ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
ဧပြီ ၂-၈
ကျမ်းစာထဲက အဖိုးတန်ဘဏ္ဍာများ | မဿဲ ၂၆
“ပသခါပွဲနဲ့ အောက်မေ့ရာပွဲ—ဆင်တူချက်များနဲ့ ကွာခြားချက်များ”
(မဿဲ ၂၆:၁၇-၂၀) တဆေးမဲ့မုန့်ပွဲတော် ပထမနေ့မှာ တပည့်တွေက ယေရှုဆီလာပြီး “ပသခါညစာကို ဘယ်မှာပြင်ဆင်ရမလဲ” လို့မေးတော့၊ ၁၈ ယေရှုက “မြို့ထဲသွားရင် လူတစ်ယောက်ကို တွေ့လိမ့်မယ်။ “‘ကျွန်တော် သေရမယ့်အချိန် နီးနေပြီ။ ခင်ဗျားရဲ့အိမ်မှာ တပည့်တွေနဲ့အတူ ပသခါပွဲလုပ်ချင်တယ်’ လို့ ဆရာမှာလိုက်တယ်” ဆိုပြီး သူ့ကိုပြောလိုက်” လို့ပြောတယ်။ ၁၉ တပည့်တွေလည်း ယေရှုမှာတဲ့အတိုင်း လုပ်ပြီး ပသခါပွဲအတွက် ပြင်ဆင်ကြတယ်။ ၂၀ ညဦးပိုင်းရောက်တော့ ယေရှုက တပည့် ၁၂ ယောက်နဲ့အတူ စားပွဲမှာ ထိုင်ပြီး၊
nwtsty မီဒီယာ
ပသခါညစာ
ပသခါညစာအတွက် လိုအပ်တာတွေက ကင်ထားတဲ့ သိုး (တိရစ္ဆာန်ရဲ့ အရိုးတစ်ချောင်းမှ မချိုးရ) (၁)၊ တဆေးမဲ့မုန့် (၂)၊ ဟင်းရွက်ခါးတွေ (၃) ဖြစ်တယ်။ (ထွ ၁၂:၅၊ ၈။ တော ၉:၁၁) မစ်ရှ်နာကျမ်းအရ ဟင်းရွက်ခါးတွေထဲမှာ ဆလတ်ရွက်၊ ချီကိုရီရွက်၊ ဒုဓလီရွက်တို့ ပါတယ်။ အဲဒါတွေက အီဂျစ်ပြည်မှာ ကြုံခဲ့ရတဲ့ ခါးသီးတဲ့ကျွန်ဘဝကို ပြန်သတိရစေတယ်။ ယေရှုက စုံလင်တဲ့ မိမိခန္ဓာကိုယ်ရဲ့ အထိမ်းအမှတ်အဖြစ် တဆေးမဲ့မုန့်ကို အသုံးပြုခဲ့တယ်။ (မ ၂၆:၂၆) တမန်တော်ပေါလုက ယေရှုကို “ပသခါသိုးသငယ်” လို့ခေါ်ခဲ့တယ်။ (၁က ၅:၇) ပထမရာစုရောက်တော့ ပသခါညစာမှာ ဝိုင် (၄) ကို ထည့်သုံးခဲ့ကြတယ်။ ယေရှုက ပူဇော်သက္ကာအဖြစ် သွန်းလောင်းမယ့် မိမိသွေးရဲ့ အထိမ်းအမှတ်အဖြစ် ဝိုင်ကို သုံးခဲ့တယ်။—မ ၂၆:၂၇၊ ၂၈။
(မဿဲ ၂၆:၂၆) သူတို့စားသောက်နေချိန်မှာ ယေရှုက မုန့်ကိုယူပြီး ဆုတောင်းတယ်။ မုန့်ကိုဖဲ့ပြီးနောက် “ယူစားကြပါ။ ဒါဟာ ကျွန်တော့်ကိုယ်ခန္ဓာကို ကိုယ်စားပြုတယ်” လို့ပြောပြီး တပည့်တွေကို ပေးတယ်။
nwtsty မ ၂၆:၂၆ လေ့လာမှု မှတ်စု
ကိုယ်စားပြု– ဂရိစကားလုံး အက်စ်တင် (“ဖြစ်သည်” လို့အဓိပ္ပာယ်ရှိ) မှာ “သဘောဆောင်၊ ပုံဆောင်၊ ရပ်တည်၊ တင်စား” ဆိုတဲ့ အဓိပ္ပာယ်ရှိတယ်။ စုံလင်တဲ့ ယေရှုရဲ့ ခန္ဓာကိုယ်ဟာ တမန်တော်တွေရှေ့မှာ ရှိနေလို့ သူတို့ စားတော့မယ့်မုန့်ရဲ့ အဓိပ္ပာယ်ကို သူတို့ သိမှန်း ထင်ရှားတယ်။ ဒါကြောင့် မုန့်ဟာ ယေရှုရဲ့ တကယ့်ကိုယ်ခန္ဓာကို ဆိုလိုတာ မဖြစ်နိုင်ဘူး။ မ ၁၂:၇ မှာလည်း အဲဒီဂရိစကားလုံးကို သုံးထားတယ်။ ဘာသာပြန်ကျမ်း အတော်များများမှာ “ကိုယ်စားပြု” လို့ ပြန်ဆိုထားတယ်။
(မဿဲ ၂၆:၂၇၊ ၂၈) အဲဒီနောက် ဝိုင်ခွက်ကိုယူ၊ ဘုရားသခင်ကို ကျေးဇူးတင်ချီးမွမ်းပြီး တပည့်တွေကို ပေးတယ်။ ပြီးတော့ “သောက်ကြပါ။ ၂၈ ဒါဟာ ကျွန်တော့်ရဲ့သွေးကို ကိုယ်စားပြုတယ်။ အပြစ်တွေ ခွင့်လွှတ်ခံရဖို့ လူအများအတွက် သွန်းလောင်းမယ့် ‘ပဋိညာဉ်နဲ့ဆိုင်တဲ့သွေး’ ပဲ။
nwtsty မ ၂၆:၂၈ လေ့လာမှု မှတ်စု
ပဋိညာဉ်နဲ့ဆိုင်တဲ့သွေး– ယေဟောဝါနဲ့ ဘိသိက်ခံခရစ်ယာန်တွေ ဖွဲ့တဲ့ ပဋိညာဉ်သစ်ဟာ ယေရှုရဲ့ ပူဇော်သက္ကာအားဖြင့် အတည်ဖြစ်ခဲ့တယ်။ (ဟီ ၈:၁၀) သိနာတောင်မှာ အစ္စရေးတွေနဲ့ ယေဟောဝါ ပညတ်ပဋိညာဉ် ဖွဲ့တာကို ဖြန်ဖြေသူအဖြစ် လုပ်ဆောင်ချိန်မှာ မောရှေ သုံးခဲ့တဲ့ အသုံးအနှုန်းကိုပဲ ယေရှု သုံးခဲ့တယ်။ (ထွ ၂၄:၈။ ဟီ ၉:၁၉-၂၁) နွားနဲ့ ဆိတ်ရဲ့သွေးက ဘုရားသခင်နဲ့ အစ္စရေးလူမျိူး ဖွဲ့တဲ့ ပညတ်ပဋိညာဉ်ကို အတည်ဖြစ်စေသလို ယေရှုရဲ့ သွေးက ယေဟောဝါနဲ့ ပုံဆောင်အစ္စရေးလူမျိုး ဖွဲ့တဲ့ ပဋိညာဉ်သစ်ကို အတည်ဖြစ်စေတယ်။ အဲဒီပဋိညာဉ်ဟာ အေဒီ ၃၃၊ ပင်တေကုတ္တေပွဲနေ့မှာ စတင်အကျိုးသက်ရောက်ခဲ့တယ်။—ဟီ ၉:၁၄၊ ၁၅။
ရှာဖွေလေ့လာ ဘုရားရေးရာရတနာ
(မဿဲ ၂၆:၁၇) တဆေးမဲ့မုန့်ပွဲတော် ပထမနေ့မှာ တပည့်တွေက ယေရှုဆီလာပြီး “ပသခါညစာကို ဘယ်မှာပြင်ဆင်ရမလဲ” လို့မေးတော့၊
nwtsty မ ၂၆:၁၇ လေ့လာမှု မှတ်စု
တဆေးမဲ့မုန့်ပွဲတော် ပထမနေ့– တဆေးမဲ့မုန့်ပွဲတော်ဟာ ပသခါပွဲနေ့ (နိသန် ၁၄) အပြီး နောက်တစ်ရက် နိသန်လ ၁၅ ရက်မှာ စပြီး ခုနစ်ရက်ကြာခဲ့တယ်။ (နောက်ဆက်တွဲ ခ၁၅ ကိုကြည့်ပါ။) ဒါပေမဲ့ ယေရှုအချိန်တုန်းက ပသခါပွဲကို တဆေးမဲ့မုန့်ပွဲနဲ့ တစ်ဆက်တည်း ကျင်းပခဲ့ကြတယ်။ ဒါကြောင့် နိသန် ၁၄ ရက်အပါအဝင် ရှစ်ရက်ကြာ ပွဲတော်ကို တစ်ခါတလေ “တဆေးမဲ့မုန့်ပွဲတော်” လို့ပဲ ခေါ်ကြတော့တယ်။ (လု ၂၂:၁) ဒီနေရာမှာ “ပထမနေ့” ဆိုတဲ့စကားစုကို “မတိုင်ခင်နေ့” လို့ ပြန်ဆိုနိုင်တယ်။ ဒါကြောင့် မူရင်းဂရိစကားနဲ့ ဂျုးထုံးစံအရ နိသန် ၁၃ ရက်နေ့မှာ တပည့်တွေက ယေရှုကို “ပသခါညစာကို ဘယ်မှာပြင်ဆင်ရမလဲ” လို့မေးပြီး အဲဒီနေ့ နေ့လည်ပိုင်းမှာ ပသခါပွဲအတွက် ပြင်ဆင်ခဲ့ကြတာဖြစ်မယ်။ နိသန် ၁၄ ရက်နေ့အစ ဖြစ်တဲ့ “ညဦးပိုင်းရောက်တော့” ပွဲတော် ကျင်းပခဲ့ကြတယ်။—မာ ၁၄:၁၆၊ ၁၇။
(မဿဲ ၂၆:၃၉) ရှေ့နားလေး သွားပြီး ပျပ်ဝပ်ရင်း “ကျွန်တော့်အဖ၊ ဖြစ်နိုင်မယ်ဆိုရင် ဒီခွက်ကို လွှဲဖယ်ပေးပါ။ ဒါပေမဲ့ ကျွန်တော့်ဆန္ဒအတိုင်း မဖြစ်ပါစေနဲ့။ အဖရဲ့ဆန္ဒအတိုင်းသာ ဖြစ်ပါစေ” လို့ဆုတောင်းတယ်။
nwtsty မ ၂၆:၃၉ လေ့လာမှု မှတ်စု
