ယေဟောဝါ၏အဖွဲ့အစည်းနှင့်အတူ သစ္စာစောင့်သိစွာအမှုဆောင်ခြင်း

“သစ္စာစောင့်သိသူနှင့် ကိုယ်တော်သည် သစ္စာစောင့်သိစွာစီရင်မည်။”—၂ ဓမ္မရာဇဝင် ၂၂:၂၆၊ ကဘ။

၁၊ ၂။ အသင်းတော်တွင် ကျွန်ုပ်တို့အားလုံး တွေ့မြင်နိုင်သော သစ္စာစောင့်သိခြင်း ပုံသက်သေအချို့ကား အဘယ်နည်း။

အကြီးအကဲတစ်ဦးသည် ခရစ်ယာန်အစည်းအဝေးတစ်ခုအတွက် ဟောပြောချက်ကို ညဦးယံတစ်ညတွင် ပြင်ဆင်နေသည်။ သူ့ခမျာ ခေတ္တအနားယူ အပန်းဖြေချင်ပေမည်; ယင်းအစား သိုးတော်စု၏နှလုံးကိုထိမိ၍ အားပေးမှုဖြစ်စေမည့် ကျမ်းစာပုံသက်သေများနှင့် ပုံဥပမာများကို ကြိုးစားရှာဖွေလေ့လာနေ၏။ အစည်းအဝေးကျင်းပသည့် ညအချိန်တွင် ထိုအသင်းတော်ရှိ အလွန်မောပန်းနေသော မိဘနှစ်ပါးသည် ညနေချမ်းချိန်၌ အိမ်တွင် သက်သောင့်သက်သာနေချင်ကြ၏; ယင်းအစား စိတ်ရှည်စွာဖြင့် သားသမီးများကို အသင့်ပြင်ဆင်ပေးပြီး အစည်းအဝေးတက်ကြသည်။ အစည်းအဝေးပြီးနောက် ခရစ်ယာန်တစ်စုသည် ထိုအကြီးအကဲ၏ဟောပြောချက်ကို ဆွေးနွေးနှီးနှောနေကြ၏။ ညီအစ်မတစ်ဦးက ထိုညီအစ်ကိုသည် မိမိအားစိတ်ထိခိုက်စေခဲ့ဖူးကြောင်း ထုတ်ဖော်ပြောဆိုချင်၏; ယင်းအစား သူတင်ပြခဲ့သောအချက်တစ်ချက်ကို အားတက်သရော ပြောဆိုသည်။ ၎င်းဖြစ်စဉ်တွင် တူညီသည့်အရာတစ်ခုကို သတိပြုမိပါသလော။

^၂ ၎င်းမှာ သစ္စာစောင့်သိခြင်းဖြစ်သည်။ အကြီးအကဲသည် ဘုရားသခင့်သိုးတော်စု၏အကျိုးကိုဆောင်ရန် သစ္စာစောင့်သိစွာ အမှုထမ်းသည်; မိဘများသည် အသင်းတော်အစည်းအဝေးများကို သစ္စာစောင့်သိစွာတက်ရောက်ကြသည်; ညီအစ်မဖြစ်သူသည် အကြီးအကဲများကို သစ္စာစောင့်သိစွာ ထောက်မပံ့ပိုးပေးသည်။ (ဟေဗြဲ ၁၀:​၂၄၊ ၂၅; ၁၃:၁၇; ၁ ပေတရု ၅:၂) မှန်ပါ၏၊ ဘဝကဏ္ဍအသီးသီးတွင် ယေဟောဝါ၏အဖွဲ့အစည်းနှင့်ယှဉ်တွဲ၍ သစ္စာစောင့်သိစွာအမှုဆောင်ရွက်ရန် ဘုရားသခင့်လူမျိုးအနေနှင့် ဆုံးဖြတ်ချက်ချထားသည်ကို တွေ့ရှိရပါသည်။

၃။ ယေဟောဝါ၏မြေကြီးအဖွဲ့အစည်းအပေါ် အမြဲသစ္စာစောင့်သိရန် အဘယ်ကြောင့်အလွန်အရေးကြီးသနည်း။

^၃ ယိုယွင်းနေသော ဤလောကကြီးကို ယေဟောဝါငုံ့ကြည့်တော်မူသည့်အခါ သစ္စာစောင့်သိမှု အနည်းငယ်မျှသာရှိသည်ကို တွေ့မြင်တော်မူသည်။ (မိက္ခာ ၇:၂) ကိုယ်တော့်လူမျိုး၏ သစ္စာစောင့်သိမှုကို ကိုယ်တော်တွေ့မြင်သည့်အခါ မည်မျှအားရရွှင်လန်းပါမည်တကား! မှန်ပါသည်၊ သင်၏သစ္စာစောင့်သိမှုသည် ကိုယ်တော်အတွက် နှစ်သက်စရာဖြစ်သည်။ ရှေးဦးစွာမှစ၍ပုန်ကန်သူ စာတန်အတွက်မူကား အမျက်ထွက်စရာဖြစ်ပြီး သူသည် မုသာကောင်ဖြစ်ကြောင်း ယင်းကသက်သေထူပါသည်။ (သု. ၂၇:၁၁; ယောဟန် ၈:၄၄) စာတန်သည် ယေဟောဝါနှင့် ကိုယ်တော်၏မြေကြီးအဖွဲ့အစည်းအပေါ် သင်၏သစ္စာစောင့်သိမှုကို တစ်စတစ်စနှင့်ပျက်ပြားသွားစေမည်ကို မျှော်လင့်ထားပါလေ။ ယင်းကို စာတန်ပြုသည့်နည်းအချို့အကြောင်း သုံးသပ်ကြည့်ကြစို့။ သို့ဖြင့် အဆုံးတိုင် မည်သို့သစ္စာစောင့်သိနိုင်မည်ကို ကောင်းစွာသိရှိထားနိုင်ကြမည်ဖြစ်သည်။​—၂ ကောရိန္သု ၂:၁၁။

မစုံလင်မှုများကို အာရုံစိုက်နေခြင်းက သစ္စာစောင့်သိမှုကို တိုက်စားနိုင်

၄။ (က) အခွင့်အာဏာရထားသူများကို အပြစ်မြင်ရန် အဘယ်ကြောင့်လွယ်ကူသနည်း။ (ခ) ကောရသည် ယေဟောဝါ၏အဖွဲ့အစည်းအပေါ် သစ္စာကင်းမဲ့ကြောင်း မည်သို့တင်ပြသနည်း။

^၄ ညီအစ်ကိုတစ်ဦးသည် တာဝန်ရှိသောရာထူးအဆင့်၌ရှိသည့်အခါ သူ၏အားနည်းချက်များသည် ပိုထင်ရှားပေမည်။ ‘ကျွန်ုပ်တို့၏မျက်စိ၌ရှိသော တံကျင်ကို ဥပေက္ခာပြုပြီး ညီအစ်ကိုမျက်စိ၌ရှိသော ငြောင့်ငယ်ကို’ မြင်ဖို့ရန် အလွန်လွယ်ကူလှလေခြင်း! (မဿဲ ၇:​၁-၅) သို့သော် အားနည်းချက်များကိုသာ အာရုံစူးစိုက်နေမည်ဆိုလျှင် သစ္စာမဲ့ခြင်းကို ဖြစ်ပွားစေသည်။ ဥပမာ၊ ကောရနှင့် ဒါဝိဒ်တို့သည် မည်မျှကွဲပြားခြားနားသည်ကို သုံးသပ်ကြည့်ပါ။ ကောရသည် တာဝန်များစွာ ထမ်းဆောင်ခဲ့ရသူတစ်ဦးဖြစ်ပြီး နှစ်ချီ၍ သစ္စာစောင့်သိခဲ့သော်လည်း နောက်ပိုင်းတွင် ရည်မှန်းချက်ကြီးလာလေသည်။ သူ၏ဝမ်းကွဲများဖြစ်သူ မောရှေနှင့်အာရုန်တို့၏ အခွင့်အာဏာကို သူငြူစူလေသည်။ မောရှေသည် လူအပေါင်းတို့ထက် သာ၍နူးညံ့သိမ်မွေ့သော သဘောရှိသူဖြစ်သော်လည်း ကောရသည် သူ့ကိုအပြစ်မြင်ကြောင်း ထင်ရှားသည်။ မောရှေ၏အားနည်းချက်များကို သူတွေ့ဟန်တူသည်။ သို့ရာတွင် ထိုအားနည်းချက်များသည် ယေဟောဝါ၏အဖွဲ့အစည်းအပေါ် ကောရသစ္စာပျက်ဖို့ရန် အကြောင်းပြချက်များမဟုတ်ပါ။ သူသည် ပရိသတ်အလယ်မှ ဖျက်ဆီးခြင်းခံခဲ့ရလေသည်။​—တောလည်ရာ ၁၂:၃; ၁၆:​၁၁၊ ၃၁-၃၃။

