LESONA 12

Miezaha ho Tsara Fanahy sy Hangoraka

1 Tesalonianina 2:7, 8

AHOANA IZANY? Ataovy tsapan’ny olona iresahanao hoe tena vokatry ny fonao izay lazainao, ary tena te hanampy azy ianao.

Eritrereto izay mahazo an’ilay olona. Saintsaino hoe inona ny olana mahazo azy, ary inona ny tsapany. Hangoraka azy ianao amin’izay, ka ho vokatry ny fonao ny teninao.
Fidio tsara ny teny holazaina. Miezaha hampionona sy hampahery, ary aza miteny zavatra manafintohina. Aza manakiana ny olona tsy manompo an’i Jehovah na manakiana ny zavatra inoany.
Ataovy hitany hoe tena te hanampy azy ianao. Tokony ho heno amin’ny feonao izany, sady ho hita amin’ny fihetsikao sy ny endrikao. Miezaha koa ho sariaka foana.

Aza amboamboarina be ny fihetsika sy ny feo ary ny endrika. Rehefa mamaky teny, ohatra, ianao, dia avoahy tsara izay fihetseham-po ao, nefa aza atao tafahoatra, sao dia ianao indray no hifantohan’ny olona fa tsy ilay vakiteny. Aza atao mitsatotsatoka be koa ny feonao.