ဒီခွက်ကို လွှဲဖယ်ပေးပါ– ကျမ်းစာမှာ “ခွက်” ကို ဘုရားအလိုတော်၊ ဒါမှမဟုတ် လူတစ်ယောက်ကို “ပေးအပ်တဲ့တာဝန်” အဖြစ် တင်စားသုံးလေ့ရှိတယ်။ (nwtsty မ ၂၀:၂၂ လေ့လာမှု မှတ်စုကို ကြည့်ပါ။) ယေရှုက ရာဇဝတ်သားအဖြစ် မိမိရဲ့သေခြင်းကြောင့် ဘုရားသခင်ကို ရှုတ်ချစရာဖြစ်မှာ စိုးရိမ်နေလို့ ဒီ “ခွက်” ကို လွှဲဖယ်ပေးပါလို့ ဆုတောင်းတာ ဖြစ်မယ်။
ကျမ်းစာဖတ်ရှုခြင်း
(မဿဲ ၂၆:၁-၁၉) ယေရှုက အဲဒါတွေအားလုံး ပြောပြီးတဲ့နောက် တပည့်တွေကို၊ ၂ “ခင်ဗျားတို့သိတဲ့အတိုင်း နောက်နှစ်ရက်ဆိုရင် ပသခါပွဲတော် ရောက်တော့မယ်။ အဲဒီအခါ လူသားကို သစ်တိုင်ပေါ်တင်ပြီး သတ်ဖို့ အပ်လိမ့်မယ်” လို့ပြောတယ်။ ၃ ပုရောဟိတ်ကြီးနဲ့ အကြီးအကဲတွေက ကယာဖလို့ခေါ်တဲ့ ပုရောဟိတ်မင်းရဲ့ အိမ်ဝင်းထဲ စုဝေးနေကြတယ်။ ၄ ယေရှုကို အကွက်ဆင်ဖမ်းပြီး သတ်ဖို့ တိုင်ပင်ကြတယ်။ ၅ ဒါပေမဲ့ “ပွဲတော်အတွင်းမှာတော့ ဖမ်းလို့မဖြစ်ဘူး။ လူတွေ ရုတ်ရုတ်သဲသဲဖြစ်မှာ စိုးရိမ်တယ်” လို့ပြောကြတယ်။ ၆ ဗေသနိရွာက အနာကြီးရောဂါသည် ရှိမုန်ရဲ့အိမ်မှာ ယေရှုရှိနေတုန်း၊ ၇ အမျိုးသမီးတစ်ယောက်က တန်ဖိုးကြီးဆီမွှေးပါတဲ့ ကျောက်ဖြူဘူးကို ယူလာပြီး စားသောက်နေတဲ့ ယေရှုရဲ့ ခေါင်းပေါ် လောင်းလိုက်တယ်။ ၈ အဲဒါကိုမြင်တဲ့အခါ တပည့်တွေက စိတ်ဆိုးဆိုးနဲ့ “ဒါဖြုန်းတီးနေတာ။ ၉ အဲဒီဆီကို စျေးကြီးကြီးနဲ့ ရောင်းပြီး ဆင်းရဲသားတွေကို ပေးလို့ရတယ်” လို့ ပြောကြတယ်။ ၁၀ ဒါကို ယေရှုကြားတဲ့အခါ “ဒီအမျိုးသမီးကို ဘာလို့ နှောင့်ယှက်နေတာလဲ။ သူက ကျွန်တော့်ကို ကောင်းမှုပြုနေတာ။ ၁၁ ဆင်းရဲသားတွေဟာ ခင်ဗျားတို့နဲ့အတူ အမြဲရှိနေမှာပဲ။ ကျွန်တော်ကတော့ အမြဲရှိနေမှာ မဟုတ်ဘူး။ ၁၂ ဒီအမျိုးသမီး ကျွန်တော့်အပေါ် ဆီမွှေးလောင်းတာဟာ ကျွန်တော့်ကို သင်္ဂြိုဟ်ဖို့ ပြင်ဆင်နေတာ။ ၁၃ ကျွန်တော် မှန်တာကိုပြောမယ်။ သတင်းကောင်း ဟောလေရာ မြေတစ်ပြင်လုံးမှာ ဒီအမျိုးသမီးကို အမှတ်ရတဲ့အနေနဲ့ သူလုပ်ခဲ့တာတွေကို ပြောကြလိမ့်မယ်” လို့ပြောတယ်။ ၁၄ အဲဒီနောက် တမန်တော် ၁၂ ယောက်ထဲက ယုဒရှကာရုတ်က ပုရောဟိတ်ကြီးတွေဆီ သွားပြီး၊ ၁၅ “ယေရှုကို ခင်ဗျားတို့လက်ထဲ အပ်မယ်ဆိုရင် ဘယ်လောက်ပေးမလဲ” လို့မေးတော့ သူတို့က ငွေစ ၃၀ ပေးမယ်လို့ ကတိပေးတယ်။ ၁၆ အဲဒီနေ့ကစပြီး ယေရှုကို သစ္စာဖောက်အပ်နှံဖို့ သူ အခွင့်ကောင်း ရှာနေတော့တယ်။ ၁၇ တဆေးမဲ့မုန့်ပွဲတော် ပထမနေ့မှာ တပည့်တွေက ယေရှုဆီလာပြီး “ပသခါညစာကို ဘယ်မှာပြင်ဆင်ရမလဲ” လို့မေးတော့၊ ၁၈ ယေရှုက “မြို့ထဲသွားရင် လူတစ်ယောက်ကို တွေ့လိမ့်မယ်။ “‘ကျွန်တော် သေရမယ့်အချိန် နီးနေပြီ။ ခင်ဗျားရဲ့အိမ်မှာ တပည့်တွေနဲ့အတူ ပသခါပွဲလုပ်ချင်တယ်’ လို့ ဆရာမှာလိုက်တယ်” ဆိုပြီး သူ့ကိုပြောလိုက်” လို့ပြောတယ်။ ၁၉ တပည့်တွေလည်း ယေရှုမှာတဲ့အတိုင်း လုပ်ပြီး ပသခါပွဲအတွက် ပြင်ဆင်ကြတယ်။
ဧပြီ ၉-၁၅
ကျမ်းစာထဲက အဖိုးတန်ဘဏ္ဍာများ | မဿဲ ၂၇-၂၈
“သွားပြီး တပည့်ဖြစ်အောင် သွန်သင်ပေးကြပါ —ဘာကြောင့်လဲ၊ ဘယ်မှာလဲ၊ ဘယ်နည်းနဲ့လဲ”
(မဿဲ ၂၈:၁၈) ယေရှုက တပည့်တွေအနား သွားပြီး “ကောင်းကင်မှာရော မြေကြီးမှာပါ အခွင့်အာဏာရှိသမျှကို ကျွန်တော့်ကို ပေးထားပြီ။
‘သွား၍ တပည့်ဖြစ်စေကြလော့’
၄ ယေရှုသည် အသင်းတော်အပေါ် အခွင့်တန်ခိုးရှိ၏၊ ၁၉၁၄ ခုနှစ်ကတည်းက တည်ထောင်ခါစ ဘုရားသခင့်နိုင်ငံတော်အပေါ် အခွင့်တန်ခိုးရရှိခဲ့သည်။ (ကောလောသဲ ၁:၁၃; ဗျာ. ၁၁:၁၅) ကိုယ်တော်သည် ကောင်းကင်တမန်မင်းဖြစ်တော်မူရာ သန်းရာနှင့်ချီကောင်းကင်တမန်များပါဝင်သည့် ကောင်းကင်တပ်အပေါ် အခွင့်တန်ခိုးရှိ၏။ (၁ သက်သာလောနိတ် ၄:၁၆; ၁ ပေတရု ၃:၂၂; ဗျာဒိတ် ၁၉:၁၄-၁၆) ခမည်းတော်သည် ဖြောင့်မတ်သောမူများကို ဆန့်ကျင်သည့် “အထွတ်အမြတ်အာဏာတန်ခိုးအမျိုးမျိုးကို” ဖျက်ဆီးနိုင်ခွင့်တန်ခိုးအာဏာ ကိုယ်တော်အား အပ်နှင်းထားသည်။ (၁ ကောရိန္သု ၁၅:၂၄-၂၆; ဧဖက် ၁:၂၀-၂၃) ယေရှု၏အခွင့်တန်ခိုးသည် သက်ရှိများအပေါ်သာ ကန့်သတ်ထားသည်မဟုတ်။ ကိုယ်တော်သည် “အသက်ရှင်သောသူတို့နှင့် သေသောသူတို့ကို တရားစီရင်သောသခင်” လည်းဖြစ်ရာ သေခြင်း၌အိပ်ပျော်နေသူများကို ရှင်ပြန်ထမြောက်ပေးရန် ဘုရားသခင်ပေးတန်ခိုးအာဏာ ရရှိထား၏။ (တမန်တော် ၁၀:၄၂; ယောဟန် ၅:၂၆-၂၈) ဤမျှတန်ခိုးအာဏာကြီးမားသူ၏မိန့်မှာချက်ကို အရေးတကာ့အရေးကြီးဆုံးအဖြစ် ရှုမြင်သင့်သည်။ ထို့ကြောင့် ကျွန်ုပ်တို့သည် ‘သွား၍တပည့်ဖြစ်စေကြ’ ဟူသော ခရစ်တော်၏မိန့်မှာချက်ကို လေးစားစွာ တလိုတလားနာခံကြသည်။
(မဿဲ ၂၈:၁၉) ဒါကြောင့် လူမျိုးတကာဆီ သွားပြီး လူတွေကို ကျွန်တော့်တပည့် ဖြစ်လာအောင် သွန်သင်ပေးကြပါ။ အဖဘုရားရဲ့နာမည်၊ သားတော်ရဲ့နာမည်၊ သန့်ရှင်းသော စွမ်းအားတော်ရဲ့နာမည်နဲ့ နှစ်ခြင်းပေးကြပါ။
nwtsty မ ၂၈:၁၉ လေ့လာမှု မှတ်စု
တပည့်ဖြစ်လာအောင်– ဂရိကြိယာ ma·the·teuʹo ဟာ တပည့်၊ နောက်လိုက်ဖြစ်စေဖို့ ရည်ရွယ်ပြီး “သွန်သင်တယ်” ဆိုတဲ့အဓိပ္ပာယ် ရှိတယ်။ (မ ၁၃:၅၂ မှာ “သင်” လို့ပြန်ဆိုထားတဲ့ အသုံးအနှုန်းနဲ့ နှိုင်းယှဉ်ပါ။) “နှစ်ခြင်းပေး” နဲ့ “သွန်သင်ပေး” ဆိုတဲ့ ကြိယာတွေက “တပည့်ဖြစ်လာအောင်” လုပ်ပါဆိုတဲ့ မိန့်မှာချက်မှာ ဘာတွေပါဝင်ကြောင်း ဖော်ပြတယ်။