၅။ ဒါဝိဒ်သည် ရှောလုကိုပုန်ကန်ရန် အဘယ်ကြောင့်သွေးဆောင်ခံရကောင်း ခံခဲ့ရမည်နည်း။

^၅ တစ်ဖက်မှကြည့်ပြန်လျှင် ဒါဝိဒ်သည် ရှောလုမင်းကြီးလက်အောက်တွင် အမှုထမ်းခဲ့သည်။ တစ်ချိန်က မင်းကောင်းတစ်ပါးဖြစ်ခဲ့သော ရှောလုသည် တကယ်ပင် မင်းဆိုးကြီးဖြစ်လာသည်။ ငြူစူသောရှောလု၏ရန်များကို ရှောင်တိမ်းရန် ဒါဝိဒ်တွင် ယုံကြည်ခြင်း၊ ခံနိုင်ရည်နှင့် ကြံဆတီထွင်မှုအနည်းအကျဉ်းရှိဖို့ပင် လိုအပ်နေသည်။ သို့တိုင် လက်တုံ့ပြန်ဖို့ ဒါဝိဒ်အခွင့်အရေးရသောအခါ သူက ယေဟောဝါဘိသိက်ပေးထားသောမင်းကို သစ္စာမဲ့စွာ ပြုမူဆက်ဆံခြင်းသည် ‘ယေဟောဝါ၏ရှုထောင့်မှ မစဉ်းစားနိုင်’ စရာဖြစ်သည်ဟု ပြောဆိုပါသည်။​—၁ ဓမ္မရာဇဝင် ၂၆:၁၁။

၆။ အကြီးအကဲများတွင် အားနည်းချက်များ၊ အပြစ်များ တွေ့မြင်ခဲ့သည့်တိုင် ဘယ်သောအခါမျှ အဘယ်အရာကို မပြုသင့်သနည်း။

^၆ ကျွန်ုပ်တို့တွင် ဦးစီးနေသူအချို့သည် ဆုံးဖြတ်ချက်ချ မှားပုံပေါက်မည်ဖြစ်စေ၊ ခက်ထန်စွာ စကားပြောဆိုမိမည်ဖြစ်စေ၊ မျက်နှာလိုက်ပုံပေါက်နေမည်ဖြစ်စေ သူတို့ကို မကျေမနပ်ဖြစ်ကာ ညည်းညူကြခြင်းဖြင့် အသင်းတော်တွင် အပြစ်မြင်စိတ်ဓာတ်ကို တိုးပွားစေမည်လော။ မကျေနပ်ကြောင်းကို တင်ပြသည့်အနေနှင့် ခရစ်ယာန်စည်းဝေးများမတက်ဘဲနေမည်လော။ အမှန်ပြုမည်မဟုတ်ပေ! ဒါဝိဒ်နည်းတူ ကျွန်ုပ်တို့သည် သူတစ်ပါး၏အားနည်းချက်များကြောင့် ယေဟောဝါနှင့် ကိုယ်တော်၏အဖွဲ့အစည်းအပေါ် ဘယ်သောအခါမျှ သစ္စာဖျက်ကြလိမ့်မည်မဟုတ်ပါ။​—ဆာလံ ၁၁၉:၁၆၅။

၇။ ယေရုရှလင်ဗိမာန်တော်တွင် အဘယ်ယိုယွင်းသော အလွဲသုံးစားပြုမှုများ ဖြစ်ပေါ်လာခဲ့ပြီး ယင်းကို ယေရှုမည်သို့သဘောထားတော်မူသနည်း။

^၇ လူတို့တွင် သစ္စာစောင့်သိခြင်း အကောင်းဆုံးပုံသက်သေကား ယေဟောဝါ၏ “သစ္စာစောင့်သိသောသူ” ဟုပရောဖက်ပြုဖော်ပြခံရသည့် ယေရှုခရစ်ဖြစ်တော်မူသည်။ (ဆာလံ ၁၆:​၁၀၊ ကဘ) ယေရုရှလင်ဗိမာန်တော်ကို အလွဲသုံးစားပြုခဲ့ခြင်းက သစ္စာစောင့်သိရန် အခက်အခဲရှိစေခဲ့မည်။ ယဇ်ပုရောဟိတ်၏လုပ်ငန်းနှင့် ယဇ်ပူဇော်သကာများသည် ကိုယ်တော်၏ဓမ္မအမှုနှင့် ယဇ်ပူဇော်သကာသေခြင်းကို ပုံဆောင်ကြောင်း ယေရှုသိတော်မူပြီး လူတို့သည် ၎င်းတို့မှသင်ယူရန် မည်မျှအရေးကြီးကြောင်း ကိုယ်တော်သိထားတော်မူသည်။ ထို့ကြောင့်ဗိမာန်တော်သည် “ဓားပြတွင်း” ဖြစ်နေသည်ကို ကိုယ်တော်တွေ့မြင်သောအခါ လျော်ကန်စွာအမျက်ဒေါသ ထွက်တော်မူခဲ့သည်။ ကိုယ်တော်သည် ဘုရားသခင်ပေးအခွင့်အာဏာဖြင့် ၎င်းကိုစင်ကြယ်စေရန် နှစ်ကြိမ်အရေးယူဆောင်ရွက်တော်မူ၏။a​—မဿဲ ၂၁:​၁၂၊ ၁၃; ယောဟန် ၂:​၁၅-၁၇။

၈။ (က) ယေရှုသည် ဗိမာန်တော်အစီအစဉ်ကို သစ္စာစောင့်သိကြောင်း မည်သို့တင်ပြတော်မူသနည်း။ (ခ) ယေဟောဝါ၏သန့်ရှင်းသောအဖွဲ့အစည်းတွင် ကိုယ်တော်အား ဝတ်ပြုခွင့်ရခြင်းကို တန်ဖိုးထားလေးမြတ်ကြောင်း မည်သို့တင်ပြနိုင်မည်နည်း။

