ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
ဇူလိုင် ၂-၈
ကျမ်းစာထဲက အဖိုးတန်ဘဏ္ဍာများ | လုကာ ၆-၇
“ရက်ရက်ရောရော ချိန်ပေးလိုက်ပါ”
(လုကာ ၆:၃၇) “သူတစ်ပါးကို ဝေဖန်အကဲဖြတ်တာမျိုး မလုပ်ပါနဲ့တော့။ ဒါမှ ကိုယ်တိုင် အကဲဖြတ်ခံရတော့မှာ မဟုတ်ဘူး။ သူတစ်ပါးကို အပြစ်တင်တာမျိုး မလုပ်ပါနဲ့တော့။ ဒါမှ ကိုယ်တိုင် အပြစ်တင်ခံရတော့မှာ မဟုတ်ဘူး။ အမြဲခွင့်လွှတ်ပါ။ ဒါမှ ကိုယ်တိုင် ခွင့်လွှတ်ခံရလိမ့်မယ်။
nwtsty လု ၆:၃၇ လေ့လာမှု မှတ်စု
အမြဲခွင့်လွှတ်ပါ။ ဒါမှ ကိုယ်တိုင် ခွင့်လွှတ်ခံရလိမ့်မယ်- ဒါမှမဟုတ် “အမြဲလွှတ်ပေးပါ။ ဒါမှ ကိုယ်တိုင် လွှတ်ခံရလိမ့်မယ်။” “ခွင့်လွှတ်ပါ” လို့ပြန်ဆိုတဲ့ ဂရိစကားက စာသားအရ “လွှတ်ပေးတာ၊ (ဥပမာ၊ အကျဉ်းသားကို) လွတ်ပေးတာ” ကို ဆိုလိုတယ်။ ဒီကျမ်းချက်မှာတော့ ဝေဖန်အကဲဖြတ်တာ၊ အပြစ်တင်တာနဲ့ ပတ်သက်ရင် ဒဏ်ခတ်သင့်၊ လက်စားချေသင့်တာတောင် ကင်းလွတ်ခွင့်ပေးသင့်၊ ခွင့်လွှတ်သင့်တဲ့သဘော သက်ရောက်တယ်။
ဆက်၍ကောင်းမှုပြုပါ
၁၃ မဿဲ၏သတင်းကောင်းကျမ်းစောင်က ယေရှုမိန့်တော်မူချက်ကို ဤသို့ဖော်ပြ၏– “သင်တို့သည် စစ်ကြောဆုံးဖြတ်ခြင်းနှင့် ကင်းလွတ်မည်အကြောင်း သူတစ်ပါး၏အမှု၌ စစ်ကြောဆုံးဖြတ်ခြင်းကို မပြုကြနှင့်။” (မ. ၇:၁) လုကာကျမ်းအရ ယေရှု ဤသို့မိန့်ဆို၏– “သူတစ်ပါး၏အမှု၌ စစ်ကြောဆုံးဖြတ်ခြင်းကိုမပြုကြနှင့်။ မပြုလျှင် သင်တို့သည် စစ်ကြောဆုံးဖြတ်ခြင်းနှင့် ကင်းလွတ်ကြလိမ့်မည်။ သူတစ်ပါးကို အပြစ်မစီရင်ကြနှင့်။ မစီရင်လျှင် သင်တို့သည် အပြစ်စီရင်ခြင်းနှင့် ကင်းလွတ်ကြလိမ့်မည်။ သူ့အပြစ်ကိုလွှတ်ကြလော့။ လွှတ်လျှင် ကိုယ်အပြစ်လွတ်လိမ့်မည်။” (လု. ၆:၃၇) ပထမရာစုမှ ဖာရိရှဲတို့သည် ကျမ်းစာနှင့်မညီသော ထုံးတမ်းဓလေ့များပေါ်အခြေပြုကာ တခြားသူတို့ကို ပြင်းပြင်းထန်ထန်စီရင်ဆုံးဖြတ်ခဲ့ကြသည်။ ယေရှုစကား နားထောင်နေသူတို့ထဲတွင် ထိုသို့ပြုခဲ့ကြသူမည်သူမဆိုသည် “သူတစ်ပါး၏အမှု၌ စစ်ကြောဆုံးဖြတ်ခြင်းကို မပြုကြ” တော့ရန်ဖြစ်သည်။ ယင်းအစား သူတို့သည် အခြားသူများ၏ အပြစ်အနာအဆာများကို ခွင့်လွှတ်ခြင်းအားဖြင့် “အပြစ်ကိုလွှတ်ကြ” ရန်ဖြစ်သည်။ တမန်တော်ပေါလုက ခွင့်လွှတ်ခြင်းနှင့်ပတ်သက်၍ အလားတူဆုံးမစကားကို ဆိုခဲ့သည်။
၁၄ ယေရှုတပည့်များ၏ခွင့်လွှတ်မှုက လူများကိုလည်း ခွင့်လွှတ်တတ်ရန် လှုံ့ဆော်ပေမည်။ “သင်တို့သည် အကြင်တရားအတိုင်း သူတစ်ပါးကိုစီရင်ကြ၏။ ထိုတရားအတိုင်း စီရင်ခြင်းကိုခံရကြမည်။ အကြင်ချိန်၊ တင်းပမာဏနှင့် သူတစ်ပါးအားပေး၏၊ ထိုပမာဏအတိုင်း ကိုယ်ခံရကြမည်။” (မ. ၇:၂) အခြားသူတို့အား ကျွန်ုပ်တို့၏ဆက်ဆံပုံနှင့်အညီ ကျွန်ုပ်တို့ ဆက်ဆံခံရကြသည်။—ဂလ. ၆:၇။
(လုကာ ၆:၃၈) ပေးကမ်းတတ်တဲ့အကျင့် လုပ်ပါ။ ခင်ဗျားတို့ကို ပြန်ပေးကမ်းကြလိမ့်မယ်။ ခင်ဗျားတို့ရဲ့ အင်္ကျီအိတ်ထဲ ရက်ရက်ရောရော ထည့်ပေးရုံမက ဖိသိပ်လှုပ်ခါပြီး ပြည့်လျှံနေအောင် ပေးကြလိမ့်မယ်။ ကိုယ်ချိန်ပေးလိုက်တဲ့ ပမာဏအတိုင်း ပြန်ရမှာဖြစ်လို့ပဲ။”
nwtsty လု ၆:၃၈ လေ့လာမှု မှတ်စု
ပေးကမ်းတတ်တဲ့အကျင့် လုပ်ပါ– ဒါမှမဟုတ် “ဆက်ပေးကမ်းပါ။” ဒီမှာပါတဲ့ ဂရိကြိယာက “ပေးတယ်” ဆိုတဲ့ အဓိပ္ပာယ်ရှိပြီး ဆက်ပေးတာကို ဆိုလိုတယ်။
(လုကာ ၆:၃၈) ပေးကမ်းတတ်တဲ့အကျင့် လုပ်ပါ။ ခင်ဗျားတို့ကို ပြန်ပေးကမ်းကြလိမ့်မယ်။ ခင်ဗျားတို့ရဲ့ အင်္ကျီအိတ်ထဲ ရက်ရက်ရောရော ထည့်ပေးရုံမက ဖိသိပ်လှုပ်ခါပြီး ပြည့်လျှံနေအောင် ပေးကြလိမ့်မယ်။ ကိုယ်ချိန်ပေးလိုက်တဲ့ ပမာဏအတိုင်း ပြန်ရမှာဖြစ်လို့ပဲ။”
nwtsty လု ၆:၃၈ လေ့လာမှု မှတ်စု
ခင်ဗျားတို့ရဲ့ အင်္ကျီအိတ်– စာသားအရ ဒီဂရိစကားလုံးက “သင့်ရင်ဘတ်” ဆိုတဲ့ အဓိပ္ပာယ်ရှိတယ်။ တကယ်တော့ ခပ်ပွပွဝတ်တတ်တဲ့ အပေါ်ဝတ်ရုံကို ခါးစည်းလိုက်တဲ့အခါ အိတ်လိုဖြစ်သွားတာကို ဆိုလိုတယ်။ ‘အင်္ကျီအိတ်ထဲထည့်ပေး’ ဆိုတာဟာ ကုန်သည်တချို့က ဝယ်တဲ့ပစ္စည်းတွေကို အဲဒီအိတ်ထဲ ထည့်ပေးတတ်တဲ့ ထုံးစံကို ဆိုလိုတာ ဖြစ်နိုင်တယ်။
ရှာဖွေလေ့လာ ဘုရားရေးရာရတနာ
(လုကာ ၆:၁၂၊ ၁၃) “တစ်နေ့မှာ ယေရှုက ဆုတောင်းဖို့ တောင်ပေါ်ကို တက်သွားပြီး ဘုရားသခင်ဆီ တစ်ညလုံး ဆုတောင်းတယ်။ ၁၃ မနက်မိုးလင်းတဲ့အခါ တပည့်တွေကို ခေါ်လိုက်တယ်။ သူတို့ထဲက ၁၂ ယောက်ကို ရွေးပြီး တမန်တော်တွေလို့ ခေါ်တယ်။
စစ်မှန်တဲ့ ဘုရားတရားစိတ်ထား—ဘယ်မှာ ရှာတွေ့နိုင်မလဲ
ယေရှုဟာ မကြာခဏ အကြာကြီးဆုတောင်းခဲ့တယ်။ (ယောဟန် ၁၇:၁-၂၆) ဥပမာ၊ တမန်တော် ၁၂ ယောက်ကို မရွေးခင် “ယေရှုက ဆုတောင်းဖို့ တောင်ပေါ်ကို တက်သွားပြီး ဘုရားသခင်ဆီ တစ်ညလုံး ဆုတောင်းတယ်။” (လုကာ ၆:၁၂) ဘုရားတရားစိတ်ထားရှိသူတွေဟာ ယေရှုလို တစ်ညလုံး ဆုမတောင်းပေမဲ့ သူ့ပုံသက်သေကို အတုယူကြတယ်။ ဘဝမှာ အရေးကြီးတဲ့ ဆုံးဖြတ်ချက်တွေ မချခင် အချိန်ယူဆုတောင်းတယ်၊ သန့်ရှင်းသောစွမ်းအားတော် လမ်းပြညွှန်ကြားမှုကို တောင်းခံပြီး ဆုံးဖြတ်ကြတယ်။
(လုကာ ၇:၃၅) ဘာပဲပြောပြော၊ ဉာဏ်ပညာဟာ ဖြောင့်မတ်တယ်ဆိုတာကို လုပ်ရပ်တွေ [“သားသမီးနဲ့၊” အောက်ခြေမှတ်ချက်] နဲ့ သက်သေပြလိမ့်မယ်။”
nwtsty လု ၇:၃၅၊ အောက်ခြေမှတ်ချက် လေ့လာမှု မှတ်စု
သားသမီးနဲ့– ဒါမှမဟုတ် “လုပ်ရပ်တွေနဲ့။” ဒီမှာ ဉာဏ်ပညာကို လူပုဂ္ဂိုလ်အလား တင်စားပြီး သားသမီးတွေ ရှိတယ်လို့ ဖော်ပြထားတယ်။ ကျမ်းပြိုင်ဖြစ်တဲ့ မ ၁၁:၁၉ မှာတော့ ဉာဏ်ပညာမှာ “လုပ်ရပ်တွေ” ရှိတယ်လို့ ဖော်ပြထားတယ်။ နှစ်ခြင်းပေးသူ ယောဟန်နဲ့ ယေရှု ပြခဲ့တဲ့ သက်သေသာဓကတွေဟာ ဉာဏ်ပညာရဲ့ သားသမီးတွေ ဒါမှမဟုတ် လုပ်ရပ်တွေဖြစ်တယ်။ သူတို့ကို စွပ်စွဲတာတွေ မှားတယ်ဆိုတာ အဲဒီလုပ်ရပ်တွေက ဖော်ပြတယ်။ ယေရှုက ‘ဖြောင့်မတ်တဲ့ လုပ်ရပ်တွေနဲ့ အကျင့်တွေကို ကြည့်ပါ။ သူတို့ စွပ်စွဲချက်တွေ မှားမှန်း သိရလိမ့်မယ်’ လို့ပြောနေတာ ဖြစ်တယ်။
ကျမ်းစာဖတ်ရှုခြင်း
(လုကာ ၇:၃၆-၅၀) ဖာရိရှဲတစ်ယောက်က အတူစားသောက်ဖို့ ဖိတ်ခေါ်တဲ့အတွက် ယေရှုလည်း သူ့အိမ်ထဲဝင်ပြီး စားပွဲမှာ ထိုင်တယ်။ ၃၇ အပြစ်များသူအဖြစ် သိထားကြတဲ့ အမျိုးသမီးတစ်ယောက်က အဲဒီအိမ်မှာ ယေရှု စားသောက်နေမှန်း သိသွားတဲ့အခါ ဆီမွှေးထည့်ထားတဲ့ ကျောက်ဖြူဘူးကို ယူလာတယ်။ ၃၈အဲဒီနောက် ယေရှုရဲ့ ခြေရင်းနားမှာ ဒူးထောက်ပြီး တရှုံ့ရှုံ့ ငိုနေတယ်။ ယေရှုရဲ့ခြေထောက်မှာ မျက်ရည်စိုသွားတော့ ဆံပင်နဲ့သုတ်ပေးတယ်။ ခြေထောက်ကို နမ်းပြီး ဆီမွှေးလောင်းတယ်။ ၃၉ ယေရှုကိုဖိတ်ခေါ်တဲ့ ဖာရိရှဲက ဒါကိုမြင်တဲ့အခါ “ဒီလူသာ ပရောဖက်မှန်ရင် သူ့ခြေထောက်ကိုကိုင်တဲ့ မိန်းမဟာ ဘယ်သူလဲဆိုတာ သိမှာပဲ။ သူဟာ အပြစ်များတဲ့သူဖြစ်မှန်း ဒီလူ မသိဘူးလား’ ဆိုပြီး တွေးနေတယ်။ ၄၀ ဒါကြောင့် ယေရှုက “ရှိမုန်၊ ခင်ဗျားကို ကျွန်တော် ပြောစရာတစ်ခု ရှိတယ်” ဆိုတော့ “ပြောပါ၊ ဆရာ” လို့ သူဖြေတယ်။ ၄၁ “ကြွေးရှင်တစ်ယောက်ဆီမှာ အကြွေးတင်နေတဲ့ လူနှစ်ယောက် ရှိတယ်။ တစ်ယောက်က ဒေနာရိ ၅၀၀၊ နောက်တစ်ယောက်က ၅၀ အကြွေးတင်နေတယ်။ ၄၂ သူတို့မှာ ကြွေးဆပ်စရာမရှိတော့ ကြွေးရှင်က သူတို့နှစ်ယောက်ရဲ့အကြွေးကို တစ်ပြားမကျန် လျှော်ပစ်လိုက်တယ်။ ဒါဆိုရင် ဘယ်တစ်ယောက်က ကြွေးရှင်ကို ပိုပြီးမေတ္တာပြမလဲ’ လို့မေးတော့၊ ၄၃ ရှိမုန်က “အကြွေးပိုများတဲ့သူက ပိုပြီးမေတ္တာပြမယ်လို့ ကျွန်တော်ထင်တယ်” လို့ဖြေတယ်။ ယေရှုက “ခင်ဗျားထင်တာ မှန်တယ်” လို့ပြောတယ်။ ၄၄ အဲဒီနောက် အမျိုးသမီးဘက် လှည့်ကြည့်ပြီး ရှိမုန်ကို “ဒီအမျိုးသမီးကို ခင်ဗျားမြင်တယ် မဟုတ်လား။ ခင်ဗျားက အိမ်ထဲဝင်လာတဲ့ ကျွန်တော့်ကို ခြေဆေးဖို့ ရေမပေးဘူး။ သူကတော့ ကျွန်တော့်ခြေကို မျက်ရည်နဲ့ဆေးပြီး ဆံပင်နဲ့ သုတ်ပေးလိုက်ပြီ။ ၄၅ ခင်ဗျားက ကျွန်တော့်ကို နမ်းပြီး မကြိုဆိုဘူး။ သူကတော့ ဒီအိမ်ထဲ ကျွန်တော် ရောက်ကတည်းက ကျွန်တော့်ခြေကို နမ်းနေလိုက်တာ။ ၄၆ ခင်ဗျားက ကျွန်တော့်ခေါင်းကို ဆီမလောင်းပေးဘူး။ သူကတော့ ကျွန်တော့်ခြေကို ဆီမွှေးလောင်းပေးပြီ။ ၄၇ ဒါကြောင့် ကျွန်တော်ပြောမယ်။ သူဟာ အပြစ်များလှပေမဲ့ ခွင့်လွှတ်ခံရပြီ။ ဒီတော့ သူက မေတ္တာအများကြီး ပြပြီပေါ့။ နည်းနည်းပဲ ခွင့်လွှတ်ခံရသူကတော့ နည်းနည်းပဲ မေတ္တာပြတတ်တယ်” လို့ပြောတယ်။ ၄၈ အဲဒီနောက် “ခင်ဗျားရဲ့ အပြစ်တွေကို ခွင့်လွှတ်လိုက်ပြီ” လို့ အမျိုးသမီးကို ပြောလိုက်တယ်။ ၄၉ အတူစားသောက်နေသူတွေက “အပြစ်တွေကိုတောင် ခွင့်လွှတ်တယ်ဆိုတော့ ဒီလူဟာ ဘယ်သူပါလိမ့်” ဆိုပြီး အချင်းချင်း ပြောကြတယ်။ ၅၀ ယေရှုက အမျိုးသမီးကို “ခင်ဗျားရဲ့ယုံကြည်ခြင်းက ခင်ဗျားကို ကယ်တင်လိုက်ပြီ။ စိတ်အေးလက်အေးသာ သွားပါ” လို့ပြောတယ်။
