8ǁÎ ǃÂB

ǁKhan re ama tama ǂgomde, ama ǂgoms ǀgaub ai ǃoaba re

1. ǀGoreǀîs tawa i ga hā o, khoena mâ ǁhûis aisi mâ nētsē?

JESUB ge ge mî: “Tita ǀkha hâ tama i ge ti ǃoagu hâ-e.” (Mateub 12:30) Jehovab ǀkhāb ai da ga mâ tama io o da ge ǁGâuab ǀkhāb ai mâ. ǂGui khoen ge ra ǂâi Eloban ǃgâiǀgaub ai ra ǃoaba di, xawes ge Elobmîsa ra mî ǁGâuab ge “ǃhūbaib hoaragaba ra ǂgaeǂhawuba.” (ǂHaiǂhais 12:9) Miliundi khoen ge ra ǂgom Eloban ta ǀgoreǀî ti, xawen ge amabes ǃnâ ǁGâuaba ra ǃoabaǃ Khoen ge nētsē a ǁhûi ǁkhā: Jehovaban nî ǃoaba, ‘Amab di Eloba’ tamas ka io ǁGâuaba, ‘ǂhomib di ǁgûba.’—Psalmti 31:6; Johaneb 8:44.

ǂOa re ama tama ǂgomsa xu

2. Mâ ǀguiǀgaub aib ǁGâuaba khoena ra ǁkhae in tā Jehovaba ǀgoreǀî?

² Jehovabats ta ǃoaba tits ga mî o ots ge gā-aise go ǁhûi, ǁhûi ǀgaub hîna Elob ǀkhaeba ra hā-ūba. Xaweb ge ǁGâuaba ǂkhî tama khoe-i ga Eloba ǃoaba o, ǁîb ge ǃgomsina ra kuruba ǁnān hîna Eloba ra ǃoabana. ǀGui ǀgaus hînab ǁnāsa ra dīs ge ǃhōs tsî mâǃoasa nau khoena xu, ǀhōsan tsî ǀaokhoena xus tsîna. Jesub ge ge ǃkhâikhom: “Tsî khoe-i omi din ge ǁî-i khākhoese nî ī.”—Mateub 10:36.

3. Sa ǀaokhoen tamas ka io ǀhōsan ga satsa Eloba ǀgoreǀîsa mâǃoa o, tae-ets nî dī?

³ ǁNās ga sats ǀkha i o, matits nî dī? ǂGui khoen ge a ǂan ǁîn ǀgoreǀî ǀgaub a tsūsa, xawen ge ra îgaǀgē ǁnapaxu ǂoasa. ǁÎn ge ra ǂâi ǁîn ǀaokhoenan ra ǀawexu ti. ǁNāsa ǀgau i ra? ǂAnts ga o sa ǀaokhoe-i ge ǁkhōǁkhōsase ǀhuwuǀhuwusen ū xūna ra sîsenū di, o mîbats tite ǁnā ǀhuwuǀhuwusen ū xūn ǁî-e nî ǁgaiǁgaisa? Sats ge ǁîn ǀkha ǁnā ǀhuwuǀhuwusen ū xūna sîsenū tite, dī its nî?

4. Josuaba mati Israelǁaesa ǀgoreǀîs ǂnamipe ge mîba ǁîb di tsēti ǃnâ?

⁴ Josuab ge Israelǁaesa ge ǂkhâǃnâ tsū ǂgom ǀgaugu tsî ǃhaoǃnâbe ǁnaetigu ǁîn îgu dina xu ǂgōsa. ǁÎb ge ge mî: “ǁNâi ǃao ǃKhuba, îdu ǁÎba ǃoaba ǂhauǃnâsib, tsî amab tsîkha ǃnâ, i dībē ǁnā Elogu sadu di îgu ge ǃāb nau ǃnani tsî Egipteb ǃnâ hâna ǃoaba ga, îdu ǃKhuba ǃoaba.” (Josuab 24:14) Josuab ge Elob ǃoa-ai ge ǂgomǂgomsa i tsî Jehovab ge ǁîba ge ǀkhae. Sida ga Jehovab ǃoa-ai ǂgomǂgomsa o, ob ge nî ǀkhae da.—2 Samueli 22:26.

ǂGomdi ǁkhāǁkhāti—Amab tsî ǂhomib

ǃNonaǀguira Elob: ǂGui ǂgomdi ge ra ǁkhāǁkhā Elob a ǃnonaǀguira Elo di. ǁÎn ge ra mî “ǁGûb a Elo, ǀgôab a [Jesub a] Elo, tsî ǃanu Gāgāb tsîn a Elo, xawe gu ge ǃnona Elo tama tsî ǀgui Elo.”

