“စိတ်အားထက်သန်” မှုဖြင့် တိကျမှန်ကန်သောအသိပညာ၌ တိုးပွားပါ

ယေဟောဝါ၏ကျေးကျွန်အားလုံးသည် ကိုယ်တော်၏မျက်နှာသာရရန် ကြိုးစားကြသည်။ ထိုသို့မျက်နှာသာရလိုသောကြောင့် ကျွန်ုပ်တို့သည် မိမိတို့၏ယုံကြည်ခြင်းအရည်အသွေး တိုးတက်စေရန်နှင့် မြင့်မြတ်သောလုပ်ငန်းတော်တွင် ထက်သန်စွာပါဝင်ရန် စိတ်ပြင်းပြကြသည်။ သို့သော် တမန်တော်ပေါလုခေတ်ကဂျူးတချို့ကို ထိခိုက်ခဲ့သောအရာဖြစ်သည့် ဖြစ်လာနိုင်ဖွယ်အန္တရာယ်ကို ကျွန်ုပ်တို့အား ဤသို့အာရုံစိုက်စေသည်– “ထိုသူတို့သည် မှန်သောပညာမရှိသော်လည်း ဘုရားသခင်ဘက်၌ စိတ်အားကြီးသည်။” (ရော. ၁၀:၂) ရှင်းနေသည်မှာ ကျွန်ုပ်တို့၏ယုံကြည်ခြင်းနှင့် ယေဟောဝါအားဝတ်ပြုကိုးကွယ်ခြင်းသည် စိတ်လှုပ်ရှားမှုအပေါ်တွင်သာ အခြေမခံသင့်ပါ။ ကျွန်ုပ်တို့သည် ကျွန်ုပ်တို့၏ဖန်ဆင်းရှင်၊ ကိုယ်တော့်အလိုတော်နှင့်ဆိုင်သည့် တိကျမှန်ကန်သောအသိပညာရှိဖို့ လိုအပ်သည်။

မိမိရေးသောစာစောင်များထဲမှ အခြားတစ်ခုတွင် ပေါလုက ဘုရားသခင်နှစ်သက်သောအကျင့်အကြံကို အသိပညာရယူပိုင်ဆိုင်လိုစိတ်နှင့် ဆက်စပ်ခဲ့သည်။ ခရစ်တော်၏နောက်လိုက်များသည် “ကောင်းသောအမှုအမျိုးမျိုး၌ သီးပွင့်ဖြစ်ထွန်း၍ ဘုရားသခင်နှင့်ပတ်သက်သည့် တိကျမှန်ကန်သောအသိပညာ၌ တိုးပွား” ကြသည်နှင့်အမျှ ‘ယေဟောဝါ၏ နှစ်သက်လက်ခံမှုကို အပြည့်အဝရရှိလျက် ကိုယ်တော်နှင့်ထိုက်တန်စွာ လျှောက်လှမ်းကြ’ ရန်ဘုရားသခင်၏ “အလိုတော်နှင့်ဆိုင်သည့် တိကျမှန်ကန်သောအသိပညာ ပြည့်ဝစေရန်” ပေါလုဆုတောင်းခဲ့သည်။ (ကော. ၁:၉၊ ၁၀၊ ကဘ) “တိကျမှန်ကန်သောအသိပညာ” ရဖို့အဘယ်ကြောင့် အလွန်အရေးကြီးသနည်း။ ကျွန်ုပ်တို့သည် ထိုသို့သောအသိပညာတွင် အဘယ်ကြောင့် တိုးပွားသင့်သနည်း။

