“ကျွန်တော်တို့အားလုံး တညီတညွတ်တည်း သဘောတူဆုံးဖြတ်ခဲ့ပါတယ်”

၁၊ ၂။ (က) ပထမရာစု ခရစ်ယာန် အသင်းတော်ရဲ့ အုပ်ချုပ်ရေးအဖွဲ့ ဘယ်အရေးကြီး မေးခွန်းတွေ ဖြေပေးရမလဲ။ (ခ) ဒီညီအစ်ကိုတွေ ဆုံးဖြတ်ချက် မှန်မှန်ကန်ကန် ချနိုင်ဖို့ ဘယ်အချက်အလက်တွေက ပံ့ပိုးပေးသလဲ။

ဘာဆုံးဖြတ်ချက်များ ချမလဲဆိုပြီး လူတွေ မျှော်လင့်တကြီး စောင့်နေကြတယ်။ အရေးကြီး ဆုံးဖြတ်ချက် ဖြစ်မှန်း ရိပ်မိလို့ တမန်တော်တွေ၊ အကြီးအကဲတွေ တစ်ယောက်မျက်နှာ တစ်ယောက် ကြည့်နေကြတယ်။ အရေဖျား ဖြတ်ခြင်းကိစ္စကြောင့် အရေးကြီး မေးခွန်းတွေ ပေါ်လာတယ်။ ခရစ်ယာန်တွေ မောရှေပညတ်အောက် ရှိသလား။ ဂျူးခရစ်ယာန်ရယ်၊ လူမျိုးခြား ခရစ်ယာန်ရယ်ဆိုပြီး ဘုရား ခွဲခြားရှုမြင်ဦးမလား။

^၂ ဦးစီးနေတဲ့ အမျိုးသားတွေဟာ အထောက်အထား အများကြီး သုံးသပ်ကြတယ်။ ကျမ်းစာ ပရောဖက်ပြုချက်တွေ ထည့်စဉ်းစားကြတယ်။ လူမျိုးခြား ခရစ်ယာန်တွေကို ဘုရား နှစ်သက်လက်ခံတယ်ဆိုတာ ဖော်ပြတဲ့ ကိုယ်တွေ့ သက်သေခံချက်တွေ ထည့်စဉ်းစားကြတယ်။ ဒီကိစ္စနဲ့ပတ်သက်ပြီး ကိုယ်သိသမျှ ထုတ်ပြောကြတယ်။ ဆုံးဖြတ်ချက် ချနိုင်ဖို့ ပံ့ပိုးပေးတဲ့ အချက်အလက်တွေမှ အများကြီးပဲ။ ဘုရား ဘယ်လို ဆုံးဖြတ်စေချင်သလဲ ထင်ရှားနေပြီ။ စွမ်းအားတော် လမ်းညွှန်မှုကို သူတို့ လက်ခံကြမလား။

၃။ တမန်တော် အခန်းကြီး ၁၅ ကနေ ဘာတွေ သင်ယူရမလဲ။

^၃ ဒီကိစ္စမှာ စွမ်းအားတော် လမ်းပြမှု လက်ခံနိုင်ဖို့ စစ်မှန်တဲ့ ယုံကြည်ခြင်းနဲ့ သတ္တိ လိုတယ်။ ဒီဆုံးဖြတ်ချက်ကြောင့် ဂျူးဘာသာရေး ခေါင်းဆောင်တွေ ပိုမုန်းလာနိုင်လို့ပဲ။ ဒါ့အပြင် ခေတ်နောက်ပြန်ဆွဲပြီး မောရှေပညတ် ဆက်လိုက်စေချင်တဲ့ အသင်းသားတချို့ရဲ့ ဆန့်ကျင်မှုကိုလည်း ရင်ဆိုင်ရနိုင်တယ်။ အုပ်ချုပ်ရေးအဖွဲ့ ဘာလုပ်မလဲ။ ဒီနေ့ခေတ် ယေဟောဝါသက်သေတွေရဲ့ အုပ်ချုပ်ရေးအဖွဲ့ လိုက်လျှောက်ဖို့ သူတို့ ဘာစံနမူနာ ချခဲ့ကြောင်း လေ့လာကြစို့။ ကျွန်တော်တို့လည်း ဘဝမှာ ပြဿနာတွေ ကြုံတဲ့အခါ၊ ဆုံးဖြတ်ချက်တွေ ချတဲ့အခါ ဒီစံနမူနာ လိုက်လျှောက်ရမယ်။