^၈ သို့တိုင် ယေရှုသည် ဗိမာန်တော်အစီအစဉ်ကို သစ္စာစောင့်သိစွာ ထောက်မခဲ့သည်။ ကိုယ်တော်သည် ငယ်ရွယ်စဉ်ကတည်းက ဗိမာန်တော်တွင်ကျင်းပသည့်ပွဲများကိုတက်ခဲ့ပြီး၊ ထိုတွင်မကြာခဏ ဟောပြောတော်မူခဲ့သည်။ ဗိမာန်တော်အခွန်ကို ပေးဆက်ရန်ဝတ္တရားမရှိသော်လည်း ကိုယ်တော်ပေးဆက်တော်မူခဲ့သည်။ (မဿဲ ၁၇:​၂၄-၂၇) ဗိမာန်တော်ဘဏ္ဍာတိုက်ထဲ “မိမိအသက်မွေးစရာ ဥစ္စာရှိသမျှကို” သွင်းချသော ဆင်းရဲသည့်မုဆိုးမကို ယေရှုချီးမွမ်းတော်မူခဲ့သည်။ ထိုနောက်မကြာမီတွင် ၎င်းဗိမာန်တော်ကို ယေဟောဝါလုံးဝပယ်တော်မူ၏။ သို့သော် ထိုအချိန်မရောက်မချင်း ယင်းအပေါ် ယေရှုသစ္စာစောင့်သိတော်မူခဲ့သည်။ (မာကု ၁၂:​၄၁-၄၄; မဿဲ ၂၃:၃၈) ယနေ့ ဘုရားသခင်၏ မြေကြီးဆိုင်ရာအဖွဲ့အစည်းသည် ဗိမာန်တော်ပါဝင်သည့် ဂျူးစနစ်ထက် သာလွန်ကောင်းမွန်ပါသည်။ ယင်းသည် ခြောက်ပြစ်ကင်းသဲလဲစင်မဟုတ်သည်ကားအမှန်; ယင်းကြောင့်လည်း ရံဖန်ရံခါ ပြုပြင်ပြောင်းလဲမှုများ ပြုလုပ်နေရပါသည်။ သို့သော်လည်း ယင်းသည် ယိုယွင်းပျက်စီးမနေပါ။ ၎င်းကို အစားထိုးရန်လည်း ယေဟောဝါဘုရားသခင် ရည်ရွယ်တော်မမူပါ။ ထို့ကြောင့် အဖွဲ့အစည်းတွင် အပြစ်အနာအဆာ တွေ့ရှိသောကြောင့် ၎င်းအပေါ် စိတ်နာခြင်း၊ သို့မဟုတ် အပြစ်မြင်၊ အပျက်သဘောထားခြင်းတို့ ဘယ်သောအခါမျှ မရှိသင့်ပါ။ ယင်းအစား ယေရှုခရစ်၏သစ္စာစောင့်သိခြင်းသဘောကို တုပကြစို့လေ။​—၁ ပေတရု ၂:၂၁။

ကျွန်ုပ်တို့၏ မစုံလင်မှုများ

၉၊ ၁၀။ (က) ကျွန်ုပ်တို့သစ္စာဖျက်ကြရန် စာတန်၏အစီအစဉ်စနစ်သည် ကျွန်ုပ်တို့၏မစုံလင်မှုများကို မတရားအသုံးပြုပြီး မည်သို့သွေးဆောင်သနည်း။ (ခ) ကြီးလေးသောအပြစ်ကို ပြုလုပ်ခဲ့သူတစ်ဦးသည် အဘယ်အမှုကို ပြုလုပ်သင့်သနည်း။

^၉ စာတန်သည် ကျွန်ုပ်တို့၏မစုံလင်မှုများကို မတရားအသုံးပြုခြင်းဖြင့်လည်း သစ္စာပျက်မှုတိုးပွားလာစေရန် ကြိုးစားပါသည်။ သူ၏အစီအစဉ်စနစ်သည် ကျွန်ုပ်တို့၏အားနည်းချက်များကို အခွင့်အရေးယူကာ ယေဟောဝါ၏အမြင်တွင် မှားယွင်းသောအရာများကိုပြုရန် ဖြားယောင်းသွေးဆောင်ပါသည်။ ဝမ်းနည်းစရာမှာ နှစ်စဉ်ပင် ထောင်ပေါင်းများစွာသောသူတို့သည် စာရိတ္တယိုယွင်းမှုအတွင်း သက်ဆင်းခဲ့ကြပြီ။ အချို့တို့သည် သစ္စာရှိသောခရစ်ယာန်များ၏ပုံစံကိုဖမ်းပြီး မှားယွင်းသောလမ်းစဉ်ကိုလျှောက်သည့် နှစ်ဘဝစံပုံစံဖြင့် သူတို့၏သစ္စာဖျက်မှုကို တိုးပွားစေကြပါသည်။ ဤအကြောင်းနှင့်ပတ်သက်ပြီး နိုးလော့!မဂ္ဂဇင်းတွင် ဆက်တိုက်ပါသော “လူငယ်များအမေး . . . ” ဆောင်းပါးများနှင့်စပ်လျဉ်း၍ အမျိုးသမီးငယ်တစ်ဦးက “ထိုဆောင်းပါးများသည် ကျွန်မ၏ဘဝအတ္ထုပ္ပတ္တိဖြစ်သည်” ဟုရေးသားခဲ့၏။ သူမသည် ယေဟောဝါကို လုံးဝမချစ်သူများနှင့် တိတ်တဆိတ်မိတ်ဆွေဖွဲ့ပေါင်းသင်းနေပါသည်။ ရလဒ်ကား အဘယ်နည်း။ သူမက “ကျွန်မ ဘဝပျက်ပြီး စာရိတ္တယိုယွင်းမှုအတွက် ဆုံးမခံခဲ့ရပါသည်။ ယေဟောဝါနှင့်ဆက်ဆံရေး ပျက်ပြားသည့်အပြင် ကျွန်မမိဘများနှင့် အကြီးအကဲများ၏ယုံကြည်စိတ်ချမှုကိုလည်း ဆုံးရှုံးခဲ့ရသည်” ဟုရေး၍တင်ပြသည်။b

^၁၀ ဤအမျိုးသမီးငယ်သည် အကြီးအကဲများထံမှ အကူအညီရရှိပြီး ယေဟောဝါအား သစ္စာစောင့်သိစွာ ပြန်အမှုတော်ထမ်းဆောင်ခဲ့ပါသည်။ သို့သော် မြောက်မြားစွာတို့မှာမူ ဒုက္ခအကြီးအကျယ်ရောက်ကြရသည်၊ အချို့ဆိုလျှင် သိုးခြံတွင်းသို့ လုံးဝပြန်မလာတော့ချေ။ ဤဆိုးသွမ်းသောလောကကြီး၏ သွေးဆောင်မှုကိုငြင်းပယ်ပြီး သစ္စာစောင့်သိခြင်းကား မည်မျှသာလွန်ကောင်းမွန်လှလေခြင်း! လောကအပေါင်းအသင်းနှင့် ညစ်ညမ်းသောအပန်းဖြေမှုတို့နှင့်ပတ်သက်သော အကြောင်းအရာများကိုဖော်ပြသည့် ကင်းမျှော်စင် နှင့် နိုးလော့!မဂ္ဂဇင်းတို့မှ သတိပေးချက်များကိုဂရုပြုပါ။ သစ္စာကင်းမဲ့သောလမ်းစဉ်သို့ ဘယ်သောအခါမျှ မရောက်ပါလေစေနှင့်။ သို့သော် ရောက်သွားမိမည်ဆိုလျှင် မိမိမရောက်သကဲ့သို့ ဟန်မဆောင်ပါနှင့်။ (ဆာလံ ၂၆:၄) ထိုသို့ပြုမည့်အစား အကူအညီတောင်းခံပါ။ ခရစ်ယာန်မိဘများနှင့် အကြီးအကဲများသည် အကူအညီပေးရန် အသင့်ရှိကြပါသည်။​—ယာကုပ် ၅:၁၄။

၁၁။ အဖတ်ဆယ်မရသည့်တိုင် ဆိုးသွမ်းသည်ဟု မိမိကိုယ်ကိုယူမှတ်ခြင်းသည် အဘယ်ကြောင့်မှားမည်နည်း။ ကျွန်ုပ်တို့၏သဘောထားကို ပြုပြင်ပေးရန် ကျမ်းစာပါ အဘယ်အဖြစ်အပျက်က အထောက်အကူပြုမည်နည်း။

