“ဘုရားသခင်၌ ချဉ်းကပ်ကြလော့။ သို့ပြုလျှင် သင်တို့၌ ချဉ်းကပ်တော်မူလိမ့်မည်။”

မတိုင်မီနှင့် ပြီးနောက်​—သမ္မာကျမ်းစာက ဤသူကို ပြောင်းလဲပေးပုံ

တေးဂီတသည် ရိုဖ်မိုက်ကယ်လ်၏အသက်ဖြစ်သည်။ မူးယစ်​ဆေးဝါးသည် သူ၏စွဲလမ်းရာဖြစ်သည်။ ​ဂျာမနီနိုင်ငံမှ ​လူငယ်တစ်ဦးအနေဖြင့် အရက်သောက်ကြူးခဲ့ပြီး အဲလ်အက်စ်ဒီ၊ ​ကိုကင်း၊ ဆေးခြောက်နှင့် ထုံထိုင်းစေသည့်အခြားဆေးဝါးများကို ပရမ်းပတာသုံးစွဲခဲ့၏။

ရိုဖ်မိုက်ကယ်လ်သည် အာဖရိကနိုင်ငံတစ်နိုင်ငံသို့ မူးယစ်ဆေးများ ခိုးသွင်းရန် ကြိုးစားနေစဉ် အဖမ်းခံရပြီး ထောင်ဒဏ် ၁၃ လကျခဲ့သည်။ ထောင်ကျနေစဉ် ဘဝ၏စစ်မှန်သောရည် ရွယ်ချက်ကို သူတွေးတောချိန်ရရှိခဲ့၏။

ထို့နောက် ရိုဖ်မိုက်ကယ်လ်နှင့် သူ့ဇနီးအာစူလာတို့သည် ဘဝအဓိပ္ပာယ်နှင့် အမှန်တရားကို ​သဲသဲမဲမဲရှာဖွေခဲ့ကြသည်။ ခရစ်ယာန်ချာ့ချ်များကြောင့် စိတ်ပျက်ဖွယ်တွေ့ ကြုံမှုများ ရရှိခဲ့ကြသော်လည်း သူတို့သည် ဘုရားသခင်ကို သိလိုစိတ်ပြင်းပြခဲ့ကြ၏။ သို့ရာတွင် ​ဘာသာတရားအမျိုးမျိုးက သူတို့၏မေးခွန်းများကို ကျေနပ်လောက်အောင် အဖြေများ မပေးနိုင်ကြပေ။ ထို့ပြင် အဆိုပါ​ဘာသာတရားများက သူတို့၏အသက်တာကို ပြောင်းလဲပေးနိုင်စွမ်းမရှိ​ကြချေ။

နောက်ဆုံးတွင် ရိုဖ်မိုက်ကယ်လ်နှင့် အာစူလာတို့သည် ယေဟောဝါသက်သေများနှင့် အဆက်အသွယ်ရလေသည်။ သမ္မာကျမ်းစာ,စသင်ကြသောအခါ ရိုဖ်မိုက်ကယ်လ်သည် “ဘုရားသခင်၌ ချဉ်းကပ်ကြလော့။ သို့ပြုလျှင် သင်တို့ ၌ ချဉ်းကပ်တော်မူလိမ့်မည်” ဟူသော ဆုံးမစကားကို အလွန်စွဲမှတ်သွားခဲ့၏။ (ယာကုပ် ၄:၈) ​ထိုအခါ သူသည် ‘ဥပဓိရုပ်ဟောင်းကိုချွတ်ပယ်၍ မှန်သောဖြောင့်မတ်ခြင်း၊ သန့်ရှင်းခြင်း . . . အားဖြင့် ဘုရားသခင်နှင့်အတူအမျှ ​ဖန်ဆင်းသော ဥပဓိရုပ်သစ်ကို ယူတင်ဝတ်ဆောင်’ ရန်သန္နိဋ္ဌာန်ချ​ခဲ့သည်။​—ဧဖက် ၄:​၂၂-၂၄။

ရိုဖ်မိုက်ကယ်လ်သည် ဥပဓိရုပ်သစ်ကို မည်သို့ယူတင်ဝတ်ဆောင်နိုင်ခဲ့သနည်း။ လူတစ်ဦး၏ဥပဓိရုပ်ကို ‘တိကျမှန်ကန်သောအသိပညာအားဖြင့်’ “ဖန်ဆင်းတော်မူသောသူ” ယေဟောဝါဘုရားသခင်၏ “ပုံသဏ္ဌာန်နှင့်အညီ” ဝတ်ဆောင်နိုင်ကြောင်း သမ္မာကျမ်းစာမှ ​သူသိနားလည်လာခဲ့သည်။​—ကောလောသဲ ၃:​၉-၁၁။

