ကျွန်ုပ်တို့ရဲ့ ခရိုင်စည်းဝေးကြီးများ—အမှန်တရားအတွက် အစွမ်းထက်တဲ့ သက်သေခံချက်
၁။ နှစ်စဉ်ကျင်းပတဲ့ ပွဲတော်တွေကနေ အစ္စရေးလူတွေဟာ ဘာအရေးကြီးတဲ့ အမှန်တရားတွေကို တွေးတောဆင်ခြင်ဖို့ အခွင့်အရေး ရကြသလဲ။
၁ ရှေးခေတ် အစ္စရေးလူတွေဟာ နှစ်စဉ်ကျင်းပတဲ့ ပွဲတော်တွေအတွက် တစ်နှစ်ကို သုံးကြိမ် စုဝေးခဲ့ကြပါတယ်။ အမျိုးသားတွေပဲ တက်ရောက်ဖို့ တောင်းဆိုခံရပေမဲ့ မိသားစုဝင်တွေအားလုံး ဂျေရုဆလင်မြို့ကိုသွားပြီး အဲဒီပွဲတော်တွေကို တက်ရောက်လေ့ရှိပါတယ်။ (တရား. ၁၆:၁၅၊ ၁၆) ဒီပွဲတော်တွေမှာဆိုရင် အရေးကြီးတဲ့ ဘုရားရေးရာ အမှန်တရားတွေကို တွေးတောဆင်ခြင် ဆွေးနွေးဖို့ အခွင့်အရေးရကြပါတယ်။ အမှန်တရားတချို့က ဘာတွေလဲ။ တစ်ခုကတော့၊ ယေဟောဝါဘုရားဟာ မြင့်မြတ်တယ်၊ မေတ္တာကြီးမားတဲ့ ထောက်မပေးရှင် ဖြစ်တယ်။ (တရား. ၁၅:၄၊ ၅) နောက်တစ်ခုက၊ လမ်းညွှန်ချက်နဲ့ ကာကွယ်မှုအတွက် ကိုယ်တော်ကို အားကိုးနိုင်တယ်။ (တရား. ၃၂: ၉၊ ၁၀) အစ္စရေးလူမျိုးတွေဟာ ယေဟောဝါဘုရားရဲ့ နာမတော်ကို ခံယူထားတဲ့သူတွေအနေနဲ့ ကိုယ်တော်ရဲ့ ဖြောင့်မတ်ခြင်းတရားတွေကို သူတို့ရဲ့ ဘဝမှာ လက်တွေ့ကျင့်သုံးရမှာဖြစ်ပါတယ်။ (တရား. ၇:၆၊ ၁၁) ဒီနေ့ခေတ်မှာလည်း နှစ်စဉ်ကျင်းပနေတဲ့ ခရိုင်စည်းဝေးကြီးတွေက ကျွန်ုပ်တို့ကို ထပ်တူအကျိုးခံစားရရှိစေပါတယ်။
၂။ လာမယ့် ခရိုင်စည်းဝေးကြီးအစီအစဉ်က အမှန်တရားအလင်း ဘယ်လိုထွန်းလင်းပေးမလဲ။
၂ အမှန်တရားအလင်းကို ထွန်းလင်းပေးတဲ့ အစီအစဉ်– ခရိုင်စည်းဝေးကြီးတွေမှာ သမ္မာကျမ်းစာအလင်း ထွန်းလင်းပေးတဲ့ ဟောပြောချက်တွေ၊ ပြဇာတ်တွေ၊ သရုပ်ပြတွေနဲ့ လူတွေ့မေးမြန်းခန်းတွေကြောင့် ကျွန်ုပ်တို့ ပျော်ရွှင်ကြပါတယ်။ (ယော. ၁၇:၁၇) လာမယ့် ခရိုင်စည်းဝေးကြီးအတွက် ကြိုတင်ပြင်ဆင်မှုတွေ လုပ်နေပါပြီ။ ယေဟောဝါဘုရားရဲ့ အဖွဲ့အစည်းဟာ ကမ္ဘာ့အခြေအနေကိုလိုက်ပြီး လိုအပ်ရာတွေကို ဖြည့်ဆည်းပေးဖို့ အထူးရည်ရွယ်ထားတဲ့ အစီအစဉ်တစ်ခုကို ပြင်ဆင်နေပါတယ်။ (မ. ၂၄:၄၅-၄၇) စည်းဝေးကြီးမှာ ဘာတွေတင်ဆက်မယ် ဆိုတာကို ကြားသိရဖို့ သင် စိတ်စောနေပြီလား။
