Miezaha Hifampahery Mandritra ny Fivoriana

1. Nahoana isika no manome valin-teny mandritra ny fivoriana?

NAHOANA isika no manatrika fivoriana? Mba hidera an’i Jehovah aloha voalohany indrindra. (Sal. 26:12; 111:1) Mivory koa isika amin’izay afaka mifampahery amin’izao fotoan-tsarotra izao. (1 Tes. 5:11) Manao an’ireo isika rehefa manangan-tanana sy manome valin-teny.

2. Isaky ny inona isika no afaka manome valin-teny mandritra ny fivoriana?

² Imbetsaka isika no afaka manome valin-teny isan-kerinandro, mandritra ny fivoriana. Afaka manao an’izany, ohatra, isika amin’ny faran’ny herinandro, mandritra ny Fianarana Ny Tilikambo Fiambenana. Afaka manome valin-teny koa isika amin’ny fivoriana andavanandro mandritra ny Vatosoa Ara-panahy, sy ny Fianarana Baiboly Ataon’ny Fiangonana, ary amin’ny anjara hafa misy fiaraha-midinika.

3. Inona ny olana mety hatrehintsika, ary nahoana no afaka manampy antsika ny Hebreo 10:24, 25?

³ Samy te hidera an’i Jehovah sy hampahery ny mpiara-manompo daholo isika. Mety hisy olana anefa. Angamba isika matahotra hanome valin-teny, na mazoto mamaly ihany nefa tsy voatondro imbetsaka araka ny itiavantsika azy. Ahoana no iatrehana an’ireo? Mamaly an’izany ny taratasin’ny apostoly Paoly ho an’ny Hebreo. Noresahiny tao fa zava-dehibe ny miara-mivory, ary ny “hifampahery” no tokony hifantohantsika. (Vakio ny Hebreo 10:24, 25.) Tsy dia hatahotra hamaly isika, raha tsapantsika fa mampahery an’ireo mpiara-manompo na dia valin-teny tsotra aza mba hampisehoantsika ny finoantsika. Ary ahoana raha tsy voatondro matetika isika? Afaka ny ho faly isika hoe mba ny hafa indray no mandray anjara.​—1 Pet. 3:8.

4. Inona ny hevitra telo hodinihintsika ato?

⁴ Ahoana àry no ahafahantsika mifampahery raha any amin’ny fiangonana kely isika, ka vitsy no manome valin-teny? Ahoana indray no anaovana an’izany raha any amin’ny fiangonana lehibe isika, ka be dia be no tia mandray anjara? Hodinihintsika ato ireo. Horesahintsika koa izay azontsika atao mba tena hampahery ny hafa ny zavatra resahintsika rehefa mamaly isika.

RAHA KELY NY FIANGONANAREO

5. Ahoana no ahafahantsika mifampahery raha vitsy ny mpanatrika?

⁵ Tsy dia misy mpanome valin-teny azon’ny mpitarika isafidianana any amin’ny fiangonana kely na antoko-mpitory. Mety hiandry elaela izy indraindray vao misy manangan-tanana. Mety hitarazoka àry ilay fivoriana, nefa tsy tena mampahery izany. Inona no azonao atao? Atsangano matetitetika ny tananao. Mety handrisika ny hafa hamaly imbetsaka kokoa izany.

6-7. Inona no azonao atao mba tsy hitebiteby loatra ianao rehefa hamaly?

⁶ Ahoana anefa raha tsy mahazo aina ianao raha vao mieritreritra fotsiny hoe hamaly? Betsaka no hoatr’izany. Misy zavatra azonao atao anefa mba hampahery kokoa an’ireo rahalahy sy anabavy ianao. Jereo hoe inona no hanampy anao tsy hitebiteby loatra rehefa hamaly. Ahoana no hanaovanao an’izany?

⁷ Maninona raha jerena indray ireo Tilikambo Fiambenana efa nivoaka?b Misy soso-kevitra mahasoa mantsy ao amin’izy ireny. Anisan’izany ny hoe manomàna tsara. (Ohab. 21:5) Ho mora kokoa aminao ny hamaly raha azonao tsara ilay fianarana. Ataovy fohy koa ny valin-teninao. (Ohab. 15:23; 17:27) Tsy dia hanahy loatra mantsy ianao raha fohy izany, ohatra hoe fehezanteny iray na roa fotsiny. Ho mora kokoa amin’ireo rahalahy sy anabavy aza ny hahazo ny valin-teny fohy omenao, toy izay valin-teny lava be misy hevitra isan-karazany. Ho hita hoe nanomana tsara ianao sady azonao tsara ilay fianarana, raha manome valin-teny fohy amin’ny fomba fiteninao ianao.

