ခရစ်ယာန်စစ်များအားလုံးဧဝံဂေလိဟောပြောသူများဖြစ်ရမည်

“သာသနာပြုဆရာဆောင်ရွက်ရသောအမှုကိုဆောင်ရွက်လော့။”—၂ တိမောသေ ၄:၅။

၁။ ပထမရာစုတွင် ဧဝံဂေလိဟောပြောသူများ ကြေညာခဲ့သည့်သတင်းကောင်းကား အဘယ်နည်း။

ယနေ့တွင် ဧဝံဂေလိဟောပြောသူတစ်ဦးဖြစ်ခြင်းသည် မည်သို့အဓိပ္ပာယ်ရှိသနည်း။ သင်သည် ထိုကဲ့သို့သောသူတစ်ဦးဖြစ်သလော။ “ဧဝံဂေလိဟောပြောသူ” ဟူသောစကားလုံးသည် “သတင်းကောင်းဟောပြောသူ” ဟုအဓိပ္ပာယ်ရှိသော ဂရိစကားလုံး eu·ag·ge·li·stes΄ မှပေါ်ထွက်လာသည်။ စီအီး ၃၃ တွင်ခရစ်ယာန်အသင်းတော်တည်ထောင်ခဲ့ကတည်းက ခရစ်ယာန်သတင်းကောင်းသည် ဘုရားသခင်ကယ်တင်မည့်နည်းလမ်းကို ပေါ်လွင်စေပြီး၊ လူသားအပေါင်းအပေါ် ဘုရားသခင့်နိုင်ငံတော်အစိုးရကိုစတင်ခြင်းငှာ နောက်တစ်ကြိမ်ယေရှုခရစ်ကြွလာမည့်အကြောင်း ကြွေးကြော်ပါသည်။—မဿဲ ၂၅:၃၁၊ ၃၂။ ၂ တိမောသေ ၄:၁။ ဟေဗြဲ ၁၀:၁၂၊ ၁၃။

၂။ (က) ကျွန်ုပ်တို့ခေတ်တွင် သတင်းကောင်း၌ အဘယ်အကြောင်းများထပ်ဆင့်ပါဝင်လာသနည်း။ (ခ) ယနေ့ခရစ်ယာန်စစ်များအားလုံးအပေါ် အဘယ်တာဝန်ကျရောက်သနည်း။

^၂ ယေရှုပြန်ကြွလာ၍ မျက်မြင်မရရောက်ရှိနေခြင်းနှင့်စပ်လျဉ်းသည့် ပုပ္ပနိမိတ်ပြည့်စုံနေကြောင်း ၁၉၁၄ ခုနှစ်မှစ၍ သက်သေသာဓကတိုးများလာသည်။ (မဿဲ ၂၄:၃-၁၃၊ ၃၃) သို့ဖြစ်၍ သတင်းကောင်းတွင် “ဘုရားသခင့်နိုင်ငံတော်တည်လုနီးပြီ” ဟူသောစကားများပါဝင်နိုင်ပြန်သည်။ (လုကာ ၂၁:၇၊ ၃၁။ မာကု ၁:၁၄၊ ၁၅) “လူမျိုးအပေါင်းတို့အားသက်သေဖြစ်မည်အကြောင်း နိုင်ငံတော်နှင့်ယှဉ်သောဧဝံဂေလိတရားကို လောကီနိုင်ငံအရပ်ရပ်ရှိသမျှတို့၌ဟောရလိမ့်မည်။ သို့ပြီးမှ အဆုံးသည်ဖြစ်လတ္တံ့” ဟူသောမဿဲ ၂၄:၁၄ တွင်မှတ်တမ်းတင်ထားသည့် ယေရှု၏ပရောဖက်ပြုချက်ပြည့်စုံလာရန်အချိန်တိုင်ပေပြီ။ ထိုကြောင့် ယခုဧဝံဂေလိဟောပြောခြင်းတွင် တည်ထောင်လျက်ရှိသော ဘုရားသခင့်နိုင်ငံတော်နှင့် နာခံမှုရှိလူသားအပေါင်းတို့အား မကြာမီခံစားရတော့မည့်ကောင်းချီးမင်္ဂလာများအကြောင်း ဇွဲရှိရှိကြွေးကြော်ခြင်းပါဝင်ပါသည်။ ခရစ်ယာန်များအားလုံး ဤလုပ်ငန်းကိုလည်းကောင်း၊ “တပည့်ဖြစ်စေ” ခြင်းလုပ်ငန်းကိုလည်းကောင်း လုပ်ဆောင်ကြရန် အမိန့်ရရှိထားသည်။—မဿဲ ၂၈:၁၉၊ ၂၀။ ဗျာဒိတ် ၂၂:၁၇။

၃။ (က) “ဧဝံဂေလိဟောပြောသူ” ဟုဆိုရာတွင် အဘယ်ထပ်ဆင့်အဓိပ္ပာယ်ရှိသနည်း။ (Insight on the Scriptures, Volume 1, page 770, column 2, paragraph 2 ရှု။) (ခ) ယင်းက အဘယ်မေးခွန်းများကိုပေါ်လာစေသနည်း။

^၃ ရိုးရိုးသတင်းကောင်းဟောပြောခြင်းအပြင် မိမိတို့၏အရပ်ဌာနေမှထွက်ခွာသွားကာ တစ်ခါမျှမဟောမပြောရသေးသည့်အရပ်ဒေသများတွင် သတင်းကောင်း သွားရောက်ဟောပြောသူများနှင့်စပ်လျဉ်း၍ သမ္မာကျမ်းစာက အထူးသဘောမျိုးဖြင့် “ဧဝံဂေလိဟောပြောသူ” ဟူသောစကားလုံးကို အသုံးပြုထားပါသည်။ ပထမရာစုတွင် ဖိလိပ္ပု၊ ပေါလု၊ ဗာနဗ၊ သိလ၊ တိမောသေ အစရှိသည့်သာသနာပြုသော ဧဝံဂေလိဟောပြောသူများစွာရှိကြပါသည်။ (တမန်တော် ၂၁:၈။ ဧဖက် ၄:၁၁) သို့သော် ၁၉၁၄ ကတည်းက ကျွန်ုပ်တို့၏ထူးခြားသောအချိန်တွင်ကော။ ယနေ့ယေဟောဝါ၏လူများသည် ဒေသခံအပြင် သာသနာပြုဧဝံဂေလိဟောပြောသူများအဖြစ် အမှုထမ်းဆောင်ရန် အသင့်ရှိနေကြပါသလော။

၁၉၁၉ ကတည်းကတိုးတက်မှု

၄၊ ၅။ ၁၉၁၄ နောက်ပိုင်း မကြာမီပင် ဧဝံဂေလိဟောပြောခြင်းလုပ်ငန်းအတွက် အဘယ်မျှော်လင့်ချက်များရှိသနည်း။