ယုံကြည်ခြင်းရှိရသည့် အဓိကအချက်

သမ္မာကျမ်းစာတွင် ဖော်ပြထားသည့်အတိုင်း ဘုရားသခင်၊ ကိုယ်တော့်အလိုတော်နှင့်ဆိုင်သည့် တိကျမှန်ကန်သောအသိပညာသည် ကျွန်ုပ်တို့ယုံကြည်ခြင်း၏ အခြေခံဖြစ်သည်။ ထိုသို့သောယုံကြည်စိတ်ချရသည့်အသိပညာမရှိဘဲ ယေဟောဝါကိုယုံကြည်ခြင်းသည် လေတစ်ချက်မှုတ်လိုက်ရုံနှင့် ပြိုလဲသွားသည့် ဖဲချပ်နှင့်ဆောက်ထားသောအိမ်နှင့်တူလိမ့်မည်။ ကျွန်ုပ်တို့၏ “စဉ်းစားဆင်ခြင်နိုင်စွမ်း” ဖြင့် ဘုရားသခင်၏မြင့်မြတ်သောအမှုတော်ကို ထမ်းဆောင်ကြရန်နှင့် ‘ကျွန်ုပ်တို့၏စိတ်သဘောကို ပြုပြင်ပြောင်းလဲကြ’ ရန်ပေါလုအားပေးသည်။ (ရော. ၁၂:၁၊ ၂၊ ကဘ) ဤကဏ္ဍတွင် သမ္မာကျမ်းစာကို မှန်မှန်လေ့လာခြင်းက အထောက်အကူပြုနိုင်သည်။

ပိုလန်နိုင်ငံမှ မှန်မှန်ရှေ့ဆောင်ညီအစ်မအဲဗာ ဤသို့ဝန်ခံသည်– “ကျွန်မ ဘုရားသခင့်နှုတ်မြွက်စကားတော်ကို မှန်မှန်မလေ့လာတဲ့အခါ ယေဟောဝါနဲ့ပတ်သက်တဲ့ တိကျမှန်ကန်တဲ့အသိပညာမှာ တိုးတက်မှုမရှိတော့ဘူး။ ကျွန်မရဲ့ခရစ်ယာန်အရည်အသွေးတွေ အလျင်အမြန်ပဲဆုတ်ယုတ်ကျဆင်းလာပြီး ဘုရားသခင်အပေါ် ကျွန်မရဲ့ယုံကြည်မှုတွေ အားနည်းလာတယ်၊ အဲဒါက ဘုရားသခင်နဲ့ကျွန်မရဲ့ဆက်ဆံရေးကို ပျက်စီးစေတယ်။” ကျွန်ုပ်တို့ ဘယ်တော့မျှ ထိုသို့မဖြစ်ပါစေနှင့်! ယေဟောဝါနှင့်ပတ်သက်သည့် တိကျမှန်ကန်သောအသိပညာ၌ တိုးတက်ခဲ့သောကြောင့် ကိုယ်တော့်မျက်နှာသာတော်ခံစားခဲ့ရသူတစ်ဦး၏ ပုံသက်သေကို သုံးသပ်ကြည့်ပါ။

“ကိုယ်တော်၏တရားကို အကျွန်ုပ်သည် အလွန်နှစ်သက်ပါ၏”

ကျမ်းစာထဲမှ ဆာလံ ၁၁၉ တွင်မှတ်တမ်းတင်ထားသော ကဗျာသီချင်းက ယေဟောဝါ၏တရားများ၊ သက်သေခံတော်မူချက်များ၊ ဆုံးမစကားများ၊ ပညတ်များ၊ စီရင်တော်မူချက်များအပေါ် ဆာလံဆရာ၏ခံစားချက်ကို ဖော်ပြသည်။ ဆာလံဆရာ ဤသို့ရေးခဲ့သည်– “အထုံးအဖွဲ့တော်တို့၌ မွေ့လျော်ပါ၏။ . . . သက်သေခံတော်မူချက်တို့သည် အကျွန်ုပ်မွေ့လျော်ရာ . . . ဖြစ်ကြပါ၏။” ဤသို့လည်းရေးသည်– “ကိုယ်တော်၏တရားကို အကျွန်ုပ်သည် အလွန်နှစ်သက်ပါ၏။ တစ်နေ့လုံး ဆင်ခြင်အောက်မေ့လျက်နေပါ၏။”—ဆာ. ၁၁၉:၁၆၊ ၂၄၊ ၄၇၊ ၄၈၊ ၇၇၊ ၉၇။

