အထူးကင်းမျှော်စင်မဂ္ဂဇင်းများကို ဆွေးနွေးခြင်းဖြင့် သင်အံမှုများ စတင်ခြင်း

၁။ တစ်အိမ်မှတစ်အိမ် ဓမ္မအမှုတွင် အထူးကင်းမျှော်စင်များကို မည်သို့အသုံးပြုနိုင်သနည်း။

^၁ သမ္မာကျမ်းစာ အမှန်တကယ်သွန်သင်ရာမှာ အဘယ်နည်းဟူသော အဓိက ကျမ်းစာသင်အံမှုအထောက်အကူပြုစာအုပ်မှ အကြောင်းအရာများပါဝင်သော အထူးကင်းမျှော်စင်များ ဝေငှနေသည်မှာ အပတ်အတန်ကြာပြီဖြစ်သည်။ မှန်မှန်ပြန်လည်ပတ်ပြီး အထူးကင်းမျှော်စင်များကိုသုံးကာ တိုတိုတုတ်တုတ်ဆွေးနွေးနေလျှင် ကျမ်းစာသင်အံမှုတစ်ခုကျင်းပနေကြောင်း သင်သိရှိပါသလော။ မှန်ပါသည်၊ အိမ်တံခါးဝတွင် ထိုသို့ဆွေးနွေးလျှင်ပင် ကျမ်းစာသင်အံမှုကျင်းပနေခြင်းဖြစ်သည်။

၂။ ဦးဆုံးအကြိမ် ကျမ်းစာဆွေးနွေးမှုများကို မည်သို့လုပ်ဆောင်သင့်သနည်း။

^၂ ဦးဆုံးအကြိမ်ဆွေးနွေးမှုများ– အိမ်ရှင်ထံ ဦးဆုံးအကြိမ် ပြန်လည်ပတ်ချိန်များတွင် အထူးကင်းမျှော်စင်တွင်ပါသော သမ္မာကျမ်းစာသွန်သင်ရာဆောင်းပါးများမှ ကျမ်းချက်အနည်းငယ်နှင့် အပိုဒ်တစ်ပိုဒ်နှစ်ပိုဒ်ကိုသာ သုံးသပ်ပါ။ ဦးဆုံးအကြိမ်ဆွေးနွေးမှုများသည် ငါးမိနစ်မှဆယ်မိနစ်သာကြာပြီး တိုတိုတုတ်တုတ်ဖြစ်သင့်သည်။ ဦးဆုံးအကြိမ်တွေ့ဆုံပြီးနောက် အထူးကင်းမျှော်စင်ဖြင့် နှစ်ကြိမ်မျှဆွေးနွေးပြီးသည့်အပြင် ဆက်သင်အံမည်ဟုယူဆရပါက ကျမ်းစာသင်အံမှုတစ်ခုအဖြစ် မှတ်တမ်းသွင်းနိုင်သည်။

၃။ (က) ဇူလိုင် ၁ (ခ) ဇူလိုင် ၁၅ (ဂ) ဩဂုတ် ၁ ရက်ထုတ်မဂ္ဂဇင်းများကို ဝေငှပြီးနောက် ကျမ်းစာဆက်ဆွေးနွေးနိုင်ရန် မည်သို့လုပ်ဆောင်နိုင်သနည်း။

^၃ နောက်တစ်ကြိမ်ဆွေးနွေးမှုအတွက် မေးခွန်းမေးခဲ့ပါ– ကျမ်းစာဆွေးနွေးပြီးတိုင်း နောက်တစ်ကြိမ်လည်ပတ်ရာတွင် ဖြေဆိုပေးမည့်မေးခွန်းကို မေးခဲ့ပါ။ ပြန်လည်ပတ်မည့်အချိန်အတိအကျကို စီစဉ်ပြီး ထိုအတိုင်း အသေအချာပြန်သွားပါ။ (မ. ၅:၃၇) သင်ပြန်သွားသည့်အခါ ယခင်မေးခဲ့သောမေးခွန်းကို ပြန်အမှတ်ရစေပါ။ ပြီးနောက် ထိုမေးခွန်း၏အဖြေပါရှိသော အထူးကင်းမျှော်စင်မှ အပိုဒ်အချို့ကို အတိုချုပ်ဖတ်၍ ဆွေးနွေးပါ။ အောက်ပါတို့မှာ နမူနာအချို့ဖြစ်၏–

◼ ဇူလိုင် ၁ မဂ္ဂဇင်းကို ဝေငှပြီးနောက် “ဘုရားသခင့်နိုင်ငံတော်ဆိုတာ ဘာလဲလို့ မိတ်ဆွေတွေးကြည့်ဖူးသလား” ဟုမေးနိုင်သည်။ အိမ်ရှင်တုံ့ပြန်ပြီးနောက် ဤသို့ဆက်ပြောပါ– “နောက်တစ်ခါပြန်လာတဲ့အခါ ဘုရားသခင့်နိုင်ငံတော်အကြောင်း ကျမ်းစာမှာဘာပြောထားတယ်ဆိုတာ ပြောပြချင်တယ်။” သင်ပြန်သွားသည့်အခါ မဿဲ ၆:၉၊ ၁၀ ကိုဖတ်ပြီး ဇူလိုင် ၁ မဂ္ဂဇင်း၊ စာမျက်နှာ ၁၁၊ အပိုဒ် ၄-၅ ကိုဆွေးနွေးပါ။

