ဝိညာဉ်ရေးသန်စွမ်းသောမိသားစုများ—မည်သို့အားဖြင့်နည်း

^၁ ခရစ်ယာန်မိသားစုများသည် “ဘုရားဝတ်ကိုရည်မှတ်လျက်၊ မိမိအိမ်ကိုပြုစု” ခြင်းအတွက် ချီးမွမ်းခံရကြသည်။ (၁ တိ. ၅:၄) သို့သော် ကျွန်ုပ်တို့၏ယုံကြည်ခြင်းကို ချည့်နဲ့သွားစေနိုင်သည့် ကျွန်ုပ်တို့ဝန်းကျင်ရှိ မကောင်းသောသြဇာလွှမ်းမိုးမှုအများအပြားရှိရာ မိသားစုများသည် ဝိညာဉ်ရေးသန်စွမ်းနေရန် ကြိုးစားလုပ်ဆောင်ဖို့အရေးကြီး၏။ ယင်းကို မည်သို့ပြုလုပ်နိုင်သနည်း။

^၂ ခရစ်တော်ကဲ့သို့ဦးစီးပါ– အိမ်ထောင်ဦးစီးများသည် အိမ်ထောင်ခိုင်မြဲရန် မိမိတို့၏တာဝန်ထမ်းဆောင်ရာတွင် ယေရှုခရစ်ကိုတုပဖို့လို၏။ ယေရှုသည် မိမိ၏ယဇ်သကာသေခြင်းအားဖြင့် ကျွန်ုပ်တို့ကိုတစ်ကြိမ်မေတ္တာပြရုံမက အသင်းတော်ကို အဆက်မပြတ် “ကျွေးမွေးပြုစု” တော်မူ၏။ (ဧ. ၅:၂၅-၂၉) မေတ္တာရှိသောမိဘတို့သည် မိမိတို့မိသားစုများ၏ ဝိညာဏလိုအပ်ရာများကို နေ့စဉ်ကြည့်ရှုပေးခြင်းဖြင့် ကြင်နာသောဂရုစိုက်မှုဆိုင်ရာ ၎င်းပုံသက်သေကိုတုပကြသည်။ ယင်းတွင် မိသားစုကျမ်းစာသင်အံမှုပတ်စဉ်ကျင်းပခြင်း၊ ဖြစ်နိုင်သည့်အခါတိုင်း အဓိပ္ပာယ်ပြည့်ဝသော ဝိညာဏဆွေးနွေးမှုများပြုခြင်းနှင့် ပြဿနာများပေါ်ပေါက်သည့်အခါ ယင်းတို့ကို ကိုင်တွယ်ဖြေရှင်းခြင်းတို့ပါဝင်သည်။—တရား. ၆:၆၊ ၇။

^၃ လယ်ကွင်းဓမ္မအမှုတွင်– ယေဟောဝါနှင့် ကိုယ်တော့်ရည်ရွယ်ချက်များအကြောင်း အခြားသူတို့ကို သက်သေခံခြင်းသည် မိမိတို့ဝတ်ပြုရေး၏ အရေးကြီးသောအပိုင်းတစ်ခုဖြစ်ကြောင်း မိသားစုဝင်တိုင်း သဘောပေါက်သင့်သည်။ (ဟေရှာ. ၄၃:၁၀-၁၂) အသင်မိဘတို့သည် သင်တို့၏သားသမီးများကို ယေဟောဝါ၏သစ္စာရှိသက်သေခံများဖြစ်စေလိုလျှင် ဓမ္မအမှုအတွက် သူတို့၏နှလုံးကိုပြင်ဆင်ပေးရာ၌ အလွန်စောစောစတင်ရမည်။ လုပ်ငန်းတော်တွင် ကိုယ်ကျိုးစွန့်ရန်နှင့် ၎င်းတွင်ပတ်စဉ်ပါဝင်ရန် လိုအပ်ရသည့်အကြောင်းရင်းများကို ဆွေးနွေးပါ။ (မ. ၂၂:၃၇-၃၉) ထို့နောက် လယ်ကွင်းဓမ္မအမှုတွင် သင်နှင့်အတူမှန်မှန်ပါဝင်ရန် သူတို့အတွက်အစီအစဉ်များလုပ်ပေးပါ။

