အစည်းအဝေးများကို “သာ၍ကြိုးစား” တက်ပါ

^၁ အတူတကွစည်းဝေးခြင်းသည် ယေဟောဝါ၏လူမျိုးတော်အတွက် အစဉ်ပင်အရေးပါလာခဲ့သည်။ ဣသရေလလူများတွင် စစ်မှန်သောဝတ်ပြုရေး၏အချက်အချာများအဖြစ် ဗိမာန်တော်နှင့် တရားဇရပ်များ၊ မြင့်မြတ်သောပညာရေးနှင့် ပျော်ရွှင်ဖွယ်ပေါင်းသင်းမှုရှိခဲ့သည်။ အလားတူပင် ကနဦးခရစ်ယာန်များသည် အတူတကွစည်းဝေးခြင်းကို မရှောင်မလွှဲခဲ့ကြချေ။ ခဲယဉ်းသောဤနောက်ဆုံးကာလတွင် ဖိစီးမှုများနှင့်စုံစမ်းခြင်းများတိုးများလာသည်နှင့်အမျှ ကျွန်ုပ်တို့သည်လည်း အသင်းတော်စည်းဝေးများမှရရှိသည့် ဝိညာဏခွန်အားလိုအပ်ပြီး “သာ၍ကြိုးစားကြ” ရန်လိုသည်။ (ဟေဗြဲ ၁၀:၂၅) အစည်းအဝေးများတက်ရသည့်အကြောင်းရင်းသုံးခုကို သတိပြုပါ။

^၂ ပေါင်းသင်းမှုအတွက်– ကျမ်းစာက ကျွန်ုပ်တို့ကို “အချင်းချင်းတိုက်တွန်း၍ တစ်ယောက်ကိုတစ်ယောက်တည်ဆောက်ကြ” ရန်သြဝါဒပေးထားသည်။ (၁ သက်. ၅:၁၁) ဘုရားရေးရာပေါင်းသင်းမှုက ကျွန်ုပ်တို့၏စိတ်ကို အကြံအစည်ကောင်းများဖြင့် ပြည့်စေပြီး ကောင်းမှုများပြုရန် လှုံ့ဆော်ပေးသည်။ သို့သော် ကျွန်ုပ်တို့သည် တစ်သီးပုဂ္ဂလနေပါက မိုက်မဲသော၊ အတ္တဆန်သော သို့မဟုတ် စာရိတ္တယိုယွင်းသောအကြံအစည်များပင် စိတ်ကူးထဲဝင်လာတတ်သည်။—သု. ၁၈:၁။

^၃ သွန်သင်ပေးရန်အတွက်– ခရစ်ယာန်အစည်းအဝေးများသည် ကျွန်ုပ်တို့၏နှလုံးထဲတွင် ဘုရားသခင်၏မေတ္တာတော်အမြဲရှင်သန်နေရန်စီစဉ်ပေးထားသည့် ကျမ်းစာသွန်သင်ချက်ဆိုင်ရာ ဆက်တိုက်အစီအစဉ်တစ်ရပ်ကို ပြင်ဆင်ပေးပါသည်။ ယင်းတို့က “ဘုရားသခင်၏သြဝါဒအလုံးစုံကို” ကျင့်သုံးရာတွင် လက်တွေ့ကျညွှန်ကြားချက်ကိုပေးသည်။ (တ. ၂၀:၂၇၊ ကဘ) အစည်းအဝေးများက ကျွန်ုပ်တို့အား သတင်းကောင်းဟောပြောခြင်းနှင့်သွန်သင်ခြင်းအတတ်ပညာဖြင့် လေ့ကျင့်ပေးသည်၊ ယင်းတို့သည် ကျမ်းစာသမ္မာတရားလက်ခံမည့်သူများကို ရှာဖွေခြင်းနှင့်ကူညီပေးခြင်းမှရရှိသည့် ပြောမပြနိုင်သောရွှင်လန်းမှုကိုခံစားရရန် ယခုအခါ သာ၍လိုအပ်သောစွမ်းရည်များဖြစ်သည်။

^၄ အကာအကွယ်အတွက်– ဆိုးသွမ်းသောဤလောကတွင် အသင်းတော်သည် စစ်မှန်သောဝိညာဏခိုလှုံရာ—ငြိမ်သက်ခြင်းနှင့်မေတ္တာလွှမ်းမိုးသည့် အေးငြိမ်းရာအရပ်ဖြစ်သည်။ ကျွန်ုပ်တို့သည် အသင်းတော်အစည်းအဝေးများတွင် တက်ရောက်နေသည့်အခါ ဘုရားသခင်၏သန့်ရှင်းသောဝိညာဉ်တော်သည် ကျွန်ုပ်တို့အပေါ် တန်ခိုးပါပါသြဇာလွှမ်းမိုးပြီး “ချစ်ခြင်း၊ ဝမ်းမြောက်ခြင်း၊ ငြိမ်သက်ခြင်း၊ စိတ်ရှည်ခြင်း၊ ကျေးဇူးပြုခြင်း၊ ကောင်းမြတ်ခြင်း၊ သစ္စာစောင့်ခြင်း၊ နူးညံ့သိမ်မွေ့ ခြင်း၊ ချူပ်တည်းခြင်း” အသီးများကိုသီးစေသည်။ (ဂလ. ၅:၂၂၊ ၂၃) အစည်းအဝေးများသည် ကျွန်ုပ်တို့အား ယုံကြည်ခြင်း၌ မြဲမြံခိုင်မာစွာရပ်တည်နိုင်စေသည်။ ယင်းတို့သည် ရင်ဆိုင်ရမည့်စုံစမ်းခြင်းများအတွက် အသင့်ရှိရန်ပြင်ဆင်ပေးသည်။

^၅ အစည်းအဝေးမှန်မှန်တက်ခြင်းအားဖြင့် ဆာလံ ၁၃၃:၁၊ ၃ တွင်မှတ်တမ်းတင်ထားသည့်အတိုင်း ဆာလံဆရာဖော်ပြထားသည့်အရာကို ကျွန်ုပ်တို့တွေ့ ကြုံခံစားရသည်– “ညီအစ်ကိုတို့သည် သဘောတူလျက် ပေါင်းဖော်ကြသည်အရာမှာ အလွန်ကောင်းပေ၏။” ယနေ့ ဘုရားသခင်၏လူမျိုးတော်သည် အတူတကွဝတ်ပြု၍တွေ့ဆုံကြသည့်အခါတိုင်းတွင် “ထိုသို့နေကြသောအရပ်၌၊ ထာဝရဘုရားသည် အစဉ်အမြဲအသက်ရှင်ခြင်းအခွင့်တည်းဟူသော ကောင်းချီးမင်္ဂလာကို စီရင်တော်မူ၏။”