပြုလုပ်နိုင်ပုံ တွေ့ကြုံမှုများနှင့် လူတွေ့မေးမြန်းခန်းများ

ဂိလဒ်နည်းပြဆရာ အခြားတစ်ဦးဖြစ်သော မာ့ခ်နူမဲရ်က အစီအစဉ်၏နောက်တစ်ပိုင်းကို ဦးစီးသွားခဲ့သည်။ ၎င်းသည် သင်တန်းသားများ၏ လေ့ကျင့်မှုကာလအတွင်း လယ်ကွင်းလုပ်ငန်းအတွေ့အကြုံများနှင့်ပတ်သက်သည်။ ထိုသင်တန်းသားများသည် ဂိလဒ်ကျောင်းသို့မလာမီ အချိန်ပြည့်ခရစ်ယာန်ဓမ္မအမှု၌ ပျမ်းမျှအားဖြင့် ၁၂ နှစ်ခန့် ပါဝင်ခဲ့ကြသည်။ သူတို့သည် သင်တန်းတက်နေစဉ် နောက်ခံအမျိုးမျိုးရှိလူတို့နှင့် ကျမ်းစာသင်အံမှု အတော်များများ စတင်နိုင်ခဲ့ကြပြီး ယင်းက “ခပ်သိမ်းသောသူတို့၌ ခပ်သိမ်းသောအရာ” ဖြစ်နိုင်ပုံကို သူတို့သိရှိထားကြောင်း တင်ပြသည်။—၁ ကောရိန္သု ၉:၂၂။

သင်တန်းသားများ၏တွေ့ကြုံမှုများပြီးနောက် ချားလ်စ်မော်လဟန်နှင့် ဝီလျံ ဆယ်မြူလ်ဆန်တို့က ဂိလဒ်သင်တန်းဆင်းများဖြစ်ခဲ့ကြသော ဗေသလမိသားစုဝင်အချို့နှင့် နယ်လှည့်ကြီးကြပ်မှူးအချို့ကို လူတွေ့မေးမြန်းခဲ့၏။ လူတွေ့မေးမြန်းခံခဲ့ရသူတစ်ဦးမှာ ၅၁ ကြိမ်မြောက်ဂိလဒ်သင်တန်းဆင်းပြီးနောက် ဖိလစ်ပိုင်နိုင်ငံ၌အမှုထမ်းခဲ့သော ရောဘတ်ပက်ဗီဖြစ်သည်။ သူက သင်တန်းသားများကို ဤသို့သတိပြုစေခဲ့၏– “ပြဿနာတစ်ခုခုဖြစ်တိုင်း အဲ့ဒီပြဿနာဖြေရှင်းနိုင်ပုံကို လူတိုင်းက အကြံပြုကြတယ်။ သင့်ထက်သာသူတစ်ဦး အမြဲရှိပြီး သူက ပိုပြီးကောင်းတဲ့အကြံဉာဏ်တစ်ခုကို ပေးပေလိမ့်မယ်။ ဒါပေမဲ့ သင်ဟာ သမ္မာကျမ်းစာကိုဖွင့်ပြီး ဘုရားသခင့်ရှုမြင်ပုံကို ရှာဖွေစစ်ဆေးမယ်ဆိုရင် အဲ့ဒါထက်ထူးကဲသာလွန်တဲ့အကြံပြုချက်ရှိမှာမဟုတ်ဘူး။ အဲ့ဒါကသာ အမြဲပဲ မှန်ကန်တဲ့အဖြေဖြစ်လိမ့်မယ်။”