“ပရောဖက်ကျမ်းမှာ ပါတဲ့ စကားတွေနဲ့ ကိုက်ညီ” (တ. ၁၅:၁၃-၂၁)

၄၊ ၅။ ပရောဖက်ကျမ်းထဲက ဘယ်ကျမ်းပိုဒ်ကို ယာကုပ် ကိုးကားသလဲ။

^၄ ယေရှုရဲ့ မိတူဖကွဲ ညီ၊ တပည့် ယာကုပ် စပြောတယ်။a ယာကုပ်ဟာ အစည်းအဝေး သဘာပတိ ဖြစ်ပြီး အုပ်ချုပ်ရေးအဖွဲ့ ဆုံးဖြတ်ချက်ကို ပြန်ပြောပြနေပုံ ရတယ်။ “ဘုရားသခင်က လူမျိုးခြားတွေကို သတိရပြီး နာမတော်အတွက် သူတို့ထဲကနေ လူတွေကို ရွေးချယ်လိုက်တဲ့အကြောင်း ရှုမောင် အသေးစိတ် ပြောပြခဲ့ပြီပဲ။ အဲဒီအချက်ဟာ ပရောဖက်ကျမ်းမှာ ပါတဲ့ စကားတွေနဲ့ ကိုက်ညီပါတယ်” လို့ ယာကုပ် ပြောတယ်။—တ. ၁၅:၁၄၊ ၁၅။

^၅ ရှုမောင် ဒါမှမဟုတ် ရှိမုန် ပေတရုရဲ့ စကား၊ ဗာနဗနဲ့ ပေါလု ပြောပြတဲ့ အထောက်အထားတွေကြောင့် ယာကုပ်ဟာ ဘုရားလမ်းညွှန်ချက်ကို ညီအစ်ကိုတွေ ပိုသဘောပေါက်ဖို့ ကူညီပေးမယ့် ကျမ်းပိုဒ်တွေ မှတ်မိလာပုံ ရတယ်။ (ယော. ၁၄:၂၆) “ပရောဖက်ကျမ်းမှာ ပါတဲ့ စကားတွေနဲ့ ကိုက်ညီပါတယ်” လို့ ပြောပြီးနောက် အာမုတ် ၉:၁၁၊ ၁၂ ကို ယာကုပ် ကိုးကားတယ်။ အာမုတ်ကျမ်းဟာ “ပရောဖက်ကျမ်း” လို့ ခေါ်ကြတဲ့ ဟီဘရူး ကျမ်းစောင်ထဲမှာ ပါတယ်။ (မ. ၂၂:၄၀။ တ. ၁၅:၁၆-၁၈) ယာကုပ် ကိုးကားတဲ့ ကျမ်းစကားဟာ ဒီနေ့ အာမုတ်ကျမ်းမှာ ကျွန်တော်တို့ ဖတ်ရတာနဲ့ နည်းနည်း ကွာတယ်။ ဟီဘရူးကျမ်းစောင်တွေကို ဂရိလို ပြန်ဆိုထားတဲ့ စက်ပ်တွားဂျင့် ကျမ်းကနေ ယာကုပ် ကိုးကားခဲ့ပုံရတယ်။

