ရှင်ပြန်ထမြောက်ခြင်းက ဘုရားမေတ္တာ၊ ဉာဏ်ပညာနဲ့ စိတ်ရှည်မှုကို ပေါ်လွင်စေ

၁။ အသက်ကို ယေဟောဝါ ဘာကြောင့် ဖန်ဆင်းခဲ့သလဲ။

ယေဟောဝါ တစ်ယောက်တည်း ရှိခဲ့တဲ့အချိန် ရှိတယ်။ အရာရာ ပြီးပြည့်စုံနေလို့ အထီးကျန်တယ်လို့ မခံစားရဘူး။ ဒါပေမဲ့ တခြားသူတွေကိုလည်း အသက်ကို ပျော်မွေ့စေချင်တယ်။ မေတ္တာရဲ့ စေ့ဆော်မှုကြောင့် ဖန်ဆင်းခြင်းလုပ်ငန်း စတင်ခဲ့တယ်။—ဆာ. ၃၆:၉။ ၁ ယော. ၄:၁၉။

၂။ ယေဟောဝါရဲ့ ဖန်ဆင်းခြင်း လက်ရာတွေကို ယေရှုနဲ့ ကောင်းကင်တမန်တွေ ဘယ်လို သဘောထားသလဲ။

^၂ အရင်ဆုံး သားတော် ယေရှုကို ဖန်ဆင်းတယ်။ ပြီးနောက် အဲဒီသားဦးကို သုံးပြီး အသိဉာဏ်ရှိ နာမ်ဝိညာဉ် ပုဂ္ဂိုလ် သန်းပေါင်းများစွာ အပါအဝင် “ရှိရှိသမျှ” ကို ဖန်ဆင်းတယ်။ (ကော. ၁:၁၆) ဖခင်နဲ့ အတူတွဲလုပ်ရတာကို ယေရှု သိပ်ဝမ်းမြောက်တယ်။ (ပညာ. ၈:၃၀) ဘုရားသခင်ရဲ့ ကောင်းကင်တမန် သားတွေမှာလည်း ဝမ်းမြောက်စရာ အကြောင်းရင်း ရှိတယ်။ ကောင်းကင်၊ မြေကြီးကို ယေဟောဝါနဲ့ ကျွမ်းကျင်လုပ်သား ယေရှု ဖန်ဆင်းချိန်မှာ သူတို့ ကြည့်နေတယ်။ မြေကြီးကို ဖန်ဆင်းချိန်မှာ သူတို့ “လက်ခုပ်ဩဘာပေးကြတယ်။” ဘုရားရဲ့ အပြောင်မြောက်ဆုံး လက်ရာ ဖြစ်တဲ့ လူသားတွေ အပါအဝင် ဖန်ဆင်းခြင်း လက်ရာတိုင်းအတွက် ဆက်ဩဘာပေးကြမှာ သေချာတယ်။ (ယောဘ ၃၈:၇။ ပညာ. ၈:၃၁) အဲဒီဖန်ဆင်းရာတိုင်းက ယေဟောဝါရဲ့ မေတ္တာနဲ့ ဉာဏ်ပညာကို ပေါ်လွင်စေတယ်။—ဆာ. ၁၀၄:၂၄။ ရော. ၁:၂၀။

၃။ ၁ ကောရိန္သု ၁၅:၂၁၊ ၂၂ အရ ယေရှုရဲ့ ရွေးဖိုး ပူဇော်သက္ကာက ဘာဖြစ်စေမလဲ။

^၃ ယေဟောဝါက မိမိဖန်ဆင်းထားတဲ့ လှပတဲ့ ကမ္ဘာပေါ်မှာ လူ့မိသားစုကို ထာဝစဉ် အသက်ရှင်စေချင်တယ်။ ဒါပေမဲ့ မေတ္တာရှင် ဖခင်ကို အာဒံနဲ့ ဧဝ ပုန်ကန်တဲ့အခါ အပြစ်နဲ့ သေခြင်း လူ့လောကထဲ ရောက်လာတယ်။ (ရော. ၅:၁၂) ယေဟောဝါ ဘယ်လို ကိုင်တွယ်သလဲ။ လူတွေကို ဘယ်လို ကယ်တင်မယ်ဆိုတာ ချက်ချင်း ပြောတယ်။ (က. ၃:၁၅) အာဒံ၊ ဧဝရဲ့ သားသမီးတွေကို အပြစ်နဲ့ သေခြင်းကနေ လွတ်မြောက်စေမယ့် ရွေးဖိုး ပြင်ဆင်ပေးဖို့ ဆုံးဖြတ်လိုက်တယ်။ ဒါမှ မိမိကို ဝတ်ပြုဖို့ ရွေးချယ်သူတိုင်းကို ထာဝရအသက် ပေးနိုင်မယ်။—ယော. ၃:၁၆။ ရော. ၆:၂၃။ ၁ ကောရိန္သု ၁၅:၂၁၊ ၂၂ ကိုဖတ်ပါ။