^၄ ပထမကမ္ဘာစစ်ပြီးဆုံးခါနီး ၁၉၁၈ တွင် ဘုရားသခင့်ကျေးကျွန်များသည် ဖောက်ပြန်သူများအပြင် ခရစ်ယာန်ဘောင်ဓမ္မဆရာနှင့်သူတို့၏နိုင်ငံရေးမဟာမိတ်များ၏ အတိုက်အခံပြုမှုကို တိုး၍တိုး၍ခံရကြသည်။ ၁၉၁၈ ဇွန် တွင်အမေရိကန်ပြည်ရှိ ကင်းမျှော်စင်အသင်း၏ ဦးစီးအကြီးအမှူးများသည် မတရားသဖြင့်စွပ်စွဲခံရလျက် အနှစ် ၂၀ ထောင်ဒဏ်သင့်ခဲ့သောအခါ စစ်မှန်သောခရစ်ယာန်ဧဝံဂေလိဟောပြောခြင်းလုပ်ငန်းသည် ရပ်စဲသွားလုမတတ်ဖြစ်ခဲ့သည်ကိုတွေ့ရှိရသည်။ သို့ဖြစ်၍သတင်းကောင်းဟောပြောခြင်းကို ဘုရားသခင့်ရန်သူများ ရပ်တန့်သွားစေရန် အောင်မြင်သွားပြီလော။

^၅ မမျှော်လင့်ဘဲနှင့် ၁၉၁၉ မတ် တွင်အသင်းမ၏အကြီးအမှူးများသည် လွတ်ငြိမ်းခွင့်ရပြီး ထောင်ချခံရသည့်စွပ်စွဲချက်များမှ ကင်းလွတ်ခွင့်ရခဲ့သည်။ ဤသို့လွတ်မြောက်လာပြီးနောက် ဘုရားသခင့်နိုင်ငံတော်အမွေစားအမွေခံများအဖြစ် ကောင်းကင်ဆုကျေးဇူးကို မခံယူမီ လုပ်ကိုင်စရာလုပ်ငန်းများစွာရှိနေကြောင်း ထိုဘိသိက်ခံခရစ်ယာန်များသဘောပေါက်ကြသည်။—ရောမ ၈:၁၇။ ၂ တိမောသေ ၂:၁၂။ ၄:၁၈။

၆။ ၁၉၁၉ နှင့် ၁၉၃၉ စပ်ကြားတွင် ဧဝံဂေလိဟောပြောခြင်းလုပ်ငန်းသည် မည်သို့တိုးတက်လာသနည်း။

^၆ ၁၉၁၉ ခုနှစ်က သတင်းကောင်းဟောပြောသူများအရေအတွက်မှာ ၄,၀၀၀ မျှပင်မရှိချေ။ နောက်အနှစ်နှစ်ဆယ်အတွင်း လူအချို့သည် သာသနာပြုဧဝံဂေလိဟောပြောသူများအဖြစ် အမှုဆောင်ရန်သင့်ရှိကြပြီး အာဖရိကတိုက်၊ အာရှတိုက် နှင့် ဥရောပတိုက်များသို့ စေလွှတ်ခံခဲ့သည်။ ဘုရားသခင့်နိုင်ငံတော်အကြောင်းဟောပြောခြင်းကို နှစ်ပေါင်း ၂၀ တိုင်ဆောင်ရွက်ခဲ့သည့် ၁၉၃၉ ခုနှစ်တိုင်လေသော် ယေဟောဝါသက်သေများအရေအတွက်သည် ၇၃,၀၀၀ ကျော်အထိတိုးတက်လာလေသည်။ ညှဉ်းပန်းနှိပ်စက်မှုများကြား ဤသို့ထူးခြားစွာတိုးတက်လာခြင်းသည် ခရစ်ယာန်အသင်းတော်၏ အစောပိုင်းအချိန်အဖြစ်အပျက်တို့နှင့် ဆင်တူချက်များဖြစ်သည်။—တမန်တော် ၆:၇။ ၈:၄၊ ၁၄-၁၇။ ၁၁:၁၉-၂၁။

၇။ စီအီး ၄၇ နှင့် ၁၉၃၉ ခုနှစ်များတွင် ခရစ်ယာန်ဧဝံဂေလိဟောပြောခြင်းလုပ်ငန်းနှင့်စပ်လျဉ်း၍ အဘယ်ဆင်တူသည့်အခြေအနေပေါ်လာသနည်း။

^၇ ဤသို့ဖြစ်နေစေကာမူ ထိုအချိန်က ယေဟောဝါသက်သေအများစုသည် အင်္ဂလိပ်စကားပြော ပရိုတက်စတင့်နိုင်ငံများ၌သာ အများအပြားရှိနေသေးသည်။ ထိုစဉ်က ဘုရားသခင့်နိုင်ငံတော်သတင်းကြွေးကြော်သူ ၇၃,၀၀၀ အနက် ၇၅ ရာခိုင်နှုန်းကျော်သည် ဩစတြေးလျ၊ ဗြိတိသျှ၊ ကနေဒါ၊ နယူးဇီလန် နှင့် အမေရိကန်နိုင်ငံများတွင်ရှိကြသည်။ ထိုကြောင့် လုပ်ငန်းတော်မတွင်ကျယ်သေးသည့် ကမ္ဘာဒေသများကိုအာရုံပြုဖို့ရန် စီအီး ၄၇ ခန့်ကကဲ့သို့ ဧဝံဂေလိဟောပြောသူများအား တိုက်တွန်းပေးစရာအကြောင်းတစ်ခုလိုအပ်နေပါသည်။

၈။ ၁၉၉၂ တိုင်လေသော် ဂိလဒ်ကျောင်းသည် အဘယ်အမှုကိုပြုနိုင်ခဲ့ပြီနည်း။

^၈ စစ်အတွင်းပိတ်ပင်တားဆီးမှုများ၊ ညှဉ်းပန်းနှိပ်စက်မှုများက ယေဟောဝါ၏ကျေးကျွန်များအား ပို၍တိုးချဲ့လုပ်ကိုင်ဖို့ပြင်ဆင်ရန် ကိုယ်တော်၏တန်ခိုးပါသောသန့်ရှင်းသောဝိညာဉ်တော် တိုက်တွန်းမှုမခံရရန်မပြုလုပ်နိုင်ချေ။ ဒုတိယကမ္ဘာစစ်ဖြစ်နေဆဲ ၁၉၄၃ ခုနှစ်တွင် ဘုရားသခင်၏အဖွဲ့အစည်းသည် သတင်းကောင်းကိုအနှံ့အပြားရောက်ရှိစေရန်ရည်ရွယ်ချက်ဖြင့် ကင်းမျှော်စင်သမ္မာကျမ်းစာဂိလဒ်ကျောင်းကိုဖွင့်ခဲ့သည်။ ၁၉၉၂ မတ် တိုင်လေသော် ဤကျောင်းမှ သာသနာပြု ၆,၅၁၇ ကို ၁၇၁ နိုင်ငံသို့ စေလွှတ်နိုင်ခဲ့ပြီးသားဖြစ်ချေသည်။ ထို့ပြင် တိုင်းတစ်ပါးရပ်ခြားရှိ ကင်းမျှော်စင်အသင်း၏ဌာနခွဲများ၌ ကွပ်ကဲစီမံရေးအတွက် အမျိုးသားများကိုလေ့ကျင့်ပေးခဲ့ပါသည်။ ၁၉၉၂ အထိဌာနခွဲကော်မတီညှိနှိုင်းရေးမှူး ၉၇ ဦးအနက် ၇၅ ဦးသည် ဂိလဒ်တွင်လေ့ကျင့်မှုရပြီးသားဖြစ်ကြသည်။