၃။ အစီအစဉ်ကနေ အကျိုးကျေးဇူးရရှိဖို့ ကျွန်ုပ်တို့ ဘာလုပ်ရမလဲ။
၃ သုံးရက်စလုံး တက်ရောက်ပြီး အစီအစဉ်ကို အပြည့်အဝ အာရုံစိုက်မယ်ဆိုရင်တော့ အကျိုးကျေးဇူး အများကြီးရမှာ သေချာပါတယ်။ အလုပ်ကနေ ခွင့်ယူဖို့ အလုပ်ရှင်ကို မပြောရသေးဘူးဆိုရင် အခုကတည်းက ခွင့်ယူဖို့ ပြင်ဆင်ပါ။ အစီအစဉ်အတွင်း လန်းလန်းဆန်းဆန်း ရှိနေစေဖို့ စည်းဝေးကြီး အတောအတွင်း ညတိုင်း လုံလုံလောက်လောက် အနားယူပါ။ ဟောပြောသူကို သေသေချာချာ အာရုံစူးစိုက်ပြီး မှတ်စုတိုလေးတွေ ယူမယ်ဆိုရင်တော့ နိုးနိုးကြားကြား ရှိနေနိုင်ပါတယ်။ ကိုယ့်ရဲ့ လက်ကိုင်ဖုန်းသံကြောင့် တခြားသူတွေကို အနှောင့်အယှက်မဖြစ်စေပါနဲ့။ အစီအစဉ်အတွင်းမှာ စကားပြောတာ၊ ဖုန်းနဲ့စာတိုလေးတွေ ပေးပို့တာ၊ စားသောက်နေတာတွေ မလုပ်ပါနဲ့။
၄။ မိဘတွေဟာ သူတို့ရဲ့ ကလေးတွေကို စည်းဝေးကြီးကနေ အကျိုးရရှိစေဖို့ ဘယ်လိုကူညီပေးနိုင်မလဲ။
၄ ဥပုသ်နှစ်ရောက်တိုင်း ဖတ်ရွတ်တဲ့ ပညတ်စကားတွေကို ကြားနာဖို့ အစ္စရေးမိသားစုတွေဟာ တဲနေပွဲခံချိန်မှာ စုရုံးရောက်ရှိလာကြတယ်။ အဲဒီအခါမျိုးမှာ ကလေးတွေကိုလည်း နားထောင်ပြီးသင်ယူစေဖို့ ခေါ်လာကြတယ်။ (တရား. ၃၁:၁၂) စည်းဝေးကြီးအတွင်းမှာ မိသားစု၀င်တွေ အတူတူထိုင်ကြပြီး ကလေးတွေကလည်း နိုးနိုးကြားကြားနဲ့ အစီအစဉ်ကို အာရုံစိုက်နေတာကို တွေ့ရတဲ့အခါ အလွန်ပဲ အားရစရာ ကောင်းပါတယ်။ အစီအစဉ်ရဲ့ အဓိကပေါ်လွင်ချက်တွေကို ညတိုင်း မိသားစုလိုက် ဆွေးနွေးပါ။ “မိုက်သော သဘောသည် သူငယ်၏ စိတ်နှလုံးထဲမှာ ထုပ်ထားလျက်ရှိ၏။” ဒါကြောင့် မိဘတွေဟာ ဆယ်ကျော်သက် သားသမီးတွေ အပါအဝင် သူတို့ရဲ့ ကလေးတွေကို နေ့လယ်ရပ်နားချိန်နဲ့ ဟိုတယ်မှာရှိနေချိန်အတွင်း ဒီတိုင်း လွတ်ထားမဲ့အစား သေသေချာချာ အုပ်ထိန်းရပါမယ်။—သု. ၂၂:၁၅; ၂၉:၁၅။