ရိုဖ်မိုက်ကယ်လ်သည် တိကျမှန်ကန်သောအသိပညာကိုရလာလေ သူ၏အသက်တာကို သမ္မာကျမ်းစာမူများနှင့်အညီဖြစ်စေရန် ကြိုးစားအားထုတ်လေဖြစ်၏။ (ယောဟန် ၁၇:၃) ​မူးယစ်ဆေးဖြတ်ခြင်းသည် မလွယ်ကူသော်လည်း ဆုတောင်းခြင်းဖြင့် ယေဟောဝါထံ​ချဉ်းကပ်ပြီး ကိုယ်တော်၏အကူအညီရရှိခြင်း​တန်ဖိုးကို ​ရိုဖ်မိုက်ကယ်လ် သဘောပေါက်လာလေသည်။ (၁ ယောဟန် ၅:​၁၄၊ ၁၅) ဘုရားသခင်၏အလိုတော်ကို ကြိုးစားပမ်းစားဆောင်ရွက်နေကြသော ယေဟောဝါသက်သေများနှင့် အနီးကပ်ပူးပေါင်းလုပ်ဆောင်ခြင်းဖြင့်လည်း နောက်ထပ်အကူအညီရရှိခဲ့သည်။

ဤလောကသည် ရွေ့သွားကွယ်ပျောက်သွားပြီး ဘုရားသခင့်အလိုတော်ဆောင်ရွက်သူများသည် ထာဝစဉ်တည်ရှိလိမ့်မည်ကို ​ရိုဖ်မိုက်ကယ်လ်သိထားခြင်းကလည်း အကူအညီဖြစ်ခဲ့၏။ ဤလောကကို ခေတ္တခဏမချစ်ဘဲ မေတ္တာရှင်ဘုရားသခင် ယေဟောဝါနှင့် အနီးကပ်ဆက်ဆံမှု ရှိခြင်းမှရမည့် ထာဝရကောင်းချီးကို သူရွေးချယ်နိုင်ခဲ့သည်။ (၁ ယောဟန် ၂:​၁၅-၁၇) “ငါ့သား ပညာရှိလော့။ ကဲ့ရဲ့သောသူ၏စကားကို ငါချေနိုင်အောင် ငါ့စိတ်ကို ရွှင်လန်းစေလော့” ဟူသည့် နယပုံပြင် ၂၇:၁၁ ပါစကားများက ရိုဖ်မိုက်ကယ်လ်အတွက် အလွန်စိတ်စွဲမှတ်စရာဖြစ်ခဲ့သည်။ ကျေးဇူးတင်လေးမြတ်စွာဖြင့် သူဤသို့ဆို၏– “လူသားတွေကို ယေဟောဝါရဲ့စိတ်ရွှင်လန်းစေခွင့်ပေးတဲ့အတွက် ကိုယ်တော်ရဲ့မေတ္တာ ဘယ်လောက်ကြီးမားတယ်ဆိုတာကို ​ဒီအခန်းငယ်က ဖော်ပြတယ်။”

ရိုဖ်မိုက်ကယ်လ်၊ သူ၏ဇနီးနှင့် သားသမီးသုံးဦးတို့ကဲ့သို့ပင် ထောင်သောင်းမကသောသူတို့သည် သမ္မာကျမ်းစာမူများကို လိုက်လျှောက်ခြင်းအားဖြင့် အကျိုးကျေးဇူးခံစားခဲ့ကြရပြီ။ ဤသို့သောသူများကို ကမ္ဘာတစ်ဝန်းရှိ ယေဟောဝါသက်သေများ၏ အသင်းတော်များတွင် တွေ့ ရှိနိုင်၏။ ဝမ်းနည်းစရာမှာ၊ နိုင်ငံအချို့တွင် သက်သေခံများသည် မိသားစုများကို ဖြိုခွဲနေသော အန္တရာယ်ဂိုဏ်းဖြစ်သည်ဟု မဟုတ်မမှန် စွပ်စွဲခံနေကြရသည်။ ရိုဖ်မိုက်ကယ်လ်၏ကိုယ်တွေ့အဖြစ်အပျက်က ထိုသို့မဟုတ်ကြောင်း ဖော်ပြသည်။​—ဟေဗြဲ ၄:၁၂။

