သင်သည် သင့်ဆက်ကပ်အပ်နှံမှုနှင့်အညီ အသက်ရှင်နေထိုင်သလော

“လူ၏အမှုကိုသာဆောင်ရွက်သကဲ့သို့မဟုတ်။ သခင်ဘုရား၏အမှုတော်ကိုဆောင်ရွက်သကဲ့သို့၊ ပြုလေသမျှတို့၌ စေတနာစိတ်နှင့်ပြုကြလော့။”—ကောလောသဲ ၃:၂၃။

၁။ လောကသုံးနှုန်းသောစကားစပ်တွင် “ဆက်ကပ်အပ်နှံမှု” ဟူသောစကားလုံးက အဘယ်အရာကိုဖော်ပြသနည်း။

အားကစားသမားများသည် မိမိတို့၏အထွတ်အထိပ်စွမ်းဆောင်မှုသို့ မည်သို့ရောက်လာကြသနည်း။ တင်းနစ်၊ ဘောလုံးပွဲ၊ ဘတ်စကက်ဘော၊ ဘေ့စ်ဘော၊ အပြေးပြိုင်ပွဲ၊ ဂေါက်သီး သို့မဟုတ် အခြားအားကစားတို့တွင် အတော်ဆုံးဖြစ်လာရခြင်းမှာ မယိမ်းမယိုင်မြှုပ်နှံခြင်းအားဖြင့်သာ ဖြစ်သည်။ ကာယရေးနှင့် စိတ်ဓာတ်ရေး အခြေအနေကောင်းဖို့ ဦးစားပေးဂရုစိုက်ရသည်။ ယင်းက “ဆက်ကပ်အပ်နှံမှု” ဟူသည့် စကားလုံး၏ အနက်ဖွင့်ဆိုချက်များမှတစ်ခုဖြစ်သော “တစ်စုံတစ်ခုသောအတွေးအခေါ်လမ်းစဉ် သို့မဟုတ် လုပ်ငန်း၌ လုံးလုံးလျားလျားအပ်နှံသည်” နှင့်လွန်စွာကိုက်ညီပါသည်။

၂။ သမ္မာကျမ်းစာပါ “ဆက်ကပ်အပ်နှံမှု” ကား အဘယ်အရာကိုဆိုလိုသနည်း။ သရုပ်ဖော်ပါ။

^၂ သို့သော် သမ္မာကျမ်းစာအဓိပ္ပာယ်ဖွင့်ဆိုချက်အရ “ဆက်ကပ်အပ်နှံမှု” ဟူသည် အဘယ်အရာကိုဆိုလိုသနည်း။ “ဆက်ကပ်အပ်နှံ” ကို “သီးခြားနေသည်; သီးသန့်ခွဲထွက်သည်; ဆုတ်ခွာသည်” ဟုအဓိပ္ပာယ်ရှိသော ဟေဗြဲစကားလုံးတစ်လုံးမှ ဘာသာပြန်ဆိုခြင်းဖြစ်သည်။a ရှေးဣသရေလအချိန်တွင် ယဇ်ပုရောဟိတ်မင်း အာရုန်သည် ရွှေစင်နှင့်ပြုလုပ်ထားသည့် “သန့်ရှင်းခြင်းကို ယေဟောဝါပိုင်တော်မူသည်” ဟူ၍ ဟေဗြဲစကားလုံးဖြင့် အက္ခရာတင်ထားသော “ဆက်ကပ်အပ်နှံမှုဆိုင်ရာ သန့်ရှင်းသည့်အမှတ်လက္ခဏာ” ကို သူ၏ခေါင်းပေါင်း၌ တပ်ဆင်ထားသည်။ ယင်းက ယဇ်ပုရောဟိတ်မင်းအနေဖြင့် သန့်ရှင်းရာဌာနတော်ကို ရှုတ်ချသည့်အရာမှန်သမျှ ရှောင်ရှားရမည်ဖြစ်ကြောင်း သူ့အား သတိပေးသောအရာတစ်ခုအဖြစ် လုပ်ဆောင်သည်၊ “အကြောင်းမူကား မိမိဘုရားသခင်၏ဘိသိက်ဆီနှင့်ဆိုင်သော ဆက်ကပ်အပ်နှံမှုဆိုင်ရာ အမှတ်လက္ခဏာသည် သူ့အပေါ်၌ရှိ [ခဲ့] ၏။”—ထွက်မြောက်ရာ ၂၉:၆၊ ကဘ; ၃၉:၃၀၊ ကဘ; ဝတ်ပြုရာ ၂၁:၁၂၊ ကဘ။

၃။ ဆက်ကပ်အပ်နှံမှုက ကျွန်ုပ်တို့၏အမူအကျင့်အပေါ် မည်သို့အကျိုးသက်ရောက်သင့်သနည်း။

^၃ ဤစကားစပ်တွင် ဆက်ကပ်အပ်နှံမှုသည် အလေးအနက်ထားရသောကိစ္စတစ်ရပ်ဖြစ်ကြောင်း ကျွန်ုပ်တို့သိမြင်နိုင်သည်။ ယင်းတွင် ဘုရားသခင်၏ကျေးကျွန်တစ်ဦးအဖြစ် စိတ်လိုကိုယ်လျောက်ဖော်ပြခြင်းနှင့် ၎င်းကတောင်းဆိုသည့် သန့်ရှင်းသောအမူအကျင့်ပါဝင်၏။ ထို့ကြောင့် တမန်တော်ပေတရုက ယေဟောဝါမိန့်တော်မူသည့်အတိုင်း ဤသို့အဘယ်ကြောင့်ကိုးကားခဲ့ကြောင်း ကျွန်ုပ်တို့နားလည်နိုင်ပါသည်– “ငါသည်သန့်ရှင်းတော်မူသောကြောင့်၊ သင်တို့သည်လည်း သန့်ရှင်းခြင်းရှိကြလော့။” (၁ ပေတရု ၁:၁၅၊ ၁၆) ဆက်ကပ်အပ်နှံထားသော ခရစ်ယာန်များအနေဖြင့် ကျွန်ုပ်တို့သည် ကျွန်ုပ်တို့၏ဆက်ကပ်အပ်နှံမှုနှင့်အညီ အဆုံးထိသစ္စာရှိရှိနေထိုင်ရန်ဟူသော ကြီးလေးသည့်တာဝန်တစ်ခုကို ထမ်းဆောင်ကြရသည်။ သို့သော် ခရစ်ယာန်ဆက်ကပ်အပ်နှံခြင်းတွင် အဘယ်အရာ ပါဝင်ပတ်သက်သနည်း။—ဝတ်ပြုရာ ၁၉:၂; မဿဲ ၂၄:၁၃။