“မွေ့လျော်” နှင့် “ဆင်ခြင်အောက်မေ့” ဟူသောအသုံးအနှုန်းများက ဘုရားသခင့်နှုတ်မြွက်စကားတော်ကို တွေးတောဆင်ခြင်ကြောင်း၊ ထိုသို့တွေးတောဆင်ခြင်ခြင်းတွင် မွေ့လျော်ကြောင်းကို ဆိုလိုသည်။ ယင်းအသုံးအနှုန်းများက ဘုရားသခင့်တရားတော်လေ့လာခြင်းကို ဆာလံဆရာအလွန်နှစ်သက်မြတ်နိုးကြောင်း အလေးပေး၏။ ယင်းနှစ်သက်မြတ်နိုးမှုသည် ဆာလံဆရာစိတ်လှုပ်ရှား၍ ထွက်ပေါ်လာရာမျှသာမဟုတ်ပါ။ ယင်းအစား၊ တရားတော်ကို “ဆင်ခြင်အောက်မေ့” လိုသော၊ ယေဟောဝါ၏စကားတော်ကို ထိုးထွင်းသိလိုသောပြင်းပြသည့်ဆန္ဒ သူ၌ရှိသည်။ ဘုရားသခင်နှင့် ကိုယ်တော်၏အလိုတော်ကို အဖြစ်နိုင်ဆုံးတိတိကျကျသိလိုခဲ့ကြောင်း သူ၏စိတ်နေသဘောထားမှ ကျွန်ုပ်တို့သိနိုင်သည်။

ဘုရားသခင့်နှုတ်မြွက်စကားတော်အပေါ် ဆာလံဆရာ၏နှစ်သက်မြတ်နိုးမှုသည် သူ၏နှလုံးထဲမှ လှိုက်လှိုက်လှဲလှဲထွက်လာကြောင်း ထင်ရှားသည်။ မိမိတို့ကိုယ်ကို ဤသို့မေးနိုင်သည်– “ဘုရားသခင့်နှုတ်မြွက်စကားတော်ကို ငါရော နှစ်သက်မြတ်နိုးရဲ့လား။ သမ္မာကျမ်းစာရဲ့အပိုင်းတစ်ပိုင်းကို နေ့တိုင်းဖတ်ပြီး လေ့လာဆန်းစစ်တာကို ငါပျော်မွေ့ရဲ့လား။ ဘုရားသခင့်နှုတ်မြွက်စကားတော်ကို ကြိုးစားပြီး ငါဖတ်ရဲ့လား၊ မဖတ်ခင်မှာ ယေဟောဝါထံဆုတောင်းရဲ့လား။” ယင်းမေးခွန်းများကို ဟုတ်ကဲ့ဟုဖြေနိုင်ပါက ကျွန်ုပ်တို့သည် “ဘုရားသခင်နှင့်ပတ်သက်သည့် တိကျမှန်ကန်သောအသိပညာ၌ တိုးပွား” နေခြင်းဖြစ်နိုင်သည်။

အဲဗာ ဤသို့ပြောသည်– “ကျွန်မရဲ့ကိုယ်ပိုင်လေ့လာမှုအရည်အသွေးတိုးတက်ဖို့ အမြဲကြိုးစားတယ်။ ‘ကောင်းမွန်သောပြည်ကိုကြည့်လော့!’ ဘရိုရှာရကတည်းက အဲဒီဘရိုရှာကို ကျွန်မရဲ့လေ့လာမှုတိုင်းလိုလိုမှာ အသုံးပြုခဲ့တယ်။ လိုအပ်မယ်ဆိုရင် သမ္မာကျမ်းစာအပေါ်ထိုးထွင်းအမြင် စာအုပ်နဲ့ တခြားကိုးကားထားတဲ့စာအုပ်တွေမှာ အကြောင်းအရာတွေရှာဖွေကြည့်ဖို့ ပိုပြီးကြိုးစားတယ်။”