၆။ ဘုရားအလိုကို ညီအစ်ကိုတွေ သဘောပေါက်ဖို့ ကျမ်းစာက ဘယ်လို ကူညီပေးသလဲ။

^၆ “ဒါဝိဒ်ရဲ့ တဲ” ကို ပြန်ထူမယ့်အချိန် ရောက်လာမယ်လို့ ပရောဖက် အာမုတ်ကတစ်ဆင့် ယေဟောဝါ ကြိုဟောတယ်။ “ဒါဝိဒ်ရဲ့ တဲ” ဆိုတာ မေရှိယ နိုင်ငံတော် ပေါ်ထွန်းစေမယ့် မင်းဆက် ဖြစ်တယ်။ (ယေဇ. ၂၁:၂၆၊ ၂၇) ဒါဆိုရင် ဂျူးလူမျိုးကို ယေဟောဝါ သီးသန့် မျက်နှာသာ ပြန်ပေးမယ့် သဘောလား။ မဟုတ်ဘူး။ “လူမျိုးခြားတွေ” ကို “[ဘုရားသခင်ရဲ့] နာမည်နဲ့ မှည့်ခေါ်” မယ်လို့ ပရောဖက်ပြုချက်မှာ ဆက်ပြောတယ်။ “ဘုရားသခင်က ကျွန်တော်တို့ [ဂျူးခရစ်ယာန်တွေ] နဲ့ သူတို့ [လူမျိုးခြား ခရစ်ယာန်တွေ] ကို မခွဲခြားတော့ဘူး။ သူတို့ရဲ့ ယုံကြည်ခြင်းကြောင့် သူတို့ရဲ့ စိတ်နှလုံးကို စင်ကြယ်စေပြီ” လို့ ခုနလေးတင် ပေတရု ပြောတယ်။ (တ. ၁၅:၉) တစ်နည်းအားဖြင့်၊ ဘုရားက ဂျူးတွေကိုကော လူမျိုးခြားတွေကိုပါ နိုင်ငံတော် အမွေခံ ဖြစ်စေချင်တယ်။ (ရော. ၈:၁၇။ ဧ. ၂:၁၇-၁၉) ယုံကြည်သူ လူမျိုးခြားတွေ အရေဖျား ဖြတ်မှ၊ ဂျူးဘာသာ ဝင်မှ နိုင်ငံတော် အမွေခံ ဖြစ်မယ်လို့ ဘယ်ပရောဖက်ပြုချက်မှာမှ ဖော်ပြမထားဘူး။

၇၊ ၈။ (က) ယာကုပ် ဘယ်လို အကြံပြုသလဲ။ (ခ) ညီအစ်ကိုတွေကို ယာကုပ် အာဏာပြ ပြောလိုက်တာလား။ ရှင်းပြပါ။

^၇ ကျမ်းစာ အထောက်အထားတွေ၊ ခိုင်လုံတဲ့ သက်သေခံချက်တွေကြောင့် ယာကုပ် ဒီလိုအကြံပြုတယ်– “ဒါကြောင့် ကျွန်တော့်အမြင်ကတော့ ဘုရားသခင်ကို ကိုးကွယ်လာတဲ့ လူမျိုးခြားတွေ အခက်တွေ့အောင် မလုပ်သင့်ဘူး။ အဲဒီအစား ရုပ်တုကိုးကွယ်ခြင်းနဲ့ ဆက်စပ်တဲ့ ညစ်ညူးတဲ့အရာ၊ လိင်အကျင့်ယိုယွင်းမှု၊ လည်ညှစ်သတ်ထားတဲ့ တိရစ္ဆာန်နဲ့ သွေးကို ရှောင်ကြဉ်ဖို့ပဲ စာရေး မှာကြားရင် ကောင်းမယ်။ မောရှေပညတ်ကျမ်းကို ဖတ်ပြီး ဟောခဲ့တဲ့သူတွေ ဟိုးအရင်ကတည်းက မြို့တိုင်းမှာ ရှိတယ်။ ဥပုသ်နေ့တိုင်း တရားဇရပ်တွေမှာ အဲဒီကျမ်းတွေကို အသံကျယ်ကျယ် ဖတ်ပြလေ့ရှိတယ်။”—တ. ၁၅:၁၉-၂၁။

^၈ “ကျွန်တော့်အမြင်ကတော့” လို့ ယာကုပ် ပြောလိုက်တာဟာ အစည်းအဝေး သဘာပတိမို့လို့ ဘာလုပ်ပါဆိုပြီး ညီအစ်ကိုတွေကို အာဏာပြ ပြောလိုက်တာလား။ လုံးဝ မဟုတ်ဘူး။ “ကျွန်တော့်အမြင်ကတော့” ဆိုပြီး ပြန်ဆိုထားတဲ့ ဂရိစကားဟာ “ယူဆတယ်” ဆိုတဲ့ သဘော ဖြစ်နိုင်တယ်။ အုပ်ချုပ်ရေးအဖွဲ့ကို ယာကုပ် စိုးမိုးခြယ်လှယ်နေတာ မဟုတ်ဘူး။ ကြားခဲ့တဲ့ အထောက်အထားတွေနဲ့ ကျမ်းစာအဆိုကို အခြေပြုပြီး သုံးသပ်ဖို့ အကြံပြုနေတာ။