ဇူလိုင် ၉-၁၅
ကျမ်းစာထဲက အဖိုးတန်ဘဏ္ဍာများ | လုကာ ၈-၉
“ကျွန်တော့်နောက်လိုက် လုပ်ပါ—ဘာတွေ လိုအပ်သလဲ”
(လုကာ ၉:၅၇၊ ၅၈) သူတို့သွားနေတုန်းမှာ လူတစ်ယောက်က “ဆရာ၊ ဆရာသွားလေရာ ကျွန်တော် လိုက်ပါ့မယ်” လို့ပြောတယ်။ ၅၈ ယေရှုက “မြေခွေးမှာ မြေတွင်းရှိတယ်။ ငှက်တွေမှာ နားစရာနေရာ ရှိတယ်။ လူသားကတော့ ခေါင်းချစရာတောင် မရှိဘူး” ဆိုပြီးပြောတယ်။
it-2 ၄၉၄
အသိုက်
ကျမ်းတတ်တစ်ယောက်က “ဆရာ၊ ဆရာသွားလေရာ ကျွန်တော်လိုက်ပါ့မယ်” လို့ ယေရှုကို ပြောတယ်။ ယေရှုက “မြေခွေးမှာ မြေတွင်းရှိတယ်။ ငှက်တွေမှာ နားစရာနေရာ ရှိတယ်။ လူသားကတော့ ခေါင်းချစရာတောင် မရှိဘူး” ဆိုပြီး ပြန်ပြောတယ်။ (မ ၈:၁၉၊ ၂၀။ လု ၉:၅၇၊ ၅၈) ဒီကျမ်းချက်မှာ ယေရှုက သူ့နောက် လိုက်ချင်ရင် သက်သောင့်သက်သာရှိဖို့၊ အဆင်ပြေဖို့ မစဉ်းစားဘဲ ယေဟောဝါကို လုံးဝအားကိုးဖို့ လိုတယ်လို့ ပြောတယ်။ ဒီလမ်းညွှန်ချက်အတိုင်း “ဒီနေ့အတွက် ကျွန်တော်တို့ လိုအပ်တဲ့ အစားအစာကို ပေးသနားပါ” လို့ တောင်းဖို့ တပည့်တွေကို သင်ပေးခဲ့တယ်။ “ခင်ဗျားတို့လည်း ကိုယ်ပိုင်ဆိုင်သမျှကို မစွန့်လွှတ်နိုင်ဘူးဆိုရင် ကျွန်တော့်တပည့် မဖြစ်နိုင်ဘူး” လို့လည်း ပြောတယ်။—မ ၆:၁၁။ လု ၁၄:၃၃။
(လုကာ ၉:၅၉၊ ၆၀) နောက်တစ်ယောက်ကို “ကျွန်တော့် နောက်လိုက် လုပ်ပါ” လို့ပြောတော့ သူက “ဆရာ၊ အဖေ့ကို အရင် သင်္ဂြိုဟ်ပါရစေ” လို့ခွင့်တောင်းတယ်။ ၆၀ ယေရှုက “လူသေကို လူသေတွေပဲ သင်္ဂြိုဟ်ပါစေ။ ခင်ဗျားကတော့ သွားပြီး ဘုရားသခင့် နိုင်ငံတော်အကြောင်း ဟောပြောပါ” လို့ပြောတယ်။
nwtsty လု ၉:၅၉၊ ၆၀ လေ့လာမှု မှတ်စု
အဖေ့ကို အရင် သင်္ဂြိုဟ်ပါရစေ– ဒီစကားတွေက အဲဒီလူရဲ့အဖေ သေဆုံးသွားလို့ အရင် သင်္ဂြိုဟ်ပါရစေလို့ ခွင့်တောင်းနေတာကို ဆိုလိုတာ မဖြစ်နိုင်ဘူး။ အဲဒီလိုသာဖြစ်ရင် အဲဒီမှာ ယေရှုနဲ့ စကားပြောနေမှာ မဟုတ်ဘူး။ ရှေးခေတ် အရှေ့အလယ်ပိုင်းဒေသက လူတွေဟာ သေဆုံးသွားတဲ့ မိသားစုဝင်ကို အဲဒီနေ့မှာပဲ ချက်ချင်း သင်္ဂြိုဟ်တတ်ကြတယ်။ ဒါကြောင့် အဲဒီလူရဲ့ အဖေဟာ မသေသေးဘဲ အိုမင်းပြီး ဖျားနေတာ ဖြစ်နိုင်တယ်။ ယေရှုက ဖျားနေတဲ့၊ အကူအညီလိုနေတဲ့ မိဘကို ပစ်ထားပါလို့ ပြောမှာ မဟုတ်ဘူး။ အဖေကို ကူညီပေးနိုင်မယ့် တခြားမိသားစုဝင်တွေလည်း ရှိမှာပဲ။ (မာ ၇:၉-၁၃) အဲဒီလူက ‘အဖေအသက်ရှင်သရွေ့တော့ မလိုက်သေးဘဲ နောက်မှ ဆရာ့နောက် လိုက်ပါမယ်။ သူသေပြီး သူ့ကို သင်္ဂြိုဟ်ပြီးမှ လိုက်ပါရစေ’ လို့ပြောတာ ဖြစ်မယ်။ ယေရှုအမြင်မှာတော့ အဲဒီလူဟာ ဘုရားနိုင်ငံတော်ကို ရှေ့ဦးထားဖို့ဆိုတဲ့ အခွင့်အရေးကို အဆုံးရှုံးခံနေတယ်။—လု ၉:၆၀၊ ၆၂။
လူသေကို လူသေတွေပဲ သင်္ဂြိုဟ်ပါစေ– လု ၉:၅၉ လေ့လာမှု မှတ်စုအရ ယေရှုနဲ့ စကားပြောနေတဲ့လူရဲ့ အဖေဟာ မသေသေးဘဲ အိုမင်းပြီး ဖျားနေတာ ဖြစ်နိုင်တယ်။ ဒါကြောင့် ယေရှုက ‘ဘုရားအမြင်မှာ သေနေသူတွေ အချင်းချင်းပဲ သင်္ဂြိုဟ်ပါစေ’ လို့ပြောနေတာပါ။ ဆိုလိုတာက သူ့ရဲ့ တခြားဆွေမျိုးတွေ အဖေကို ပြုစုပြီး သေတဲ့အခါ သင်္ဂြိုဟ်ပါစေလို့ ပြောနေမှန်း ထင်ရှားတယ်။ သူကတော့ ယေရှုနောက် လိုက်ရင် ထာဝရအသက်လမ်းပေါ်မှာ ရှိနေမယ်၊ ဘုရားရှေ့မှာ သေနေသူတွေအထဲ ပါမှာမဟုတ်ဘူး။ ယေရှုရဲ့စကားအရ ဘုရားရှေ့ အသက်ရှင်သူတွေဖြစ်နေဖို့ ဘုရားသခင့်နိုင်ငံတော်ကို ရှေ့ဦးထားပြီး နိုင်ငံတော်အကြောင်း အနှံ့အပြား ဟောပြောရမယ်ဆိုတာ ထင်ရှားတယ်။
(လုကာ ၉:၆၁၊ ၆၂) နောက်တစ်ယောက်ကလည်း “ဆရာ၊ ဆရာ့နောက်ကို လိုက်ပါ့မယ်။ ဒါပေမဲ့ အိမ်သားတွေကို အရင် နှုတ်ဆက်ပါရစေဦး” လို့ပြောတော့၊ ၆၂ ယေရှုက “ထွန်ကိုင်းကိုကိုင်ရင်း နောက်လှည့်ကြည့်တဲ့သူဟာ ဘုရားသခင့်နိုင်ငံတော်နဲ့ မထိုက်တန်ဘူး” လို့ပြောတယ်။”
nwtsty မီဒီယာ
ထွန်ယက်ခြင်း
ချစ်ချစ်တောက်နေပူရှိန်ကြောင့် နွေရာသီမှာ မာကျောနေတဲ့ မြေကြီးဟာ ဆောင်းမိုးကြောင့် ပျော့ပျောင်းသွားတဲ့အခါ ထွန်ယက်တတ်ကြတယ်။ (နောက်ဆက်တွဲ ခ၁၅ ကိုကြည့်ပါ။) ထယ်တချို့ဟာ ထိပ်မှာ သတ္တုတပ်ထားတဲ့ တုတ်ချွန်တစ်ချောင်းပဲ ဖြစ်တယ်။ အဲဒါကို တိရစ္ဆာန်တစ်ကောင် ဒါမှမဟုတ် နှစ်ကောင်က ဆွဲတယ်။ မြေကြီးကို ထွန်ယက်ပြီးတဲ့အခါ မျိုးစေ့ကြဲတယ်။ ဟေဗြဲကျမ်းစောင်တွေမှာ ထွန်ယက်တဲ့အလုပ်ကို ပုံဥပမာတွေမှာ အသုံးပြုလေ့ရှိတယ်။ (သူ ၁၄:၁၈။ ရှာ ၂:၄။ ယေ ၄:၃။ မိ ၄:၃) ယေရှုဟာ အရေးကြီးတဲ့ သွန်သင်ချက်တွေကို သဘောပေါက်ဖို့ စိုက်ပျိုးရေးလုပ်ငန်းတွေကို ပုံဥပမာတွေအနေနဲ့ သုံးလေ့ရှိတယ်။ ဥပမာ၊ စိတ်နှလုံးအကြွင်းမဲ့ အမှုဆောင်တဲ့တပည့်ဖြစ်ဖို့ အရေးကြီးပုံကို လယ်ထွန်တာနဲ့ နှိုင်းယှဉ်ပြတယ်။ (လု ၉:၆၂) လယ်ထွန်နေတဲ့သူဟာ အာရုံမစိုက်ရင် ထယ်ကြောင်းတွေ ဖြောင့်တန်းနေမှာမဟုတ်ဘူး။ အဲဒီလိုပဲ ခရစ်တော်ရဲ့ တပည့်တစ်ယောက်ဟာ အာရုံထွေပြားမယ်၊ တာဝန်မကျေဘူးဆိုရင် ဘုရားသခင့်နိုင်ငံတော်နဲ့ မထိုက်တန်ဘူး။
ယေဟောဝါကို စုံလင်တဲ့နှလုံးနဲ့ ဆက်အမှုဆောင်ပါ
၁၁ ယေရှုရဲ့ ဥပမာမှာပါတဲ့ သင်ခန်းစာကို ပိုနားလည်သဘောပေါက်နိုင်ဖို့ ဥပမာကို နည်းနည်းထပ်ဖြည့်ပြီး ကြည့်ကြစို့။ လယ်သမားတစ်ယောက် လယ်ထွန်နေတယ်။ ဒါပေမဲ့ သူက လယ်ထွန်နေရင်းနဲ့ အိမ်ကိုပဲ စိတ်ရောက်နေတယ်။ အိမ်ပြန်မယ်ဆိုရင် သူ့မိသားစု၊ မိတ်ဆွေတွေနဲ့အတူ နေနိုင်တယ်၊ အစားအစာ၊ တေးဂီတ၊ ရယ်မောသံတွေနဲ့အတူ အမိုးအကာအောက်မှာ သက်သောင့်သက်သာနေလို့ ရတယ်။ အဲဒီအရာတွေကို သူ အရမ်းလိုချင်တောင့်တလာတယ်။ ခဏတစ်ဖြုတ် လယ်ထွန်ပြီးတဲ့နောက် ဘဝရဲ့သာယာပျော်ရွှင်မှုတွေကို ခံစားချင်တဲ့ဆန္ဒ အရမ်းပြင်းပြလာတဲ့အတွက် သူက ယေရှုရဲ့ ဥပမာထဲကအတိုင်း နောက်ကို “လှည့်ကြည့်” လိုက်တယ်။ လယ်စိုက်နိုင်ဖို့ဆိုရင် လုပ်စရာအလုပ်တွေ အများကြီးကျန်နေသေးပေမဲ့ ဒီလယ်သမားဟာ အာရုံပျံ့လွင့်နေတာကြောင့် အလုပ်ကို ထိခိုက်လာတော့တယ်။ လယ်သမားက အလုပ်ကို စွဲစွဲမြဲမြဲမလုပ်တဲ့အတွက် အလုပ်ရှင်က သူ့ကိုစိတ်ပျက်ခဲ့တယ်။
၁၂ ဒီနေ့အချိန်မှာလည်း ဘယ်လိုနည်းနဲ့ အလားတူအဖြစ်အပျက်မျိုး ဖြစ်နိုင်တယ်ဆိုတာ သုံးသပ်ကြည့်ကြစို့။ အမှုဆောင်ခြင်းမှာ ကောင်းကောင်းပါဝင်နေပုံရပေမဲ့ နှလုံးကတော့ အန္တရာယ်ကျရောက်နေတဲ့ ခရစ်ယာန်တွေဟာ အဲဒီပုံဥပမာမှာပါတဲ့ အလုပ်သမားနဲ့တူတယ်။ ဥပမာ၊ အစည်းအဝေးတွေတက်၊ အမှုဆောင်ထွက်နေတဲ့ ညီအစ်ကိုတစ်ဦးကို မြင်ယောင်ကြည့်ပါ။ ဒါပေမဲ့ တစ်ချိန်တည်းမှာ သူဟာ ဒီလောကမှာရှိတဲ့ သူနှစ်သက်တဲ့အရာတချို့အပေါ် တစ်ချိန်လုံး စိတ်ရောက်နေတယ်။ သူ့နှလုံးထဲမှာ အဲဒါတွေကိုပဲ အလွန်အမင်း လိုချင်တောင့်တနေတယ်။ ဘုရားသခင်ကို နှစ်ပေါင်းများစွာ ကြိုးစားပမ်းစား အမှုဆောင်ပြီးတဲ့နောက်မှာတော့ ဒီလောကမှာရှိတဲ့ အရာတချို့ကို လိုချင်တဲ့ ဒီညီအစ်ကိုရဲ့ဆန္ဒက အရမ်းပြင်းပြလာတဲ့အတွက် သူက ယေရှုရဲ့ ဥပမာထဲကအတိုင်း နောက်မှာရှိတဲ့အရာတွေကို “လှည့်ကြည့်” လိုက်တယ်။ အမှုဆောင်ခြင်းမှာ လုပ်စရာများစွာရှိနေသေးပေမဲ့ သူက အာရုံပျံ့လွင့်ပြီး အရင်ကလို ဘုရားသခင့်အမှုတော်ကို ကောင်းကောင်း မလုပ်ဆောင်တော့ဘူး။ (ဖိ. ၂:၁၆) “စပါးရှင်” ယေဟောဝါက သူ့အလုပ်သမားတွေထဲက တစ်ယောက်ယောက် လက်လျှော့သွားတာကို တွေ့တဲ့အခါ ဝမ်းနည်းတယ်။—လု. ၁၀:၂။