၅။ ဟိုတယ်မှာရှိနေတုန်း ကျွန်ုပ်တို့ရဲ့ အမူအကျင့်ကောင်းက အမှန်တရားကို ဘယ်လိုပိုပြီး ထင်ရှားစေသလဲ။
၅ ကျွန်ုပ်တို့ရဲ့ အမူအကျင့်ကောင်းက အမှန်တရားကို ပိုပြီးထင်ရှားစေ– စည်းဝေးကြီးကျင်းပတဲ့မြို့မှာ ရှိနေတုန်း ကျွန်ုပ်တို့ရဲ့ အမူအကျင့်ကောင်းက အမှန်တရားကို ပိုပြီးထင်ရှားစေပါတယ်။ (တိ. ၂:၁၀) အုပ်စုလိုက် ဟိုတယ်စည်းကမ်းတွေကို လိုက်နာတာ၊ ဝန်ထမ်းတွေကို စိတ်ရှည်ရှည်နဲ့ ဖော်ဖော်ရွေရွေ ဆက်ဆံတာကို ဟိုတယ်ဝန်ထမ်းတွေက သတိပြုမိပါတယ်။ (ကော. ၄:၆) ပြီးခဲ့တဲ့နှစ်က ဌာနခွဲရုံး ကိုယ်စားလှယ်တွေ ဟိုတယ်ကိစ္စ ညှိနှိုင်းဆောင်ရွက်တဲ့အခါ အရောင်းမန်နေဂျာက ဒီလိုပြောတယ်– “ခင်ဗျားတို့လို လူတွေပဲ ကျွန်တော်တို့ ဟိုတယ်ကို လာတည်းကြရင် ကောင်းမယ်၊ ဘာကြောင့်လဲဆိုတော့ သူတို့က လူကောင်းတွေဖြစ်လို့ပဲ။ သိပ်ကို ကြင်နာပြီး အမူအကျင့်ကောင်းကြတယ်၊ ဝန်ထမ်းတွေကိုလည်း လေးလေးစားစား ဆက်ဆံတယ်။ ပြီးတော့ အသုံးအဆောင်ပစ္စည်းတွေကိုလည်း ရိုရိုသေသေ ကိုင်တွယ်ကြတယ်။”
၆ စည်းဝေးကြီးကျင်းပတဲ့ မြို့မှာရှိနေတဲ့အခါ ကျွန်ုပ်တို့ရဲ့ ဝတ်စားဖြီးလိမ်းပုံက အမှန်တရားကို ဘယ်လိုပိုပြီး ထင်ရှားစေမလဲ။
၆ စည်းဝေးကြီး ရင်ထိုးကတ်တွေကို ဝတ်ဆင်ထားခြင်းက စည်းဝေးကြီးကို ကြော်ငြာရုံလောက်ပဲ မဟုတ်ဘဲ သက်သေခံမဟုတ်သူတွေနဲ့ သိသိသာသာ ကွဲပြားစေပါတယ်။ ပြီးတော့ အကဲခတ်သူတွေကိုလည်း သက်သေခံခွင့် ရရှိစေပါတယ်။ ရင်ထိုးကတ်တွေ ဝတ်ဆင်တဲ့သူတွေဟာ ဒီနေ့ခေတ်စားနေတဲ့ ဖိုသီဖတ်သီ၊ မပေါ်တပေါ် ဝတ်စားတာမျိုးမဟုတ်ဘဲ သပ်သပ်ရပ်ရပ်နဲ့ ဣန္ဒြေရှိရှိ ဝတ်ဆင်ထားတာကို စည်းဝေးကြီးကျင်းပတဲ့မြို့က လူတွေ သတိပြုမိကြပါတယ်။ (၁ တိ. ၂:၉၊ ၁၀) ဒါကြောင့် ဟိုတယ်အပါအဝင် စည်းဝေးကြီးကျင်းပတဲ့ မြို့မှာရှိနေတဲ့အခါ ကျွန်ုပ်တို့ရဲ့ ဝတ်စားဖြီးလိမ်းပုံကို