၉။ ဧဝံဂေလိဟောပြောခြင်းနှင့် တပည့်ဖြစ်စေခြင်းလုပ်ငန်းတိုးတက်ခြင်း၌ မည်သည့်လေ့ကျင့်ရေးအစီအစဉ်များက ထောက်ကူခဲ့ပြီနည်း။

^၉ ဂိလဒ်ကျောင်းအပြင် ဧဝံဂေလိဟောပြောခြင်းလုပ်ငန်းကိုတိုးချဲ့တိုးတက်စေရန် ယေဟောဝါလူများကိုအသင့်ပြင်ဆင်ပေးဖို့အတွက် အခြားလေ့ကျင့်ရေးအစီအစဉ်များလည်းရှိပါသေးသည်။ ဥပမာ၊ သီအိုကရက်တစ်ဓမ္မအမှုကျောင်းကို ကမ္ဘာတစ်ဝန်းရှိ ယေဟောဝါသက်သေများ၏အသင်းတော်များတွင် ကျင်းပပေးပါသည်။ ပတ်စဉ်လုပ်ငန်းတော်စည်းဝေးနှင့်အတူ ဤအစီအစဉ်ကြောင့် ဘုရားသခင့်နိုင်ငံတော်ကြေညာသူ သန်းပေါင်းများစွာတို့သည် လူထုရှေ့ဓမ္မအမှုဆောင်ရွက်ခြင်းတွင် ထိရောက်ကြရန်လေ့ကျင့်မှုရရှိခဲ့ပြီ။ နိုင်ငံတော်ဓမ္မအမှုသင်တန်းကျောင်းလည်းရှိသေးသည်။ ဤသင်တန်းက အကြီးအကဲများနှင့်ဓမ္မအမှုထမ်းများကို တိုးချဲ့များပြားလာနေသောအသင်းတော်များကို ကောင်းစွာကြီးကြပ်ပေးနိုင်ရန် လေ့ကျင့်သွန်သင်ပေးသည်။ ရှေ့ဆောင်လုပ်ငန်းတော်ကျောင်းသည်လည်း အချိန်ပြည့်ဧဝံဂေလိဟောပြောသူ မြောက်မြားစွာတို့သည် ဟောပြောခြင်းကိုသာ၍ထိရောက်စွာဆောင်ရွက်နိုင်ရန် ကူညီပေးခဲ့ပြီ။ များမကြာမီကလည်း နိုင်ငံအသီးအသီးတွင် အိမ်ထောင်မရှိသောအကြီးအကဲများနှင့်ဓမ္မအမှုထမ်းများကို မျက်မှောက်ခေတ်တိမောသေများဖြစ်လာနိုင်စေရန် ဓမ္မအမှုဆိုင်ရာလေ့ကျင့်ရေးကျောင်းကိုဖွင့်ခဲ့သည်။

၁၀။ ဘုရားအဖွဲ့အစည်းမှတစ်ဆင့်ရရှိသည့် အလွန်ကောင်းသောလေ့ကျင့်သွန်သင်ချက်များအားလုံး၏ အကျိုးကျေးဇူးကားအဘယ်နည်း။ (လေးထောင့်ကွက်ရှိ အကြောင်းအရာပါအပါအဝင်။)

^၁၀ ဤလေ့ကျင့်မှုအားလုံးမှ အဘယ်အကျိုးကျေးဇူးများဖြစ်ထွန်းလာခဲ့ပြီနည်း။ ၁၉၉၁ တွင်နိုင်ငံပေါင်း ၂၁၂ နိုင်ငံ၌ ဘုရားသခင့်နိုင်ငံတော်ကိုတက်ကြွစွာကြွေးကြော်သူ ယေဟောဝါသက်သေများအရေအတွက်သည် လေးသန်းကျော်လေပြီ။ သို့ရာတွင် ၁၉၃၉ ၌ရှိခဲ့သောအခြေအနေနှင့်မတူဘဲ ထိုအရေအတွက်၏ ၇၀ ရာခိုင်နှုန်းကျော်မှာ အင်္ဂလိပ်ဘာသာစကားကိုအဓိကမသုံးသည့် ကက်သလစ်၊ ဩသိုဒေါက်၊ ခရစ်ယာန်မဟုတ်သည့်၊ သို့မဟုတ် အခြားတိုင်းနိုင်ငံမှသူများဖြစ်ကြသည်။—“၁၉၃၉ ကတည်းကတိုးချဲ့ခြင်း” လေးထောင့်ကွက်ကိုရှု။

အဘယ်ကြောင့်အောင်မြင်

၁၁။ ဓမ္မအအမှုဆောင်တစ်ဦးအဖြစ် မိမိ၏အောင်မြင်မှုသည် မည်သူကြောင့်ဖြစ်သည်ဟု တမန်တော်ပေါလုဆိုသနည်း။

^၁၁ ဤသို့တိုးချဲ့ကြီးထွားလာခြင်းသည် မိမိတို့ကြောင့်ဖြစ်သည်ဟူ၍ ယေဟောဝါသက်သေများမဆိုပါ။ ယင်းအစား ကောရိန္သုအသင်းသားများထံ ပေါလုရေးသားခဲ့သောစာတွင် တမန်တော်ရှင်းပြခဲ့သည်အတိုင်း သူတို့လုပ်ငန်းကိုကြည့်မြင်ကြသည်။ “ပေါလုကားအဘယ်သူနည်း။ အာပေါလုကား အဘယ်သူနည်း။ အခြားသောသူမဟုတ်၊ ထာဝရဘုရားသည် အသီးအသီးတို့အားအခွင့်ပေးသနားတော်မူသည်နှင့်အညီ သင်တို့ကိုယုံကြည်ခြင်းသို့ရောက်စေသော ဓမ္မဆရာပေတည်း။ ငါသည်စိုက်ပျိုးသောသူဖြစ်၏။ အာပေါလုသည် ရေလောင်းသောသူဖြစ်၏။ အပင်ကိုကြီးပွားစေသောသူကား ဘုရားသခင်ပေတည်း။ စိုက်ပျိုးသောသူမတတ်နိုင်။ ရေလောင်းသောသူလည်းမတတ်နိုင်။ ကြီးပွားစေတော်မူသောဘုရားသခင်သာလျှင် တတ်နိုင်တော်မူ၏။ ငါတို့သည် ဘုရားသခင်ထံ၌အလုပ်လုပ်သောသူချင်းဖြစ်ကြ၏။ သင်တို့သည် ဘုရားသခင်၏ဥယျာဉ်တော်ဖြစ်ကြ၏။ ဘုရားသခင်၏ကျောင်းတော်တိုက်လည်းဖြစ်ကြ၏။”—၁ ကောရိန္သု ၃:၅-၇၊ ၉။