မိသားစုတာဝန်အတော်အတန်ရှိသော ဝို့စီရေ့ဂျ်နဲ့ မောဂေါရ်ဇာတာတို့၏ပုံသက်သေကိုလည်း သုံးသပ်ကြည့်ပါ။ သူတို့၏ဇယားတွင် ကိုယ်ပိုင်ကျမ်းစာလေ့လာမှုကို မည်သို့ပါဝင်စေသနည်း။ “ဘုရားသခင့်နှုတ်မြွက်စကားတော်ကို တစ်ဦးစီလေ့လာဖို့ အတတ်နိုင်ဆုံး အချိန်ရအောင်လုပ်တယ်။ ပြီးတော့ မိသားစုလေ့လာမှုလုပ်တဲ့အချိန်မှာနဲ့ နေ့စဉ်စကားစမြည်ပြောဆိုချိန်မှာ တွေ့ရှိထားတဲ့စိတ်ဝင်စားစရာ ဒါမှမဟုတ် လှုံ့ဆော်မှုဖြစ်စေတဲ့အရာတွေကို ပြောကြတယ်။” နက်နက်နဲနဲပြုလုပ်သောကိုယ်ပိုင်လေ့လာမှုက သူတို့ကို များစွာရွှင်လန်းစေပြီး “တိကျမှန်ကန်သောအသိပညာ၌ တိုးပွား” နေရန်အထောက်အကူပြုသည်။

လက်ခံလိုသောစိတ်နှင့်လေ့လာပါ

ဘုရားသခင့်အလိုတော်မှာ “လူအမျိုးမျိုးတို့သည် ကယ်တင်ခံရ၍ အမှန်တရားဆိုင်ရာ တိကျမှန်ကန်သောအသိပညာကို သိရှိလာရန်” ဖြစ်ကြောင်း ခရစ်ယာန်များအနေနှင့် ကျွန်ုပ်တို့ယုံကြည်ကြသည်။ (၁ တိ. ၂:၃၊ ၄၊ ကဘ) ယင်းအချက်က ကျမ်းစာဖတ်ရှုခြင်းနှင့် ဆိုလိုရင်းကို “နားလည်” ရန်ကြိုးစားခြင်းတို့၏တန်ဖိုးကို အလေးပေးဖော်ပြသည်။ (မ. ၁၅:၁၀-၁၁) ထိုသို့ဖြစ်ရန်အကူအညီတစ်ခုမှာ လက်ခံလိုသောစိတ်နှင့်လေ့လာခြင်းဖြစ်သည်။ ယင်းသည် ရှေးဗေရိမြို့သားများကို ပေါလုသတင်းကောင်းဝေမျှသောအခါ သူတို့တင်ပြခဲ့သောဤစိတ်ဓာတ်ပင်ဖြစ်သည်– “နှုတ်တော်ထွက်စကားကိုလည်း စိတ်အားထက်သန်စွာလက်ခံကြ၍ ဤအကြောင်းများမှန်ကန်ကြောင်းကို သိမြင်နိုင်ကြရန် သူတို့သည် နေ့စဉ်နေ့တိုင်း ကျမ်းစာများကို လေ့လာကြ၏။”—တ. ၁၇:၁၁၊ ကက်သလစ်ကျမ်း။

သမ္မာကျမ်းစာလေ့လာနေစဉ် သင်သည် စိတ်အားထက်သန်ပြီး မလိုအပ်ဘဲစိတ်မပျံ့လွင့်စေခြင်းဖြင့် ဗေရိမြို့သားများ၏ပုံသက်သေကို လိုက်လျှောက်ပါသလော။ ခရစ်ယာန်တစ်ဦးသည် လေ့လာမှုကို ရွှင်လန်းစရာအဖြစ် ယခင်ကမရှုမြင်ခဲ့လျှင်ပင် ဗေရိမြို့သားများကို တုပနိုင်သည်။ ထို့ပြင် လူအချို့သည် အသက်အရွယ်ကြီးရင့်လာသည်နှင့်အမျှ ဖတ်ရှုလေ့လာမှုလျော့နည်းလာတတ်သော်လည်း ခရစ်ယာန်တစ်ဦးအနေနှင့် ထိုသို့ဖြစ်စရာမလိုပါ။ အသက်အရွယ်မည်မျှပင်ရှိပါစေ စိတ်အာရုံပျံ့လွင့်မှုမရှိဘဲ ဖတ်ရှုလေ့လာနိုင်သည်။ အကြောင်းအရာကိုဖတ်နေစဉ် အခြားသူများအား ဝေမျှနိုင်သည့်အချက်ကို ထက်သန်စွာရှာဖွေနိုင်သည်။ ဥပမာ၊ လေ့လာနေစဉ်အတွင်း သင်ဖတ်သည့် သို့မဟုတ် သင်ယူရရှိသည့်အရာများထဲမှ သင့်အိမ်ထောင်ဖက် သို့မဟုတ် ခရစ်ယာန်မိတ်ဆွေတစ်ဦးအား ဝေမျှမည့်အချက်တစ်ချက်ကို မှတ်သားနိုင်သလော။ ဤသို့ပြုခြင်းက ယင်းအချက်များကို သင့်စိတ်နှလုံးတွင် ကောင်းစွာစွဲမှတ်စေနိုင်ပြီး အခြားသူတို့အတွက်လည်း ကောင်းသောအကျိုးသက်ရောက်မှုရှိသည်။