လူမျိုးတကာ– လူမျိုးတကာလို့ ပြန်ဆိုပေမဲ့ အထက်အောက်စကားအရ ဒီအသုံးအနှုန်းဟာ လူမျိုးအားလုံးထဲက လူတွေကို ဆိုလိုတယ်။ “လူမျိုးတကာ” ဆီရောက်ဖို့ဆိုတဲ့ မိန့်မှာချက်ဟာ အသစ်ဖြစ်တယ်။ ယေရှု အမှုဆောင်ချိန်မတိုင်ခင်က လူမျိုးခြားတွေ အစ္စရေးတွေနဲ့ ပူးပေါင်းပြီး ယေဟောဝါအမှုဆောင်နိုင်တယ်လို့ ကျမ်းစာမှာ ဖော်ပြထားတယ်။ (၁ဘု ၈:၄၁-၄၃) ဒါပေမဲ့ ဒီလို ယေရှု အမိန့်ပေးတာက ဂျူးလူမျိုးအပြင် တခြားလူမျိုးတွေကိုပါ ဟောပြောဖို့ တာဝန်ပေးနေတာဖြစ်တယ်။ ခရစ်ယာန်တပည့်ဖြစ်စေခြင်းလုပ်ငန်းဟာ ကမ္ဘာတစ်ခွင်လုံးကို ပျံ့နှံ့မှာဖြစ်ကြောင်း အလေးပေးဖော်ပြနေတာဖြစ်တယ်။—မ ၁၀:၁၊ ၅-၇။ ဗ ၇:၉။ nwtsty မ ၂၄:၁၄ လေ့လာမှု မှတ်စုကို ကြည့်ပါ။
(မဿဲ ၂၈:၂၀) ကျွန်တော် မိန့်မှာထားသမျှကို လိုက်နာဖို့ သွန်သင်ပေးကြပါ။ လောကစနစ်နိဂုံးပိုင်း အထိ ခင်ဗျားတို့နဲ့အတူ ကျွန်တော် အမြဲရှိနေမယ်” လို့ပြောတယ်။
nwtsty မ ၂၈:၂၀ လေ့လာမှု မှတ်စု
သွန်သင်ပေးကြ– “သွန်သင်” လို့ပြန်ဆိုတဲ့ ဂရိစကားလုံးမှာ ညွှန်ကြား၊ ရှင်းပြ၊ အချေအတင် ပြောဆိုပြသ၊ သက်သေပြတာတွေ ပါတယ်။ (nwtsty မာ ၃:၁။ ၄:၂၃ လေ့လာမှု မှတ်စုကို ကြည့်ပါ။) ယေရှု မိန့်မှာထားသမျှကို လိုက်နာဖို့ သွန်သင်ပေးခြင်းဟာ ဆက်လုပ်ဆောင်ရမယ့်အရာဖြစ်တယ်။ အဲဒီအထဲမှာ ယေရှု သွန်သင်ပေးတာကို သင်ပေးခြင်း၊ သွန်သင်ချက်တွေကို လိုက်နာခြင်း၊ ယေရှုရဲ့ စံနမူနာအတိုင်း လိုက်လျှောက်ခြင်းတို့ ပါဝင်တယ်။—ယဟ ၁၃:၁၇။ ဧ ၄:၂၁။ ၁ပ ၂:၂၁။
ရှာဖွေလေ့လာ ဘုရားရေးရာရတနာ
(မဿဲ ၂၇:၅၁) အဲဒီအချိန်မှာ ဗိမာန်တော် ကန့်လန့်ကာဟာ အထက်အောက် နှစ်ခြမ်းကွဲသွားတယ်။ ငလျင်လှုပ်လာပြီး ကျောက်ဆောင်တွေ အက်ကွဲသွားတယ်။
nwtsty မ ၂၇:၅၁ လေ့လာမှု မှတ်စု
ကန့်လန့်ကာ– တင့်တယ်လှပအောင် စီခြယ်ထားတဲ့ ဒီကန့်လန့်ကာဟာ ဗိမာန်တော်ရဲ့ အသန့်ရှင်းဆုံးအခန်းနဲ့ သန့်ရှင်းရာအခန်းကို ကန့်ထားတယ်။ ဂျုးထုံးစံအရ ဒီလေးလံလှတဲ့ ကန့်လန့်ကာဟာ အရှည် ၁၈ မီတာ (ပေ ၆၀)၊ အနံ ၉ မီတာ (ပေ ၃၀)၊ အထူ ၇.၄ စင်တီမီတာ (၂.၉ လက်မ) ရှိတယ်။ ကန့်လန့်ကာကို နှစ်ခြမ်း ဆုတ်လိုက်တာက သားတော်ကို သတ်သူတွေအပေါ် ယေဟောဝါ ဒေါသထွက်ကြောင်း ဖော်ပြရုံမက အခု ကောင်းကင်ကို ဝင်ခွင့်ရပြီဆိုတဲ့ အဓိပ္ပာယ်လည်း ရှိတယ်။—ဟီ ၁၀:၁၉၊ ၂၀။ ခက်ဆစ်ကို ကြည့်ပါ။
သန့်ရှင်းရာဌာန– ဒီနေရာမှာ ဂရိစကားလုံး နာ.အော့စ်ဟာ သန့်ရှင်းရာအခန်းနဲ့ အသန့်ရှင်းဆုံးအခန်း ပါဝင်တဲ့ အဓိက အဆောက်အအုံကို ဆိုလိုတယ်။
(မဿဲ ၂၈:၇) ‘သူ သေရာကနေ အသက်ပြန်ရှင်လာပြီ။ ဂါလိလဲနယ်ကို အရင်သွားနှင့်ပြီ။ အဲဒီမှာ သူ့ကို တွေ့ရလိမ့်မယ်’ ဆိုပြီး တပည့်တွေကို အမြန်သွားပြောလိုက်။ ဒီအကြောင်းပြောဖို့ ကျွန်တော်လာခဲ့တာ” လို့ပြောတယ်။
nwtsty မ ၂၈:၇ လေ့လာမှု မှတ်စု
သူ သေရာက ပြန်ရှင်လာပြီဆိုပြီး တပည့်တွေကို ပြောပါ– ဒီအမျိုးသမီးတွေဟာ ယေရှု ရှင်ပြန်ထမြောက်ပြီလို့ အသိပေးခံရတဲ့ ပထမဆုံးပုဂ္ဂိုလ်တွေလောက်သာ မဟုတ်ဘဲ တခြားတပည့်တွေကို အသိပေးဖို့လည်း ညွှန်ကြားခံရသူတွေဖြစ်တယ်။ (မ ၂၈:၂၊ ၅၊ ၇) ကျမ်းစာနဲ့မညီတဲ့ ဂျူးထုံးစံမှာ အမျိုးသမီးတစ်ယောက်ဟာ တရားရုံးမှာ သက်သေထွက်ဆိုခွင့် မရှိဘူး။ ဒါပေမဲ့ ယေဟောဝါရဲ့ ကောင်းကင်တမန်ကျတော့ အမျိုးသမီးတွေကို ပျော်စရာ တာဝန်ပေးပြီး ဂုဏ်တင်ခဲ့တယ်။
ကျမ်းစာဖတ်ရှုခြင်း
(မဿဲ ၂၇:၃၈-၅၄) အဲဒီနောက် ဓားပြနှစ်ယောက်ကို ယေရှုရဲ့ ညာဘက်မှာ တစ်ယောက်၊ ဘယ်ဘက်မှာ တစ်ယောက် သစ်တိုင်ပေါ်တင်ကြတယ်။ ၃၉ ဖြတ်သန်းသွားလာသူတွေက ယေရှုကို ကဲ့ရဲ့ကြတယ်။ ခေါင်းတခါခါ လုပ်ပြီး၊ ၄၀ “ဗိမာန်တော်ကို ဖြိုဖျက်ပြီး သုံးရက်အတွင်း ပြန်ဆောက်မယ့်သူ၊ ကိုယ့်ကိုယ်ကိုယ် ကယ်ပါတော့လား။ ဘုရားသခင်ရဲ့သား မှန်ရင် သစ်တိုင်ပေါ်ကနေ ဆင်းလေ” လို့ပြောတယ်။ ၄၁ ပုရောဟိတ်ကြီးတွေ၊ ကျမ်းတတ်တွေ၊ အကြီးအကဲတွေကလည်း ယေရှုကို ဝိုင်းလှောင်ပြီး၊ ၄၂ “ဒီလူ၊ တခြားသူကိုတော့ ကယ်နိုင်ပါရဲ့။ ကိုယ့်ကိုယ်ကိုယ်တော့ မကယ်နိုင်ပါလား။ သူဟာ အစ္စရေးဘုရင်ပဲ။ သစ်တိုင်ပေါ်က အခု ဆင်းလာပါစေ။ ဒါဆို သူ့ကို ကျုပ်တို့ယုံကြည်မယ်။ ၄၃ ဘုရားသခင်ကို သူ အားကိုးတာပဲ။ ‘ငါဟာ ဘုရားသခင်ရဲ့သားပဲ’ လို့ပြောတဲ့အတွက် သူ့ကို ဘုရားကယ်ချင်ရင် ကယ်ပါစေ” လို့ခနဲ့တယ်။ ၄၄ ဘေးမှာ သစ်တိုင်တင်ခံရတဲ့ ဓားပြတွေတောင် ယေရှုကို အဲဒီလိုပဲ ကဲ့ရဲ့ပြောဆိုကြတယ်။ ၄၅ မွန်းတည့် ၁၂ နာရီ ကနေ မွန်းလွဲ ၃ နာရီ အထိ တစ်ပြည်လုံး အမှောင်ကျသွားတယ်။ ၄၆ မွန်းလွဲ ၃ နာရီလောက်မှာ ယေရှုက “ဧလိ၊ ဧလိ၊ လာမာ ရှာဗတ်ခသာနိ” လို့ အော်ပြောတယ်။ “ကျွန်တော့်ဘုရား၊ ကျွန်တော့်ဘုရား၊ ကျွန်တော့်ကို ဘာလို့ စွန့်ပစ်တာလဲ” ဆိုတဲ့အဓိပ္ပာယ်ပဲ။ ၄၇ ဒါကိုကြားတော့ အဲဒီမှာရပ်နေသူတချို့က “သူ ဧလိယကို ခေါ်နေတာ” လို့ပြောကြတယ်။ ၄၈ တစ်ယောက်က ခပ်သုတ်သုတ် ပြေးသွားပြီး ရေမြှုပ်ကို ယူ၊ အချဉ်ပေါက်နေတဲ့ဝိုင်ထဲ နှစ်လိုက်တယ်။ ပြီးတော့ ရေမြှုပ်ကို ကျူရိုးထိပ်မှာတပ်ပြီး ယေရှုကို သောက်ခိုင်းတယ်။ ၄၉ ကျန်တဲ့လူတွေက “နေပါစေ၊ သူ့ကို ဧလိယ လာကယ်မကယ် စောင့်ကြည့်ရအောင်” လို့ပြောကြတယ်။ ၅၀ ယေရှုက နောက်တစ်ကြိမ် အကျယ်ကြီး အော်ပြီးနောက် အသက်ထွက်သွားတယ်။ ၅၁ အဲဒီအချိန်မှာ ဗိမာန်တော် ကန့်လန့်ကာဟာ အထက်အောက် နှစ်ခြမ်းကွဲသွားတယ်။ ငလျင်လှုပ်လာပြီး ကျောက်ဆောင်တွေ အက်ကွဲသွားတယ်။ ၅၂ သင်္ချိုင်းဂူတွေ ပွင့်ထွက်ပြီး သေဆုံးသွားတဲ့ သန့်ရှင်းသူတွေရဲ့ အလောင်းတွေ ပေါ်လာတာကို၊ ၅၃ လူအများကြီး မြင်ရတယ်။ (ယေရှု အသက်ပြန်ရှင်လာပြီးချိန်မှာ လူတချို့ သင်္ချိုင်းဂူတွေကြားကနေ ထွက်ပြီး သန့်ရှင်းတဲ့မြို့ထဲ ဝင်သွားတယ်။) ၅၄ ယေရှုကို စောင့်ကြပ်နေတဲ့ တပ်မှူးနဲ့ အပေါင်းပါတွေက ငလျင်လှုပ်တာ၊ ဖြစ်ပျက်နေတာတွေကို မြင်တဲ့အခါ ကြောက်လန့်သွားပြီး “သေချာတယ်၊ သူဟာ ဘုရားသခင်ရဲ့သားပဲ” လို့ပြောကြတယ်။