၁၂။ (က) ခရစ်ယာန်ဧဝံဂေလိဟောပြောခြင်းလုပ်ငန်းအောင်မြင်ရေးတွင် ဘုရားသခင့်နှုတ်ကပါဌ်တော်သည် မည်သည့်ကဏ္ဍမှပါဝင်သနည်း။ (ခ) အသင်းတော်၏ဦးခေါင်းအဖြစ် မည်သူအားခန့်အပ်ထားပြီနည်း။ ကိုယ်တော်၏ဦးစီးမှုကိုလက်အောက်ခံကြောင်းတင်ပြရန် အရေးကြီးသောနည်းလမ်းတစ်ခုကားအဘယ်နည်း။

^၁၂ ယေဟောဝါသက်သေများ၏ ထူးခြားသောတိုးတက်ကြီးထွားမှုသည် ဘုရားသခင့်ကောင်းချီးကြောင့်သာအမှန်ဖြစ်သည်။ ဘုရားသခင့်လုပ်ငန်းတော်ပင်တည်း။ ယင်းကိုအသိအမှတ်ပြုသည့်အနေနှင့် ဘုရားသခင့်နှုတ်ကပါဌ်တော်ကို ဆက်၍မှန်မှန်လေ့လာလျက်ရှိသည်။ သူတို့၏ဧဝံဂေလိဟောပြောခြင်းလုပ်ငန်းတွင် ပြောဆိုလေသမျှကို သမ္မာကျမ်းစာအတိုင်းဖြစ်စေသည်။ (၁ ကောရိန္သု ၄:၆။ ၂ တိမောသေ ၃:၁၆) သူတို့၏ဧဝံဂေလိဟောပြောခြင်းလုပ်ငန်း အောင်မြင်ရခြင်းအကြောင်း နောက်တစ်ခုမှာ အသင်းတော်၏ဦးခေါင်းအဖြစ် ဘုရားသခင်ခန့်အပ်ထားသော သခင်ယေရှုခရစ်တော်ကို လုံးလုံးလျားလျားအသိအမှတ်ပြုကြခြင်းကြောင့်ဖြစ်သည်။ (ဧဖက် ၅:၂၃) တမန်တော်များအဖြစ် ယေရှုခန့်အပ်ခဲ့သူများနှင့် ပထမရာစုခရစ်ယာန်များ ပူးပေါင်းဆောင်ရွက်ကြခြင်းအားဖြင့် ထိုသို့အသိအမှတ်ပြုကြောင်း တင်ပြခဲ့သည်။ ဤတမန်တော်များသည် ယေရုရှလင်အသင်းတော်ရှိအခြားအကြီးအကဲများနှင့်အတူ ပထမရာစု ခရစ်ယာန်အုပ်ချုပ်ရေးအဖွဲ့ဝင်များဖြစ်ကြသည်။ ပြဿနာများကိုဆုံးဖြတ်ပေးရန်၊ ဧဝံဂေလိဟောပြောခြင်းလုပ်ငန်းကို ညွှန်ကြားပေးရန် ရင့်ကျက်သောဤခရစ်ယာန်အုပ်စုအား ကောင်းကင်မှသခင်ယေရှုခရစ်သည် အသုံးပြုခဲ့သည်။ ဘုရားသခင်၏ဤအစီအစဉ်ကို ဇွဲလုံ့လနှင့်ပေါလုပူးပေါင်းဆောင်ရွက်ခဲ့သောကြောင့် လည်ပတ်ခဲ့သမျှအသင်းတော်များတွင် တိုးတက်ကြီးထွားခြင်းကို တွေ့ရှိခဲ့ရသည်။ (တမန်တော် ၁၆:၄၊ ၅။ ဂလာတိ ၂:၉) ယနေ့လည်းဘုရားသခင့်နှုတ်ကပါဌ်တော်ကို စွဲမြဲစွာဆုပ်ကိုင်ထားပြီး အုပ်ချုပ်ရေးအဖွဲ့ထံမှရသောလမ်းပြညွှန်ကြားမှုကို ဇွဲရှိရှိနာခံလုပ်ဆောင်ခြင်းအားဖြင့် ခရစ်ယာန်ဧဝံဂေလိဟောပြောသူများသည် သူတို့၏ဓမ္မအမှုတွင် အောင်မြင်ရန်စိတ်ချနိုင်ကြသည်။—တိတု ၁:၉။ ဟေဗြဲ ၁၃:၁၇။

အခြားသူတို့အား ကိုယ်ထက်သာသည်ဟု ယူမှတ်ခြင်း

၁၃၊ ၁၄။ (က) ဖိလိပ္ပိ ၂:၁-၄ တွင်မှတ်တမ်းတင်ထားသည့် တမန်တော်ပေါလု၏သြဝါဒက အဘယ်နည်း။ (ခ) ဧဝံဂေလိဟောပြောခြင်းလုပ်ငန်း၌ပါဝင်စဉ် ဤသြဝါဒကိုမှတ်ထားရန် အဘယ်ကြောင့်အရေးကြီးသနည်း။

^၁၃ သမ္မာတရားရှာဖွေနေသူများကို တမန်တော်ပေါလုအမှန်ချစ်မြတ်နိုးပြီး လူမျိုးရေးစိတ်ဓာတ်၊ မိမိသာသည်ဟူသောစိတ်ထား မတင်ပြခဲ့ပါ။ ယင်းကြောင့်လည်း ယုံကြည်သူချင်းတို့အား ‘သူတစ်ပါး ကိုယ်ထက်သာ၍ကောင်းမြတ်သည်ဟု စိတ်ထား’ ရန်သြဝါဒပေးနိုင်ခဲ့ခြင်းဖြစ်သည်။—ဖိလိပ္ပိ ၂:၁-၄။

