‘ငါသည် သင်တို့အား ပေးသမျှသော ပညတ်တော်တို့ကို စောင့်ရှောက်စေခြင်းငှာ သွန်သင်ပေးကြလော့’

‘သင်တို့သွား၍ ငါ့တပည့်ဖြစ်စေလျက်၊ ငါသည် သင်တို့အားပေးသမျှသော ပညတ်တော်တို့ကို စောင့်ရှောက်စေခြင်းငှာ သွန်သင်ပေးကြလော့။’—မဿဲ ၂၈:၁၉၊ ၂၀။

၁။ တပည့်ဖိလိပ္ပုနှင့် အီသီယိုးပီးယားပြည်သားတို့သည် အဘယ်အကြောင်း ပြောဆိုဆွေးနွေးခဲ့ကြသနည်း။

အီသီယိုးပီးယားပြည်သားသည် ယေရုရှလင်မြို့သို့ တောက်လျှောက်ခရီးနှင်ခဲ့သည်။ ထိုတွင် သူချစ်မြတ်နိုးသော ဘုရားသခင် ယေဟောဝါကို ဝတ်ပြုကိုးကွယ်ခဲ့၏။ ဘုရားသခင့်မှုတ်သွင်းခံ နှုတ်မြွက်စကားတော်ကိုလည်း သူမြတ်နိုးသည်မှာ ထင်ရှား၏။ သူ၏မြင်းရထားဖြင့် အိမ်အပြန်လမ်းတွင် ပရောဖက်ဟေရှာယကျမ်းကို ဖတ်နေစဉ် ခရစ်တော်တပည့် ဖိလိပ္ပုနှင့် တွေ့ဆုံခဲ့သည်။ ဖိလိပ္ပုက အီသီယိုးပီးယားပြည်သားအား “ဖတ်သောအရာကို နားလည်ပါ၏လော” ဟုမေးမြန်း၏။ ထိုသူက “သွန်သင်ပဲ့ပြင်သောသူမရှိလျှင် အဘယ်သို့နားလည်နိုင်မည်နည်း” ဟုပြန်ဆို၏။ အဆိုပါ ရိုးသားသောကျမ်းစာလေ့လာသူအား ခရစ်တော်တပည့်ဖြစ်လာစေရန် ဖိလိပ္ပု ဆက်၍ကူညီပေးခဲ့သည်။—တမန်တော် ၈:၂၆-၃၉။

၂။ (က) အီသီယိုးပီးယားပြည်သား ပြန်ပြောသောစကားသည် အဘယ်နည်းဖြင့် အဓိပ္ပာယ်ရှိသနည်း။ (ခ) တပည့်ဖြစ်စေပါဟူသော ခရစ်တော်၏မိန့်မှာချက်နှင့်ဆက်နွှယ်သည့် အဘယ်မေးခွန်းများကို သုံးသပ်ကြမည်နည်း။

^၂ ‘သွန်သင်ပဲ့ပြင်သောသူမရှိလျှင် နားမလည်နိုင် ’ ဟု အီသီယိုးပီးယားပြည်သား ပြန်ပြောသည့်စကားမှာ မှတ်သားထိုက်ပေ၏။ မှန်ပါသည်၊ သူ့ကို ရှင်းပြ၊ သွန်သင်ပေးမည့်သူ လိုသည်။ ဤသို့ထုတ်ဖော်ပြောဆိုချက်က တပည့်ဖြစ်စေရန်တာဝန်ကို ယေရှုပေးခဲ့စဉ် ကိုယ်တော်၏မိန့်မှာချက်တွင်ပါသည့် တိကျပြတ်သားသော ညွှန်ကြားချက်တစ်ခု၏အရေးကြီးမှုကို ဖော်ပြသည်။ ထိုညွှန်ကြားချက်ကား အဘယ်နည်း။ အဖြေရရန် မဿဲကျမ်းအခန်းကြီး ၂၈ ပါ ယေရှု၏မိန့်မှာချက်ကို ဆက်၍သုံးသပ်ကြည့်ကြစို့။ ရှေ့ဆောင်းပါးတွင် အဘယ်ကြောင့်နည်းနှင့် အဘယ်နေရာ၌နည်း အစရှိသောမေးခွန်းများကို အဓိကထားလေ့လာခဲ့ပြီးပြီ။ ယခု တပည့်ဖြစ်စေပါဟူသော ခရစ်တော်၏မိန့်မှာချက်နှင့်ဆက်နွှယ်သည့် နောက်ထပ်မေးခွန်းနှစ်ခု အဘယ်အရာနည်းနှင့် အဘယ်အချိန်နည်းတို့ကို သုံးသပ်ကြမည်။

‘ပေးသမျှသောပညတ်တော်တို့ကို စောင့်ရှောက်စေခြင်းငှာ သွန်သင်ပေးကြလော့’

၃။ (က) တစ်ဦးတစ်ယောက်သည် ယေရှုခရစ်၏တပည့်တစ်ဦး မည်သို့ဖြစ်လာသနည်း။ (ခ) တပည့်ဖြစ်စေခြင်းတွင် အဘယ်အရာသွန်သင်ပေးခြင်း ပါဝင်သနည်း။