၄။ ဒီဆောင်းပါးမှာ ဘယ်မေးခွန်းတွေကို သုံးသပ်ကြမလဲ။

^၄ သေဆုံးသူတွေကို ပြန်ရှင်စေမယ်ဆိုတဲ့ ဘုရားကတိကြောင့် မေးခွန်းများစွာ ပေါ်လာတယ်။ ဥပမာ၊ ရှင်ပြန်ထမြောက်ခြင်း ဘယ်လို ဖြစ်မှာလဲ။ ချစ်ရသူတွေ အသက်ပြန်ရှင်လာတဲ့အခါ သူတို့ကို မှတ်မိမလား။ ရှင်ပြန်ထမြောက်ခြင်းက ဘယ်နည်းတွေနဲ့ ကျွန်တော်တို့ကို ပျော်ရွှင်စေမလဲ။ ရှင်ပြန်ထမြောက်ခြင်းအကြောင်း တွေးတောတာက ယေဟောဝါရဲ့ မေတ္တာ၊ ဉာဏ်ပညာ၊ စိတ်ရှည်မှုအတွက် ကျေးဇူးတင်လေးမြတ်စိတ် ဘယ်လို တိုးများစေနိုင်သလဲ။ အဲဒီမေးခွန်း တစ်ခုစီကို သုံးသပ်ကြည့်ကြစို့။

ရှင်ပြန်ထမြောက်ခြင်း ဘယ်လို ဖြစ်မှာလဲ

၅။ သေဆုံးသူအားလုံး တစ်ပြိုင်တည်း အသက်ပြန်ရှင်လာမယ်လို့ မျှော်လင့်ဖို့ ဘာကြောင့် မဖြစ်နိုင်သလဲ။

^၅ သားတော်ကို သုံးပြီး လူသန်းပေါင်းများစွာကို ယေဟောဝါ အသက်ပြန်ရှင်စေတဲ့အခါ အားလုံး တစ်ပြိုင်တည်း ပြန်ရှင်လာမယ်ဆိုပြီး မျှော်လင့်လို့ မရနိုင်ဘူး။ ဘာကြောင့်လဲ။ ကမ္ဘာ့လူဦးရေ ဝုန်းကနဲ များလာရင် ပရမ်းပတာ ဖြစ်သွားနိုင်လို့ပဲ။ ယေဟောဝါက ဘာကိုမှ စည်းမဲ့ကမ်းမဲ့ ပရမ်းပတာ မလုပ်ဘူး။ သင့်မြတ်ငြိမ်သက်စွာ အမြဲ နေနိုင်ဖို့ စည်းစနစ် ရှိရမယ်ဆိုတာ ဘုရား သိတယ်။ (၁ ကော. ၁၄:၃၃) လူတွေကို မဖန်ဆင်းခင် ယေရှုနဲ့အတူ ကမ္ဘာကို တဖြည်းဖြည်း အသင့်ပြင်ခဲ့တာက ယေဟောဝါရဲ့ စိတ်ရှည်မှုနဲ့ ဉာဏ်ပညာကို ဖော်ပြတယ်။ ယေရှုလည်း အနှစ်တစ်ထောင် အုပ်ချုပ်မှုအတွင်း အသက်ပြန်ရှင်လာသူတွေအတွက် ကမ္ဘာမြေကို အသင့်ပြင်ဖို့ အာမဂေဒုန် ကပ်ကျော်သူတွေနဲ့အတူ တွဲဖက်လုပ်ဆောင်ချိန်မှာ စိတ်ရှည်မှုနဲ့ ဉာဏ်ပညာကို ဖော်ပြပါလိမ့်မယ်။