သင့်လေ့လာမှုပြုချိန်များနှင့်ပတ်သက်၍ “ယေဟောဝါ၏တရားတော်ကို စစ်ဆေးစောင့်ရှောက်ခြင်းငှာ စိတ်နှလုံးကို အသင့်ပြင်ဆင်” သော ရှေးခေတ်ဘုရားသခင့်ကျေးကျွန်ဧဇရ၏ပုံသက်သေကို လိုက်လျှောက်ပါ။ (ဧဇ. ၇:၁၀၊ ကဘ) သင် မည်သို့လုပ်ဆောင်နိုင်သနည်း။ လေ့လာမှု အကျိုးဖြစ်ထွန်းစေမည့်ဝန်းကျင်ကို ဖန်တီးနိုင်သည်။ ထို့နောက် ယေဟောဝါ၏လမ်းညွှန်မှုနှင့် ဉာဏ်ပညာအတွက် ကိုယ်တော့်ထံဆုတောင်းပါ။ (ယာ. ၁:၅) ကိုယ့်ကိုယ်ကို ဤသို့မေးပါ– ‘ဒီလေ့လာမှုကနေ ဘာသင်ယူဖို့ ငါမျှော်လင့်သလဲ။’ ဖတ်နေစဉ် အဓိကအချက်များကို မှတ်သားပါ။ ယင်းအချက်များကို မှတ်ချက်ယူလိုပေမည်၊ သို့မဟုတ် အထူးသဖြင့် သင်မှတ်မိလိုသည့်အပိုင်းများကို အမှတ်အသားလုပ်လိုပေမည်။ ဟောပြောခြင်းတွင် ပါဝင်သောအခါ၊ ဆုံးဖြတ်ချက်များချသောအခါ၊ သို့မဟုတ် ယုံကြည်သူချင်းများကို အားပေးသောအခါတို့တွင် အကြောင်းအရာကို မည်သို့အသုံးပြုနိုင်ကြောင်း သုံးသပ်ပါ။ လေ့လာမှုအဆုံးပိုင်းတွင် လေ့လာမှတ်သားရာများကို အကျဉ်းချုံးပြန်သုံးသပ်ပါ။ ယင်းက သင်ယူခဲ့ရာများကို စွဲမှတ်သွားရန် အထောက်အကူပြုနိုင်သည်။

မိမိပြုလုပ်ပုံနှင့်ပတ်သက်၍ အဲဗာဤသို့ပြောပြသည်– “ကျွန်မ ကျမ်းစာဖတ်တဲ့အခါမှာ အပြန်အလှန်အညွှန်းများ၊ ကင်းမျှော်စင်စာပေအညွှန်းနဲ့ ကင်းမျှော်စင်စာကြည့်တိုက် စီဒီရွမ်တွေကို အသုံးပြုတယ်။ ဓမ္မအမှုမှာအသုံးပြုဖို့ရည်ရွယ်ချက်နဲ့ မှတ်ချက်တွေယူတယ်။”