၄။ ဆက်ကပ်အပ်နှံမှုခြေလှမ်းကို ကျွန်ုပ်တို့ မည်သို့မီကြသနည်း၊ ယင်းကို အဘယ်အရာနှင့် နှိုင်းယှဉ်နိုင်သနည်း။

^၄ ယေဟောဝါဘုရားသခင်နှင့် ကိုယ်တော်၏ရည်ရွယ်တော်မူချက်များ၊ ယေရှုခရစ်နှင့် ယင်း၏ရည်ရွယ်တော်မူချက်များတွင် ကိုယ်တော့်အခန်းကဏ္ဍဆိုင်ရာ တိကျမှန်ကန်သောအသိပညာကို ကျွန်ုပ်တို့ရရှိကြပြီးနောက် ကျွန်ုပ်တို့သည် မိမိတို့၏ စိတ်နှလုံး၊ စိုးလ်ရှိသမျှနှင့် ခွန်အားရှိသမျှဖြင့် ဘုရားသခင်ကိုဝတ်ပြုကိုးကွယ်ရန် ကျွန်ုပ်တို့ကိုယ်တိုင်ဆုံးဖြတ်ချက်ချခဲ့ကြသည်။ (မာကု ၈:၃၄; ၁၂:၃၀; ယောဟန် ၁၇:၃) ယင်းကို တစ်ဦးချင်းစီ၏အဓိဋ္ဌာန်တစ်ရပ်၊ ဘုရားသခင်ထံ လုံးလုံးလျားလျား ဆက်ကပ်အပ်နှံမှုတစ်ရပ်အဖြစ်ပင် ယူမှတ်ကြသည်။ ကျွန်ုပ်တို့၏ဆက်ကပ်အပ်နှံမှုမှာ စိတ်လှုပ်ရှားမှုဆိုင်ရာ စိတ်အပြောင်းအလဲတစ်ရပ်ကြောင့် မဟုတ်ချေ။ ယင်းက ဆင်ခြင်နိုင်စွမ်းကိုအသုံးပြုပြီး ဂရုတစိုက်ဆုတောင်း၍ အသေအချာစဉ်းစားခဲ့ရသည်။ သို့ဖြစ်၍ ယင်းသည် ယာယီဆုံးဖြတ်ချက်တစ်ရပ်မဟုတ်ချေ။ ယာခင်းတစ်ခုတွင် ထွန်ယက်စိုက်ပျိုးရန်စတင်ပြီးမှ ယင်းသည် အလွန်ပင်ပန်းသောကြောင့် သို့မဟုတ် သီးနှံရိတ်သိမ်းချိန်မှာ အလှမ်းကွာဝေးလွန်းသောကြောင့် သို့မဟုတ် မသေချာသောကြောင့် တစ်ဝက်တစ်ပျက်ဖြင့် လက်လျှော့လိုက်သူတစ်ဦးနှင့် ကျွန်ုပ်တို့မတူညီနိုင်ပါ။ အခက်အခဲအတားအဆီးမျိုးစုံကြားမှ သီအိုကရက်တစ်တာဝန်ဆိုင်ရာ “ထွန်ကိုင်းကိုကိုင်လျက်” ရှိခဲ့ကြသော အချို့သူတို့၏ပုံနမူနာကို သုံးသပ်ကြည့်ပါ။—လုကာ ၉:၆၂; ရောမ ၁၂:၁၊ ၂။

မိမိတို့၏ဆက်ကပ်အပ်နှံမှုကို မစွန့်ခဲ့ကြ

၅။ ဘုရားသခင်ထံ ဆက်ကပ်အပ်နှံထားသည့် ကျေးကျွန်တစ်ဦးဖြစ်သော ယေရမိ၏ထူးခြားသည့်ပုံသက်သေကား မည်သို့ဖြစ်ခဲ့သနည်း။

^၅ ယေရုရှလင်မြို့၌ ယေရမိ၏ပရောဖက်ပြုချက်ဆိုင်ရာ အမှုဆောင်လုပ်ငန်းမှာ အနှစ် ၄၀ ကျော် (ဘီ.စီ.အီး. ၆၄၇-၆၀၇) သက်တမ်းကြာခဲ့ပြီး ယင်းသည် လွယ်ကူသောတာဝန်မဟုတ်ချေ။ မိမိ၏အကန့်အသတ်ဖြစ်မှုများကို သူသတိပြုမိခဲ့သည်။ (ယေရမိ ၁:၁၆) သူသည် ခေါင်းမာသည့်ယုဒလူတို့နှင့် နေ့စဉ်နေ့တိုင်းရင်ဆိုင်ရန် သတ္တိနှင့် ခံနိုင်ရည်လိုအပ်ခဲ့၏။ (ယေရမိ ၁၈:၁၈; ၃၈:၄-၆) သို့သော် ယေရမိသည် ဘုရားသခင်၏ဆက်ကပ်အပ်နှံထားသော စစ်မှန်သည့်ကျေးကျွန်တစ်ဦးဖြစ်ကြောင်း သက်သေပြခြင်းငှာ သူ့ကိုခွန်အားပေးတော်မူသော ယေဟောဝါဘုရားသခင်အား ယုံကြည်ကိုးစားခဲ့သည်။—ယေရမိ ၁:၁၈၊ ၁၉။