၆။ တမန်တော် ၂၄:၁၅ အရ ယေဟောဝါ အသက်ပြန်ရှင်စေမယ့် သူတွေထဲမှာ ဘယ်သူတွေ ပါမလဲ။

^၆ အာမဂေဒုန်ကနေ ကပ်ကျော်လာသူတွေဟာ ဘုရားနိုင်ငံတော်အကြောင်း၊ ယေဟောဝါရဲ့ တောင်းဆိုချက်တွေအကြောင်း ရှင်ပြန်ထမြောက်လာသူတွေကို သင်ပေးဖို့ လိုတယ်။ ဘာကြောင့်လဲ။ အသက်ပြန်ရှင်လာသူ အများစုထဲမှာ “မဖြောင့်မတ်သူတွေ” ပါမှာ ဖြစ်လို့ပဲ။ (တမန်တော် ၂၄:၁၅ ကိုဖတ်ပါ။) ခရစ်တော်ရဲ့ ရွေးဖိုးကနေ အကျိုးရဖို့ သူတို့မှာ ပြုပြင်ပြောင်းလဲစရာ အများကြီး ရှိမယ်။ ယေဟောဝါအကြောင်း မသိသူ သန်းပေါင်းများစွာကို ဘုရားနဲ့ပတ်သက်တဲ့ အမှန်တရား သင်ပေးရတဲ့ အလုပ်မှာ ဘာတွေ ပါဝင်မလဲဆိုတာ စဉ်းစားကြည့်ပါ။ ဒီနေ့ခေတ် ကျမ်းစာသင်အံမှု လုပ်သလို တစ်ဦးချင်းကို သင်ပေးရမှာလား။ အဲဒီလူသစ်တွေကို အသင်းတော်တွေမှာ ပူးပေါင်းခိုင်းတာမျိုး၊ သူတို့နောက်မှ ထမြောက်လာသူတွေကို သင်ပေးဖို့ လေ့ကျင့်ပေးတာမျိုး ရှိမလား။ စောင့်ကြည့်ရုံပဲ ရှိတယ်။ ဒါပေမဲ့ ခရစ်တော်ရဲ့ အနှစ်တစ်ထောင် အုပ်ချုပ်မှု အဆုံးမှာ ‘ကမ္ဘာမြေဟာ ယေဟောဝါကို သိကျွမ်းခြင်းနဲ့ ပြည့်နေမယ်’ ဆိုတာတော့ ကျွန်တော်တို့ သိထားတယ်။ (ဟေရှာ. ၁၁:၉) တကယ် အလုပ်များပြီး ပျော်စရာကောင်းတဲ့ အနှစ်တစ်ထောင် ဖြစ်မှာ သေချာပါတယ်။

၇။ ဘုရားလူမျိုးဟာ ရှင်ပြန်ထမြောက်လာသူတွေကို ကူညီပေးတဲ့အခါ ဘာကြောင့် စာနာတတ်မလဲ။

^၇ ခရစ်တော်ရဲ့ အနှစ်တစ်ထောင် အုပ်ချုပ်မှုအတွင်း ယေဟောဝါရဲ့ ကျေးကျွန်အားလုံးဟာ ဘုရားနှစ်သက်မှု ရဖို့ ပြုပြင်ပြောင်းလဲမှုတွေ လုပ်ကြရမယ်။ ဒါကြောင့် ရှင်ပြန်ထမြောက်လာသူတွေကို ကူညီပေးတဲ့အခါ စာနာတတ်ပါလိမ့်မယ်။ (၁ ပေ. ၃:၈) ယေဟောဝါရဲ့ လူမျိုး နှိမ့်ချကြောင်း၊ ‘ကယ်တင်ခြင်း ရဖို့ ဆက်ကြိုးစားနေ’ ကြောင်း အသက်ပြန်ရှင်လာသူတွေ မြင်တဲ့အခါ သူတို့နဲ့အတူ ယေဟောဝါကို ဝတ်ပြုချင်လာပါလိမ့်မယ်။—ဖိ. ၂:၁၂။

ရှင်ပြန်ထမြောက်လာသူတွေကို ကျွန်တော်တို့ မှတ်မိမလား

၈။ ရှင်ပြန်ထမြောက်လာသူတွေကို မိသားစုဝင်တွေနဲ့ မိတ်ဆွေတွေ မှတ်မိမယ်လို့ ဘာကြောင့် ယူဆနိုင်သလဲ။

^၈ ရှင်ပြန်ထမြောက်လာသူတွေကို မိသားစုဝင်တွေနဲ့ မိတ်ဆွေတွေ မှတ်မိမယ်လို့ ယူဆနိုင်စရာ အကြောင်းရင်း များစွာ ရှိတယ်။ ဥပမာ၊ အရင်က ရှင်ပြန်ထမြောက်ခြင်း မှတ်တမ်းတွေကို ကြည့်ရင် မသေဆုံးခင်ကအတိုင်း ရုပ်ရည်၊ စကားပြောနိုင်စွမ်း၊ စဉ်းစားနိုင်စွမ်းတွေ ပြန်ရှိမယ်လို့ မျှော်လင့်နိုင်ပါတယ်။ ယေရှုက သေခြင်းကို အိပ်ပျော်တာနဲ့၊ ရှင်ပြန်ထမြောက်တာကို အိပ်ရာနိုးတာနဲ့ နှိုင်းယှဉ်ခဲ့တယ်။ (မ. ၉:၁၈၊ ၂၄။ ယော. ၁၁:၁၁-၁၃) လူတွေ အိပ်ရာကနေ ပြန်နိုးတဲ့အခါ ရုပ်ရည်၊ အသံ၊ မှတ်ဉာဏ်တွေဟာ မအိပ်ခင်ကအတိုင်းပဲ။ လာဇရုအကြောင်း စဉ်းစားကြည့်ပါ။ သေဆုံးတာ လေးရက် ရှိပြီ ဖြစ်လို့ ခန္ဓာကိုယ် စပျက်စီးနေပြီ။ ဒါပေမဲ့ သူ့ကို ယေရှု ထမြောက်ပေးတဲ့အခါ အစ်မတွေ ချက်ချင်း မှတ်မိတယ်။ သူတို့ကိုလည်း လာဇရု မှတ်မိတယ်။—ယော. ၁၁:၃၈-၄၄။ ၁၂:၁၊ ၂။