^၃ ခရစ်တော်၏တပည့်ဖြစ်လာစေရန် အခြားသူများကို အဘယ်အရာ သွန်သင်ပေးရမည်နည်း။ ယေရှုက နောက်လိုက်များအား “သင်တို့သွား၍ လူမျိုးတကာတို့ကို ငါ့တပည့်ဖြစ်စေလျက် ခမည်းတော်၊ သားတော်၊ သန့်ရှင်းသောဝိညာဉ်တော်၏နာမ၌ [နှစ်ခြင်း]ပေးကြလော့။ ငါသည် သင်တို့အား ပေးသမျှသောပညတ်တော်တို့ကို စောင့်ရှောက်စေခြင်းငှာ ဆုံးမ . . . [“သွန်သင်၊” ကဘ] ပေးကြလော့” ဟုမိန့်ဆိုခဲ့သည်။ (မဿဲ ၂၈:၁၉၊ ၂၀) ထို့ကြောင့် ခရစ်တော် မိန့်မှာခဲ့ရာများကို ကျွန်ုပ်တို့ သွန်သင်ပေးရမည်ဖြစ်သည်။a သို့သော် ယေရှု၏မိန့်မှာချက်များကို လေ့လာထားသူသည် တပည့်ဖြစ်လာရုံမက တပည့်ဆက်ဖြစ်နေရန် အဘယ်အရာက ထောက်ကူပေးမည်နည်း။ ယေရှု အသေအချာရွေးချယ်ပြောဆိုခဲ့သော စကားလုံးများတွင် အဓိကအချက်တစ်ချက်ကို တွေ့ရှိရ၏။ ကိုယ်တော်က ‘သင်တို့အား ပေးသမျှသော ပညတ်တော်တို့ကို သွန်သင်ပေးကြလော့’ ဟူ၍သာ မိန့်ဆိုခဲ့သည်မဟုတ်ကြောင်း သတိပြုပါ။ ယင်းအစား၊ ကိုယ်တော်က “သင်တို့အား ပေးသမျှသော ပညတ်တော်တို့ကို စောင့်ရှောက်စေခြင်းငှာ ဆုံးမ . . . [“သွန်သင်၊” ကဘ] ပေးကြလော့” ဟုမိန့်မှာခဲ့သည်။ (မဿဲ ၁၉:၁၇) ယင်းက အဘယ်အရာကို ဆိုလိုသနည်း။

၄။ (က) မိန့်မှာချက်ကို စောင့်ရှောက်ခြင်းဟူသည် အဘယ်နည်း။ (ခ) ခရစ်တော်၏မိန့်မှာချက်များကို စောင့်ရှောက်ရန် မည်သို့သင်ပေးရကြောင်း ဥပမာပေးပါ။

^၄ အမိန့်တစ်ခုကို လိုက်နာစောင့်ရှောက်ခြင်းဟူသည် အမိန့်နှင့်အညီ “ပြုမူလုပ်ကိုင်ခြင်း၊” နာခံခြင်း သို့မဟုတ် ကျင့်စောင့်ခြင်းဖြစ်သည်။ သို့ဖြစ်လျှင် ကျွန်ုပ်တို့သည် တစ်ဦးတစ်ယောက်အား ခရစ်တော်မိန့်မှာခဲ့ရာများကို စောင့်ရှောက်ရန် သို့မဟုတ် နာခံရန် မည်သို့သင်ပေးသနည်း။ ကားမောင်းနည်းပြဆရာတစ်ဦးသည် သင်တန်းသားများ ယာဉ်ဥပဒေလိုက်နာရန် သင်ပေးပုံကို စဉ်းစားကြည့်ပါ။ နည်းပြဆရာသည် သင်တန်းသားများကို သင်တန်းခန်းမထဲတွင် လမ်းစည်းကမ်းများ သင်ပေးပေမည်။ သို့သော် သင်တန်းသားများ သိရှိထားရာကို လက်တွေ့ကျင့်သုံးရန် လမ်းပေါ်တွင် ကြိုးစားကားမောင်းကျင့်နေစဉ် ဤစည်းကမ်းများကို မည်သို့လိုက်နာရကြောင်း သူတို့အား ညွှန်ကြားပေးရမည်ဖြစ်သည်။ ထိုနည်းတူစွာ၊ ကျွန်ုပ်တို့သည် လူတို့နှင့် ကျမ်းစာသင်အံမှုပြုသည့်အခါ ခရစ်တော်၏မိန့်မှာချက်များကို သင်ပေးကြသည်။ သို့သော် သင်သားများသည် ခရစ်တော်၏မိန့်မှာချက်များကို သူတို့၏ဘဝနှင့် ခရစ်ယာန်ဓမ္မအမှုတွင် လက်တွေ့ကျင့်သုံးရန် ကြိုးစားစဉ် လမ်းညွှန်ပေးဖို့လည်း လို၏။ (ယောဟန် ၁၄:၁၅; ၁ ယောဟန် ၂:၃) ထို့ကြောင့် တပည့်ဖြစ်စေပါဟူသော ခရစ်တော်၏မိန့်မှာချက်ကို အပြည့်အဝထမ်းဆောင်ရန် ကျွန်ုပ်တို့သည် သွန်သင်ပေးသူရော၊ လမ်းညွှန်ပေးသူပါဖြစ်ဖို့လိုသည်။ ဤနည်းဖြင့် ကျွန်ုပ်တို့သည် ယေရှုနှင့်ယေဟောဝါ ပြသသော ပုံသက်သေကို တုပကြသည်။—ဆာလံ ၄၈:၁၄; ဗျာ. ၇:၁၇။

၅။ ကျွန်ုပ်တို့နှင့် ကျမ်းစာလေ့လာနေသူသည် တပည့်ဖြစ်စေပါဟူသော ခရစ်တော်၏မိန့်မှာချက်ကိုနာခံရန် အဘယ်ကြောင့် တွန့်ဆုတ်နိုင်သနည်း။

