Avy Amin’i Jehovah ny Tena Fifaliana

1-2. a) Inona no tsapan’ny olona maro amin’izao? b) Inona no hodinihintsika ato?

FIFALIANA. Manao izay azony atao ny olona eo amin’izao tontolo izao mba hahitana an’izany, nefa tsy mahita. Betsaka no kivy dia mieritreritra hoe tsy hisy mangirana mihitsy ny fiainany. Mety ho tratran’izany na dia ny vahoakan’i Jehovah aza. Miaina amin’ny “andro farany” mantsy isika, dia mety hiatrika olana mampiady saina na mahakivy be.​—2 Tim. 3:1.

² Hodinihintsika ato hoe inona no mety hahatonga antsika tsy ho falifaly intsony, ary inona no hanampy antsika ho falifaly indray. Fa hojerentsika aloha hoe avy aiza ny tena fifaliana.

ILAY LOHARANON’NY TENA FIFALIANA

3. Inona no ianarantsika momba an’i Jehovah avy amin’ny zavaboary? (Jereo koa ny sary.)

³ Falifaly foana i Jehovah hatramin’izay, dia tiany ho falifaly koa isika. Hita amin’ireo zavaboary noforoniny izany. Nataony tsara be, ohatra, ny planetantsika. Namorona loko isan-karazany koa izy, sy biby tia misangisangy, ary sakafo matsiro be dia be. Hita mihitsy hoe tiany isika, sady tiany hankafy fiainana.

Zanaka elefanta: Image © Romi Gamit/Shutterstock; zanaka pingouin: Vladimir Seliverstov/500px via Getty Images; zanak’osy: Rita Kochmarjova/stock.adobe.com; feso roa: georgeclerk/E+ via Getty Images

4. a) Nahoana i Jehovah no falifaly foana na dia mahita ny fijaliana eto an-tany aza? b) Inona no fanampiana omen’i Jehovah antsika? (Salamo 16:11)

⁴ Marina hoe “Andriamanitra falifaly” i Jehovah, kanefa fantany tsara koa ny fahoriana sy ny fijalian’ny olona eto an-tany. (1 Tim. 1:11) Tsy avelany hampihena ny fifaliany anefa izany. Fantany hoe mandalo ihany ny fahoriana sy ny fijaliana rehetra, ary efa nofaritany mialoha ny fotoana hamaranany an’izany. Manam-paharetana izy mandra-pahatongan’io fotoana io. Azony tsara koa ny olana mahazo antsika sady te hanampy antsika izy. Dia ahoana no ataony? Ampiany, ohatra, isika mba ho falifaly. (Vakio ny Salamo 16:11.) Hojerentsika hoe ahoana no nanaovany an’izany tamin’i Jesosy Zanany.

5-6. Nahoana i Jesosy no falifaly foana?

⁵ I Jesosy no falifaly indrindra amin’ny zavaboary rehetra noforonin’i Jehovah. Nahoana? Ireto misy antony roa. 1) “Izy no endrik’ilay Andriamanitra tsy hita maso”, dia nanahaka tanteraka ny Rainy izy. (Kol. 1:15; 1 Tim. 6:15) 2) Izy no niaraka ela indrindra tamin’ny Rainy, ilay Loharanon’ny tena fifaliana.

⁶ Falifaly foana i Jesosy satria nanao izay rehetra nasain’ny Rainy nataony izy. (Ohab. 8:30, 31; Jaona 8:29) Izany no nahatonga azy hankasitrahan’i Jehovah.​—Mat. 3:17.

7. Inona no hanampy antsika ho falifaly foana?

⁷ Ho falifaly koa isika raha mifandray akaiky amin’i Jehovah, ilay Loharanon’ny tena fifaliana. Vao mainka isika ho falifaly raha miezaka foana mianatra momba azy sy manahaka azy. Hahita fifaliana koa isika rehefa manao ny sitrapon’i Jehovah sy mahafantatra hoe mankasitraka antsika izy.a (Sal. 33:12) Ahoana anefa raha tsy mahita fifaliana isika indraindray na mandritra ny fotoana maharitra? Midika ve izany hoe tsy ankasitrahan’Andriamanitra isika? Tsy izany. Tsy lavorary isika, dia malahelo indraindray, na kivy, na miady saina. Azon’i Jehovah tsara izany. (Sal. 103:14) Hojerentsika hoe inona no mety hahatonga antsika tsy ho falifaly intsony, ary inona no hanampy antsika ho falifaly indray.