^၁၁ ကျွန်ုပ်တို့၏မစုံလင်မှုများသည် အခြားနည်းတစ်နည်းဖြင့် အန္တရာယ်ပြုနိုင်သေးသည်။ သစ္စာမရှိသောအပြုအမူတစ်ခုကို ပြုမိပြီးသူအချို့သည် ယေဟောဝါအလိုတော်နှင့်တွေ့ရန် မကြိုးစားတော့ဘဲနေကြသည်။ ဒါဝိဒ်သည် အလွန်ကြီးလေးသောအပြစ်များကို ပြုခဲ့ကြောင်း သတိရပါ။ သို့တိုင် ဒါဝိဒ်ကွယ်လွန်ပြီး နှစ်အတန်ကြာကာလတွင်ပင် သူ့ကို သစ္စာရှိကျေးကျွန်တစ်ဦးအဖြစ် ယေဟောဝါ မှတ်မိဆဲရှိတော်မူသည်။ (ဟေဗြဲ ၁၁:၃၂; ၁၂:၁) အဘယ်ကြောင့်နည်း။ အကြောင်းမူကား သူသည် ယေဟောဝါ၏စိတ်တော်နှင့်တွေ့ရန် အမြဲကြိုးစားအားထုတ်ခဲ့သောကြောင့်ဖြစ်သည်။ “ဖြောင့်မတ်သောသူသည် ခုနစ်ကြိမ်လဲသော်လည်း ထပြန်လိမ့်မည်” ဟုနယပုံပြင် ၂၄:၁၆ ကဆိုသည်။ ကျွန်ုပ်တို့ကြိုးစားတိုက်လှန်နေသည့် အားနည်းချက်တစ်ခုခုကြောင့် အသေးအဖွဲအပြစ်များကို ကြိမ်ဖန်များစွာပြုမိသည့်တိုင် ကျွန်ုပ်တို့ဆက်၍ ‘ပြန်ထ’ လျှင် ယေဟောဝါ၏ရှေ့မှောက်တော်တွင် ကျွန်ုပ်တို့သည်ဖြောင့်မတ်နေဆဲဖြစ်နိုင်သည်။ ထိုသို့ဖြစ်ရန် ကျွန်ုပ်တို့သည် စိတ်ရင်းမှန်ဖြင့် နောင်တယူပြီး သစ္စာစောင့်လမ်းစဉ်ပေါ် ဆက်လျှောက်ရမည်။’​—၂ ကောရိန္သု ၂:၇ နှိုင်းယှဉ်။

မသိမသာသစ္စာကင်းမဲ့သောပုံစံများကို သတိပြု!

၁၂။ ဖာရိရှဲများသည် စည်းမျဉ်းတင်းကျပ်ပြီး ဥပဒေများကို လှေနံဓားထစ်ပြုမူခြင်းကြောင့် သစ္စာမဲ့သူများ မည်သို့ဖြစ်သွားကြသနည်း။

^၁၂ သစ္စာကင်းမဲ့မှုသည် မသိမသာနည်း အမျိုးမျိုးဖြင့်လည်း ပေါ်လာနိုင်ပါသည်။ သစ္စာစောင့်သိခြင်းအသွင်ကိုပင် ဆောင်ပေအံ့! ဥပမာ၊ ယေရှုခေတ်က ဖာရိရှဲများသည် သူတို့ကိုယ်ကို အထူးသစ္စာစောင့်သူများဟူ၍ ယူမှတ်ခဲ့ကြပေမည်။c သစ္စာစောင့်သိခြင်းနှင့် လူလုပ်ဥပဒေများကို လှေနံဓားထစ်လိုက်နာခြင်းတို့စပ်ကြား ကွာခြားမှုရှိကြောင်းကို သူတို့မမြင်နိုင်ကြပါ။ အကြောင်းမူကား သူတို့သည် စည်းမျဉ်းတင်းကျပ်ပြီး အပြစ်စီရင်လိုကြသောကြောင့်ဖြစ်သည်။ (ဒေသနာ ၇:​၁၆ နှိုင်းယှဉ်။) ဤနည်းဖြင့် သူတို့အကျိုးဆောင်ရွက်ပေးသင့်သော လူများကိုလည်းကောင်း၊ သူတို့သွန်သင်ပေးနေပါသည်ဟုဆိုကြသော ပညတ်တရား၏ မူရင်းအဓိပ္ပာယ်ကိုလည်းကောင်း၊ ယေဟောဝါကိုယ်တော်တိုင်အားလည်းကောင်း အမှန်ပင်သစ္စာပျက်ကြသည်။ ယေရှုမူကား ချစ်ခြင်းမေတ္တာပေါ်အခြေခံသည့် ပညတ်တရား၏ ဆိုလိုရင်းသဘောကို သစ္စာစောင့်သိကြောင်း တင်ပြတော်မူခဲ့၏။ ဤနည်းဖြင့် မေရှိယနှင့်ဆိုင်သော ပရောဖက်ပြုချက်များ ကြိုတင်ဟောသည့်အတိုင်း လူတို့ကိုအားပေးတည်ဆောက်တော်မူခဲ့သည်။​—ဟေရှာယ ၄၂:၃; ၅၀:၄; ၆၁:​၁၊ ၂။

၁၃။ (က) ခရစ်ယာန်မိဘများသည် မည်သို့သစ္စာမဲ့နိုင်သနည်း။ (ခ) မိဘများသည် သားသမီးများကို ပဲ့ပြင်ဆုံးမရာတွင် အလွန်အမင်းခက်ထန်ခြင်း၊ အပြစ်ချည်းသာမြင်ခြင်း၊ သို့မဟုတ် အပြုသဘောမပါခြင်းတို့ကို အဘယ်ကြောင့်ရှောင်သင့်သနည်း။

^၁၃ အခွင့်အာဏာ အတော်အသင့်ရှိသူ ခရစ်ယာန်များသည် ယင်းနှင့်ပတ်သက်သည့် ယေရှု၏ပုံစံမှ အကျိုးများစွာ ခံစားကြရသည်။ ဥပမာ၊ သစ္စာစောင့်သောမိဘများအနေနှင့် သားသမီးများကို ပဲ့ပြင်ဆုံးမရန်လိုကြောင်း သိထားကြသည်။ (သု. ၁၃:၂၄) သို့တိုင် အမျက်ဒေါသနှင့် ခက်ထန်စွာဆုံးမခြင်းဖြင့်လည်းကောင်း၊ တတွတ်တွတ်အပြစ်တင်ခြင်းဖြင့်လည်းကောင်း မိမိသားသမီးတို့ကို စိတ်ဆိုးစေခြင်းငှာမပြုမိရန် သူတို့သတိပြုကြ၏။ မိဘများကို ဘယ်တော့မျှအလိုမကျစေနိုင်ပါဟူ၍ဖြစ်စေ၊ မိဘတို့၏ဝတ်ပြုရေးက သူတို့ကို အပျက်သဘောပိုက်စေ၍ အပြစ်ကိုသာမြင်စေသည်ဟူ၍ ခံစားရသောသားသမီးများသည် စိတ်ဓာတ်ကျလာနိုင်ပြီး နောက်ဆုံးတွင် စစ်မှန်သောယုံကြည်ခြင်းမှ သွေဖည်သွားနိုင်ကြပါသည်။​—ကောလောသဲ ၃:၂၁။

၁၄။ ခရစ်ယာန်သိုးထိန်းများသည် သူတို့အကျိုးဆောင်ပေးသော သိုးစုအပေါ် သစ္စာစောင့်သိကြောင်း မည်သို့တင်ပြနိုင်သနည်း။

