ဟေရှာယ ၄၁:၁၀—“မကြောက်နဲ့။ မင်းနဲ့အတူ ငါရှိတယ်”

“မကြောက်နဲ့။ မင်းနဲ့အတူ ငါရှိတယ်။ မစိုးရိမ်နဲ့။ ငါဟာ မင်းရဲ့ ဘုရားသခင်ပါ။ မင်းကို ခိုင်ခံ့စေမယ်၊ ကူညီပေးမယ်။ ဖြောင့်မတ်တဲ့ ညာလက်နဲ့ မြဲမြဲကိုင်ထားမယ်။”—ဟေရှာယ ၄၁:၁၀၊ ကမ္ဘာသစ် ဘာသာပြန်ကျမ်း။

“မစိုးရိမ်နှင့်။ ငါသည် သင့်ဘက်မှာ ရှိ၏။ မကြောက်နှင့်။ သင်၏ဘုရားသခင် ငါသည် သင့်ကို ခိုင်ခံ့စေမည်။ သင့်ကို စောင့်မမည်။ ငါ့သစ္စာလက်ယာလက်ဖြင့် ထောက်ပင့်မည်။”—ဟေရှာယ ၄၁:၁၀၊ ယုဒသန်ကျမ်း။

ဟေရှာယ ၄၁:၁၀ ရဲ့ အဓိပ္ပာယ်

ယေဟောဝါa ဘုရားက သစ္စာရှိတဲ့ ဝတ်ပြုသူတွေကို ဘာအခက်အခဲပဲ ကြုံရပါစေ ကူညီထောက်မမယ်လို့ အာမခံတယ်။

“မင်းနဲ့အတူ ငါရှိတယ်။” ယေဟောဝါက မိမိကို ဝတ်ပြုသူတွေ မကြောက်သင့်တဲ့ အကြောင်းရင်းကို ပြောတယ်။ သူတို့ တစ်ယောက်တည်း ဖြစ်နေမှာ မဟုတ်လို့ပါ။ ဘုရားသခင်က သူတို့ ခံရတဲ့ ဒုက္ခကို မြင်တယ်။ သူတို့ဆုတောင်းသံကို ကြားတယ်။ ဒါဟာ သူတို့အနားမှာ ယေဟောဝါ ရှိနေတဲ့ သဘောပါပဲ။—ဆာလံ ၃၄:၁၅။ ၁ ပေတရု ၃:၁၂။

“ငါဟာ မင်းရဲ့ဘုရားသခင်ပါ။” ယေဟောဝါက ဘယ်အခြေအနေမှာမဆို မိမိကို ဝတ်ပြုသူတွေရဲ့ ဘုရားသခင် ဖြစ်နေဆဲပဲ၊ မိမိလူတွေအဖြစ် လက်ခံနေဆဲပဲလို့ မိန့်ဆိုတယ်။ သူတို့ကို မကူညီရအောင် ဘာကမှ မတားဆီးနိုင်ဘူးဆိုတာ ယုံကြည်စိတ်ချနိုင်တယ်။—ဆာလံ ၁၁၈:၆။ ရောမ ၈:၃၂။ ဟီဘရူး ၁၃:၆။

“မင်းကို ခိုင်ခံ့စေမယ်၊ ကူညီပေးမယ်။ ဖြောင့်မတ်တဲ့ ညာလက်နဲ့ မြဲမြဲကိုင်ထားမယ်။” ယေဟောဝါက မိမိလူတွေကို ကူညီထောက်မမှာ ဖြစ်ကြောင်း ဒီစကားစု သုံးခုနဲ့ အလေးပေးဖော်ပြတယ်။ မိမိလူတွေ အကူအညီ လိုအပ်ချိန်မှာ ဘယ်လို တုံ့ပြန်မယ်ဆိုတာ မြင်သာအောင် တင်စားချက် သုံးထားတယ်။ တစ်ယောက်ယောက် လဲကျတဲ့အခါ ဘုရားသခင်က ညာလက်ကို ကမ်းပေးပြီး ဆွဲထူနိုင်တယ်။—ဟေရှာယ ၄၁:၁၃။

မိမိလူတွေကို ယေဟောဝါ ခွန်အားပေး ထောက်မတဲ့ အဓိကနည်းကတော့ သမ္မာကျမ်းစာအားဖြင့်ပါပဲ။ (ယောရှု ၁:၈။ ဟီဘရူး ၄:၁၂) ဥပမာ၊ ကျမ်းစာမှာ နွမ်းပါးမှု၊ အဖျားအနာ၊ ချစ်ရသူ သေဆုံးတာစတဲ့ အခက်အခဲတွေ ရင်ဆိုင်နေရသူတို့အတွက် လက်တွေ့ကျ အကြံဉာဏ်တွေ ပါတယ်။ (ပညာအလိမ္မာ ၂:၆၊ ၇) စမ်းသပ်မှုတွေ ခံရပ်နိုင်ဖို့ သန့်ရှင်းသော စွမ်းအားတော်ကတစ်ဆင့် စိတ်ဓာတ်ခွန်အား ပေးနိုင်တယ်။—ဟေရှာယ ၄၀:၂၉။ လုကာ ၁၁:၁၃။

ဟေရှာယ ၄၁:၁၀ အထက်အောက်စကား

ဒီစကားတွေဟာ နောက်ပိုင်း ဗာဗုလုန်ကို ပြည်နှင်ခံရမယ့် သစ္စာရှိ ဂျူးတွေအတွက် နှစ်သိမ့်မှု ဖြစ်စေတယ်။ ဂျူးတွေ ပြည်နှင်ခံဘဝ ပြီးဆုံးခါနီးမှာ အုပ်စိုးရှင်တစ်ဦး ဝန်းကျင်နိုင်ငံတွေကို ချေမှုန်းပြီး ဗာဗုလုန်ကိုပါ ခြိမ်းခြောက်မယ်ဆိုတဲ့ သတင်း ထွက်ပေါ်မယ်လို့ ယေဟောဝါ ကြိုဟောတယ်။ (ဟေရှာယ ၄၁:၂-၄။ ၄၄:၁-၄) ဒီသတင်းကြောင့် ဗာဗုလုန်နဲ့ ဝန်းကျင်လူမျိုးတွေ ကြောက်လန့်သွားပေမဲ့ ဂျူးတွေကတော့ မကြောက်ကြဘူး။ ယေဟောဝါ ကာကွယ်မှာ ဖြစ်လို့ပဲ။ “မကြောက်နဲ့” ဆိုပြီး သုံးကြိမ်တိုင်တိုင် အာမခံတယ်။—ဟေရှာယ ၄၁:၅၊ ၆၊ ၁၀၊ ၁၃၊ ၁၄။

ဟေရှာယ ၄၁:၁၀ ပါ ယေဟောဝါရဲ့ စကားတွေက သစ္စာရှိ ဂျူးတွေ ပြည်နှင်ခံရချိန်မှာ တိုက်ရိုက် သက်ဆိုင်ပေမဲ့ သစ္စာရှိ ကျေးကျွန်အားလုံးနဲ့လည်း သက်ဆိုင်ပါတယ်။ (ဟေရှာယ ၄၀:၈။ ရောမ ၁၅:၄) ဘုရားသခင်က အရင်တုန်းက မိမိကျေးကျွန်တွေကို ကူညီခဲ့သလိုပဲ ဒီနေ့လည်း ကူညီနေပါတယ်။