^၄ ထိရောက်သောတင်ဆက်မှုတစ်ခုကို ကြိုတင်ပြင်ဆင်၍ အစမ်းလေ့ကျင့်ရန် ပတ်စဉ်မိသားစုသင်အံမှုအတွင်း အချိန်ဖယ်ထားခြင်းဖြင့် ဟောပြောခြင်းလုပ်ငန်းအပေါ်လေးမြတ်မှုကို တည်ဆောက်ပေးပါ။ ဓမ္မအမှုတွင် သင့်ကလေးတစ်ဦးစီကို လေ့ကျင့်ပေးကာ သူတို့၏အသက်အရွယ်၊ အစွမ်းအစနှင့်အညီတိုးတက်ရန် ကူညီပေးပါ။ လုပ်ငန်းတော်တွင် အတူတကွပါဝင်ပြီးနောက် ယေဟောဝါ၏ကောင်းမြတ်မှုကို သူတို့ကိုယ်တွေ့မြင်ခဲ့ရပုံကို ဆွေးနွေးပါ။ ယုံကြည်ခြင်းခိုင်ခံ့စေသည့်တွေ့ကြုံမှုများကို ပြောပြပါ။ မိသားစုများအနေနှင့် “သခင်သည် ကြင်နာတော်မူကြောင်း မြည်းစမ်း” လေလေ ယေဟောဝါနှင့်ပို၍နီးကပ်ကာ “မကောင်းမှုအားလုံး” ကိုခုခံတွန်းလှန်ရန် ခွန်အားရှိလေလေဖြစ်မည်။—၁ ပေ. ၂:၁-၃၊ ကဘ။

^၅ အစည်းအဝေးများတွင်– မိသားစုဝင်များသည် အထူးသဖြင့် မိမိတို့ထဲမှတစ်ဦး မောပန်းနွမ်းနယ်၊ စိတ်ဓာတ်ကျ သို့မဟုတ် ဖိစီးမှုခံနေရလျှင် အသင်းတော်အစည်းအဝေးအားလုံးတက်ရောက်ရန် တစ်ဦးကိုတစ်ဦးကူညီကြသောအခါ မည်မျှကောင်းလိုက်သည်ဖြစ်ခြင်း! ညီအစ်မငယ်တစ်ဦးက ဤသို့ဆိုသည်– “ကျွန်မရဲ့အဖေဟာ အလုပ်ကနေ အိမ်ကိုပြန်လာတဲ့အခါ မောပန်းနွမ်းလျနေတယ်။ ဒါပေမဲ့ အဲဒီညနေစည်းဝေးမှာ ပြောမယ့်အချက်ကောင်းတစ်ချက်ကို ကျွန်မဝေမျှပေးတယ်၊ အဲဒါက စည်းဝေးသွားဖို့ သူ့ကိုအားပေးမှုဖြစ်စေတယ်။ ကျွန်မမောပန်းနွမ်းနယ်နေတဲ့အခါမှာလည်း စည်းဝေးသွားဖို့ ကျွန်မကိုသူအားပေးတယ်။”—ဟေဗြဲ ၁၀:၂၄၊ ၂၅။

^၆ ကိစ္စရပ်များကို အတူတကွလုပ်ဆောင်ပါ– မိသားစုများသည် အိမ်ထောင်တာဝန်များကူလုပ်ပေးခြင်း ကဲ့သို့သောအရာများကို အတူတကွလုပ်ဆောင်သင့်သည်။ ကောင်းစွာရွေးချယ်ထားသောအပန်းဖြေမှုအတွက်လည်း အချိန်ဖယ်ထားသင့်သည်။ ပျော်ပွဲစားထွက်ခြင်း၊ ခြေလျင်ခရီးထွက်ခြင်း၊ ကစားခြင်းနှင့် ဆွေမျိုး သို့မဟုတ် မိတ်ဆွေများထံအလည်သွားခြင်းသည် ပျော်ရွှင်စရာဖြစ်ကာ အမှတ်ရစရာများဖြစ်နိုင်သည်။—ဒေ. ၃:၄။

^၇ ခိုင်ခံ့မြဲမြံသောခရစ်ယာန်မိသားစုများသည် ဝိညာဉ်ရေးနှင့်စပ်လျဉ်းသည့် နေ့စဉ်စိန်ခေါ်ချက်များကို အောင်နိုင်ကြသည်။ ယေဟောဝါနှင့်ပို၍နီးကပ်နေခြင်းဖြင့် သူတို့သည် ကိုယ်တော်ပေးသည့်တန်ခိုးကို ခံစားကြရသည်။—ဧ. ၆:၁၀။