Elobmîs ge “ǃNonaǀguira Elo i” xa ǃhoa tama hâ, tsîs tsîna i ge ǁkhāǁkhā tama Jehovab ǃnonaǀguira Elo di. Jehovab ge ǀguri a Elo. ǂGuro Korinteǁîn 8:6 ge ra mî: “Xawe da ge sada ǀgui Elob ǀguiba ūhâ, ǁGûba.” Jehovab ge a ǁÎ HoaǀGawiba. Jesub ge Elo tama, xawe “Elob di ôa.”(1 Johaneb 4:15) ǁNās ǁkhās khamib ge ǃanu gāgāba Elo tama hâ. ǃAnu gāgāb ge khoes tsîna i tama hâ. Nēb ge a Elob di sîsenū ǀgai.—Ap. !Nae!khaidi 1:8; Efeseǁîn 5:18.
ǀOms: ǂGui ǂgomdi ge ra ǁkhāǁkhā ǀoms a xū khoen ǃnâ hâ sa tātsē ǁō tama sa. Elobmîs ge ra ǁkhāǁkhā ǀoms a khoe ǃkhaisa tsî a ǁōǁkhā ǃkhaisa.—Genesis 2:7; Hesekieli 18:4.
ǀAmoǀaeb: Ama tama ǂgomdi ge ra ǁkhāǁkhā ǀomdi tsūdī-aon di di ge nî ǀamoǀaeb ǃnâ ǂhuwi ǀamosib kose. Elobmîs ge ra mî “xawe ǁōhân ge xui xare-e ǂan tama hâ.” (Aoǁnâ-aob 9:5) Elobmîs ge ra ǁkhāǁkhā “Elob a ǀnam” di. (1 Johaneb 4:8) Jehovab, ge a ǀnamǀnamsa Elo, ǁÎb ge tātsē khoe-e ǀaes ǀkha ǁkhara tite.

Mûǂuis: Elobmîsa tae-e ra ǁkhāǁkhā ǃnonaǀguira Elob, ǀoms tsî ǀamoǀaeb xa?

Axū re xūn hîna ama tama ǀgoreǀîs ǃnâ ra sîsenūhe na

Kaikhoes ge ǁîs ǃgaidīb xūna ra ǂhubiǂui

5. Tae-i ǃaroma da ǃgaib ǃnâ ra sîsenūhe xūna nî axū?

⁵ Ama tama ǂgomsa xu ǂoas ge ra ǂâibasen i da hoa ǃgaib ǀkha ǃgaeǁaresa ūhâ xūna dīkākā, karan, ǃganun, ǂnū tsurin tsî nî hâ xūn hoana. Nēs ge a ǂhâǂhâsa Jehovab ai da ra ǂgomǃgâ ǃkhaisa ra ǁgau amaga.

6. Tae-en ge ǂgurokam ǁaeb di Xristeǁîna ǁîn ǃgaidīb ǂkhanidi ǀkha ge dī?

⁶ ǂÂiǃgâ re ǂgurokam ǁaeb di Xristeǁîn ge dīsa ama ǂgoms ǀgaub ain gere ǃoaba ǂgao o. Elobmîs ge ra mî: “Tsî ǁkhāti ǀoatsin, tsū ǁkhāsiga gere dīn ge ǂkhanide ūǀhao, tsî ǁîte ǂhaitsise ge khauǃkhu.”—Ap. !Nae!khaidi 19:19.

7. Tae-e da nî dī ǁgâuagu ga ra ǀkhaoǁore da o?

⁷ ǀNîn hîna ge Jehovaba ǃoaba tsoatsoan hîna ge ǃoa ǃgaidīb ǀkha dī xūna ūhâ in ge ǁgâuagu xa gere ǁore-e. ǁNās ga sats ǀkha ī o, Jehovaba ǃgarise ǀgores ǃnâ ǂgaiǀon re. ǁÎb ge nî hui tsi.—ǂKhoa-mîdi 18:10; Jakobub 4:7.

8. Xristeǁîna mati ǁgôa-tsî-ǁgoa elogu, tsî ai-īsigu tsîna ra ǃgawaǀî ama tama ǀgoreǀîs ǃnâ ra sîsenūhe ga?

⁸ ǁNān hîna ra ǁkhoren Jehovaba ǃoabasan ge ǁgôa-tsî-ǁgoa elogu, tsî ai-īsigu hîna ama tama ǂgoms ǃnâ ra sîsenūhena sîsenū tite. Ama Xristeǁîn ‘ǂgoms ǃnâ ra ǃgû xui-ao, tsî ǃgawaǀîs ǃnâ tama.’ (2 Korinteǁîn 5:7) ǁÎn ge Elob di ǂhanuga ǃgôa hâ tsîn ge ra ǂhara ai-īsiga ǁîn ǀgoreǀîs ǃnâ sîsenūsa.—Eksodus 20:4, 5.