ဂရုစိုက်သင့်ပါတယ်။ ဟိုတယ်ကိုတည်းဖို့ ရောက်လာတဲ့အခါမှာလည်း တိုနန့်နန့်တွေ၊ တီရှပ်တွေ မဝတ်သင့်ပါဘူး။ အားကစားကွင်းမှာ စည်းဝေးကြီးကျင်းပတယ်ဆိုရင်တောင် ကျွန်ုပ်တို့ရဲ့ ဝတ်စားပုံက ဣန္ဒြေရှိသင့်ပါတယ်။ အစီအစဉ်ပြီးတဲ့နောက် စားသောက်ဆိုင်သွားတဲ့အခါ အဝတ်အစားလဲသွားမယ်ဆိုရင်လည်း ကျွန်ုပ်တို့ဟာ စည်းဝေးကြီးကိုယ်စားလှယ်တွေဆိုတာကို မမေ့သင့်ပါဘူး၊ ပြီးတော့ ဖိုသီဖတ်သီလည်း မဝတ်သင့်ပါဘူး။
၇။ စည်ဝေးကြီးအတွင်းမှာ ခရစ်ယာန်စည်းလုံးမှုကို တိုးပွားစေတဲ့ နည်းတစ်နည်းက ဘာလဲ။
၇ နှစ်စဉ်ကျင်းပတဲ့ ပွဲတော်တွေအတွင်းမှာ အစ္စရေးလူတွေဟာ တခြားဒေသက ရောက်လာကြတဲ့ ဝတ်ပြုသူချင်းတွေနဲ့ ပေါင်းသင်းခွင့်ရပြီး အဲဒါက သူတို့ကို စည်းလုံးစေခဲ့တယ်။ (တ. ၂:၁၊ ၅) ကျွန်ုပ်တို့ရဲ့ စည်းဝေးကြီးမှာလည်း ခရစ်ယာန်ညီအစ်ကိုအသင်းအပင်းရဲ့ စည်းလုံးမှုက ပေါ်လွင်နေပါတယ်။ ကြည်နူးဖွယ် ဒီပုံဆောင်ပရဒိသု မြင်ကွင်းကြောင့် အကဲခတ်နေသူတွေ စွဲမှတ်သွားကြတယ်။ (ဆာ. ၁၃၃:၁) အပြင်ထွက်ပြီး ဝယ်စားမဲ့အစား ရိုးရှင်းတဲ့ နေ့လယ်စာကို ယူဆောင်လာပါ၊ ပြီးတော့ ညီအစ်ကိုညီအစ်မတွေနဲ့ အတူတူ စားသောက်ပေါင်းသင်းပါ။
၈။ ကျွန်ုပ်တို့ရဲ့ အခြေအနေက ခွင့်ပြုတယ်ဆိုရင် စေတနာ့ဝန်ထမ်းလုပ်ဖို့ ဘာအကြောင်းကောင်းတွေ ရှိသလဲ။
၈ ကျွန်ုပ်တို့ရဲ့ စည်းဝေးကြီးတွေကို စည်းစနစ်တကျ လုပ်ဆောင်တာ၊ အားလုံးက စေတနာ့ဝန်ထမ်းအဖြစ် လုပ်ဆောင်ပေးတာကို အကဲခတ်သူတွေက အထင်ကြီးကြပါတယ်။ ဒီစည်းဝေးကြီးမှာ သင် စေတနာ့ဝန်ထမ်း လုပ်နိုင်မလား။ (ဆာ. ၁၁၀:၃) ကလေးတွေ တခြားသူတွေကို ကူညီပေးတတ်အောင် လေ့ကျင့်ပေးတဲ့အနေနဲ့ မိသားစုဝင်တွေအားလုံး စေတနာ့ဝန်ထမ်းအဖြစ် လုပ်ဆောင်လေ့ရှိကြပါတယ်။ သင်ဟာ လူတောမတိုးရဲတဲ့သူဆိုရင် စည်းဝေးကြီးမှာ စေတနာ့ဝန်ထမ်းတာက တခြားသူတွေနဲ့ ရင်းနှီးဖို့ အခွင့်အရေးရရှိစေတယ်။ ညီအစ်မတစ်ယောက် ဒီလိုပြောတယ်– “ကျွန်မရဲ့ မိသားစုဝင်တွေနဲ့ သူငယ်ချင်းတချို့ကလွဲရင် အဲဒီမှာရှိတဲ့ လူတော်တော်များများကို ကျွန်မ မသိဘူး။ ဒါပေမဲ့ သန့်ရှင်းရေးမှာ ကူညီပေးတဲ့အခါ ညီအစ်ကိုညီအစ်မ တော်တော်များများနဲ့ ရင်းနှီးခွင့်ရခဲ့တယ်။ ဒါကြောင့် ကျွန်မ တော်တော် ပျော်ခဲ့တယ်။” စည်းဝေးကြီးမှာ စေတနာ့ဝန်ထမ်း လုပ်ဆောင်ရင်း မိတ်ဆွေသစ်တွေနဲ့ ခင်မင်ခွင့်ရတာက ကျွန်ုပ်တို့ကို ပျော်ရွှင်စေပါတယ်။ (၂ ကော. ၆:၁၂၊ ၁၃) သင်ဟာ စေတနာ့ဝန်ထမ်း တစ်ခါမှ မလုပ်ဖူးဘူးဆိုရင် ဘာတောင်းဆိုချက်ရှိတယ်ဆိုတာ သိဖို့ အကြီးအကဲတွေကို မေးပါ။
၉။ စည်းဝေးကြီးကို တက်ရောက်ဖို့ တခြားသူတွေကို ဘယ်လိုဖိတ်ခေါ်ကြမလဲ။
၉ အမှန်တရားကို ကြားသိစေဖို့ အခြားသူတွေကို ဖိတ်ခေါ်ပါ– အရင်နှစ်တွေတုန်းကလိုပါပဲ၊ ဒီနှစ်လည်း စည်းဝေးကြီးမတိုင်ခင် သုံးပတ်အလိုမှာ စည်းဝေးကြီးဖိတ်စာတွေကို ဝေကြမှာ ဖြစ်ပါတယ်။ အသင်းတော်အနေနဲ့ ရပ်ကွက်တစ်ခုလုံးကို ကာမိအောင် ဝေဖို့ အတတ်နိုင်ဆုံး ကြိုးစားသင့်ပါတယ်။ (“ဖိတ်စာတွေကို ဘယ်လိုဝေကြမလဲ” ဆိုတဲ့ လေးထောင့်ကွက်ကို ကြည့်ပါ) ဝေလို့မကုန်တဲ့ ဖိတ်စာတွေ စည်းဝေးကြီးကို ယူလာသင့်တယ်။ အဲဒါတွေကို စည်းဝေးကြီးကျင်းပတဲ့မြို့မှာ အလွတ်သဘောသက်သေခံဖို့ အသုံးပြုကြမှာ ဖြစ်ပါတယ်။
၁၀။ ကျွန်ုပ်တို့ရဲ့ ဖိတ်စာကင်ပိန်းက အကျိုးရလဒ်တွေ ရရှိစေတယ်ဆိုတဲ့ တွေ့ကြုံမှုတွေ ပြောပြပါ။
၁၀ နှစ်စဉ်လုပ်ဆောင်နေတဲ့ ဒီကင်ပိန်းကို လူတွေ တုံ့ပြန်ကြရဲ့လား။ တစ်ခါက စည်းဝေးကြီးတစ်ခုမှာ ဧည့်ကြိုတစ်ယောက်က မောင်နှံတစ်စုံကို နေရာရဖို့ ကူညီပေးခဲ့တယ်။ သူတို့ဟာ ဖိတ်စာရပြီးတဲ့နောက် “စိတ်ဝင်စားစရာကောင်းမှာပဲ” ဆိုပြီး လာခဲ့တာလို့ အဲဒီဧည့်ကြိုကို ပြောပြတယ်။ သူတို့က ဒီစည်းဝေးကြီးကို တက်ရောက်ဖို့ မိုင် ၂၀၀ ကျော်ဝေးတဲ့နေရာကနေ လာခဲ့တာ ဖြစ်တယ်။ နောက်တွေ့ကြုံမှုတစ်ခုက၊ ညီအစ်မတစ်ယောက်ဟာ တစ်အိမ်တက်ဆင်း သွားရင်းနဲ့ အမျိုးသားတစ်ယောက်ကို ဖိတ်စာပေးခဲ့တယ်။ အဲဒီအမျိုးသားက စည်းဝေးကြီးအကြောင်း သိချင်ပုံရတဲ့အတွက် ညီအစ်မက အချိန်ယူပြီး ရှင်းပြပေးခဲ့တယ်။ ရက်အနည်းငယ် ကြာပြီးနောက် စည်းဝေးကြီးတက်တဲ့အခါမှာ အဲဒီအမျိုးသားက သူ့မိတ်ဆွေတစ်ယောက်နဲ့အတူ အသစ်ထွက်တဲ့ စာပေတွေ ကိုယ်စီကိုင်ထားတာကို ညီအစ်မက တွေ့လိုက်တယ်။
၁၁။ နှစ်စဉ်ကျင်းပတဲ့ ခရိုင်စည်းဝေးကြီးတွေကို တက်ရောက်ဖို့ ဘာကြောင့် အရေးကြီးသလဲ။
၁၁ ယေဟောဝါကို အစ္စရေးလူတွေ “အမှားကင်းစွာ၊ မှန်ကန်စွာ ၀တ်ပြု” နိုင်ဖို့ နှစ်စဉ်ကျင်းပတဲ့ ပွဲတော်တွေဟာ ကိုယ်တော်ရဲ့မေတ္တာပါ ပြင်ဆင်ပေးချက်ဖြစ်တယ်။ (ယောရှု. ၂၄:၁၄၊ ကဘ) ထပ်တူပါပဲ၊ နှစ်စဉ်ကျင်းပနေတဲ့ ခရိုင်စည်းဝေးကြီးတွေကို တက်ရောက်ခြင်းက “အမှန်တရားတွင် လိုက်လျှောက်” နေဖို့ ကူညီပေးပြီး အဲဒါက ဝတ်ပြုရေးရဲ့ အဓိကကျတဲ့အပိုင်း ဖြစ်ပါတယ်။ (၃ ယော. ၃) အမှန်တရားကို ချစ်မြတ်နိုးသူတွေ စည်းဝေးကြီး တက်ရောက်ဖို့ ကြိုးစားနေတာကို ယေဟောဝါ ကောင်းချီးပေးပါစေ၊ အစီအစဉ်ကနေ အကျိုးအပြည့်အဝ ရရှိကြပါစေ။
[စာမျက်နှာ ၄ ပါ အကျဉ်းဖော်ပြချက်]
စည်းဝေးကြီးကျင်းပတဲ့မြို့မှာ ရှိနေတုန်း ကျွန်ုပ်တို့ရဲ့ အမူအကျင့်ကောင်းက အမှန်တရားကို ပိုပြီးထင်ရှားစေ
[စာမျက်နှာ ၅ ပါ အကျဉ်းဖော်ပြချက်]
စည်းဝေးကြီးမတိုင်ခင် သုံးပတ်အလိုမှာ စည်းဝေးကြီးဖိတ်စာတွေကို ဝေကြမှာဖြစ်
[စာမျက်နှာ ၄ ပါ လေးထောင့်ကွက်]
၂၀၁၂ ခရိုင်စည်းဝေးကြီး သတိပေးချက်များ
◼ အစီအစဉ်အချိန်များ– အစီအစဉ်သုံးရက်စလုံးကို နံနက် ၉:၂၀ နာရီမှာ စတင်မှာဖြစ်တယ်။ တံခါးတွေကို နံနက် ၈:၀၀ နာရီမှာ ဖွင့်ပါလိမ့်မယ်။ အစီအစဉ်ကို စနစ်တကျ စတင်နိုင်ဖို့အတွက် အဖွင့်တေးသံသာ ကြေညာချိန်မှာ ကျွန်တော်တို့အားလုံးဟာ မိမိတို့ရဲ့ထိုင်ခုံမှာ ရှိနေသင့်ပါတယ်။ အစီအစဉ်ကို သောကြာနေ့နဲ့ စနေနေ့မှာ ညနေ ၄:၅၅ နာရီ၊ တနင်္ဂနွေနေ့မှာ ညနေ ၃:၄၀ နာရီမှာ နိဂုံးချုပ်မှာ ဖြစ်ပါတယ်။
