ယောဟန် ၁၆:၃၃—“ငါသည် လောကကို အောင်ပြီ”

“ကျွန်တော့်ကြောင့် ခင်ဗျားတို့ ငြိမ်သက်ခြင်း ခံစားရအောင် ဒါတွေကို ပြောပြနေတာ။ ဒီလောကမှာ ခင်ဗျားတို့ ဆင်းရဲဒုက္ခ ခံရလိမ့်မယ်။ ဒါပေမဲ့ သတ္တိရှိကြပါ။ ဒီလောကကို ကျွန်တော် အောင်နိုင်ပြီ” လို့ ပြောတယ်။”—ယောဟန် ၁၆:၃၃။ ကမ္ဘာသစ်ဘာသာပြန်ကျမ်း။

“သင်တို့သည် ငါ့ကို အမှီပြု၍ ငြိမ်သက်ခြင်း ရှိစေခြင်းငှာ ဤစကားကို ငါဟောပြောပြီ။ သင်တို့သည် လောက၌ ဆင်းရဲဒုက္ခကို ခံရကြလိမ့်မည်။ သို့သော်လည်း မစိုးရိမ်ကြနှင့်။ ငါသည် လောကကို အောင်ပြီဟု မိန့်တော်မူ၏။”—ယောဟန် ၁၆:၃၃။ ယုဒသန်ကျမ်း။

ယောဟန် ၁၆:၃၃ ရဲ့ အဓိပ္ပာယ်

ယေရှုက မိမိရဲ့ နောက်လိုက်တွေဟာ စမ်းသပ်မှု၊ အတိုက်အခံတွေ ကြုံရရင်တောင် ဘုရားနှစ်သက်မှု ရနိုင်တယ်ဆိုတာ ဒီစကားတွေနဲ့ နှစ်သိမ့်ပေးနေတာပါ။

“ကျွန်တော့်ကြောင့်a ခင်ဗျားတို့ ငြိမ်သက်ခြင်း ခံစားရအောင် ဒါတွေကို ပြောပြနေတာ။” နောက်ကျမ်းပိုဒ်တွေအရ ဒီငြိမ်သက်ခြင်းဆိုတာ ဘဝမှာ ပဋိပက္ခ ကင်းတာကို မဆိုလိုဘူး။ စိတ်ငြိမ်သက်အေးချမ်းမှု ရှိခြင်းကို ဆိုလိုတယ်။ ယေရှုကြောင့်သာ ရရှိခံစားနိုင်မယ့် စိတ်ငြိမ်သက်မှုမျိုးပါ။ ယေရှုက တပည့်တွေဆီ သန့်ရှင်းသော စွမ်းအားတော်ကို လွှတ်လိုက်မယ်လို့လည်း ကတိပေးတယ်။ “ကူညီသူ” ဖြစ်တဲ့ အဲဒီစွမ်းအားတော်က တပည့်တွေ ဘာအခက်အခဲ ကြုံရပါစေ ရင်ဆိုင်ကျော်လွှားနိုင်ဖို့ ကူညီပေးမှာ ဖြစ်တယ်။—ယောဟန် ၁၄:၁၆၊ ၂၆၊ ၂၇။

“ဒီလောကမှာ ခင်ဗျားတို့ ဆင်းရဲဒုက္ခခံရလိမ့်မယ်။ ဒါပေမဲ့ သတ္တိရှိကြပါ။” ယေရှုက မတရားမှု၊ နှိပ်စက်ညှဉ်းပန်းမှုစတဲ့ စမ်းသပ်မှုတွေကို တပည့်တွေ ကြုံရမယ့်အကြောင်း ပွင့်ပွင့်လင်းလင်း ပြောပြတယ်။ (မဿဲ ၂၄:၉။ ၂ တိမောသေ ၃:၁၂) ဒါပေမဲ့ သူတို့ “သတ္တိရှိ” ရမယ်၊ စိတ်မပျက်ရဘူး။—ယောဟန် ၁၆:၃၃။