ဧပြီ ၁၆-၂၂
ကျမ်းစာထဲက အဖိုးတန်ဘဏ္ဍာများ | မာကု ၁-၂
“မင်းရဲ့အပြစ်တွေကို ခွင့်လွှတ်လိုက်ပြီ”
(မာကု ၂:၃-၅) အဲဒီအချိန်မှာ လေဖြတ်နေသူတစ်ယောက်ကို လူလေးယောက် ထမ်းခေါ်လာတယ်။ ၄ လူတွေ ကြိတ်ကြိတ်တိုးနေလို့ ယေရှုဆီကို ဝင်သွားလို့မရဘူး။ ဒါနဲ့ ယေရှုရဲ့ အပေါ်တည့်တည့်ကနေ အိမ်မိုးကိုဖောက်ပြီး လေဖြတ်နေသူကို ထမ်းစင်နဲ့ လျှောချကြတယ်။ ၅ ယေရှုက သူတို့ရဲ့ယုံကြည်ခြင်းကို မြင်တဲ့အခါ လေဖြတ်နေသူကို “ငါ့သား၊ မင်းရဲ့အပြစ်တွေကို ခွင့်လွှတ်လိုက်ပြီ” လို့ပြောတယ်။
“မင်းရဲ့အပြစ်တွေကို ခွင့်လွှတ်လိုက်ပြီ”
လူတွေ ပြည့်ကျပ်နေတဲ့ အခန်းထဲမှာ ယေရှု သွန်သင်နေတုန်း လေဖြတ်နေသူ တစ်ယောက်ကို လူလေးယောက် ထမ်းခေါ်လာတယ်။ သူတို့ရဲ့ မိတ်ဆွေကို ကုသပေးစေချင်ပေမဲ့ လူအုပ်ကြောင့် ‘ယေရှုရှိရာကို ဝင်လာလို့မရဘူး။’ (မာကု ၂:၄၊ ကဘ) သူတို့ တော်တော်လေး စိတ်ညစ်သွားမှာပဲ။ ဒါနဲ့ အိမ်မိုးပေါ်တက်ပြီး မျက်နှာကြက်ကို ဖောက်လိုက်တယ်။ ပြီးတော့ လေဖြတ်နေသူကို ထမ်းစင်နဲ့ လျှောချကြတယ်။
အဲဒီလိုလုပ်တာကို ယေရှု စိတ်ဆိုးသလား။ လုံး၀စိတ်မဆိုးဘူး။ သူတို့ရဲ့ယုံကြည်ခြင်းကို အရမ်းအထင်ကြီးလေးစားသွားတဲ့အတွက် လေဖြတ်နေသူကို ‘မင်းရဲ့အပြစ်တွေကို ခွင့်လွှတ်လိုက်ပြီ’ လို့ပြောတယ်။ (မဿဲ ၉:၂၊ ကဘ) ယေရှုက တကယ်ပဲ အပြစ်တွေကို ခွင့်လွှတ်ပေးနိုင်သလား။ ဖာရိရှဲနဲ့ကျမ်းတတ်တချို့က ‘ဒီလူ ဘာလို့ အဲဒီလိုပြောတာလဲ။ ဘုရားကို စော်ကားပြောဆိုနေတာပဲ။ ဘုရားကလွဲရင် ဘယ်သူ အပြစ်လွှတ်ပိုင်ခွင့်ရှိလို့လဲ’ ဆိုပြီး တွေးနေကြတယ်။—မာကု ၂:၇၊ ကဘ။
ယေရှုက သူတို့ဘာတွေးနေမှန်း သိတဲ့အတွက် ‘ခင်ဗျားတို့ ဘာလို့ ဒီလိုတွေးနေတာလဲ။ လေဖြတ်နေသူကို “မင်းရဲ့အပြစ်တွေကို ခွင့်လွှတ်လိုက်ပြီ” လို့ပြောတာနဲ့ “ထပါ။ ထမ်းစင်ကိုသယ်ပြီး လမ်းလျှောက်ပါ” လို့ပြောတာ ဘယ်ဟာက ပိုပြောလွယ်သလဲ’ လို့မေးလိုက်တယ်။ (မာကု ၂:၈၊ ၉၊ ကဘ) မှန်ပါတယ်၊ ယေရှုဟာ အချိန်တန်ရင် သူ့ပေးဆက်မယ့်ပူဇော်သက္ကာအပေါ် အခြေပြုပြီး အဲဒီလူရဲ့ အပြစ်တွေကို ခွင့်လွှတ်ပေးနိုင်တယ်။
(မာကု ၂:၆-၁၂) အဲဒီမှာထိုင်နေတဲ့ ကျမ်းတတ်တချို့က၊ ၇ “ဒီလူ ဘာလို့ အဲဒီလိုပြောတာလဲ။ ဒါဟာ ဘုရားကို စော်ကားပြောဆိုနေတာပဲ။ ဘုရားသခင်ကလွဲရင် ဘယ်သူ အပြစ်လွှတ်ပိုင်ခွင့် ရှိလို့လဲ” ဆိုပြီး တွေးနေကြတယ်။ ၈ ယေရှုက သူတို့ဘာတွေးနေမှန်း ချက်ချင်းသိတဲ့အတွက် “ဘာလို့ ဒီလိုတွေးနေကြတာလဲ။ ၉ လေဖြတ်နေသူကို ‘မင်းရဲ့အပြစ်တွေကို ခွင့်လွှတ်လိုက်ပြီ’ လို့ပြောတာနဲ့ ‘ထပါ။ ထမ်းစင်ကိုသယ်ပြီး လမ်းလျှောက်ပါ’ လို့ပြောတာ ဘယ်ဟာက ပိုပြောလွယ်သလဲ။ ၁၀ လူသားဟာ ကမ္ဘာပေါ်မှာ အပြစ်လွှတ်ပိုင်ခွင့်ရှိမှန်း ခင်ဗျားတို့သိအောင် သက်သေပြမယ်” ဆိုပြီး လေဖြတ်နေသူကို၊ ၁၁ “ကျွန်တော်ပြောမယ်။ ထပါ။ ထမ်းစင်ကိုသယ်ပြီး အိမ်ပြန်တော့” လို့ပြောတယ်။ ၁၂ ချက်ချင်းပဲ အဲဒီလူက ထရပ်ပြီး ထမ်းစင်ကိုသယ်ရင်း ထွက်သွားတယ်။ လူတွေလည်း တအံ့တဩနဲ့ “ဒါမျိုး တစ်ခါမှ မမြင်ဖူးဘူး” ဆိုပြီး ဘုရားဘုန်းတော်ကို ချီးမွမ်းကြတယ်။
nwtsty မာ ၂:၉ လေ့လာမှု မှတ်စု
ဘယ်ဟာက ပိုပြောလွယ်သလဲ– အပြစ်ကို ခွင့်လွှတ်ပေးနိုင်တဲ့ အခွင့်အာဏာရှိကြောင်း မြင်နိုင်တဲ့ အထောက်အထား ပြစရာမလိုတဲ့အခြေအနေမှာ အပြစ်တွေကို ခွင့်လွှတ်လိုက်ပြီလို့ ပြောတာက ပိုလွယ်တယ်။ ဒါပေမဲ့ ထ . . . ပြီး လမ်းလျှောက်ပါ လို့ ပြောလိုက်ရင် အပြစ်ကို ခွင့်လွှတ်ပေးနိုင်တဲ့ အခွင့်အာဏာ ယေရှုမှာရှိကြောင်း လူအားလုံး တွေ့မြင်နိုင်တဲ့ အံ့ဖွယ်အမှု ထပ်လုပ်ပြရဦးမှာဖြစ်တယ်။ ဖျားနာမှုက အပြစ်ကြောင့် ဆိုတာကို ဒီအဖြစ်အပျက်နဲ့ ဟေရှာယ ၃၃:၂၄ က ဖော်ပြတယ်။
ရှာဖွေလေ့လာ ဘုရားရေးရာရတနာ
(မာကု ၁:၁၁) ပြီးတော့ “မင်းဟာ ငါမြတ်နိုးတဲ့ ငါ့ရဲ့ချစ်သားပဲ” ဆိုတဲ့အသံ ကောင်းကင်က ထွက်လာတယ်။
nwtsty မာ ၁:၁၁ လေ့လာမှု မှတ်စု
ကောင်းကင်ကနေ ထွက်ပေါ်လာတဲ့ အသံ– လူသားတွေကို ယေဟောဝါ တိုက်ရိုက်စကားပြောတဲ့အကြောင်း ခရစ်ဝင်ကျမ်းမှတ်တမ်း သုံးခုထဲက ပထမတစ်ခုဖြစ်တယ်။—nwtsty မာ ၉:၇။ ယဟ ၁၂:၂၈ လေ့လာမှု မှတ်စုကို ကြည့်ပါ။
မင်းဟာ ငါ့ရဲ့သားပဲ– နာမ်ဝိညာဉ်သားဖြစ်ခဲ့တဲ့ ယေရှုဟာ ဘုရားသားဖြစ်တယ်။ (ယဟ ၃:၁၆) ယေရှုဟာ လူသားအဖြစ် မွေးလာချိန်ကတည်းက စုံလင်တဲ့ အာဒံလိုပဲ “ဘုရားသခင်ရဲ့သား” ဖြစ်ခဲ့တယ်။ (လု ၁:၃၅။ ၃:၃၈) ဒါပေမဲ့ ဘုရားရဲ့ ဒီစကားတွေက ယေရှုဟာ ဘယ်သူဘယ်ဝါဖြစ်တယ်ဆိုတာ ဖော်ပြရုံထက်မကဘူး။ အဲဒီထုတ်ဖော်ပြောဆိုချက်အပြင် သူ့အပေါ် သန့်ရှင်းသောစွမ်းအားတော် သွန်းလောင်းပေးတာက လူသား ယေရှုဟာ ဘုရားသခင်ရဲ့နာမ်ဝိညာဉ် သားဖြစ်ကြောင်း၊ ကောင်းကင်ဆီ ရှင်ပြန်ထမြောက်သွားမယ့် မျှော်လင့်ချက်နဲ့ “တစ်ဖန်မွေးဖွား” ခံရသူဖြစ်ကြောင်း၊ ဘုရားရဲ့ ခန့်အပ်ခံ ဘုရင်နဲ့ ပုရောဟိတ်ဖြစ်ဖို့ စွမ်းအားတော်နဲ့ ဘိသိက်ပေးခံရသူဖြစ်ကြောင်း ဖော်ပြတယ်။—ယဟ ၃:၃-၆။ ၆:၅၁။ ဒီကျမ်းချက်တွေနဲ့ နှိုင်းယှဉ်ပါ– လု ၁:၃၁-၃၃။ ဟီ ၂:၁၇။ ၅:၁၊ ၄-၁၀။ ၇:၁-၃။
