Ampio Ireo ‘Manana Toe-po Tsara’

1. Ahoana no mety ho fihetsiky ny olona rehefa mitory amin-dry zareo isika? (Asan’ny Apostoly 13:47, 48; 16:14, 15)

BE DIA BE no tonga dia nanaiky ny fahamarinana, tamin’ny taonjato voalohany, rehefa nitory taminy ny Kristianina. (Vakio ny Asan’ny Apostoly 13:47, 48; 16:14, 15.) Faly be koa ny olona sasany amin’izao raha vao itoriana ny vaovao tsara. Na dia tsy mihaino antsika aza ny olona amin’ny voalohany, dia mety hanaiky ny hafatra torintsika ihany any aoriana any. Inona àry no tokony hataontsika rehefa mahita olona ‘manana toe-po tsara’ isika?

2. Nahoana no mitovy amin’ny asan’ny mpamboly ny asa fampianarana ataontsika?

² Hoatran’ny ataon’ny mpamboly no ataon’ny mpitory rehefa manampy ny olona ho lasa mpanara-dia an’i Jesosy. Mety tsy hiara-masaka ny voankazo ambolen’ny mpamboly iray. Tonga dia angoniny àry izay hitany hoe masaka, fa tondrahany sy karakarainy kosa izay mbola manta. Hoatr’izany koa no ataontsika. Tonga dia ampiantsika ny olona liana mba ho lasa mpianatr’i Kristy. Izay mbola tsy liana kosa ampiantsika foana mba hahatsapa hoe nahoana no zava-dehibe ny mianatra momba an’Andriamanitra sy ny Baiboly. (Jaona 4:35, 36) Mila mahay manavaka isika mba hahitana raha liana ilay olona na tsia, dia ampifanarahintsika amin’izay ny fomba anampiana azy. Hojerentsika àry hoe ahoana no hanampiantsika ny olona liana, dieny eo am-pitoriana. Ho hitantsika koa hoe ahoana no hanampiantsika ny olona hoatr’izany mba handroso foana.

REHEFA LIANA ILAY OLONA

3. Inona no azontsika atao raha mahita olona liana isika eny am-pitoriana? (1 Korintianina 9:26)

³ Rehefa mahita olona liana isika eny am-pitoriana, dia tiantsika hampiana handeha amin’ilay lalana mankany amin’ny fiainana izy. Tsy hiandriandry àry isika fa tonga dia hanasa azy hianatra Baiboly sy hivory.​—Vakio ny 1 Korintianina 9:26.

4. Milazà fitantarana mampiseho hoe misy olona tonga dia vonona hianatra Baiboly.

⁴ Asao hianatra Baiboly izy. Tonga dia vonona hianatra Baiboly ny olona sasany itoriantsika. Nankeo amin’ny fampirantiana, ohatra, ny tovovavy iray any Kanada, indray alakamisy izay, dia naka an’ilay bokikely hoe Ankafizo Mandrakizay ny Fiainana! Nanazava ilay anabavy teo hoe: ‘Natao hianarana Baiboly iny.’ Liana ilay tovovavy dia nanome ny nomeraon-telefaoniny. Nandefasany SMS ilay anabavy tamin’iny andro iny hoe rahoviana ry zareo no hianatra. Hoy ilay anabavy: ‘Mety ve raha amin’ny faran’ny herinandro?’ Namaly ilay tovovavy hoe: “Tsy mety angaha raha rahampitso, fa malalaka aho?” Tonga dia nianatra izy ny zoma, ary nivory ny alahady. Nandroso haingana be izy.

5. Ahoana no ataontsika raha mbola tsy vonona hianatra ilay olona? (Jereo koa ny sary.)

⁵ Mazava ho azy fa tsy ny olona rehetra no ho hoatran’io tovovavy io. Mety hila fotoana mantsy ny olona sasany vao hanaiky hianatra Baiboly. Angamba aloha isika mila miresaka hevitra mahaliana azy. Raha tsy mora kivy isika fa miezaka hiahy an’ilay olona foana, dia mety hianatra Baiboly ihany izy aoriana kely ao. Inona àry no azontsika tenenina rehefa hanasa azy hianatra Baiboly? Andao isika handinika soso-kevitra vitsivitsy avy amin’ny rahalahy sy anabavy efa za-draharaha.

