မဂ္ဂဇင်းများက နိုင်ငံတော်ကိုကြေညာ

၁ ယေဟောဝါသက်သေများအနေနှင့် ကျွန်ုပ်တို့သည် ဘုရားသခင့်နိုင်ငံတော်အကြောင်းကို ဇွဲနပဲဖြင့်ဟောပြောခြင်းကြောင့် လူသိများကြသည်။ ကျွန်ုပ်တို့ဝေငှသော ကင်းမျှော်စင်နှင် နိုးလော့!မဂ္ဂဇင်းများသည် သန်းပေါင်းများစွာသောလူတို့အား ဘုရားသခင်၏ရည်ရွယ်တော်မူချက်များကိုသိရှိရန် ကူညီပေးရာတွင် များစွာအရေးပါသောကဏ္ဍမှပါဝင်သည်။ ယင်းတို့တွင်ပါသောသတင်းတရားသည် အမှန်ပင်သတင်းကောင်းဖြစ်၏။ အကြောင်းမှာ ယင်းက လူသားအတွက် တစ်ခုတည်းသောမျှော်လင့်ရာအဖြစ် ဘုရားသခင့်ကောင်းကင်နိုင်ငံတော်ကို ကြေညာပေးသောကြောင့်တည်း။

၂ မဂ္ဂဇင်းများက လူတို့၏အမှန်လိုအပ်ချက်များ—စိတ်ပိုင်း၊ လူမှုရေးနှင့် ဝိညာဉ်ရေး—ကိုဖြည့်ဆည်းပေးသည်။ နေရာအနှံ့တွင် စာရိတ္တနှင့်မိသားစုစံနှုန်းများပျက်ပြားနေရာ ကင်းမျှော်စင်နှင့် နိုးလော့!သည် ကျမ်းစာမူများကိုမည်သို့ကျင့်သုံးရမည်ကို တင်ပြပေးခြင်းဖြင့် လူတို့၏ဘဝအရည်အသွေးတိုးတက်လာရန် ကူညီပေးသည်။ ဧပြီနှင့် မေလအတွင်း ထိုမဂ္ဂဇင်းများကို ပျော်ရွှင်စွာဝေငှကြမည်။

^၃ ယင်းတို့သည် အမှန်ပင်ဆွဲဆောင်မှု ရှိ– ကမ္ဘာ့လူသားထုအားလုံးနီးပါး၏ဘာသာစကားများဖြင့် ကင်းမျှော်စင်နှင့် နိုးလော့!ကို ရရှိနိုင်သည်။ ယင်းကြောင့် ကျွန်ုပ်တို့၏မဂ္ဂဇင်းများကို လူသိများခြင်းဖြစ်သည်။ ယင်းတို့က လူတို့ကိုဆွဲဆောင်မှုဖြစ်စေသည့်အကြောင်းတချို့ကို ဤတွင်ဖော်ပြထားသည်–

▪ သမာဓိနှင့်သမ္မာတရားဂျာနယ်များအနေနှင့် ယင်းတို့သည် အကောင်းနှင့်အဆိုးကွာခြားချက်ကို ရှင်းလင်းစွာတင်ပြသည်။

▪ ယင်းတို့က ကမ္ဘာမြေကြီးကို ကိုယ်တော်၏နိုင်ငံတော်အုပ်စိုးမှုအောက်ရောက်ရှိစေမည်ဟူသည့် ဘုရားသခင့်ကတိတော်ကိုအခြေခံ၍ ဖြောင့်မတ်သောပရဒိသုဖြစ်ပေါ်လာမည်ဟူသောမျှော်လင့်ချက်ကိုပေးသည်။

▪ ကျယ်ပြန့်သော အခန့်သင့်အကြောင်းအရာမျိုးစုံကို တင်ပြထားရာ နောက်ခံနှင့်ယဉ်ကျေးမှုအသီးသီးရှိလူတို့အတွက် ဆွဲဆောင်မှုဖြစ်စေသည်။