^၅ ယေရှု၏မိန့်မှာချက်များကို စောင့်ရှောက်ရန် အခြားသူများအား သွန်သင်ပေးရာတွင် တပည့်ဖြစ်စေပါဟူသော မိန့်မှာချက်ကို လိုက်နာကြဖို့ ကူညီပေးခြင်း ပါဝင်သည်။ ကျွန်ုပ်တို့နှင့် ကျမ်းစာလေ့လာနေသူအချို့အတွက် ၎င်းသည် ခက်ကောင်းခက်ပေမည်။ သူတို့သည် ယခင်က ခရစ်ယာန်ဘောင်အသင်းသားများ ဖြစ်ခဲ့လျှင်ပင် သူတို့၏ဘာသာရေးဆရာဟောင်းများက သွား၍တပည့်ဖြစ်စေပါဟု သွန်သင်ပေးခဲ့ဖွယ်မရှိချေ။ ခရစ်ယာန်ဘောင်ချာ့ချ်များသည် သူတို့၏သိုးအုပ်ကို ဧဝံဂေလိဟောပြောရန် သွန်သင်ပေးခြင်းတာဝန် လုံးဝပျက်ကွက်နေသည်ဟု ချာ့ချ်ခေါင်းဆောင်အချို့က ပွင့်ပွင့်လင်းလင်း ဝန်ခံ၏။ ဤလောကသို့သွား၍ လူမျိုးအပေါင်းကို တပည့်ဖြစ်စေရန် ကူညီပေးပါဟူသော ယေရှု၏မိန့်မှာချက်နှင့်ပတ်သက်၍ ကျမ်းပညာရှင် ဂျွန် အာရ်. ဒဗလျူ. စတာတ်က ဤသို့ဖော်ပြခဲ့သည်– “အဲ့ဒီမိန့်မှာချက်ရဲ့ ဆိုလိုချက်ကို လိုက်နာဆောင်ရွက်ဖို့ ကျွန်တော်တို့ ပျက်ကွက်နေတာဟာ ယနေ့ ဧဝံဂေလိဟောပြောခြင်းနယ်ပယ်က ဧဝံဂေလိခရစ်ယာန်များရဲ့ အထူးအားနည်းချက်ဖြစ်နေတယ်။” သူက “ကျွန်တော်တို့ဟာ သတင်းတရားကို အဝေးကနေပဲ ကြေညာချင်ကြတယ်။ တစ်ခါတလေ ရေနစ်နေသူတွေကို အန္တရာယ်မရှိတဲ့ကမ်းစပ်ကနေ လှမ်းပြီး သတိပေးနေတဲ့သူတွေနဲ့ တူနေတယ်။ ရေထဲခုန်ဆင်းပြီး သူတို့ကို မကယ်ကြဘူး။ ရေစိုမှာ ကြောက်နေကြတယ်လေ” ဟုထပ်ဆင့်ဆိုသည်။

၆။ (က) ကျမ်းစာသင်သားတစ်ဦးကို ကူညီပေးသည့်အခါ ဖိလိပ္ပု၏ပုံနမူနာကို မည်သို့ တုပနိုင်သနည်း။ (ခ) ဟောပြောခြင်းလုပ်ငန်းတွင် ကျမ်းစာသင်သား စပါဝင်ချိန်တွင် ကျွန်ုပ်တို့၏စိုးရိမ်မှုကို မည်သို့ ပြနိုင်သနည်း။

^၆ ကျွန်ုပ်တို့နှင့်ကျမ်းစာလေ့လာနေသူသည် ယခင်က “ရေစိုမှာကြောက်” သောဘာသာရေးအဖွဲ့သားဖြစ်မည်ဆိုလျှင် ဥပစာစကားအရ ရေကြောက်ရွံ့ခြင်းကို တွန်းလှန်ပြီး တပည့်ဖြစ်စေပါဟူသော ခရစ်တော်၏မိန့်မှာချက်ကို နာခံရန် အခက်တွေ့နေပေမည်။ သူသည် အကူအညီလိုအပ်လိမ့်မည်။ အီသီယိုးပီးယားပြည်သားသည် ဖိလိပ္ပု၏သွန်သင်ချက်များကို နားလည်ပြီး နှစ်ခြင်းခံလိုစိတ်ရှိလာသကဲ့သို့ ကျမ်းစာသင်သားသည် ကျွန်ုပ်တို့၏သွန်သင်ချက်နှင့် လမ်းညွှန်ချက်တို့ကို အတွင်းကျကျနားလည်လာကာ လုပ်ဆောင်လိုစိတ်ရှိလာစေရန် စိတ်ရှည်ဖို့လိုသည်။ (ယောဟန် ၁၆:၁၃; တမန်တော် ၈:၃၅-၃၈) ထို့ပြင် တပည့်ဖြစ်စေပါဟူသော မိန့်မှာချက်ကို လိုက်နာရန် ကျမ်းစာသင်သားများအား ကျွန်ုပ်တို့သင်ပေးလိုသည့်ဆန္ဒက ဘုရားသခင့်နိုင်ငံတော်အကြောင်း သူတို့ စဟောပြောချိန်တွင် သူတို့အနားမှာနေ၍ လမ်းညွှန်ပေးဖို့ ကျွန်ုပ်တို့ကို လှုံ့ဆော်ပေး၏။—ဒေ. ၄:၉၊ ၁၀; လုကာ ၆:၄၀။

“ပေးသမျှသောပညတ်တော်တို့”

၇။ “ပေးသမျှသောပညတ်တော်တို့ကို စောင့်ရှောက်” ရန်အခြားသူများအား သွန်သင်ပေးရာတွင် အဘယ်ပညတ်များကိုလည်း သင်ပေးရမည်နည်း။

^၇ ကျွန်ုပ်တို့သည် တပည့်သစ်များကို သွန်သင်ပေးခြင်းမှာ တပည့်ဖြစ်လာစေရုံသာ မဟုတ်ချေ။ ယေရှုသည် “ပေးသမျှသောပညတ်တော်တို့ကို စောင့်ရှောက်စေ” ရန်အခြားသူများကို သွန်သင်ပေးဖို့ ကျွန်ုပ်တို့ကို မိန့်မှာထား၏။ ၎င်းတွင် ဘုရားသခင်နှင့် အိမ်နီးချင်းကို ချစ်ပါဟူသော အကြီးမြတ်ဆုံးပညတ်နှစ်ခုပါသည်။ (မဿဲ ၂၂:၃၇-၃၉) အဆိုပါပညတ်များကို စောင့်ရှောက်ရန် တပည့်သစ်များအား မည်သို့သွန်သင်ပေးနိုင်သနည်း။