6. Inona no azontsika lazaina mba hahatonga an’ilay olona hazoto hianatra Baiboly?

⁶ Nilaza ireny rahalahy sy anabavy ireny fa tsy dia tsara, any amin’ny tany sasany, ny mampiasa ny teny hoe “mianatra”, “fianarana Baiboly”, na hoe “mampianatra anao” rehefa miresaka momba an’ilay fianarana. Hitan-dry zareo fa tsara kokoa ny mampiasa ny teny hoe “resadresaka”, “dinidinika”, na “mamantatra an’izay resahin’ny Baiboly.” Mba hanohizana an’ilay resaka, dia azonao atao, ohatra, ny miteny hoe “tena mahavariana fa valian’ny Baiboly ny fanontaniana manahiran-tsaina antsika eo amin’ny fiainana”, na hoe “tsy boky ara-pivavahana fotsiny ny Baiboly fa misy torohevitra mahasoa antsika koa ao.” Afaka miteny hoatr’izao ianao aorian’izay: “Ao anatin’ny 10 na 15 minitra fotsiny ianao dia efa mahafantatra zavatra mahasoa.” Tsy voatery hampiasa an’ilay teny hoe “mifanao fotoana” ianao, na hoe “isan-kerinandro”, amin’izay ilay olona tsy hieritreritra hoe voatery hihaona aminao foana izy.

7. Inona no nanampy ny olona sasany hiaiky hoe nahita ny fahamarinana izy? (1 Korintianina 14:23-25)

⁷ Asao hivory izy. Toa tany am-pivoriana ny olona sasany no niaiky hoe nahita ny fahamarinana, tamin’ny andron’ny apostoly Paoly. (Vakio ny 1 Korintianina 14:23-25.) Misy hoatr’izany koa amin’izao. Mandroso haingana kokoa ny ankamaroan’ny olona vaovao rehefa manomboka mivory. Rahoviana àry ry zareo no tokony hasaintsika hivory? Misy fanasana ny olona hivory ao amin’ny lesona 10 amin’ny boky Ankafizo Mandrakizay ny Fiainana! Tsy hoe tonga any anefa ny fianaranareo vao hanasa azy ianao. Azonao asaina hanatrika fivoriana amin’ny faran’ny herinandro kosa ny olona dieny eo am-pitoriana. Azonao resahina aminy ny lohatenin’ny lahateny ho an’ny besinimaro, na ny hevitra iray hodinihina amin’ny Fianarana Ny Tilikambo Fiambenana.

8. Inona no asongadintsika rehefa manasa olona hivory isika? (Isaia 54:13)

⁸ Hazavao amin’ny olona asainao hoe tsy mitovy amin’ny any amin’ny fivavahana nahazatra azy ny fivoriantsika. Nanontany hoatr’izao tamin’ny mpampianatra azy, ohatra, ny vehivavy iray tamin’izy nanatrika voalohany ny Fianarana Ny Tilikambo Fiambenana: “Hain’ilay mpitarika daholo ve izany ny anaran’ny olona rehetra?” Dia hoy ilay mpampianatra azy: “Miezaka mahafantatra ny anaran’ny olona rehetra ao amin’ny fiangonanay izahay, hoatran’ny any an-trano ihany.” Hitan’ilay mpianatra hoe tsy hoatr’izany ny any amin-dry zareo. Azonao hazavaina amin’ny olona asainao koa ny tanjon’ny fivoriantsika. (Vakio ny Isaia 54:13.) Mivory mantsy isika mba hanompo an’i Jehovah sy hianatra momba azy ary hifampahery. (Heb. 2:12; 10:24, 25) Milamina tsara àry ny fivoriantsika, sady andraisana fianarana, ary tsy misy fombafomba. (1 Kor. 14:40) Tsotra koa ny efitranontsika ary mety tsara mba hianarana ao. Ankoatra izay, dia tsy momba ny atsy na ny aroa isika amin’ny resaka politika, ka tsy miresaka momba an’izany. Tsy manao adihevitra be koa isika. Azonao aseho an’ilay mpianatrao ilay video hoe Inona no Atao any Amin’ny Efitrano Fanjakana? Ho fantany mialoha, amin’izay, hoe inona no ho hitany any.

9-10. Rehefa manasa olona hivory isika dia inona no azontsika lazaina azy mba tsy hatahotra izy? (Jereo koa ny sary.)