၆။ တမန်တော်ယောဟန်သည် ကျွန်ုပ်တို့အတွက် အဘယ်ပုံနမူနာကိုထားခဲ့သနည်း။

^၆ “ဘုရားသခင့်အကြောင်းကိုပြောခြင်း၊ ယေရှုအကြောင်းသက်သေခံခြင်း” ကြောင့် အသက်အရွယ်အိုမင်းချိန်၌ ဖော်ရွေမှုမရှိသောပတ်မုကျွန်းသို့ ပြည်နှင်ဒဏ်ခံခဲ့ရသည့် သစ္စာရှိသော တမန်တော်ယောဟန်နှင့်ပတ်သက်၍ကော အသို့နည်း။ (ဗျာဒိတ် ၁:၉၊ ကဘ) သူသည် နှစ်ပေါင်း ၆၀ ခန့် ခရစ်ယာန်တစ်ဦးအဖြစ် မိမိ၏ဆက်ကပ်အပ်နှံခြင်းအနေအထား၌ ခံရပ်တည်ကြည်ခဲ့ပြီး ၎င်းနှင့်အညီ နေထိုင်ပြုမူခဲ့သည်။ ရောမစစ်တပ်များ၏လက်ထဲ၌ ယေရုရှလင်မြို့ပျက်စီးပြီးသည့်နောက်ပိုင်းအချိန်ထိ သူအသက်ရှင်ခဲ့သည်။ သူသည် ခရစ်ဝင်ကျမ်းတစ်စောင်၊ မှုတ်သွင်းခံစာသုံးစောင်နှင့် အာမဂေဒုန်စစ်ပွဲကို တင်ကြိုမြင်တွေ့ခဲ့သည့် ဗျာဒိတ်ကျမ်းစောင်ကို ရေးသားခွင့်ရရှိခဲ့သည်။ မိမိ၏အသက်တာတွင် အာမဂေဒုန်လာဦးမည်မဟုတ်ကြောင်း သူသိလာသောအခါ သူစွန့်ခွာခဲ့သလော။ စိတ်မပါခြင်း၌ သူခြေကုန်လက်ပန်းကျခဲ့သလော။ မကျပါ၊ “ကာလအချိန်ရောက်လုနီးပြီဖြစ်” သော်လည်း သူ၏တင်ကြိုမြင်ရချက်ပြည့်စုံမှုမှာ နောက်ပိုင်းအချိန်တစ်ချိန်အတွက်ဖြစ်ကြောင်း သိရှိကာ ယောဟန်သည် သေသည့်အထိသစ္စာရှိခဲ့၏။—ဗျာဒိတ် ၁:၃; ဒံယေလ ၁၂:၄။

ဆက်ကပ်အပ်နှံခြင်းဆိုင်ရာ မျက်မှောက်ခေတ် ပုံနမူနာများ

၇။ ညီအစ်ကိုတစ်ဦးသည် ခရစ်ယာန်ဆက်ကပ်အပ်နှံမှုတွင် ပုံသက်သေကောင်းတစ်ရပ် မည်သို့ဖြစ်ခဲ့သနည်း။

^၇ မျက်မှောက်ခေတ်တွင် ထောင်နှင့်ချီသောသစ္စာရှိခရစ်ယာန်တို့သည် အာမဂေဒုန်ကို မျက်မြင်ကိုယ်တွေ့ ကပ်မကျော်ကြလင့်ကစား မိမိတို့၏ဆက်ကပ်အပ်နှံခြင်း၌ ဇွဲရှိစွာမြဲခဲ့ကြ၏။ ထိုသူထဲမှတစ်ဦးမှာ အင်္ဂလန်နိုင်ငံမှ အန့်စ် အီး. ဘီဗာဖြစ်သည်။ ၁၉၃၉၊ ဒုတိယကမ္ဘာစစ်စတင်ချိန်၌ သက်သေခံတစ်ဦးဖြစ်လာခဲ့ပြီး အချိန်ပြည့်ခရစ်ယာန်ဓမ္မအမှုကိုလုပ်ဆောင်ရန် အောင်မြင်လျက်ရှိသော ပုံနှိပ်ဓာတ်ပုံလုပ်ငန်းကို စွန့်လွှတ်ခဲ့သည်။ သူသည် မိမိ၏ခရစ်ယာန်ကြားနေမှုကို ထိန်းထားခဲ့ခြင်းကြောင့် နှစ်နှစ်တာထောင်ထဲဝင်ခဲ့ရသည်။ သူ့မိသားစုသည် သူ့ဘက်မှရပ်တည်ခဲ့ကြပြီး ၁၉၅၀ တွင် သူ၏သားသမီးသုံးယောက်သည် နယူးယောက်မြို့ရှိ၊ ဂိလဒ်ကင်းမျှော်စင်ကျမ်းစာကျောင်း သာသနာပြုသင်တန်းကို တက်ရောက်ခဲ့ကြသည်။ ညီအစ်ကို ဘီဗာသည် မိမိ၏ဟောပြောခြင်းလုပ်ငန်းတွင် အလွန်ဇွဲရှိသဖြင့် မိတ်ဆွေများက သူ့ကို အာမဂေဒုန်အားနီဟုခေါ်ခဲ့ကြသည်။ မိမိ၏ဆက်ကပ်အပ်နှံမှုနှင့်အညီ သစ္စာရှိရှိနေထိုင်ခဲ့ပြီး ၁၉၈၆ ခုနှစ်၊ သူသေဆုံးသွားချိန်ထိ ဖြစ်အံ့လုဆဲဆဲ ဘုရားသခင်၏အာမဂေဒုန်စစ်ပွဲကို ဟောပြောခဲ့သည်။ မိမိ၏ဆက်ကပ်အပ်နှံခြင်းကို ဘုရားသခင်နှင့်ချုပ်ဆိုသော အချိန်ကန့်ထားသည့်စာချုပ်အဖြစ် မရှုမြင်ခဲ့ချေ!b—၁ ကောရိန္သု ၁၅:၅၈။

၈၊ ၉။ (က) ဖရန်ကိုအစိုးရအုပ်ချုပ်စဉ် စပိန်နိုင်ငံတွင် လူငယ်များစွာသည် မည်သည့်ပုံသက်သေ ပြခဲ့ကြသနည်း။ (ခ) မည်သည့်မေးခွန်းများမှာ သင့်လျော်သနည်း။

^၈ မဆုတ်မနစ်ဇွဲရှိသည့် နောက်ပုံနမူနာမှာ စပိန်နိုင်ငံမှဖြစ်သည်။ ဖရန်ကိုအစိုးရ (၁၉၃၉-၇၅) အုပ်ချုပ်စဉ်ကာလအတွင်း ဆက်ကပ်အပ်နှံထားသော ရာနှင့်ချီသည့်သက်သေခံများသည် ခရစ်ယာန်ကြားနေမှုအဖြစ် ရပ်တည်ခဲ့ကြသည်။ သူတို့ထဲမှ အများစုမှာ ဆယ်နှစ် သို့မဟုတ် ထိုထက်မက စစ်ဘက်အကျဉ်းထောင်များတွင် အချိန်ကုန်ခဲ့ကြသည်။ သက်သေခံတစ်ဦးဖြစ်သော ကာစ္စစ် မာတင်သည် ထောင်ထဲတွင် ပြစ်ဒဏ်စုစုပေါင်းအတွက် ၂၂ နှစ်ပင်ကျခဲ့သည်။ မြောက်အာဖရိကရှိ စစ်ဘက်အကျဉ်းထောင်တစ်ခု၌ကျနေစဉ် သူသည် ပြင်းထန်စွာရိုက်နှက်ခံခဲ့ရ၏။ အလျဉ်းမလွယ်ကူခဲ့ပါ၊ သို့သော် သူသည် အလျော့ပေးလိုက်လျောဖို့ ငြင်းဆန်ခဲ့သည်။