၉။ ယာကုပ်ရဲ့ အကြံပြုချက်ကြောင့် ဘာအကျိုးတွေ ရသလဲ။

^၉ တမန်တော်တွေ၊ အကြီးအကဲတွေ လက်ခံကြတာကို ကြည့်ရင် ယာကုပ်ရဲ့ အကြံပြုချက် သိပ်ကောင်းတာ သေချာတယ်။ ဒီအကြံပြုချက်ကြောင့် ဘာအကျိုးတွေ ရသလဲ။ လူမျိုးခြား ခရစ်ယာန်တွေ မောရှေပညတ် လိုက်စရာ မလိုလို့ အခက်မတွေ့ကြတော့ဘူး။ (တ. ၁၅:၁၉) ဒါ့အပြင် နှစ်တွေတစ်လျှောက် ‘မောရှေပညတ်ကျမ်းကို ဥပုသ်နေ့တိုင်း တရားဇရပ်တွေမှာ အသံကျယ်ကျယ် ဖတ်ပြ’ တာ ကြားခဲ့ရတဲ့ ဂျူးခရစ်ယာန်တွေရဲ့ သိစိတ်ကိုလည်း လေးစားရာ ရောက်တယ်။b (တ. ၁၅:၂၁) ဒါကြောင့် ဂျူးနဲ့ လူမျိုးခြား ခရစ်ယာန်တွေ နှောင်ကြိုး ပိုခိုင်မြဲလာတယ်။ မိမိရည်ရွယ်ချက်နဲ့ ကိုက်ညီတဲ့အတွက် ယေဟောဝါဘုရားလည်း နှစ်သက်တယ်။ ဘုရားလူမျိုးရဲ့ စည်းလုံးငြိမ်သက်မှုကို ထိပါးလာနိုင်တဲ့ ပြဿနာကို ကောင်းကောင်း ဖြေရှင်းလိုက်တာပဲ။ ဒီနေ့ခေတ် ခရစ်ယာန် အသင်းတော်အတွက် သိပ်ကောင်းတဲ့ စံနမူနာပါပဲ။

၁၀။ ဒီနေ့ခေတ် အုပ်ချုပ်ရေးအဖွဲ့ဟာ ပထမရာစု အုပ်ချုပ်ရေးအဖွဲ့ ချခဲ့တဲ့စံနမူနာကို ဘယ်လို လိုက်လျှောက်နေသလဲ။

^၁၀ ရှေ့အခန်းမှာ ဖော်ပြတဲ့အတိုင်း ပထမရာစု အုပ်ချုပ်ရေးအဖွဲ့လိုပဲ ဒီနေ့ခေတ် ယေဟောဝါသက်သေတွေရဲ့ အုပ်ချုပ်ရေးအဖွဲ့ဟာ ဘာကိစ္စပဲဖြစ်ဖြစ် စကြဝဠာ အချုပ်အခြာ အာဏာရှင် ယေဟောဝါနဲ့ အသင်းတော် ဦးခေါင်း ယေရှုခရစ်ရဲ့ ညွှန်ကြားမှုကို အားကိုးတယ်။c (၁ ကော. ၁၁:၃) ဘယ်လိုနည်းနဲ့လဲ။ ၁၉၇၄ ကနေ မြေကြီးအသက်တာ ကုန်ဆုံးတဲ့ ၂၀၀၆၊ မတ်လအထိ အုပ်ချုပ်ရေး အဖွဲ့ဝင်အဖြစ် အမှုဆောင်ခဲ့တဲ့ အဲလ်ဘတ် ရှရိုးဒါ ဒီလိုရှင်းပြတယ်– “ဗုဒ္ဓဟူးနေ့မှာ အုပ်ချုပ်ရေးအဖွဲ့ အစည်းအဝေး လုပ်တယ်။ ယေဟောဝါရဲ့ စွမ်းအားတော် ညွှန်ကြားပေးဖို့ ဆုတောင်းပြီး အစည်းအဝေး စတယ်။ ကိုင်တွယ်ရတဲ့ ကိစ္စရပ်တိုင်း၊ ဆုံးဖြတ်ရတဲ့ ဆုံးဖြတ်ချက်တိုင်း ကျမ်းစာနဲ့ ညီဖို့ ကြိုးစားတယ်။” ၂၀၀၃၊ မတ်လမှာ မြေကြီးအသက်တာ ကုန်ဆုံးသွားတဲ့ သက်တမ်းကြာ အုပ်ချုပ်ရေး အဖွဲ့ဝင် မီလ်တန် ဟန်ရှယ်လ်လည်း ၁၀၁ ကြိမ်မြောက် ဂိလဒ် သင်တန်းဆင်းပွဲမှာ “ဦးစီးသူတွေ အရေးကြီး ဆုံးဖြတ်ချက် မချခင် ကျမ်းစာကနေ အကြံဉာဏ် ယူတဲ့ တခြားအဖွဲ့အစည်းတစ်ခုခု ကမ္ဘာပေါ်မှာ ရှိသလား” ဆိုပြီး မေးခဲ့တယ်။ အဖြေက ရှင်းပါတယ်။