၁၃ ကျွန်ုပ်တို့အတွက် သင်ခန်းစာကတော့ ရှင်းပါတယ်။ ယေဟောဝါကို နှလုံးအပြည့်နဲ့ အမှုဆောင်ခြင်းဆိုတာ အသင်းတော်အစည်းအဝေးတွေ ပုံမှန်တက်တာ၊ အမှုဆောင်လုပ်ငန်းမှာ ပုံမှန်ပါဝင်တာထက်မကဘူး။ (၆ ရာ. ၂၅:၁၊ ၂၊ ၂၇) ခရစ်ယာန်တစ်ဦးရဲ့နှလုံးထဲမှာ နောက်မှာရှိတဲ့အရာတွေ၊ ဆိုလိုတာက လောကရဲ့ဘဝပုံစံတွေထဲက အရာတွေကို ဆက်ချစ်နေမယ်ဆိုရင် ယေဟောဝါနဲ့ သူ့ရဲ့ဆက်ဆံရေးက အန္တရာယ်ရှိနေပြီဖြစ်တယ်။ ဒါကြောင့် ဘုရားသခင်ကို နှလုံးအပြည့်နဲ့ အမှုဆောင်ဖို့ ကျွန်ုပ်တို့ဟာ “ဆိုးညစ်သောအရာကို စက်ဆုပ်ရွံရှာ” ပြီး “ကောင်းသောအရာကို မှီဝဲဆည်းကပ်” ကြရမယ်။ (ရော. ၁၂:၉; လု. ၉:၆၂) စာတန့်လောကမှာရှိတဲ့ တချို့အရာတွေက အသုံးတည့်ပုံ ဒါမှမဟုတ် နှစ်သက်စရာကောင်းပုံ ပေါက်နေရင်တောင်မှ အဲဒီအရာတွေကြောင့် ဘုရားသခင်ကို နှလုံးအကြွင်းမဲ့နဲ့ အမှုမဆောင်တော့တာမျိုး အဖြစ်မခံရဘူး။—၂ ကော. ၁၁:၁၄; ဖိလိပ္ပိ ၃:၁၃၊ ၁၄ ကိုဖတ်ပါ။
ရှာဖွေလေ့လာ ဘုရားရေးရာရတနာ
(လုကာ ၈:၃) ဟေရုဒ်မင်းရဲ့ အိမ်တော်ထိန်း ခုဇရဲ့ဇနီး ယောဟန္န၊ ရှုရှန္နတို့အပြင် တခြားအမျိုးသမီးတွေလည်း ပါတယ်။ သူတို့က ကိုယ့်ပစ္စည်းဥစ္စာတွေ သုံးပြီး ယေရှုနဲ့ တမန်တော်တွေကို အလုပ်အကျွေးပြုဖို့ လိုက်ပါလာကြတယ်။
nwtsty လု ၈:၃ လေ့လာမှု မှတ်စု
တမန်တော်တွေကို အလုပ်အကျွေးပြု– ဒါမှမဟုတ် “သူတို့ကို ထောက်မ (ကျွေးမွေးပြုစု) နေ။” ဂရိစကားလုံး ဒိုင်ယာကိုနီအို ဟာ ဝယ်ခြမ်း၊ ချက်ပြုတ်ကျွေးမွေး စတဲ့အလုပ်တွေ လုပ်ပေးတာကို ဆိုလိုတယ်။ ထပ်တူသဘောမျိုးနဲ့ လု ၁၀:၄၀ (“လုပ်ခိုင်း”)၊ လု ၁၂:၃၇ (“အလုပ်အကျွေးပြု”)၊ လု ၁၇:၈ (“လိုသမျှ လုပ်ပေး”)၊ တ ၆:၂ (“လုပ်ကျွေးနေ”) တို့မှာ အဲဒီစကားလုံးကို အသုံးပြုထားတယ်။ လူတစ်ယောက်အတွက် လုပ်ပေးတဲ့ တခြားအလုပ်တွေကိုပါ ဆိုလိုတယ်။ ဒီအချက်တွေက အခန်းငယ် ၂ နဲ့ ၃ မှာပါတဲ့ အမျိုးသမီးတွေဟာ ယေရှုနဲ့ တပည့်တွေ ဘုရားပေးတာဝန်ကို အပြည့်အဝ လုပ်ဆောင်နိုင်ဖို့ ထောက်မကူညီပေးတာတွေကို ဖော်ပြတယ်။ အဲဒီလိုလုပ်ပေးခြင်းဖြင့် ဒီအမျိုးသမီးတွေဟာ ဘုရားကို ဂုဏ်တင်ခဲ့ကြတယ်။ ဒါကို ကျေးဇူးတင်လေးမြတ်တဲ့အနေနဲ့ ဘုရားသခင်က သူတို့ရဲ့ ရက်ရောမှုအကြောင်း လူမျိုးအဆက်ဆက် သိစေဖို့ ကျမ်းစာထဲမှာ မှတ်တမ်းတင်စေခဲ့တယ်။ (ပ ၁၉:၁၇။ ဟီ ၆:၁၀) မ ၂၇:၅၅ နဲ့ မာ ၁၅:၄၁ ပါအမျိုးသမီးတွေအကြောင်း ပြောတဲ့အခါ အဲဒီဂရိစကားလုံးကိုပဲ သုံးထားတယ်။
(လုကာ ၉:၄၉၊ ၅၀) ယောဟန်က “ဆရာ၊ ဆရာ့နာမည်ကိုသုံးပြီး နတ်ဆိုးနှင်ထုတ်နေတဲ့ လူတစ်ယောက်ကို တွေ့ခဲ့တယ်။ ကျွန်တော်တို့ထဲက မဟုတ်လို့ သူ့ကို တားလိုက်တယ်” လို့ပြောတော့၊ ၅၀ ယေရှုက “သူ့ကို မတားပါနဲ့။ ခင်ဗျားတို့ကို မဆန့်ကျင်တဲ့လူဟာ ခင်ဗျားတို့ဘက်က လူပဲ” လို့ပြောတယ်။”
လုကာကျမ်းမှ ပေါ်လွင်ချက်များ
၉:၄၉၊ ၅၀—လူတစ်ဦးသည် ယေရှုနောက်သို့ မလိုက်သော်လည်း နတ်ဆိုးများ နှင်ထုတ်ပေးနေသည်ကို ကိုယ်တော် အဘယ်ကြောင့် မတားမြစ်ခဲ့သနည်း။ ယေရှုမတားမြစ်ခဲ့ခြင်းမှာ ခရစ်ယာန်အသင်းတော် မတည်ထောင်သေးသောကြောင့် ဖြစ်၏။ ယင်းကြောင့် ထိုသူသည် ယေရှု၏နာမကို ယုံကြည်ကြောင်းတင်ပြရန်၊ နတ်ဆိုးများကို နှင်ထုတ်ရန် ကိုယ်တော်နောက်သို့လိုက်ဖို့ မလိုပါ။—မာ. ၉:၃၈-၄၀။
ကျမ်းစာဖတ်ရှုခြင်း
(လုကာ ၈:၁-၁၅) မကြာခင်မှာ ယေရှုက တစ်မြို့ပြီးတစ်မြို့၊ တစ်ရွာပြီးတစ်ရွာ သွားပြီး ဘုရားသခင့်နိုင်ငံတော် သတင်းကောင်းကို ဟောပြောတယ်။ တမန်တော် ၁၂ ယောက်နဲ့အတူ၊ ၂ နတ်ဆိုးနှောင့်ယှက်မှု ကင်းအောင်၊ ရောဂါသက်သာအောင် ယေရှု ကုသပေးဖူးတဲ့ အမျိုးသမီးတချို့လည်း လိုက်ပါလာတယ်။ နတ်ဆိုးခုနစ်ကောင်ရဲ့ နှောင့်ယှက်မှုကနေ လွတ်ကင်းသွားတဲ့ မာဂဒလလို့ခေါ်တဲ့ မာရိ၊ ၃ ဟေရုဒ်မင်းရဲ့ အိမ်တော်ထိန်း ခုဇရဲ့ဇနီး ယောဟန္န၊ ရှုရှန္နတို့အပြင် တခြားအမျိုးသမီးတွေလည်း ပါတယ်။ သူတို့က ကိုယ့်ပစ္စည်းဥစ္စာတွေ သုံးပြီး ယေရှုနဲ့ တမန်တော်တွေကို အလုပ်အကျွေးပြုဖို့ လိုက်ပါလာကြတယ်။ ၄ မြို့အသီးသီးကနေ ရောက်လာသူတွေအပါအဝင် လူအများကြီး စုရုံးလာတဲ့အခါ ယေရှုက ပုံဥပမာသုံးပြီး အခုလိုပြောတယ်- ၅ “တစ်ခါက မျိုးကြဲသူတစ်ယောက် မျိုးစေ့ကြဲဖို့ ထွက်သွားတယ်။ မျိုးကြဲတဲ့အခါ မျိုးစေ့တချို့ လမ်းပေါ်ကျတဲ့အတွက် အနင်းခံရတယ်။ ငှက်တွေ ကောက်စားသွားတယ်။ ၆ မျိုးစေ့တချို့ဟာ မြေဆီလွှာပါးတဲ့ ကျောက်ခံမြေပေါ် ကျတယ်။ အပင်ပေါက်လာပေမဲ့ ရေမရတဲ့အတွက် ခြောက်သွေ့သွားတယ်။ ၇ မျိုးစေ့တချို့ကတော့ ဆူးပင်တွေကြားထဲ ကျတယ်။ ဆူးပင်တွေ အတူကြီးထွားလာပြီး လွှမ်းမိုးပိတ်ဆို့လိုက်တယ်။ ၈ မျိုးစေ့တချို့ကတော့ ကောင်းတဲ့မြေပေါ် ကျတဲ့အတွက် အပင်ပေါက်လာပြီး အဆ ၁၀၀ သီးပွင့်ဖြစ်ထွန်းတယ်။” အဲဒီနောက် အသံကိုမြှင့်ပြီး “နားရှိတဲ့သူ ကြားပါစေ” လို့ပြောတယ်။ ၉ အဲဒီပုံဥပမာရဲ့ အဓိပ္ပာယ်ကို တပည့်တွေမေးတော့၊ ၁၀ ယေရှုက “ခင်ဗျားတို့ဟာ ဘုရားသခင့်နိုင်ငံတော်နဲ့ပတ်သက်တဲ့ မြင့်မြတ်တဲ့ လျှို့ဝှက်ချက်အကြောင်း နားလည်ခွင့်ရတယ်။ တခြားသူတွေအတွက်တော့ ဒါဟာ ပုံဥပမာသက်သက်ပဲ။ ဒါကြောင့် သူတို့ဟာ ကြည့်လျက်နဲ့ မမြင်ဘူး။ ကြားလျက်နဲ့ ဆိုလိုရင်းကို သဘောမပေါက်ဘူး။ ၁၁ ပုံဥပမာရဲ့ အဓိပ္ပာယ်ကတော့ မျိုးစေ့ဟာ ဘုရားသခင်ရဲ့ တရားစကား ဖြစ်တယ်။ ၁၂ လမ်းပေါ် မျိုးစေ့ကျတယ်ဆိုတဲ့ အဓိပ္ပာယ်က တရားစကားကို ကြားပေမဲ့ မယုံကြည်အောင်၊ ကယ်တင်ခြင်းမရအောင် သူတို့စိတ်နှလုံးထဲက တရားစကားကို မာရ်နတ် လာနုတ်ယူသွားတာကို ဆိုလိုတယ်။ ၁၃ ကျောက်ခံမြေပေါ် မျိုးစေ့ကျတယ်ဆိုတဲ့ အဓိပ္ပာယ်က တရားစကားကို ကြားတဲ့အခါ ဝမ်းသာအားရ လက်ခံပေမဲ့ စိတ်ထဲမှာ အမြစ်မစွဲတာကို ဆိုလိုတယ်။ ခဏတော့ ယုံကြည်ပေမဲ့ စမ်းသပ်ခံရချိန်မှာ ကျရှုံးသွားတယ်။ ၁၄ ဆူးပင်တွေကြားမှာ မျိုးစေ့ကျတယ်ဆိုတဲ့ အဓိပ္ပာယ်က တရားစကားကို ကြားပေမဲ့ ဘဝရဲ့စိုးရိမ်ပူပန်စရာ၊ စည်းစိမ်ဥစ္စာ၊ အပျော်အပါးတွေကြောင့် စိတ်ပျံ့လွင့်သွားတာကို ဆိုလိုတယ်။ လုံးဝ လွှမ်းမိုးပိတ်ဆို့ခံရတဲ့အတွက် အသီးမအောင်ဘူး။ ၁၅ ကောင်းတဲ့မြေမှာ မျိုးစေ့ကျတယ်ဆိုတဲ့ အဓိပ္ပာယ်က စိတ်ကောင်းနှလုံးကောင်း ရှိသူတွေ တရားစကားကို နာယူပြီးနောက် စိတ်စွဲမှတ်ထားပြီး ခံနိုင်ရည်ရှိရှိ သီးပွင့်ဖြစ်ထွန်းတာကို ဆိုလိုတယ်။
ဇူလိုင် ၁၆-၂၂
ကျမ်းစာထဲက အဖိုးတန်ဘဏ္ဍာများ | လုကာ ၁၀-၁၁
“ရှမာရိလူ ပုံဥပမာ”
(လုကာ ၁၀:၂၉-၃၂) ဒါပေမဲ့ အဲဒီလူက သူဖြောင့်မတ်တယ်ဆိုတာ ပြချင်တော့ “ကျွန်တော်ချစ်ရမယ့် လူသားချင်းဟာ ဘယ်သူလဲ” လို့မေးတယ်။ ၃၀ ဒါနဲ့ ယေရှုက “လူတစ်ယောက်က ဂျေရုဆလင်မြို့ကနေ ယေရိခေါမြို့ကို ဆင်းသွားတဲ့အခါ လမ်းမှာ ဓားပြတွေနဲ့ တိုးတယ်။ ဓားပြတွေက သူ့အဝတ်ပါမကျန် ချွတ်ယူကြတယ်။ သူ့ကို ရိုက်နှက်ပြီး သေလုမြောပါး ဖြစ်တော့မှ ပစ်ထားခဲ့ကြတယ်။ ၃၁ တိုက်တိုက်ဆိုင်ဆိုင် ပုရောဟိတ်တစ်ယောက် အဲဒီလမ်းအတိုင်း ဆင်းလာတယ်။ သူ့ကိုမြင်တော့ လမ်းတစ်ဖက်ကို ရှောင်သွားတယ်။ ၃၂ လေဝိအမျိုးသားတစ်ယောက်လည်း အဲဒီနေရာကို ရောက်လာပြီး သူ့ကိုမြင်တော့ လမ်းတစ်ဖက်ကို ရှောင်သွားတယ်။
nwtsty မီဒီယာ
ဂျေရုဆလင်မြို့ကနေ ယေရိခေါမြို့ကို ဆင်းသွားတဲ့လမ်း
ဒီဗီဒီယိုတိုလေးမှာ ပြထားတဲ့ (၁) လမ်းဟာ ဂျေရုဆလင်မြို့ကနေ ယေရိခေါမြို့ကို ဆင်းသွားတဲ့ ရှေးခေတ်က လမ်းဟောင်းအတိုင်း ဖြစ်နိုင်တယ်။ အဲဒီလမ်းက ၁၂ မိုင်ရှည်ပြီး .၆ မိုင်လောက် မတ်စောက်တယ်။ လူပြတ်တဲ့ တောလမ်းဖြစ်ပြီး ဓားပြတွေပေါတဲ့အတွက် ခရီးသည်တွေကို ကာကွယ်ပေးဖို့ တပ်ချထားရတယ်။ ယုဒတောအထွက်လမ်းမှာ ရောမ ယေရိခေါမြို့ (၂) တည်ရှိပြီး ယေရိခေါမြို့ဟောင်း (၃) ကျတော့ အဲဒီမြို့ကနေ ၁ မိုင်ကျော်ကျော်အကွာမှာ ရှိတယ်။
