ကျွန်ုပ်တို့၏နိုင်ငံတော်စည်းလုံးမှုကို ဆက်တည်တံ့စေခြင်း

^၁ ဘုရားသခင့်နိုင်ငံတော်သည် တန်ခိုးအာဏာရှိသော တကယ့်အစိုးရဖြစ်သည်။ ယေရှုဟောပြောခဲ့သော အဓိကအကြောင်းလည်းဖြစ်သည်။ (မ. ၄:၁၇) ယေရှု၏ဓမ္မအမှုတွင် နိုင်ငံတော်သမ္မာတရားကို သွန်သင်ခြင်းနှင့် ယင်းကိုသက်သေခံခြင်းသည် အဓိကအရာဖြစ်သည်။ နိုင်ငံတော်အတွက် ဆုတောင်းဖို့နှင့် ယင်းကိုရှေးဦးရှာရန် ကိုယ်တော်သွန်သင်ပေးခဲ့သည်။ (မ. ၆:၉၊ ၁၀၊ ၃၃) ယေဟောဝါနှင့်ဖြစ်စေ၊ ကိုယ်တော်၏အဖွဲ့အစည်းနှင့်ဖြစ်စေ ပူးပူးကပ်ကပ်ရှိခြင်း၊ ဟောပြောခြင်းတာဝန်ကို ကျေပွန်စွာလုပ်ဆောင်ခြင်းနှင့် လောကနှင့်တသီးတခြားနေခြင်းတို့က နိုင်ငံတော်စည်းလုံးမှုကို တည်တံ့မြဲမြံစေသည်။ ကျွန်ုပ်တို့သည် အပြုအမူနှင့် အပြောအဆိုအားဖြင့် ဘုရားသခင်၏နိုင်ငံတော်ဘက်၌ရှိကြောင်း တင်ပြကြသည်။—ယော. ၁၈:၃၇။

^၂ ၁၉၁၄ ခုနှစ်ကတည်းက ယင်းကိုလက်အောက်ခံသည့် သန်းပေါင်းများစွာသောသူတို့အတွက် ဘုရားသခင့်နိုင်ငံတော်သည် တကယ့်ဖြစ်ရပ်မှန်ဖြစ်လာသည်။ ဤနိုင်ငံတော်ကို လက်အောက်ခံသူများတင်ပြသော စည်းလုံးမှုသည် အစိတ်စိတ်ကွဲပြားနေသောလောကနှင့် လားလားကြီးခြားနားသည်။ ယင်းကြောင့် ကျွန်ုပ်တို့ကိုစည်းလုံးစေသည့်စွမ်းအားဖြစ်စေရန် ဘုရားသခင့်နိုင်ငံတော်သည် ကျွန်ုပ်တို့ဘဝတွင် တကယ်ဖြစ်ရမည်။ ယင်းကိုအဘယ်အရာက တကယ်ဖြစ်စေမည်နည်း။

^၃ အခြားအစိုးရများနည်းတူ ဘုရားသခင့်နိုင်ငံတော်တွင် စည်းကမ်းဥပဒေများရှိသည်။ သို့တိုင် ယင်း၏ဥပဒေများသည် သမ္မာကျမ်းစာတွင်အခြေပြုသည့်အတွက် ခြားနားမှုရှိသည်။ ဘုရားသခင်၏နှုတ်ကပါဌ်တော်ကို မှန်မှန်ဖတ်ရှုခြင်းက နိုင်ငံတော်ကိုလက်အောက်ခံသူများအနေနှင့် ကျွန်ုပ်တို့ပြုလုပ်ရမည့်တာဝန်များကို သတိရစေသည်။ ကျွန်ုပ်တို့၏စာပေများကို မှန်မှန်လေ့လာခြင်းနှင့် “သစ္စာနှင့်သတိပညာရှိသောကျွန်” ၏လမ်းညွှန်မှုကိုခံခြင်းတို့က ကျွန်ုပ်တို့၏နေ့စဉ်ဘဝအသက်တာတွင် ဘုရားသခင့်ပညတ်များကို လိုက်လျှောက်ကျင့်သုံးရန် အကူအညီပေးသည်။ (မ. ၂၄:၄၅၊ သမ) ဤကဲ့သို့လက်တွေ့ကျင့်သုံးခြင်းအားဖြင့် ဘုရားသခင့်နိုင်ငံတော်သည် ကျွန်ုပ်တို့အတွက် သာ၍သာ၍တကယ်ပင်ဖြစ်လာပါမည်။ သို့ ဖြစ်၍ ကမ္ဘာချီညီအစ်ကိုများအသင်းအပင်းတွင် ကျွန်ုပ်တို့သည် ပိုမိုရင်းနှီးလာပြီး ယေရှု၏အုပ်ချုပ်မှုအောက်တွင်စည်းလုံးစွာဝတ်ပြုသောမိသားစုကြီးတစ်ခု ဖြစ်လာစေသည်။