ငါ့ရဲ့ချစ်သား– ဒါမှမဟုတ် “မင်းကို နှစ်သက်တယ်။ သဘောကျတယ်။” မ ၁၂:၁၈ မှာပါတဲ့ ထပ်တူအသုံးအနှုန်းက ကတိပြုထားတဲ့ မေရှိယ၊ ခရစ်တော်နဲ့ ပတ်သက်တဲ့ ရှာ ၄၂:၁ ကို ကိုးကားတာဖြစ်တယ်။ သန့်ရှင်းသောစွမ်းအားတော် သွန်းလောင်းတာ၊ မိမိသားနဲ့ပတ်သက်ပြီး ဘုရား ထုတ်ဖော်ပြောဆိုတာက ယေရှုဟာ ကတိပြုထားတဲ့ မေရှိယဖြစ်ကြောင်း ရှင်းရှင်းလင်းလင်း ဖော်ပြတယ်။—nwtsty မ ၃:၁၇။ ၁၂:၁၈ လေ့လာမှု မှတ်စုကို ကြည့်ပါ။
(မာကု ၂:၂၇၊ ၂၈) ပြီးတော့ “ဥပုသ်နေ့ဟာ လူအတွက် ဖြစ်လာတာ။ လူဟာ ဥပုသ်နေ့အတွက် ဖြစ်လာတာ မဟုတ်ဘူး။ ၂၈ လူသားဟာ ဥပုသ်နေ့ရဲ့သခင်ပဲ” လို့ဆက်ပြောတယ်။
nwtsty မာ ၂:၂၈ လေ့လာမှု မှတ်စု
ဥပုသ်နေ့ရဲ့သခင်– ယေရှုက မိမိကိုယ်ကို အဲဒီလို ခေါ်ခြင်းအားဖြင့် (မ ၁၂:၈။ လု ၆:၅) ကောင်းကင်ဖခင် ခိုင်းထားတဲ့အလုပ်ကို လုပ်ဖို့ ဥပုသ်နေ့ကို လိုသလိုသုံးပိုင်ခွင့်ရှိကြောင်း ဖော်ပြခဲ့တယ်။ (ယောဟန် ၅:၁၉။ ၁၀:၃၇၊ ၃၈ နဲ့နှိုင်းယှဉ်ပါ။) ယေရှုဟာ ဥပုသ်နေ့မှာ လူနာတွေကို ကုသပေးခြင်းအပါအဝင် ထင်ရှားတဲ့ အံ့ဖွယ်အမှုတွေ လုပ်ပြခဲ့တယ်။ (လု ၁၃:၁၀-၁၃။ ယောဟန် ၅:၅-၉။ ၉:၁-၁၄) ဒါက နိုင်ငံတော် အုပ်ချုပ်မှုအောက်မှာ ရရှိမယ့် လွတ်မြောက်မှုတွေကို တင်ကူးဖော်ပြတယ်။ အဲဒါဟာ ဥပုသ်နေ့မှာ အနားယူတာနဲ့ တူတယ်။—ဟီ ၁၀:၁။
ကျမ်းစာဖတ်ရှုခြင်း
(မာကု ၁:၁-၁၅) ဘုရားသခင်ရဲ့သား ယေရှုခရစ်အကြောင်း သတင်းကောင်းအစကတော့– ၂ ပရောဖက် ဟေရှာယက “(ငါ့စေတမန်ကို မင်းရှေ့မှာ စေလွှတ်မယ်။ သူက မင်းသွားမယ့်လမ်းကို ရှေ့ကနေ အသင့်ပြင်ပေးမယ်။) ၃ ‘ယေဟောဝါ ဘုရားရဲ့လမ်းကို အသင့်ပြင်ကြ။ လမ်းတွေ ဖြောင့်ဖြူးအောင် လုပ်ကြ’ ဆိုပြီး တောထဲမှာ လူတစ်ယောက် ကြွေးကြော်နေတယ်” လို့ရေးခဲ့တယ်။ ၄ နှစ်ခြင်းပေးသူ ယောဟန်က နောင်တရတဲ့ အထိမ်းအမှတ်အဖြစ် နှစ်ခြင်းခံကြပါ၊ ဒါမှ အပြစ်ခွင့်လွှတ်ခံရမယ်ဆိုပြီး လူတွေကို တောထဲမှာ ဟောပြောနေတယ်။ ၅ ယုဒနယ်တစ်ဝန်းလုံးမှာရှိတဲ့ လူတွေ၊ ဂျေရုဆလင် မြို့သူမြို့သားတွေ လာတဲ့အခါ ယောဟန်က ဂျော်ဒန်မြစ်မှာ နှစ်ခြင်းပေးတယ်။ သူတို့လည်း လူအများရှေ့မှာ ကိုယ့်အပြစ်တွေကို ဝန်ခံကြတယ်။ ၆ ယောဟန်ဟာ ကုလားအုတ်မွေးနဲ့ရက်တဲ့ အဝတ်ကိုဝတ်ပြီး သားရေခါးပတ် ပတ်တယ်။ ၇ ကျိုင်းကောင်နဲ့ တောထဲက ပျားရည်ကို စားတယ်။ ၇ သူက “ကျွန်တော့်ထက် ကြီးမြတ်တဲ့သူဟာ ကျွန်တော့်နောက်မှာ လာနေတယ်။ သူ့ဖိနပ်ကြိုးကို ဖြေပေးဖို့တောင် ကျွန်တော် မထိုက်တန်ဘူး။ ၈ ကျွန်တော်က ခင်ဗျားတို့ကို ရေနဲ့နှစ်ခြင်းပေးတယ်။ သူကတော့ ခင်ဗျားတို့ကို သန့်ရှင်းသော စွမ်းအားတော်နဲ့ နှစ်ခြင်းပေးလိမ့်မယ်” လို့ဟောတယ်။ ၉ အဲဒီအချိန်မှာ ယေရှုက ဂါလိလဲပြည်၊ နာဇရက်မြို့ကနေ ဂျော်ဒန်မြစ်ကို လာပြီး ယောဟန်ဆီမှာ နှစ်ခြင်းခံတယ်။ ၁၀ ရေထဲကနေ ပေါ်လာတာနဲ့ ကောင်းကင်ပွင့်လာပြီး စွမ်းအားတော်က ချိုးငှက်သဏ္ဌာန်နဲ့ သူ့အပေါ် ဆင်းသက်တာကို သူမြင်ရတယ်။ ၁၁ ပြီးတော့ “မင်းဟာ ငါမြတ်နိုးတဲ့ ငါ့ရဲ့ချစ်သားပဲ” ဆိုတဲ့အသံ ကောင်းကင်က ထွက်လာတယ်။ ၁၂ ချက်ချင်းပဲ စွမ်းအားတော်က ယေရှုကို တောထဲသွားဖို့ လှုံ့ဆော်တယ်။ ၁၃ တောမှာ ရက်ပေါင်း ၄၀ နေပြီး စာတန်ရဲ့ သွေးဆောင်မှုကို ခံရတယ်။ အဲဒီမှာ သားရဲတွေလည်း ရှိတယ်။ ဒါပေမဲ့ ကောင်းကင်တမန်တွေက ယေရှုကို အလုပ်အကျွေးပြုကြတယ်။ ၁၄ ယောဟန် ထောင်ချခံရပြီးနောက် ယေရှုက ဂါလိလဲပြည်ကို သွားပြီး ဘုရားသခင်ရဲ့ သတင်းကောင်းကို ဟောပြောတယ်။ ၁၅ “သတ်မှတ်ထားချိန် ရောက်ပြီ။ ဘုရားသခင်ရဲ့ နိုင်ငံတော် နီးနေပြီ။ နောင်တရကြပါ။ သတင်းကောင်းကို ယုံကြည်ကြပါ” လို့ဟောတယ်။
ဧပြီ ၂၃-၂၉
ကျမ်းစာထဲက အဖိုးတန်ဘဏ္ဍာများ | မာကု ၃-၄
“ဥပုသ်နေ့မှာ ကုသပေး”
(မာကု ၃:၁၊ ၂) ယေရှုက နောက်တစ်ကြိမ် တရားဇရပ်ထဲ ဝင်လာတဲ့အခါ အဲဒီမှာ လက်တစ်ဖက်သေနေသူ ရှိနေတယ်။ ၂ ဖာရိရှဲတွေက ယေရှုကို အပြစ်ရှာချင်တာနဲ့ ဥပုသ်နေ့မှာ အဲဒီလူကို ကုပေးမလားဆိုတာ မျက်ခြည်မပြတ် စောင့်ကြည့်နေတယ်။
ဥပုသ်နေ့မှာ ဘာလုပ်သင့်သလဲ
နောက်ဥပုသ်နေ့တစ်နေ့မှာ ယေရှုက တရားဇရပ်ကို သွားတယ်။ အဲဒါက ဂါလိလဲပြည်မှာဖြစ်တယ်။ တရားဇရပ်မှာ လက်တစ်ဖက်သေတဲ့သူကို တွေ့တယ်။ (လုကာ ၆:၆) ကျမ်းတတ်နဲ့ ဖာရိရဲတွေက ယေရှုကို မျက်ခြည်မပြတ် စောင့်ကြည့်နေကြတယ်။ ဘာလို့လဲ။ ‘ဥပုသ်နေ့မှာ ရောဂါကုသင့်သလား’ ဆိုပြီး မေးတာကိုကြည့်ရင် သူတို့ရဲ့သဘောထားမှန်ကို သိနိုင်တယ်။—မဿဲ ၁၂:၁၀။ ကဘ။
ဂျူးဘာသာရေးခေါင်းဆောင်တွေက အသက်အန္တရာယ်ရှိမှပဲ ဥပုသ်နေ့မှာ ရောဂါကုသင့်တယ်လို့ လက်ခံထားတာ။ ဥပမာ၊ ဥပုသ်နေ့မှာ အရိုးကျိုးသွားလို့ ပြန်ဆက်တာ၊ အဆစ်လွဲလို့ ပတ်တီးစည်းတာ မလုပ်ရဘူး။ အဲဒါတွေက အသက်အန္တရာယ်ရှိတဲ့ အခြေအနေမဟုတ်လို့ပဲ။ ကျမ်းတတ်နဲ့ဖာရိရှဲတွေက သနားစရာကောင်းတဲ့ အဲဒီလူကို စိုးရိမ်လို့ မေးခွန်းမေးတာ မဟုတ်ဘဲ ယေရှုကို အပြစ်တင်ချင်လို့ အကြောင်းရှာနေကြတာ။
(မာကု ၃:၃၊ ၄) အဲဒီအခါ ယေရှုက လက်တစ်ဖက်သေနေသူကို “ထပြီး ဒီအလယ်မှာ လာရပ်ပါ” လို့ပြောလိုက်တယ်။ ၄ ပြီးတော့ “ဥပုသ်နေ့မှာ ဘာလုပ်သင့်သလဲ။ ကောင်းမှုလား၊ မကောင်းမှုလား။ လူ့အသက် ကယ်တာလား၊ လူ့အသက် သတ်တာလား” လို့မေးတော့ ဘာမှပြန်မဖြေကြဘူး။
