ခရစ်ယာန်အသက်တာလမ်းစဉ်
မဟုတ်မမှန်တဲ့ စကားတွေ မဖြန့်ပါနဲ့
အခုချိန်မှာ အချက်အလက်တွေဟာ သတင်းဂျာနယ်တွေ၊ ရေဒီယို၊ ရုပ်မြင်သံကြား၊ အင်တာနက်ကတစ်ဆင့် သန်းနဲ့ချီတဲ့သူတွေဆီ ချက်ချင်း ရောက်သွားနိုင်တယ်။ “အမှန်တရားရဲ့ ဘုရား” ကို ကိုးကွယ်သူတွေဟာ မမှန်တဲ့ သတင်းတွေကို မတော်တဆအနေနဲ့တောင် မဖြန့်ချင်ကြပါဘူး။ (ဆ ၃၁:၅။ ထွ ၂၃:၁) မဟုတ်မမှန်တဲ့ စကားတွေ ဖြန့်တာက အလွန်အမင်း ထိခိုက်စေနိုင်တယ်။ အကြောင်းအရာတစ်ခုခုကို မှန်မမှန် ပိုင်းဖြတ်တဲ့အခါ ကိုယ့်ကိုယ်ကိုယ် ဒီလို မေးပါ–
‘ယုံကြည်စိတ်ချရသူဆီက ကြားတာလား။’ အဲဒီအကြောင်း ပြောတဲ့သူဟာ အချက်အလက်အားလုံးကို မသိတာ ဖြစ်နိုင်တယ်။ အကြောင်းအရာတွေကို တစ်ဆင့်စကား တစ်ဆင့် ပြောလိုက်တဲ့အခါ စကားက ပြောင်းသွားနိုင်တယ်။ ဒါကြောင့် ယုံကြည်စိတ်ချရသူဆီက မဟုတ်ရင် သတိထားပါ။ အသင်းတော်မှာ အခွင့်အာဏာရှိသူတွေဟာ ယုံကြည်စိတ်ချရသူတွေလို့ ယူမှတ်ခံရတဲ့အတွက် မခိုင်လုံတဲ့ အကြောင်းအရာတွေ ထပ်မဖြန့်ဖို့ အထူး သတိပြုသင့်တယ်။
‘အသရေဖျက်တဲ့ စကားတွေလား။’ လူတစ်ယောက်၊ အုပ်စုတစ်စုရဲ့ ဂုဏ်သတင်းကို ထိခိုက်တဲ့ စကားတွေဆိုရင် ထပ်မဖြန့်တာ အကောင်းဆုံးပဲ။—ပ ၁၈:၈။ ဖိ ၄:၈
‘အကြောင်းအရာက ယုတ္တိရှိသလား။’ စိတ်လှုပ်ရှားစရာ အကြောင်းအရာ၊ အဖြစ်အပျက်တွေကို ကြားတဲ့အခါ သတိထားပါ။
အတင်းအဖျင်း ပြောတာကို ငါ ဘယ်လို ရှောင်နိုင်သလဲ ဗီဒီယိုကို ကြည့်ပါ။ ပြီးတဲ့နောက် အောက်ပါမေးခွန်းတွေကို ဖြေပါ–
ပညာအလိမ္မာ ၁၂:၁၈ အရ စကားက ဘယ်လို ထိခိုက်စေနိုင်သလဲ။
တခြားသူတွေအကြောင်း ပြောတဲ့အခါ မျှတတဲ့အမြင် ရှိအောင် ဖိလိပ္ပိ ၂:၄ က ဘယ်လို ကူညီပေးနိုင်သလဲ။
စကားဝိုင်းမှာ တခြားသူအကြောင်း ထေ့ငေါ့ပြောတာ၊ မကောင်းပြောတာတွေ ပါလာပြီဆိုရင် ဘာလုပ်သင့်သလဲ။
တခြားသူတွေအကြောင်း စမပြောခင် ကိုယ့်ကိုယ်ကိုယ် ဘယ်မေးခွန်းတွေ မေးသင့်သလဲ။