ထိရောက်တဲ့နိဒါန်းတွေ ပြင်ဆင်နိုင်ပုံ

၁။ စိတ်ဝင်စားဖို့ကောင်းတဲ့နိဒါန်းဖြစ်ဖို့ ဘာကြောင့်အရေးကြီးသလဲ။

^၁ အစားအစာဟာ အနံ့အရသာနဲ့ပြည့်စုံရင် စားချင်စိတ်ကိုဖြစ်ပေါ်စေသလိုပဲ စိတ်ဝင်စားစရာကောင်းတဲ့နိဒါန်းက ကျမ်းစာကို ဆက်ဆွေးနွေးချင်စိတ် ဖြစ်ပေါ်စေပါတယ်။ ထိရောက်တဲ့ နိဒါန်းကောင်းတွေဟာ ရှည်တာလည်းဖြစ်နိုင်တယ်၊ တိုတာလည်းဖြစ်နိုင်တယ်၊ အကြောင်းအရာလည်း အမျိုးမျိုးဖြစ်နိုင်တယ်။ ဘယ်လိုပဲဖြစ်ပါစေ အရသာရှိတဲ့ အစားအစာလိုပဲ ကြိုတင်စဉ်းစားမှုနဲ့ ပြင်ဆင်မှု လိုအပ်ပါတယ်။ (သု. ၁၅:၂၈) ဒါဆိုရင် ထိရောက်တဲ့နိဒါန်းကောင်းဖြစ်ဖို့ ဘယ်လိုပြင်ဆင်မလဲ။

၂။ စိတ်ဝင်စားဖို့ကောင်းတဲ့နိဒါန်း ဘယ်လိုပြင်ဆင်နိုင်သလဲ။

^၂ စိတ်ဝင်စားမယ့်အကြောင်းအရာ ရွေးချယ်ပါ– ကျွန်ုပ်တို့သုံးတဲ့နိဒါန်းကြောင့် အိမ်ရှင်ပိုစိတ်ဝင်စားလာနိုင်သလို စကားဆက်လည်း ပြတ်သွားနိုင်တယ်။ ဒါကြောင့် ပြင်ဆင်တဲ့အခါ အိမ်ရှင်စိတ်ဝင်စားမယ့် အကြောင်းအရာကို စဉ်းစားပါ။ ကောင်းတဲ့အုပ်ချုပ်မှု၊ ပျော်ရွှင်တဲ့မိသားစုဘဝ ဒါမှမဟုတ် စစ်မရှိတဲ့ကမ္ဘာ စတဲ့အကြောင်းအရာတွေကို ရပ်ကွက်ကလူတွေ စိတ်ဝင်စားကြသလား။ လူတွေဟာ သူတို့ရဲ့သဘောထားကို ပြောပြချင်ကြတဲ့အတွက် သူတို့ရဲ့အမြင်ကို ထုတ်ပြောလာစေတဲ့ မေးခွန်းတစ်ခု ပြင်ဆင်ထားပါ။ ကျွန်ုပ်တို့၏နိုင်ငံတော်ဓမ္မအမှု မှာပါတဲ့ နမူနာတင်ဆက်နည်းကို သုံးနိုင်သလား၊ ရက်ကွက်နဲ့အလိုက်သင့် ပြုပြင်ပြောင်းလဲပြီး သုံးနိုင်မလား။ မိသားစုဝတ်ပြုမှုညချမ်းမှာ အသုံးတည့်မယ့် နိဒါန်းတွေ ပြင်ဆင်တာကို တစ်ခါတစ်ခါ ပါဝင်စေပါ။

၃။ ရပ်ကွက်ကလူတွေရဲ့ ယဉ်ကျေးမှု၊ နောက်ခံနဲ့အညီ နိဒါန်းကို ဘယ်လို အလိုက်သင့်ပြုပြင်နိုင်ပါသလဲ။

^၃ ယဉ်ကျေးမှု၊ နောက်ခံတွေကို ထည့်စဉ်းစားပါ– တချို့ဒေသတွေမှာ ကျွန်ုပ်တို့ လာရတဲ့အကြောင်းရင်းကို တိုက်ရိုက်ပြောနိုင်တယ်။ တချို့ဒေသတွေမှာတော့ အိမ်ရှင်ရဲ့ အခြေအနေတွေကို အရင်မေးမြန်းတာ မလုပ်ဘူးဆိုရင် မယဉ်ကျေးရာရောက်တယ်။ ဒေသတချို့မှာတော့ သူတို့ရဲ့ဘာသာရေးနောက်ခံကြောင့် နိဒါန်းစကတည်းက သမ္မာကျမ်းစာကို လွတ်လွတ်လပ်လပ် သုံးလို့ရနိုင်တယ်။ (တ. ၂:၁၄-၁၇) ဒါပေမဲ့ ခရစ်ယာန်မဟုတ်တဲ့သူတွေ၊ ဘုရားမဲ့ဝါဒီတွေနဲ့ ပထမဆုံးစတွေ့ချိန်မှာ ကျမ်းစာသုံးမယ့်အစား ပြန်လည်ပတ်မှု လုပ်တဲ့အခါမှ ကျမ်းစာသုံးတာက ပိုကောင်းပါတယ်။—တ. ၁၇:၂၂-၂၃။

၄။ နိဒါန်းစကားလုံးတွေကို ဘယ်လို ပုံစံနဲ့ပြောမလဲ။

^၄ နိဒါန်းစကားလုံးများ– ဦးဆုံးပြောမယ့်စကားလုံးတွေကို အသေအချာပြင်ဆင်ပါ။ ရိုးရှင်းပြီး တိုတိုတုတ်တုတ်ပြောတာက အကောင်းဆုံးဖြစ်တယ်။ ပြောပုံပြောနည်းကလည်း အရေးကြီးပါတယ်။ စိတ်ပါလက်ပါပြောပါ။ အိမ်ရှင်ရဲ့အကျိုးကို တကယ်လိုလားတယ်ဆိုတာကို စိတ်အရင်းခံနဲ့ ခင်မင်ရင်းနှီးစွာ ပြောပါ။ ဒီအကြံပေးချက်တွေကို လိုက်နာမယ်ဆိုရင် စိတ်ဝင်စားဖို့ကောင်းတဲ့ နိဒါန်းတွေကို ပြင်ဆင်အသုံးပြုနိုင်ပြီး ရပ်ကွက်မှာရှိတဲ့သူတွေကို “ယေဟောဝါဘုရား၏စားပွဲ” မှာစားဖို့ သွေးဆောင်နိုင်ပါလိမ့်မယ်။—၁ ကော. ၁၀:၂၁။