သင်သိပါသလော

ယေရှုကိုဆန့်ကျင်ခဲ့သော ကျမ်းတတ်များကား မည်သူများနည်း။

ယေရှုသည် မိမိဓမ္မအမှုဆောင်ချိန်အတွင်း ဂျေရုဆလင်မြို့တွင်သာမက မြို့ငယ်များနှင့်ရွာများတွင်ပါ ကျမ်းတတ်များကို ဆုံတွေ့ရသည်။ ဂျေရုဆလင်မြို့ပြင်နှင့် ပါလက်စတိုင်းပြင်ပရှိ ဂျူးရပ်ကွက်များတွင်ပင် ထိုသို့သောသူတို့သည် အရာရှိငယ်များ၊ ပညတ်တရားကို တတ်ကျွမ်းသူများဖြစ်ပြီး ကျမ်းကူးသူ သို့မဟုတ် ဒေသခံတရားသူကြီးများအဖြစ် အမှုထမ်းသူများဖြစ်နိုင်သည်။—မာကု ၂:၆; ၉:၁၄; လုကာ ၅:၁၇-၂၁။

ဂျေရုဆလင်မြို့တွင် ကျမ်းတတ်များသည် ဂျူးအစိုးရအဖွဲ့နှင့် အနီးကပ်ဆက်စပ်နေသူများဖြစ်သည်။ (မဿဲ ၁၆:၂၁) ထိုတွင် သူတို့၏ကဏ္ဍမှာ “တရားရေးကိစ္စများတွင်လည်းကောင်း၊ ဂျူးတို့၏ဓလေ့ထုံးစံနှင့်ပညတ်များကို အတည်ဖြစ်စေရာတွင်လည်းကောင်း ယဇ်ပုရောဟိတ်များ၏တွဲဖက်များဖြစ်ပုံရပြီး ဂျူးတရားရုံးချုပ်ဖြစ်သော ဆဲန်ဟီဒရင်တွင် နေ့စဉ်လုပ်ငန်းဆောင်တာများကို လုပ်ဆောင်ရသည်” ဟုကျမ်းစာအဘိဓာန်တစ်အုပ်ကဆိုသည်။ သူတို့သည် ထင်ပေါ်ကျော်ကြားသော ပညတ်ကျမ်းဆရာများဖြစ်ရာ အချို့မှာ ဆဲန်ဟီဒရင်အဖွဲ့ဝင်များဖြစ်သည်။ ယဇ်ပုရောဟိတ်ကြီးများ၊ ဖာရိရှဲများနှင့်လည်း တွဲဖက်လုပ်ဆောင်သည်။

ယေရှုကို ဆန့်ကျင်သူတို့မှာ ကျမ်းတတ်များဖြစ်ကြောင်း ကျမ်းစာတွင် မကြာခဏတွေ့ရသည်။ သို့သော် အချို့မှာ ထိုသို့မဆန့်ကျင်ကြပေ။ ဥပမာ၊ ကျမ်းတတ်တစ်ဦးက ယေရှုကို “ကိုယ်တော်သွားလေရာရာသို့ ကျွန်ုပ်လိုက်ပါမည်” ဟုဆို၏။ ယေရှုက အခြားကျမ်းတတ်တစ်ဦးကို “သင်သည် ဘုရားသခင်၏နိုင်ငံတော်နှင့် မဝေး” ဟုမိန့်ဆိုခဲ့သည်။—မဿဲ ၈:၁၉; မာကု ၁၂:၂၈-၃၄။