8. Ahoana no fahitan’i Jehovah an’izay tsara indrindra vitantsika?

⁸ Ahoana raha efa niezaka nanaraka ny sasany tamin’ireo soso-kevitra ireo ianao, nefa mbola mitebiteby foana ka tsy mahavita mamaly mihoatra ny indray mandeha na indroa? Matokia fa faly i Jehovah rehefa miezaka manao izay vitanao ianao. (Lioka 21:1-4) Ny hoe manome ny tsara indrindra mantsy tsy midika hoe manezakezaka manao izay tsy ho vita. (Fil. 4:5) Fantaro hoe inona no azonao atao, dia ataovy tanjona ny hanao an’ilay izy, ary mivavaha mba hanana fo tony. Mety hoe ny hanome valin-teny fohy iray izany tanjona izany amin’ny voalohany.

RAHA LEHIBE NY FIANGONANAREO

9. Inona no olana mety hitranga any amin’ny fiangonana lehibe?

⁹ Hafa indray ny olana raha be dia be ny mpitory ao amin’ny fiangonana. Tena betsaka angamba ny rahalahy sy anabavy mazoto mamaly, dia matetika ianao no tsy voatondro. Hoatr’izany i Daniella.c Tia manome valin-teny foana izy mandritra ny fivoriana. Anisan’ny fanompoana izany taminy sady fomba hampaherezana ny hafa. Milentika kokoa ao an-tsainy koa ny fahamarinana ao amin’ny Baiboly rehefa mamaly izy. Nifindra tany amin’ny fiangonana lehibe kokoa anefa izy, dia lasa tsy afaka namaly firy. Indraindray aza tsy voatondro mihitsy izy nandritra ny fivoriana manontolo. Izao no nolazainy: “Kivy aho! Hoatran’ny hoe very tombontsoa izany aho. Rehefa miverimberina foana ilay izy, dia lasa mieritreritra aho hoe fanahy inian’ilay mpitarika tsy tondroina mihitsy angamba aho.”

10. Inona no azonao atao mba ho azo antoka kokoa hoe ho afaka hanome valin-teny ianao?

¹⁰ Hoatran’ny an’i Daniella koa ve no tsapanao? Angamba ianao tsy te hanangan-tanana intsony, fa hihaino fotsiny mandritra ny fivoriana. Aza milavo lefona anefa. Inona no azonao atao? Manomàna valin-teny maromaro isaky ny fivoriana. Amin’izay rehefa tsy voatondro ianao any am-piandohan’ny fianarana, dia mety mbola ho afaka hamaly ihany any aoriana. Rehefa manomana ny Fianarana Ny Tilikambo Fiambenana ianao, dia saintsaino hoe inona no ifandraisan’ny fehintsoratra tsirairay amin’ny foto-kevitr’ilay lahatsoratra. Ho afaka hanome valin-teny tsara foana ianao amin’izay, mandritra an’ilay fianarana. Ankoatra izay, dia miomàna mba hamaly amin’ireo fehintsoratra miresaka fahamarinana lalina sarotsarotra hazavaina. (1 Kor. 2:10) Mety ho vitsy kokoa mantsy no manangan-tanana amin’ireny. Ahoana anefa raha efa niezaka nampihatra an’ireo soso-kevitra ireo ianao, nefa mbola tsy voatondro ihany mandritra ny fivoriana maromaro? Manatòna an’ilay mpitarika alohan’ny anombohan’ny fivoriana, dia resaho aminy hoe aiza ho aiza ianao no te hamaly.

11. Mampirisika antsika hanao inona ny Filipianina 2:4?

¹¹ Vakio ny Filipianina 2:4. Nahazo fanahy masina ny apostoly Paoly, ka nampirisika ny Kristianina mba hitady izay hahasoa ny hafa. Ahoana no ampiharantsika an’izany mandritra ny fivoriana? Tadidio hoe mba te hamaly hoatr’antsika koa ry zareo.

12. Inona no fomba tsara ampaherezana ny hafa mandritra ny fivoriana? (Jereo koa ny sary.)

¹² Saintsaino izao: Mibodo resaka ve ianao rehefa miaraka amin’ny namanao ka tsy misy handaharana mihitsy? Mazava ho azy fa tsia! Tianao raha mba mandray anjara amin’ilay resaka koa ry zareo. Hoatr’izany koa mandritra ny fivoriana. Tiantsika raha betsaka araka izay azo atao no mamaly. Avelantsika hanambara ny finoany ry zareo. Izany mantsy no anisan’ny fomba tsara indrindra hampaherezantsika ny rahalahy sy anabavintsika. (1 Kor. 10:24) Andao hojerentsika hoe ahoana no azo anaovana an’izany.

13. Inona no azonao atao mba ho betsaka kokoa no afaka mamaly?

¹³ Ataovy fohy ny valin-teninao mba ho betsaka kokoa no afaka mamaly. Afaka manome modely amin’izany ny anti-panahy sy ny mpitory mahay hafa. Na fohy aza ny valin-teninao, dia aza miresaka hevitra be loatra. Raha resahinao daholo mantsy ny hevitra ao amin’ilay fehintsoratra, dia inona intsony no horesahin’ny hafa? Misy soso-kevitra roa, ohatra, eto amin’ity fehintsoratra ity hoe: Ataovy fohy ny valin-teninao ary aza miresaka hevitra be loatra. Maninona raha ny iray amin’ireo ihany no valiana, raha ianao no voatondro voalohany eto amin’ity fehintsoratra ity?