INONA NO METY HAHATONGA ANAO TSY HO FALIFALY INTSONY?

8. Inona no mety ho vokany rehefa miatrika olana isika?

⁸ Miatrika olana. Enjehina ve ianao izao? Sa tratran’ny loza araka ny natiora? Sa mahantra, na marary, na efa be taona? Mety hahatonga antsika tsy ho falifaly intsony ny olana hoatr’ireo, indrindra raha tsy afa-manoatra isika na tsy misy zavatra firy azontsika atao. Ny Baiboly mihitsy no milaza hoe ‘kivy ny olona rehefa malahelo ny fony.’ (Ohab. 15:13) Izany no nanjo an’ilay anti-panahy atao hoe Babis. Maty tao anatin’ny efa-taona ny rahalahiny sy ny ray aman-dreniny. Hoy izy: “Nahatsiaro ho nanirery aho, dia hoatran’ny hoe tsy nisy afaka nanampy ahy. Nisy fotoana koa aho niady saina be, satria tsy mba nanam-potoana firy niarahana tamin’i Dada sy Neny ary ny rahalahiko aho tamin-dry zareo mbola velona.” Mety handreraka sy hahakivy tokoa ny olana eo amin’ny fiainana.

9. Inona no hanampy antsika ho falifaly indray? (Jeremia 29:4-7, 10)

⁹ Inona no hanampy antsika ho falifaly indray? Aza mifantoka amin’izay tsy azonao ovana fa mifalia amin’izay misy eo. Miely be izao ilay toe-tsaina hoe tsy ho falifaly mihitsy ianao raha tsy tonga lafatra ny fiainanao. Tsy marina anefa izany. Rehefa lasa babo tany Babylona, ohatra, ny Jiosy, dia nampirisihin’i Jehovah ry zareo mba hanaiky an’izany fiovana izany sy hiezaka hankafy an’ilay fiainana vaovao, na dia sarotra aza ilay izy. (Vakio ny Jeremia 29:4-7, 10.) Inona no ianarantsika avy amin’izany? Ekeo ny zava-misy, dia miezaha hankasitraka an’izay zavatra tsara anananao. Tadidio koa hoe tsy hahafoy anao mihitsy i Jehovah. (Sal. 63:7; 146:5) Niharan-doza, ohatra, ilay anabavy atao hoe Effie, dia lasa nalemy. Hoy izy: “Tena nanampy ahy i Jehovah sy ny fianakaviako ary ny fiangonana. Hoatran’ny hoe tsy nahay nankasitraka àry aho raha namoy fo. Tiako haseho amin’i Jehovah sy ny mpiara-manompo hoe mankasitraka ny fanampiana be avy amin-dry zareo aho, dia miezaka ny ho falifaly foana.”

10. Nahoana isika no afaka ny ho falifaly na dia miatrika olana aza?

¹⁰ Na tsy tonga lafatra aza ny fiainantsika, na hoe nisy zavatra ratsy be nitranga tamintsika na tamin’ny fianakaviantsika, dia mbola afaka ny ho falifaly foana isika.b (Sal. 126:5) Tsy miankina amin’ny zavatra iainantsika mantsy ny fifaliantsika. Hoy ilay mpisava lalana atao hoe Maria: “Afaka ny ho falifaly foana ianao rehefa miatrika olana, raha mitadidy ny fampanantenan’i Jehovah. Tsy midika izany hoe tsy hitomany mihitsy ianao, na hoe tsy hampiseho ny fihetseham-ponao. Afaka manampy antsika ho falifaly foana anefa ilay Raintsika, na inona na inona atrehintsika.” Tadidio koa hoe na mafy hoatran’ny inona aza ny olana atrehintsika, dia mandalo ihany ireny, hoatran’ny dian-tongotra eny amin’ny tora-pasika. Tsy ho ela ireny dia ho lasan’ny rano, ka tsy hamela soritra intsony.

11. Nahoana no mampahery anao ny ohatr’i Paoly?

¹¹ Ahoana raha manomboka mieritreritra ianao hoe: ‘Tsy ankasitrahan’i Jehovah intsony angamba aho matoa manana olana be dia be hoatr’izao’? Raha izay, dia diniho ny tantaran’ny mpanompon’i Jehovah tsy nivadika fahiny, izay nanana olana be dia be. Anisan’izany ny apostoly Paoly. I Jesosy mihitsy no nifidy azy hitory ny fahamarinana tamin’ny “hafa firenena sy ny mpanjaka ary ny zanak’Israely.” (Asa. 9:15) Tombontsoa be izany! Niatrika olana nisesisesy anefa i Paoly. (2 Kor. 11:23-27) Midika ve izany hoe tsy nankasitrahan’i Jehovah intsony izy? Tsy izany. Tsy ho nahavita niaritra aza izy raha tsy teo i Jehovah. (Rom. 5:3-5) Diniho indray ny fiainanao. Mahavita miaritra sy tsy mivadika ianao, na eo aza ny olana atrehinao. Matokia àry fa ankasitrahan’i Jehovah koa ianao.

12. Inona no mety ho vokany rehefa tsy tanteraka ny zavatra nantenaintsika?

¹² Tsy tanteraka ny zavatra antenaina. (Ohab. 13:12) Tia sy mankasitraka an’i Jehovah isika, dia lasa te hanatratra tanjona eo amin’ny fanompoana azy. Raha tsy mamela antsika hanatratra an’ilay izy anefa ny zavatra iainantsika, dia mety ho kivy isika. (Ohab. 17:22) Hoy ilay mpisava lalana atao hoe Holly: “Te hanatrika ny Sekolin’ny Mpitory Ilay Fanjakana aho, na hanompo any an-tany hafa, na handray anjara amin’ny fanorenana an’i Ramapo. Niova anefa ny fiainako, dia tsy afaka nanatratra an’ireo tanjona ireo intsony aho. Kivy be aho. Malahelo ianao rehefa misy zavatra tianao hatao nefa tsy afaka manao an’ilay izy ianao.” Betsaka no mahatsapa hoatr’izany.

13. Inona no tanjona azontsika tratrarina raha voafetra ny zavatra azontsika atao?

¹³ Inona no hanampy antsika ho falifaly indray? Tadidio hoe tsy mitaky be loatra amintsika i Jehovah. Tsy tereny hanao zavatra tsy ho vitantsika isika, ary tsy miankina amin’izay vitantsika eo amin’ny fanompoana no mahatonga antsika ho sarobidy aminy na tsia. Tiany kosa isika raha tsy mivadika aminy, sady miaiky hoe voafetra ny zavatra vitantsika. Ny fontsika no tena dinihiny, fa tsy izay ataontsika. (Mika 6:8; 1 Kor. 4:2) Dia isika indray ve no hitaky be loatra amin’ny tenantsika, nefa i Jehovah aza tsy manao an’izany?c Raha voafetra àry ny azonao atao eo amin’ny fanompoana, dia mifantoha amin’izay vitanao. Afaka mampiofana tanora ve, ohatra, ianao, na mampahery zokiolona? Azonao atao tanjona ve ny hampahery olona mivantana, na amin’ny alalan’ny telefaonina na SMS? Hitahy anao i Jehovah ka hanampy anao ho falifaly foana, raha miezaka manatratra an’izay tanjona azonao tratrarina ianao. Tadidio koa hoe tsy ho ela isika dia hiaina ao amin’ny tontolo vaovao, ka tsy ho voafetra ny fanompoana azontsika atao, sady mety ho amin’ny fomba tsy eritreretintsika mihitsy aza. Izao no nolazain’i Holly, ilay voaresaka terỳ aloha: “Saintsainiko hoe: ‘Mbola hiaina mandrakizay ange aho e!’ Hampian’i Jehovah aho, dia ho tratrako ny tanjoko sasany ao amin’ny tontolo vaovao.”