၈။ မေတ္တာပြပါဟူသော ပညတ်ချက်ကို တပည့်သစ်တစ်ဦးအား မည်သို့ သွန်သင်ပေးနိုင်ကြောင်း ဥပမာပေးပါ။

^၈ ကားမောင်းတော့မည့် သင်တန်းသား၏ ပုံဥပမာကို ပြန်စဉ်းစားကြည့်ပါ။ သင်တန်းသားသည် မိမိ၏ဘေးတွင်ထိုင်နေသော နည်းပြဆရာနှင့်အတူ ကားမောင်းထွက်စဉ် နည်းပြဆရာ၏စကားကို နားထောင်နေရုံမက အခြားယာဉ်မောင်းများကို ကြည့်ဖို့လည်း သင်ယူရသည်။ ဥပမာ၊ အခြားကားတစ်စီးကို မိမိကားရှေ့သို့ စာနာစွာ ကြားဝင်ခွင့်ပြုသော ယာဉ်မောင်း; သို့မဟုတ် မျက်နှာချင်းဆိုင်ယာဉ်ကြောမှ ယာဉ်မောင်းဖြစ်သူ မျက်စိပြာမသွားစေရန် ကားရှေ့မီးကြီးပိတ်ပေးသော ယာဉ်မောင်း; သို့မဟုတ် မျက်နှာသိတစ်ဦး၏ကား ပျက်သွားသောအခါ စေတနာနှင့်ကူညီပေးသော ယာဉ်မောင်းတို့ကို နည်းပြဆရာက ဂရုပြုကြည့်ခိုင်းပေမည်။ သင်တန်းသား ကားမောင်းနေသည့်အခါ သူကျင့်သုံးနိုင်သည့် အရေးပါသင်ခန်းစာများကို ထိုပုံနမူနာများက သင်ပေးသည်။ ထိုနည်းတူ အသက်လမ်းပေါ် ခရီးနှင်နေသော တပည့်သစ်တစ်ဦးသည် သွန်သင်ပေးသူထံမှသာမက အသင်းတော်တွင် မြင်တွေ့ရသည့် ပုံသက်သေကောင်းများမှလည်း သင်ယူနိုင်၏။—မဿဲ ၇:၁၃၊ ၁၄။

၉။ တပည့်သစ်တစ်ဦးသည် ချစ်ရမည်ဟူသော ပညတ်ချက် လိုက်နာခြင်း၏ဆိုလိုချက်ကို မည်သို့သင်ယူသိရှိလာသနည်း။

^၉ သာဓကအနေနှင့် ကျမ်းစာသင်သားတစ်ဦးသည် သားသမီးငယ်များကိုဆွဲ၍ ဘုရားသခင့်နိုင်ငံတော်ခန်းမသို့ ကြိုးစားပမ်းစားရောက်ရှိလာသော ကြင်ဖော်မဲ့မိဘတစ်ဦးကို သတိပြုမိပေမည်။ စိတ်ဓာတ်ကျမှုကို ကြိုးစားတွန်းလှန်လျက် အစည်းအဝေးများသို့ ပုံမှန်ရောက်ရှိလာတတ်သော စိတ်ဓာတ်ကျဆင်းနေသူတစ်ဦး၊ သက်ကြီးရွယ်အိုများအား အသင်းတော်အစည်းအဝေးတိုင်းသို့ ကားဖြင့်ခေါ်လာပေးသော သက်ကြီးမုဆိုးမတစ်ဦး၊ သို့မဟုတ် ဘုရားသခင့်နိုင်ငံတော်ခန်းမသန့်ရှင်းရေးတွင် ကူညီလုပ်အားပေးသော ဆယ်ကျော်သက်တစ်ဦးတို့ကို တွေ့မိပေမည်။ အသင်းတော်တာဝန်များစွာရှိသည့်ကြားမှ လယ်ကွင်းလုပ်ငန်းတော်ကို တည်ကြည်မြဲမြံစွာဦးဆောင်နေသော အသင်းတော်အကြီးအကဲတစ်ဦးကို သတိထားမိပေမည်။ မသန်မစွမ်းဖြစ်ကာ အိမ်တွင်းအောင်းနေရသော်လည်း သူ့ထံ လည်ပတ်ရောက်ရှိလာသူအားလုံးကို ဝိညာဉ်ရေးအရ အားပေးမှုဖြစ်စေသူကိုလည်း တွေ့ဆုံရပေမည်။ သက်ကြီးရွယ်အိုမိဘများကို ပြုစုစောင့်ရှောက်ရန် မိမိတို့၏ဘဝတစ်ခုလုံး ပြုပြင်ပြောင်းလဲရသည့် ဇနီးမောင်နှံတစ်စုံကိုလည်း ထိုသင်သား သတိပြုမိပေမည်။ အကြင်နာတရားနှင့် ကူညီပေးကာ ယုံကြည်စိတ်ချရသော ဤခရစ်ယာန်များကို သတိပြုမိခြင်းအားဖြင့် တပည့်သစ်ဖြစ်သူသည် ဘုရားသခင်နှင့် အိမ်နီးချင်း အထူးသဖြင့် ယုံကြည်သူချင်းများကို ချစ်ရမည်ဟူသော ခရစ်တော်၏မိန့်မှာချက်ကို နာခံခြင်းသည် အဘယ်အဓိပ္ပာယ်ရှိကြောင်း ပုံနမူနာမှ သင်ယူသိရှိလာလေသည်။ (သု. ၂၄:၃၂; ယောဟန် ၁၃:၃၅; ဂလာတိ ၆:၁၀; ၁ တိမောသေ ၅:၄၊ ၈; ၁ ပေတရု ၅:၂၊ ၃) ဤနည်းဖြင့် ခရစ်ယာန်အသင်းသားတိုင်းသည် သွန်သင်သူနှင့် လမ်းညွှန်ပေးသူဖြစ်နိုင်ပြီး ဖြစ်လည်းဖြစ်သင့်သည်။—မဿဲ ၅:၁၆။