◼ ကားရပ်နားခြင်း– စည်းဝေးကြီးကျင်းပတဲ့နေရာမှာ ကားရပ်မယ့်နေရာတွေကို ကျွန်တော်တို့ ကြီးကြပ်ပေးမှာ ဖြစ်ပါတယ်။ တက်ရောက်လာသူတွေရဲ့ ကားတွေ ရပ်နားဖို့ နေရာတွေကို စီစဉ်ပေးထားမှာဖြစ်ပြီး အခကြေးငွေပေးစရာမလိုဘဲ ဦးရာလူစနစ်နဲ့ ရပ်နားနိုင်ပါတယ်။ ကားရပ်နားဖို့နေရာတွေက အများအားဖြင့် အကန့်အသတ်ရှိတာကြောင့် အတတ်နိုင်ဆုံး စုပေါင်းစီးသင့်ပါတယ်။
◼ ထိုင်ခုံဦးခြင်း– သင်နဲ့အတူ ကားတစ်စီးတည်း စီးလာသူတွေ ဒါမှမဟုတ် သင်နဲ့တစ်အိမ်တည်း နေတဲ့သူတွေ၊ သင်နဲ့အတူ လက်ရှိကျမ်းစာလေ့လာနေတဲ့သူတွေအတွက် ထိုင်ခုံဦးထားနိုင်ပါတယ်။—၁ ကော. ၁၃:၅။
◼ နေ့လယ်စာ– နေ့လယ်စာစားချိန်မှာ အပြင်ထွက်ပြီး ဝယ်စားမယ့်အစား ကျေးဇူးပြု၍ နေ့လယ်စာ ယူလာပါ။
◼ အလှူငွေများ– စည်းဝေးကြီးမှာ ကမ္ဘာချီလုပ်ငန်းအတွက် စေတနာအလျောက် အလှူငွေထည့်ဝင်ခြင်းဖြင့် စည်းဝေးကြီး အစီအစဉ်တွေအတွက် ကျွန်တော်တို့ရဲ့ ကျေးဇူးတင်လေးမြတ်မှုကို ဖော်ပြနိုင်ပါတယ်။ စည်းဝေးကြီးမှာ ချက်လက်မှတ်နဲ့ အလှူငွေပေးလိုတယ်ဆိုရင် “ယေဟောဝါသက်သေများ၊ ကင်းမျှော်စင်သမ္မာကျမ်းစာနဲ့ ဝေစာအသင်း၊ ရန်ကုန်” သို့ ပေးလှူသင့်ပါတယ်။
◼ မတော်တဆ ထိခိုက်မှုများနဲ့ အရေးပေါ်အခြေအနေများ– စည်းဝေးကြီး ကျင်းပတဲ့နေရာမှာ ဆေးဘက်ဆိုင်ရာ အရေးပေါ်အခြေအနေ ပေါ်ပေါက်လာရင် ရှေးဦးသူနာပြုဌာနကို ချက်ချင်း အကြောင်းကြားပေးမယ့် အနီးအနားမှာရှိတဲ့ ဧည့်ကြိုတစ်ဦးနဲ့ ကျေးဇူးပြုပြီး ဆက်သွယ်ပါ။ အဲဒါမှ ရှေးဦးသူနာပြုတွေက အခြေအနေ စိုးရိမ်စရာရှိမရှိ အကဲဖြတ်ပြီး အကူအညီ ပေးနိုင်ပါလိမ့်မယ်။
◼ ဆေးဝါး– ဆရာဝန်ညွှန်းတဲ့ဆေး သောက်ဖို့လိုတယ်ဆိုရင် စည်းဝေးကြီးကျင်းပတဲ့နေရာမှာ လိုအပ်တဲ့ဆေးတွေ ရနိုင်မှာမဟုတ်တဲ့အတွက် သောက်ဖို့လိုအပ်တဲ့ ဆေးတွေကို ကျေးဇူးပြု၍ သင်နဲ့ တစ်ပါတည်းယူလာပါ။