^၁၄ ထိုနည်းတူ ခရစ်ယာန်အကြီးအကဲများနှင့် နယ်လှည့်ကြီးကြပ်မှူးများသည် သိုးတော်စုရင်ဆိုင်နေရသော ပြဿနာများနှင့် အန္တရာယ်များကို ဂရုစိုက်ကြပါသည်။ သစ္စာစောင့်သိုးထိန်းများအနေနှင့် သူတို့သည် အကြံဉာဏ်ပေးဖို့လိုအပ်သည့်အခါ အကျိုးအကြောင်းကို ဦးဆုံးစစ်ဆေးပြီးနောက်ပြောဆိုသမျှစကားသည် ကျမ်းစာနှင့် အသင်းမ၏စာအုပ်စာတမ်းများကို အခြေခံစေရန် ဂရုစိုက်ကြသည်။ (ဆာလံ ၁၁၉:၁၀၅; သု. ၁၈:၁၃) ဝိညာဉ်ရေးဘက် တည်ဆောက်ခြင်းနှင့် ကျွေးမွေးခြင်းခံရရန် သိုးများက မိမိတို့ကို အားကိုးနေကြကြောင်း သူတို့သိထားကြ၏။ သို့ဖြစ်၍ သိုးထိန်းကောင်းယေရှုခရစ်ကို သူတို့ကြိုးစားတုပကြပါသည်။ ပတ်စဉ်ပတ်တိုင်းပင် ခရစ်ယာန်စည်းဝေးများတွင် သိုးတို့၏အကျိုးကို သစ္စာစောင့်သိစွာဆောင်ရွက်ပေးကြ၏။ သူတို့ကို ဖြိုဖျက်မည့်အစား တည်ဆောက်ပေးပြီး ယုံကြည်ခြင်းကိုခိုင်ခံ့မြဲမြံစေကြသည်။​—မဿဲ ၂၀:၂၈; ဧဖက် ၄:​၁၁၊ ၁၂; ဟေဗြဲ ၁၃:​၂၀၊ ၂၁။

၁၅။ ပထမရာစုမှသူအချို့သည် သစ္စာစောင့်သိမှုကို လွဲမှားစွာတင်ပြနေကြကြောင်း မည်သို့ထင်ရှားစေခဲ့သနည်း။

^၁၅ မသိမသာသစ္စာကင်းမဲ့သော အခြားပုံစံတစ်ခုမှာ သစ္စာစောင့်သိမှုကို လွဲမှားစွာတင်ပြခြင်းဖြစ်သည်။ ကျမ်းစာအတိုင်း စစ်မှန်သောသစ္စာစောင့်သိခြင်းသည် ယေဟောဝါဘုရားသခင်အား သစ္စာစောင့်သိခြင်းထက် အခြားမည်သည့်သစ္စာခံခြင်းကိုမျှ ဦးစားပေးရန် ခွင့်မပြုပါ။ ပထမရာစုမှ ဂျူးများစွာတို့သည် မောရှေပညတ်နှင့် ဂျူးအစီအစဉ်စနစ်ကို ခေါင်းမာစွာဖြင့် ဆုပ်ကိုင်ထားကြသည်။ သို့တိုင် ယေဟောဝါ၏ကောင်းချီးမင်္ဂလာကို ထိုပုန်ကန်သောလူမျိုးမှ ဝိညာဉ်ရေးဣသရေလလူမျိုးအပေါ်သို့ လွှဲပြောင်းရန်အချိန် ကျရောက်လာသည်။ လူနည်းစုမျှသာ ယေဟောဝါအပေါ် သစ္စာစောင့်သိကြပြီး ဤကြီးမားသောပြောင်းလဲမှုနှင့် လိုက်လျောညီထွေပြုမူခဲ့ပါသည်။ ခရစ်ယာန်စစ်များအတွင်း၌ပင် ယုဒအယူဝါဒလိုက်စားသူများသည် ခရစ်တော်၌ပြည့်စုံခဲ့သော မောရှေပညတ္တိကျမ်း၏ “အားမရှိ၊ ချမ်းသာမပေးနိုင်သောတရားနုဘက်သို့” တစ်ဖန်ပြောင်းလဲကြရန် အခိုင်အမာလှုံ့ဆော်နေပါသည်။​—ဂလာတိ ၄:၉; ၅:​၆-၁၂; ဖိလိပ္ပိ ၃:​၂၊ ၃။

၁၆။ ယေဟောဝါ၏သစ္စာစောင့်ကျေးကျွန်များသည် ပြုပြင်ပြောင်းလဲမှုများကို မည်သို့တုံ့ပြန်ကြသနည်း။

^၁၆ မျက်မှောက်ခေတ် ယေဟောဝါ၏လူများမူကား ပြောင်းလဲရာကာလတစ်လျှောက် သစ္စာစောင့်သိကြောင်း သက်သေထူခဲ့ကြပြီ။ ကိုယ်တော်ဖွင့်ပြတော်မူသော သမ္မာတရား၏အလင်းသည် ထွန်းလင်းသည်ထက် ထွန်းလင်းလာသည်နှင့်အမျှ ပြုပြင်ပြောင်းလဲမှုများကို ပြုလုပ်လာခဲ့သည်။ (သု. ၄:၁၈) မကြာမီက “သစ္စာနှင့်သတိပညာရှိသောကျွန်” သည်မဿဲ ၂၄:၃၄ တွင်ပါသော “လူမျိုးဆက်” ဟူသောဝေါဟာရကိုလည်းကောင်း၊ မဿဲ ၂၅:​၃၁-၄၆ ပါ “သိုး” နှင့် “ဆိတ်” တို့ကိုတရားစီရင်မည့်အချိန်ကိုလည်းကောင်း၊ အရပ်ဘက်ဆိုင်ရာလုပ်ငန်းအချို့အပေါ် ကျွန်ုပ်တို့အမြင်နှင့်ပတ်သက်၍လည်းကောင်း ကျွန်ုပ်တို့တိုးသိနားလည်ကြရန် အကူအညီပေးခဲ့ပါပြီ။ (မဿဲ ၂၄:​၄၅၊ သမ) ယေဟောဝါသက်သေအများစုသည် ထိုအကြောင်းအရာများအပေါ် ယခင်နားလည်ထားသည့်အတိုင်းသာ အသေဆုပ်ကိုင်ထားကြမည်ဆိုလျှင် အယူဖောက်ပြန်သူအချို့က ဝမ်းသာမည်အမှန်။ သို့သော် ထိုသို့လုံးဝမဖြစ်ခဲ့ပါ။ အဘယ်ကြောင့်နည်း။ ယေဟောဝါ၏လူမျိုးသည် သစ္စာစောင့်သိကြသောကြောင့်ဖြစ်သည်။

၁၇။ တစ်ခါတစ်ရံ ကျွန်ုပ်တို့၏သစ္စာစောင့်သိမှုသည် မိမိချစ်မြတ်နိုးရသူများကြောင့် မည်သို့စမ်းသပ်ခံရနိုင်သနည်း။