“ဥပမာကင်း၍ ဟောပြောတော်မမူ”
၁၄ ဒုတိယ၊ အိမ်နီးချင်းပီသသည့် ရှမာရိအမျိုးသား ပုံဆောင်ချက်ကို ပြန်တွေးကြည့်ပါ။ ယေရှုက ယင်းကို ဤသို့အစပြုခဲ့သည်– “လူတစ်ယောက်သည် ယေရုရှလင်မြို့မှ ယေရိခေါမြို့သို့ (“ဆင်း၊” ကဘ) သွားရာတွင် ဓားပြနှင့်တွေ့ကြုံလေ၏။ ဓားပြတို့သည် ထိုသူ၏အဝတ်ကို ချွတ်၍ နာကျင်စွာရိုက်နှက်ပြီးမှ သေလုမတတ်ရှိသောအခါ ပစ်ထား၍ သွားကြ၏။” (လုကာ ၁၀:၃၀) ယေရှုသည် ဆိုလိုရင်းကို ပေါ်လွင်စေရန် “ယေရုရှလင်မြို့မှ ယေရိခေါမြို့သို့” သွားရာလမ်းကို အသုံးပြုခဲ့ခြင်းမှာ အထူးအဓိပ္ပာယ်ရှိ၏။ ဤပုံဆောင်ချက်ကို ဖော်ပြချိန်တွင် ကိုယ်တော်သည် ယေရုရှလင်မြို့နှင့် မဝေးလှသည့် ယုဒနယ်တွင် ရှိနေသည်။ သို့ဖြစ်၍ ကိုယ်တော့်ပရိသတ်များသည် ပုံဥပမာပါလမ်းကြောင်းကို သိထားကြပေမည်။ ထိုလမ်းသည် အထူးသဖြင့် တစ်ဦးတည်း ခရီးသွားသူအတွက် အန္တရာယ်ထူပြောသည်။ လူသူအရောက်အပေါက်နည်းပြီး အကွေ့အကောက်များသည်၊ သို့ဖြင့် ဓားပြများ ချောင်းမြောင်းစောင့်ဆိုင်းနိုင်သည့်နေရာ များစွာရှိစေသည်။
၁၅ “ယေရုရှလင်မြို့မှ ယေရိခေါမြို့သို့ဆင်း” သွားရာလမ်းကို ယေရှုရည်ညွှန်းရခြင်းနှင့်ပတ်သက်၍ သတိပြုစရာတစ်ခု ရှိသေးသည်။ ထိုပုံဆောင်ချက်အရ ဦးဆုံး ယဇ်ပုရောဟိတ်တစ်ဦး၊ ထို့နောက် လေဝိသားတစ်ဦးသည် ထိုလမ်းပေါ် သွားခဲ့သော်လည်း ဓားပြတိုက်ခံရသူကို ရပ်၍မကူညီခဲ့ချေ။ (လုကာ ၁၀:၃၁၊ ၃၂၊ ကဘ) ယဇ်ပုရောဟိတ်များသည် ယေရုရှလင်မြို့ရှိ ဝတ်ပြုရာအိမ်တော်တွင် အမှုထမ်းကြပြီး လေဝိသားများက သူတို့ကို ကူညီပေးခဲ့ကြရသည်။ ယဇ်ပုရောဟိတ်နှင့် လေဝိသားများစွာတို့သည် ဝတ်ပြုရာအိမ်တော်တွင် အမှုမထမ်းချိန်တွင် ၁၄ မိုင်သာဝေးသည့် ယေရိခေါမြို့တွင် နေထိုင်ကြသည်။ သို့ဖြစ်၍ သူတို့သည် ထိုလမ်းပေါ် အမှန်သွားလာလေ့ရှိကြသည်။ ယဇ်ပုရောဟိတ်နှင့် လေဝိသားတို့သည် “ယေရုရှလင်မြို့မှ” လာကြသဖြင့် ဝတ်ပြုရာအိမ်တော်မှ ထွက်လာခဲ့ကြသည်ကိုလည်း သတိပြုပါ။ ထို့ကြောင့် ဤသူတို့၏ဥပေက္ခာပြုမှုကို မည်သူကမျှ ‘သေနေပုံပေါက်တဲ့ ဒဏ်ရာရသူကို သူတို့ရှောင်မှာပေါ့၊ လူသေအလောင်းကို သူတို့ထိလိုက်ရင် ဝတ်ပြုရာအိမ်တော်မှာ အမှုထမ်းဆောင်ဖို့ အခိုက်အတန့် မစင်ကြယ်ဖြစ်သွားမှာ’ ဟူ၍ ဆင်ခြေပေးနိုင်မည် မဟုတ်ချေ။ (ဝတ်ပြုရာ ၂၁:၁; တောလည်ရာ ၁၉:၁၁၊ ၁၆) ယေရှု၏ပုံဥပမာသည် ပရိသတ်များ အကျွမ်းတဝင်ရှိထားရာကို ဖော်ပြကြောင်း ရှင်းမနေပေလော။
(လုကာ ၁၀:၃၃-၃၅) ရှမာရိလူတစ်ယောက်လည်း အဲဒီလမ်းအတိုင်း ခရီးနှင်လာတယ်။ သူ့ကိုတွေ့တဲ့အခါ သနားသွားတယ်။ ၃၄ ဒါနဲ့ သူ့အနားသွားပြီး ဒဏ်ရာတွေကို ဆီနဲ့ဝိုင် လိမ်းပေးတယ်။ ပတ်တီးစည်းပေးတယ်။ ပြီးတော့ မြည်းပေါ်တင်၊ ဧည့်ရိပ်သာဆီ ခေါ်သွားပြီး ပြုစုတယ်။ ၃၅ နောက်တစ်နေ့မှာ ရှမာရိလူက ဧည့်ရိပ်သာပိုင်ရှင်ကို ဒေနာရိ နှစ်ပြားထုတ်ပေးပြီး ‘ဒီလူကို ပြုစုထားပေးပါ။ နောက်ထပ်ကုန်ကျသမျှကို ကျွန်တော် ပြန်လာတဲ့အခါ ပေးပါ့မယ်’ လို့မှာခဲ့တယ်။
nwtsty လု ၁၀:၃၃၊ ၃၄ လေ့လာမှု မှတ်စု
ရှမာရိလူတစ်ယောက်– ဂျူးတွေက ရှမာရိတွေကို အထင်သေးပြီး အပေါင်းအသင်း မလုပ်ကြဘူး။ (ယဟ ၄:၉) ဂျူးတချို့က ကဲ့ရဲ့တဲ့အသုံးအနှုန်းအဖြစ် “ရှမာရိလူ” ဆိုပြီး အသုံးပြုကြတယ်။ (ယဟ ၈:၄၈) “ရှမာရိတွေဆီက မုန့်ကို စားတဲ့သူဟာ ဝက်သားစားသူပဲ” လို့ ရဗ္ဗိတစ်ယောက်ရဲ့အဆိုကို မစ်ရှနာကျမ်းမှာ ဖော်ပြထားတယ်။ (ရှီဘစ်သ် ၈:၁၀) ရှမာရိတစ်ဦးရဲ့ သက်သေခံချက်၊ ဝန်ဆောင်မှုကို ဂျူးအများစုက လက်မခံကြဘူး။ ယေရှုက ဂျူးတွေရဲ့ အထင်သေးတတ်တဲ့သဘောကို သိလို့ လူသားချင်းကိုချစ်တဲ့ ဒီရှမာရိလူပုံဥပမာမှာ အဲဒါကို ချက်ကျကျ ဖော်ပြထားတယ်။
ဒဏ်ရာတွေကို ဆီနဲ့ဝိုင် လိမ်းပေးတယ်။ ပတ်တီးစည်းပေးတယ်– သမားတော်လုကာဟာ အဲဒီခေတ်က ဒဏ်ရာကုသနည်းကို ဖော်ပြတဲ့ ယေရှုရဲ့ ပုံဥပမာကို အသေအချာ မှတ်တမ်းတင်တယ်။ ဒဏ်ရာတွေကို ကုသရာမှာ ဆီနဲ့ဝိုင် နှစ်မျိုးစလုံးကို အသုံးပြုလေ့ရှိတယ်။ အနာတွေကို ပျော့ပျောင်းသွားအောင် တစ်ခါတလေ ဆီလိမ်းတယ် (ရှာ ၁:၆ နဲ့နှိုင်းယှဉ်)။ ဝိုင်ကျတော့ ဆေးဖက်ဝင်တဲ့ ပိုးသတ်ဆေးဖြစ်တယ်။ အနာတွေ ပိုမဆိုးစေဖို့ ပတ်တီးစည်းပုံကိုတောင် လုကာ ဖော်ပြတယ်။
ဧည့်ရိပ်သာ– ဒီမှာ အသုံးပြုတဲ့ ဂရိစကားလုံးက စာသားအရ “လူတိုင်းကို လက်ခံတဲ့ နေရာ” ကိုဆိုလိုတယ်။ ဒီလိုနေရာမျိုးမှာ ခရီးသည်တွေနဲ့ သူတို့ရဲ့တိရစ္ဆာန်တွေ နေလို့ရတယ်။ တည်းခိုခန်းပိုင်ရှင်က ခရီးသည်တွေရဲ့ အခြေခံလိုအပ်ရာတွေ ပေးတတ်တယ်။ အဖိုးအခပေးပြီး သူ့ဆီမှာ ပစ္စည်းတွေ အပ်ခဲ့လို့ရတယ်။
(လုကာ ၁၀:၃၆၊ ၃၇) ဒီတော့ အဲဒီလူသုံးယောက်မှာ ဓားပြတိုက်ခံရသူကို လူသားချင်းချစ်တဲ့ မေတ္တာပြတာ ဘယ်သူလို့ ခင်ဗျားထင်သလဲ” လို့မေးတဲ့အခါ၊ ၃၇ “သနားစိတ်နဲ့ ကူညီတဲ့သူပေါ့” လို့ သူဖြေတယ်။ ယေရှုက “ခင်ဗျားလည်း သွားပြီး အဲဒီအတိုင်း လုပ်ပါ” လို့ပြောတယ်။”
အိမ်နီးချင်းကောင်းတစ်ဦးဖြစ်ကြောင်း ရှမာရိတစ်ဦး သက်သေထူ
အမှန်တကယ် ဖြောင့်မတ်သူတစ်ဦးသည် ဘုရားသခင့်ပညတ်များကို နာခံရုံသာမက ကိုယ်တော့်အရည်အချင်းများကို တုပသူလည်းဖြစ်ကြောင်း ယေရှု၏ပုံဥပမာက ဖော်ပြပါသည်။ (ဧဖက် ၅:၁) ဥပမာ၊ ကျမ်းစာက “ဘုရားသခင်သည် လူမျက်နှာကို မှတ်တော်မမူ” ဟုဆိုသည်။ (တမန်တော် ၁၀:၃၄) ဤကိစ္စ၌ ဘုရားသခင်ကို တုပနေပါသလော။ ကိုယ်နှင့်စပ်ဆိုင်သူကောင်းတစ်ဦး ဖြစ်ခြင်းတွင် လူမျိုးရေး၊ ယဉ်ကျေးမှုနှင့် ဘာသာတရားအတားအဆီးများ မရှိသင့်ကြောင်း ယေရှု၏ လှုံ့ဆော်မှုဖြစ်စေသောသော ပုံဥပမာက တင်ပြသည်။ မှန်ပါသည်၊ ခရစ်ယာန်များသည် တူညီသော လူမှုရေးအဆင့်အတန်း၊ လူမျိုး သို့မဟုတ် အမျိုးအနွယ်နှင့် ယုံကြည်သူချင်းတို့ကိုသာ မဟုတ်ဘဲ “ခပ်သိမ်းသောသူတို့အား ကျေးဇူးပြု” ရန် ညွှန်ကြားခံရကြသည်။—ဂလာတိ ၆:၁၀။
ရှာဖွေလေ့လာ ဘုရားရေးရာရတနာ
(လုကာ ၁၀:၁၈) အဲဒီအခါ ယေရှုက “စာတန်ဟာ လျှပ်စီးလို ကောင်းကင်ကနေ ကျသွားတာကို ကျွန်တော်မြင်တယ်။
nwtsty လု ၁၀:၁၈ လေ့လာမှု မှတ်စု
စာတန်ဟာ လျှပ်စီးလို ကောင်းကင်ကနေ ကျသွားတာကို ကျွန်တော်မြင်တယ်– ကောင်းကင်ကနေ စာတန် ကျလာတာကို ဖြစ်ပျက်ခဲ့ပြီးတဲ့အလား ယေရှု ပရောဖက်ပြုပြောနေတာ ဖြစ်တယ်။ ဗ ၁၂:၇-၉ က ကောင်းကင်မှာ စစ်ဖြစ်တာ၊ မေရှိယနိုင်ငံ မွေးဖွားချိန်မှာ စာတန်ကျသွားတာကို ဖော်ပြတယ်။ အနာဂတ်မှာဖြစ်မယ့် စစ်ပွဲမှာ စာတန်နဲ့ သူ့နတ်ဆိုးတွေ တကယ်စစ်ရှုံးမယ်ဆိုတာ အဲဒီကျမ်းချက်မှာ ယေရှု အလေးပေး ဖော်ပြတယ်။ ဘာကြောင့်လဲဆိုတော့ မစုံလင်သူ လူသားတွေဖြစ်တဲ့ တပည့် ၇၀ ဟာ ဘုရားပေးတန်ခိုးနဲ့ နတ်ဆိုးတွေကို အနိုင်ရခဲ့လို့ပဲ။—လု ၁၀:၁၇။
လုကာကျမ်းမှ ပေါ်လွင်ချက်များ
၁၀:၁၈—ယေရှုက “စာတန်သည် လျှပ်စစ်ကဲ့သို့ ကောင်းကင်မှကျသည်ကို ငါမြင်ပြီ” ဟုတပည့် ၇၀ ကိုမိန့်ဆိုစဉ် အဘယ်အရာကို ဆိုလိုသနည်း။ စာတန်သည် ကောင်းကင်မှ နှင်ချခံရပြီးဖြစ်၏ဟု ယေရှုမဆိုခဲ့ပါ။ ၁၉၁၄ တွင် ကောင်းကင်၌ ဘုရင်အဖြစ် ခရစ်တော်ခန့်အပ်မခံရမီအထိ ထိုသို့မဖြစ်ပျက်ခဲ့ပေ။ (ဗျာ. ၁၂:၁-၁၀) ယေရှု၏ဆိုလိုရင်းကို ကျွန်ုပ်တို့ တထစ်ချမသိနိုင်သော်လည်း အနာဂတ်ဖြစ်ရပ်တစ်ခုကို အတိတ်ဖြစ်ရပ်အဖြစ် မိန့်ဆိုခြင်းဖြင့် ယင်းသည် အမှန်ဖြစ်ပျက်လာမည်ကို ယေရှုအလေးပေးနေခြင်း ဖြစ်နိုင်သည်။
