LESONA 01
Afaka Manampy Anao ny Baiboly
Efa nanontany ny ankamaroantsika hoe maninona isika no mijaly sy maty, na hoe hanao ahoana ny hoavy. Mety hampiady saina antsika koa ny fitadiavam-bola, ary tiantsika ho fantatra hoe ahoana no hahasambatra ny fianakaviantsika. Betsaka no mahita hoe mamaly ny fanontaniana manahiran-tsaina azy ny Baiboly, sady manome torohevitra manampy azy eo amin’ny fiainana andavanandro. Tena afaka manampy ny olona ve ny Baiboly, araka ny hevitrao?
1. Inona, ohatra, ny fanontaniana valian’ny Baiboly?
Mamaly an’ireto fanontaniana mampiady saina ireto ny Baiboly: Nisy namorona ve izao rehetra izao? Inona no antony namoronana antsika? Maninona ny tsara fanahy no mijaly? Manao ahoana ny olona rehefa maty? Maninona no be dia be ny ady nefa ny olona samy te hanana fiainana milamina daholo? Ho potika ve ny tany indray andro any? Mampirisika antsika hitady ny valin’ny fanontaniana hoatr’ireo ny Baiboly, ary olona an-tapitrisany no mahita hoe tena mahafa-po ny valiny omeny.
2. Nahoana ny Baiboly no manampy antsika eo amin’ny fiainana andavanandro?
Manome torohevitra tsara ny Baiboly. Atorony, ohatra, hoe inona no tena mahasambatra ny fianakaviana. Resahiny koa hoe inona no azo atao mba tsy hiady saina be loatra, ary inona no hanampy antsika ho tia ny asantsika. Ho fantatrao izay lazain’ny Baiboly momba an’izany sy ny foto-kevitra hafa, rehefa miara-midinika an’ity boky ity isika. Ho resy lahatra ianao amin’izay hoe ‘mahasoa ny Soratra Masina iray manontolo.’—2 Timoty 3:16.
Tsy solon’ny Baiboly ity boky ity. Mampirisika anao handinika ny Baiboly kosa izy ity. Tsara àry raha vakinao ny andinin-teny ao amin’ny lesona tsirairay. Jereo avy eo raha mifanaraka amin’izay ianaranao ilay izy na tsia.
ANDAO HOHALALININTSIKA
Hojerentsika hoe ahoana no nanampian’ny Baiboly ny olona sasany, inona no azonao atao mba ho tia mamaky Baiboly ianao, ary nahoana ianao no mila fanampiana mba hahazo tsara azy io.
3. Mitari-dalana antsika ny Baiboly
Hoatran’ny jiro mazava be mitari-dalana antsika ny Baiboly. Afaka manampy antsika handray fanapahan-kevitra tsara izy io, sady milaza amintsika hoe inona no hitranga amin’ny hoavy.
Vakio ny Salamo 119:105, ary iaraho midinika ireto fanontaniana ireto:
Raha jerena ny tenin’io mpanoratra salamo io, ahoana no fiheverany ny Baiboly?
Ahoana no fiheveranao ny Baiboly?
4. Mamaly ny fanontaniantsika ny Baiboly
Hitan’ny vehivavy iray hoe voavaly tao amin’ny Baiboly daholo ny fanontaniana nampiady saina azy. Alefaso ilay VIDEO, ary iaraho midinika ny fanontaniana.
Inona ny fanontaniana nampiady saina an’ilay vehivavy tao amin’ilay video?
Inona ny soa azony rehefa nianatra Baiboly izy?
Mampirisika antsika hametraka fanontaniana ny Baiboly. Vakio ny Matio 7:7, ary iaraho midinika ity fanontaniana ity:
Inona ny fanontaniana manahiran-tsaina anao, ka mba tianao ho hita ao amin’ny Baiboly ny valiny?
5. Mahafinaritra ny mamaky Baiboly
Betsaka no tia mamaky Baiboly sady mandray soa avy amin’izany. Alefaso ilay VIDEO, ary iaraho midinika ny fanontaniana.
Araka ilay video, ahoana ny fihetseham-pon’i Dmytro rehefa nahazo Baiboly amin’ny tenin’ny tanana izy?
Inona ny soa azon’izy mianakavy rehefa mijery an’ilay Baiboly amin’ny tenin’ny tanana izy ireo?
Mampionona antsika sy mahatonga antsika hanana fanantenana ny Baiboly. Vakio ny Romanina 15:4, ary iaraho midinika ity fanontaniana ity:
Inona no tsapanao rehefa fantatrao hoe afaka mampionona sy manome fanantenana anao ny Baiboly?
6. Hahazo tsara an’izay lazain’ny Baiboly isika raha misy manampy
Betsaka no mahita hoe tsy ampy ny mamaky Baiboly, fa ilaina koa ny miara-midinika azy io amin’ny olon-kafa. (Asa 8:26-29) Vakio ny Asan’ny Apostoly 8:26-31, ary iaraho midinika ity fanontaniana ity:
Inona no hanampy antsika hahazo tsara an’izay lazain’ny Baiboly?—Jereo ny andininy 30, 31.
Lasa nahazo tsara ny Soratra Masina ilay lehilahy etiopianina rehefa nisy nanampy azy. Betsaka koa no mahita hoe mandray soa izy rehefa misy olona miara-midinika ny Baiboly aminy
MISY MITENY HOE: “Mandany andro fotsiny izany mianatra Baiboly izany.”
Ahoana ny hevitrao?
FAMINTINANA
Manome torohevitra ilaina amin’ny fiainana andavanandro ny Baiboly, mamaly an’ireo fanontaniana manahiran-tsaina, ary mampionona sy manome fanantenana.
Famerenana
Torohevitra hoatran’ny ahoana no hita ao amin’ny Baiboly?
Inona, ohatra, ny fanontaniana valian’ny Baiboly?
Inona no mba tianao hianarana ao amin’ny Baiboly?
JEREO KOA IRETO
Mbola azo ampiharina hatramin’izao ve ny torohevitry ny Baiboly?
“Tsy Mety Lany Andro ny Fampianaran’ny Baiboly” (Ny Tilikambo Fiambenana No. 1 2018)
Jereo ato hoe ahoana no nanampian’ny Baiboly ny lehilahy marenina iray mba hahavita hamoaka an’izay ao am-pony.
“Hitako Izany, Nefa Tsy Azoko ny Heviny” (Ny Tilikambo Fiambenana 1 Martsa 2013)
Ho hitanao ato ny torohevitry ny Baiboly ho an’ny fianakaviana.
“Torohevitra 12 Mahasambatra ny Fianakaviana” (Mifohaza! No. 2 2018)
Betsaka no mieritreritra hoe Andriamanitra no mitondra an’izao tontolo izao. Inona anefa no lazain’ny Baiboly?
Nahoana Ianao no Tokony Hianatra Baiboly?—Video Manontolo (3:13)