ဥပုသ်နေ့မှာ ဘာလုပ်သင့်သလဲ
ယေရှုက သူတို့ဉာဏ်များနေတာကို သိတယ်။ ဥပုသ်နေ့မှာ အလုပ်မလုပ်ရဘူးဆိုတဲ့ပညတ်ကို ချိုးဖောက်တာနဲ့ပတ်သက်ပြီး သူတို့ရဲ့သဘောထားက အစွန်းရောက်နေတယ်၊ ကျမ်းစာနဲ့လည်း မကိုက်ညီဘူးဆိုတာ သိတယ်။ (ထွက်မြောက်ရာ ၂၀:၈-၁၀) သူလုပ်တဲ့ကောင်းမှုတွေကို အပြစ်ရှာဝေဖန်တာမျိုး အရင်ကလည်းကြုံဖူးတယ်။ အခု ယေရှုက လက်တစ်ဖက်သေနေသူကို ‘ထပြီး ဒီမှာ လာရပ်ပါ’ လို့ပြောပြီး သူတို့နဲ့ ထိပ်တိုက်ရင်ဆိုင်လိုက်တယ်။—မာကု ၃:၃၊ ကဘ။
(မာကု ၃:၅) သူတို့မှာ အကြင်နာတရား မရှိတဲ့အတွက် ယေရှု စိတ်ထိခိုက်သွားတယ်။ ပတ်လည်မှာရှိတဲ့ လူတွေကို စိတ်ဆိုးဆိုးနဲ့ကြည့်ပြီး လက်တစ်ဖက်သေနေသူကို “လက်ဆန့်လိုက်ပါ” လို့ပြောတယ်။ အဲဒီလူလည်း လက်ဆန့်လိုက်တဲ့အခါ အကောင်းပကတိ ပြန်ဖြစ်သွားတယ်။
nwtsty မာ ၃:၅ လေ့လာမှု မှတ်စု
စိတ်ထိခိုက်၊ စိတ်ဆိုး– ဒီအချိန်အခါမှာ ဘာသာရေးခေါင်းဆောင်တွေ အကြင်နာတရား မရှိတာကို ယေရှု မြင်တွေ့တဲ့အခါ တုံ့ပြန်ပုံကို မာကုတစ်ယောက်ပဲ မှတ်တမ်းတင်ခဲ့တယ်။ (မ ၁၂:၁၃။ လု ၆:၁၀) ယေရှုရဲ့ ခံစားချက်ကို ဒီလို ကွင်းကွင်းကွက်ကွက် ဖော်ပြနိုင်တာက စိတ်လှုပ်ရှားလွယ်တဲ့ ပေတရုပြောပြလို့ ဖြစ်မယ်။—“မာကုကျမ်း နိဒါန်း” ကို ကြည့်ပါ။
ရှာဖွေလေ့လာ ဘုရားရေးရာရတနာ
(မာကု ၃:၂၉) သန့်ရှင်းသော စွမ်းအားတော်ကို စော်ကားပြောဆိုရင်တော့ ဘယ်တော့မှ ခွင့်လွှတ်ခံရမှာ မဟုတ်ဘူး။ ထာဝရ အပြစ်ရှိတယ်။”
nwtsty မာ ၃:၂၉ လေ့လာမှု မှတ်စု
သန့်ရှင်းသောစွမ်းအားတော်ကို စော်ကားပြောဆို– စော်ကားပြောဆိုတယ်ဆိုတာ ဘုရား ဒါမှမဟုတ် မြင့်မြတ်ရာတွေကို အသရေဖျက်တာ၊ ထိခိုက်နစ်နာစေတာ၊ ရင့်ရင့်သီးသီး ပြောဆိုတာကို ရည်ညွှန်းတယ်။ သန့်ရှင်းသောစွမ်းအားတော်ဟာ ဘုရားသခင်ဆီက အရင်းခံလို့ စွမ်းအားတော်လုပ်ဆောင်မှုကို တမင်တကာ ဆန့်ကျင်တာ၊ ငြင်းဆန်တာက ဘုရားသခင်ကို စော်ကားပြောဆိုတာဖြစ်တယ်။ မ ၁၂:၂၄၊ ၂၈ နဲ့ မာ ၃:၂၂ မှာ တွေ့ရတဲ့အတိုင်း ယေရှုလုပ်တဲ့ အံ့ဖွယ်အမှုတွေမှာ ဘုရားရဲ့ စွမ်းအားတော်ကို ဂျုးဘာသာရေး ခေါင်းဆောင်တွေ မြင်တွေ့ရပေမဲ့ ဒီတန်ခိုးက စာတန်မာရ်နတ်ဆီကလို့ ပြောကြတယ်။
ထာဝရအပြစ်– အကျိုးဆက်ကို ထာဝစဉ် ခံစားရစေတဲ့ တမင်တကာလုပ်တဲ့ အပြစ်ကို ဆိုလိုပုံရတယ်။ အဲဒီအပြစ်ကို ဖုံးအုပ်ပေးမယ့် ပူဇော်သက္ကာ မရှိဘူး။—ဒီကျမ်းချက်မှာပါတဲ့ သန့်ရှင်းသောစွမ်းအားတော်ကို စော်ကားပြောဆို လေ့လာမှုမှတ်စုနဲ့ ကျမ်းပြိုင်ဖြစ်တဲ့ မာ ၁၂:၃၁ လေ့လာမှု မှတ်စုတို့ကို ကြည့်ပါ။
(မာကု ၄:၂၆-၂၉) ယေရှု ဆက်ပြောတယ်– “ဘုရားသခင့်နိုင်ငံတော်ကို လူတစ်ယောက် လယ်မှာ မျိုးစေ့ကြဲတာနဲ့ ခိုင်းနှိုင်းနိုင်တယ်။ ၂၇ သူက ညမှာ အိပ်စက်လိုက်၊ နေ့မှာ နိုးထလိုက်နဲ့ အဲဒီအတောအတွင်း မျိုးစေ့တွေ ဘယ်လို အပင်ပေါက်ပြီး ကြီးထွားလာမှန်း မသိလိုက်ဘူး။ ၂၈ မြေကြီးက သူ့အလိုလို တဖြည်းဖြည်း အသီးသီးစေတယ်။ ဦးဆုံး၊ အညှောက်ပေါက်လာတယ်။ ပြီးတော့ အနှံထွက်လာတယ်။ နောက်ဆုံးမှာ အဆန်အောင်သွားတယ်။ ၂၉ ကောက်နှံရင့်မှည့်လာပြီး ရိတ်သိမ်းချိန် ရောက်တဲ့အခါ သူ တံစဉ်ကိုယူပြီး ရိတ်သိမ်းတယ်။”
nwtsty မာ ၄:၉ လေ့လာမှု မှတ်စု
နားရှိတဲ့သူ ကြားပါစေ– ယေရှုဟာ မျိုးကြဲသူ ပုံဥပမာကို မပြောခင်မှာ “နားထောင်ကြပါ” လို့ ပြောခဲ့တယ်။ (မာ ၄:၃) ပုံဥပမာကို ဒီသတိပေးချက်နဲ့ နိဂုံးချုပ်ခြင်းအားဖြင့် မိမိရဲ့သွန်သင်ချက်ကို သေသေချာချာ လိုက်နာကျင့်သုံးဖို့ အရေးကြီးကြောင်း နောက်လိုက်တွေကို အလေးပေး ဖော်ပြခဲ့တယ်။ အလားတူ သတိပေးချက်ကို မ ၁၁:၁၅။ ၁၃:၉၊ ၄၃။ မာ ၄:၂၃။ လု ၈:၈။ ၁၄:၃၅။ ဗ ၂:၇၊ ၁၁၊ ၁၇၊ ၂၉။ ၃:၆၊ ၁၃၊ ၂၂။ ၁၃:၉ တို့မှာ တွေ့နိုင်တယ်။
‘ဆိုလိုရင်းကို နားလည်’ သလား
၆ ဒီပုံဥပမာကနေ ဘာသင်ယူနိုင်သလဲ။ ပထမအနေနဲ့၊ ကျမ်းစာသင်သားရဲ့ တိုးတက်မှုနှုန်းကို ထိန်းချုပ်လို့ မရနိုင်ဘူးဆိုတာ အသိအမှတ်ပြုဖို့လိုတယ်။ သူ့ကို အတတ်နိုင်ဆုံး ကူညီထောက်မနိုင်ပေမဲ့ နှစ်ခြင်းခံဖို့ ဘယ်တော့မှ ဖိအားမပေးသင့်ဘူး။ သူ့ဘဝကို ဘုရားသခင်ဆီ ဆက်ကပ်အပ်နှံမလား၊ မအပ်နှံဘူးလားဆိုတာ သူကိုယ်တိုင် ဆုံးဖြတ်ရမယ့်ကိစ္စဖြစ်တယ်။ ဒါကို ကျွန်တော်တို့ နှိမ့်ချစွာ လက်ခံရမယ်။ ယေဟောဝါကို တကယ်ချစ်မှသာ လူတစ်ယောက်ရဲ့ ဆက်ကပ်အပ်နှံမှုကို ကိုယ်တော် လက်ခံမှာဖြစ်တယ်။—ဆာ. ၅၁:၁၂; ၅၄:၆; ၁၁၀:၃။
၇ ဒုတိယအနေနဲ့၊ သွန်သင်ခြင်းလုပ်ငန်းရဲ့ အကျိုးရလဒ်တွေကို အစပိုင်းမှာမမြင်ရတဲ့အခါ စိတ်ဓာတ်မကျဖို့ ဒီပုံဥပမာကိုနားလည်ခြင်းက ကူညီပေးတယ်။ ကျွန်တော်တို့ စိတ်ရှည်ဖို့လိုတယ်။ (ယာ. ၅:၇၊ ၈) ကျမ်းစာသင်သားကို အတတ်နိုင်ဆုံးကူညီပေးပေမဲ့ သူ့စိတ်နှလုံးမှာ အမှန်တရား မကြီးထွားလာတာက ကျွန်တော်တို့ ဆရာသမားကောင်း မဟုတ်ဘူးလို့ မဆိုလိုဘူး။ ယေဟောဝါဟာ လိုလိုလားလား ပြောင်းလဲချင်တဲ့ နှိမ့်ချသူတွေရဲ့စိတ်နှလုံးထဲမှာပဲ အမှန်တရားမျိုးစေ့ကို ကြီးထွားစေတယ်။ (မ. ၁၃:၂၃) ဒါကြောင့် အမှုဆောင်လုပ်ငန်းမှာ ထိရောက်မှုရှိမရှိဆိုတာ နှစ်ခြင်းခံသူအရေအတွက်ကို ကြည့်ရုံနဲ့ ဆုံးဖြတ်လို့မရဘူး။ အဲဒီအပြင် ယေဟောဝါကလည်း လူတွေရဲ့တုံ့ပြန်ပုံပေါ်မူတည်ပြီး ကျွန်တော်တို့ရဲ့ အမှုဆောင်လုပ်ငန်းအောင်မြင်မှုကို မပိုင်းဖြတ်ဘူး။ ကျွန်တော်တို့ လုံ့လရှိရှိ ကြိုးစားအားထုတ်တာကို ကိုယ်တော် တန်ဖိုးထားတယ်။—လုကာ ၁၀:၁၇–၂၀ နဲ့ ၁ ကောရိန္သု ၃:၈ တို့ကို ဖတ်ပါ။