◼ ဇူလိုင် ၁၅ မဂ္ဂဇင်းကို ဝေငှပြီးနောက် ဤသို့ပြောနိုင်သည်– “ကောင်းကင်တမန်တွေရှိတယ်ဆိုတာ မိတ်ဆွေယုံသလား။ ကောင်းကင်တမန်တွေရှိတယ်လို့ လူအတော်များများက ယုံကြပေမဲ့ သူတို့ကိုကြောက်သင့်သလားဆိုတာ မသိကြဘူး။ ကောင်းကင်တမန်တွေနဲ့ပတ်သက်တဲ့ ကျမ်းစာရှင်းပြချက်တွေက မိတ်ဆွေကို အံ့အားသင့်စေမယ်လို့ ကျွန်တော်ထင်တယ်။” သင်ပြန်သွားသည့်အခါ ဇူလိုင် ၁၅ မဂ္ဂဇင်း၏စာမျက်နှာ ၁၀ မှရုပ်ပုံကိုပြပြီးနောက် အပိုဒ် ၄-၆ ကိုဆွေးနွေးပါ။

◼ ဩဂုတ် ၁ မဂ္ဂဇင်းကိုဝေငှပြီးနောက် နောက်တစ်ကြိမ်ဆွေးနွေးမှုအတွက် “ကျွန်တော်တို့ဟာ ဘုရားသခင့်မိတ်ဆွေဖြစ်နိုင်တယ်လို့ ထင်သလား” ဟုမေးခဲ့ပါ။ ပြန်သွားသည့်အခါ ဩဂုတ် ၁ မဂ္ဂဇင်း၏ စာမျက်နှာ ၈၊ အပိုဒ် ၄-၅ ကိုသုံးသပ်ပါ။

၄။ ကျမ်းစာသင်အံမှုကျင်းပရန် တွန့်ဆုတ်နေခြင်းကို ကျော်လွှားနိုင်ရန် ဖိလိပ္ပိ ၄:၁၃ သည် မည်သို့ကူညီနိုင်သနည်း။ ဥပမာပေးပါ။

^၄ အားလုံးပါဝင်နိုင်– သင်သည် လောကပညာ သိပ်မတတ်သောကြောင့် သို့မဟုတ် အတွေ့အကြုံမရှိသောကြောင့် ထိုသို့သောကျမ်းစာဆွေးနွေးမှုများ ပြုလုပ်နိုင်မည်မဟုတ်ဟု စိုးရိမ်သလော။ သို့သော် ကျမ်းစာသင်အံမှုကျင်းပနိုင်ရန် ကျွန်ုပ်တို့အားလုံးကို ယေဟောဝါ၏သန့်ရှင်းသောဝိညာဉ်တော်က စွမ်းဆောင်ပေးနိုင်ကြောင်း စိတ်ချပါ။ (ဖိ. ၄:၁၃) ပညာမတတ်သောညီအစ်ကိုတစ်ဦး၏အဖြစ်ကို သုံးသပ်ကြည့်ပါ။ ထိုညီအစ်ကိုသည် ဓမ္မအမှုတွင်တွေ့ဆုံခဲ့ရသော အမျိုးသားတစ်ဦးနှင့် ကျမ်းစာစတင်ဆွေးနွေးလိုသော်လည်း ထိုသူထံချဉ်းကပ်ရန် အလွန်စိုးရိမ်ထိတ်လန့်ခဲ့သည်။ သို့သော် ခွန်အားပေးရန် ယေဟောဝါထံ ဆုတောင်းပြီးနောက် ထိုအမျိုးသားထံချဉ်းကပ်ကာ “မင်္ဂလာပါ” ဟုနှုတ်ဆက်လိုက်ရာ ထိုသူကလည်း “မင်္ဂလာပါ” ဟုပြန်ပြောသည်။ ထိုအခါ ညီအစ်ကိုက “ကမ္ဘာပေါ်မှာ ပရဒိသုဖြစ်လာမယ်ဆိုတာ မိတ်ဆွေသိသလား” ဟုသာဆက်ပြောနိုင်ခဲ့သည်။ ထိုအမျိုးသားသည် ခဏစဉ်းစားပြီးနောက် “ဟုတ်လား။ ကမ္ဘာ့ပရဒိသုဆိုတာ ဘယ်လိုမျိုးပါလိမ့်” ဟုပြန်မေးလေသည်။ သို့နှင့် ဆွေးနွေးမှုစတင်ပြီး မကြာမီ ထိုအမျိုးသားနှင့်ကျမ်းစာလေ့လာနိုင်ခဲ့သည်။ နောက်ဆုံး ထိုအမျိုးသား၏မိသားစုဝင်ငါးဦးမှာ သမ္မာတရားကိုလက်ခံပြီး မိတ်ဆွေ ၁၃ ဦးမှာ ယခု ကျမ်းစာလေ့လာနေသည်။

၅။ ကျွန်ုပ်တို့သည် မဂ္ဂဇင်းဝေငှရုံထက် အဘယ်ကြောင့် ပိုလုပ်ဆောင်သင့်သနည်း။

^၅ အထူးကင်းမျှော်စင်ဆောင်းပါးများသည် သမ္မာကျမ်းစာအမှန်တကယ်သွန်သင်ရာကို လူတစ်ဦး လေ့လာလိုသည့်ဆန္ဒကို အမှန်နှိုးဆွပေးနိုင်သည်။ ထို့ကြောင့် ထိုမဂ္ဂဇင်းများကိုလက်ခံသူတို့နှင့် ကျမ်းစာသင်အံမှုစတင်နိုင်ရန် အထူးကြိုးစားပါ။ ဤနည်းဖြင့် “တပည့်ဖြစ်စေလျက် . . . ဆုံးမသြဝါဒပေးကြလော့” ဟူသောယေရှု၏ညွှန်ကြားချက်ကို နာခံနိုင်ကြပါသည်။—မ. ၂၈:၁၉၊ ၂၀။