(လုကာ ၁၁:၅-၉) အဲဒီနောက် ယေရှုက “ခင်ဗျားတို့မှာ မိတ်ဆွေတစ်ယောက်ရှိတယ် ဆိုပါစို့။ မိတ်ဆွေရဲ့အိမ်ကို ညသန်းခေါင်ကြီး သွားပြီး ‘မုန့်သုံးလုံးလောက် ချေးပါဦး။ ၆ ငါ့သူငယ်ချင်းတစ်ယောက် ခရီးသွားရင်း အခုလေးတင် ရောက်လာတာ။ သူ့ကိုကျွေးစရာ ဘာမှမရှိလို့ပါ’ ဆိုပြီးပြောတဲ့အခါ၊ ၇ မိတ်ဆွေက ‘မနှောင့်ယှက်ပါနဲ့ကွာ။ တံခါးပိတ်ပြီးလို့ ငါ့သားသမီးတွေတောင် အိပ်ကုန်ပြီ။ ထပြီး မပေးနိုင်ဘူး’ လို့ အိမ်ထဲကနေ လှမ်းပြောတယ်။ ၈ ကျွန်တော်ပြောမယ်။ သူက မိတ်ဆွေဖြစ်နေတာတောင် အိပ်ရာကထပြီး မပေးချင်ဘူး။ ဒါပေမဲ့ တောင်းတဲ့သူက ဇွဲမလျှော့ဘဲ တောင်းနေတော့ လိုသမျှ ထပေးလိုက်ရတာပဲ။ ၉ ဒါကြောင့် ကျွန်တော်ပြောမယ်။ တောင်းမြဲတောင်းပါ၊ ရလိမ့်မယ်။ ရှာမြဲရှာပါ၊ တွေ့လိမ့်မယ်။ ခေါက်မြဲခေါက်ပါ၊ တံခါးပွင့်လာလိမ့်မယ်။
nwtsty လု ၁၁:၅-၉ လေ့လာမှု မှတ်စု
မုန့်သုံးလုံးလောက် ချေးပါဦး– ဒီပုံဥပမာအရ အရှေ့အလယ်ပိုင်း ယဉ်ကျေးမှုမှာ ဧည့်ဝတ်ပြုတာဟာ အရေးကြီးတဲ့ တာဝန်တစ်ခုပဲ။ မထင်မှတ်ဘဲ ညသန်းခေါင်မှာ ဧည့်သည်ရောက်လာတာက အဲဒီခေတ်အခါ ခရီးသွားလာရေးဟာ အသေအချာပြောလို့မရကြောင်း ဖော်ပြတယ်။ အဲဒီအပြင် ညနက်ချိန်မှာတောင် အိမ်ရှင်ထပြီး ကျွေးမွေးဖို့ တာဝန်ရှိတယ်၊ စားစရာချေးရတဲ့အထိ လုပ်ဆောင်ပေးဖို့ လိုတယ်လို့ ယူမှတ်ကြတယ်။
မနှောင့်ယှက်ပါနဲ့ကွာ- ဒီပုံဥပမာထဲက အိမ်နီးချင်း မကူညီချင်တာဟာ မခင်မင်လို့မဟုတ်ဘဲ အိပ်ရာဝင်ပြီးနေလို့ဖြစ်တယ်။ အဲဒီခေတ်က အိမ်တွေ၊ အထူးသဖြင့် ဆင်းရဲသားတွေရဲ့ အိမ်တွေမှာ အိပ်ခန်းကြီးတစ်ခန်းပဲ ရှိတယ်။ အိမ်ရှင်ထလိုက်ရင် အိပ်နေတဲ့ ကလေးတွေ အပါအဝင် တစ်မိသားစုလုံး နိုးသွားမယ်။
ဇွဲမလျှော့ဘဲ တောင်းနေတော့– ဒီမှာအသုံးပြုထားတဲ့ ဂရိစကားလုံးက စာသားအရ “အားမနာတတ်တာ” ဒါမှမဟုတ် “အရှက်မရှိတာ” ကိုဆိုလိုနိုင်တယ်။ ဒီကျမ်းချက်မှာတော့ ဇွဲမလျှော့ဘဲ တောင်းတာ၊ မရမက တောင်းတာကို ဆိုလိုတယ်။ ယေရှုရဲ့ ပုံဥပမာထဲကသူဟာ သူလိုချင်တာရဖို့ မရှက်ဘဲ မရမက တောင်းတယ်။ တပည့်တွေလည်း အဲဒီလိုပဲ ဆုတောင်းသင့်တယ်လို့ ယေရှု ပြောနေတာဖြစ်တယ်။—လု ၁၁:၉၊ ၁၀။
ကျမ်းစာဖတ်ရှုခြင်း
(လုကာ ၁၀:၁-၁၆) အဲဒီနောက် သခင်ယေရှုက နောက်ထပ်တပည့် ၇၀ ကိုခန့်ပြီး သူသွားမယ့်မြို့ရွာတွေဆီ နှစ်ယောက်တစ်တွဲ ကြိုလွှတ်လိုက်တယ်။ ၂ ပြီးတော့ အခုလိုမှာတယ်- “စပါးရိတ်စရာ အများကြီးရှိတယ်။ လုပ်သားတွေကတော့ နည်းနေတယ်။ ဒါကြောင့် လုပ်သားတွေ စေလွှတ်ပေးဖို့ စပါးရှင်ဆီ ဆုတောင်းကြပါ။ ၃ ခင်ဗျားတို့ သွားနိုင်ပြီ။ ဝံပုလွေအုပ်ထဲ သိုးတွေလွှတ်သလို ခင်ဗျားတို့ကို ကျွန်တော်လွှတ်တယ်။ ၄ ငွေအိတ်၊ ရိက္ခာအိတ်၊ ဖိနပ်တွေ မယူသွားပါနဲ့။ လမ်းမှာ ဘယ်သူ့ကိုမှ နှုတ်မဆက်ပါနဲ့။ ၅ အိမ်ထဲဝင်တာနဲ့ ‘ဒီအိမ်မှာ ငြိမ်သက်ခြင်းရှိပါစေ’ လို့ အရင်ပြောပါ။ ၆ အဲဒီအိမ်မှာ ငြိမ်သက်ခြင်းလိုလားသူ ရှိရင် သူ့အပေါ် ငြိမ်သက်ခြင်း တည်နေလိမ့်မယ်။ မရှိရင်တော့ ငြိမ်သက်ခြင်းက ခင်ဗျားတို့အပေါ်မှာပဲ တည်နေလိမ့်မယ်။ ၇ ငြိမ်သက်ခြင်းလိုလားသူ ရှိတဲ့အိမ်မှာပဲ တည်းခိုပါ။ အလုပ်လုပ်သူဟာ လုပ်ခရထိုက်တဲ့အတွက် အိမ်ရှင်ကျွေးမွေးတာကို စားသောက်ပါ။ နောက်တစ်အိမ်ကို မပြောင်းပါနဲ့။ ၈ “မြို့တစ်မြို့ထဲ ဝင်တဲ့အခါ ခင်ဗျားတို့ကို လက်ခံကြိုဆိုရင် သူတို့ တည်ခင်းတာကို စားပါ။ ၉ လူနာတွေကို ကုပေးပါ။ ‘ဘုရားသခင့်နိုင်ငံတော် နီးနေပြီ’ လို့ဟောပါ။ ၁၀ မြို့တစ်မြို့ထဲ ဝင်တဲ့အခါ ခင်ဗျားတို့ကို လက်မခံရင်တော့ လမ်းမပေါ်ထွက်ပြီး၊ ၁၁ ‘ကျွန်တော်တို့ခြေထောက်က ဖုန်တွေကို ခါလိုက်ပြီ။ ဒါပေမဲ့ ဘုရားသခင့်နိုင်ငံတော် နီးနေပြီ ဆိုတာကိုတော့ သိထားကြပါ’ လို့ပြောပါ။ ၁၂ ကျွန်တော် ပြောမယ်။ တရားစီရင်ရာနေ့မှာ အဲဒီမြို့ဟာ သောဒုံမြို့ထက် ပိုခံရလိမ့်မယ်။ ၁၃ “ခေါရာဇိန်မြို့သားတို့၊ အဖြစ်ဆိုးကြုံရလိမ့်မယ်။ ဗက်ဇဲဒမြို့သားတို့၊ အဖြစ်ဆိုးကြုံရလိမ့်မယ်။ ခင်ဗျားတို့မြို့မှာ ဖြစ်ခဲ့တဲ့ တန်ခိုးကြီးလုပ်ရပ်တွေသာ တိုင်ရာနဲ့ ဆိုင်ဒုန်မြို့မှာ ဖြစ်ခဲ့ရင် ဟိုးအရင်ကတည်းက အဲဒီမြို့သားတွေ အထည်ကြမ်းကိုဝတ်၊ ပြာပေါ်ထိုင်ပြီး နောင်တရနေလောက်ပြီ။ ၁၄ တရားစီရင်ရာနေ့မှာ ခင်ဗျားတို့ဟာ တိုင်ရာနဲ့ ဆိုင်ဒုန်မြို့သားတွေထက် ပိုခံရလိမ့်မယ်။ ၁၅ ကပေရနောင်မြို့သားတို့၊ ခင်ဗျားတို့ မိုးထိအောင် ချီးမြှောက်ခံရမယ်လို့များ ထင်နေသလား။ မဟုတ်ဘူး။ သင်္ချိုင်းအထိ ဆင်းသွားရမှာ။ ၁၆ “ခင်ဗျားတို့ရဲ့စကားကို နားထောင်တာဟာ ကျွန်တော့်စကားကို နားထောင်တာပဲ။ ခင်ဗျားတို့ကို အရေးမလုပ်တာဟာ ကျွန်တော့်ကို အရေးမလုပ်တာပဲ။ ကျွန်တော့်ကို အရေးမလုပ်တာဟာ ကျွန်တော့်ကို စေလွှတ်တဲ့အရှင်ကို အရေးမလုပ်တာပဲ။”
ဇူလိုင် ၂၃-၂၉
ကျမ်းစာထဲက အဖိုးတန်ဘဏ္ဍာများ | လုကာ ၁၂-၁၃
“ခင်ဗျားတို့ဟာ စာငှက်လေးတွေထက် ပိုတန်ဖိုးရှိပါတယ်”
(လုကာ ၁၂:၆) စာငှက်ငါးကောင်ကို ငွေနှစ်ပြားနဲ့ ဝယ်လို့ရတယ် မဟုတ်လား။ အဲဒီစာငှက်တစ်ကောင်ကိုမှ ဘုရားသခင် မမေ့ဘူး။
nwtsty လု ၁၂:၆ လေ့လာမှု မှတ်စု
စာငှက်လေးတွေ– ဂရိစကားလုံး စတရိုသီအွန် ဟာ သေးငယ်တာကို ဖော်ပြတဲ့စကားလုံးဖြစ်ပြီး အများအားဖြင့် စာငှက်လေးတွေကို ရည်ညွှန်းတယ်။ စားစရာအဖြစ် ရောင်းတဲ့ငှက်တွေထဲမှာ စာငှက်ဟာ စျေးအပေါဆုံးပဲ။
(လုကာ ၁၂:၇) ခင်ဗျားတို့ရဲ့ ဆံပင်တွေကိုတောင် အကုန် ရေတွက်ထားတယ်။ ဒါကြောင့် မကြောက်ပါနဲ့။ ခင်ဗျားတို့ဟာ စာငှက်လေးတွေထက် ပိုတန်ဖိုးရှိပါတယ်။
nwtsty လု ၁၂:၇ လေ့လာမှု မှတ်စု
ခင်ဗျားတို့ရဲ့ ဆံပင်တွေကိုတောင် အကုန် ရေတွက်ထားတယ်– လူတစ်ဦးရဲ့ဆံပင်ဟာ ပျမ်းမျှအနေနဲ့ ၁၀၀,၀၀၀ ခန့်ရှိတယ်။ ဒီလို အသေးစိတ် အချက်အလက်တွေကို ယေဟောဝါ အသေအချာသိနေတာက ခရစ်တော်ရဲ့ နောက်လိုက်တစ်ယောက်စီကို ကိုယ်တော် စိတ်ဝင်စားကြောင်း အာမခံတယ်။
(လုကာ ၁၂:၇) ခင်ဗျားတို့ရဲ့ ဆံပင်တွေကိုတောင် အကုန် ရေတွက်ထားတယ်။ ဒါကြောင့် မကြောက်ပါနဲ့။ ခင်ဗျားတို့ဟာ စာငှက်လေးတွေထက် ပိုတန်ဖိုးရှိပါတယ်။
အဘယ်အရာကမျှ “ဘုရားသခင်၏ မေတ္တာတော်နှင့် ငါတို့ကို မကွာစေနိုင်”
၄ ပထမအချက်မှာ ဘုရားသခင်သည် မိမိ၏ကျေးကျွန်တစ်ဦးစီ၌ တန်ဖိုးရှိရာကို မြင်ကြောင်း သမ္မာကျမ်းစာက တိုက်ရိုက်သွန်သင်သည်။ ဥပမာ၊ ယေရှု ဤသို့မိန့်တော်မူခဲ့သည်– “စာငှက်နှစ်ကောင်ကို အဿရိတစ်ပြားဖိုးနှင့် ဝယ်ရသည်မဟုတ်လော။ သင်တို့အဘအခွင့်မရှိလျှင် ထိုစာငှက်တစ်ကောင်မျှ မြေသို့မကျရ။ သင်တို့ဆံပင်သည်လည်း အကုန်အစင်ရေတွက်လျက်ရှိ၏။ ထို့ကြောင့် မကြောက်ကြနှင့်။ သင်တို့သည် စာငှက်အများတို့ထက် သာ၍မြတ်ကြ၏။” (မဿဲ ၁၀:၂၉-၃၁) ထိုစကားများသည် ပထမရာစုရှိ ယေရှု၏တရားကို နာသူတို့အတွက် အဘယ်အဓိပ္ပာယ်ရှိကြောင်း သုံးသပ်ကြည့်ပါ။
၅ အဘယ်ကြောင့် စာငှက်တစ်ကောင်ကို ဝယ်ရသနည်းဟု သင်သိလိုပေမည်။ ယေရှုအချိန်က စားစရာအဖြစ် ရောင်းသောငှက်များတွင် စာငှက်သည် ဈေးအပေါဆုံးဖြစ်သည်။ တန်ဖိုးနည်းသော ငွေအသပြာတစ်ပြားဖြင့် စာငှက်နှစ်ကောင်ကို ဝယ်ယူနိုင်ကြောင်း သတိပြုပါ။ သို့သော် ယေရှုက လူတစ်ဦးသည် အဿရိနှစ်ပြားပေးနိုင်လျှင် စာငှက်လေးကောင်မဟုတ်ဘဲ ငါးကောင်ဝယ်ယူနိုင်ကြောင်း နောက်ပိုင်း၌ မိန့်တော်မူခဲ့၏။ ငှက်အပိုတစ်ကောင်၌ တန်ဖိုးလုံးဝမရှိသည့်အလား အဆစ်ထည့်ပေးလိုက်သည်။ လူတို့အမြင်တွင် ထိုငှက်များသည် တန်ဖိုးမရှိဘဲဖြစ်ပေမည်၊ သို့သော် ဖန်ဆင်းရှင်သည် ၎င်းတို့ကို မည်သို့ရှုမြင်သနည်း။ ယေရှုက “ထိုစာငှက်တစ်ကောင်ကိုမျှ [အဆစ်ပေးသောစာငှက်ကိုပင်] ဘုရားသခင်မေ့လျော့တော်မမူ” ဟုမိန့်တော်မူခဲ့သည်။ (လုကာ ၁၂:၆၊ ၇) ယခု ယေရှု၏ဆိုလိုရင်းကို ကျွန်ုပ်တို့ သဘောပေါက်လာပေလိမ့်မည်။ ယေဟောဝါသည် စာငှက်လေးတစ်ကောင်ကို ဤမျှတန်ဖိုးထားလျှင် လူတစ်ဦးသည် မည်မျှပို၍ တန်ဖိုးရှိလိမ့်မည်ဖြစ်ခြင်း! ယေရှုရှင်းပြသကဲ့သို့ပင် ကျွန်ုပ်တို့နှင့်ပတ်သက်၍ အစစအရာရာကို ယေဟောဝါ သိတော်မူ၏။ စဉ်းစားကြည့်ပါ၊ ကျွန်ုပ်တို့ခေါင်းပေါ်မှ ဆံပင်များကိုပင် ရေတွက်ထားသည်တကား!
