စာရှုသူများထံမှ မေးခွန်းလွှာ
“ယောက်ျားတစ်ထောင်တို့တွင် တစ်ယောက်ကိုငါတွေ့ပြီ။ မိန်းမတစ်ထောင်တို့တွင် တစ်ယောက်ကိုမျှ ငါမတွေ့” ဟူသည် အဘယ်အရာကိုဆိုလိုသနည်း။—ဒေ. ၇:၂၈။
ထိုမှုတ်သွင်းခံကျမ်းစကားကို မှန်ကန်စွာနားလည်နိုင်ရန် ဦးစွာ အမျိုးသမီးများကို ဘုရားသခင်မည်သို့ရှုမြင်ကြောင်း သဘောပေါက်ရမည်။ နောမိ၏ချွေးမဖြစ်သော မုဆိုးမရုသကို “သီလနှင့်ပြည့်စုံသောမိန်းမ” ဟူ၍ ကျမ်းစာကဖော်ပြသည်။ (ရုသ ၃:၁၁) နယပုံပြင် ၃၁:၁၀ အရ ဇနီးကောင်းတစ်ဦးသည် “ပတ္တမြားထက် အဖိုးသာ၍ထိုက်ပေ၏။” သို့ဆိုလျှင် “ယောက်ျားတစ်ထောင်တို့တွင် တစ်ယောက်ကိုငါတွေ့ ပြီ။ မိန်းမတစ်ထောင်တို့တွင် တစ်ယောက်ကိုမျှ ငါမတွေ့” ဟူ၍ ရှေးဣသရေလဘုရင်ရှောလမုန် ပြောဆိုရာတွင် သူအဘယ်အရာကို ဆိုလိုသနည်း။
ရှေ့နောက်စကားက ရှောလမုန်ခေတ်မှ အမျိုးသမီးများသည် ကိုယ်ကျင့်တရားကျဆင်းနေကြောင်း ဖော်ပြသည်။ (ဒေ. ၇:၂၆) ထိုသို့ဖြစ်ရခြင်းမှာ ဗာလနတ်ဘုရားကိုဝတ်ပြုသော တစ်ပါးအမျိုးသမီးများ၏သြဇာ အကြီးအကျယ်လွှမ်းမိုးနေခြင်းကြောင့် ဖြစ်ပေမည်။ ဘုရင်ရှောလမုန်ပင် တိုင်းတစ်ပါးမိဖုရားများ၏ ဩဇာအောက် ရောက်ခဲ့ရသည်။ သူ၌ “မင်းသမီးဖြစ်သောခင်ပွန်းခုနစ်ရာ၊ မောင်းမမိဿံသုံးရာရှိ၍” သူတို့သည် မှားယွင်းသောနတ်ဘုရားများထံသို့ “စိတ်နှလုံးတော်ကို လွဲစေကြ၏” ဟုကျမ်းစာဆိုသည်။ (၃ ဓမ္မရာဇဝင် ၁၁:၁-၄) အမျိုးသားများ၏ကိုယ်ကျင့်တရားလည်း ကျဆင်းနေသည်ဖြစ်ရာ ယောက်ျားတစ်ထောင်တွင် ဖြောင့်မတ်သူတစ်ယောက် တွေ့ ရှိရန်ပင် အလွန်ခဲယဉ်းလှ၏။ “ငါတွေ့သောအရာတစ်ခုတည်းဟူမူကား ဘုရားသခင်သည် လူကို ဖြောင့်မတ်အောင် ဖန်ဆင်းတော်မူသော်လည်း လူတို့သည် များပြားသောအကြံအစည်တို့ကို ရှာဖွေကြံစည်ကြပြီ” ဟုရှောလမုန်ကောက်ချက်ချခဲ့သည်။ (ဒေ. ၇:၂၉) ယင်းသည် လူသားထုတစ်ရပ်လုံးကို ရည်ညွှန်းပြောဆိုနေခြင်းဖြစ်သည်။ ယောက်ျားကို လူ့မျိုးနွယ်အဖြစ် နှိုင်းယှဉ်ဖော်ပြခြင်းဖြစ်ကာ မိန်းမနှင့်နှိုင်းယှဉ်နေခြင်းမဟုတ်ပေ။ ထို့ကြောင့် ဒေ. ၇:၂၈ တွင် တွေ့ ရသောစကားများမှာ ရှောလမုန်ခေတ်ရှိလူတို့၏ ကိုယ်ကျင့်တရားအခြေအနေကို ခြုံငုံပြောဆိုနေခြင်းဖြစ်သည်ဟု ရှုမြင်သင့်သည်။
သို့သော် ထိုအခန်းငယ်တွင် အခြားအဓိပ္ပာယ်တစ်မျိုးလည်း ရှိနိုင်သည်။ ယင်းသည် ပရောဖက်ပြုချက်ဖြစ်ပုံရသည်။ အကြောင်းမှာ မိန်းမတစ်ဦးမျှ ယေဟောဝါရှေ့ ပြည့်ဝစုံလင်စွာ နာခံမှုမတင်ပြနိုင်ပေ။ သို့သော် ယေရှုခရစ်မူကား ပြည့်ဝစုံလင်စွာ နာခံမှုတင်ပြခဲ့သော ယောက်ျားတစ်ဦးဖြစ်ပေသည်။—ရောမ ၅:၁၅-၁၇။
[စာမျက်နှာ ၃၁ ပါ ရုပ်ပုံ]
ယောက်ျားတစ်ထောင်တို့တွင်တစ်ယောက်