ယေဟောဝါ၏သတိပေးချက်များသည် ဝိညာဉ်ရေးအရ ကျွန်ုပ်တို့ကို နှိုးဆော်ပေးနေသလော

^၁ ဆာလံဆရာသည် ယေဟောဝါအား ဤသို့ချီးမွမ်းခဲ့သည်– “ကိုယ်တော်၏သတိပေးချက်များသည် အကျွန်ုပ်ဆင်ခြင်ရာ” ဖြစ်ပါသည်။ (ဆာ. ၁၁၉:၉၉၊ ကဘ) “သတိပေးချက်များ” ဟူသည့်ဟေဗြဲစကားလုံးက ယေဟောဝါ၏ပညတ်ချက်များ၊ မှာကြားချက်များ၊ စည်းမျဉ်းဥပဒေများ၊ အမိန့်တော်များနှင့် ပြဋ္ဌာန်းချက်များ၌ပါသမျှကို ပြန်သတိရစေတော်မူသည့်သဘော သက်ရောက်သည်။ ကျွန်ုပ်တို့တုံ့ပြန်မည်ဆိုလျှင် ဝိညာဉ်ရေးအရ နှိုးဆော်ခံရပြီး ပျော်ရွှင်စေမည်ဖြစ်သည်။—ဆာ. ၁၁၉:၂။

^၂ ယေဟောဝါ၏လူမျိုးအနေနှင့် ဆုံးမသြဝါဒစကားများကို ကျွန်ုပ်တို့မှန်မှန်ရရှိကြသည်။ ဩဝါဒစကားအမြောက်အမြားကို ကျွန်ုပ်တို့ကြားဖူးနားဝဖြစ်မည်။ ဤသို့အားပေးခြင်းကို ကျွန်ုပ်တို့တန်ဖိုးထားကြဦးတော့ မေ့လျော့တတ်ကြသည်။ (ယာ. ၁:၂၅) ယေဟောဝါသည် စိတ်ရှည်စွာဖြင့် မေတ္တာပါသောသတိပေးချက်များကို ပေးတော်မူ၏။ “အရှင်ဘုရားပေးထားသည့်အမိန့်ပညတ်များကို သတိရမည်အကြောင်း ကျွန်ုပ်တို့၏ကြည်လင်သောဉာဏ်ကိုနှိုးဆော်” ပေးခြင်းငှာ တမန်တော်ပေတရုက သတိပေးချက်အချို့ကို မှတ်တမ်းတင်ခဲ့ခြင်းဖြစ်သည်။—၂ ပေ. ၃:၁၊ ၂၊ သမ။

^၃ ကိုယ်ပိုင်လေ့လာမှုပြုလုပ်ခြင်းနှင့် စည်းဝေးတက်ခြင်းသည် အရေးကြီးကြောင်း ကျွန်ုပ်တို့အား ထပ်ခါတလဲ သတိပေးထားသည်။ ကျွန်ုပ်တို့၏ဝိညာဉ်ရေးကောင်းနေဖို့အတွက် ယင်းသို့ ပြုရန် အလွန်အရေးကြီးသောကြောင့် ထိုသို့သတိပေးခြင်းဖြစ်သည်။—၁ တိ. ၄:၁၅; ဟေဗြဲ ၁၀:၂၄၊ ၂၅။

^၄ အချို့သူများအတွက် အကြီးမားဆုံးစိန်ခေါ်ချက်မှာ ဟောပြောရမည်ဟူသော ခရစ်ယာန်တာဝန်ကို ကျေပွန်ခြင်းဖြစ်သည်။ ထိုသို့ ပြုလုပ်ရန် ကြိုးစားအားထုတ်ခြင်း၊ ဆုံးဖြတ်ချက်ခိုင်မာခြင်းနှင့် မဆုတ်မနစ်သောဇွဲရှိခြင်းတို့ လိုအပ်သည်။ ယင်းသည် ကျွန်ုပ်တို့ထံမှများစွာတောင်းထားခြင်းမှန်သော်လည်း “ဝမ်းမြောက်ဖွယ်သတင်းတရားမှဖြစ်သော ပြင်ဆင်ခြင်းအဖြစ်တည်းဟူသော ဖိနပ်ကိုစီးလျက် ခံရပ်” နိုင်ရန် အကူအညီရရှိပါသည်။—ဧ. ၆:၁၄၊ ၁၅၊ သမ္မာ။