⁹ Misalasala hanatrika fivoriana anefa ny olona sasany, satria matahotra sao dia hasaina miova finoana. Omeo toky izy hoe tsy manery an’iza na iza hanaraka ny fivavahantsika isika. Afaka manatrika fotsiny izy fa tsy voatery mandray anjara. Asaina ho tonga ny mpianakavy, anisan’izany ny ankizy. Tsy ampianarina mitokana ny ankizy, ao am-pivoriantsika. Miara-mipetraka kosa ny ray aman-dreny sy ny zanany, amin’izay ry zareo afaka manara-maso ny zanany sy mahafantatra ny zavatra ampianarina azy. (Deot. 31:12) Tsy misy fanantazan-drakitra any sady tsy asaina mandoa adidy ny olona. Manaraka an’ity torohevitr’i Jesosy ity kosa isika: “Nahazo maimaim-poana ianareo, ka manomeza maimaim-poana.” (Mat. 10:8) Mety ho azonao tenenina amin’ilay olona koa hoe tsy voatery hanao akanjo lafo be izy. Ny fon’ny olona mantsy no jeren’Andriamanitra fa tsy ny paoziny.​—1 Sam. 16:7.

¹⁰ Raiso tsara ilay olona raha tonga mivory. Ampifankahalalao amin’ny anti-panahy sy ny mpitory hafa koa izy. Raha mahazo aina tsara izy dia azo inoana kokoa hoe mbola hiverina indray amin’ny manaraka. Asaivo mijery ao amin’ny Baibolinao izy raha tsy manana, ary asehoy azy koa ny lahatsoratra ianarana mba hahafahany manaraka tsara.

REHEFA MANOMBOKA MIANATRA IZY

11. Ahoana no hampisehoanao hoe manaja ny fotoanan’ilay olona sy ny fandaharam-potoanany ianao?

¹¹ Inona no tokony hotadidintsika rehefa mampianatra Baiboly any an-trano? Hajao ny fotoanan’ilay olona sy ny fandaharam-potoanany. Raha efa nanome fotoana azy, ohatra, ianao dia tongava ara-potoana, na dia zatra tsy manaja fotoana aza ny olona eny aminareo. Tsara koa raha atao fohy ilay fianarana amin’ny voalohany. Hitan’ny mpitory za-draharaha sasany hoe aleo tsy atao lava be ilay fianarana na dia mbola te hianatra aza ilay olona. Ankoatra izay, dia aza be resaka fa avelao ilay mpianatra hilaza ny ao am-pony.​—Ohab. 10:19.

12. Inona no tokony ho tanjontsika dieny vao manomboka mianatra ilay olona?

¹² Inona no tokony ho tanjontsika dieny vao manomboka mianatra ilay olona? Ampio hahafantatra an’i Jehovah sy Jesosy izy, sady ampio ho tia an-dry zareo. Mba hanaovana an’izany, dia ny Tenin’Andriamanitra no ataovy misongadina fa tsy ny tenanao na ny fahaizanao Baiboly. (Asa. 10:25, 26) Ohatra tsara amin’izany ny apostoly Paoly. Rehefa nampianatra izy dia matetika no nanasongadina an’i Jesosy Kristy, ilay nirahin’i Jehovah mba hanampy antsika hahafantatra sy ho tia Azy. (1 Kor. 2:1, 2) Nasongadin’i Paoly koa fa zava-dehibe ny manampy ny mpianatra vaovao mba hanana toetra tsara, izay azo ampitovina amin’ny volamena, volafotsy, ary vatosoa. (1 Kor. 3:11-15) Anisan’ireo toetra sarobidy ireo ny finoana, ny fahendrena, ny fahaiza-mandinika, ary ny fahatahorana an’i Jehovah. (Sal. 19:9, 10; Ohab. 3:13-15; 1 Pet. 1:7) Tahafo àry i Paoly rehefa mampianatra, ka ampio ny mpianatrao mba hanana finoana matanjaka sy hifandray tsara amin’ilay Rainy be fitiavana any an-danitra.​—2 Kor. 1:24.

13. Ahoana no ampisehoantsika hoe manam-paharetana sy mahay mipetraka eo amin’ny toeran’ilay olona isika? (2 Korintianina 10:4, 5) (Jereo koa ny sary.)