‘ဤကပ်ကမ္ဘာကုန်သည်တိုင်အောင်’

၁၀။ (က) တပည့်ဖြစ်စေခြင်းလုပ်ငန်းကို အချိန်မည်မျှတိုင် ဆက်လက်လုပ်ဆောင်ကြမည်နည်း။ (ခ) ယေရှုသည် တာဝန်ထမ်းဆောင်ခြင်းနှင့် ပတ်သက်၍ အဘယ်စံနမူနာ ချမှတ်ပေးခဲ့သနည်း။

^၁၀ တပည့်ဖြစ်စေခြင်းလုပ်ငန်းကို အဘယ်အချိန်ထိတိုင် ဆက်လုပ်ဆောင်သင့်သနည်း။ ဤကပ်ကမ္ဘာကုန်သည့်အထိ လုပ်ဆောင်သင့်၏။ (မဿဲ ၂၈:၂၀) ကျွန်ုပ်တို့သည် ယေရှု၏မိန့်မှာချက် ဤအပိုင်းကို ကျေပွန်အောင် ထမ်းဆောင်နိုင်မည်လော။ ကမ္ဘာချီအသင်းတော်တစ်ခုအနေနှင့် ကျွန်ုပ်တို့သည် တာဝန်ကျေပွန်ရန် သန္နိဋ္ဌာန်ချထားကြသည်။ ယမန်နှစ်များက “ထာဝရအသက်ကို တလိုတလားရှိ” သူများကို ရှာတွေ့ရန် ကျွန်ုပ်တို့၏အချိန်၊ ခွန်အားနှင့် ဥစ္စာအင်ခွင်များကို ဝမ်းမြောက်ဝမ်းသာ ပေးဆက်ခဲ့ကြပြီ။ (တမန်တော် ၁၃:၄၈၊ ကဘ) ယခုအခါ ယေဟောဝါသက်သေများသည် ကမ္ဘာချီ ဘုရားသခင့်နိုင်ငံတော်ဟောပြောခြင်းနှင့် တပည့်ဖြစ်စေခြင်းလုပ်ငန်းတွင် ဤနှစ်အတွင်း တစ်ရက်လျှင် ပျမ်းမျှနာရီပေါင်း သုံးသန်းကျော် အသုံးပြုလျက်ရှိသည်။ ကျွန်ုပ်တို့သည် ယေရှု၏စံနမူနာကို လိုက်လျှောက်သောကြောင့် ထိုသို့အသုံးပြုကြခြင်းဖြစ်၏။ ကိုယ်တော်က “ငါ့ကိုစေလွှတ်တော်မူသောသူ၏ အလိုတော်ကိုဆောင်ခြင်း၊ သူ၏အမှုတော်ကို ပြီးစီးခြင်းအမှုသည် ငါ့စားစရာဖြစ်၏” ဟုမိန့်ဆိုခဲ့သည်။ (ယောဟန် ၄:၃၄) ကျွန်ုပ်တို့၏လှိုက်လှဲသောစိတ်ဆန္ဒသည်လည်း ထိုနည်းလည်းကောင်းပင်။ (ယောဟန် ၂၀:၂၁) ကျွန်ုပ်တို့ကိုအပ်နှင်းထားသော ထိုလုပ်ငန်းကို အစပြုလုပ်ဆောင်ရုံမျှမဟုတ်ဘဲ ပြီးစီးအောင် လုပ်ဆောင်လိုကြပါသည်။—မဿဲ ၂၄:၁၃; ယောဟန် ၁၇:၄။

၁၁။ ကျွန်ုပ်တို့၏ခရစ်ယာန်ညီအစ်ကို၊ ညီအစ်မများသည် အဘယ်သို့ဖြစ်သွားကြသနည်း၊ ကျွန်ုပ်တို့ကိုယ်ကို အဘယ်မေးခွန်းမေးသင့်သနည်း။

^၁၁ သို့သော် ကျွန်ုပ်တို့၏ယုံကြည်သူချင်းအချို့ ဝိညာဉ်ရေးတွင် တဖြည်းဖြည်း အားနည်းလာကာ ခရစ်တော်၏တပည့်ဖြစ်စေခြင်းမိန့်မှာချက်ကို ထမ်းဆောင်ရန် အရှိန်လျော့လာကြ၊ မလုပ်ဆောင်ကြတော့သည်ကို တွေ့ရှိရသည်မှာ ဝမ်းနည်းစရာပင်။ အသင်းတော်နှင့် ပြန်ပူးပေါင်း၍ တပည့်ဖြစ်စေခြင်းလုပ်ငန်းတွင် ပြန်ပါဝင်လာရန် သူတို့ကို ကျွန်ုပ်တို့ကူညီပေးနိုင်သည့် နည်းလမ်းရှိသလော။ (ရောမ ၁၅:၁; ဟေဗြဲ ၁၂:၁၂) တမန်တော်များ ခေတ္တအားနည်းသွားချိန်တွင် သူတို့ကို ယေရှုကူညီပေးခဲ့သကဲ့သို့ ယနေ့ ကျွန်ုပ်တို့လည်း ကူညီပေးနိုင်၏။

စိုးရိမ်မှုပြပါ

၁၂။ (က) ယေရှုမသေမီလေးတွင် တမန်တော်များ အဘယ်အရာပြုလုပ်ခဲ့ကြသနည်း။ (ခ) တမန်တော်များသည် ဝိညာဉ်ရေးတွင် အလွန်အားနည်းကြောင်း တွေ့ရသော်လည်း သူတို့ကို ယေရှု မည်သို့စောင်မခဲ့သနည်း။