^၁၄ ထိုနည်းတူစွာ ယနေ့ဧဝံဂေလိဟောပြောသူခရစ်ယာန်စစ်များသည် လူမျိုးမတူ၊ နောက်ခံချင်းခြားနားသူတို့နှင့်ဆက်ဆံသည်တွင် ကိုယ်ကိုယ်ကိုအထင်မကြီးကြပါ။ အာဖရိကနိုင်ငံတွင် သာသနာပြုအဖြစ်အမှုဆောင်ရန် အမေရိကန်ပြည်မှယေဟောဝါသက်သေတစ်ဦးပြောသည်အတိုင်း “ကျွန်တော်တို့မသာဘူးဆိုတာ သိပါတယ်။ မှန်တယ်၊ ငွေအနည်းငယ်ပိုရှိတာ၊ ပညာအဆင့်အနည်းငယ်ပိုများတာကလွဲယင် သူတို့ [ဒေသခံများ] မှာကျွန်တော်တို့ထက်သာတဲ့အရည်အချင်းများရှိတယ်။”

၁၅။ နိုင်ငံခြားတွင်အမှုဆောင်ရန်တာဝန်ရရှိထားသူများသည် တပည့်တော်လောင်းများကို အမှန်လေးစားကြောင်း မည်သို့တင်ပြနိုင်သနည်း။

^၁၅ မှန်ပါသည်။ သတင်းကောင်းကြားနာသူတို့ကို လေးစားမှုအမှန်တင်ပြမည်ဆိုလျှင် သမ္မာကျမ်းစာ၏သတင်းတရားကို သူတို့လက်ခံရန်လွယ်ကူစေမည်။ ကူညီပေးရန်တာဝန်ရထားသူများနှင့်အတူ နေထိုင်စားသောက်ရခြင်းကိုပျော်မွေ့ကြောင်း ဧဝံဂေလိဟောပြောသူသာသနာပြု ဖော်ပြမည်ဆိုလျှင်လည်း များစွာအထောက်အကူဖြစ်သည်။ အာဖရိကနိုင်ငံတွင်နေထိုင်ခဲ့သည်မှာ ၃၈ နှစ်ရှိခဲ့သူ အောင်မြင်မှုတွေ့ရှိသောသာသနာပြုတစ်ဦး ဤသို့ဆိုသည်။ “ဒါကျွန်တော့်အိမ်၊ ကျွန်တော်တာဝန်ရထားတဲ့အသင်းတော်ရှိသူများဟာ ကျွန်တော့်ညီအစ်ကိုညီအစ်မများဖြစ်တယ်လို့ စိတ်နှလုံးအတွင်းထဲကနေ တကယ်ခံစားရတယ်။ ကနေဒါကိုပြန်

လည်တဲ့အခါ ကိုယ့်အိမ်ကိုယ်ပြန်တယ်လို့တောင်မထင်တော့ဘူး။ ကနေဒါကနေပြန်ထွက်လာရတော့မယ့် နောက်ဆုံးအပတ်လောက်ဆိုယင် ပြန်ဖို့တကဲကဲဘဲဖြစ်နေတယ်။ ခါတိုင်းလိုလိုဘဲ အဲ့ဒီလိုဖြစ်တယ်။ ပြန်ရောက်တဲ့အခါ ကျမ်းစာသင်သားများနဲ့ ညီအစ်ကိုညီအစ်မများကိုပြန်တွေ့ရတာ သိပ်ဝမ်းသာတဲ့အကြောင်း ပြောပြတဲ့အခါလည်း သူတို့နဲ့အတူရှိနေချင်တဲ့စိတ် ကျွန်တော့်မှာရှိတာကို သူတို့ဝမ်းသာကြတယ်။”—၁ သက်သာလောနိတ် ၂:၈။

၁၆၊ ၁၇။ (က) ဓမ္မအမှု၌ပိုမိုထိရောက်မှုရှိရန် သာသနာပြု နှင့် ဒေသခံ ဧဝံဂေလိဟောပြောသူများစွာတို့သည် အဘယ်စိန်ခေါ်ချက်ကိုလက်ခံခဲ့ပြီနည်း။ (ခ) တိုင်းရင်းသားစကားဖြင့်ဟောပြောခဲ့သည့်အတွက် သာသနာပြုတစ်ဦး အဘယ်အတွေ့အကြုံကိုရခဲ့သနည်း။

^၁၆ မိမိတို့၏ဒေသခံရပ်ကွက်များတွင် ဘာသာခြားစကားပြောဆိုသူများစွာနေထိုင်သည့်အရပ်တွေ့ခဲ့လျှင် သူတို့ဘာသာစကားကိုကြိုးစားသင်ယူသူအချို့ရှိသည်။ ဤနည်းဖြင့် အခြားသူတို့သည် မိမိထက်သာလွန်သည်ဟုယူမှတ်ကြောင်း တင်ပြကြပါသည်။ “တောင်အာဖရိကမှာ အာဖရိကလူမျိုးနဲ့ဥရောပမှလူမျိုး အချင်းချင်း မယုံသင်္ကာစိတ်ရှိတတ်တယ်။ ဒါပေမယ့် ဒေသခံဘာသာစကားပြောလိုက်ရုံနဲ့ အဲ့ဒီစိတ်ထားကို ပျောက်လွင့်သွားစေတယ်” ဟုသာသနာပြုတစ်ဦးပြောပြသည်။ သတင်းကောင်းကြားနာသူများ၏ တိုင်းရင်းသားဘာသာစကားကိုပြောဆိုခြင်းသည် သူတို့နှလုံးထိမိရန် များစွာအကူအညီပေးပါသည်။ ယင်းသို့ပြုရန် ကြိုးစားအားထုတ်မှုအပြင် နှိမ့်ချစွာဖြင့်စွဲစွဲမြဲမြဲလေ့လာကျင့်သုံးရန်လိုသည်။ အာရှနိုင်ငံတစ်နိုင်ငံတွင် သာသနာပြုသူတစ်ဦးရှင်းပြသည့်အတိုင်းပင်ဖြစ်သည်။ “စကားပြောမှားမှားနေတဲ့အတွက် ရယ်မောခံရတာ တကယ့်စမ်းသပ်မှုတစ်ခုဘဲ။ လက်မြှောက်အရှုံးပေးတာက လွယ်သေးတယ်ထင်ရတယ်။” သို့သော် ဘုရားသခင်နှင့်ကိုယ်နှင့်စပ်ဆိုင်သူကိုချစ်ခြင်းက ဤသာသနာပြုအား ဆက်ကြိုးစားအားထုတ်စေခဲ့သည်။—မာကု ၁၂:၃၀၊ ၃၁။