^၉ ဤလူငယ်တို့သည် လွတ်လမ်းမမြင်မိသလောက်ဖြစ်ကြသည်၊ အကြောင်းမှာ သူတို့သည် ပြစ်ဒဏ်ချမှတ်ချက်များကို တစ်ခုပြီးတစ်ခုကျခံရန် စီရင်ချက်ချထားခြင်းကြောင့်ဖြစ်သည်။ သို့တိုင် သူတို့သည် ဆက်သစ္စာရှိခဲ့ကြပြီး အကျဉ်းကျနေစဉ် ခရစ်ယာန်ဓမ္မအမှုအတွက် မိမိတို့၏ဇွဲကို ဆက်ထိန်းထားခဲ့ကြသည်။ နောက်ဆုံး၌ ၁၉၇၃ တွင် အခြေအနေစ၍တိုးတက်လာရာ ထိုသက်သေခံများစွာသည် သူတို့၏အသက် ၃၀ ကျော်၌ အကျဉ်းထောင်မှလွတ်မြောက်ခဲ့ကြပြီး အချိန်ပြည့်ခရစ်ယာန်ဓမ္မအမှုထဲသို့ တိုက်ရိုက်ဝင်ရောက်ခဲ့ကြကာ အချို့သူတို့မှာ အထူးရှေ့ဆောင်များနှင့် နယ်လှည့်ကြီးကြပ်မှူးများဖြစ်လာကြသည်။ သူတို့သည် အကျဉ်းထောင်ထဲတွင် မိမိတို့၏ဆက်ကပ်အပ်နှံမှုနှင့်အညီ နေထိုင်ခဲ့ကြပြီး အများစုမှာ လွတ်မြောက်လာကြပြီးနောက်တွင် ထိုသို့ဆက်ပြုလုပ်ခဲ့ကြသည်။c ယနေ့ ကျွန်ုပ်တို့ကော အသို့နည်း။ ဤသစ္စာစောင့်သူများကဲ့သို့ ကျွန်ုပ်တို့သည် မိမိတို့၏ဆက်ကပ်အပ်နှံမှုအပေါ် သစ္စာစောင့်သိကြမည်လော။—ဟေဗြဲ ၁၀:၃၂-၃၄; ၁၃:၃။

ကျွန်ုပ်တို့၏ဆက်ကပ်အပ်နှံမှုဆိုင်ရာ လျောက်ပတ်သောအမြင်

၁၀။ (က) ကျွန်ုပ်တို့၏ဆက်ကပ်အပ်နှံမှုကို ကျွန်ုပ်တို့ မည်သို့ရှုမြင်သင့်သနည်း။ (ခ) ကိုယ်တော်အား ကျွန်ုပ်တို့ဝတ်ပြုကိုးကွယ်ခြင်းကို ယေဟောဝါ မည်သို့ရှုမြင်သနည်း။

^၁၀ ဘုရားသခင့်အလိုတော်ထမ်းဆောင်ရန် ကိုယ်တော်ထံပေးသည့် ကျွန်ုပ်တို့၏ဆက်ကပ်အပ်နှံမှုကို ကျွန်ုပ်တို့ မည်သို့ရှုမြင်ကြသနည်း။ ယင်းသည် ကျွန်ုပ်တို့၏ဘဝတွင် ဦးစားထားရာလော။ လူငယ် သို့မဟုတ် လူကြီး၊ အိမ်ထောင်သည် သို့မဟုတ် တစ်ကိုယ်ရေ၊ ကျန်းမာသန်စွမ်းသူ သို့မဟုတ် မမာမကျန်းသူဖြစ်ဖြစ်၊ ကျွန်ုပ်တို့၏အခြေအနေများမှာ မည်သို့ပင်ရှိပါစေ ကျွန်ုပ်တို့၏အခြေအနေနှင့်အညီ ကျွန်ုပ်တို့ဆက်ကပ်အပ်နှံထားသည့်အတိုင်း အသက်ရှင်နေထိုင်ရန် ကြိုးစားသင့်သည်။ လူတစ်ဦး၏အခြေအနေက သူ့ကို ရှေ့ဆောင်တစ်ဦးအဖြစ်၊ ကင်းမျှော်စင်အသင်း၏ ဌာနခွဲရုံးတစ်ခုတွင် စေတနာ့ဝန်ထမ်းတစ်ဦးအဖြစ်၊ သာသနာပြုတစ်ဦးအဖြစ်၊ သို့မဟုတ် နယ်လှည့်ကြီးကြပ်မှူးတစ်ဦးအဖြစ် အချိန်ပြည့်ခရစ်ယာန်ဓမ္မအမှုကို ထမ်းဆောင်ရန်ခွင့်ပြုပေမည်။ အခြားတစ်ဖက်တွင် မိဘအချို့သည် မိသားစု၏ကာယရေးနှင့် ဝိညာဉ်ရေးရာလိုအပ်ချက်များအတွက် အလွန်အလုပ်များကြပေမည်။ ယေဟောဝါ၏မျက်မှောက်တော်၌ ခရစ်ယာန်ဓမ္မအမှုတွင် သူတို့လစဉ်အသုံးပြုသောနာရီအနည်းငယ်သည် အချိန်ပြည့်ကျေးကျွန်တစ်ဦး အသုံးပြုသောနာရီများစွာထက် သာ၍တန်ဖိုးလျော့နည်းပါသလော။ ထိုသို့မဟုတ်ပါ။ ဘုရားသခင်သည် ကျွန်ုပ်တို့တွင်မရှိသောအရာကို ဘယ်သောအခါမျှမမျှော်လင့်ချေ။ တမန်တော်ပေါလုက ဤမူနှင့်ပတ်သက်၍ ဤသို့ဖော်ပြသည်– “စေတနာစိတ်သည် အသင့်ရှိလျှင်၊ မတတ်နိုင်သောအမှုကိုမထောက်ဘဲ၊ တတ်နိုင်သောအမှုကိုထောက်၍ နှစ်သက်တော်မူဖွယ်ဖြစ်၏။”—၂ ကောရိန္သု ၈:၁၂။