^၁၂ ကမ္ဘာမြေကြီးပေါ် ယေရှု၏ခရစ်ယာန်ဓမ္မအမှု ပြီးဆုံးချိန် ကိုယ်တော်အသတ်ခံရတော့မည့်ဆဲဆဲတွင် တမန်တော်များသည် “ကိုယ်တော်ကို စွန့်ပစ်၍ပြေးကြ၏။” ယေရှုကြိုဟောခဲ့သည့်အတိုင်း သူတို့ “အသီးအသီး မိမိတို့နေရာသို့ ပြေးသွား” ကြသည်။ (မာကု ၁၄:၅၁; ယောဟန် ၁၆:၃၂) ယေရှုသည် ဝိညာဉ်ရေးတွင် အားနည်းနေသော မိမိ၏အပေါင်းအဖော်များကို မည်သို့စောင်မခဲ့သနည်း။ ယေရှုထမြောက်ပြီး မကြာမီ ကိုယ်တော်၏နောက်လိုက်အချို့ကို “ကြောက်ရွံ့ခြင်းမရှိကြနှင့်။ သွားကြလော့။ ငါ့ညီတို့သည် ဂါလိလဲပြည်သို့သွားစေခြင်းငှာ ဤသတင်းစကားကို ကြားပြောကြလော့။ ထိုပြည်၌ သူတို့သည် ငါ့ကိုတွေ့မြင်ရကြလိမ့်မည်” ဟုမိန့်မှာသည်။ (မဿဲ ၂၈:၁၀) တမန်တော်များသည် ဝိညာဉ်ရေးတွင် အလွန်အားနည်းခဲ့သော်လည်း ယေရှုသည် သူတို့ကို “ငါ့ညီ” တို့ဟုခေါ်နေဆဲပင်။ (မဿဲ ၁၂:၄၉) သူတို့ကို လက်မလျှော့လိုက်ပါ။ ယေဟောဝါသည် အကြင်နာတရားထားကာ ခွင့်လွှတ်တတ်သကဲ့သို့ ယေရှုသည် ထိုနည်းဖြင့် အကြင်နာထားပြီး ခွင့်လွှတ်ခဲ့၏။ (၄ ဓမ္မရာဇဝင် ၁၃:၂၃) ကျွန်ုပ်တို့သည် ယေရှုကို မည်သို့တုပနိုင်သနည်း။

၁၃။ ဝိညာဉ်ရေးတွင် အားနည်းလာသူများကို ကျွန်ုပ်တို့ မည်သို့ သဘောထားသင့်သနည်း။

^၁၃ ခရစ်ယာန်ဓမ္မအမှုတွင် အရှိန်လျော့လာသူ သို့မဟုတ် ရပ်တန့်သွားသူများကို ကျွန်ုပ်တို့ အလွန်စိုးရိမ်မှုပြသင့်သည်။ အတိတ်က—အချို့မှာ ဆယ်စုနှစ်နှင့်ချီ၍—လုပ်ဆောင်ခဲ့သော အဆိုပါယုံကြည်သူချင်းများ၏ မေတ္တာရှိလုပ်ရပ်များကို ကျွန်ုပ်တို့ အမှတ်ရနေဆဲရှိ၏။ (ဟေဗြဲ ၆:၁၀) သူတို့နှင့်ပေါင်းဖော်ခဲ့ရသည်ကို ကျွန်ုပ်တို့ အမှန်ပင် လွမ်းဆွတ်သတိရကြ၏။ (လုကာ ၁၅:၄-၇; ၁ သက်သာလောနိတ် ၂:၁၇) သို့သော်လည်း သူတို့ကို ကျွန်ုပ်တို့ စိုးရိမ်ပူပန်ကြောင်း မည်သို့ပြနိုင်သနည်း။

၁၄။ ကျွန်ုပ်တို့သည် ယေရှုကိုတုပ၍ အားနည်းသူကို မည်သို့ကူညီပေးနိုင်သနည်း။

^၁၄ စိတ်ဓာတ်ကျဆင်းနေသော တမန်တော်များအား ဂါလိလဲပြည်သို့သွားပါ၊ ထိုတွင် မိမိကို တွေ့ရလိမ့်မည်ဟု ယေရှု မိန့်ဆိုခဲ့သည်။ ယေရှုသည် အထူးစည်းဝေးခြင်းကို တက်ရောက်ရန် သူတို့အား ဖိတ်ခေါ်လိုက်ခြင်းပင်ဖြစ်သည်။ (မဿဲ ၂၈:၁၀) ထိုနည်းတူ ယနေ့ ကျွန်ုပ်တို့သည် ဝိညာဉ်ရေးအားနည်းသူများကို ခရစ်ယာန်အသင်းတော်အစည်းအဝေးများ တက်ရောက်ရန် အားပေးကြသည်၊ ထိုသို့အားပေးမှုသည် တစ်ကြိမ်ထက်မက လိုအပ်ပေမည်။ တမန်တော်များကိစ္စတွင် “တစ်ကျိပ်တစ်ပါးသောတပည့်တော်တို့သည် ဂါလိလဲပြည်သို့သွား၍ ယေရှုမှာထားတော်မူသောတောင်ပေါ်သို့ တက်ကြ” ရာ ဤဖိတ်ခေါ်မှုကြောင့် အကျိုးဖြစ်ထွန်းခဲ့သည်။ (မဿဲ ၂၈:၁၆) ထိုနည်းတူစွာ အားနည်းသူများသည် ကျွန်ုပ်တို့၏လှိုက်လှဲစွာဖိတ်ခေါ်မှုကို လက်ခံပြီး ခရစ်ယာန်အစည်းအဝေးများ ပြန်တက်လာသည့်အခါ ကျွန်ုပ်တို့ တကယ်ကိုအားရရွှင်လန်းကြ၏!—လုကာ ၁၅:၆။

၁၅။ ကျွန်ုပ်တို့၏အစည်းအဝေးသို့ ရောက်ရှိလာကြသော အားနည်းသူများအား ကြိုဆိုရာတွင် ယေရှု၏စံနမူနာကို မည်သို့တုပနိုင်သနည်း။