¹³ Tahafo i Jesosy rehefa mampianatra, ka miezaha hanam-paharetana sy hahay hipetraka eo amin’ny toeran’ilay olona. Aza mametraka fanontaniana tsy mampahazo aina azy. Raha misy zavatra tsy eken’ny sainy dia aza mijanona ela be amin’iny, fa aleo iny hiverenana indray amin’ny manaraka. Aza terena hanaraka fampianarana iray izy raha mbola tsy vonona, fa avelao hamaka tsara ao am-pony aloha ny fahamarinana. (Jaona 16:12; Kol. 2:6, 7) Oharin’ny Baiboly amin’ny zavatra efa mafy orina mila ravana mantsy ny fampianaran-diso. (Vakio ny 2 Korintianina 10:4, 5.) Mety ho sarotra amin’ny mpianatra Baiboly iray ny hiala amin’ny zavatra ninoany hatry ny ela. Mila ampiantsika àry aloha izy mba hifandray tsara amin’i Jehovah. Ho mora kokoa aminy avy eo ny hiala amin’ilay fampianarana efa niorim-paka tao am-pony.​—Sal. 91:9.

REHEFA MIVORY IZY

14. Ahoana no tokony handraisantsika an’izay vaovao tonga mivory?

¹⁴ Tian’i Jehovah raha raisintsika amim-pitiavana ny olona vaovao tonga mivory, na inona na inona kolontsainy, foko niaviany, na fari-piainany. (Jak. 2:1-4, 9) Ahoana no hanaovantsika an’izany?

15-16. Ahoana no hanampiantsika an’ireo vaovao mba hahazo aina tsara ry zareo rehefa any am-pivoriana?

¹⁵ Tonga mivory ny olona sasany satria mba te hahafanta-javatra fotsiny, na nisy olona avy any an-toeran-kafa nampirisika azy. Tsy tokony hisalasala hanatona ny olona hoatr’ireny isika, ary handray tsara azy. Aza mafana fo tafahoatra anefa mba tsy ho sadaikatra izy. Asao hiara-mipetraka aminao koa ilay olona. Omeo Baiboly sy izay fitaovana ianarantsika izy, na asaivo miara-mijery aminao. Ankoatra izay, dia ataovy izay hampahazo aina azy. Rehefa tonga tao amin’ny Efitrano Fanjakana, ohatra, ny lehilahy iray dia nisy rahalahy nandray azy. Nolazainy tamin’ilay rahalahy hoe menatra, hono, izy satria tsy tsara be hoatran’ny an’ny olon-drehetra ny akanjony. Nataon’ilay rahalahy àry izay hampahazo aina azy, dia nomeny toky izy hoe hoatran’ny olon-drehetra ihany ny Vavolombelon’i Jehovah. Na dia efa vita batisa aza ilay lehilahy, tatỳ aoriana, dia tsy hadinony mihitsy ny fomba nandraisan’ilay rahalahy azy. Izao anefa no mila itandremantsika: Tsy tokony hidikiditra be amin’ny fiainan’ilay olona isika rehefa miresaka aminy, na aloha izany na aorian’ny fivoriana.​—1 Pet. 4:15.

¹⁶ Inona koa no azontsika atao mba hahazo aina tsara ny olona sambany vao mivory? Hanaja tsara isika rehefa miresaka momba ny olona tsy Vavolombelona sy ny zavatra inoany, na amin’ny resadresaka ataontsika izany, na amin’ny valin-tenintsika, na amin’ny anjarantsika. Aza mampiasa teny manafintohina na manambany an-dry zareo. (Tit. 2:8; 3:2) Tsy hanaratsiratsy ny zavatra inoan-dry zareo, ohatra, isika. (2 Kor. 6:3) Ny rahalahy manao lahateny ho an’ny besinimaro no tena mila mitandrina amin’io lafiny io. Mila tadidiny koa hoe misy olona tsy Vavolombelona manatrika eo, dia hohazavainy izay teny mety tsy ho azon-dry zareo.

17. Inona no tanjontsika rehefa mahita olona ‘manana toe-po tsara’ isika eny am-pitoriana?

¹⁷ Maika kokoa ny asa fampianarana, isaky ny mifarana ny andro tsirairay. Hiezaka foana àry isika hitady an’izay olona ‘manana toe-po tsara mba hahazoana fiainana mandrakizay.’ (Asa. 13:48) Tsy hisalasala isika hanasa an-dry zareo hianatra Baiboly na hanasa azy hivory. Raha manao an’izany isika dia hanampy an-dry zareo handeha amin’ilay “lalana mankany amin’ny fiainana.”​—Mat. 7:14.