‘ညီအစ်ကိုတချို့ကို ရွေးချယ်ပြီး စေလွှတ်’ (တ. ၁၅:၂၂-၂၉)

၁၁။ အုပ်ချုပ်ရေးအဖွဲ့ ဆုံးဖြတ်ချက်ကို အသင်းတော်တွေဆီ ဘယ်လို အသိပေးသလဲ။

^၁၁ ဂျေရုဆလင်မြို့က အုပ်ချုပ်ရေးအဖွဲ့ဟာ အရေဖျား ဖြတ်ခြင်း ပြဿနာကို တညီတညွတ်တည်း သဘောတူ ဆုံးဖြတ်ခဲ့ကြတယ်။ ဒါပေမဲ့ အသင်းတော်က ညီအစ်ကို/မတွေ တညီတညွတ်တည်း လိုက်နာနိုင်ဖို့ ဒီဆုံးဖြတ်ချက်ကို ရှင်းရှင်းလင်းလင်း၊ အားရှိစေတဲ့ နည်းနဲ့ အသိပေးရမယ်။ ဘယ်လိုနည်းနဲ့လဲ။ “တမန်တော်တွေ၊ အကြီးအကဲတွေ အပါအဝင် အသင်းတော်တစ်ခုလုံးက ပေါလု၊ ဗာနဗနဲ့ ညီအစ်ကိုတချို့ကို ရွေးချယ်ပြီး အန္တိအုတ်မြို့ဆီ လွှတ်ဖို့ ဆုံးဖြတ်တယ်။ ဦးဆောင်သူတွေ ဖြစ်တဲ့ ဗာရှဗလို့ ခေါ်တဲ့ ယုဒနဲ့ သိလကို လွှတ်လိုက်တယ်” လို့ မှတ်တမ်းက ဆိုတယ်။ ဒါ့အပြင် အန္တိအုတ်မြို့ကစပြီး ဆီးရီးယားပြည်၊ ကိလိကိပြည်မှာ ရှိတဲ့ အသင်းတော်တွေမှာ ဖတ်ပြဖို့ စာတစ်စောင် ရေးပြီး သူတို့နဲ့ ထည့်ပေးလိုက်တယ်။—တ. ၁၅:၂၂-၂၆။

၁၂၊ ၁၃။ (က) ယုဒနဲ့ သိလကို လွှတ်လိုက်တာ ဘာအကျိုး ရှိစေသလဲ။ (ခ) အုပ်ချုပ်ရေး အဖွဲ့ကနေ စာပို့လိုက်တာ ဘာအကျိုး ရှိစေသလဲ။

^၁၂ ယုဒနဲ့ သိလဟာ “ဦးဆောင်သူတွေ” ဖြစ်တဲ့အတွက် အုပ်ချုပ်ရေးအဖွဲ့ ကိုယ်စားလှယ်အဖြစ် အရည်အချင်း ပြည့်မီကြတယ်။ သူတို့ ယူလာတဲ့ သတင်းဟာ အရေဖျား ဖြတ်ခြင်း ကိစ္စအတွက် အဖြေပေးရုံသာ မဟုတ်ဘဲ အုပ်ချုပ်ရေးအဖွဲ့ရဲ့ ညွှန်ကြားချက်အသစ် ဖြစ်ကြောင်း ဒီကိုယ်စားလှယ် လေးယောက် ရှင်းရှင်းလင်းလင်း အသိပေးကြမှာ ဖြစ်တယ်။ ‘ရွေးချယ်ပြီး စေလွှတ်’ ခံရသူတွေ ရောက်လာလို့ ဂျေရုဆလင်မှာ ရှိတဲ့ ဂျူးခရစ်ယာန်တွေနဲ့ အသင်းတော်မှာ ရှိတဲ့ လူမျိုးခြား ခရစ်ယာန်တွေ တစ်သွေးတည်း တစ်သံတည်း ဖြစ်လာကြမယ်။ တကယ် ပညာရှိပြီး မေတ္တာပါတဲ့ အစီအစဉ်ပါပဲ။ ဘုရားလူမျိုး ပိုစည်းလုံးသွားမှာ သေချာတယ်။