^၁၇ နိုင်ငံခြားသားတစ်ဦးသည် မိမိတို့၏ဘာသာစကားဖြင့် သတင်းကောင်းကိုကြိုးစားတင်ပြခြင်းကို လူတို့တွေ့ရှိသည့်အခါ သူတို့တကယ်သဘောကျနှစ်သက်သည်။ တစ်ခါတစ်ရံ မမျှော်လင့်သောကောင်းချီးများဖြစ်ပွားစေသည်။ အာဖရိကတိုက်၊ လီစိုသိုနိုင်ငံတွင် စက်စူတူးစကားဖြင့် အထည်အလိပ်ဆိုင်တစ်ခုတွင် အမေရိကန်သာသနာပြုတစ်ဦးဟောပြောနေသည်။ အခြားအာဖရိကနိုင်ငံတစ်နိုင်ငံမှ အစိုးရအရာရှိတစ်ဦးသည် ထိုနေရာသို့ရောက်ရှိနေ၍ သူ့စကားကိုကြားလိုက်သည်။ သို့နှင့်သူမအားချီးမွမ်းလိုက်သည့်အခါ ယင်းအစိုးရအရာရှိ၏ဘာသာစကားဖြင့်ပင် သူနှင့်အပြန်အလှန်စကားပြောဆိုလိုက်သည်။ “ခင်ဗျားစွာဟီလီစကားလည်းတတ်တဲ့အတွက် ကျွန်တော်တို့နိုင်ငံမှာ ကျွန်တော်တို့လူမျိုးများကြား လာအမှုထမ်းပါလား” ဟုသူပြောလိုက်သည်။ လိမ္မာပါးနပ်စွာဖြင့် သာသနာပြုကဤသို့ဖြေဆိုခဲ့သည်။ “သိပ်ကောင်းမှာပေါ့။ ဒါပေမယ့် ကျွန်မက ယေဟောဝါသက်သေတစ်ဦးဖြစ်တယ်။ လောလောဆယ်အချိန်မှာ ကျွန်မတို့လုပ်ငန်းကို ဆရာရဲ့နိုင်ငံမှာပိတ်ပင်ထားတယ်။” သူက “ခင်ဗျားတို့အလုပ်ကို ကျွန်တော်တို့အားလုံးအတိုက်အခံလုပ်တယ်လို့မထင်ပါနဲ့။ ယေဟောဝါသက်သေများကို ကြိုက်တဲ့လူအတော်များများရှိပါတယ်။ တစ်နေ့နေ့တော့ ကျွန်တော်တို့လူမျိုးကို လွတ်လွတ်လပ်လပ်သင်ကြားပေးနိုင်ပါလိမ့်မယ်” ဟုဖြေဆိုခဲ့သည်။ ထိုနောက်မကြာမီ ယင်းနိုင်ငံတွင် ယေဟောဝါသက်သေများ လွတ်လပ်စွာကိုးကွယ်ဝတ်ပြုနိုင်ပြီဟူသောသတင်းကို သာသနာပြုကြားလိုက်ရ၍ အလွန်ဝမ်းသာခဲ့ပါသည်။

ရပိုင်ခွင့်တို့ကို စွန့်လွှတ်ရန်အသင့်ရှိ

၁၈၊ ၁၉။ (က) သခင်ယေရှုခရစ်ကို ပေါလုသည် အဘယ်အရေးကြီးသည့်နည်းလမ်းဖြင့် ကြိုးစားအတုယူခဲ့သနည်း။ (ခ) သတင်းကောင်းကြားနာသူများ ထိမိ၍လဲစရာဖြစ်နိုင်သည့်အကြောင်းကို ရှောင်ကြဉ်ခြင်း၏အရေးကြီးမှုကိုတင်ပြသည့် တွေ့ကြုံမှု (အပိုဒ်ပါ၊ သို့မဟုတ် သင့်ကိုယ်ပိုင်) ကိုတင်ပြပါ။

^၁၈ တမန်တော်ပေါလုက “ငါသည် ခရစ်တော်၏နည်းတူကျင့်သကဲ့သို့ သင်တို့လည်း ငါ့နည်းတူကျင့်ကြလော့” ဟုရေးသားချိန်တွင် သူတစ်ပါးကိုထိမိ၍မလဲစေရန် ရှောင်ကြဉ်ဖို့လိုကြောင်းကို ဤသို့ဆွေးနွေးပြီးခါစဖြစ်သည်။ “သင်တို့သည် စားသော်လည်းကောင်း၊ သောက်သော်လည်းကောင်း၊ မည်သည့်အမှုကိုပြုသော်လည်းကောင်း ဘုရားသခင်၏ဘုန်းတော်ကိုထောက်၍ ခပ်သိမ်းသောအမှုကိစ္စကိုပြုကြလော့။ လူများတို့သည် ကယ်တင်ခြင်းသို့ရောက်စိမ့်သောငှာ ငါသည် ကိုယ်အကျိုးကိုမရှာဘဲ သူ့အကျိုးကိုရှာ၍ ခပ်သိမ်းသောလူတို့၏အလိုသို့ အရာရာ၌လိုက်သည်နည်းတူ၊ သင်တို့လည်း ယုဒလူ၊ ဟေလသလူ၊ ဘုရားသခင်၏အသင်းတော်ဝင်သူတို့၌ ထိမိ၍လဲစရာအကြောင်းကိုမပြု” ရကြ။—၁ ကောရိန္သု ၁၀:၃၁-၃၃၊ ၁၁:၁။

^၁၉ မိမိတရားကိုနာသူများအကျိုးအလိုငှာ ကိုယ်ကျိုးစွန့်ရန်အသင့်ရှိသော ပေါလုကဲ့သို့ဧဝံဂေလိဟောပြောသူများသည် ကောင်းချီးများစွာရိတ်သိမ်းရ၏။ ဥပမာ၊ အာဖရိကနိုင်ငံတစ်နိုင်ငံရှိ သာသနာပြုမောင်နှံတစ်စုံသည် သူတို့မင်္ဂလာဆောင်နှစ်ပတ်လည်နေ့ကိုပွဲခံရန် ဟိုတယ်တစ်ခုတွင် ညစာသွားစားကြသည်။ သမ္မာကျမ်းစာတွင် အရက်ယမကာကိုအသင့်အတင့်သုံးဆောင်ခြင်းကို မတားမြစ်ထားသည့်အတွက် ဝိုင်အရက်အနည်းငယ်ဝယ်သောက်ရန် ပထမကြံစည်ကြသည်။ (ဆာလံ ၁၀၄:၁၅) သို့သော် နယ်ခံလူများထိမိလဲစရာဖြစ်မည်ကိုစိုးရိမ်ပြီး သူတို့မသောက်ရန်ဆုံးဖြတ်ကြသည်။ “နောက်ပိုင်းမှာ အဲ့ဒီဟိုတယ်မှာထမင်းချက်တဲ့သူနဲ့ ကျွန်တော်တို့ကျမ်းစာသင်အံမှုစနိုင်ခဲ့တယ်။ အတော်ကြာတော့မှ သူက ‘ဟိုတယ်မှာ ညစာလာစားခဲ့တဲ့အချိန်ကို မှတ်မိသလား။ ကျွန်တော့်တို့ မီးဖိုချောင်တံခါးနောက်ကနေ ခင်ဗျားတို့ကိုဂရုစိုက်ကြည့်နေကြတာ။ ချာ့ချ်ကသာသနာပြုများက အရက်သောက်တာမှားတယ်လို့ ကျွန်တော်တို့ကိုပြောထားတယ်။ ဒါပေမယ့် သူ့တို့ကျတော့ဟိုတယ်ကိုလာတိုင်း ဝိုင်မှာပြီးအကြီးအကျယ်သောက်ကြတယ်။ အဲ့ဒါကြောင့် ခင်ဗျားလည်း အရက်တစ်မျိုးမျိုးမှာသောက်မယ်ဆိုယင် တရားလာဟောတဲ့အခါ ခင်ဗျားတရားကိုနားမထောင်ဘူးလို့ဆုံးဖြတ်ထားကြတယ်’” ဟုပြောပြခဲ့ကြောင်း လင်ယောက်ျားဖြစ်သူက ပြောပြသည်။ ယနေ့ထိုထမင်းချက်နှင့်အတူ ဟိုတယ်အလုပ်သမားအချို့ပါ နှစ်ခြင်းခံပြီးသားသက်သေခံများဖြစ်နေကြပြီ။