◼ ဖိနပ်များ– ဖိနပ်ကြောင့် နှစ်စဉ် ထိခိုက်ဒဏ်ရာရသူ အတော်များများရှိတယ်။ လှေကားတွေ၊ သံဆန်ခါတွေ၊ ဆင်ခြေလျှောလမ်းတွေ အစရှိတဲ့ နေရာတွေမှာ ဘေးကင်းစွာ လျှောက်လှမ်းနိုင်ဖို့ သင့်တော်တဲ့ဖိနပ်ကို ရွေးချယ်တာက အကောင်းဆုံးဖြစ်ပါတယ်။
◼ ကျေးဇူးပြု၍ ဆက်လိုက်ပေးပါ (S-43) ပုံစံများ– စည်းဝေးကြီးအတွင်း အလွတ်သဘော သက်သေခံတဲ့အခါ စိတ်ဝင်စားသူတွေရဲ့ အချက်အလက်တွေကို မှတ်သားဖို့ ကျေးဇူးပြု၍ ဆက်လိုက်ပေးပါ ပုံစံကို အသုံးပြုသင့်ပါတယ်။ ကြေညာသူတွေဟာ ဆက်လိုက်ပေးပါပုံစံ တစ်ရွက်နှစ်ရွက်ကို စည်းဝေးကြီးသို့ ယူလာသင့်ပါတယ်။ ဖြည့်စွက်ပြီးတဲ့ ပုံစံတွေကို စာအုပ်စာတမ်းကောင်တာ ဒါမှမဟုတ် သင့်အသင်းတော်ကို ပြန်ရောက်တဲ့အခါ အတွင်းရေးမှူးကို ပေးနိုင်ပါတယ်။—၂၀၁၁၊ မေလထုတ် ကျွန်ုပ်တို့၏နိုင်ငံတော်ဓမ္မအမှု၊ စ. ၃ တွင် ကြည့်ပါ။
◼ စားသောက်ဆိုင်များ– စားသောက်ဆိုင်တွေမှာ သင့်ရဲ့အမူအကျင့်ကောင်းတွေနဲ့ ယေဟောဝါရဲ့ နာမတော်ကို ဂုဏ်တင်ပါ။
◼ စေတနာ့ဝန်ထမ်းခြင်း– စေတနာ့ဝန်ထမ်းလိုသူ ဘယ်သူမဆို စည်းဝေးကြီး စေတနာ့ဝန်ထမ်းဌာနကို အကြောင်းကြားသင့်ပါတယ်။ အသက် ၁၆ နှစ်အောက် ကလေးတွေလည်း မိဘ၊ အုပ်ထိန်းသူ ဒါမှမဟုတ် သူတို့ ယုံကြည်စိတ်ချတဲ့ ရင့်ကျက်သူတစ်ယောက်ယောက်ရဲ့ ကွပ်ကဲမှုအောက်မှာ အလုပ်လုပ်ခြင်းဖြင့် ကူညီပေးနိုင်ပါတယ်။
[စာမျက်နှာ ၆ ပါ လေးထောင့်ကွက်]
ဖိတ်စာတွေကို ဘယ်လိုဝေကြမလဲ
ရပ်ကွက်တစ်ခုလုံး ပြီးမြောက်နိုင်ဖို့ အတိုချုပ်ပြောသင့်ပါတယ်။ ဒီလိုပြောနိုင်တယ်– “မင်္ဂလာပါ။ ဒီဖိတ်စာကို ကျွန်တော်တို့ ကမ္ဘာတစ်ဝန်းလုံးမှာ ဝေငှနေပါတယ်။ သင့်အတွက် တစ်စောင်ယူလာပါတယ်။ ဖိတ်စာထဲမှာ ပိုပြီးတော့ အသေးစိတ် တွေ့ရပါလိမ့်မယ်။” စိတ်ထက်သန်မှုရှိပါ။ စနေ၊ တနင်္ဂနွေနေ့တွေမှာ ဝေငှတဲ့အခါ သင့်တော်တဲ့အခါတိုင်း မဂ္ဂဇင်းတွေနဲ့လည်း တွဲဝေသင့်ပါတယ်။