^၄ ဘုရားသခင့်နိုင်ငံတော်သတင်းဟောပြောခြင်းအားဖြင့် စည်းလုံးမှု– ကျွန်ုပ်တို့၏တာဝန်သည် “မြေကြီးစွန်းတိုင်အောင်” ဘုရားသခင့်နိုင်ငံတော်သတင်းကောင်းကို ဟောပြောရန်ဖြစ်သည်။ (တ. ၁:၈) ယေဟောဝါ၏ “ဘုန်းတော်” အကြောင်းကို “တစ်စိတ်တည်း တစ်သံတည်း” ကြိုးစားဟောပြောခြင်းအားဖြင့် စည်းလုံးလာသည်။ (ရော. ၁၅:၅၊ ၆၊ သမ) ကမ္ဘာတစ်ဝန်းရှိ ကျွန်ုပ်တို့၏လုပ်ဖော်ကိုင်ဖက်များနှင့်အတူ ဇွဲဖြင့်ပါဝင်ခြင်းက ကျွန်ုပ်တို့၏ယုံကြည်ခြင်းကို တိုးပွားစေပြီး ယေဟောဝါ၏အလိုတော်ပြီးမြောက်လာရန် ကိုယ်တော်၏ဝိညာဉ်တော်ကို ကျွန်ုပ်တို့အားတိုက်တွန်းစေသည်။ ‘သခင်ဘုရား၏လုပ်ငန်းတွင် အလုပ်များနေခြင်း’ က ကျွန်ုပ်တို့အား “တည်ကြည်သောစိတ်နှင့်ပြည့်စုံ၍ မရွေ့လျော့မတိမ်းယိမ်းဘဲ” ရှိစေသည်။—၁ ကော. ၁၅:၅၈။

^၅ နိုင်ငံများစွာတွင် စာတန်သည် ဟောပြောခြင်းလုပ်ငန်းကို အနှောင့်အယှက်ပေးပြီး ကျွန်ုပ်တို့တွင်စည်းလုံးမှုမရှိစေရန် ကြိုးစားပါသည်။ အငြင်းပွားမှုနှင့် ခိုက်ရန်ဒေါသဖြစ်စေရန် ဆွပေးတတ်ကာ စိတ်ဝမ်းကွဲဖို့၊ အထင်အမြင်မှားစေဖို့ နည်းအမျိုးမျိုးကို သူအသုံးပြုပါသည်။ (သု. ၆:၁၉; ဂလ. ၅:၁၉-၂၁၊ ၂၆) ကမ္ဘာ့အငြင်းပွားမှုများတွင် ကျွန်ုပ်တို့အားပါဝင်စေလိုပြီး နိုင်ငံရေးနှင့် လူမှုရေးကိစ္စများတွင်ပင် ဘက်လိုက်စေလိုပါသည်။ (ယာ. ၃:၁၄-၁၆) ကျမ်းစာက သူ၏သြဇာကိုငြင်းဆန်ရန် တိုက်တွန်းပါသည်; သို့မဟုတ်လျှင် သူ၏သားကောင်အဖြစ် ကျွန်ုပ်တို့ကိုသူဝါးမြိုလိမ့်မည်။ (၁ ပေ. ၅:၈၊ ၉) ကျွန်ုပ်တို့၏စိတ်နှလုံးထဲမှ နိုင်ငံတော်မျှော်လင့်ချက်ဖြစ်ရပ်မှန်ကို မှေးမှိန်ပျောက်ကွယ်မသွားစေပါနှင့်။

^၆ ကျွန်ုပ်တို့၏စည်းလုံးမှုကို တည်တံ့စေရန် ကျန်းခံ့သောစိတ်ထားနှင့် အထက်မှလာသောဉာဏ်ပညာရှိဖို့လိုသည်။ အထူးသဖြင့် ညီအစ်ကိုများနှင့်ပတ်သက်၍ အခက်အခဲများပေါ်ပေါက်လာမည်ဆိုလျှင် ဆက်လက်အသင့်အတင့်ရှိနိုင်ရန် ဝိညာဉ်အသီးများသီးရမည်။ လောကီစရိုက်များဖြစ်သည့် မာနထောင်လွှားခြင်း၊ မနာလိုဝန်တိုခြင်းနှင့် အတ္တဆန်ခြင်းတို့သည် စိတ်ဝမ်းကွဲပြားစေတတ်၍ ယင်းတို့ကိုချိုးနှိမ်ဖျောက်ဖျက်ရမည်။ (ဧ. ၄:၁-၃; ကော. ၃:၅-၁၀၊ ၁၂-၁၄) ကျွန်ုပ်တို့တွင် အပြုသဘောပါသည့် တည်ဆောက်မှုပေးသောအတွေးအခေါ်များဖြင့် ပြည့်နေရမည်။ ဘုရားသခင့်နိုင်ငံတော်သည် ကျွန်ုပ်တို့၏ဘဝအသက်တာတွင် တကယ့်အဖြစ်မှန်ဖြစ်သည်တကား! သို့သော် ထိုသို့ဆက်တည်ရှိစေရန် သတိဝီရိယရှိကြရမည်။—ဧ. ၆:၁၁၊ ၁၃။

^၇ ကျွန်ုပ်တို့၏အံ့ချီးဖွယ် နိုင်ငံတော်မျှော်လင့်ချက်ဖြစ်ရပ်မှန်သည် အတောမသတ်နိုင်သော တစ်ပေါင်းတစ်စည်းစိတ်ထား၌ ကျွန်ုပ်တို့ကိုစည်းလုံးစေပါသည်။—ဆာ. ၁၃၃:၁။