‘Nisaotra An’Andriamanitra i Paoly ary Nihanahery’

Henon’ireo rahalahy tany Roma hoe ho avy i Paoly. Nisy tamin’izy ireo àry nandeha an-tongotra 64 km mba hitsena azy. Tena be fitiavana izy ireo. Inona no vokatr’izany tamin’i Paoly? “Nisaotra an’Andriamanitra i Paoly raha vao nahita an’ireo, ary nihanahery.” (As 28:15) I Paoly matetika no nampahery ny fiangonana notsidihiny. Izy indray anefa teto no nahazo fampaherezana.—2Ko 13:10.

Mampahery an’ireo rahalahy sy anabavy koa ny mpiandraikitra ny faritra rehefa mitsidika fiangonana. Hoatr’antsika rehetra ihany anefa izy ireny, ka mety ho reraka, na kivy, na hiady saina. Rahoviana indray ny mpiandraikitra ny faritra no hitsidika ny fiangonanareo? Inona no azonao atao amin’io mba “hisy fifampaherezana” eo aminareo?—Ro 1:11, 12.

• 

  Miezaha hanatrika fivoriana alohan’ny fanompoana. Tena faly ny mpiandraikitra ny faritra rehefa miezaka be ny mpitory, mba ho afaka handray soa amin’ilay herinandro manokana. (1Te 1:2, 3; 2:20) Afaka manao mpisava lalana mpanampy ve ianao amin’ilay volana itsidihany? Sao dia afaka miara-mitory amin’izy mivady ianao, na miara-mampianatra aminy? Tena tian’izy ireo ny miara-manompo amin’ny mpitory samy hafa, anisan’izany ireo vaovao na ireo mbola tsy ampy traikefa.

• 

  Miezaha ho tia mandray vahiny. Sao dia afaka mampiantrano azy ireo ianao, na manasa azy hisakafo? Ho hitany amin’izay hoe tena tianao izy ireo. Zavatra tsotsotra dia efa mety aminy.—Lk 10:38-42.

• 

  Henoy izay torohevitra sy tari-dalana omeny ary ampiharo. Manampy antsika hanome ny tsara indrindra ho an’i Jehovah ny mpiandraikitra ny faritra. Mety hanome torohevitra hentitra mihitsy aza izy indraindray. (1Ko 5:1-5) Tena faly izy rehefa manaiky sy mankatò isika.—He 13:17.

• 

  Ankasitraho izy ireo. Teneno azy ireo ny soa noraisinao noho ny ezaka mafy ataony. Azonao lazaina azy mivantana izany, na soratana amin’ny taratasy kely.—Kl 3:15.