14. Inona koa no mety hahatonga antsika tsy ho falifaly intsony?

¹⁴ Manao izay mampifalifaly ny tenanao fotsiny. Hindrahindraina be ao amin’ny tambazotran-tserasera hoe tena ho sambatra ianao raha mampifalifaly ny tenanao foana. Ampirisihina ny olona mba tsy hieritreritra afa-tsy ny hiala voly, hiantsena, ary hitsidika toerana samihafa. Tsy ratsy ny manao an’ireo. Efa noforonin’i Jehovah hankafy zavatra tsara mantsy isika. Betsaka anefa no nahita hoe tsy nahitany fifaliana akory ilay zavatra noeritreretiny hoe hampifalifaly azy. Hoy ilay mpisava lalana atao hoe Eva: “Tsy ho afa-po mihitsy ianao raha ny hampifalifaly ny tenanao foana no ifantohanao.” Ho kivy sy ho diso fanantenana fotsiny ny olona hoatr’izany.

15. Inona no ianarantsika avy amin’i Solomona Mpanjaka?

¹⁵ Niezaka nanao zavatra isan-karazany i Solomona Mpanjaka, mba hahitana raha tena mitondra fifaliana izany. Nanandrana karazan-tsakafo matsiro, ohatra, izy, nihaino mozika mahafinaritra, ary nividy zavatra lafo vidy. Tsy nahafa-po azy anefa ireny. Izao no nolazainy: “Tsy leon’ny mijery ny maso, ary tsy leon’ny mihaino koa ny sofina.” (Mpito. 1:8; 2:1-11) Hoatran’ny vola sandoka ireny zavatra heverin’izao tontolo izao hoe tena ahitana fifaliana ireny. Fitaka fotsiny ireny!

16. Nahoana isika no ho falifaly indray raha manao zavatra ho an’ny hafa? (Jereo koa ny sary.)

¹⁶ Inona no hanampy antsika ho falifaly indray? Nampianatra i Jesosy hoe: “Mahasambatra kokoa ny manome noho ny mandray.” (Asa. 20:35) Hoy ilay anti-panahy atao hoe Alekos: “Miezaka manao zavatra tsotsotra ho an’ny hafa aho. Vao mainka aho falifaly rehefa manome ho an’ny hafa. Tsy mifantoka be amin’ny tenako mantsy aho.” Ary inona no azonao atao ho an’ny hafa? Raha mahita olona malahelohelo ianao, dia miezaha hampahery azy. Mety tsy hahavita hamaha ny olana mahazo azy ianao, nefa afaka mampionona azy. Amin’ny fomba ahoana? Henoy tsara izy, ary miezaha hahatakatra ny fihetseham-pony sy hangoraka azy. Ampahatsiahivo izy mba hametraka ny zavatra manavesatra azy amin’i Jehovah. (Sal. 55:22; 68:19) Azonao ampiana ny olona hoatr’izany mba hahatsapa hoe tsy mahafoy azy i Jehovah. (Sal. 37:28; Isaia 59:1) Afaka manao zavatra hafa koa ianao, ohatra hoe mikarakara ny sakafony, na miara-mandehandeha aminy. Asao hanompo miaraka aminao koa izy. Mety hahatonga azy ho falifaly indray izany. Avelao i Jehovah hampiasa anao mba hampaherezana ny hafa. Tena ho faly ianao raha mifantoka amin’ny hafa fa tsy mifantoka amin’ny tenanao.​—Ohab. 11:25.

17. Inona no tokony hataontsika raha tiantsika ny ho falifaly foana? (Salamo 43:4)

¹⁷ Tena ho faly isika raha miezaka ho akaiky an’ilay Raintsika any an-danitra foana. Manome toky mantsy ny Baiboly hoe ‘hanome fifaliana be ho antsika’ i Jehovah. (Vakio ny Salamo 43:4.) Tsy hisy hampanahy antsika amin’izay, na inona na inona olana atrehintsika. Raha i Jehovah àry no ataontsika namana akaiky indrindra, dia hampiany isika mba ho falifaly foana mandrakizay.​—Sal. 144:15.