အမှုဆောင်လုပ်ငန်းမှာ တိုးတက်အောင်လုပ်ဆောင်ခြင်း —ပုဂ္ဂိုလ်ရေးစိတ်ဝင်စားမှုပြပါ

ဘာကြောင့်အရေးကြီး– ယေရှုက လူတစ်ဦးစီကို ဂရုစိုက်ပြီး ပုဂ္ဂိုလ်ရေးစိတ်ဝင်စားမှု ပြခဲ့ပါတယ်။ ဥပမာ၊ တစ်ခါတုန်းက ဆွံ့အနားမကြားသူကို ကုသပေးဖို့ ယေရှုဆီခေါ်လာချိန် သူ စိုးရွံ့နေတာကို သတိပြုမိတယ်။ ဒါကြောင့် သူ့ကို လူအုပ်ကြားထဲကနေ သီးသန့်ခေါ်ထုတ်သွားပြီး ကုသပေးခဲ့တယ်။ (မာ. ၇:၃၁-၃၅) ယေရှုဟာ တပည့်တွေရဲ့ခံယူနိုင်စွမ်း အကန့်အသတ်ကို နားလည်တဲ့အတွက် အကြောင်းအရာအများကြီး မပြောပြခဲ့ဘူး။ အဲဒီလိုနည်းနဲ့ သူတို့ကို စာနာထောက်ထားမှု ပြခဲ့တယ်။ (ယော. ၁၆:၁၂) ကောင်းကင်ကို ယေရှုတက်သွားပြီးတဲ့နောက်မှာတောင် လူတွေကို ပုဂ္ဂိုလ်ရေးစိတ်ဝင်စားမှု ပြခဲ့တယ်။ (၂ တိ. ၄:၁၇) နောက်လိုက်တွေဖြစ်တဲ့ ကျွန်ုပ်တို့ဟာ ယေရှုကို တုပချင်ကြတယ်။ (၁ ပေ. ၂:၂၁; ၁ ယော. ၃:၁၆၊ ၁၈) အိမ်ရှင်ကို စာနာထောက်ထားမှုပြပြီး သူ့အခြေအနေတွေ၊ စိတ်ဝင်စားမှုတွေ၊ စိုးရိမ်ပူပန်မှုတွေကို သတိပြုမယ်ဆိုရင် အမှုဆောင်လုပ်ငန်းမှာ ကျွန်ုပ်တို့ရဲ့လုပ်ဆောင်မှုဟာ ပိုပြီးထိရောက်ပါလိမ့်မယ်။ ကျွန်ုပ်တို့ဟာ သတင်းတရားကို ဟောပြောနေရုံ၊ စာပေတွေကို ဝေငှနေရုံသာမဟုတ်ဘဲ အိမ်ရှင်ကို ပုဂ္ဂိုလ်ရေးစိတ်ဝင်စားမှုရှိကြောင်းပြတဲ့အခါ သတင်းတရားကို သူ ပိုပြီးနားထောင်ချင်စိတ် ရှိလာနိုင်တယ်။