ဝိညာဉ်ရေးအစီအစဉ်မွန်ကို အပြီးသတ်ရန် အုပ်ချုပ်ရေးအဖွဲ့ဝင်တစ်ဦးဖြစ်သူ ဂျွန်ဘားရ်က “ယေဟောဝါအား နှစ်သက်ဖွယ် မြင့်မြတ်သောလုပ်ငန်းတော်ပေးဆက်ပါ” ဟူသောအဓိကအချက်ပေါ်မူတည်၍ ဟောပြောခဲ့သည်။ ဘုရားသခင်လက်သင့်ခံနိုင်ဖွယ်နည်းလမ်းဖြင့် ကိုယ်တော်အားဝတ်ပြုခြင်းငှာ စိတ်နှလုံးရိုးဖြောင့်သူများကို ကူညီပေးရန် လယ်ကွင်းအမှုဆောင်ခြင်း၌ မြင့်မြတ်သောလုပ်ငန်းသည် မည်သို့ရောင်ပြန်နိုင်ကြောင်း သူဖော်ပြခဲ့၏။ မဿဲ ၄:၁၀ ၌ပါသော ယေရှု၏စကားများကို ဖွင့်ဖတ်ပြီးနောက် ညီအစ်ကိုဘားရ်က “ယေဟောဝါတစ်ပါးတည်းကိုသာ ကျွန်ုပ်တို့ကိုးကွယ်ကြရမည်ဆိုလျှင် တပ်မက်ခြင်း၊ ချမ်းသာကြွယ်ဝလိုခြင်းနှင့် မိမိကိုယ်ကိုအမွှမ်းတင်ခြင်းကဲ့သို့သော . . . ကိုးကွယ်ခြင်းပုံစံအမျိုးမျိုးကို ကျွန်ုပ်တို့ရှောင်ရှားကြရမည်။ ယင်းနှင့်ပတ်သက်၍ ၁၉၄၀ ပြည့်လွန်နှစ်များ၏ အစောပိုင်းကတည်းက ခေတ်ကာလများတစ်လျှောက် ကျွန်ုပ်တို့၏ခရစ်ယာန်သာသနာပြုများသည် အထူးကောင်းမွန်သောမှတ်တမ်းတင်ခဲ့ကြခြင်းမှာ တကယ်ပျော်ရွှင်စရာပါတကား! ၁၀၈ ကြိမ်မြောက် ဂိလဒ်သင်တန်းဆင်းများဖြစ်ကြသော အသင်တို့လည်း သူတို့၏ပုံသက်သေကို အတုယူကြလိမ့်မည်ဟု ကျွန်ုပ်တို့စိတ်ချယုံကြည်ပါ၏။ သင်တို့သည် ယေဟောဝါတစ်ပါးတည်းသာရထိုက်သည့် မြင့်မြတ်သောလုပ်ငန်းတော်ကို ထမ်းဆောင်သွားကြမည်ဖြစ်သည်” ဟုသူပြောခဲ့သည်။

ယင်းသည် တည်ဆောက်မှုဖြစ်စေသည့် အစီအစဉ်အတွက် အပြုသဘောပါ နိဂုံးချုပ်ဖြစ်သည်။ ထိုနောက်တွင် ကမ္ဘာတစ်ဝန်းရှိ ဆန္ဒမွန်ပါးလိုသူတို့ထံမှ နှုတ်ခွန်းဆက်သဝဏ်လွှာများကို ကြားနာခြင်း၊ ဒီပလိုမာဘွဲ့များ ပေးအပ်ခြင်း၊ လေ့ကျင့်သွန်သင်မှုအတွက် သင်တန်းသားတို့၏ကျေးဇူးတင်လေးမြတ်စာကို ဖတ်ပြရန် အချိန်တိုင်လေသည်။ သင်တန်းဆင်းများသည် သူတို့တာဝန်ကျရာနေရာများနှင့် ယေဟောဝါ၏အမှုတော်ကိုထမ်းဆောင်ခြင်း၌ စွဲစွဲမြဲမြဲတွယ်ကပ်ခြင်းအရည်အသွေးကို ထင်ရှားဖော်ပြဖို့ မှာကြားခံခဲ့ရ၏။ နိုင်ငံပေါင်း ၂၅ နိုင်ငံမှဧည့်သည်များအပါအဝင် တက်ရောက်ခဲ့သူအားလုံးသည် သီချင်းဆို၊ ဆုတောင်းခြင်းဖြင့် အစီအစဉ်ကိုအဆုံးသတ်ရာ၌ ပါဝင်ခဲ့ကြသည်။

[အောက်ခြေမှတ်ချက်များ]

[စာမျက်နှာ ၂၃ ပါ လေးထောင့်ကွက်]

သင်တန်းဆိုင်ရာအချက်အလက်များ

ကိုယ်စားပြု နိုင်ငံအရေအတွက်– ၁၀

တာဝန်ပေးအပ်ခံရသည့် နိုင်ငံအရေအတွက်– ၁၇

ကျောင်းသား/သူအရေအတွက်– ၄၆

ပျမ်းမျှအသက်– ၃၄

ပျမ်းမျှအမှန်တရားသက်တမ်း– ၁၆

ပျမ်းမျှအချိန်ပြည့်အမှုဆောင်သက်တမ်း– ၁၂

[စာမျက်နှာ ၂၄ ပါ ရုပ်ပုံ]

ဂိလဒ်ကင်းမျှော်စင်ကျမ်းစာကျောင်း၏ ၁၀၈ ကြိမ်မြောက် ဂိလဒ်သင်တန်း

အောက်ပါစာရင်းတွင် အတန်းများကို ရှေ့တန်းမှ နောက်တန်းသို့ရေတွက်ပြီး အမည်များကို လက်ဝဲမှ လက်ယာဘက်သို့ စီထားသည်။

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.