၉။ သေဆုံးသွားသူတွေဟာ ပြည့်ဝစုံလင်တဲ့ စိတ်၊ ကိုယ်ခန္ဓာနဲ့ ရှင်ပြန်ထမြောက်လာမှာ မဟုတ်ဘူးလို့ ဘာကြောင့် ယူဆနိုင်သလဲ။

^၉ ခရစ်တော်ရဲ့ အုပ်ချုပ်မှုအောက်မှာ ဘယ်သူမှ “နေမကောင်းဘူး” လို့ မပြောရတော့မယ့်အကြောင်း ယေဟောဝါ ကတိပေးထားတယ်။ (ဟေရှာ. ၃၃:၂၄။ ရော. ၆:၇) ဒါကြောင့် သေဆုံးသွားသူတွေဟာ ကျန်းမာတဲ့ ခန္ဓာနဲ့ အသက်ပြန်ရှင်လာကြမယ်။ ချက်ချင်းတော့ ပြည့်ဝစုံလင်သွားမှာ မဟုတ်ဘူး။ အဲဒီလိုသာ ချက်ချင်း ပြည့်ဝစုံလင်သွားရင် ချစ်ရသူတွေ သူတို့ကို မှတ်မိမှာ မဟုတ်ဘူး။ လူအားလုံးဟာ ခရစ်တော်ရဲ့ အနှစ်တစ်ထောင် အုပ်ချုပ်မှုအတွင်း တဖြည်းဖြည်း ပြည့်ဝစုံလင်လာမယ်။ အနှစ်တစ်ထောင် ပြီးနောက် ဖခင်ဆီ နိုင်ငံကို ယေရှု ပြန်အပ်မယ်။ အဲဒီအခါ လူသားတွေကို ပြည့်ဝစုံလင်အောင် လုပ်ပေးခြင်း အပါအဝင် ယေဟောဝါ အလိုရှိရာ အားလုံးကို နိုင်ငံတော်က ပြီးမြောက်အောင် လုပ်ဆောင်ပြီး ဖြစ်ပါလိမ့်မယ်။—၁ ကော. ၁၅:၂၄-၂၈။ ဗျာ. ၂၀:၁-၃။

ရှင်ပြန်ထမြောက်ခြင်းက ဘယ်နည်းတွေနဲ့ ကျွန်တော်တို့ကို ပျော်ရွှင်စေမလဲ

၁၀။ ရှင်ပြန်ထမြောက်ခြင်းကြောင့် သင် ဘယ်လို ခံစားရမလဲ။

^၁၀ ချစ်ရသူတွေကို ပြန်ကြိုဆိုတဲ့အခါ ဘယ်လို နေမလဲဆိုတာ စဉ်းစားကြည့်ပါ။ ဝမ်းသာလွန်းလို့ ရယ်နေမလား၊ ငိုနေမလား။ ယေဟောဝါကို ချီးမွမ်းတဲ့ သီချင်းတွေ ဆိုနေမလား။ သေချာတာ တစ်ခုကတော့ ရှင်ပြန်ထမြောက်ခြင်း ဆုလက်ဆောင်ကြောင့် မေတ္တာရှင် ဖခင်နဲ့ သားတော်ကို သိပ်ချစ်လာပါလိမ့်မယ်။

၁၁။ ယောဟန် ၅:၂၈၊ ၂၉ မှာပါတဲ့ ယေရှုရဲ့ စကားတွေအရ ဘုရားရဲ့ ဖြောင့်မတ်တဲ့ စံနှုန်းတွေနဲ့အညီ အသက်ရှင်သူတွေ ဘာဖြစ်မလဲ။

