ကျမ်းပိုဒ် ရှင်းပြချက်များ
ဟေရှာယ ၄၀:၃၁—“ယေဟောဝါကို မျှော်လင့်တဲ့သူတွေကတော့ ခွန်အား ပြန်ပြည့်လာလိမ့်မယ်”
“ယေဟောဝါကို မျှော်လင့်တဲ့သူတွေကတော့ ခွန်အား ပြန်ပြည့်လာလိမ့်မယ်။ လင်းယုန်လို တောင်ပံဖြန့်ပြီး ပျံဝဲနေလိမ့်မယ်။ ပြေးတဲ့အခါ မောပန်းမှာ မဟုတ်ဘူး။ လမ်းလျှောက်ရင်လည်း ပင်ပန်းမှာ မဟုတ်ဘူး။”—ဟေရှာယ ၄၀:၃၁။ ကမ္ဘာသစ်ဘာသာပြန်ကျမ်း။
“ထာဝရဘုရားကို မျှော်လင့်သောသူတို့မူကား အားပြည့်ကြလိမ့်မည်။ ရွှေလင်းတကဲ့သို့ မိမိတို့အတောင်ကို အသစ်ပြုပြင်ကြလိမ့်မည်။ ပြေးသော်လည်း မပင်ပန်း၊ ခရီးသွားသောအခါ မမောရကြ။”—ဟေရှာယ ၄၀:၃၁။ ယုဒသန်ကျမ်း။
ဟေရှာယ ၄၀:၃၁ ရဲ့ အဓိပ္ပာယ်
ယေဟောဝါaဘုရားက မိမိကို ဝတ်ပြုသူတွေ ကြုံရနိုင်တဲ့ ဘယ်အခက်အခဲကိုမဆို ကျော်လွှားနိုင်ဖို့၊ ခံနိုင်ရည် ရှိစေဖို့ လိုအပ်တဲ့ ခွန်အား ပေးမယ်လို့ အာမခံတယ်။
“ယေဟောဝါကို မျှော်လင့်တဲ့သူတွေကတော့ ခွန်အား ပြန်ပြည့်လာလိမ့်မယ်။” ယေဟောဝါဘုရားရဲ့ ကူညီပေးနိုင်စွမ်း၊ ကူညီပေးချင်စိတ်ကို ယုံကြည်စိတ်ချစွာ မျှော်လင့်သူတွေကို ဘုရား ကူညီထောက်မပေးမယ်ဆိုတာ စိတ်ချနိုင်တယ်။ (ပညာအလိမ္မာ ၃:၅၊ ၆) ဘုရားက မိမိကို ဝတ်ပြုသူတွေကို သန့်ရှင်းသော စွမ်းအားတော်ကတစ်ဆင့် ခွန်အားပေးနိုင်တယ်။—လုကာ ၁၁:၁၃။
“လင်းယုန်လို တောင်ပံဖြန့်ပြီး ပျံဝဲနေလိမ့်မယ်။” ဒီတင်စားချက်က လူတစ်ဦးအပေါ် ဘုရားပေး အစွမ်းခွန်အား သက်ရောက်မှု ရှိနိုင်ပုံကို ပေါ်လွင်စေတယ်။ လင်းယုန်က လေဆန်ကြောလို့ ခေါ်တဲ့ လေနွေးစီးကြောင်းကို အားပြုပြီး အမြင့်ကို ဆန်တက်ပျံဝဲတယ်။ လေဆန်ကြောတစ်ခုဆီ ရောက်တာနဲ့ အတောင်ကို ဖြန့်ကားပြီး စက်ဝိုင်းပုံ လှည့်ပတ်ပျံဝဲရင်း မြင့်သည်ထက် မြင့်အောင် ပျံတက်တယ်။ လင်းယုန်တွေဟာ လေဆန်ကြော တစ်ခုပြီးတစ်ခု ပြောင်းရင်း လေထဲမှာ နာရီနဲ့ချီ ပျံဝဲနိုင်တယ်။ ဒီနည်းနဲ့ ခွန်အား သိပ်မကုန်ဘဲ လိုရာခရီးဆီ ရောက်သွားနိုင်တယ်။
“ပြေးတဲ့အခါ မောပန်းမှာ မဟုတ်ဘူး။” ဘဝမှာ ကြုံရတဲ့ အခက်အခဲတွေကြောင့် စိတ်ပန်းလူပန်းပြီး အားလျော့သွားနိုင်တယ်။ ဒါပေမဲ့ ဘုရားပေး ခွန်အားနဲ့ ခံရပ်နိုင်ကြပါတယ်။ ကြီးမားတဲ့ အခက်အခဲတွေကြား မှန်ရာကို လုပ်နိုင်ဖို့ ခွန်အားရှိစေနိုင်တယ်။ “ကျွန်တော့်ကို အစွမ်းခွန်အား ပေးတဲ့ ဘုရားသခင်ကြောင့် အရာရာကို စွမ်းဆောင်နိုင်လို့ပဲ” ဆိုပြီး တမန်တော် ပေါလု ရေးတယ်။—ဖိလိပ္ပိ ၄:၁၃။
ဟေရှာယ ၄၀:၃၁ ရဲ့ အထက်အောက်စကား
ဒီကျမ်းစကားတွေကို ဘီစီ ရှစ်ရာစုမှာ ပရောဖက် ဟေရှာယက စွမ်းအားတော် လမ်းညွှန်မှုနဲ့ ရေးခဲ့တာပါ။ ဒီကျမ်းစကားက ဘုရားကို သစ္စာရှိရှိ ဝတ်ပြုသူအားလုံးနဲ့ သက်ဆိုင်တယ်။ ယေဟောဝါဘုရားက ဗာဗုလုန်ဆီ အနှစ် ၇၀ ပြည်နှင်ခံရသူတွေကို အားပေးဖို့ ဒီစကားတွေကို ရေးစေခဲ့တာ ဖြစ်နိုင်တယ်။ ဂျုးတွေဟာ ပြည်နှင်ခံဘဝကနေ နေရင်းပြည်ဆီ ပြန်လာတဲ့အခါ ဒီကျမ်းစကား ပြည့်စုံမှုကို ခံစားခဲ့ကြတယ်။ (ဟေရှာယ ၄၀:၁-၃) ဘုရားသခင်က ဘီစီ ၅၃၇ မှာ ဗာဗုလုန်ကနေ ဂျေရုဆလင်ဆီ ရှည်လျားကြမ်းတမ်းတဲ့ လမ်းကြောင်းတစ်လျှောက်b အဆုံးထိ ခရီးနှင်နိုင်ဖို့ ခွန်အားပေးခဲ့တယ်။—ဟေရှာယ ၄၀:၂၉။
a ယေဟောဝါဆိုတာ ဘုရားသခင်ရဲ့ နာမည်ဖြစ်တယ်။—ဆာလံ ၈၃:၁၈။
b ပြည်နှင်ခံတွေရဲ့ ပြန်လာတဲ့ လမ်းကြောင်းက ကီလိုမီတာ ၁,၆၀၀ ကျော် (မိုင် ၁,၀၀၀) ရှိနိုင်တယ်။