၈ တတိယအနေနဲ့၊ လူတစ်ယောက်ရဲ့ စိတ်နှလုံးထဲမှာ ပြောင်းလဲနေတာကို ကျွန်တော်တို့ အမြဲမမြင်တွေ့နိုင်ဘူး။ ဥပမာ၊ သာသနာပြုညီအစ်ကိုတစ်ယောက်နဲ့ ကျမ်းစာလေ့လာနေတဲ့ မောင်နှံက နှစ်ခြင်းမခံရသေးတဲ့ ကြေညာသူ ဖြစ်ချင်တဲ့အကြောင်း ဖွင့်ပြောလာတယ်။ ဒါနဲ့ အရင် ဆေးလိပ်ဖြတ်ရမယ်လို့ ပြောလိုက်တယ်။ လွန်ခဲ့တဲ့လတွေကတည်းက ဆေးလိပ်ဖြတ်ထားတယ်လို့ သူတို့ပြန်ပြောတဲ့အခါ ညီအစ်ကို အံ့ဩသွားတယ်။ ဆေးလိပ်ခိုးသောက်ရင်လည်း ယေဟောဝါ မြင်နိုင်တယ်၊ ကိုယ်တော်ဟာ ဟန်ဆောင်လိမ်ညာတာကို မုန်းတယ်ဆိုတာ သူတို့သိတယ်။ ဒါကြောင့် ဆေးလိပ်သောက်မယ်ဆိုရင် သာသနာပြုညီအစ်ကိုရှေ့မှာ ပေါ်တင်သောက်မယ်၊ မသောက်ရင်လည်း လုံးဝဖြတ်ပစ်မယ်လို့ သူတို့ဆုံးဖြတ်ခဲ့တယ်။ ဒီလောက် ကြီးကြီးမားမားပြောင်းလဲခဲ့မှန်း သာသနာပြုညီအစ်ကို လုံးဝမရိပ်မိလိုက်ပေမဲ့ ယေဟောဝါကိုချစ်တဲ့မေတ္တာ တိုးများလာတာက မှန်ကန်တဲ့ဆုံးဖြတ်ချက်ချဖို့ သူတို့ကို ကူညီပေးခဲ့တယ်။
ကျမ်းစာဖတ်ရှုခြင်း
(မာကု ၃:၁-၁၉က) ယေရှုက နောက်တစ်ကြိမ် တရားဇရပ်ထဲ ဝင်လာတဲ့အခါ အဲဒီမှာ လက်တစ်ဖက်သေနေသူ ရှိနေတယ်။ ၂ ဖာရိရှဲတွေက ယေရှုကို အပြစ်ရှာချင်တာနဲ့ ဥပုသ်နေ့မှာ အဲဒီလူကို ကုပေးမလားဆိုတာ မျက်ခြည်မပြတ် စောင့်ကြည့်နေတယ်။ ၃ အဲဒီအခါ ယေရှုက လက်တစ်ဖက်သေနေသူကို “ထပြီး ဒီအလယ်မှာ လာရပ်ပါ” လို့ပြောလိုက်တယ်။ ၄ ပြီးတော့ “ဥပုသ်နေ့မှာ ဘာလုပ်သင့်သလဲ။ ကောင်းမှုလား၊ မကောင်းမှုလား။ လူ့အသက် ကယ်တာလား၊ လူ့အသက် သတ်တာလား” လို့မေးတော့ ဘာမှပြန်မဖြေကြဘူး။ ၅ သူတို့မှာ အကြင်နာတရား မရှိတဲ့အတွက် ယေရှု စိတ်ထိခိုက်သွားတယ်။ ပတ်လည်မှာရှိတဲ့ လူတွေကို စိတ်ဆိုးဆိုးနဲ့ကြည့်ပြီး လက်တစ်ဖက်သေနေသူကို “လက်ဆန့်လိုက်ပါ” လို့ပြောတယ်။ အဲဒီလူလည်း လက်ဆန့်လိုက်တဲ့အခါ အကောင်းပကတိ ပြန်ဖြစ်သွားတယ်။ ၆ အဲဒီအခါ ဖာရိရှဲတွေ ထွက်သွားပြီး ယေရှုကိုသတ်ဖို့ ဟေရုဒ်နောက်လိုက်တွေနဲ့ ချက်ချင်းတိုင်ပင်ကြတယ်။ ၇ ယေရှုက တပည့်တွေနဲ့အတူ အိုင်ဘက်ကို ထွက်သွားတယ်။ ဂါလိလဲပြည်နဲ့ ယုဒပြည်က လူအတော်များများ နောက်ကနေ လိုက်လာတယ်။ ၈ ဂျေရုဆလင်မြို့၊ အိဒုမဲပြည်နဲ့ ဂျော်ဒန်မြစ် တစ်ဖက်ကမ်းမှာရှိတဲ့ လူတွေ၊ တိုင်ရာနဲ့ ဆိုင်ဒုန်မြို့ပတ်ဝန်းကျင်က လူတွေလည်း ယေရှု လုပ်ဆောင်ခဲ့သမျှကို ကြားတဲ့အခါ အုပ်လိုက်ကြီး ရောက်လာတယ်။ ၉ ဒါနဲ့ ယေရှုက လူအုပ်တွန်းတိုက်တာ မခံရအောင် တပည့်တွေကို လှေငယ်တစ်စင်း အသင့်ပြင်ထားခိုင်းတယ်။ ၁၀ လူတွေကို ကုသပေးခဲ့တဲ့အတွက် ရောဂါဝေဒနာ ခံစားနေရသူတွေက ယေရှုကိုတို့ထိဖို့ အလုအယက် တိုးဝှေ့နေလို့ပဲ။ ၁၁ နတ်ဆိုးတွေတောင် ယေရှုကိုမြင်တဲ့အခါ ရှေ့မှာဦးညွှတ်ပြီး “ခင်ဗျားဟာ ဘုရားသခင်ရဲ့သားပဲ” လို့အော်ကြတယ်။ ၁၂ ဒါပေမဲ့ ယေရှုက သူ့အကြောင်းကို လုံးဝ မပေါက်ကြားစေဖို့ အထပ်ထပ်မှာတယ်။ ၁၃ ယေရှုက တောင်ပေါ်ကို တက်သွားတယ်။ အဲဒီနောက် တပည့်တချို့ကို ခေါ်လိုက်တဲ့အခါ သူတို့ရောက်လာတယ်။ ၁၄ တပည့် ၁၂ ယောက်ပါတဲ့ အုပ်စုတစ်စုဖွဲ့ပြီး တမန်တော်တွေလို့ နာမည်ပေးလိုက်တယ်။ သူတို့ဟာ ယေရှုသွားလေရာ လိုက်ပါရမယ့်သူတွေပဲ။ နောက်တော့ ယေရှုက ဟောပြောဖို့ သူတို့ကို စေလွှတ်တဲ့အပြင်၊ ၁၅ နတ်ဆိုးတွေကို နှင်ထုတ်နိုင်တဲ့ တန်ခိုးလည်း ပေးတယ်။ ၁၆ အဲဒီအုပ်စုအဝင် တပည့် ၁၂ ယောက်ကတော့ ပေတရုလို့ ယေရှုနာမည်ပေးတဲ့ ရှိမုန်၊ ၁၇ ဇေဗေဒဲရဲ့သား ယာကုပ်နဲ့ သူ့ညီယောဟန် (“မိုးကြိုးသားတွေ” လို့အဓိပ္ပာယ်ရှိတဲ့ ဗောနေရဂက်ဆိုပြီးတော့လည်း ယေရှု နာမည်ပေးတယ်)၊ ၁၈ အန္ဒြေ၊ ဖိလိပ္ပု၊ ဗာသောလမဲ၊ မဿဲ၊ သောမ၊ အာလဖဲရဲ့သား ယာကုပ်၊ သဒ္ဒဲ၊ စိတ်ထက်သန်သူ ရှိမုန်၊ ၁၉ နောက်ပိုင်းမှာ ယေရှုကို သစ္စာဖောက်သွားတဲ့ ယုဒရှကာရုတ် တို့ဖြစ်တယ်။
ဧပြီ ၃၀–မေ ၆
ကျမ်းစာထဲက အဖိုးတန်ဘဏ္ဍာများ | မာကု ၅-၆
“သေဆုံးသွားတဲ့ ချစ်ရသူတွေကို ပြန်ရှင်စေနိုင်တဲ့တန်ခိုး ယေရှုမှာရှိ”
(မာကု ၅:၃၈) ယေရှုက တရားဇရပ်မှူးရဲ့အိမ်ကို ရောက်တဲ့အခါ လူတွေ အုတ်အုတ်ကျက်ကျက် ဖြစ်နေတာ၊ အော်ဟစ်ငိုယိုနေကြတာကို တွေ့ရတယ်။
(မာကု ၅:၃၉-၄၁) ဒါနဲ့ အိမ်ထဲဝင်ပြီး “ဘာလို့ အုတ်အုတ်ကျက်ကျက်ဖြစ်ပြီး ငိုနေတာလဲ။ ဒီမိန်းကလေး သေတာမှ မဟုတ်ပဲ။ အိပ်ပျော်နေတာ” လို့ပြောလိုက်တော့၊ ၄၀ လူတွေ လှောင်ရယ်ကြတယ်။ ယေရှုက အားလုံးကို အပြင်ထွက်ခိုင်းပြီး မိန်းကလေးရဲ့ မိဘနှစ်ပါးနဲ့ လိုက်ပါလာတဲ့ တပည့်တွေကိုပဲ ခေါ်ပြီး မိန်းကလေးရှိတဲ့ အခန်းထဲ ဝင်သွားတယ်။ ၄၁ အဲဒီနောက် မိန်းကလေးရဲ့လက်ကို ကိုင်ပြီး “တလိသ ကုမိ” လို့ပြောတယ်။ “မိန်းကလေး၊ ကျွန်တော်ပြောမယ်။ ထပါ” လို့အဓိပ္ပာယ်ရတယ်။
nwtsty မာ ၅:၃၉ လေ့လာမှု မှတ်စု
သေတာမှ မဟုတ်ပဲ။ အိပ်ပျော်နေတာ– တစ်ခါတလေ ကျမ်းစာက သေတာကို အိပ်ပျော်တာနဲ့ နှိုင်းယှဉ်တယ်။ (ဆ ၁၃:၃။ ယဟ ၁၁:၁၁-၁၄။ တ ၇:၆၀။ ၁က ၇:၃၉။ ၁၅:၅၁။ ၁သ ၄:၁၃) မိန်းကလေး အသက်ပြန်ရှင်လာအောင် ယေရှု လုပ်ပေးတော့မှာဖြစ်လို့ အဲဒီလို ပြောတာဖြစ်နိုင်တယ်။ နှစ်နှစ်ခြိုက်ခြိုက် အိပ်ပျော်နေသူက နိုးထနိုင်သလိုပဲ သေသွားတဲ့သူလည်း ပြန်ရှင်နိုင်မှန်း ယေရှု ပြသမှာဖြစ်တယ်။ မိန်းကလေးကို အသက်ပြန်ရှင်စေတဲ့ တန်ခိုးကို “သေလွန်သူတွေကို အသက်ရှင်စေတဲ့ဘုရား၊ မဖြစ်သေးတဲ့အကြောင်းတွေကို ဖြစ်ပြီးသားပုံစံမျိုးနဲ့ ပြောဆိုတဲ့ဘုရား” ဆီက ယေရှု ရတာဖြစ်တယ်။—ရ ၄:၁၇။