^၁၃ လူမျိုးခြား ခရစ်ယာန်တွေဟာ အရေဖျား ဖြတ်ခြင်း ကိစ္စနဲ့ပတ်သက်ပြီး ရှင်းလင်းတဲ့ ညွှန်ကြားချက် ရတဲ့အပြင် ဘုရားမျက်နှာသာ၊ ကောင်းချီး ရချင်ရင် ဘာလုပ်ရမယ်ဆိုတာ စာကတစ်ဆင့် သိလာကြတယ်။ “လိုက်နာရမယ့် ဒီအရာတွေကလွဲလို့ တခြားဝန်ကို ခင်ဗျားတို့အပေါ် ထပ်မတင်ဖို့ သန့်ရှင်းသော စွမ်းအားတော် အကူအညီနဲ့ ကျွန်တော်တို့ သဘောတူ ဆုံးဖြတ်နိုင်ခဲ့တယ်– ရုပ်တုရှေ့ ပူဇော်ထားတဲ့အရာ၊ သွေး၊ လည်ညှစ်သတ်ထားတဲ့ တိရစ္ဆာန်၊ လိင်အကျင့်ယိုယွင်းမှုကို အမြဲ ရှောင်ကြဉ်ကြပါ။ ဒါတွေကို သတိထား ရှောင်ကြဉ်မယ်ဆိုရင် ကောင်းစားပါလိမ့်မယ်။ ကျန်းမာကြပါစေ” ဆိုပြီး စာရဲ့ အဓိကအပိုင်းမှာ ဖော်ပြထားတယ်။—တ. ၁၅:၂၈၊ ၂၉။

၁၄။ ဒီနေ့၊ စိတ်ဝမ်းကွဲပြားနေတဲ့ ကမ္ဘာမှာ ဘုရားလူမျိုး ဘာကြောင့် စည်းလုံးနေသလဲ။

^၁၄ ဒီနေ့၊ ကမ္ဘာတစ်ဝန်း အသင်းတော်ပေါင်း ၁၀၀,၀၀၀ ကျော်မှာ ယေဟောဝါ သက်သေ ၈,၀၀၀,၀၀၀ ကျော် ရှိတယ်။ ယုံကြည်ချက်၊ လုပ်ဆောင်မှု တူကြတယ်။ ကမ္ဘာပေါ်မှာ မငြိမ်သက်မှု၊ စိတ်ဝမ်းကွဲမှုတွေ များနေပေမဲ့ ဘုရားလူမျိုး ဘာကြောင့် စည်းလုံးနေသလဲ။ “သစ္စာနဲ့ သတိပညာရှိတဲ့ ကျွန်၊” အုပ်ချုပ်ရေးအဖွဲ့ကတစ်ဆင့် အသင်းတော်ရဲ့ ဦးခေါင်း ယေရှုခရစ် ရှင်းလင်းပြတ်သားစွာ ညွှန်ကြားပေးနေလို့ပဲ။ (မ. ၂၄:၄၅-၄၇) ဒါ့အပြင် အုပ်ချုပ်ရေးအဖွဲ့ရဲ့ ညွှန်ကြားမှုကို ကမ္ဘာချီ ညီအစ်ကို အသင်းအပင်း တစ်ရပ်လုံး စိတ်လိုကိုယ်လျောက် လက်ခံလို့လည်း စည်းလုံးနေတာ။

“အားပေးစကားကြောင့် ဝမ်းသာ” (တ. ၁၅:၃၀-၃၅)

၁၅၊ ၁၆။ အုပ်ချုပ်ရေးအဖွဲ့ရဲ့ ညွှန်ကြားချက်ကို ညီအစ်ကိုတွေ ဘယ်လို တုံ့ပြန်ကြသလဲ။ ဘာကြောင့်လဲ။