^၁၁ စရိုက်ဟောင်းကို ချွတ်ဖို့၊ ဘုရားရဲ့ ဖြောင့်မတ်တဲ့ စံနှုန်းတွေနဲ့အညီ အသက်ရှင်ဖို့ ကြိုးစားရင်း ရှင်ပြန်ထမြောက်လာသူတွေ ဘယ်လောက် ပျော်နေမယ်ဆိုတာ မြင်ယောင်ကြည့်ပါ။ အဲဒီလို ပြုပြင်ပြောင်းလဲသူတွေဟာ ထာဝရ အသက်ရှင်ဖို့ ထမြောက်လာသူတွေ ဖြစ်ခွင့်ရမယ်။ မပြောင်းလဲသူတွေကတော့ ဆက်အသက်ရှင်ရမှာ မဟုတ်ဘူး။ သူတို့ကြောင့် ကမ္ဘာသစ်ရဲ့ ငြိမ်သက်မှု ပျက်စီးတာကို ဘုရား ခွင့်ပြုမှာ မဟုတ်ဘူး။—ဟေရှာ. ၆၅:၂၀။ ယောဟန် ၅:၂၈၊ ၂၉ ကိုဖတ်ပါ။

၁၂။ မြေကြီးပေါ်က လူအားလုံး ဘယ်နည်းနဲ့ ယေဟောဝါရဲ့ ကောင်းချီး ခံစားရမလဲ။

^၁၂ “ယေဟောဝါရဲ့ ကောင်းချီးက ကြွယ်ဝစေတယ်။ အဲဒီကြွယ်ဝမှုမှာ နာကျင်စရာတွေ မရောဘူး” ဆိုတဲ့ ပညာအလိမ္မာ ၁၀:၂၂ မှာပါတဲ့ စကားတွေ မှန်ကန်ကြောင်း နိုင်ငံတော် အုပ်ချုပ်မှုအောက်မှာ ဘုရားကျေးကျွန်အားလုံး တွေ့ကြုံခံစားရမယ်။ ယေဟောဝါရဲ့ စွမ်းအားတော် အကူအညီကြောင့် ဘုရားရေးရာဘက်မှာ ကြွယ်ဝနေမယ်။ ဆိုလိုတာက ခရစ်တော်နဲ့ ပိုတူလာပြီး တဖြည်းဖြည်း ပြည့်ဝစုံလင်လာမယ်။ (ယော. ၁၃:၁၅-၁၇။ ဧ. ၄:၂၃၊ ၂၄) တစ်ရက်ကုန်သွားတိုင်း ပိုကျန်းမာသူတွေ၊ စိတ်ထား ပိုကောင်းသူတွေ ဖြစ်လာမယ်။ တကယ့်ကို ပျော်ရွှင်စရာပါပဲ။ (ယောဘ ၃၃:၂၅) ဒါပေမဲ့ ရှင်ပြန်ထမြောက်ခြင်းအကြောင်း တွေးတောတာက လောလောဆယ် သင့်ကို ဘယ်လို ကူညီပေးနိုင်သလဲ။

ယေဟောဝါရဲ့ မေတ္တာကို ကျေးဇူးတင်လေးမြတ်ပါ

၁၃။ ဆာလံ ၁၃၉:၁-၄ အရ ကျွန်တော်တို့ကို ယေဟောဝါ အတွင်းကျကျ သိကြောင်း ရှင်ပြန်ထမြောက်ခြင်းက ဘယ်လို ဖော်ပြမလဲ။

^၁၃ အစောပိုင်းမှာ ဆွေးနွေးခဲ့တဲ့အတိုင်း သေဆုံးသူတွေကို ယေဟောဝါ အသက်ပြန်ရှင်စေတဲ့အခါ သူတို့မှာ ရှိခဲ့တဲ့ မှတ်ဉာဏ်၊ ကိုယ်ရည်ကိုယ်သွေးတွေ ပြန်ထည့်ပေးမယ်။ အဲဒါ သင့်အတွက် ဘာအဓိပ္ပာယ် ရှိသလဲ။ ယေဟောဝါက သင့်ကို ချစ်လွန်းလို့ သင် စဉ်းစား၊ ခံစား၊ ပြောဆို၊ လုပ်ကိုင်သမျှ အရာအားလုံးကို မှတ်ထားတယ်။ ဒါကြောင့် ထမြောက်ပေးတဲ့အခါ သင့်ရဲ့ မှတ်ဉာဏ်၊ စိတ်သဘော၊ ကိုယ်ရည်ကိုယ်သွေးတွေကို အလွယ်တကူ ထည့်သွင်းပေးနိုင်မယ်။ တစ်ယောက်စီကို ယေဟောဝါ ဘယ်လောက် စိတ်ဝင်စားကြောင်း ဘုရင်ဒါဝိဒ် သိတယ်။ (ဆာလံ ၁၃၉:၁-၄ ကိုဖတ်ပါ။) ကျွန်တော်တို့ကို ယေဟောဝါ အတွင်းကျကျ သိမှန်း နားလည်လာတဲ့အခါ ဘယ်လို ခံစားရသလဲ။