အချို့သူတို့သည် ဝိညာဉ်ရေးအကြောင်းအရာများကို နက်နက်နဲနဲလေ့လာမှုလုပ်ခြင်းတွင် နှစ်အတော်ကြာမွေ့လျော်ခဲ့ကြသည်။ (သု. ၂:၁-၅) သို့တိုင် သူတို့သည် လုပ်ကိုင်စရာတာဝန်များစွာရှိပြီး ကိုယ်ပိုင်လေ့လာမှုအတွက် အချိန်ဖယ်ပေးရန် အခက်အခဲရှိကြသည်။ သင်လည်းထိုသို့ဖြစ်ပါက သင့်ဇယားတွင် အဘယ်ပြုပြင်စရာများ ပြုလုပ်နိုင်သနည်း။

ကျွန်ုပ် မည်သို့အချိန်ရနိုင်မည်နည်း

ကျွန်ုပ်တို့နှစ်သက်သည့်အရာများအတွက် အချိန်ပေးရန်လွယ်ကူကြောင်း သင်သဘောတူပေမည်။ ကိုယ်ပိုင်လေ့လာမှုတွင် အာရုံဝင်စားနိုင်ဖို့ အထောက်အကူပြုသည့်အရာမှာ ကျမ်းစာတစ်အုပ်လုံးဖတ်ရှုခြင်းကဲ့သို့သော လက်တွေ့ကျပန်းတိုင်ချမှတ်ခြင်းဖြစ်ကြောင်း များစွာသောသူတို့ တွေ့ရှိကြသည်။ ရှည်လျားသောဆွေစဉ်မျိုးဆက်စာရင်းများ၊ ရှေးခေတ်ဝတ်ပြုရာအိမ်တော်နှင့်ဆိုင်သော အသေးစိတ်ဖော်ပြချက်များ သို့မဟုတ် နေ့စဉ်အသက်တာနှင့်သက်ဆိုင်ပုံမရသော ရှုပ်ထွေးသည့်ပရောဖက်ပြုချက်တို့ကို ဖတ်ရန်မှာ အလွန်ခက်ခဲပေမည်။ သင့်ပန်းတိုင်ကိုရောက်နိုင်သည့် လက်တွေ့ကျခြေလှမ်းများကို ကြိုးစားလှမ်းယူပါ။ ဥပမာ၊ ခက်ခဲပုံရသော ကျမ်းစာအပိုင်းတစ်ပိုင်းကို မလေ့လာမီ ယင်း၏နောက်ခံသမိုင်းကြောင်း သို့မဟုတ် လက်တွေ့သက်ဆိုင်ပုံတို့ကို ဖတ်ရှုနိုင်သည်။ ထိုသို့သောအကြောင်းအချက်များကို ဘာသာစကားပေါင်း ၅၀ နီးပါးဖြင့်ရနိုင်သော “ကျမ်းစာတစ်ကျမ်းလုံး ဘုရာ[သခင်]မှုတ်သွင်းရာဖြစ်ပြီး အကျိုးလည်းပြု” စာအုပ်တွင် တွေ့နိုင်သည်။

ယင်းက ကျမ်းစာဖတ်နေစဉ် သင်၏စိတ်အာရုံကို အသုံးပြုရန် လှုံ့ဆော်ပေးသည်။ ယင်းက ဇာတ်ကောင်များနှင့် ပါဝင်ပတ်သက်သည့်အဖြစ်အပျက်များကို စိတ်တွင်မြင်ယောင်စေနိုင်သည်။ ယင်းအနည်းငယ်သောအကြံပြုချက်ကို လက်တွေ့ကျင့်သုံးခြင်းဖြင့် သင့်လေ့လာချိန်များကို ပို၍ပျော်ရွှင်စရာကောင်းပြီး ပို၍အကျိုးဖြစ်ထွန်းစေနိုင်သည်။ ထို့ကြောင့် လေ့လာမှုအတွက် အချိန်ပိုပေးလိုပါလိမ့်မည်။ ကျမ်းစာကို နေ့စဉ်ဖတ်သည့်အကျင့်ကို ထိန်းသိမ်းရန် ပို၍လွယ်ကူစေပါလိမ့်မည်။