^၁၇ သို့ရာတွင် သစ္စာစောင့်သိမှုကို လွဲမှားစွာတင်ပြခြင်းကိစ္စသည် မိမိကိုယ်တိုင်ကိုပင် ထိခိုက်နိုင်ပေသည်။ အလွန်ချစ်ခင်ရသော မိတ်ဆွေတစ်ဦး သို့မဟုတ် မိသားစုဝင်တစ်ဦးတစ်ယောက်သည် ကျမ်းစာမူများကို ချိုးဖောက်သည့်လမ်းစဉ်ကို လိုက်သည့်အခါ ကျွန်ုပ်တို့၏သစ္စာစောင့်သိမှုပျက်ပြားရန် ဆွဲဆောင်ခံရသည်ဟု ခံစားရပေမည်။ ကိုယ့်မိသားစုကို သစ္စာစောင့်သိခြင်းကား ဓမ္မတာပင်။ သို့သော် ယေဟောဝါအား သစ္စာစောင့်သိခြင်းထက် သူတို့အပေါ်သစ္စာစောင့်သိခြင်းကို ဘယ်သောအခါမျှ ဦးစားမပေးသင့်ပါ! (၁ ဓမ္မရာဇဝင် ၂၃:​၁၆-၁၈ နှိုင်းယှဉ်။) ကြီးလေးသောအပြစ်တစ်ခုကို ဖုံးဝှက်ထားရန် အပြစ်ကျူးလွန်သူများကို ကျွန်ုပ်တို့ကူညီပေးမည်လည်းမဟုတ်၊ ‘သူတို့ကိုမစ၍၊ သူတို့၏နေရာ၌ တည်မြဲတည်စေပြန်’ ရန်ကြိုးစားကူညီပေးနေသော အကြီးအကဲများကို အတိုက်အခံပြုပြီး သူတို့ဘက်နေကြမည်လည်းမဟုတ်ပါ။ (ဂလာတိ ၆:၁) ထိုသို့ပြုမူခြင်းသည် ယေဟောဝါအားလည်းကောင်း၊ ကိုယ်တော်၏အဖွဲ့အစည်းအပေါ်လည်းကောင်း၊ ချစ်မြတ်နိုးရသူကိုလည်းကောင်း သစ္စာမဲ့ရာကျသည်။ အမှန်မှာ၊ ပြစ်မှားသူတစ်ဦး ရသင့်ရထိုက်သော ပဲ့ပြင်ဆုံးမမှုကို မခံရရန် ကာဆီးကာဆီးပြုလုပ်နေခြင်းသည် တစ်နည်းအားဖြင့် သူ့ကိုယေဟောဝါ၏မေတ္တာတော် မခံစားစေရန် တားဆီးပိတ်ပင်ရာကျသည်။ (ဟေဗြဲ ၁၂:​၅-၇) ‘အဆွေခင်ပွန်း ဒဏ်ပေးသောအခါ သစ္စာစောင့်လျက်ပေး’ သည်ကိုလည်း မမေ့ပါနှင့်။ (သု. ၂၇:၆) ဘုရားသခင့်နှုတ်ကပါဌ်တော်ကို အခြေပြုသော မေတ္တာပါပါ ပွင့်ပွင့်လင်းလင်းဆုံးမပေးခြင်းသည် ပြစ်မှားသော ချစ်ရသူ၏စိတ်ကို ထိခိုက်သွားစေနိုင်မည်ဖြစ်သော်လည်း နောက်ဆုံးတွင် အသက်ကယ်ဆယ်ရေးအတွက် ဖြစ်ကောင်းဖြစ်နိုင်ပေသည်တကား!

နှိပ်စက်ညှဉ်းပန်းမှုကြား သစ္စာစောင့်သိနိုင်ခြင်း

၁၈၊ ၁၉။ (က) အာဟပ်သည် နာဗုတ်ထံမှ အဘယ်အရာကို ရလိုသနည်း။ နာဗုတ်က အဘယ်ကြောင့်မပေးသနည်း။ (ခ) နာဗုတ်၏သစ္စာစောင့်သိမှုသည် အကျိုးနပ်ပါသလော။ ရှင်းပြပါ။

^၁၈ တစ်ခါတစ်ရံ ကျွန်ုပ်တို့၏သစ္စာစောင့်သိခြင်းကို စာတန်တိုက်ရိုက်တိုက်ခိုက်ပါသည်။ နာဗုတ်၏အဖြစ်အပျက်ကို သုံးသပ်ကြည့်ပါ။ သူ၏စပျစ်ဥယျာဉ်ကို ရောင်းပေးရန် အာဟပ်မင်းကြီးက အတင်းအကျပ်တောင်းဆိုသည့်အခါ နာဗုတ်က “ဘိုးဘေးလက်မှအမွေခံသောမြေကို ကိုယ်တော်အားပေးရသောအမှုကို ထာဝရဘုရား[သခင်]ဆီးတားတော်မူပါစေသောဟု ပြန်လျှောက်၏။” (၃ ဓမ္မရာဇဝင် ၂၁:​၃) နာဗုတ်သည် ခေါင်းမာနေခြင်းမဟုတ်ပါ; သစ္စာစောင့်သိနေခြင်းဖြစ်သည်။ မည်သည့်ဣသရေလအမျိုး တစ်ဦးတစ်ယောက်မျှ ဘိုးဘေးလက်မှအမွေခံသောမြေကိုမရောင်းရဟု မောရှေပညတ်က မိန့်မှာထားသည်။ (ဝတ်ပြုရာ ၂၅:​၂၃-၂၈) ဤရက်စက်ကြမ်းကြုတ်သောဘုရင်သည် မိမိကိုသတ်ပစ်နိုင်ကြောင်း နာဗုတ်ကောင်းစွာသိသည်။ အကြောင်းမှာ ယေဟောဝါ၏ပရောဖက်တို့ကို သူ၏မိဖုရားယေဇဗေလ သတ်ပစ်ခဲ့သည်ကို အာဟပ်ခွင့်ပြုခဲ့နှင့်ပြီ! သို့တိုင် နာဗုတ်သည် မြဲမြံတည်ကြည်ပါသည်။​—၃ ဓမ္မရာဇဝင် ၁၈:၄။

^၁၉ သစ္စာစောင့်သိခြင်းငှာ တစ်ခါတစ်ရံ အဖိုးအခပေးရသည်။ ယေဇဗေလသည် “သုံးမရသောသူ” အချို့၏အကူအညီဖြင့် နာဗုတ်အပြစ်စီရင်ခံရရန် ထောင်ချောက်ဆင်ခဲ့သည်။ ရလဒ်အနေနှင့် သူနှင့်သူ၏သားများ အသတ်ခံကြရသည်။ (၃ ဓမ္မရာဇဝင် ၂၁:​၇-၁၆၊ ကဘ; ၄ ဓမ္မရာဇဝင် ၉:၂၆) ယင်းကြောင့် နာဗုတ်၏သစ္စာစောင့်သိခြင်းသည် လွဲမှားနေသည်ဟုဆိုမည်လော။ မဆိုနိုင်ရာ! နာဗုတ်သည် ယခုပင် ယေဟောဝါ၏မှတ်ဉာဏ်တော်၌ ‘အသက်ရှင်နေကြ’ သောသစ္စာစောင့်သိသူယောက်ျားမိန်းမများစွာတို့တွင် တစ်ဦးအပါအဝင်ဖြစ်သည်။ သူတို့သည် ရှင်ပြန်ထမြောက်မည့်အချိန်တိုင်အောင် သင်္ချိုင်းတွင် လုံခြုံစွာအိပ်ပျော်နေကြ၏။​—လုကာ ၂၀:၃၈; တမန်တော် ၂၄:၁၅။

၂၀။ ကျွန်ုပ်တို့၏သစ္စာစောင့်သိမှုကို ထိန်းသိမ်းထားရန် မျှော်လင့်ခြင်းက မည်သို့အကူအညီပေးနိုင်မည်နည်း။