၁၄။ ကျွန်တော်တို့ကို ယေဟောဝါ အတွင်းကျကျ သိကြောင်း တွေးတောတဲ့အခါ ဘယ်လို ခံစားရသင့်သလဲ။

^၁၄ ကျွန်တော်တို့ကို ယေဟောဝါ အတွင်းကျကျ သိနေတယ်ဆိုလို့ မစိုးရိမ်ပါနဲ့။ ယေဟောဝါက ကျွန်တော်တို့ကို အလွန်စိတ်ဝင်စားတယ်။ တစ်ယောက်စီရဲ့ တစ်မူထူးခြားတဲ့ စရိုက်လေးတွေကို မြတ်နိုးတယ်။ ဖြတ်သန်းခဲ့ရတဲ့ ဘဝနောက်ခံတွေကို ကောင်းကောင်း သိတယ်။ တကယ့်ကို စိတ်သက်သာစရာပါပဲ။ နေ့ရက်တိုင်း၊ မိနစ်တိုင်း ကျွန်တော်တို့ဘေးနား ယေဟောဝါ ရှိပြီး ကူညီပေးဖို့ အခွင့်အရေး စောင့်နေတယ်။ ဒါကြောင့် အထီးကျန်တယ်လို့ မခံစားသင့်ဘူး။—၂ ရာ. ၁၆:၉။

ယေဟောဝါရဲ့ ဉာဏ်ပညာကို ကျေးဇူးတင်လေးမြတ်ပါ

၁၅။ ရှင်ပြန်ထမြောက်ခြင်းက ယေဟောဝါရဲ့ ဉာဏ်ပညာကို ဘယ်လို ပေါ်လွင်စေသလဲ။

^၁၅ သေရမှာ ကြောက်တဲ့စိတ်ဟာ အစွမ်းထက် လက်နက်ပဲ။ စာတန့်ထိန်းချုပ်မှုအောက်က လူတွေဟာ အဲဒီလက်နက်ကို သုံးပြီး မိတ်ဆွေကို သစ္စာဖောက်ဖို့၊ ကိုယ့်ယုံကြည်ချက်ကို စွန့်လွှတ်ဖို့ ဖိအားပေးတတ်တယ်။ ကျွန်တော်တို့အတွက်တော့ အဲဒီလက်နက် အစွမ်းမထက်ပါဘူး။ ရန်သူတွေ သတ်ပစ်ရင်တောင် ယေဟောဝါ အသက်ပြန်ပေးနိုင်မှန်း သိထားလို့ပဲ။ (ဗျာ. ၂:၁၀) ယေဟောဝါအပေါ် ထားတဲ့ ကျွန်တော်တို့ရဲ့ မေတ္တာကို ဘာကမှ မတားနိုင်မှန်း တထစ်ချ ယုံကြတယ်။ (ရော. ၈:၃၅-၃၉) ရှင်ပြန်ထမြောက်ခြင်း မျှော်လင့်ချက် ပေးထားတာက ယေဟောဝါရဲ့ ဉာဏ်ပညာ ကြီးမားကြောင်း ပေါ်လွင်စေတယ်။ အဲဒီမျှော်လင့်ချက် ရှိထားလို့ သတ်ပစ်မယ်ဆိုပြီး ခြိမ်းခြောက်ခံရတဲ့အခါ ကျွန်တော်တို့ မကြောက်တဲ့အပြင် ယေဟောဝါကို ဆက်သစ္စာရှိဖို့ သတ္တိရှိလာတယ်။

၁၆။ ကိုယ့်ကိုယ်ကိုယ် ဘယ်မေးခွန်းတွေ မေးဖို့ လိုသလဲ။ ယေဟောဝါအပေါ် သင့်ရဲ့ ယုံကြည်ကိုးစားမှု အတိမ်အနက်ကို သိဖို့ အဲဒီမေးခွန်းတွေက ဘယ်လို ကူညီပေးနိုင်သလဲ။