ရှာဖွေလေ့လာ ဘုရားရေးရာရတနာ
(လုကာ ၁၃:၂၄) ကျဉ်းတဲ့တံခါးကနေ ဝင်နိုင်ဖို့ အားသွန်ခွန်စိုက် ကြိုးစားပါ။ ကျွန်တော်ပြောမယ်။ လူအတော်များများ ဝင်ဖို့ကြိုးစားပေမဲ့ မဝင်နိုင်ကြဘူး။
nwtsty လု ၁၃:၂၄ လေ့လာမှု မှတ်စု
အားသွန်ခွန်စိုက် ကြိုးစားပါ– ဒါမှမဟုတ် “ကြိုးစားအားထုတ်နေပါ။” ကျဉ်းတဲ့တံခါးကနေ ဝင်နိုင်ဖို့ စိတ်ရောကိုယ်ပါ လုပ်ဆောင်ရမယ်ဆိုတာကို ယေရှု အလေးအနက် တိုက်တွန်းတယ်။ ဒီကျမ်းချက်ကို ကိုးကားစာပေအသီးသီးက “အစွမ်းကုန်ကြိုစား၊ အတတ်နိုင်ဆုံးကြိုးစား” ဆိုပြီး ပြန်ဆိုတယ်။ ဒီဂရိကြိယာ အဂိုနီဇိုမိုင်ဟာ အားကစားပြိုင်ပွဲတွေကို ရည်ညွှန်းရာမှာ သုံးလေ့ရှိတဲ့ ဂရိနာမ် အဂေါင် နဲ့ ဆက်စပ်နေတယ်။ ဟီ ၁၂:၁ မှာ ဒီနာမ်ကို ခရစ်ယာန် အသက် “ပြေးပွဲ” နဲ့ပတ်သက်ပြီး အသုံးပြုထားတယ်။ “ကြိုးစားတိုက်လှန်” (ဖလ ၁:၃၀။ ကော ၂:၁) ဒါမှမဟုတ် “တိုက်ပွဲ” (၁တိ ၆:၁၂။ ၂တိ ၄:၇) အတွက်လည်း အသုံးပြုထားတယ်။ လု ၁၃:၂၄ မှာ အသုံးပြုထားတဲ့ ဂရိကြိယာကို “ပြိုင်ပွဲဝင်” (၁က ၉:၂၅)၊ “အစွမ်းကုန်ကြိုးစားအားထုတ်” (ကော ၁:၂၉။ ၄:၁၂။ ၁တိ ၄:၁၀) နဲ့ “တိုက်” (၁တိ ၆:၁၂) လို့လည်း ပြန်ဆိုတယ်။ ဒီအသုံးအနှုန်းရဲ့ မူလအစဟာ အားကစားပြိုင်ပွဲတွေနဲ့ ဆက်စပ်နေတာကြောင့် ယေရှုတိုက်တွန်းခဲ့တဲ့ ကြိုးစားမှုဟာ ဆုရဖို့ ပြိုင်ပွဲဝင်သူ အားကြိုးမာန်တက် လုပ်ဆောင်တဲ့ ကြိုးစားမှုမျိုးဖြစ်မယ်လို့ တချို့က ဆိုကြတယ်။
(လုကာ ၁၃:၃၃) ကျွန်တော်က ဒီနေ့၊ မနက်ဖြန်၊ သန်ဘက်ခါ ခရီးဆက်ရဦးမယ်။ ပရောဖက်မှန်ရင် ဂျေရုဆလင်မြို့ပြင်မှာ အသတ်ခံဖို့ မဖြစ်နိုင်ဘူး။
nwtsty လု ၁၃:၃၃ လေ့လာမှု မှတ်စု
မဖြစ်နိုင်ဘူး– ဒါမှမဟုတ် “မယုံနိုင်လောက်အောင် (စဉ်းစားလို့ မရအောင်)။” မေရှိယဟာ ဂျေရုဆလင်မြို့မှာ သေရမယ်ဆိုတဲ့ ကျမ်းစာ ပရောဖက်ပြုချက် မရှိပေမဲ့ ဒံ ၉:၂၄-၂၆ ကိုဖတ်ပြီး အဲဒီလို ကောက်ချက်ချတာ ဖြစ်နိုင်တယ်။ အဲဒီအပြင် ပရောဖက်တစ်ပါး၊ အထူးသဖြင့် မေရှိယကို ဂျူးတွေ သတ်မယ်ဆိုရင် အဲဒီမြို့မှာပဲဖြစ်လိမ့်မယ်လို့ ယူမှတ်ကြတယ်။ ဂျေရုဆလင်မြို့ဟာ အဖွဲ့ဝင် ၇၁ ဦးပါဝင်တဲ့ ဂျူးတရားရုံးချုပ် ရှိရာမြို့ ဖြစ်တဲ့အတွက် ပရောဖက်အတုအယောင်လို့ စွပ်စွဲခံရသူတွေကို အဲဒီမှာ ရုံးတင်စစ်ဆေးရမယ်။ ဂျေရုဆလင်မြို့မှာ ဘုရားဆီ ပုံမှန်ပူဇော်သက္ကာတွေ ဆက်သတာ၊ ပသခါသိုးသငယ်ကို သတ်တာကို ယေရှု ရည်ညွှန်းနေတာလည်း ဖြစ်နိုင်တယ်။ နောက်ဆုံး ယေရှုပြောသလို ဖြစ်လာတယ်။ ဂျေရုဆလင်မြို့က ဂျူးတရားရုံးချုပ်ရှေ့ ယေရှုရောက်သွားပြီး ပြစ်ဒဏ်စီရင်ခံခဲ့ရတယ်။ “ပသခါသိုးသငယ်” အဖြစ် ဂျေရုဆလင်မြို့ရိုးအနီးမှာ သေဆုံးသွားတယ်။—၁က ၅:၇။
ကျမ်းစာဖတ်ရှုခြင်း
(လုကာ ၁၂:၂၂-၄၀) ယေရှုက တပည့်တွေကို “ဒါကြောင့် ကျွန်တော်ပြောမယ်– အသက်ရှင်ရေးအတွက် ဘာစားရမလဲဆိုပြီး မစိုးရိမ်ကြနဲ့တော့။ ခန္ဓာကိုယ်အတွက် ဘာဝတ်ရမလဲဆိုပြီး မစိုးရိမ်ကြနဲ့တော့။ ၂၃ အစာထက် အသက်က ပိုအရေးကြီးတယ်။ အဝတ်ထက် ကိုယ်ခန္ဓာက ပိုအရေးကြီးတယ်။ ၂၄ ကျီးအတွေကို ဆင်ခြင်သုံးသပ်ကြည့်ပါ။ မျိုးစေ့ကြဲတာ၊ ရိတ်သိမ်းတာ မလုပ်ဘူး။ သူတို့မှာ ကျီတွေ၊ သိုလှောင်ခန်းတွေ မရှိဘူး။ ဒါပေမဲ့ ဘုရားသခင်က သူတို့ကို ကျွေးထားတာပဲ။ ခင်ဗျားတို့ဟာ အဲဒီငှက်တွေထက် ပိုတန်ဖိုးရှိတယ် မဟုတ်လား။ ၂၅ စိုးရိမ်ပူပန်နေလို့ကော ခင်ဗျားတို့သက်တမ်း တစ်တောင်လောက် ပိုရှည်လာလို့လား။ ၂၆ အဲဒါလေးတောင် မလုပ်နိုင်ဘူးဆိုရင် ကျန်တာတွေအတွက် ဘာလို့ စိုးရိမ်နေသေးလဲ။ ၂၇ တောနှင်းပန်းတွေ ရှင်သန်နေပုံကို စဉ်းစားကြည့်ပါ။ နှင်းပန်းတွေဟာ ပင်ပင်ပန်းပန်း မလုပ်ဘူး။ ချည်လည်း မငင်ဘူး။ ကျွန်တော်ပြောမယ်။ ခံ့ခံ့ညားညား ဝတ်ဆင်တဲ့ ရှောလမုန်မင်းတောင် အဲဒီနှင်းပန်းတစ်ပင်လို လှလှပပဖြစ်အောင် မဆင်မြန်းနိုင်ဘူး။ ၂၈ ယုံကြည်ခြင်းနည်းသူတို့၊ ဒီနေ့ ရှင်သန်ပြီး မနက်ဖြန် မီးထဲရောက်သွားမယ့် တောပင်တွေကိုတောင် ဘုရားသခင်က အဲဒီလိုဆင်မြန်းပေးတယ်ဆိုရင် ခင်ဗျားတို့ကို ဒီထက်မက ဆင်မြန်းပေးမယ် မဟုတ်လား။ ၂၉ ဒါကြောင့် ဘာစားရမလဲ၊ ဘာသောက်ရမလဲဆိုပြီး မစိုးရိမ်ကြနဲ့တော့။ အစိုးရိမ်လွန်တာမျိုး မဖြစ်ကြနဲ့တော့။ ၃၀ ဒါတွေအားလုံးကို လူမျိုးခြားတွေ အသည်းအသန် ရှာဖွေတတ်ကြတယ်။ အဲဒါတွေကို ခင်ဗျားတို့လိုအပ်မှန်း အဖဘုရား သိပါတယ်။ ၃၁ ဒါကြောင့် ဘုရားသခင့်နိုင်ငံတော်ကို အမြဲဦးစားထားကြပါ။ နောက်မှ အဲဒါတွေကို ဖြည့်ဆည်းပေးလိမ့်မယ်။ ၃၂ “သိုးစုငယ်၊ မကြောက်နဲ့။ အဖဘုရားက ခင်ဗျားတို့ကို နိုင်ငံတော်ပေးဖို့ ဆုံးဖြတ်ပြီးပြီ။ ၃၃ ကိုယ့်ပစ္စည်းတွေကို ရောင်းပြီး ပေးကမ်းစွန့်ကြဲကြပါ။ မဆွေးမြေ့နိုင်တဲ့ ငွေအိတ်ကို ရယူပါ၊ တစ်နည်းပြောရရင် မပျက်စီးနိုင်တဲ့ ကောင်းကင်ဘဏ္ဍာကို စုဆောင်းပါ။ အဲဒီဘဏ္ဍာကို သူခိုး ဝင်မခိုးနိုင်ဘူး။ ပိုးမွှား မဖျက်ဆီးနိုင်ဘူး။ ၃၄ ကိုယ့်ဘဏ္ဍာရှိတဲ့နေရာမှာ ကိုယ့်စိတ် ရောက်နေတတ်တယ်။ ၃၅ “ခင်ဗျားတို့၊ ခါးကိုစည်းပြီး အသင့်ရှိနေပါ။ မီးခွက်တွေကို ထွန်းထားကြပါ။ ၃၆ မင်္ဂလာပွဲကနေ သခင် ပြန်လာပြီး တံခါးခေါက်တဲ့အခါ ချက်ချင်းဖွင့်ပေးဖို့ စောင့်နေတဲ့ ကျွန်တွေလို ဖြစ်ကြပါ။ ၃၇ သခင်ပြန်လာလို့ သတိနဲ့စောင့်နေတဲ့ ကျွန်တွေကို တွေ့ရင် အဲဒီကျွန်တွေဟာ ပျော်ရွှင်ချမ်းမြေ့ရလိမ့်မယ်။ ကျွန်တော် မှန်တာကို ပြောမယ်။ အဲဒီကျွန်တွေကို စားပွဲမှာ ထိုင်ခိုင်း၊ သခင်ကိုယ်တိုင် ခါးကိုစည်းပြီး အလုပ်အကျွေးပြုလိမ့်မယ်။ ၃၈ ညဉ့်နက်မှ ဖြစ်စေ၊ သန်းခေါင်ကျော်မှ ဖြစ်စေ သခင်ရောက်လာပြီး သူတို့အသင့်ဖြစ်နေတာကို တွေ့ရင် အဲဒီကျွန်တွေဟာ ပျော်ရွှင်ချမ်းမြေ့ရလိမ့်မယ်။ ၃၉ တစ်ခုတော့ သိထားကြပါ- အိမ်ရှင်က သူခိုးလာမယ့်အချိန်ကို သိရင် အိမ်ဖောက်ထွင်းမခံရအောင် မအိပ်ဘဲ စောင့်နေမှာပဲ။ ၄၀ ခင်ဗျားတို့လည်း အသင့်ရှိနေကြပါ၊ လူသားဟာ ခင်ဗျားတို့ မထင်မှတ်တဲ့အချိန်မှာ လာလိမ့်မယ်” လို့ပြောတယ်။
ဇူလိုင် ၃၀–ဩဂုတ် ၅
ကျမ်းစာထဲက အဖိုးတန်ဘဏ္ဍာများ | လုကာ ၁၄-၁၆
“ပျောက်တဲ့သား ပုံဥပမာ”
(လုကာ ၁၅:၁၁-၁၆) အဲဒီနောက် ယေရှု ပြောတာက- “လူတစ်ယောက်မှာ သားနှစ်ယောက် ရှိတယ်။ ၁၂ သားငယ်က ‘အဖေ၊ ကျွန်တော်ရမယ့်အမွေ ခွဲပေးပါ’ လို့တောင်းတဲ့အခါ အဖေက အမွေခွဲပေးလိုက်တယ်။ ၁၃ ရက်အနည်းငယ်ကြာတော့ သားငယ်က အမွေဥစ္စာရှိသမျှကို ယူပြီး တိုင်းတစ်ပါးကို ထွက်သွားတယ်။ အဲဒီမှာ အပျော်အပါး လိုက်စားပြီး ပိုင်ဆိုင်သမျှကို သုံးဖြုန်းပစ်တယ်။ ၁၄ ဒီလိုနဲ့ ရှိသမျှကုန်သွားတဲ့အပြင် အဲဒီပြည်မှာ အကြီးအကျယ် အငတ်ဘေးဆိုက်တဲ့အတွက် သူငတ်ပြတ်နေတော့တယ်။ ၁၅ ဒါနဲ့ ပြည်သားတစ်ယောက်ဆီ သွားပြီး အတင်းခိုကပ်နေတော့ အဲဒီလူက သူ့ကို လယ်တောမှာ ဝက်ကျောင်းခိုင်းတယ်။ ၁၆ သူဟာ ဝက်တွေစားတဲ့ ပဲတောင့်ကိုတောင် စားချင်စိတ်ပေါက်လာတယ်။ ဘယ်သူမှ သူ့ကို စားစရာ မပေးကြဘူး။