အထက်ပါအကြံပေးချက်များက တစ်ဦးချင်းစီကို အထောက်အကူပြုနိုင်သော်လည်း အလုပ်များသောမိသားစုတစ်စုအနေနှင့် အဘယ်အရာပြုနိုင်သနည်း။ မိသားစုလေ့လာမှုမှ ရရှိလာနိုင်သည့်အကျိုးကျေးဇူးများအကြောင်း အတူတကွ အေးအေးဆေးဆေးဆွေးနွေးကြည့်ပါ။ ထိုသို့ဆွေးနွေးရာမှ နေ့စဉ် သို့မဟုတ် အချို့နေ့ရက်များတွင် ကျမ်းစာအပိုင်းတစ်ပိုင်းကိုဆွေးနွေးရန် မိနစ်အနည်းငယ်စောစောထခြင်းကဲ့သို့သော လက်တွေ့ကျသည့်အကြံအစည်များထွက်လာပေမည်။ သို့မဟုတ် မိသားစုဇယားပြုပြင်ဖို့လိုကြောင်း ထိုဆွေးနွေးမှုမှ သိရှိလာပေမည်။ ဥပမာ၊ မိသားစုထမင်းစားချိန်အပြီးတွင် နေ့စဉ်ကျမ်းချက်ဆွေးနွေးခြင်း သို့မဟုတ် ကျမ်းစာအပိုင်းတစ်ပိုင်းဖတ်ခြင်းသည် လက်တွေ့ကျကြောင်း မိသားစုတချို့တွေ့ရှိကြသည်။ စားပွဲမသိမ်းမီ သို့မဟုတ် တခြားလုပ်ဆောင်စရာမလုပ်မီတွင် မိသားစုသည် ကျမ်းစာဆွေးနွေးရန် သို့မဟုတ် ကျမ်းစာဖတ်ရှုခြင်းဇယားအတိုင်းပြုလုပ်ရန် ၁၀ သို့မဟုတ် ၁၅ မိနစ် အသုံးပြုကြသည်။ ယင်းသို့ပြုလုပ်ခြင်းသည် အစပိုင်းတွင် အနည်းငယ်ခက်ခဲနိုင်သော်လည်း မကြာမီတွင် ပုံမှန်ဖြစ်လာပြီး မိသားစုအတွက် အလွန်ပျော်ရွှင်စရာဖြစ်လာနိုင်သည်။

မိမိတို့မိသားစုကို အထောက်အကူပြုသည့်အရာနှင့်ပတ်သက်၍ ဝို့စီရေ့ဂျ်နဲ့ မောဂေါရ်ဇာတာတို့က ဤသို့ရှင်းပြသည်– “အရင်တုန်းကတော့ အရေးမကြီးတဲ့လုပ်ဆောင်မှုတွေနဲ့ အချိန်ကုန်ခဲ့တယ်။ အီးမေးလ်ပို့တဲ့အချိန်ကိုလျော့ချဖို့ ကျွန်တော်တို့ဆုံးဖြတ်လိုက်တယ်။ အပန်းဖြေချိန်တချို့ကိုလည်း လျော့ချပြီး နက်နက်နဲနဲလေ့လာမှုလုပ်ဖို့ သတ်သတ်မှတ်မှတ်နေ့တစ်နေ့၊ အချိန်တစ်ချိန်ကို ဖယ်ထားကြတယ်။” ဤမိသားစုသည် ယင်းပြုပြင်မှုများပြုလုပ်သောကြောင့် လုံးဝနောင်တမရပါ၊ သင်လည်း သင့်မိသားစုအတွက် အလားတူဖြစ်လာနိုင်ကြောင်း တွေ့ရှိနိုင်သည်။