^၅ ကျွန်ုပ်တို့လုပ်ငန်းတော်ကိုလှုံ့ဆော်ရန် ယေဟောဝါ၏လိုအပ်ချက်များကို သိရှိရုံထက်မကပိုလိုသည်။ “ကယ်တင်ခြင်းသို့ရောက်ခြင်းငှာ နှုတ်ဖြင့်ဝန်ခံ” ဖို့နှလုံးက ကျွန်ုပ်လိုအပ်သောတိုက်တွန်းမှုကိုပေးသည်ဟု တမန်တော်ပေါလုက သတိပေးသည်။ (ရော. ၁၀:၁၀) ကျွန်ုပ်တို့သည် ကြံ့ခိုင်သောယုံကြည်ခြင်းရှိမည်၊ ယေဟောဝါ၏သတိပေးချက်များကို စိတ်ပါမည်ဆိုလျှင် နာမတော်ကိုချီးမွမ်းထောမနာပြုရန် ကျွန်ုပ်တို့တိုက်တွန်းခံရမည်။—ဆာ. ၁၁၉:၃၆; မ. ၁၂:၃၄။

^၆ ကောင်းသောအလုပ်များကို ကြိုးစားအားထုတ်လုပ်ဆောင်သည့်အခါ ဝမ်းမြောက်ရလိမ့်မည်ဟု မျှော်လင့်တတ်ကြသည်။ (ဒေ. ၂:၁၀) ဝမ်းမြောက်ခြင်းသည် ယေဟောဝါ၏ဝိညာဉ်အသီးတစ်သီးဖြစ်သည်ဟု ပေါလုကဖော်ပြထားရာ များစွာဝမ်းမြောက်ရန် ကြိုးစားသင့်သည်။ (ဂလ. ၅:၂၂) “ကြိုးစားအားထုတ်” ကြမည်ဆိုလျှင် ဝမ်းမြောက်စေသည့် သီးပွင့်သောဓမ္မအမှုဆုကျေးဇူးကို ခံရလိမ့်မည်ဟု ပေတရုကထပ်ဆင့်ပြောသည်။—၂ ပေ. ၁:၅-၈။

^၇ စိန်ခေါ်ချက်တစ်ခုနှင့် ကျွန်ုပ်တို့ရင်ဆိုင်ရလျှင် “ငါတို့သည် ကြားလျက်၊ မြင်လျက်ရှိသောအရာတို့ကို မဟောမပြောဘဲမနေနိုင်” ဟုဆိုခဲ့သောတမန်တော်များ၏ ခိုင်မြဲသည့်ရပ်တည်မှုကို သတိရသင့်သည်။ (တ. ၄:၂၀) ‘ထိုသို့ပြုလျှင် ကိုယ်ကိုလည်းကောင်း၊ နားထောင်သောသူတို့ကိုလည်းကောင်း ကျွန်ုပ်တို့ကယ်တင်လိမ့်မည်’ ဟူသောစကားများကို သတိရသောအခါ ဆက်လက်လုပ်ကိုင်ဆောင်ရွက်ရန် ခွန်အားရှိလာကြပါသည်။—၁ တိ. ၄:၁၆။

^၈ အစဉ်အမြဲသတိပေးခံရသည့်အတွက် ကျွန်ုပ်တို့စိတ်ကသိကအောက်ဖြစ်မည်မဟုတ်ပါ။ စိတ်မကျေမနပ်လည်းဖြစ်မည်မဟုတ်ပါ။ ယင်းအစား သတိပေးချက်များ၏ထူးခြားသောတန်ဖိုးကို အလွန်လေးမြတ်မည်ဖြစ်သည်။ (ဆာ. ၁၁၉:၁၂၉) ဤခဲယဉ်းသောကာလတွင် ဝိညာဉ်ရေးအရ ကျွန်ုပ်တို့နိုးနိုးကြားကြားရှိပြီး ကောင်းသောအမှု၌ ဇွဲလုံ့လရှိနိုင်ရန် ယေဟောဝါအမြဲသတိပေးနှိုးဆော်နေတော်မူခြင်းကို ကျေးဇူးတင်ကြရသည်တကား!—၂ ပေ. ၁:၁၂၊ ၁၃။