^၁၅ ဂျေရုဆလင်မြို့က ကိုယ်စားလှယ် ညီအစ်ကိုတွေ အန္တိအုတ်မြို့ကို ရောက်တဲ့အခါ “တပည့်အားလုံးကို စုဝေးပြီး စာပေးလိုက်” ကြောင်း တမန်တော်ကျမ်းက ဖော်ပြတယ်။ အုပ်ချုပ်ရေးအဖွဲ့ရဲ့ ညွှန်ကြားချက်ကို အဲဒီက ညီအစ်ကိုတွေ ဘယ်လို တုံ့ပြန်ကြသလဲ။ “စာဖတ်ပြီးတဲ့အခါ စာမှာ ပါတဲ့ အားပေးစကားကြောင့် ဝမ်းသာသွားကြတယ်။” (တ. ၁၅:၃၀၊ ၃၁) ဒါ့အပြင် ယုဒနဲ့ သိလဟာ “ဟောပြောချက် အများကြီး ပေးပြီး ညီအစ်ကိုတွေကို အားပေးတယ်၊ ခိုင်ခံ့မြဲမြံစေကြတယ်။” ဘုရားအလိုတော် သိစေသူတွေကို ပရောဖက်တွေလို့ ခေါ်တယ်။ ဒါကြောင့် ဗာနဗ၊ ပေါလုနဲ့ တခြားသူတွေလို ယုဒနဲ့ သိလလည်း “ပရောဖက်တွေ” ပဲ။—တ. ၁၃:၁။ ၁၅:၃၂။ ထွ. ၇:၁၊ ၂။

^၁၆ ဒီအစီအစဉ်တစ်ခုလုံးအပေါ် ယေဟောဝါ ကောင်းချီးပေးတဲ့အတွက် ပြဿနာ ပြေလည်သွားတယ်။ အသင်းတော် အားရှိသွားတယ်။ အဓိက,ကတော့ ကျမ်းစာနဲ့ သန့်ရှင်းသော စွမ်းအားတော် လမ်းညွှန်မှုအပေါ် အခြေခံတဲ့ အုပ်ချုပ်ရေးအဖွဲ့ရဲ့ ရှင်းလင်းပြတ်သားတဲ့ အချိန်တန် ညွှန်ကြားချက်ကြောင့်ပါပဲ။ ဆုံးဖြတ်ချက်တွေကို အသင်းတော်တွေဆီ မေတ္တာပါပါ အသိပေးလို့လည်း ပါတယ်။

၁၇။ ဒီနေ့ခေတ် တိုက်နယ်ကြီးကြပ်မှူးတွေဟာ ပေါလု၊ ဗာနဗ၊ ယုဒ၊ သိလတို့နဲ့ ဘယ်လို တူကြသလဲ။

^၁၇ ဒီနေ့ခေတ် ယေဟောဝါသက်သေတွေရဲ့ အုပ်ချုပ်ရေးအဖွဲ့လည်း ကမ္ဘာချီ ညီအစ်ကို အသင်းအပင်းကို အချိန်တန် ညွှန်ကြားချက်တွေ ပေးနေတယ်။ ဆုံးဖြတ်ချက်တွေ ချပြီးရင် အသင်းတော်တွေကို ရှင်းရှင်းလင်းလင်း အသိပေးတယ်။ တစ်နည်းကတော့ တိုက်နယ်ကြီးကြပ်မှူး လည်ပတ်မှုအားဖြင့်ပါ။ ကိုယ်ကျိုးစွန့်တဲ့ အဲဒီညီအစ်ကိုတွေဟာ အသင်းတော် တစ်ခုပြီး တစ်ခု လည်ပတ်ပြီး ရှင်းလင်းတဲ့ ညွှန်ကြားချက်တွေ ပေးကြတယ်။ တရင်းတနှီး အားပေးကြတယ်။ ပေါလုနဲ့ ဗာနဗလိုပဲ အမှုဆောင်လုပ်ငန်းမှာ အချိန်များစွာ ပါဝင်ပြီး “ယေဟောဝါရဲ့ တရားစကားနဲ့ဆိုင်တဲ့ သတင်းကောင်းကို တခြားသူတွေနဲ့အတူ ဟောပြောသွန်သင်ကြတယ်။” (တ. ၁၅:၃၅) ယုဒနဲ့ သိလလိုပဲ “ဟောပြောချက် အများကြီး ပေးပြီး ညီအစ်ကိုတွေကို အားပေးတယ်၊ ခိုင်ခံ့မြဲမြံစေကြတယ်။”