nwtsty လု ၁၅:၁၁-၁၆ လေ့လာမှု မှတ်စု
လူတစ်ယောက်မှာ သားနှစ်ယောက် ရှိတယ်– သားမိုက် (“ပျောက်တဲ့သား” လို့လည်း ခေါ်) ပုံဥပမာရဲ့ အသွင်တချို့ဟာ ထူးခြားတယ်။ ယေရှုရဲ့ အရှည်ဆုံး ပုံဥပမာဖြစ်တယ်။ ထူးခြားတာတစ်ခုက မိသားစုဆက်ဆံရေးပဲ။ တခြားပုံဥပမာတွေမှာ ယေရှုက သက်မဲ့တွေဖြစ်တဲ့ မျိုးစေ့နဲ့ မြေအမျိုးမျိုး၊ ဒါမှမဟုတ် သခင်နဲ့ကျွန် ဆက်ဆံရေးအကြောင်း ဖော်ပြလေ့ရှိတယ်။ (မ ၁၃:၁၈-၃၀။ ၂၅:၁၄-၃၀။ လု ၁၉:၁၂-၂၇) ဒီပုံဥပမာမှာတော့ သားအဖနှစ်ယောက်ရဲ့ ရင်းနှီးတဲ့ဆက်ဆံရေးအကြောင်း ဖော်ပြတယ်။ ဒီအကြောင်း ကြားတဲ့သူအများစုမှာ ပုံဥပမာထဲက အဖေမျိုး ရှိချင်မှရှိမယ်။ ဒီပုံဥပမာက ကျွန်တော်တို့ရဲ့ ကောင်းကင်ဖခင်ဟာ ကိုယ်တော်နဲ့အတူ ဆက်ရှိနေတဲ့၊ လမ်းလွဲပြီးမှ ပြန်လှည့်လာတဲ့ မိမိရဲ့ မြေကြီးပေါ်က သားသမီးတွေအပေါ် ဘယ်လောက်စာနာတယ်၊ မေတ္တာရှိတယ်ဆိုတာ ဖော်ပြတယ်။
သားငယ်– မောရှေပညတ်အရ သားဦးဟာ ဝေစုနှစ်ဆ ရတယ်။ (တရ ၂၁:၁၇) ဒီပုံဥပမာထဲက သားကြီးဟာ သားဦးဖြစ်မယ်ဆိုရင် သားငယ်ရဲ့ အမွေက အစ်ကိုကြီးအမွေရဲ့ တစ်ဝက်ဖြစ်မယ်။
သုံးဖြုန်းပစ်တယ်– ဒီမှာအသုံးပြုထားတဲ့ ဂရိစကားလုံးက “(အဘက်ဘက်သို့) ဖြန့်ကြဲ” လို့ အဓိပ္ပာယ်ရှိတယ်။ (လု ၁:၅၁။ တ ၅:၃၇) မ ၂၅:၂၄၊ ၂၆ မှာ အဲဒီစကားလုံးကို “လှေ့” ဆိုပြီး ပြန်ဆိုထားတယ်။ ဒီမှာ ဖြုန်းတီးတဲ့၊ အသုံးကြီးတဲ့ သဘောမျိုးနဲ့ သုံးထားတယ်။
အပျော်အပါး လိုက်စား– ဒါမှမဟုတ် “ဖြုန်းတီးတဲ့ (ဗရမ်းဗတာ၊ စည်းလွတ်ဝါးလွတ်) ဘဝပုံစံ။” ဧ ၅:၁၈။ တိ ၁:၆။ ၁ပ ၄:၄ တို့မှာ အဲဒါနဲ့ အဓိပ္ပာယ်ဆင်တူတဲ့ ဂရိစကားလုံးကို သုံးထားတယ်။ အဲဒီဂရိစကားလုံးမှာ အသုံးကြီးတဲ့၊ ဖြုန်းတီးတဲ့ ဘဝပုံစံမျိုး ပါဝင်တဲ့အတွက် ဘာသာပြန်ကျမ်းတချို့က “ဖြုန်းတီးတဲ့ဘဝ” ဆိုတဲ့ အသုံးအနှုန်းကို သုံးထားတယ်။
ဝက်ကျောင်း– ပညတ်တရားအရ ဝက်တွေက မသန့်ရှင်းဘူး။ ဒါကြောင့် ဂျူးတွေအတွက် ဝက်ကျောင်းရတဲ့အလုပ်ဟာ အောက်တန်းကျတဲ့ ရွံစရာအလုပ် ဖြစ်တယ်။—ဝ ၁၁:၇၊ ၈။
ဝက်တွေစားတဲ့ ပဲတောင့်– အဲဒီပဲတောင့်တွေဟာ ပြောင်လက်တဲ့ ခရမ်းညိုရောင်အခွံရှိပြီး ဂရိအခေါ်ရဲ့ အဓိပ္ပာယ်အတိုင်း (ကဲရာတီအွန်၊ “ချိုငယ်”) ချိုပုံရှိတယ်။ အခုချိန်အထိ မြင်း၊ နွားနဲ့ ဝက်စာအဖြစ် အဲဒီပဲတောင့်တွေကို သုံးနေတုန်းပဲ။ အဲဒီလူငယ်ဟာ ဝက်စာကိုစားချင်စိတ် ပေါက်တဲ့အထိ ဘဝပျက်သွားတယ်။—လု ၁၅:၁၅ လေ့လာမှု မှတ်စု ကိုကြည့်ပါ။
(လုကာ ၁၅:၁၇-၂၄) “သူ အသိတရားရလာတဲ့အခါ ‘ငါ့အဖေရဲ့ အလုပ်သမားတွေဟာ ဝဝလင်လင် စားရတယ်။ ငါ့မှာတော့ ငတ်လို့ သေရတော့မယ်။ ၁၈ အခု၊ အဖေ့ဆီ ပြန်ပြီး “အဖေ၊ ကျွန်တော်ဟာ ကောင်းကင်မှာစံမြန်းတဲ့ ဘုရားသခင်ကိုရော အဖေ့ကိုပါ ပြစ်မှားပါပြီ။ ၁၉ အဖေ့သားလို့တောင် အခေါ်မခံထိုက်တော့ပါဘူး။ အဖေ့ဆီမှာ အလုပ်သမားအနေနဲ့ နေခွင့်ပေးပါ” လို့ ပြောကြည့်မယ်’ ဆိုပြီးတွေးမိတယ်။ ၂၀ ဒါနဲ့ ထပြီး ဖခင်ဆီ သွားတယ်။ ဖခင်က သားကို အဝေးကနေ လှမ်းမြင်တဲ့အခါ သနားစိတ် ယိုဖိတ်လာတော့ ပြေးဖက်ပြီး နမ်းတယ်။ ၂၁ သားကလည်း ‘အဖေ၊ ကျွန်တော်ဟာ ကောင်းကင်မှာစံမြန်းတဲ့ ဘုရားသခင်ကိုရော အဖေ့ကိုပါ ပြစ်မှားပါပြီ။ အဖေ့သားလို့တောင် အခေါ်မခံထိုက်တော့ပါဘူး’ လို့ပြောတယ်။ ၂၂ အဲဒီအခါ ဖခင်က ကျွန်တွေကို ‘အကောင်းဆုံးဝတ်လုံကို မြန်မြန်ယူလာပြီး သူ့ကိုဝတ်ပေးကြ။ လက်စွပ်စွပ်ပေးပြီး ဖိနပ်စီးပေးကြ။ ၂၃ ဆူဖြိုးတဲ့ နွားကလေးကို ယူပြီး သတ်ကြ။ စားသောက်ပွဲ လုပ်ကြရအောင်။ ၂၄ ဘာကြောင့်လဲဆိုတော့ ငါ့သားဟာ သေရာကနေ ပြန်ရှင်လာပြီ။ ပျောက်သွားပြီးမှ ပြန်တွေ့တာ’ လို့ပြောပြီး တပျော်တပါး စားသောက်ကြတယ်။
nwtsty လု ၁၅:၁၇-၂၄ လေ့လာမှု မှတ်စု
အဖေ့ကို ပြစ်မှားပါပြီ– ဒါမှမဟုတ် “အဖေ့ရှေ့။” ဂရိဝိဘတ် အီနိုပီအွန်ဟာ စာသားအရ “ရှေ့၊ ရှေ့မှောက်၌” လို့ အဓိပ္ပာယ်ရှိပြီး စက်ပ်တွားဂျင့်ကျမ်း ၁ရှ ၂၀:၁ မှာ အဲဒီအဓိပ္ပာယ်နဲ့ သုံးထားတယ်။ အဲဒီအခန်းငယ်မှာ ယောနသန်ကို ဒါဝိဒ်က “ရှေ့တော်၌ အဘယ်ဒုစရိုက်ကို ပြုဘိသနည်း” (သမ္မာ) လို့မေးတယ်။
အလုပ်သမား– အဖေ့အိမ် ပြန်ရောက်တဲ့အခါ သားငယ်က သူ့ကို သားအဖြစ်မဟုတ်ဘဲ အလုပ်သမားအဖြစ် လက်ခံပေးဖို့ ပြောကြည့်မယ်ဆိုပြီး တွေးမိတယ်။ အလုပ်သမားဆိုတာ သခင်အိမ်မှာ နေရတဲ့ကျွန်တွေလို မဟုတ်ဘဲ အပြင်မှာနေရတဲ့ နေ့စားအခရသူသာ ဖြစ်တယ်။—မ ၂၀:၁၊ ၂၊ ၈။
ဖက်ပြီး နမ်းတယ်– ဒါမှမဟုတ် “ကြင်နာစွာ နမ်းတယ်။” “ဖက်ပြီး နမ်းတယ်” လို့ ဘာသာပြန်ဆိုတဲ့ ဂရိစကားလုံးဟာ ဖီလီအို ဆိုတဲ့ ဂရိကြိယာရဲ့ ပိုလေးနက်တဲ့ပုံစံလို့ နားလည်ကြတယ်။ “နမ်း” တယ်လို့ တစ်ခါတလေ ပြန်ဆိုကြတယ်။ (မ ၂၆:၄၈။ မာ ၁၄:၄၄။ လု ၂၂:၄၇) ဒါပေမဲ့ အများအားဖြင့် “ချစ်ခင်တွယ်တာ” ဆိုတဲ့ အဓိပ္ပာယ်ရှိတယ်။ (ယဟ ၅:၂၀။ ၁၁:၃။ ၁၆:၂၇) ပုံဥပမာထဲက အဖေဟာ သားကို ဒီလိုနွေးထွေးချစ်ခင်စွာ ကြိုဆိုတာက နောင်တရပြီး ပြန်လာတဲ့သားကို ပြန်လက်ခံချင်စိတ် ပြင်းပြတယ်ဆိုတာ ဖော်ပြတယ်။
သားလို့တောင် အခေါ်မခံထိုက်တော့ပါဘူး– စာမူတချို့မှာ “အလုပ်သမားအနေနဲ့ နေခွင့်ပေးပါ” ဆိုပြီး ဖြည့်စွက်ထားတယ်။ ဒါပေမဲ့ အဲဒီကျမ်းချက်မှာ လက်ရှိဖတ်ရတဲ့စကားတွေကို ယုံကြည်စိတ်ချရတဲ့ တခြားရှေးစာမူ အတော်များများက ထောက်ခံတယ်။ အဲဒီလိုဖြည့်စွက်တာက လု ၁၅:၁၉ နဲ့ ညီညွတ်စေဖို့ဖြစ်တယ်လို့ ကျမ်းပညာရှင်တချို့က ယူမှတ်တယ်။
ဝတ်လုံ . . . လက်စွပ် . . . ဖိနပ်– ဒီဝတ်လုံက သာမန် အဝတ်အစားမဟုတ်ဘဲ အကောင်းဆုံးဖြစ်တဲ့အတွက် ဂုဏ်အသရေရှိ ဧည့်သည်ကို ပေးဝတ်တဲ့၊ သားသားနားနား ပန်းထိုးထားတဲ့ တန်ဖိုးကြီးဝတ်လုံ ဖြစ်နိုင်သည်။ လက်စွပ်စွပ်ပေးတာက ပြန်ရောက်လာတဲ့ ဒီသားကို အဖေ မျက်နှာသာပြပြီး ချစ်ရုံမက သားအဖြစ် လက်ခံဂုဏ်ပြုမှန်း ဖော်ပြတယ်။ လက်စွပ်နဲ့ ဖိနပ်တွေကို ကျွန်တွေ ဝတ်လေ့မရှိဘူး။ ဒါကြောင့် သားကို ဖခင်က မိသားစုဝင်အဖြစ် ပြန်လက်ခံလိုက်မှန်း အတိအလင်း ဖော်ပြနေတာဖြစ်တယ်။
(လုကာ ၁၅:၂၅-၃၂) “သားကြီးကတော့ လယ်မှာ ရှိနေတယ်။ သူပြန်လာပြီး အိမ်ရောက်ခါနီးမှာ တီးမှုတ်ကခုန်သံကို ကြားတော့၊ ၂၆ အစေခံတစ်ယောက်ကို ခေါ်ပြီး အကျိုးအကြောင်း မေးမြန်းတယ်။ ၂၇ အစေခံက ‘သခင့်ညီလေး ပြန်လာတယ်။ ကျန်းကျန်းမာမာနဲ့ ပြန်ရောက်လာလို့ သခင့်အဖေက ဆူဖြိုးတဲ့နွားလေးကို သတ်ပါတယ်’ လို့ဖြေတယ်။ ၂၈ သားကြီးက စိတ်ဆိုးပြီး အိမ်ထဲ မဝင်ဘူး။ အဲဒီအခါ ဖခင်က ထွက်လာပြီး ဖျောင်းဖျတယ်။ ၂၉ သားကြီးက ‘ကျွန်တော် နှစ်ပေါင်းများစွာ အဖေ့ဆီမှာ အစေခံခဲ့တယ်။ အဖေ့စကားကိုလည်း တစ်ခါမှ မလွန်ဆန်ခဲ့ဘူး။ ဒါပေမဲ့ အဖေက ကျွန်တော့်ကို သူငယ်ချင်းတွေနဲ့အတူ စားသောက်ပွဲလုပ်ဖို့ ဆိတ်ကလေး တစ်ကောင်တောင် မပေးဖူးဘူး။ ၃၀ ပြည့်တန်ဆာတွေနဲ့ ပျော်ပါးပြီး အဖေ့စည်းစိမ်ကို သုံးဖြုန်းတဲ့ ဒီသားလည်း ရောက်လာရော ဆူဖြိုးတဲ့ နွားလေးကို သတ်တယ်ပေါ့’ လို့ပြောတယ်။ ၃၁ ဖခင်က ‘သားရယ်၊ မင်းက အဖေနဲ့အတူ အမြဲရှိနေတာပဲ။ အဖေ့ရဲ့ ဥစ္စာရှိသမျှဟာ မင်းရဲ့ဥစ္စာတွေပဲလေ။ ၃၂ မင်းရဲ့ညီလေးကတော့ သေရာကနေ ပြန်ရှင်လာတာပါ။ ပျောက်သွားပြီးမှ ပြန်တွေ့တာပါ။ ဒါကြောင့် ပျော်ပျော်ပါးပါး ပွဲလုပ်တာပါ’ လို့ပြောတယ်။”