၁၁။ ကျွန်ုပ်တို့၏ကယ်တင်ခြင်းသည် အဘယ်အရာပေါ်တွင် မူတည်သနည်း။

^၁၁ မည်သို့ပင်ဖြစ်စေ ကျွန်ုပ်တို့၏ကယ်တင်ခြင်းမှာ ကျွန်ုပ်တို့လုပ်ဆောင်သည့်အရာအပေါ် မမူတည်ဘဲ ကျွန်ုပ်တို့၏သခင်၊ ယေရှုခရစ်အားဖြင့် ယေဟောဝါ၏မခံစားထိုက်သော သနားကြင်နာမှုအပေါ်မူတည်သည်။ ပေါလုက ဤသို့အတိအလင်းရှင်းပြခဲ့သည်– “လူအပေါင်းတို့သည် [မကောင်းမှု] ကိုပြု၍ ဘုရားသခင့်ရှေ့တော်၌ အသရေပျက်ကြပြီ။ ယေရှုခရစ်ရွေးနုတ်တော်မူသောအားဖြင့် အဖိုးကိုမပေးဘဲ ဘုရားသခင်၏ကျေးဇူးတော်ကြောင့် ဖြောင့်မတ်ရာသို့ရောက်ရကြ၏။” သို့သော် ကျွန်ုပ်တို့၏လုပ်ဆောင်မှုများမှာ ဘုရားသခင့်ကတိတော်၌ တက်ကြွသောယုံကြည်ခြင်း၏သက်သေဖြစ်သည်။—ရောမ ၃:၂၃၊ ၂၄; ယာကုပ် ၂:၁၇၊ ၁၈၊ ၂၄။

၁၂။ ကျွန်ုပ်တို့သည် အဘယ်ကြောင့် နှိုင်းယှဉ်မှုများမပြုသင့်သနည်း။

^၁၂ ဘုရားသခင့်အမှုတော်၌ ကျွန်ုပ်တို့အသုံးပြုသည့်အချိန်၊ ကျမ်းစာ စာပေဝေငှမှုများ သို့မဟုတ် ကျွန်ုပ်တို့ကျင်းပကြသည့် ကျမ်းစာသင်အံမှုအရေအတွက်တို့နှင့်ပတ်သက်၍ ကျွန်ုပ်တို့သည် အခြားသူတို့နှင့်နှိုင်းယှဉ်မှုများပြုလုပ်ရန် မလိုချေ။ (ဂလာတိ ၆:၃၊ ၄) ကျွန်ုပ်တို့သည် ခရစ်ယာန်ဓမ္မအမှုတွင် မည်သည့်အရာမဆိုပြီးမြောက်အောင်မြင်ပါစေ၊ ယေရှု၏နှိမ့်ချသောဤစကားများကို ကျွန်ုပ်တို့အားလုံး သတိရရန်လိုသည်– “ထိုနည်းတူ မှာထားတော်မူသမျှတို့ကို သင်တို့သည်ကျင့်ပြီးမှ၊ ‘ငါတို့သည်သခင်၌ ကျေးဇူးပြုသောအစေအပါဖြစ်သည်မဟုတ်။ ဝတ်ပြေရုံမျှသာရှိသည်’ ဟုဝန်ခံကြလော့။” (လုကာ ၁၇:၁၀) ကျွန်ုပ်တို့သည် ‘မှာထားတော်မူသမျှတို့ကို ကျင့်ပြီးပြီ’ ဟုအမှန်အားဖြင့် အကြိမ်မည်မျှ ပြောဆိုနိုင်လေ့ရှိသနည်း။ ထို့ကြောင့် မေးခွန်းမှာ ဘုရားသခင့်အမှုတော်ဆောင်ခြင်း၌ ကျွန်ုပ်တို့၏အရည်အသွေး မည်သို့ဖြစ်သင့်သနည်း ဟူ၍ဖြစ်၏။—၂ ကောရိန္သု ၁၀:၁၇၊ ၁၈။

နေ့ရက်တိုင်း တန်ဖိုးရှိစေခြင်း

၁၃။ ကျွန်ုပ်တို့၏ဆက်ကပ်အပ်နှံမှုကို ဆောင်ရွက်စဉ် ကျွန်ုပ်တို့၌ အဘယ်သဘောထားလိုအပ်သနည်း။

^၁၃ ဇနီးများ၊ ခင်ပွန်းများ၊ သားသမီးများ၊ မိဘများနှင့် ကျွန်များကို ဆုံးမစကားဆိုပြီးနောက် ပေါလုဤသို့ရေးသားသည်– “လူ၏အမှုကိုသာဆောင်ရွက်သကဲ့သို့မဟုတ်။ သခင်ဘုရား၏အမှုတော်ကိုဆောင်ရွက်သကဲ့သို့၊ ပြုလေသမျှတို့၌ စေတနာစိတ်နှင့်ပြုကြလော့။ သင်တို့သည် သခင်ခရစ်တော်၏အစေကိုခံကြသည်ဖြစ်၍၊ အမွေတော်တည်းဟူသောအကျိုးကို၊ ထိုသခင်ဘုရား၏လက်တော်မှခံရလိမ့်မည်ဟု သိမှတ်ကြလော့။” (ကောလောသဲ ၃:၂၃၊ ၂၄) ယေဟောဝါ၏လုပ်ငန်းတော်၌ ကျွန်ုပ်တို့လုပ်ဆောင်ပြီးမြောက်ရာနှင့်ပတ်သက်၍ လူတို့ကိုစွဲမှတ်စေရန် ကျွန်ုပ်တို့အမှုဆောင်နေကြခြင်းမဟုတ်ချေ။ ယေရှုခရစ်၏ပုံနမူနာကိုလိုက်လျှောက်ခြင်းဖြင့် ကျွန်ုပ်တို့သည် ဘုရားသခင်အား အမှုဆောင်ရန် ကြိုးစားနေကြခြင်းဖြစ်သည်။ ကိုယ်တော်သည် နှိုင်းယှဉ်ကြည့်သော် တိုတောင်းလှသည့်မိမိ၏ခရစ်ယာန်ဓမ္မအမှုကို အရေးတကြီးသဘောထားဖြင့် လုပ်ဆောင်တော်မူခဲ့သည်။—၁ ပေတရု ၂:၂၁။