လုပ်ကိုင်စရာများစွာရှိနေသေး

၂၀။ ဇွဲရှိသောဧဝံဂေလိဟောပြောသူများအဖြစ် ခံနိုင်ရည်ရှိရန် အဘယ်ကြောင့်အရေးကြီးသနည်း။ အဘယ်ရွှင်လန်းဖွယ်ရာအခွင့်ထူးကို များစွာသောသူတို့လက်ခံယူနေကြသနည်း။

^၂၀ ဤစနစ်ဆိုး၏အဆုံးအလျင်အမြန်ချဉ်းကပ်လာစဉ် သတင်းကောင်းကိုကြားနာလိုသူများစွာရှိနေဆဲဖြစ်သည်။ ခရစ်ယာန်တိုင်း သစ္စာရှိဧဝံဂေလိဟောပြောသူအဖြစ် တည်ကြည်ရန် ယခင်ကထက်ယခုပိုအရေးကြီးနေပါသည်။ (မဿဲ ၂၄:၁၃) ဖိလိပ္ပိ၊ ပေါလု၊ ဗာနဗ၊ သိလ နှင့် တိမောသေတို့ကဲ့သို့ အထူးတလည်ဧဝံဂေလိဟောပြောသူတစ်ဦးဖြစ်လာခြင်းအားဖြင့် ဤလုပ်ငန်းတွင် သင်ပါဝင်နိုင်မည်လော။ များစွာသောသူတို့သည် ရှေ့ဆောင်လုပ်ငန်းတွင်ပါဝင်ပြီး သာ၍လိုအပ်သောနေရာများတွင် အမှုထမ်းခြင်းငှာ အသင့်ရှိနေကြခြင်းအားဖြင့် ထပ်တူပြုမူနေကြသည်။

၂၁။ ယေဟောဝါလူများအတွက် “ဆောင်ရွက်စရာလုပ်ငန်းတံခါးကြီးသည်” အဘယ်နည်းဖြင့်ပွင့်လျက်ရှိသနည်း။

^၂၁ ယေဟောဝါသက်သေများ၏လုပ်ငန်းကို ယခင်ကပိတ်ပင်ထားသော အာဖရိက၊ အာရှ၊ အရှေ့ဥရောပနိုင်ငံအချို့တွင် များမကြာမီက ဧဝံဂေလိဟောပြောခြင်းငှာ နယ်ပယ်အသစ်များဖွင့်ခွင့်ရရှိခဲ့သည်။ တမန်တော်ပေါလုအတွက်ဖြစ်ခဲ့သကဲ့သို့ပင် ယေဟောဝါလူများအတွက် “ဆောင်ရွက်စရာလုပ်ငန်းတံခါးကြီးသည် အဆင်သင့်၍ . . . ဖွင့်လျက်ရှိ၏။” (၁ ကောရိန္သု ၁၆:၉၊ ကဘ) အာဖရိတိုက်၊ မိုဇမ်ဘစ်နိုင်ငံသို့ များမကြာမီကရောက်ရှိလာသော သာသနာပြုဧဝံဂေလိဟောပြောသူများသည် ကျမ်းစာသင်လိုသူများလွန်းသဖြင့် လက်မလည်နိုင်အောင်ဖြစ်နေကြသည်။ ၁၉၉၁၊ ဖေဖော်ဝါရီ ၁၁ မှစ၍ထိုနိုင်ငံတွင် ယေဟောဝါသက်သေများ၏လုပ်ငန်းကို တရားဝင်ဖြစ်စေခဲ့သည့်အတွက် ဝမ်းသာအားရနိုင်ကြပါသည်။

၂၂။ ကျွန်ုပ်တို့၏ဒေသအရပ်တွင် စေ့ငစွာလုပ်ဆောင်ပြီးသည်ဖြစ်စေ၊ မပြီးသည်ဖြစ်စေ အဘယ်အမှုကိုဆောင်ရွက်ရန် စိတ်ပိုင်းဖြတ်ထားရမည်နည်း။

^၂၂ လွတ်လပ်စွာဝတ်ပြုကိုးကွယ်ခွင့်ရရှိထားသောနိုင်ငံများတွင်လည်း ဆက်လက်တိုးတက်နေဆဲရှိသည်။ မှန်ပါ၏၊ အဘယ်အရပ်၌နေစေကာမူ “သခင်ဘုရား၏အမှုတော်၌လုပ်ကိုင်စရာများစွာ” ရှိနေဆဲဖြစ်သည်။ (၁ ကောရိန္သု ၁၅:၅၈၊ ကဘ) ထိုအတွက်ကြောင့် အသီးသီး ‘ဧဝံဂေလိဟောပြောသူအဖြစ် ဆောင်ရွက်ရသောအမှုကို အပြည့်အဝဆောင်ရွက်’ ကြစဉ် ကျန်ကြွင်းသောအချိန်ကို ပညာရှိရှိဆက်လက်အသုံးပြုကြစို့။—၂ တိမောသေ ၄:၅။ ဧဖက် ၅:၁၅၊ ၁၆။

သင်ရှင်းပြနိုင်မည်လော

▫ ဧဝံဂေလိဟောပြောသူ မည်သည် အဘယ်နည်း။

▫ ၁၉၁၄ ကတည်းက သတင်းကောင်းတွင် အဘယ်အကြောင်းများထပ်ဆင့်ပါဝင်လာသနည်း။

▫ ၁၉၁၉ ကတည်းက ဧဝံဂေလိဟောပြောခြင်းလုပ်ငန်းသည် မည်သို့တိုးတက်လာသနည်း။

▫ ဤအောင်မြင်မှုရရှိရေးကို အဘယ်အဓိကအချက်များက အထောက်အကူပြုခဲ့သနည်း။

[စာမျက်နှာ ၁၈ ပါ လေးထောင့်ကွက်]