ဝိညာဉ်ရေးရာများကို ရှေးဦးထားရန် တိုက်တွန်းထားသော မဿဲ ၆:၃၃ သည် မိမိ၏မိသားစုကို လမ်းမှန်ပေါ်ရောက်စေသည့် ​“သံလိုက်အိမ်မြှောင်” နှင့်တူသည်ဟု ရိုဖ်မိုက်ကယ်လ်က ပြောပြသည်။ ​ရိုဖ်မိုက်ကယ်လ်နှင့် သူ၏မိသားစုသည် ခရစ်ယာန်များအနေနှင့် ပျော်ရွှင်သောမိသားစုဘဝရရှိသည့်အတွက် ယေဟောဝါကို အလွန်ကျေးဇူးတင်လျက်ရှိကြ၏။ “ငါ၌ ထာဝရဘုရား[သခင်]ပြုတော်မူသော ကျေးဇူးအလုံးစုံတို့ကို အဘယ်သို့ဆပ်ရမည်နည်း” ဟူ၍ သီဆိုခဲ့သော ဆာလံဆရာ၏ခံစားချက်ကို သူတို့ မျှဝေခံစားနေကြသည်။​—ဆာလံ ၁၁၆:၁၂။

[စာမျက်နှာ ၉ ပါ အကျဉ်းဖော်ပြချက်]

ဘုရားသခင်သည် မိမိ၏စိတ်ကို ရွှင်လန်းစေရန် လူသားများကို လုပ်ဆောင်ခွင့်ပေးထား

[စာမျက်နှာ ၉ ပါ လေးထောင့်ကွက်]

သမ္မာကျမ်းစာမူများ အကျိုးသက်ရောက်

လူများစွာကို သေစေနိုင်သောမူးယစ်ဆေးဖြတ်စေခဲ့သည့် သမ္မာကျမ်းစာမူများအနက် အချို့သည် ​အောက်ပါအတိုင်းဖြစ်သည်–

“ထာဝရဘုရား[သခင်]ကို ချစ်သောသူတို့ မကောင်းသောအမှုကို ရွံရှာကြလော့။” (ဆာလံ ၉၇:၁၀) လူ​တစ်ဦးသည် သေစေနိုင်သောအမူအကျင့်များ၏ မကောင်းမှုကို သိရှိပြီး ၎င်းတို့ကို အမှန်တကယ်မုန်းတီးလာပြီဆိုလျှင် ဘုရားသခင်နှစ်သက်ရာများကို လုပ်ဆောင်ရန် သာ၍လွယ်ကူလာသည်။

“ပညာရှိတို့နှင့်ပေါင်းဖော်သောသူသည် ပညာရှိတတ်၏။ လူမိုက်တို့နှင့်ပေါင်းဖော်သောသူမူကား ပျက်စီးတတ်၏။” (သု. ၁၃:၂၀) လူတစ်ဦးသည် ​မူးယစ်ဆေးနှင့် အခြားအရာများစွဲခြင်းကို ငြင်းပယ်ရန် အပေါင်းအသင်းများကို ဂရုတစိုက် ရွေးချယ်ပေါင်းသင်းဖို့လိုသည်။ သူ၏သန္နိဋ္ဌာန်ကို ထောက်ခံပေးမည့် ခရစ်ယာန်များနှင့် မိတ်ဆွေဖွဲ့ခြင်းသည် အမှန်ပင်အကျိုးရှိ၏။

“အဘယ်အမှုကိုမျှ စိုးရိမ်ခြင်းမရှိဘဲ အရာရာ၌ ကျေးဇူးတော်ကို ချီးမွမ်းခြင်းနှင့်တကွ ဆုတောင်း . . . သောအားဖြင့် သင်တို့တောင်းပန်လိုသောအရာများတို့ကို ဘုရားသခင်အား ကြားလျှောက်ကြလော့။ ထိုသို့ပြုလျှင် အဘယ်သူမျှကြံ၍မမီနိုင်သော ဘုရားသခင်၏ငြိမ်သက်ခြင်းသည် ယေရှုခရစ်အားဖြင့် သင်တို့၏စိတ်နှလုံးတို့ကို စောင်မလိမ့်မည်။” (ဖိလိပ္ပိ ၄:​၆၊ ၇) ဤသို့သောစိတ်ငြိမ်သက်မှုမျိုးကို မူးယစ်ဆေးမှီဝဲခြင်းမှ မရရှိနိုင်ချေ။ ထို့ပြင် မူးယစ်ဆေးမသုံးစွဲဘဲ ဘုရားသခင်ကို ​ဆုတောင်းအားကိုးခြင်းဖြင့် ဘဝပြဿနာများကို ​ကိုင်တွယ်ဖြေရှင်းနိုင်ပေသည်။