▪ ဆောင်းပါးများသည် လိုရင်းတိုရှင်းဖြစ်သည်၊ ပညာပေးသည်၊ ဖြစ်ရပ်မှန်ဖြစ်သည်၊ စိတ်စွန်းကွက်မှုနှင့် အလျှော့ပေးလိုက်လျောမှုကင်းသည်။

▪ ဆွဲဆောင်မှုရှိသောရုပ်ပုံများက ချက်ချင်းစိတ်ဝင်စားစေပြီး ရှင်းလင်းသောအရေးအသားပုံစံက မဂ္ဂဇင်းများကိုဖတ်ရလွယ်စေသည်။

^၄ ယင်းတို့ကိုကျယ်ကျယ်ပြန့်ပြန့်ဝေငှပါ– မဂ္ဂဇင်းဝေငှရာတွင်ထိရောက်မှုရှိခြင်းဟူသည် ကျွန်ုပ်တို့၏တင်ဆက်ပုံများကိုပြင်ဆင်ခြင်း၊ အချိန်ဇယားဆွဲခြင်းနှင့် ဟောပြောခြင်းလုပ်ငန်းကိုဖွဲ့စည်းစီစဉ်ခြင်းတို့တွင် ဝီရိယရှိခြင်းအပေါ် များစွာမူတည်သည်။ စက်တင်ဘာ ၁၉၉၅ နှင့် အောက်တိုဘာ ၁၉၉၆ ထုတ်ကျွန်ုပ်တို့၏နိုင်ငံတော်ဓမ္မအမှုတွင် လက်တွေ့ကျအကြံပြုချက်များပေးထားပြီး ယင်းတို့ကို ပြန်သုံးသပ်၍အသုံးပြုလျှင်ကောင်းပေမည်။

^၅ မဂ္ဂဇင်းများနှင့် အကျွမ်းတဝင်ရှိပါ– လထုတ်တိုင်းကိုသင်ဖတ်စဉ် ယင်းကိုတန်ဖိုးထားမည့်သူတစ်စုံတစ်ဦးကို စဉ်းစားပါ။ သင်တင်ဆက်ရာတွင်ကိုးကားနိုင်သည့် တိကျသောအချက်များ သို့မဟုတ် ကျမ်းချက်များကိုရှာဖွေပါ။ အစပြုစကားပြောဆိုရန်နှင့် အကြောင်းအရာတွင်စိတ်ဝင်စားမှုကို နှိုးဆွပေးရန် သင်မေးနိုင်သောမေးခွန်းတစ်ခုကို စဉ်းစားပါ။

^၆ လူတို့အားတင်ဆက်ပုံကို အလိုက်သင့်ပြောင်းပေးပါ– အသိအကျွမ်းတစ်ဦးဖြစ်စေ၊ သူစိမ်းတစ်ဦးဖြစ်စေ အမျိုးသား၊ အမျိုးသမီး၊ လူကြီး သို့မဟုတ် လူငယ်တစ်ဦးအတွက် အလိုက်သင့်ပြောင်းနိုင်သော ရိုးရိုးကလေးဖြစ်ပြီးပြောင်းသာလဲသာရှိသောတင်ဆက်ပုံကို ပြင်ဆင်ပါ။

^၇ ကင်းမျှော်စင်နှင့် နိုးလော့!ဝေငှရန်နိုးကြားပါ– မဂ္ဂဇင်းများသည် လွယ်အိတ်၊ လက်ဆွဲအိတ် သို့မဟုတ် အိတ်ကပ်တွင် အလွယ်တကူဆံ့သောကြောင့် ခရီးသွားသောအခါ သို့မဟုတ် ဈေးဝယ်သွားသောအခါ ကျွန်ုပ်တို့နှင့်တစ်ပါတည်းယူဆောင်သွားနိုင်သည်။ ဆွေမျိုးများ၊ အိမ်နီးချင်းများ၊ လုပ်ဖော်ဆောင်ဖက်များ၊ ကျောင်းနေဖက်များ သို့မဟုတ် ဆရာဆရာမများကိုစကားပြောသည့်အခါ ယင်းတို့ကိုဝေငှပါ။ မဂ္ဂဇင်းများနှင့်သက်သေခံရန် တစ်ပတ်လျှင်တစ်ရက်ကို သတ်မှတ်ထားပါ။