၁၉၃၉ ကတည်းကတိုးချဲ့ခြင်း

ဂိလဒ်ကျောင်းတွင်လေ့ကျင့်ခံပြီးသားသာသနာပြုများကိုစေလွှတ်ခဲ့သည့် တိုက်ကြီးသုံးခုမှပုံဥပမာအချို့ကို သုံးသပ်ကြည့်ပါ။ ၁၉၃၉ ခုနှစ်က အနောက်အာဖရိကတွင် ဘုရားသခင့်နိုင်ငံတော်ကြေညာသူ ၆၃၆ ယောက်သာရှိပါသည်။ ၁၉၉၁ ခုတိုင်လေသော် အနောက်အာဖရိကရှိ နိုင်ငံပေါင်း ၁၂ နိုင်ငံတွင် ၂၀၀,၀၀၀ ကျော်ရှိနေပြီ။ တောင်အမေရိကတိုက်ရှိနိုင်ငံများတွင်လည်း အကြီးအကျယ်တိုးတက်ကြီးပွားလာရန် သာသနာပြုများသည် များစွာအကျိုးဆောင်ခဲ့သည်။ တစ်နေရာမှာ ဘရာဇီးလ်နိုင်ငံဖြစ်သည်။ ထိုတွင် ၁၉၃၉ ခုနှစ်၌ ဘုရားသခင့်နိုင်ငံတော်ကြေညာသူ ၁၁၄ ဦးရှိရာမှ ၁၉၉၂ ဧပြီ တွင် နှုန်းသစ် ၃၃၅,၀၃၉ ယောက် ရသည်တိုင်တိုးများလာသည်။ အာရှတိုက်ရှိနိုင်ငံအသီးသီးသို့ သာသနာပြုများရောက်လာသည့်အခါ ထပ်တူပင်တိုးတက်ကြီးပွားလာသည်။ ဒုတိယကမ္ဘာစစ်အတွင်း ဂျပန်ပြည်၌ ယေဟောဝါသက်သေများသည် ပြင်းထန်စွာညှဉ်းဆဲခံခဲ့ရ၏။ သူတို့လုပ်ငန်းလည်း ရပ်တန့်သွားခဲ့သည်။ သို့သော် ၁၉၄၉ တွင်လုပ်ငန်းတော်မြတ်ကို ပြန်ဖွဲ့စည်းစီမံပေးရန် သာသနာပြုဆယ့်သုံးဦးရောက်ရှိလာသည်။ ထိုလုပ်ငန်းတော်နှစ်အတွင်း ဂျပန်ပြည်တစ်ပြည်လုံး၏ လယ်ကွင်းလုပ်ငန်းမှတ်တမ်းသွင်းသူ တိုင်းရင်းသားကြေညာသူ ဆယ်ယောက်သာ ရှိခဲ့သည်။ သို့သော် ၁၉၉၂ ဧပြီ တွင် စုစုပေါင်းကြေညာသူအရေအတွက်မှာ ၁၆၇,၃၇၀ ဖြစ်သည်။

[စာမျက်နှာ ၂၀ ပါ လေးထောင့်ကွက်]

ခရစ်ယာန်ဘောင်နှင့် ဘာသာစကားပြဿနာ

ခရစ်ယာန်ဘောင်သာသနာပြုအချို့တို့သည် ဘာသာခြားစကားကိုသင်ယူရန် ကြိုးစားအားထုတ်ခဲ့ကြသော်လည်း အများကမူ မိမိတို့၏ဥရောပစကားကို ဒေသခံလူတို့ပြောဆိုတတ်ရန် မျှော်လင့်ကြသည်။ The Missionaries ဆိုသည့်စာအုပ်တွင် ဂျက်ဖရီ မောဟောက်စ်ရှင်းပြသကဲ့သို့ပင်ဖြစ်ချေပြီ။

“တိုင်းရင်းဘာသာစကားတစ်ခုတတ်မြောက်ရေးကို ကျမ်းစာဘာသာပြန်ဖို့အတွက်သာ အများအားဖြင့်ယူမှတ်ပြီးသင်ယူကြခြင်းကခက်သည်။ တိုင်းရင်းသားတစ်ဦး၏ဘာသာစကားကို ကျွမ်းကျွမ်းကျင်ကျင်ပြောဆိုမှသာ လူနှစ်ဦးစပ်ကြား အကျွမ်းဝင်နားလည်မှုရှိနိုင်ရန် သာသနာပြုများ တစ်ဦးစီသော်လည်းကောင်း၊ သူတို့၏အဖွဲ့များကသော်လည်းကောင်း ဘာသာစကားသင်ယူရန်မကြိုးစားကြပါ။ သာသနာပြုတိုင်းသည် ဒေသခံစကားလုံးတစ်ခွန်းနှစ်ခွန်းကိုသာ သင်ယူကြ၏။ . . . ထိုထက်ပို၍ ပီဂျင်အင်္ဂလိပ်ခေါ်ဘာသာစကားနှင့် တိုးညင်းလေးကွေးသောလေယူလေသိမ်းဖြင့် အများအားဖြင့်ဆက်သွယ်ပြီး ဖွင့်ဟပြောခြင်းမရှိသော်လည်း အာဖရိကတိုင်းရင်းသားသည် အင်္ဂလိပ်ဧည့်သည်၏စံချိန်အောက်ရှိရမည် သဘောထားရှိစေသည်။ အဆိုးရွားဆုံးမှာ ဤသို့အားဖြင့် လူမျိုးရေးအရ သာလွန်ကြောင်းကို ထင်ရှားပြခြင်းပင်ဖြစ်သည်။”

၁၉၉၂ တွင်ဘာသာစကားရပ်ပြဿနာအကြောင်း လန်ဒန်မြို့ရှိ အရှေ့တိုင်းနှင့်အာဖရိကဆိုင်ရာ လေ့လာမှုသင်တန်းကျောင်းက ဤပြန်တမ်းကိုထုတ်ဆင့်ကြေညာခဲ့သည်။ “တိုင်းရင်းသားဘာသာစကားကို သာသနာပြုများတတ်မြောက်ကျွမ်းကျင်ရေး ပျမ်းမျှအဆင့်သည် . . . အလွန်ညံ့ဖျင်းလျော့နည်းနေခြင်းကား ဝမ်းနည်းစရာပင်ဖြစ်သည်။”

ကင်းမျှော်စင်သာသနာပြုများသည် ဒေသခံဘာသာစကားသင်ယူခြင်းကို မသင်၍မဖြစ်သည့်အလုပ်ကဲ့သို့ အစကတည်းကယူမှတ်ထားကြသည့်အတွက် သာသနာပြုလုပ်ငန်းတွင် သူတို့အောင်မြင်မှုတွေ့ရှိခဲ့ခြင်း၏အကြောင်းတစ်ရပ်ဖြစ်ပေသည်။