တိကျမှန်ကန်သောအသိပညာတွင် တိုးပွားနေခြင်းသည် အကျိုးနပ်

ဘုရားသခင့်နှုတ်မြွက်စကားတော်ကို နက်နက်နဲနဲလေ့လာမှုလုပ်ခြင်းက “ကောင်းသောအကျင့်အမျိုးမျိုး” ကိုကျင့်စေနိုင်သည်။ (ကော. ၁:၁၁) သင့်အသက်တာတွင် ယင်းအတိုင်း ထင်ရှားလာသည်နှင့်အမျှ သင့်တိုးတက်မှုသည် အားလုံးရှေ့တွင် ထင်ရှားလိမ့်မည်။ သင်သည် ကျမ်းစာအမှန်တရားများကို အကျယ်တဝင့်နားလည်သော ဝိညာဉ်ရေးလူဖြစ်ပါလိမ့်မည်။ သင့်ဆုံးဖြတ်ချက်များသည် ပို၍အကျိုးသင့်အကြောင်းသင့်ရှိလာပြီး အခြားသူများကို ပို၍အကူအညီပေးနိုင်မည်ဖြစ်ကာ အသိပညာမရှိသူများ၏လက္ခဏာဖြစ်တတ်သော အစွန်းရောက်ခြင်းမှ လွတ်မြောက်သွားမည်။ ထိုထက်ကား သင်သည် ယေဟောဝါနှင့် ပို၍ရင်းနှီးလာမည်ဖြစ်သည်။ ကိုယ်တော်၏အရည်အသွေးတော်များကို ပို၍တန်ဖိုးထားလေးမြတ်လာပြီး ကိုယ်တော့်အကြောင်း အခြားသူများကို ပြောပြသည်နှင့်အမျှ ယင်းတန်ဖိုးထားလေးမြတ်မှု ပေါ်လွင်ထင်ရှားလာလိမ့်မည်။—၁ တိ. ၄:၁၅; ယာ. ၄:၈။

သင့်အသက်အရွယ် သို့မဟုတ် အတွေ့အကြုံမည်သို့ပင်ရှိပါစေ ဘုရားသခင့်နှုတ်မြွက်စကားတော်ကို ဆက်၍နှစ်သက်မြတ်နိုးရန် အစွမ်းကုန်ကြိုးစားပြီး လက်ခံလိုသောစိတ်နှင့် နက်နက်နဲနဲလေ့လာမှုလုပ်ပါလေ။ ယေဟောဝါသည် သင့်ကြိုးစားအားထုတ်မှုများကို မေ့လျော့မည်မဟုတ်ကြောင်း ယုံကြည်စိတ်ချနိုင်သည်။ (ဟေဗြဲ ၆:၁၀) ကိုယ်တော်သည် သင့်အပေါ် ကြွယ်ဝသောကောင်းချီး သွန်းလောင်းပါလိမ့်မည်။

[စာမျက်နှာ ၁၃ ပါလေးထောင့်ကွက်]

ကျွန်ုပ်တို့သည် “တိကျမှန်ကန်သော အသိပညာ၌တိုးပွား” သောအခါ . . .

ကျွန်ုပ်တို့သည် ဘုရားသခင်အပေါ် ယုံကြည်ခြင်းကို ခိုင်ခံ့စေပြီး ယေဟောဝါနှင့် ထိုက်တန်စွာ လျှောက်လှမ်းကြသည်။—ကော. ၁:၉-၁၁၊ ကဘ

ကျွန်ုပ်တို့သည် ထိုးထွင်းသိမြင်မှုရှိပြီး ပိုင်းခြားနားလည်မှုကို အသုံးပြုနိုင် သောကြောင့် အမြော်အမြင်ရှိရှိ ဆုံးဖြတ်ချက်များ ချနိုင်ကြသည်။—ဆာ. ၁၁၉:၉၉

ကျွန်ုပ်တို့သည် အခြားသူများ ယေဟောဝါနှင့်ပို၍နီးကပ်ရန် ကူညီပေးရာတွင် ပို၍ပျော်ရွှင်ကြသည်။—မ. ၂၈:၁၉၊ ၂၀

[စာမျက်နှာ ၁၄ ပါပုံ]

လေ့လာမှုပြုရန် အကျိုးဖြစ်ထွန်းစေသည့်နေရာကို ရှာတွေ့ရန် ခက်ခဲနိုင်သည်၊ သို့သော် ယင်းသည် လိုအပ်ရာဖြစ်

[စာမျက်နှာ ၁၅ ပါပုံ]

မိသားစုတချို့သည် ထမင်းစားပြီးသည့်နောက် ကျမ်းစာအပိုင်းတစ်ပိုင်းကို ဖတ်ကြ