14. Inona no hanampy antsika hanapa-kevitra hoe impiry isika no hanangan-tanana? (Jereo koa ny sary.)

¹⁴ Mila mandinika tsara isika vao manapa-kevitra hoe impiry isika no hanangan-tanana. Raha manangan-tanana matetika loatra mantsy isika, dia hoatran’ny hoe manery an’ilay mpitarika hanondro antsika foana, na dia mbola tsy afaka namaly aza ny hafa. Mety hahakivy an-dry zareo izany, ka tsy hanangana intsony izy.​—Mpito. 3:7.

15. a) Inona no tokony hotandremantsika raha tsy voatondro isika? b) Ahoana no ampisehoan’ny mpitarika hoe miahy ny tsirairay izy? (Jereo ilay hoe “Ho An’ny Mpitarika.”)

¹⁵ Mety tsy ho afaka hanome valin-teny imbetsaka araka izay tiantsika isika, raha betsaka ny mpitory manangan-tanana. Indraindray aza isika mety tsy ho voatondro mihitsy. Mety hahakivy izany, nefa tsy tokony hahatezitra antsika.​—Mpito. 7:9.

16. Ahoana no azonao ampaherezana an’ireo nanome valin-teny?

¹⁶ Inona no azonao atao raha tsy afaka namaly imbetsaka araka izay tianao ianao? Henoy tsara ny hafa rehefa manome valin-teny, dia derao izy rehefa mirava. Mety hampahery an’ireo rahalahy sy anabavinao hoatran’ilay valin-teny saika homenao ny teny fiderana hoatr’izany. (Ohab. 10:21) Anisan’ny fomba ahafahana mifampahery koa mantsy ny manao teny fiderana.

FOMBA HAFA AHAFAHANA MIFAMPAHERY

17. a) Inona no azon’ny ray aman-dreny atao mba hanampiana ny zanany hanome valin-teny mety tsara? b) Inona ny zavatra efatra azo atao rehefa manomana valin-teny, araka ilay video? (Jereo koa ny fanamarihana ambany pejy.)

¹⁷ Inona koa no azontsika atao mba hahafahantsika mifampahery mandritra ny fivoriana? Raha manan-janaka ianao, dia ampio ny zanakao mba hanomana valin-teny mifanaraka amin’ny taonany. (Mat. 21:16) Hevitra lehibe indraindray no dinihina mandritra ny fianarana, ohatra hoe olana ao an-tokantrano na momba ny fitondran-tena. Na amin’ireny aza anefa, dia mety hisy fehintsoratra iray na roa azon’ny zanakao anomezana valin-teny. Ampio koa ny zanakao hahatakatra hoe tsy voatery ho voatondro foana izy isaky ny manangan-tanana. Tsy ho diso fanantenana izy amin’izay, raha olon-kafa no voatondro fa tsy izy.​—1 Tim. 6:18.d

18. Inona no azontsika atao mba tsy hisarika ny sain’ny hafa ho amin’ny tenantsika isika rehefa manome valin-teny? (Ohabolana 27:2)

¹⁸ Afaka manomana valin-teny manome voninahitra an’i Jehovah sy mampahery ny hafa daholo isika. (Ohab. 25:11) Marina hoe afaka manome valin-teny fohy momba ny zavatra niainantsika isika indraindray. Tsy tokony hiresaka be loatra momba ny tenantsika anefa isika. (Vakio ny Ohabolana 27:2; 2 Kor. 10:18) Hiezaka kosa isika hifantoka amin’i Jehovah sy ny Teniny ary ny vahoakany amin’ny ankapobeny. (Apok. 4:11) Mazava ho azy fa raha manasa antsika hiresaka momba ny hevitsika na ny zavatra iainantsika ilay fanontaniana, dia afaka manao an’izany isika. Misy fanontaniana hoatr’izany eo amin’ny fehintsoratra manaraka.

19. a) Inona no vokany rehefa miahy ny mpanatrika rehetra isika? (Romanina 1:11, 12) b) Inona no itiavanao an’ilay hoe manome valin-teny mandritra ny fivoriana?

¹⁹ Tsy misy fitsipika hentitra momba ny hoe ahoana no tokony hanomezana valin-teny. Na izany aza, dia afaka miezaka daholo isika mba hampahery ny hafa isaky ny mandray anjara. Mety hidika izany hoe mila manome valin-teny imbetsaka kokoa isika, na hoe hianina amin’izay valin-teny azontsika nomena, ary ho faly fa mankasitraka an’io tombontsoa io hoatr’antsika ihany ny hafa. Raha mifantoka amin’izay hahasoa ny hafa isika mandritra ny fivoriana, dia ho afaka “hifampahery” daholo.​—Vakio ny Romanina 1:11, 12.