^၈ မဂ္ဂဇင်းများကို တန်ဖိုးထားကြောင်း တင်ပြပါ– ယင်းတို့သည် မည်သည့်အခါမျှတန်ဖိုးလျော့မသွားပါ။ အချိန်များကုန်လွန်သွားခြင်းက ယင်းတို့တွင်ပါသော သတင်းတရား၏အရေးပါမှုကို လျော့မသွားစေပါ။ အမှန်မှာ ကျွန်ုပ်တို့ရရှိသောမဂ္ဂဇင်းအားလုံးကို ဝေငှရန်အထူးကြိုးစားမည်ဆိုလျှင် လထုတ်အဟောင်းများသည် စင်ပေါ်တွင်စုပုံနေစရာအကြောင်းမရှိပေ။

^၉ အလွတ်သဘောသက်သေခံခြင်းသည် ထိရောက်– ယင်းသည် လူမြောက်မြားစွာကို မဂ္ဂဇင်းဝေငှရန် အကောင်းဆုံးနည်းတစ်ခုဖြစ်သည်။ ကြေညာသူအချို့သည် ဈေးနေ့များ၌ လူစည်ကားသောလမ်းမများတွင် မကြာမကြာမှန်မှန်အမှုဆောင်ကြသည်။

^၁၀ စီးပွားရေးရပ်ကွက်သည် အကျိုးဖြစ်ထွန်း– တစ်ဆိုင်မှတစ်ဆိုင်သက်သေခံရာတွင် လူမတွေ့ရသည့်ဆိုင်မရှိသလောက်ပင်။ စီးပွားရေးသမားအများစုမှာ ရည်မွန်ကြပြီး အများသောသူတို့သည် မဂ္ဂဇင်းများကို ဝမ်းမြောက်ဝမ်းသာဖြင့်လက်ခံယူကြသည်။ လက်ရှိလုပ်ဆောင်နေသောစီးပွားရေးလုပ်ငန်းတစ်ရပ်အတွက် သင့်လျော်သည့်ဆောင်းပါးများကို တင်ပြပါ။

^၁၁ မဂ္ဂဇင်းလမ်းကြောင်းများသည် အလားအလာရှိ– မဂ္ဂဇင်းများကို တစ်လနှစ်ကြိမ်ထုတ်သောကြောင့် ယင်းတို့ကိုဖတ်ရှုသူများထံပြန်သွားပြီး နောက်လထုတ်များကိုပြခြင်းသည် သင့်လျော်ပေသည်။ မဂ္ဂဇင်းဝေငှဖို့သာမဟုတ်ဘဲ သမ္မာကျမ်းစာတွင် ထိုသူ၏စိတ်ဝင်စားမှုတိုးပွားလာစေရန် ပြန်လည်ပတ်မှုများကို မှန်မှန်လုပ်သင့်သည်။ မဂ္ဂဇင်းလမ်းကြောင်းများသည် ကျမ်းစာသင်အံမှုများရရှိစေနိုင်သည့် အထူးကောင်းမွန်သောဇာစ်မြစ်များဖြစ်ပါသည်။

^၁၂ ဧပြီနှင့်မေကို အစွမ်းကုန်အသုံးချပါ– ကင်းမျှော်စင်နှင့် နိုးလော့!သည် ယင်းကိုလေးမြတ်သည့် စာဖတ်သူသန်းပေါင်းများစွာတို့၏ ယုံကြည်စိတ်ချမှုကို ရရှိထားသည်။ နိုင်ငံတော်ကိုကြေညာရာတွင် အလွန်ထိရောက်သောကြောင့် ယင်းတို့ကို ကျွန်ုပ်တို့နှင့်တစ်ပါတည်းယူဆောင်သွားပြီး အခွင့်အရေးရတိုင်းဝေငှခြင်းကို မဖြစ်မနေလုပ်ဆောင်သင့်သည်။ ဧပြီနှင့်မေလသည် မဂ္ဂဇင်းဝေငှရန်အတွက် ထူးခြားသောလများဖြစ်ကြောင်း သက်သေထူနိုင်ကြပါစေ!