^၂၀ ယနေ့ ထိုကတိတော်သည် ယေဟောဝါ၏သစ္စာစောင့်သိသူများအတွက် အာမခံချက်ဖြစ်သည်။ လောကတွင် ကျွန်ုပ်တို့၏သစ္စာစောင့်သိမှုကို တင်ပြဖို့ရန် ကြီးမားသောအဖိုးအခကို ပေးရဖွယ်ရှိကြောင်း ကျွန်ုပ်တို့သိကြသည်။ ယေရှုခရစ်သည် သစ္စာစောင့်သိမှုအတွက်အခအဖြစ် အသက်စတေးခံတော်မူပြီး သူ၏တပည့်တော်များလည်း ထိုနည်းထပ်တူ ပြုမူဆက်ဆံခံရကြလိမ့်မည်ဟု ကိုယ်တော်မိန့်မှာတော်မူခဲ့သည်။ (ယောဟန် ၁၅:၂၀) အနာဂတ်အတွက် ကိုယ်တော်၏မျှော်လင့်ချက်သည် ကိုယ်တော့်အား ခွန်အားပေးသည်နည်းတူ ကျွန်ုပ်တို့၏မျှော်လင့်ချက်လည်း ခွန်အားပေးပါသည်။ (ဟေဗြဲ ၁၂:၂) သို့ဖြစ်၍ နှိပ်စက်ညှဉ်းပန်းမှုအမျိုးမျိုးခံရလျက်ပင် ကျွန်ုပ်တို့သစ္စာစောင့်သိနိုင်ကြပါသည်။

၂၁။ ယေဟောဝါသည် ကိုယ်တော်၏ သစ္စာစောင့်သိသူများကို အဘယ်အာမခံချက်များပေးသနည်း။

^၂၁ မှန်သည်၊ ယနေ့ ကျွန်ုပ်တို့၏သစ္စာစောင့်သိခြင်းကို ထိုနည်းအတိုင်း တိုက်ရိုက်တိုက်ခိုက်ခြင်းခံရသူ အလွန်နည်းပေမည်။ သို့သော် ဘုရားသခင်၏လူတို့သည် အဆုံးမတိုင်မီ နှိပ်စက်ညှဉ်းပန်းမှု ခံရစရာအကြောင်းရှိသည်။ ကျွန်ုပ်တို့၏သစ္စာစောင့်သိမှုကို မည်သို့ထိန်းသိမ်းသွားနိုင်မည်နည်း။ ယခုပင် ကျွန်ုပ်တို့သစ္စာစောင့်သိခြင်းအားဖြင့်ဖြစ်သည်။ ယေဟောဝါသည် ကိုယ်တော်၏နိုင်ငံတော်သတင်းကို ဟောပြောသွန်သင်ပေးရန် အလွန်ကြီးမားသောတာဝန်ကို အပ်နှင်းထားတော်မူပြီ။ ဤအရေးကြီးသောလုပ်ငန်းကို သစ္စာစောင့်သိစွာ အမြဲထမ်းဆောင်နေကြစို့လေ။ (၁ ကောရိန္သု ၁၅:၅၈) ယေဟောဝါ၏အဖွဲ့အစည်းအပေါ် ကျွန်ုပ်တို့၏သစ္စာစောင့်သိမှုအား လူ့မစုံလင်မှုများကတိုက်စားခြင်းကို ကျွန်ုပ်တို့ခွင့်မပြုဘဲနေမည်ဆိုလျှင်၊ သစ္စာစောင့်သိခြင်းကို လွဲမှားစွာတင်ပြခြင်း အစရှိသော မသိမသာသစ္စာကင်းမဲ့သည့်နည်းများကို သတိထားကြမည်ဆိုလျှင် ကျွန်ုပ်တို့၏သစ္စာစောင့်သိမှုသည် ပြင်းပြင်းထန်ထန် စမ်းသပ်ခံရပါက သာ၍အသင့်ရှိနေပါလိမ့်မည်။ မည်သို့ဆိုစေကာမူ ယေဟောဝါသည် ကိုယ်တော်၏သစ္စာစောင့်သိသောကျေးကျွန်များကို မပျက်မကွက် သစ္စာစောင့်တော်မူမည်ဖြစ်ကြောင်း အမြဲစိတ်ချယုံကြည်နိုင်ပါသည်။ (၂ ဓမ္မရာဇဝင် ၂၂:၂၆) မှန်ပါ၏၊ ကိုယ်တော်၏သစ္စာစောင့်သိသူများကို ကိုယ်တော်စောင့်ရှောက် ကာကွယ်တော်မူမည်!​—ဆာလံ ၉၇:၁၀။

[အောက်ခြေမှတ်ချက်များ]

သင်မည်သို့ဖြေဆိုမည်နည်း

◻ သူတစ်ပါး၏မစုံလင်မှုများကြောင့် သစ္စာမပျက်စေရန် မည်သို့ပြုလုပ်နိုင်မည်နည်း။

◻ မိမိကိုယ်တိုင်၏မစုံလင်မှုများသည် အဘယ်နည်းများဖြင့် သစ္စာပျက်စေနိုင်မည်နည်း။

◻ သစ္စာစောင့်သိမှုကို လွဲမှားစွာတင်ပြလိုစိတ်ကို မည်သို့ငြင်းဆန်နိုင်မည်နည်း။

◻ နှိပ်စက်ညှဉ်းပန်းခံရချိန်များတွင်ပင် ကျွန်ုပ်တို့၏သစ္စာစောင့်သိမှုကို ထိန်းသိမ်းထားရန် အဘယ်အရာက အကူအညီဖြစ်စေမည်နည်း။

[စာမျက်နှာ ၉ ပါ လေးထောင့်ကွက်]

ဗေသလတွင် သစ္စာရှိရှိအမှုဆောင်ခြင်း

“ခပ်သိမ်းသောအမှုကို တင့်တယ်လျောက်ပတ်စွာ အစဉ်အတိုင်းစီရင်ကြလော့။” ထိုသို့တမန်တော်ပေါလုရေးသားခဲ့သည်။ (၁ ကောရိန္သု ၁၄:၄၀) အသင်းတော်တစ်ခု လည်ပတ်လှုပ်ရှားနိုင်ရန် ‘အစီအစဉ်အတိုင်းစီရင်’ ခြင်း၊ ဖွဲ့စည်းစီမံမှုရှိခြင်း လိုအပ်ကြောင်းကို ပေါလုသိထားပါသည်။ ထိုနည်းတူ ယနေ့လည်း စာအုပ်ကြီးသင်တန်းရှိရာ နေရာအသီးသီးသို့ အသင်းတော်သားများကို တာဝန်ခန့်ခွဲပေးရန်၊ လယ်ကွင်းလုပ်ငန်းအတွက် အစည်းအဝေးများကို စီစဉ်ပေးရန်နှင့် ရပ်ကွက်တွင် နှံ့စပ်စွာအမှုဆောင်ရွက်ပြီးမပြီး စစ်ဆေးရန် အစရှိသည့် လက်တွေ့ကျကိစ္စများကို အကြီးအကဲများ ဆုံးဖြတ်ပြုလုပ်ကြရ၏။ ဤအစီအစဉ်များသည် တစ်ခါတစ်ရံ သစ္စာစောင့်သိခြင်းအတွက် စမ်းသပ်မှုဖြစ်ကောင်းဖြစ်ပေမည်။ ၎င်းတို့သည် မှုတ်သွင်းခံမိန့်မှာချက်များမဟုတ်သည့်ပြင် လူတိုင်း၏စိတ်ကြိုက်လည်း ဖြစ်နိုင်မည်မဟုတ်ပါ။