^၁၆ ယေဟောဝါရဲ့ ရန်သူတွေက သင့်ကို သတ်ပစ်မယ်လို့ ခြိမ်းခြောက်လာရင် သင့်အသက်ကို ယေဟောဝါလက်ထဲ ယုံကြည်စိတ်ချစွာ အပ်မလား။ အရေးကြုံတဲ့အခါ အဲဒီလို အပ်မလားဆိုတာ အခု ဘယ်လို သိနိုင်သလဲ။ သိနိုင်တဲ့ တစ်နည်းကတော့ ကိုယ့်ကိုယ်ကိုယ် ဒီမေးခွန်းတွေ မေးခြင်းအားဖြင့်ပဲ– ‘နေ့တိုင်း ငါ့ရဲ့ ဆုံးဖြတ်ချက် သေးသေးလေးတွေက ယေဟောဝါကို ယုံကြည်စိတ်ချကြောင်း ပြနေသလား။’ (လု. ၁၆:၁၀) ‘နိုင်ငံတော်ကို ဦးစားထားရင် လိုအပ်တဲ့ ရုပ်ပစ္စည်းတွေ ထောက်မပေးမယ်ဆိုတဲ့ ယေဟောဝါရဲ့ ကတိကို ယုံကြည်စိတ်ချကြောင်း ငါ့ရဲ့ ဘဝပုံစံက ဖော်ပြနေသလား။’ (မ. ၆:၃၁-၃၃) ပြနေတယ်လို့ ဖြေနိုင်တယ်ဆိုရင် ယေဟောဝါကို သင် ယုံကြည်ကိုးစားမှန်း သိနိုင်တယ်။ ဒါဆိုရင် အနာဂတ်မှာ ကြုံရမယ့် ဘယ်စမ်းသပ်မှုအတွက်မဆို အသင့်ဖြစ်နေပါလိမ့်မယ်။—ပညာ. ၃:၅၊ ၆။

ယေဟောဝါရဲ့ စိတ်ရှည်မှုကို ကျေးဇူးတင်လေးမြတ်ပါ

၁၇။ (က) ရှင်ပြန်ထမြောက်ခြင်းက ယေဟောဝါ စိတ်ရှည်ကြောင်း ဘယ်လို ဖော်ပြသလဲ။ (ခ) ယေဟောဝါရဲ့ စိတ်ရှည်မှုအတွက် ကျေးဇူးတင်ကြောင်း ဘယ်လို ပြနိုင်သလဲ။

^၁၇ ဒီစနစ်ဟောင်းကို အဆုံးတိုင်စေမယ့် နေ့နဲ့ အချိန်ကို ယေဟောဝါ သတ်မှတ်ပြီးပြီ။ (မ. ၂၄:၃၆) အဲဒီအချိန် မတိုင်ခင် စိတ်မရှည်ဘဲ အရေးယူလိုက်တာမျိုး လုပ်မှာ မဟုတ်ဘူး။ သေဆုံးသူတွေကို ထမြောက်ပေးချင်စိတ် ပြင်းပြနေပေမဲ့ စိတ်ရှည်တယ်။ (ယောဘ ၁၄:၁၄၊ ၁၅) အသက်ပြန်ရှင်ပေးဖို့ အကောင်းဆုံးအချိန် ရောက်တဲ့အထိ စောင့်နေတယ်။ (ယော. ၅:၂၈) ယေဟောဝါရဲ့ စိတ်ရှည်မှုအတွက် ကျေးဇူးတင်လေးမြတ်ဖို့ အကြောင်းကောင်းတွေ ရှိတယ်။ ယေဟောဝါ စိတ်ရှည်လို့ ကျွန်တော်တို့ အပါအဝင် လူများစွာ “နောင်တရ” ဖို့ အချိန်ရနေတယ်။ (၂ ပေ. ၃:၉) လူများနိုင်သမျှ များများကို ယေဟောဝါ ထာဝရအသက် ရစေချင်တယ်။ ဒါကြောင့် ဘုရားရဲ့ စိတ်ရှည်မှုအတွက် ကျေးဇူးတင်ကြောင်း ပြကြပါစို့။ ဘယ်နည်းနဲ့လဲ။ “ထာဝရအသက် ရဖို့ စိတ်ရင်းမှန်နဲ့ ကြိုးစားတဲ့သူတွေ” ကို အတတ်နိုင်ဆုံး ရှာဖွေခြင်း၊ ယေဟောဝါကို ချစ်ပြီး ဝတ်ပြုလာအောင် ကူညီပေးခြင်းအားဖြင့်ပါပဲ။ (တ. ၁၃:၄၈) ဒါဆိုရင် သူတို့လည်း ကျွန်တော်တို့လိုပဲ ယေဟောဝါရဲ့ စိတ်ရှည်မှုကနေ အကျိုးရပါလိမ့်မယ်။