^၁၅ ဝိညာဉ်ရေးအားနည်းသူတစ်ဦးသည် ဘုရားသခင့်နိုင်ငံတော်ခန်းမသို့ ရောက်ရှိလာချိန်တွင် ကျွန်ုပ်တို့ မည်သို့တုံ့ပြန်ကြမည်နည်း။ ခေတ္တခဏယုံကြည်ခြင်းအားနည်းသွားကြသော တမန်တော်များသည် ချိန်းချက်ထားသော အစည်းအဝေးနေရာသို့ ရောက်ရှိနေသည်ကို ယေရှုမြင်တွေ့သည့်အခါ အဘယ်အရာပြုလုပ်ခဲ့သနည်း။ ‘ယေရှုသည် အနီးအပါးသို့ ချဉ်းတော်မူပြီးလျှင် စကားပြောခဲ့၏။’ (မဿဲ ၂၈:၁၈) ကိုယ်တော်သည် သူတို့ကို ခပ်လှမ်းလှမ်းမှ စိန်းစိန်းမကြည့်ဘဲ သူတို့အနား လျှောက်လာသည်။ ယေရှုသည် အစပြုလုပ်ဆောင်သည့်အခါ တမန်တော်များ တကယ်ကို စိတ်သက်သာရာရခဲ့ကြမည်ကို မြင်ယောင်ကြည့်ပါ! ကျွန်ုပ်တို့လည်း ခရစ်ယာန်အသင်းတော်သို့ ကြိုးစားပြန်လာကြသော ဝိညာဉ်ရေးအားနည်းသူများကို ကိုယ်ကအစပြု၍ လှိုက်လှိုက်လှဲလှဲကြိုဆိုပါလေ။

၁၆။ (က) နောက်လိုက်များအပေါ် ယေရှုဆက်ဆံပုံမှ ကျွန်ုပ်တို့ အဘယ်သင်ခန်းစာရနိုင်သနည်း။ (ခ) အားနည်းသူများအား ယေရှု,ရှုမြင်ပုံကို ကျွန်ုပ်တို့ မည်သို့ရောင်ပြန်ဟပ်နိုင်သနည်း။ (အောက်ခြေမှတ်ချက်ကိုရှု။)

^၁၆ ယေရှုသည် အဘယ်အရာပြုလုပ်ပေးသေးသနည်း။ ဦးဆုံး၊ ကိုယ်တော်က “စီရင်ပိုင်သောအခွင့်တန်ခိုးရှိသမျှတို့ကို ငါခံရပြီ” ဟုကြေညာလိုက်သည်။ ဒုတိယ၊ ‘သွား၍ တပည့်ဖြစ်စေ’ ကြလော့ဟူသော တာဝန်တစ်ခုအပ်နှင်းခဲ့သည်။ တတိယ၊ ‘ငါသည် သင်တို့နှင့်အတူ အစဉ်မပြတ်ရှိသည်’ ဟုကတိပေးသည်။ သို့သော် ယေရှု အဘယ်အရာ မပြုလုပ်ခဲ့သည်ကို သတိပြုမိသလော။ တပည့်တို့၏အားနည်းချက်များနှင့် ယုံမှားသံသယဖြစ်မှုများကို အပြစ်မတင်ခဲ့ချေ။ (မဿဲ ၂၈:၁၇) ကိုယ်တော်၏ချဉ်းကပ်ပုံသည် အကျိုးရှိခဲ့သလော။ ရှိခဲ့ပါသည်။ များမကြာမီ တမန်တော်တို့သည် တစ်ဖန်ပြန်၍ “သွန်သင်လျက်၊ . . . ဧဝံဂေလိတရားကို . . . ဟောပြောလျက်နေကြ၏။” (တမန်တော် ၅:၄၂) အားနည်းသူများအား ရှုမြင်ဆက်ဆံပုံနှင့်ပတ်သက်သည့် ယေရှု၏စံနမူနာအတိုင်း လုပ်ဆောင်ခြင်းအားဖြင့် ကျွန်ုပ်တို့၏ဒေသခံအသင်းတော်တွင် ထပ်တူကြည်နူးအားရဖွယ်ရလဒ်များကို မြင်တွေ့နိုင်ပါစေ။b—တမန်တော် ၂၀:၃၅။

‘ငါသည် သင်တို့နှင့်အတူ အစဉ်မပြတ်ရှိသည်’

၁၇၊ ၁၈။ ‘ငါသည် သင်တို့နှင့်အတူ အစဉ်မပြတ်ရှိသည်’ ဟူသော ယေရှု၏စကားများတွင် အဘယ်ခွန်အားရှိစေသောအချက်များ ပါသနည်း။

^၁၇ ‘ငါသည်လည်း သင်တို့နှင့်အတူ အစဉ်မပြတ်ရှိသည်’ ဟူသော ယေရှုမိန့်မှာချက်၏ နောက်ဆုံးစကားသည် တပည့်ဖြစ်စေပါဟူသော ခရစ်တော်၏မိန့်မှာချက်ကို ပြီးမြောက်အောင် ကြိုးစားထမ်းဆောင်သူ အားလုံးအတွက် ခွန်အားရှိစေ၏။ ရန်သူများက ဘုရားသခင့်နိုင်ငံတော်ဟောပြောခြင်းလုပ်ငန်းကို မည်သို့ပင်အတိုက်အခံပြုပါစေ၊ ကျွန်ုပ်တို့အကြောင်း မည်သို့ပင်ရှုတ်ချပြောဆိုပါစေ ကြောက်စရာအကြောင်းမရှိချေ။ အဘယ်ကြောင့်နည်း။ ‘ကောင်းကင်၊ မြေကြီးပေါ် စီရင်ပိုင်သောအခွင့်တန်ခိုးရှိသမျှတို့ကို’ ရရှိထားသော ကျွန်ုပ်တို့၏ခေါင်းဆောင် ယေရှုသည် ကျွန်ုပ်တို့ကိုထောက်မရန် ကျွန်ုပ်တို့နှင့်အတူရှိနေတော်မူ၏!