ခရစ်ယာန်အသင်းတော်၏ အစီအစဉ်အချို့ကို လိုက်နာဆောင်ရွက်ရန် တစ်ခါတစ်ရံ သင့်အတွက် စိန်ခေါ်ချက်ဖြစ်နေပါသလော။ ထိုသို့ဆိုလျှင် ဗေသလကို ပုံစံအဖြစ်ထားခြင်းသည် အထောက်အကူဖြစ်ပေမည်။ ကင်းမျှော်စင်အသင်း၏ အမေရိကန်ရှိဌာနချုပ်အပါအဝင် ဌာနခွဲ ၁၀၄ ခုလုံးကို “ဘုရားသခင်၏အိမ်တော်” ဟူ၍အဓိပ္ပာယ်ရှိသော ဟေဗြဲစကားလုံး ဗေသလအမည်ပေးထားပါသည်။* ဗေသလအဆောက်အဦများတွင် နေထိုင်ကြပြီး အမှုထမ်းနေသော စေတနာ့ဝန်ထမ်းများသည် ဤနေရာများကို ယေဟောဝါအား ရိုသေလေးမြတ်၍ ကြောက်ရွံ့မှုတင်ပြသောနေရာများ ဖြစ်စေလိုကြပါသည်။ ယင်းသို့ဖြစ်ဖို့ရန် တစ်ဦးချင်းစီအနေနှင့် သစ္စာစောင့်သိမှု တင်ပြရန်လိုအပ်ပါသည်။

ဗေသလသို့အလည်အပတ် လာကြသူများသည် ထိုနေရာရှိ စည်းစနစ်ကျနမှုနှင့် သန့်ရှင်းမှုအကြောင်း မကြာခဏ ချီးမွမ်းပြောဆိုတတ်ကြသည်။ အမှုထမ်းသူများသည် စည်းစနစ်ရှိပြီး ပျော်ရွှင်ကြ၏; သူတို့၏အပြောအဆို၊ အမူအကျင့်တို့နှင့် အသွင်အပြင်ကပင် ရင့်ကျက်ပြီး ကျမ်းစာနှင့်အညီ လေ့ကျင့်ထားသော ခရစ်ယာန်တို့၏ ကိုယ်ကိုကိုယ်သိသောစိတ် သူတို့တွင်ရှိကြောင်း ထင်ရှားစေပါသည်။ ဗေသလမိသားစုတစ်စုလုံးသည် ဘုရားသခင့်နှုတ်ကပါဌ်တော်၏စံနှုန်းများကို သစ္စာရှိရှိလိုက်နာကြသည်။

ထို့ပြင် ဤမျှကြီးမားသော မိသားစုတစ်စုအနေနှင့် အတူတကွ လုပ်ကိုင်ဆောင်ရွက်နိုင်ကြရန် လက်တွေ့ကျအစီအစဉ်အချို့ကို ကရုဏာရှိရှိ ချမှတ်ပေးသော စည်းလုံးစွာ အတူတကွနေထိုင်ခြင်းအမည်ရှိ လက်စွဲစာအုပ်တစ်အုပ်ကို အုပ်ချုပ်ရေးအဖွဲ့က ပုံနှိပ်ထုတ်ဝေပေးထားပါသည်။ (ဆာလံ ၁၃၃:၁) ဥပမာ၊ အိပ်ခန်းများ၊ စားစရာများ၊ ကျန်းမာရေးသိပ္ပံ၊ ဝတ်စားဆင်ယင်မှုနှင့် အလားတူကိစ္စများအကြောင်း ဖော်ပြထားပါသည်။ ဗေသလမိသားစုသည် မိမိတို့၏အကြိုက်နှင့်မတူသည့်တိုင် အဆိုပါအစီအစဉ်များကို သစ္စာရှိရှိအားပေးထောက်ခံ လိုက်နာကြပါသည်။ ဤလက်စွဲသုံးစာအုပ်ကို ကြင်နာမှုကင်းမဲ့သော စည်းမျဉ်းဥပဒေအစုအပုံအဖြစ် ယူမှတ်ကြမည့်အစား စည်းလုံးညီညွတ်မှုရှိစေရန် ရည် ရွယ်ပြီး ချမှတ်ထားသည့် အကျိုးပြုလမ်းညွှန်များအဖြစ် လက်ခံယူမှတ်ထားကြသည်။ ကျမ်းစာကိုအခြေခံသော ဤလုပ်ပုံကိုင်ပုံများကို ကြီးကြပ်မှူးများသည် သစ္စာရှိရှိလိုက်လျှောက်နာယူကြသည်။ ဗေသလမိသားစုသည် သူတို့၏မြင့်မြတ်သော ဗေသလလုပ်ငန်းကို ဆက်ထမ်းဆောင်နိုင်စေရန် ယင်းတို့ကို အပြုသဘောဖြင့် အသုံးပြုပြီး အားပေးတည်ဆောက်ကြပါသည်။

*ဤပုံနှိပ်တိုက်၊ ရုံးခန်းနှင့် လူနေထိုင်ရာအဆောက်အဦများသည် ဘုရားသခင်၏ ကြီးမြတ်တော်မူသော ဝိညာဉ်ရေးဗိမာန်တော် သို့မဟုတ် အိမ်တော်တွင် အပါအဝင်မဟုတ်ပါ။ ဘုရားသခင်၏ ဝိညာဉ်ရေးဗိမာန်တော်သည် စင်ကြယ်သောဝတ်ပြုရေးအတွက် ကိုယ်တော်၏အစီအစဉ်ဖြစ်ပါသည်။ (မိက္ခာ ၄:၁) ယင်းသို့ဖြစ်သောကြောင့် ကမ္ဘာမြေကြီးပေါ်ရှိ ပကတိအဆောက်အအုံတစ်ခုခု၌ ကန့်သတ်ထားခြင်းမရှိနိုင်ချေ။

[စာမျက်နှာ ၁၀ ပါ လေးထောင့်ကွက်]

သစ္စာစောင့်သိသူနှင့် ဥပဒေကို လှေနံဓားထစ်လိုက်သူ

၁၉၁၆ ခုနှစ်က “သစ္စာစောင့်သိသူနှင့် ဥပဒေကို လှေနံဓားထစ်လိုက်သူတို့၏ ကွာခြားမှုကို အချိန်အခါမရွေး နေရာတိုင်းတွင် တွေ့ရှိနိုင်သည်” ဟုဘာသာတရားနှင့် ကျင့်ဝတ်များစွယ်စုံကျမ်းကဖော်ပြသည်။ ၎င်းက ဤသို့ ရှင်းပြ၏– “ဥပဒေကို လှေနံဓားထစ်လိုက်သူသည် စေခိုင်းခံရသည်အတိုင်းပြုလုပ်တတ်၏၊ အဘယ်ဥပဒေကိုမျှ မချိုးဖောက်ပါ; မှတ်တမ်းတင် ဖတ်ရှု၍ရနိုင်သော ဘုရားသခင်၏နှုတ်မြွတ်စကားကို သစ္စာရှိ၏။ တစ်ဖက်တွင်မူ သစ္စာစောင့်သိသူကား ထိုသို့ပင်ပြုသော်လည်း . . . ထိုထက်မကပြုမူလိမ့်မည်ဟု အားကိုးအားထားရသူ၊ မိမိတာဝန်ကို စိတ်အာရုံအပြည့်နှင့် ကျေပွန်စွာပြုလုပ်ပြီး ပြုလုပ်ရသည့်ရည် ရွယ်ချက်၏သဘောနှင့်အညီ မိမိ၏စိတ်သဘောကို ညီညွတ်စေသူဖြစ်သည်။” နောင်တွင် ၎င်းစာစောင်ကပင် ဤသို့ထပ်မံဆိုသည်– “သစ္စာရှိရန် ဥပဒေလိုက်နာရုံထက်မကလိုအပ်သည်။ . . . သစ္စာရှိသူသည် စိတ်နှလုံးအပြည့်နှင့် အစွမ်းကုန်အမှုထမ်းသူဖြစ်ရာ ဥပဒေလိုက်နာသူနှင့်ကွာခြားပါသည်။ . . . တမင်ပြုခြင်း၊ ပျက်ကွက်ခြင်း၊ သို့မဟုတ် လျစ်လျူ ရှုခြင်းတို့ကို သူပြုမူလိမ့်မည်မဟုတ်ပါ။”