၁၈။ ယေဟောဝါရဲ့ ကောင်းချီး ခံစားရဖို့ ဘုရားလူမျိုး ဘာလုပ်ရမလဲ။

^၁၈ စိတ်ဝမ်းကွဲပြားနေတဲ့ ဒီလောကမှာ အသင်းတော်တွေ စည်းလုံးငြိမ်သက်ဖို့ ဘာက ကူညီပေးသလဲ။ “အထက်က လာတဲ့ ဉာဏ်ပညာကို ပိုင်ဆိုင်တဲ့သူဟာ ဦးဆုံးအနေနဲ့ စင်ကြယ်တယ်။ ပြီးတော့ သင့်သင့်မြတ်မြတ် နေတတ်တယ်။ အကျိုးသင့်အကြောင်းသင့် ရှိတယ်။ နာခံဖို့ အသင့်ရှိတယ်။ . . . ဖြောင့်မတ်ခြင်း မျိုးစေ့ဟာ သင့်မြတ်စေသူအတွက် ငြိမ်သက်တဲ့ အခြေအနေမှာ ကြဲထားတယ်” ဆိုတဲ့ ကျမ်းစကားကို ရေးတာ တပည့် ယာကုပ် ဖြစ်ကြောင်း သတိရပါ။ (ယာ. ၃:၁၇၊ ၁၈) ဂျေရုဆလင်မြို့မှာ ကျင်းပခဲ့တဲ့ အစည်းအဝေးအကြောင်း တွေးမိပြီး ယာကုပ် ဒီလိုရေးတာ ဟုတ်မဟုတ် အတိအကျတော့ မသိဘူး။ ဒါပေမဲ့ တမန်တော် အခန်းကြီး ၁၅ မှာ ပါတဲ့ မှတ်တမ်းကနေ သိရတာက စည်းစည်းလုံးလုံး ပူးပေါင်းဆောင်ရွက်မှ ယေဟောဝါရဲ့ ကောင်းချီး ခံစားရမယ် ဆိုတာပဲ။

၁၉၊ ၂၀။ (က) အန္တိအုတ် အသင်းတော် ငြိမ်သက်စည်းလုံးသွားကြောင်း ဘာက ဖော်ပြသလဲ။ (ခ) အခု ပေါလုနဲ့ ဗာနဗ ဘာလုပ်နိုင်ပြီလဲ။

^၁၉ အန္တိအုတ် အသင်းတော် ငြိမ်သက်စည်းလုံးသွားပြီ။ ဂျေရုဆလင်မြို့က လာတဲ့ ယုဒနဲ့ သိလကို အငြင်းအခုံ လုပ်မယ့်အစား သူတို့ လာလည်ပတ်လို့ ကျေးဇူးတင်နေကြတယ်။ “သူတို့က ညီအစ်ကိုတွေနဲ့ အတန်ကြာနေပြီးတဲ့နောက် နှုတ်ဆက်ပြီး ဂျေရုဆလင်ကို ပြန်လာကြတယ်။”d (တ. ၁၅:၃၃) ခရီးစဉ်အကြောင်း သူတို့နှစ်ယောက် ပြောတာ ကြားတဲ့အခါ ဂျေရုဆလင်မြို့က ညီအစ်ကိုတွေ ဝမ်းသာကြမှာ သေချာတယ်။ ယေဟောဝါရဲ့ မဟာကရုဏာတော်ကြောင့် တာဝန်ကို သူတို့ အောင်အောင်မြင်မြင် ထမ်းဆောင်နိုင်ခဲ့ကြတယ်။

^၂၀ အခု၊ အန္တိအုတ်မြို့မှာ နေရစ်ခဲ့တဲ့ ပေါလုနဲ့ ဗာနဗ ဟောပြောခြင်းကို အာရုံစိုက် ဦးဆောင်ပေးနိုင်ကြပြီ။ ဒီနေ့ခေတ် တိုက်နယ်ကြီးကြပ်မှူးတွေ အသင်းတော်တွေဆီ လည်ပတ်တဲ့အခါ အဲဒီလိုပဲ။ (တ. ၁၃:၂၊ ၃) ယေဟောဝါရဲ့ လူမျိုးအတွက် တိုက်နယ်ကြီးကြပ်မှူးတွေဟာ တကယ့်ကောင်းချီးပဲ။ ဇွဲထက်သန်တဲ့ သတင်းကောင်း ဟောပြောသူ နှစ်ယောက်ကို ယေဟောဝါ ဘယ်လို ဆက်သုံးသလဲ၊ ဘယ်လို ကောင်းချီးပေးသလဲ။ နောက်အခန်းမှာ ကြည့်ကြစို့။