ရှာဖွေလေ့လာ ဘုရားရေးရာရတနာ
(လုကာ ၁၄:၂၆) “လူတစ်ယောက်က ကျွန်တော့်ဆီတော့ လာပါရဲ့။ ဒါပေမဲ့ မိဘ၊ သားမယား၊ ညီအစ်ကိုမောင်နှမနဲ့ ကိုယ့်အသက်ကို ပိုချစ်နေရင် သူဟာ ကျွန်တော့်တပည့် မဖြစ်နိုင်ဘူး။
nwtsty လု ၁၄:၂၆၊ အောက်ခြေမှတ်ချက် လေ့လာမှု မှတ်စု
မုန်း– ကျမ်းစာပါ “မုန်း” ဆိုတဲ့စကားလုံးမှာ မသိမသာ ကွဲပြားတဲ့ အဓိပ္ပာယ်အမျိုးမျိုး ရှိတယ်။ အလွန့်အလွန် ရန်လိုမုန်းတီးလို့ ထိခိုက်နာကျင်သွားအောင် လုပ်ချင်စိတ် ရှိတာကို ဆိုလိုနိုင်တယ်။ ဒါမှမဟုတ် တစ်ဦးဦးကို၊ တစ်ခုခုကို စက်ဆုပ်ရွံရှာတဲ့အတွက် မတွေ့အောင် ရှောင်နေတာကိုလည်း ဆိုလိုနိုင်တယ်။ ဒါမှမဟုတ် အချစ်လျော့တာကိုလည်း ဆိုလိုနိုင်တယ်။ ဥပမာ၊ လေအာ “အမုန်းခံရ” တယ်လို့ဆိုတဲ့အခါ ယာကုပ်က ရာခေလကို ပိုချစ်ပြီး လေအာကို လျှော့ချစ်တာကို ဆိုလိုတယ်။ (က ၂၉:၃၁၊ ယုဒသန်။ တရ ၂၁:၁၅) တခြား ရှေးဂျူးစာပေတွေမှာလည်း အဲဒီလိုသဘောမျိုးနဲ့ “မုန်း” ဆိုတဲ့စကားလုံးကို အသုံးပြုထားတယ်။ ဒါကြောင့် တပည့်တွေဟာ မိသားစုနဲ့ ကိုယ့်ကိုယ်ကိုယ် မုန်းရမယ်လို့ ယေရှု ဆိုလိုတာမဟုတ်ဘူး။ အဲဒီလိုသာဆိုရင် တခြားကျမ်းချက်တွေနဲ့ ကိုက်ညီမှာမဟုတ်ဘူး။ (မာ ၁၂:၂၉-၃၁။ ဧ ၅:၂၈၊ ၂၉၊ ၃၃ နဲ့နှိုင်းယှဉ်ပါ။) ကျမ်းချက်ရဲ့ ရှေ့နောက်စကားအရ “မုန်း” ဆိုတာကို “လျှော့ချစ်” လို့ ပြန်ဆိုနိုင်တယ်။
(လုကာ ၁၆:၁၀-၁၃) အသေးအမွှားကိစ္စတွေမှာ သစ္စာရှိတဲ့သူဟာ ကြီးလေးတဲ့ကိစ္စတွေမှာ သစ္စာရှိလိမ့်မယ်။ အသေးအမွှားကိစ္စတွေမှာ မရိုးသားတဲ့သူဟာ ကြီးလေးတဲ့ကိစ္စတွေမှာ ရိုးသားမှာ မဟုတ်ဘူး။ ၁၁ ခင်ဗျားတို့လည်း မဖြောင့်မတ်တဲ့စည်းစိမ်နဲ့ ပတ်သက်လာတဲ့အခါ သစ္စာမရှိရင် စစ်မှန်တဲ့စည်းစိမ်ကို ခင်ဗျားတို့လက်ထဲ ဘယ်သူမှ အပ်မှာမဟုတ်ဘူး။ ၁၂ သူတစ်ပါး ပိုင်ဆိုင်ရာနဲ့ပတ်သက်လာတဲ့အခါ ခင်ဗျားတို့ သစ္စာမရှိရင် ခင်ဗျားတို့အတွက် ရည်ရွယ်ထားတဲ့ ဆုကျေးဇူးကို ဘယ်သူမှပေးမှာ မဟုတ်ဘူး။ ၁၃ ဘယ်သူမှ သခင်နှစ်ဦးဆီမှာ အစေခံလို့မရဘူး။ သခင်တစ်ဦးကို မုန်းပြီး နောက်တစ်ဦးကို ချစ်မှာပဲ။ တစ်ဦးကို သစ္စာရှိပြီး တစ်ဦးကို မထီလေးစားလုပ်မှာပဲ။ ခင်ဗျားတို့လည်း ဘုရားသခင်အတွက်ရော စည်းစိမ်အတွက်ပါ တစ်ပြိုင်တည်း အစေခံလို့မရဘူး။”
က၁၇.၀၇ ၈-၉ ပိုဒ်. ၇-၈
စစ်မှန်တဲ့ စည်းစိမ်ကို ရှာဖွေခြင်း
၇ လုကာ ၁၆:၁၀-၁၃ ကိုဖတ်ပါ။ ယေရှုရဲ့ ပုံဥပမာထဲက ဘဏ္ဍာစိုးဟာ ကိုယ်ကျိုးအတွက် မိတ်ဖွဲ့ခဲ့တာ ဖြစ်တယ်။ ဒါပေမဲ့ ယေရှုကတော့ မိမိနောက်လိုက်တွေကို ကိုယ်ကျိုးမပါတဲ့ ရည်ရွယ်ချက်အတွက် ကောင်းကင်မှာ မိတ်ဖွဲ့ဖို့ တိုက်တွန်းခဲ့တယ်။ ပုံဥပမာ ပြောပြီးတဲ့နောက် ယေရှုက “မဖြောင့်မတ်တဲ့ စည်းစိမ်” အသုံးပြုခြင်းနဲ့ ဘုရားအပေါ် သစ္စာရှိခြင်းကို ဆက်စပ်ထားတယ်။ ကိုယ်ပိုင်ဆိုင်ထားတဲ့ စည်းစိမ်ကို အသုံးပြုပြီး ဘုရားအပေါ် ‘သစ္စာရှိ’ ကြောင်း ပြနိုင်မှန်း ယေရှု ဆိုလိုတယ်။ ဘယ်လိုနည်းနဲ့လဲ။
၈ ပစ္စည်းဥစ္စာ သုံးပြီး သစ္စာရှိကြောင်း ပြနိုင်တဲ့ နည်းလမ်းတစ်ခုက ယေရှု ကြိုဟောထားတဲ့ ကမ္ဘာချီ ဟောပြောခြင်းလုပ်ငန်းအတွက် အလှူငွေ ထည့်ဝင်ခြင်းပါပဲ။ (မ. ၂၄:၁၄) အိန္ဒိယနိုင်ငံက မိန်းကလေးတစ်ယောက် စုဘူးတစ်ဘူး လုပ်ပြီး အကြွေစေ့တွေ စုတယ်။ အရုပ်တွေတောင် မဝယ်တော့ဘူး။ စုဘူး ပြည့်သွားတဲ့အခါ ဟောပြောခြင်းလုပ်ငန်းမှာ သုံးဖို့ ပေးလိုက်တယ်။ အိန္ဒိယနိုင်ငံက အုန်းခြံပိုင်တဲ့ ညီအစ်ကိုတစ်ယောက် မာလာယလမ် ဘာသာပြန်ရုံးခွဲကို အုန်းသီးတွေ အများကြီးလှူတယ်။ ရုံးမှာ အုန်းသီးတွေ လိုမှာပဲ လို့တွေးပြီး ငွေပေးမယ့်အစား အုန်းသီးပဲ တိုက်ရိုက်ပေးလိုက်တယ်။ ဒါဟာ အမြော်အမြင်ရှိတာပဲ။ အဲဒီလိုပဲ ဂရိနိုင်ငံက ညီအစ်ကိုတွေလည်း ဗေသလမိသားစုအတွက် သံလွင်ဆီ၊ ဒိန်ခဲနဲ့ တခြားစားစရာတွေ ပုံမှန် လှူကြတယ်။
ကျမ်းစာဖတ်ရှုခြင်း
(လုကာ ၁၄:၁-၁၄) ဥပုသ်နေ့တစ်နေ့မှာ ယေရှုက ဖာရိရှဲခေါင်းဆောင်တစ်ယောက်ရဲ့ အိမ်ကို ဝင်ပြီး စားသောက်တယ်။ အဲဒီမှာရှိတဲ့ လူတွေက ယေရှုကို အသေအချာ စောင့်ကြည့်နေကြတယ်။ ၂ ရေဖျဉ်းစွဲပြီး ဖောရောင်နေသူတစ်ယောက် ရှေ့မှာရှိနေတယ်။ ၃ ယေရှုက “ဥပုသ်နေ့မှာ ရောဂါကုပေးသင့်သလား၊ မကုပေးသင့်ဘူးလား” ဆိုပြီး မေးတော့ ပညတ်ကျမ်းနှံ့စပ်သူတွေနဲ့ ဖာရိရှဲတွေက၊ ၄ ဘာမှ ပြန်မဖြေကြဘူး။ ယေရှုက အဲဒီလူအပေါ် လက်တင်ပြီး ကုသပေးတယ်။ ပြီးတော့ ပြန်ခိုင်းလိုက်တယ်။ ၅ အဲဒီနောက် ယေရှုက “ခင်ဗျားတို့ရဲ့သား ဒါမှမဟုတ် နွားက ဥပုသ်နေ့မှာ တွင်းထဲကျသွားရင် ချက်ချင်း မဆွဲတင်မယ့်သူ ရှိသလား” လို့မေးတော့၊ ၆ သူတို့ ပြန်မဖြေနိုင်ကြဘူး။ ၇ ဖိတ်ခေါ်ခံရသူတွေက အထင်ပေါ်ဆုံးနေရာကို ရွေးထိုင်ကြမှန်း ယေရှု သတိထားမိတဲ့အတွက် ဒီပုံဥပမာကို ပြောပြတယ်- ၈ “တစ်ယောက်ယောက်က ခင်ဗျားတို့ကို မင်္ဂလာပွဲတက်ဖို့ ဖိတ်ခေါ်တဲ့အခါ အထင်ပေါ်ဆုံးနေရာမှာ မထိုင်ပါနဲ့။ အိမ်ရှင်က ခင်ဗျားတို့ထက် ပိုအရေးပါသူကို ဖိတ်ထားတယ်ဆိုရင်၊ ၉ ခင်ဗျားတို့ဆီ လာပြီး ‘သူ့ကို ဒီနေရာပေးလိုက်ပါ’ လို့ပြောလိမ့်မယ်။ အဲဒီအခါ ရှက်ရှက်နဲ့ထပြီး နောက်ဆုံးနေရာကို ပြောင်းထိုင်ရလိမ့်မယ်။ ၁၀ ခင်ဗျားတို့ ဖိတ်ခေါ်ခံရတဲ့အခါ နောက်ဆုံးနေရာမှာ သွားထိုင်ပါ။ အဲဒီအခါ အိမ်ရှင်က လာပြီး ‘မိတ်ဆွေ၊ ရှေ့ကို ကြွပါ’ လို့ပြောလိမ့်မယ်။ ခင်ဗျားလည်း ဧည့်သည်အားလုံးရှေ့မှာ ဂုဏ်တက်လိမ့်မယ်။ ၁၁ ကိုယ့်ကိုယ်ကိုယ် ချီးမြှောက်တဲ့သူဟာ နှိမ့်ချခံရမယ်။ နှိမ့်ချတဲ့သူကတော့ ချီးမြှောက်ခံရမယ်။” ၁၂ အဲဒီနောက် ယေရှုက ဖိတ်ခေါ်တဲ့အိမ်ရှင်ကို “နေ့လယ်စာဖြစ်ဖြစ်၊ ညစာဖြစ်ဖြစ် တည်ခင်းကျွေးမွေးတဲ့အခါ ကိုယ့်မိတ်ဆွေ၊ ဆွေမျိုးသားချင်း၊ ချမ်းသာတဲ့ အိမ်နီးချင်းတွေကို မဖိတ်ပါနဲ့။ အဲဒီလိုဖိတ်ရင် သူတို့က ခင်ဗျားကို ပြန်ဖိတ်ပြီး ဧည့်ခံကျွေးမွေးလိမ့်မယ်။ ၁၃ စားသောက်ပွဲ တည်ခင်းတဲ့အခါ နွမ်းပါးသူတွေ၊ မသန်စွမ်းသူတွေ၊ ခြေမသန်သူတွေ၊ မျက်မမြင်တွေကို ဖိတ်ပါ။ ၁၄ သူတို့ဟာ ကျေးဇူးပြန်မဆပ်နိုင်သူတွေဖြစ်လို့ ခင်ဗျား ပျော်ရွှင်ချမ်းမြေ့ရလိမ့်မယ်။ ဖြောင့်မတ်သူတွေ ရှင်ပြန်ထမြောက်ချိန်ရောက်ရင် ခင်ဗျား ကျေးဇူးဆပ်ခံရလိမ့်မယ်” လို့ပြောတယ်။