^၁၈ ‘ငါသည် သင်တို့နှင့်အတူ အစဉ်မပြတ်ရှိသည်’ ဟူသော ယေရှု၏ကတိတော်သည်လည်း အလွန်နှစ်သိမ့်မှုဖြစ်စေသည့် အကြောင်းရင်းဖြစ်၏။ တပည့်ဖြစ်စေပါဟူသော ခရစ်တော်၏မိန့်မှာချက်ကို ကျွန်ုပ်တို့ ကြိုးစားလုပ်ဆောင်စဉ် ရွှင်လန်းမှုသာမက ဝမ်းနည်းမှုပါ တွေ့ကြုံရသည်။ (၂ ရာဇဝင်ချုပ် ၆:၂၉) ကျွန်ုပ်တို့မှအချို့သည် အလွန်ချစ်မြတ်နိုးရသူတစ်ဦး ကွယ်လွန်သွား၍ ဝမ်းနည်းကြေကွဲလျက်ရှိကြ၏။ (ကမ္ဘာဦး ၂၃:၂; ယောဟန် ၁၁:၃၃-၃၆) အခြားသူများသည် ကျန်းမာရေးယိုယွင်းပြီး အားအင်ဆုတ်ယုတ်လာသော ဇရာအိုအချိန်ပိုင်းကို တိုက်လှန်နေရ၏။ (ဒေ. ၁၂:၁-၆) အခြားသူများမူ စိတ်ဓာတ်ကျခြင်းဒဏ် ခံစားနေရသည်။ (၁ သက်သာလောနိတ် ၅:၁၄) ထို့ပြင် စီးပွားရေးအခက်အခဲများနှင့် အပြင်းအထန်ရုန်းကန်နေရသူ များသည်ထက်များလာနေ၏။ မည်သို့ပင်ကြုံနေရပါစေ၊ ဤသို့သောအခက်အခဲများကြားမှ ခရစ်တော်သည် မိုးမှောင်ကျနေသည့် ကျွန်ုပ်တို့၏ဘဝနေ့ရက်များအပါအဝင် “အစဉ်မပြတ် ” ကျွန်ုပ်တို့နှင့်အတူရှိသောကြောင့် ကျွန်ုပ်တို့၏ခရစ်ယာန်ဓမ္မအမှု အောင်မြင်ရခြင်းဖြစ်သည်။—မဿဲ ၁၁:၂၈-၃၀။

၁၉။ (က) တပည့်ဖြစ်စေပါဟူသော ခရစ်တော်၏မိန့်မှာချက်တွင် အဘယ်ညွှန်ကြားချက်များ ပါသနည်း။ (ခ) အဘယ်အရာက ကျွန်ုပ်တို့အား ခရစ်တော်၏မိန့်မှာချက်ကို ပြီးမြောက်အောင် ထမ်းဆောင်စေနိုင်သနည်း။

^၁၉ ဤဆောင်းပါးနှင့် ရှေ့ဆောင်းပါးတို့တွင် တွေ့ခဲ့ရသည့်အတိုင်း တပည့်ဖြစ်စေပါဟူသော ယေရှု၏မိန့်မှာချက်သည် ကဏ္ဍပေါင်းစုံနှင့် ပါဝင်ပတ်သက်နေ၏။ ယေရှုသည် မိမိ၏မိန့်မှာချက်ကို အဘယ်ကြောင့်နှင့် အဘယ်နေရာတွင် လုပ်ဆောင်သင့်ကြောင်း မိန့်မှာခဲ့သည်။ အဘယ်အရာကို သွန်သင်ပေးသင့်ပြီး အဘယ်အချိန်ထိတိုင် ထိုသို့သင်ပေးသင့်ကြောင်းလည်း မိန့်မှာခဲ့ပြီ။ အဆိုပါတာဝန်ကြီးကို ပြီးမြောက်အောင် ထမ်းဆောင်ခြင်းသည် အမှန်ပင် စိန်ခေါ်ချက်တစ်ရပ်ဖြစ်၏။ သို့သော် ကျွန်ုပ်တို့ကို ထောက်မနေသော ခရစ်တော်၏အခွင့်အာဏာနှင့် ကျွန်ုပ်တို့နှင့်အတူ ကိုယ်တော်ရှိနေခြင်းကြောင့် ဤတာဝန်ကို ကျွန်ုပ်တို့ ပြီးမြောက်အောင် ထမ်းဆောင်နိုင်ပါသည်! အသင် သဘောတူသည်မဟုတ်လော။

[အောက်ခြေမှတ်ချက်]

သင်မည်သို့ဖြေဆိုမည်နည်း

• ကျွန်ုပ်တို့သည် ယေရှုမိန့်မှာချက်ကို စောင့်ရှောက်ရန် အခြားသူများကို မည်သို့သင်ပေးသနည်း။

• တပည့်သစ်တစ်ဦးသည် အသင်းတော်ရှိ အခြားသူများထံမှ အဘယ် သင်ခန်းစာများ သင်ယူနိုင်သနည်း။

• ကျွန်ုပ်တို့သည် ဝိညာဉ်ရေးတွင် အားနည်းလာသူများကို ကူညီရန် အဘယ်အရာ ပြုလုပ်ပေးနိုင်သနည်း။

• ‘ငါသည် သင်တို့နှင့်အတူ အစဉ်မပြတ်ရှိသည်’ ဟူသော ယေရှု၏ ကတိတော်မှ အဘယ်ခွန်အားနှင့် နှစ်သိမ့်မှု ရရှိသနည်း။

[စာမျက်နှာ ၁၅ ပါ ရုပ်ပုံ]

ကျွန်ုပ်တို့သည် သွန်သင်သူများရော ညွှန်ကြားပေးသူများပါ ဖြစ်ဖို့လို

[စာမျက်နှာ ၁၇ ပါ ရုပ်ပုံ]

တပည့်သစ်တစ်ဦးသည် အခြားသူများ၏ ပုံနမူနာမှ အရေးကြီးသင်ခန်းစာများကို သင်ယူကြ