“ဒီလောကကို ကျွန်တော် အောင်နိုင်ပြီ။” ဒီ “လောက” ဆိုတာ ဘုရားနဲ့ ဆက်ဆံရေးကောင်း မရှိတဲ့၊ မဖြောင့်မတ်တဲ့ လူ့အဖွဲ့အစည်းကို ရည်ညွှန်းတယ်။b ‘တစ်လောကလုံးကတော့ ဆိုးညစ်သူ[စာတန်]ရဲ့ ဩဇာအောက်မှာ ရှိနေတယ်’ လို့ ၁ ယောဟန် ၅:၁၉ မှာ ဖော်ပြထားတယ်။ ဒါကြောင့်လည်း ဒီ “လောက” သားတွေရဲ့ စဉ်းစားလုပ်ကိုင်ပုံတွေဟာ ဘုရားအလိုတော်နဲ့ မညီဘူး။—၁ ယောဟန် ၂:၁၅-၁၇။

ဘုရားသခင်အကြောင်း လူတွေကို သင်ပေးခြင်း၊ မိမိရဲ့ စုံလင်တဲ့ အသက်ကို “ရွေးဖိုးအဖြစ်” ပေးခြင်းဆိုတဲ့ ဘုရားပေး တာဝန်တွေကို ယေရှု မပြီးမြောက်နိုင်အောင် စာတန်နဲ့ သူ့လောကက နည်းအမျိုးမျိုးနဲ့ တားဆီးခဲ့ကြတယ်။ (မဿဲ ၂၀:၂၈။ လုကာ ၄:၁၃။ ယောဟန် ၁၈:၃၇) ဒါပေမဲ့ ယေရှုက ဒီလောကရဲ့ ဩဇာလွှမ်းမှုကို မခံဘူး။ ဘုရားကို ကျောခိုင်းမသွားဘူး။ သေတဲ့အထိ သစ္စာစောင့်သိခဲ့တယ်။ ဒါကြောင့် ဒီလောကကို အောင်နိုင်ပြီ၊ “ဒီလောကရဲ့ မင်း” စာတန်က မိမိကို “မချုပ်ကိုင်နိုင်ပါဘူး” လို့ ယေရှု ပြောနိုင်ခဲ့တယ်။—ယောဟန် ၁၄:၃၀။

နောက်လိုက်တွေလည်း စမ်းသပ်မှု ကြုံရတဲ့အခါ ဘုရားအပေါ် သစ္စာစောင့်သိနိုင်တယ်ဆိုတာကို ယေရှုကိုယ်တိုင် စံနမူနာ ပြခဲ့တယ်။ “ဒီလောကကို ကျွန်တော် အောင်နိုင်ရင် ခင်ဗျားတို့လည်း အောင်နိုင်ပါတယ်” လို့ ပြောနေတာပါ။

ယောဟန် ၁၆:၃၃ ရဲ့ အထက်အောက်စကား

ယေရှုက မသေဆုံးခင်ညမှာ အဲဒီစကားတွေကို ပြောခဲ့တာပါ။ သေဆုံးချိန် နီးပြီဆိုတာ သိထားတဲ့အတွက် သစ္စာရှိ တမန်တော်တွေကို နောက်ဆုံး မှာကြားနေတာ ဖြစ်တယ်။ သူ့ကို နောက်ဆို “မြင်ရတော့မှာ မဟုတ်ဘူး၊” တပည့်တွေလည်း ညှဉ်းဆဲခံရပြီး အသတ်တောင် ခံရမယ်ဆိုတဲ့ အမှန်တရားတွေ ပါတယ်။ (ယောဟန် ၁၅:၂၀။ ၁၆:၂၊ ၁၀) ဒီစကားတွေကြောင့် တမန်တော်တွေ ထိတ်လန့်သွားမယ်ဆိုတာ သိလို့ ယောဟန် ၁၆:၃၃ ပါ စကားတွေနဲ့ အားပေးနှစ်သိမ့်ခဲ့တယ်။

ယေရှုရဲ့ စကားနဲ့ စံနမူနာက အခုခေတ် နောက်လိုက်တွေအတွက် အားရှိစရာပါပဲ။ ခရစ်ယာန်အားလုံးဟာ ဒုက္ခဆင်းရဲ ကြုံရပေမဲ့ ဘုရားအပေါ် ဆက်သစ္စာရှိနိုင်ပါတယ်။