၁၄။ နောက်ဆုံးကာလနှင့်ပတ်သက်၍ အဘယ်သတိပေးချက်ကို ပေတရုပေးခဲ့သနည်း။

^၁၄ တမန်တော်ပေတရုသည်လည်း အရေးတကြီးသဘောထားမျိုးကို တင်ပြခဲ့သည်။ သူ၏ဒုတိယစာစောင်၌ နောက်ဆုံးသောကာလတွင် မိမိတို့၏အလိုဆန္ဒအတိုင်း ခရစ်တော်ရောက်ရှိခြင်းနှင့်ပတ်သက်သော မေးခွန်းများကိုပေါ်ထွက်စေမည့် ကဲ့ရဲ့ပြစ်တင်သူများ—အယူဖောက်ပြန်သူများနှင့် သံသယဝင်သူများ—ရှိလိမ့်မည်ဖြစ်ကြောင်း သူသတိပေးခဲ့သည်။ သို့သော် ပေတရုက ဤသို့ဆိုခဲ့သည်– “လူအချို့တို့သည် နှေးခြင်းကိုမှတ်သည်အတိုင်း၊ ထာဝရဘုရားသည် ကတိတော်အရာမှာ နှေးတော်မမူ။ ငါတို့တွင် အဘယ်သူမျှမပျက်စီးဘဲ၊ ရှိသမျှတို့သည် နောင်တရစေခြင်းငှာ အလိုတော်ရှိ၍၊ ငါတို့ကိုသည်းခံတော်မူ၏။ သူခိုးသည် ညဉ့်အခါလာသကဲ့သို့၊ ထာဝရဘုရား၏နေ့ရက်သည်လာလိမ့်မည်။” မှန်ပါသည်၊ ယေဟောဝါ၏နေ့ရက် ရောက်လာမည်မှာသေချာပါသည်။ သို့ဖြစ်၍ ဘုရားသခင့်ကတိတော် အမှန်တကယ်ဖြစ်မှု၌ မည်မျှအသေအချာခိုင်မြဲစွာ ယုံကြည်ကြောင်းကို ကျွန်ုပ်တို့ နေ့စဉ်စိုးရိမ်ကြောင့်ကြသင့်သည်။—၂ ပေတရု ၃:၃၊ ၄၊ ၉၊ ၁၀။

၁၅။ ကျွန်ုပ်တို့၏နေ့စဉ်အသက်တာကို မည်သို့ရှုမြင်သင့်သနည်း။

^၁၅ အသိစိတ်ရှိရှိပြုမူပြောဆိုခြင်းဖြင့် ကျွန်ုပ်တို့၏ဆက်ကပ်အပ်နှံမှုနှင့်အညီအသက်ရှင်ရန်၊ နေ့ရက်တိုင်းကို ယေဟောဝါအား ချီးမွမ်းရန်အသုံးပြုသင့်သည်။ တစ်နေ့တာအဆုံးတိုင်သော် နောက်ကြောင်းပြန်ကာ ဘုရားသခင့်နာမတော်ကို သန့်ရှင်းမြင့်မြတ်စေခြင်းနှင့် ဘုရားသခင့်နိုင်ငံတော်သတင်းကောင်းကို ကြေညာခြင်း၌ မည်သည့်နည်းအချို့ဖြင့် ကျွန်ုပ်တို့ပါဝင်ခဲ့ပုံကို ပြန်သုံးသပ်ကြည့်နိုင်သလော။ ယင်းသည် ကျွန်ုပ်တို့၏ သန့်ရှင်းသောအမူအကျင့်၊ ကျွန်ုပ်တို့၏ တည်ဆောက်မှုဖြစ်စေသောစကားဝိုင်း သို့မဟုတ် မိသားစုနှင့် မိတ်ဆွေများအတွက် ကျွန်ုပ်တို့၏မေတ္တာပါသောစိုးရိမ်ကြောင့်ကြမှုတို့ ဖြစ်ကောင်းဖြစ်ပေမည်။ အခြားသူတို့ထံ ကျွန်ုပ်တို့၏ခရစ်ယာန်မျှော်လင့်ချက်ကို ဝေမျှရန် ရရှိနိုင်သောအခွင့်အလမ်းများကို ကျွန်ုပ်တို့အသုံးပြုကြပါသလော။ ဘုရားသခင့်ကတိတော်များနှင့်ပတ်သက်၍ တစ်ဦးတစ်ယောက်ကို အလေးအနက်စဉ်းစားစေရန် ကျွန်ုပ်တို့ ကူညီခဲ့ပြီလော။ ဝိညာဉ်ရေးသဘောအရ နေ့စဉ် တန်ဖိုးရှိရာတစ်ခုခုကို တိုးပွားစေကာ မည်မည်ရရရှိသော ဝိညာဉ်ရေးရာဘဏ်စာရင်းတစ်ခုအလား ဖြစ်စေကြပါစို့။—မဿဲ ၆:၂၀; ၁ ပေတရု ၂:၁၂; ၃:၁၅; ယာကုပ် ၃:၁၃။

သင်၏အမြင်အာရုံကို ကြည်လင်စေပါ

၁၆။ ဘုရားသခင်ထံ ကျွန်ုပ်တို့၏ဆက်ကပ်အပ်နှံခြင်းကို အားလျော့သွားစေရန် မည်သည့်နည်းများဖြင့် စာတန်ကြိုးစားသနည်း။