လူတစ်ဦး ဘိသိက်ပေးခံရခြင်းဟူသည် အဘယ်အရာကိုဆိုလိုသနည်း။

ကျမ်းစာခေတ်တွင် အရှေ့အလယ်ပိုင်းဒေသ၌ လူတစ်ဦး၏ဦးခေါင်းပေါ် ဆီဖြင့်လောင်းခြင်းသည် ထိုသူကို မျက်နှာသာပေးသည့်သဘော သို့မဟုတ် ဧည့်သည်တစ်ဦးကို ဧည့်ဝတ်ကျေပွန်သည့် အပြုအမူတစ်ခုဖြစ်သည်။ အများအားဖြင့် အသုံးပြုသောဆီမှာ အမွှေးအကြိုင်ရောထားသော သံလွင်ဆီဖြစ်သည်။ ဟေဗြဲလူမျိုးတို့သည် လူတစ်ဦးကို အခွင့်အာဏာရှိ အထူးရာထူးတစ်ခု တရားဝင်ခန့်အပ်ရာတွင်လည်း သူ၏ခေါင်းပေါ်သို့ ဆီလောင်းခြင်းဖြင့် ဘိသိက်ပေးလေ့ရှိသည်။ ဥပမာ၊ အာရုန်ကို ယဇ်ပုရောဟိတ်မင်းကြီးအဖြစ် ခန့်အပ်ရာတွင် သူ၏ခေါင်းပေါ်ဆီလောင်းပြီး ဘိသိက်ပေးခဲ့သည်။ (ဝတ်ပြုရာ ၈:၁၂) ဘုရင်ဒါဝိဒ်ကိစ္စတွင်လည်း ‘ရှမွေလသည်. . . ဆီဘူးကိုယူ၍ . . . သူ့ကိုဘိသိက်ပေးလေ၏။ ထိုနေ့မှစ၍ ယေဟောဝါ၏စွမ်းအားတော်သည် ဒါဝိဒ်အပေါ်မှာသက်ရောက်လေ၏။’—၁ ဓမ္မရာဇဝင် ၁၆:၁၃။

ဟေဗြဲဘာသာစကားတွင် ထိုသို့ဘိသိက်ပေးခြင်းအတွက် မာရှက်ဟူသောဝေါဟာရကို အသုံးပြုပြီး ထိုဝေါဟာရမှ မာရှိယက် သို့မဟုတ် မေရှိယဟူသောစကားလုံး ဆင်းသက်လာသည်။ ယင်းနှင့်အဓိပ္ပာယ်တူသော ဂရိစကားလုံးမှာ ခရီအို ဖြစ်ပြီး ယင်းမှ ခရီစတော့စ် သို့မဟုတ် ခရစ်တော်ဟူသောစကားလုံးဆင်းသက်လာသည်။ ထို့ကြောင့် အာရုန်နှင့်ဒါဝိဒ်နှစ်ဦးစလုံးကို မေရှိယတစ်ဦး သို့မဟုတ် ဘိသိက်ခံရသူတစ်ဦးဟု ခေါ်ဆိုနိုင်သည်။ ဘုရားသခင်သည် မောရှေကို မိမိ၏ကိုယ်စားလှယ်အဖြစ် ခန့်အပ်ခဲ့ရာ သူ့ကိုလည်း ခရစ်တော်တစ်ဦး သို့မဟုတ် ဘိသိက်ခံရသူတစ်ဦးဟု ခေါ်ဆိုထားသည်။—ဟေဗြဲ ၁၁:၂၄-၂၆။

ဘုရားသခင်သည် နာဇရက်မြို့သားယေရှုကို အခွင့်အာဏာကြီးမားသောရာထူးတစ်ခုအတွက် ကိုယ်တိုင်ကိုယ်ကျခန့်အပ်ခဲ့သည်။ ဘုရားသခင်သည် ယေရှုကို ပကတိဆီဖြင့်မဟုတ်ဘဲ မိမိ၏သန့်ရှင်းသောစွမ်းအားတော်ဖြင့် ဘိသိက်ပေးခဲ့သည်။ (မဿဲ ၃:၁၆) ယေဟောဝါရွေးချယ်ထားသော ဘိသိက်ခံရသူဖြစ်သောကြောင့် ယေရှုကို မေရှိယ သို့မဟုတ် ခရစ်တော်ဟု သင့်လျော်စွာခေါ်ဆိုထားသည်။—လုကာ ၄:၁၈။