(မာကု ၅:၄၂) (၁၂ နှစ်အရွယ်ရှိတဲ့) အဲဒီမိန်းကလေးဟာ ချက်ချင်းပဲ ထပြီး လမ်းလျှောက်တော့တယ်။ ဒါကိုလည်းမြင်ရော သူတို့ ဝမ်းသာလုံးဆို့သွားကြတယ်။
မိန်းမငယ်လေး အသက်ပြန်ရှင်လာ
ခါတိုင်းလိုပဲ ဒီတစ်ခေါက်မှာလည်း ယေရှုက သူလုပ်ခဲ့တာတွေကို ဘယ်သူ့ကိုမှ မပြောနဲ့လို့ မိဘတွေကို မှာတယ်။ ဒါပေမဲ့ ဝမ်းသာနေတဲ့မိဘတွေနဲ့ တခြားသူတွေကြောင့် ဒီသတင်းဟာ ‘အဲဒီဒေသတစ်ခုလုံး ပျံ့သွားတယ်။’ (မဿဲ ၉:၂၆၊ ကဘ) ချစ်ရတဲ့သူတစ်ယောက် သေရာကနေ အသက်ပြန်ရှင်လာတာကို မြင်တွေ့ရမယ်ဆိုရင် သင်လည်း ဝမ်းသာအားရ ပြောပြမှာပဲ မဟုတ်လား။ ဒီမှတ်တမ်းက သေတဲ့သူ ပြန်ရှင်လာအောင် ယေရှုလုပ်ပေးတဲ့ ဒုတိယမှတ်တမ်းဖြစ်တယ်။
ရှာဖွေလေ့လာ ဘုရားရေးရာရတနာ
(မာကု ၅:၁၉၊ ၂၀) ယေရှုက ခွင့်မပြုဘဲ “ဆွေမျိုးသားချင်းတွေရှိရာ အိမ်ကိုပြန်ပြီး ခင်ဗျားအတွက် ယေဟောဝါဘုရား လုပ်ပေးခဲ့တာတွေ၊ ကရုဏာပြခဲ့တာတွေကို ပြောပြပါ” လို့မှာတယ်။ ၂၀ အဲဒီလူက သူ့အတွက် ယေရှု လုပ်ပေးခဲ့တာတွေကို ဒေကာပေါလိနယ်မှာ သွားပြောပြတဲ့အခါ လူအားလုံး အံ့အားသင့်ကုန်တယ်။
nwtsty မာ ၅:၁၉ လေ့လာမှု မှတ်စု
ပြောပြပါ– မိမိလုပ်တဲ့ အံ့ဖွယ်အမှုတွေအကြောင်း တခြားသူတွေကို မပြောနဲ့လို့ မှာကြားတဲ့ တခြားအချိန်တွေနဲ့မတူဘဲ (မာ ၁:၄၄။ ၃:၁၂။ ၇:၃၆) ဖြစ်ပျက်ခဲ့တာတွေအကြောင်း ဆွေမျိုးတွေကို ပြောပြဖို့ သူ့ကို ယေရှု ညွှန်ကြားခဲ့တယ်။ ဘာကြောင့်လဲဆိုတော့ ဒီဒေသကနေထွက်သွားဖို့ ယေရှုကို ပြောကြတော့ သူတို့ကို ကိုယ်တိုင် သက်သေခံရမှာ မဟုတ်လို့ဖြစ်မယ်။ ဝက်တွေ ပျောက်သွားတာနဲ့ ပတ်သက်ပြီး မမှန်ကန်တဲ့တစ်ဆင့်စကားတွေကို ချေဖျက်ဖို့လည်း ဖြစ်နိုင်တယ်။
(မာကု ၆:၁၁) ခင်ဗျားတို့ကို လက်မခံဘူး၊ နားမထောင်ဘူးဆိုရင် အဲဒီကနေ ထွက်ခွာတဲ့အခါ သက်သေအနေနဲ့ ခြေထောက်ကဖုန်တွေကို ခါလိုက်ပါ” လို့လည်း မှာတယ်။
nwtsty မာ ၆:၁၁ လေ့လာမှု မှတ်စု
ခြေထောက်က ဖုန်တွေကို ခါလိုက်ပါ– ဘုရားဆီကလာမယ့် ဆိုးကျိုးတွေဟာ မိမိတို့နဲ့ မဆိုင်ဘူးလို့ တပည့်တွေ ငြင်းဆိုတဲ့ အမူအရာဖြစ်တယ်။ အလားတူ အသုံးအနှုန်းကို မ ၁၀:၁၄၊ လု ၉:၅ မှာ တွေ့ရတယ်။ မာကုနဲ့ လုကာက သက်သေ [ဒါမှမဟုတ်၊ “ဆန့်ကျင်တဲ့”] အနေနဲ့ ဆိုတဲ့ စကားလုံးကို ထပ်ထည့်ထားတယ်။ ပိသိဒိပြည်၊ အန္တိအုတ်မြို့မှာ ပေါလုနဲ့ ဗာနဗ ဒီညွှန်ကြားချက်ကို လိုက်နာခဲ့တယ်။ (တ ၁၃:၅၁) ကောရိန္သုမြို့မှာလည်း ပေါလု အဝတ်ကို ခါပြီး “ခင်ဗျားတို့ ကယ်တင်ခြင်းမရရင် ကျွန်တော့်အပြစ် မဟုတ်ဘူး။ ခင်ဗျားတို့အပြစ်ပဲ” လို့ ပြောတဲ့အခါ အဲဒီအတိုင်း လုပ်ခဲ့တယ်။ (တ ၁၈:၆) ဒီအမူအရာကို တပည့်တွေ ကောင်းကောင်းသိတယ်။ ဘာသာတရား ကိုင်းရှိုင်းတဲ့ ဂျူးတွေ လူမျိုးခြားနယ်မြေတွေမှာ ခရီးသွားပြီးတဲ့အခါ ဂျူးနယ်မြေထဲ ပြန်ဝင်တော့မယ်ဆိုရင် ဖိနပ်မှာကပ်နေတဲ့ မသန့်ရှင်းဘူးလို့ သူတို့ယူဆတဲ့ ဖုန်တွေကို ခါချကြတယ်။ ဒါပေမဲ့ ယေရှုက တပည့်တွေကို တခြားအဓိပ္ပာယ်တစ်မျိုးနဲ့ ဒီညွှန်ကြားချက် ပေးခဲ့တာဖြစ်တယ်။
ကျမ်းစာဖတ်ရှုခြင်း
(မာကု ၆:၁-၁၃) ယေရှုက အဲဒီအရပ်ကထွက်ပြီး နေရင်းဒေသကို သွားတဲ့အခါ တပည့်တွေ လိုက်သွားကြတယ်။ ၂ ဥပုသ်နေ့ရောက်တော့ တရားဇရပ်မှာ သွန်သင်ပေးတယ်။ ကြားနာသူအများစုက တအံ့တဩဖြစ်ပြီး “ဒါတွေကို သူ ဘယ်ကရတာလဲ။ ဒီလိုဉာဏ်ပညာမျိုး၊ ဒီလိုအံ့ဖွယ်အမှု လုပ်နိုင်တဲ့အစွမ်းမျိုးကို ဘယ်သူပေးတာလဲ။ ၃ သူဟာ လက်သမား မဟုတ်လား။ မာရိရဲ့သား မဟုတ်လား။ ယာကုပ်၊ ယောသပ်၊ ယုဒ၊ ရှိမုန်တို့ရဲ့အစ်ကို မဟုတ်လား။ သူ့နှမတွေလည်း ဒီမြို့မှာ ရှိတာပဲ” လို့ပြောကြတယ်။ ယေရှုကို သူတို့ လက်မခံကြဘူး။ ၄ ယေရှုက “ပရောဖက်ဟာ လူတွေရဲ့လေးစားမှုကို ရတယ်။ ဒါပေမဲ့ သူ့နေရင်းဒေသ၊ သူ့အိမ်၊ သူ့ဆွေမျိုးသားချင်းတွေကြားမှာတော့ လေးစားမခံရဘူး” လို့ပြောတယ်။ ၅ လူနာတချို့ကိုပဲ လက်တင်ပြီး ကုသပေးတယ်။ အဲဒီမှာ အံ့ဖွယ်အမှုတွေ လုပ်ပြမနေတော့ဘူး။ ၆ သူတို့မှာ ယုံကြည်ခြင်း မရှိတဲ့အတွက် အံ့ဩမိတယ်။ အဲဒီနောက် တစ်ရွာပြီးတစ်ရွာ သွားပြီး သွန်သင်ပေးတယ်။ ၇ ယေရှုက တမန်တော် ၁၂ ယောက်ကို နှစ်ယောက်တစ်တွဲစီ တွဲပေးပြီး စေလွှတ်လိုက်တယ်။ နတ်ဆိုးတွေကို နှင်ထုတ်နိုင်တဲ့ တန်ခိုးလည်း ပေးတယ်။ ၈ ပြီးတော့ လမ်းခရီးအတွက် တောင်ဝှေးတစ်ချောင်းကလွဲလို့ ဘာကိုမှ မယူခိုင်းဘူး။ မုန့်နဲ့ ရိက္ခာအိတ်ကို မဆောင်သွားဖို့၊ ခါးပိုက်ဆောင်အိတ်ထဲ ငွေမထည့်သွားဖို့၊ ၉ အင်္ကျီအပို ယူမသွားဖို့၊ ဖိနပ်ကိုတော့ စီးသွားဖို့ မှာတယ်။ ၁၀ ဒါ့အပြင် “အိမ်တစ်အိမ်ကို ဝင်တဲ့အခါ အဲဒီမြို့ကနေ မထွက်မချင်း အဲဒီအိမ်မှာပဲ တည်းခိုပါ။ ၁၁ ခင်ဗျားတို့ကို လက်မခံဘူး၊ နားမထောင်ဘူးဆိုရင် အဲဒီကနေ ထွက်ခွာတဲ့အခါ သက်သေအနေနဲ့ ခြေထောက်ကဖုန်တွေကို ခါလိုက်ပါ” လို့လည်း မှာတယ်။ ၁၂ အဲဒီနောက် တပည့်တွေက လူတွေ နောင်တရဖို့ သွားဟောပြောတယ်။ ၁၃ နတ်ဆိုးတွေကို နှင်ထုတ်ပေးကြတယ်။ ဖျားနာနေသူတွေကိုလည်း ဆီလူးပြီး ကုသပေးကြတယ်။