^၁၆ ခရစ်ယာန်များအတွက် သာ၍ခက်ခဲသောအချိန်၌ ကျွန်ုပ်တို့အသက်ရှင်နေကြသည်။ စာတန်နှင့် သူ၏ကိုယ်စားလှယ်များသည် အကောင်းနှင့်အဆိုး၊ စင်ကြယ်ခြင်းနှင့် မစင်ကြယ်ခြင်း၊ အကျင့်ကောင်းခြင်းနှင့် အကျင့်ယိုယွင်းခြင်း၊ ကျင့်ဝတ်ရှိခြင်းနှင့် မရှိခြင်းတို့စပ်ကြားကွာခြားချက်ကို မသဲမကွဲဖြစ်စေရန်ကြိုးစားကြ၏။ (ရောမ ၁:၂၄-၂၈; ၁၆:၁၇-၁၉) သူသည် ရုပ်မြင်သံကြားအဝေးထိန်းခလုတ် သို့မဟုတ် ကွန်ပျူတာခလုတ်ခုံတို့ဖြင့် ကျွန်ုပ်တို့၏စိတ်နှလုံးကို အလွယ်တကူညစ်ညမ်းစေရန် ယင်းကို ပြုလုပ်ခဲ့ပြီ။ ကျွန်ုပ်တို့၏ဝိညာဉ်ရေးရာအမြင်အာရုံမှာ မှုန်ဝါးဝါးဖြစ်လာနိုင်၊ သို့မဟုတ် အာရုံစိုက်ရာမှလွဲသွားနိုင်ကာ သို့နှင့် သူ၏ကောက်ကျစ်သောလုပ်ရပ်များကို ပိုင်းခြားသိမြင်ရန် ကျွန်ုပ်တို့ပျက်ကွက်သွားကြပေမည်။ ကျွန်ုပ်တို့၏ဝိညာဉ်ရေးရာစံနှုန်းများကို အလျော့ပေးလိုက်ပါက ကျွန်ုပ်တို့၏ဆက်ကပ်အပ်နှံမှုနှင့်အညီ အသက်ရှင်ရန်စိတ်ပိုင်းဖြတ်ထားခြင်းမှာ အားလျော့လာနိုင်ပြီး “ထွန်ကိုင်း” ကိုဆုပ်ကိုင်ထားခြင်းမှာ ပြေလျော့လာနိုင်သည်။—လုကာ ၉:၆၂; ဖိလိပ္ပိ ၄:၈။

၁၇။ ဘုရားသခင်နှင့် ကျွန်ုပ်တို့၏ဆက်ဆံရေးကို ထိန်းထားရန် ပေါလု၏ဆုံးမစကားများက ကျွန်ုပ်တို့အား မည်သို့ကူညီပေးနိုင်သနည်း။

^၁၇ သို့ဖြစ်၍ သက်သာလောနိတ်အသင်းတော်ထံရေးသော ပေါလု၏ဤစကားများသည် အခန့်သင့်ဆုံးဖြစ်သည်– “ဘုရားသခင်၏အလိုတော်ဟူမူကား၊ သင်တို့သည် မတရားသောမေထုန်ကိုကြဉ်ရှောင်၍ သန့်ရှင်းစေခြင်းငှာလည်းကောင်း၊ ဘုရားသခင်ကိုမသိသော [ပြင်ပ] လူတို့သည် ကိလေသာတပ်မက်ခြင်းရှိသကဲ့သို့မရှိ၊ သင်တို့အပေါင်းသည် သန့်ရှင်းခြင်း၊ အသရေတင့်တယ်ခြင်းနှင့် မိမိကိုယ်ကိုမိမိထိန်းတတ်စေခြင်းငှာ” ဖြစ်သည်။ (၁ သက်သာလောနိတ် ၄:၃-၅) အကျင့်ယိုယွင်းမှုက ဘုရားသခင်ထံ မိမိတို့၏ဆက်ကပ်အပ်နှံခြင်းအပေါ် လျစ်လျူရှုကြသူအချို့ကို ခရစ်ယာန်အသင်းတော်မှ နှင်ထုတ်ခြင်းဖြစ်စေခဲ့သည်။ သူတို့သည် ဘုရားသခင်နှင့် မိမိတို့၏ဆက်ဆံရေးကို အားလျော့စေရန် ခွင့်ပြုလိုက်ကြပြီး သို့နှင့် မိမိတို့၏အသက်တာတွင် ကိုယ်တော်သည် အလွန်အရေးပါသူတစ်ဦးမဟုတ်တော့ချေ။ မှန်ပါသည်၊ ပေါလုဤသို့ပြောခဲ့သည်– “ဘုရားသခင်သည် ညစ်ညူးစေခြင်းငှာ ငါတို့ကိုခေါ်တော်မူသည်မဟုတ်၊ သန့်ရှင်းစေခြင်းငှာခေါ်တော်မူ၏။ ထိုကြောင့်၊ ငါတို့ကိုငြင်းပယ်သောသူသည် လူကိုသာငြင်းပယ်သည်မဟုတ်၊ ကိုယ်တော်၏သန့်ရှင်းသောဝိညာဉ်တော်ကို ငါတို့အားပေးတော်မူသောဘုရားသခင်ကို ငြင်းပယ်၏။”—၁ သက်သာလောနိတ် ၄:၇၊ ၈။

သင်၏စိတ်ပိုင်းဖြတ်ထားမှုကား အဘယ်နည်း

၁၈။ ကျွန်ုပ်တို့၏စိတ်ပိုင်းဖြတ်မှုကား အဘယ်အရာဖြစ်သင့်သနည်း။

^၁၈ ယေဟောဝါဘုရားသခင်ထံ ကျွန်ုပ်တို့၏ဆက်ကပ်အပ်နှံခြင်း၏လေးနက်မှုကို ကျွန်ုပ်တို့တန်ဖိုးထားမည်ဆိုလျှင် အဘယ်အရာကိုပြုလုပ်ဖို့ ကျွန်ုပ်တို့စိတ်ပိုင်းဖြတ်ထားသင့်သနည်း။ ကျွန်ုပ်တို့၏ခိုင်မြဲသောစိတ်ပိုင်းဖြတ်မှုမှာ ကျွန်ုပ်တို့၏အပြုအမူ၊ ခရစ်ယာန်ဓမ္မအမှုနှင့်ပတ်သက်၍ ကောင်းသောကိုယ်ကိုကိုယ်သိသောစိတ်ကို စွဲကိုင်ထားရန်ဟူ၍ ဖြစ်သင့်သည်။ ပေတရုက ဤသို့တိုက်တွန်းခဲ့သည်– “ခရစ်တော်၌ သင်တို့ကျင့်သောအကျင့်ကောင်းကို ရှုတ်ချသောသူတို့သည် ကဲ့ရဲ့ပြစ်တင်သောအခါ၊ ကိုယ်တိုင်ရှက်ကြောက်ခြင်းရှိမည်အကြောင်း၊ သင်တို့သည် ကိုယ်ကိုကိုယ်သိသောစိတ်ကြည်လင်လျက်နေကြလော့။” (၁ ပေတရု ၃:၁၆) ကျွန်ုပ်တို့ခရစ်ယာန်အမူအကျင့်ကြောင့် ဝေဒနာနှင့် မတော်တရားပြုမူပြောဆိုခြင်းကို ကျွန်ုပ်တို့ခံရကြပေမည်၊ သို့သော် ခရစ်တော်သည် မိမိ၏ယုံကြည်ခြင်းနှင့် ဘုရားသခင်အပေါ် သစ္စာစောင့်သိမှုကြောင့် အလားတူခံခဲ့ရသည်။ “ထိုသို့ခရစ်တော်သည် ကိုယ်ခန္ဓာတော်၌ ငါတို့အတွက်ခံတော်မူသည်မှန်သောကြောင့်၊ သင်တို့လည်း ထိုသို့သောသဘောကိုလက်နက်ပြု၍ သုံးစွဲကြလော့။ အကြောင်းမူကား၊ ကိုယ်ခန္ဓာ၌ခံသောသူသည် [မကောင်းမှု] တို့နှင့်လွတ်ငြိမ်းသည်” ဟုပေတရုကဆိုခဲ့၏။—၁ ပေတရု ၄:၁။

