စာရှုသူများထံမှ မေးခွန်းလွှာ

ယေဟောဝါသက်သေတွေက တမန်တော် ပေါလုကို ထိပ်ပြောင်တဲ့သူ ဒါမှမဟုတ် ဆံပင်ပါးတဲ့သူအဖြစ် ဘာကြောင့် ပုံဖော်လေ့ ရှိသလဲ။

အမှန်အတိုင်း ပြောရရင် ဒီနေ့ခေတ် ဘယ်သူမှ ပေါလုရဲ့ ရုပ်သွင်ကို မသိကြပါဘူး။ အဖွဲ့အစည်းထုတ်စာပေတွေမှာပါတဲ့ ပေါလုရဲ့ပုံတွေဟာ ပန်းချီဆရာတွေရဲ့ စိတ်ကူးပုံဖော်ချက်သာ ဖြစ်တယ်။ ရှေးဟောင်းသုတေသန အထောက်အထားတွေအပေါ် အခြေခံထားတာ မဟုတ်ဘူး။

ဒါပေမဲ့ ပေါလုရဲ့ ပုံပန်းသွင်ပြင်ကို ဖော်ပြတဲ့ အချက်တချို့ ရှိတယ်။ ၁၉၀၂၊ မတ် ၁ ဇိအုန်ကင်းမျှော်စင် မှာ ဒီလိုရေးထားတယ်– “အေဒီ ၁၅၀ လောက်မှာရေးတဲ့ စာအုပ်တစ်အုပ်မှာ (Acts of Paul and Thecla) ပေါလုရဲ့ အကောင်းဆုံးနဲ့ အဖြစ်နိုင်ဆုံး ပုံပန်းကို ဖော်ပြထားတယ်။ အဲဒီမှာ ပေါလုကို ‘အရပ်ပု၊ ထိပ်ပြောင်၊ ခြေခွင်၊ ဗလကောင်း၊ မျက်ခုံးမွေးဆက်နေပြီး နှာခေါင်းချွန်သူ’ အဖြစ် ပုံဖော်ထားတယ်။”

“အဲဒီစာအုပ်မှာပါတဲ့ အချက်အလက်တွေဟာ သမိုင်းနဲ့ ကိုက်ညီတာ သေချာတယ်” လို့ ၁၉၉၇ ခုနှစ်ထုတ် အဘိဓာန်တစ်အုပ်မှာ (The Oxford Dictionary of the Christian Church) ပြောထားတယ်။ အဲဒီစာအုပ်ကို အစောပိုင်းနှစ်တွေမှာ သိပ်တန်ဖိုးထားကြတယ်။ ဂရိလက်ရေးစာမူ ၈၀ ရှိပြီး တခြားဘာသာစကားတွေနဲ့လည်း ပြန်ဆိုထားတယ်။ ဒါကြောင့် ကျွန်တော်တို့ရဲ့ ပုံဖော်ရေးဆွဲချက်တွေဟာ ပေါလုနဲ့ပတ်သက်တဲ့ ရှေးဟောင်း ဖော်ပြချက်တွေနဲ့ ကိုက်ညီတယ်။

ပေါလုရဲ့ ရုပ်သွင်ထက် ပိုအရေးကြီးတာတွေ ရှိတယ်။ ပေါလုခေတ်က ဝေဖန်သူတချို့ကတောင် “လူကတော့ ပျော့ညံ့ညံ့နဲ့။ အဟောအပြောလည်း ခပ်ညံ့ညံ့ပါပဲ” လို့ ပြောခဲ့တယ်။ (၂ ကော. ၁၀:၁၀) ဒါပေမဲ့ ယေရှုရဲ့ အံ့ဖွယ်အမှုကြောင့် ပေါလု ခရစ်ယာန်ဖြစ်လာတယ်ဆိုတာ မမေ့သင့်ဘူး။ ‘လူမျိုးခြားတွေ. . .ကို [ယေရှု] အကြောင်း သက်သေခံဖို့ [ခရစ်တော်] ရွေးချယ်ထား’ သူအဖြစ် ပေါလု ဘာတွေ ပြီးမြောက်ခဲ့ကြောင်းလည်း စဉ်းစားကြည့်ပါ။ (တ. ၉:၃-၅၊ ၁၅။ ၂၂:၆-၈) ပေါလုရေးခဲ့တဲ့ ကျမ်းစောင်တွေကနေ ဘယ်လောက် အကျိုးရရှိနိုင်ကြောင်းလည်း စဉ်းစားကြည့်ပါ။

ခရစ်ယာန်မဖြစ်ခင်က ပြီးမြောက်မှုတွေအကြောင်း ပေါလု မဝါကြွားခဲ့သလို ရုပ်သွင်ပြင်အကြောင်းလည်း မဖော်ပြခဲ့ဘူး။ (တ. ၂၆:၄၊ ၅။ ဖိ. ၃:၄-၆) “ကျွန်တော်ဟာ တမန်တော်တွေထဲမှာ အရေးမပါဆုံးသူပါ၊ . . . တမန်တော်လို့တောင် အခေါ်မခံထိုက်ဘူး” လို့ ပြောတယ်။ (၁ ကော. ၁၅:၉) “သန့်ရှင်းသူအားလုံးထဲမှာ အရေးမပါဆုံးသူထက် ပိုပြီးအရေးမပါတဲ့ ကျွန်တော်ဟာ အဲဒီမဟာကရုဏာတော်ကို ခံစားခဲ့ရတယ်။ ဒါကြောင့် ခရစ်တော်ဆီကလာတဲ့ အတိုင်းမသိ ကြွယ်ဝမှုအကြောင်း သတင်းကောင်းကို လူမျိုးခြားတွေဆီ ကျွန်တော်ဟောပြောတယ်” လို့လည်း နောက်ပိုင်းမှာ ရေးခဲ့တယ်။ (ဧ. ၃:၈) ပေါလုရဲ့ ရုပ်ရည်သွင်ပြင်ထက် အဲဒီသတင်းကောင်းက ပိုအရေးကြီးပါတယ်။