၁၈။ တခြားသူတွေကို ဘာကြောင့် စိတ်ရှည်သင့်သလဲ။

^၁၈ အနှစ်တစ်ထောင် အကုန်မှာ ကျွန်တော်တို့ ပြည့်ဝစုံလင်လာတဲ့အထိ ယေဟောဝါ စိတ်ရှည်စွာ စောင့်ပါလိမ့်မယ်။ အဲဒီအချိန်အထိ ကျွန်တော်တို့ရဲ့ အပြစ်တွေကို ယေဟောဝါ လိုလိုလားလား ခွင့်လွှတ်ပေးမယ်။ ဒါကြောင့် ကျွန်တော်တို့လည်း ဘုရားကို တုပပြီး တခြားသူတွေရဲ့ ကောင်းကွက်ကို ရှာရမယ်။ သူတို့ကို စိတ်ရှည်ရမယ်။ ညီအစ်မတစ်ယောက်အကြောင်း စဉ်းစားကြည့်ပါ။ ခင်ပွန်းဖြစ်သူဟာ စိုးရိမ်စိတ်လွန် ဝေဒနာ ခံစားရပြီး အစည်းအဝေးတွေ မတက်တော့ဘူး။ “ကျွန်မအတွက် သိပ်ခက်တယ်။ အနာဂတ် မိသားစု အစီအစဉ်တွေ ပျက်သွားပြီ” လို့ ညီအစ်မ ပြောတယ်။ ဒါပေမဲ့ ခင်ပွန်းအပေါ် ဆက်စိတ်ရှည်တယ်။ ယေဟောဝါကို အားကိုးပြီး လက်မလျှော့ဘူး။ ယေဟောဝါလိုပဲ ပြဿနာကို ကျော်ကြည့်ပြီး ခင်ပွန်းရဲ့ ကောင်းကွက်တွေကို အာရုံစိုက်တယ်။ “သူ့မှာ အရည်အသွေးကောင်းတွေ အများကြီးပဲ။ ဝေဒနာ ပြန်သက်သာလာအောင် သူ့ခမျာလည်း ကြိုးစားရှာပါတယ်” လို့ ညီအစ်မ ပြောတယ်။ အခက်အခဲတွေကို ကျော်ဖြတ်ဖို့ ကြိုးစားနေတဲ့ မိသားစုဝင်တွေ၊ ညီအစ်ကို/မတွေကို စိတ်ရှည်ဖို့ သိပ်အရေးကြီးတယ်။

၁၉။ ဘာလုပ်ဖို့ စိတ်ပိုင်းဖြတ်ထားသင့်သလဲ။

^၁၉ ကမ္ဘာကို စဖန်ဆင်းတုန်းက ယေရှုနဲ့ ကောင်းကင်တမန်တွေ သိပ်ဝမ်းသာခဲ့တယ်။ ကမ္ဘာပေါ်မှာ ယေဟောဝါကို ချစ်ပြီး ဝတ်ပြုတဲ့ ပြည့်ဝစုံလင်သူတွေ ပြည့်နေတာကို တွေ့တဲ့အခါ သူတို့ ဘယ်လောက် ဝမ်းသာမလဲဆိုတာ မြင်ယောင်ကြည့်ပါ။ ခရစ်တော်နဲ့အတူ အုပ်ချုပ်ဖို့ လူသားတွေထဲကနေ ကောင်းကင်ကို ရွေးကောက်ခံရသူတွေလည်း မိမိတို့ရဲ့ လုပ်ဆောင်မှုကနေ လူတွေ အကျိုးရနေမှန်း မြင်ရတဲ့အခါ သိပ်ဝမ်းသာကြမယ်။ (ဗျာ. ၄:၄၊ ၉-၁၁။ ၅:၉၊ ၁၀) ဝမ်းနည်းမျက်ရည်အစား ဝမ်းသာမျက်ရည်ပဲ ရှိတော့မယ့်အချိန်၊ ဖျားနာမှု၊ ဝမ်းနည်းမှုနဲ့ သေခြင်း ထာဝစဉ် ပျောက်ကွယ်သွားမယ့်အချိန်မှာ အသက်ရှင်နေတာကို မြင်ယောင်ကြည့်ပါ။ (ဗျာ. ၂၁:၄) ဒါကြောင့် ယေဟောဝါရဲ့ မေတ္တာ၊ ဉာဏ်ပညာ၊ စိတ်ရှည်မှုကို တုပဖို့ စိတ်ပိုင်းဖြတ်ထားပါ။ ဒါဆိုရင် ဘယ်လို အခက်အခဲပဲ ကြုံရပါစေ ဆက်ဝမ်းမြောက်နေနိုင်ပါလိမ့်မယ်။ (ယာ. ၁:၂-၄) “ရှင်ပြန်ထမြောက်လာမယ်” ဆိုတဲ့ ယေဟောဝါရဲ့ ကတိအတွက် သိပ်ကျေးဇူးတင်စရာပါပဲ။—တ. ၂၄:၁၅။