၁၉။ ကျွန်ုပ်တို့နှင့်ပတ်သက်၍ အဘယ်အရာကို ကျွန်ုပ်တို့ပြောဆိုစေလိုကြသနည်း။

^၁၉ အမှန်မှာ ကျွန်ုပ်တို့၏ဆက်ကပ်အပ်နှံမှုနှင့်အညီ အသက်ရှင်နေထိုင်ရန်ဟူသော ခိုင်မြဲသည့်စိတ်ပိုင်းဖြတ်ထားမှုက ဝိညာဉ်ရေးရာ၊ ကျင့်ဝတ်ရေးရာ၊ ကာယရေးရာတို့၌ ဖျားနာမှုဖြစ်စေသည့် စာတန့်လောက၏ထောင်ချောက်များမှ ကျွန်ုပ်တို့ကို ကာကွယ်ပေးပါလိမ့်မည်။ သို့သော် ထိုမျှမက စာတန်နှင့် သူ၏ကိုယ်စားလှယ်များက ပေးကမ်းနိုင်သော မည်သည့်အရာထက်မဆို သာလွန်ကောင်းမွန်လှသည့် ဘုရားသခင်၏မျက်နှာသာတော်ကို ကျွန်ုပ်တို့ရရှိထားကြောင်း ယုံကြည်စိတ်ချစေပါလိမ့်မည်။ သို့ဖြစ်၍ အမှန်တရားကို ကျွန်ုပ်တို့သိရှိခါစကမေတ္တာမျိုး ကျွန်ုပ်တို့တွင်မရှိတော့ကြောင်း ဘယ်သောအခါမျှအပြောမခံရပါစေနှင့်။ ယင်းအစား ပထမရာစုနှစ်မှ သွာတိရအသင်းတော်တွင် ရှိခဲ့ကြသူများကဲ့သို့ပင် ကျွန်ုပ်တို့နှင့်ပတ်သက်၍ ဤသို့ပြောဆိုကြပါလေစေ– “သင်အကျင့်ကျင့်ခြင်း၊ ချစ်ခြင်း၊ အမှုဆောင်ခြင်း၊ ယုံကြည်ခြင်း၊ သည်းခံခြင်းကိုလည်းကောင်း၊ နောက်ကျင့်သောအကျင့်တို့သည် အရင်ကျင့်သောအကျင့်ထက် သာ၍များကြောင်းကိုလည်းကောင်း ငါသိ၏။” (ဗျာဒိတ် ၂:၄၊ ၁၈၊ ၁၉) မှန်ပါသည်၊ ကျွန်ုပ်တို့သည် မိမိတို့၏ဆက်ကပ်အပ်နှံခြင်းနှင့်ပတ်သက်၍ မပူမအေးမနေပါနှင့်၊ အဆုံးနီးနေပြီဖြစ်ရာ—ကျွန်ုပ်တို့သည် အဆုံးအထိ ဇွဲရှိလျက် “စိတ်အားထက်သန်” ကြပါစို့။—ရောမ ၁၂:၁၁၊ သတင်းကောင်း; ဗျာဒိတ် ၃:၁၅၊ ၁၆။

[အောက်ခြေမှတ်ချက်များ]

သင်မှတ်မိသလော

• ဆက်ကပ်အပ်နှံမှုတွင် အဘယ်အရာ ပါဝင်သနည်း။

• ဘုရားသခင်၏ဆက်ကပ်အပ်နှံထားသော အဘယ်ရှေးခေတ်နှင့် မျက်မှောက်ခေတ်ကျေးကျွန်များ၏ ပုံနမူနာများသည် ကျွန်ုပ်တို့အတုယူထိုက်ရာဖြစ်သနည်း။

• ဘုရားသခင်ထံ ကျွန်ုပ်တို့အမှုဆောင်ခြင်းကို မည်သို့ ရှုမြင်သင့်သနည်း။

• ဘုရားသခင်ထံ ကျွန်ုပ်တို့၏ဆက်ကပ်အပ်နှံမှုနှင့်ပတ်သက်၍ ကျွန်ုပ်တို့စိတ်ပိုင်းဖြတ်ထားချက်ကား အဘယ်အရာဖြစ်သင့်သနည်း။

[စာမျက်နှာ ၁၅ ပါ ရုပ်ပုံ]

ယေရမိသည် အလွန်ရက်စက်သော ဆက်ဆံမှုကို ရင်ဆိုင်ခဲ့ရလင့်ကစား သစ္စာရှိစွာနေထိုင်ခဲ့

[စာမျက်နှာ ၁၆ ပါ ရုပ်ပုံ]

အန့်စ် ဘီဗာသည် ဇွဲရှိသောခရစ်ယာန်တစ်ဦးအဖြစ် မိမိ၏သားသမီးများအတွက် ပုံနမူနာကို ချမှတ်ပေးခဲ့

[စာမျက်နှာ ၁၇ ပါ ရုပ်ပုံ]

ရာနှင့်ချီသော သက်သေခံလူငယ်များသည် စပိန်အကျဉ်းထောင်ထဲတွင် သစ္စာစောင့်သိခဲ့ကြ

[စာမျက်နှာ ၁၈ ပါ ရုပ်ပုံ]

ဝိညာဉ်ရေးရာသဘောအရ တန်ဖိုးရှိသောအရာတစ်ခုခု တိုးပွားစေကြစို့