Hâǀhao re Jehovab khoen ǀkha

ǁGûs tsî ǁîs ǀgôas tsîn ge ǂû-e ra aiǂhomi

9. Tae-es ta Elobmîsa mîba da gā-ai ǂgao da ga ra, o da nî dīse?

⁹ Elobmîs ge ra mî: “Gā-ain ǀkha ǂharugub, ǁnāb ge nîra gā-ai.” (ǂKhoa-mîdi 13:20) Gā-ai ǂgao da ga ra o, o da ge nî ǃgûǁae, tamas ka io nî hâǀhao Jehovab di ǀHûǀguitimî-aon ǀkha. ǁÎn ge khoen hîna ǀamo ûib ǃoa garu daob ai ra ǃgû na.—Mateub 7:14.

10. Jehovab di ǀHûǀguidimî-aona mati hui tsi ǁkhā Eloba ǃoabas ǃnâ?

¹⁰ ǀHûǀguitimî-aon ge khoena ra tsâba. ǁÎn di sîseni ge ǂhauǃnâ khoena Elobmîs ǃnâ mâ amaba ǁnâuǃā kaisa ǀamo ûib ǃoa garuba. ǁÎn ge satsa hui ǁkhā Elobmîsa ǁkhāǁkhāsens ǃnâ-ū, mari-oǃnâse. ǁÎn ge sa dîti hoade nî ǃeream tsi, tsî nî ǁgau tsi matis Elobmîs ǃnâ hâ ǂansa a sîsenū ǁkhā ǀgausa sa ûib ǃnâ.—Johaneb 17:3.

11. Mati di Xriteǁî ǀhaode a huitsi ǁkhā?

¹¹ ǁÎn di ǀhaodi ge, Gaosib ǀHû-omi tawa ra dīhe, Jehovab ǀgaugu xats ge ǁnapa a ǁkhāǁkhāsen ǁkhā. Sa turab ge nî ǀgaiǀgai-e ama ǂgoms ǀgaub ai ǃoabas ǃnâ. Hui-ets ge nî matits ǁkhāǁkhāsents ta xūna ǀnî khoen ǀkha a ǀgoragu ǁkhā ǀgausa Elobmîs amaba.—Hebreǁîn 10:24, 25.

12. ǀGoresa mati a hui tsi ǁkhā Eloba ǃoabas ǃnâ?

¹² Jehovab di ǂâis tsî ǂâibasens xats ga ǁkhāǁkhāsen o, ob ge sa ǁnâuǃā ǀgauba nî kai ǁÎb di ǀnamǀnamxa ǀgaugu ǃnâ. Sats ge sa turab ǃnâs tsîna kai ǁkhā ǁÎba ǂkhîǂkhîs ǃnâ tsî tā nî mā-am ǁÎba nî tsûtsû xūna dīsa. ǂÂis ǃnâ ūhâ re Jehovaba ǃoats ge ǀgores ǃnâ-ū ǀgū ǁkhā tsî ǂganbi ǁkhā hui tsi sa ǃgâina dīsa tsî tsû xūna xu ubēsensa.—1 Korinteǁîn 6:9, 10; Filipeǁîn 4:6.

Omaris ge Elobmîsa ǀguiba ra khomai — Matida ama ǂgoms ǀgaub ai a ǃoaba ǁkhā?

13. Matits Jehovab ǂgaoba a ǂkhîǂkhî ǁkhā?

¹³ ǁAeb ǀkhats gāgāsise ra kai, khamits ge nî mûǃā ǂhâbasa i a ǃkhaisa māǁnâsensa tsî ǁāǁnâhe sa Jehovab di ǀHūǀguitimî-ao kais ǃaroma. Jehovab di khoen ǀkha ǁanis, ǃnâ-ūts ge Jehovab di ǂgaoba nî ǂkhî kai. (ǂKhoa-mîdi 27:11) Sats ge ǂkhî khoen ǁaegu nî hâ tis ge Eloba ra mî: “ǁÎn ǃnâ ǁan tsî da nî ǁîn ǀkha ǃgû, tsî ta nî tita ǁîn di Elo, tsîn nî ǁîna ti ǁae.”—2 Korinteǁîn 6:16.

ǁGâuaga xu ta ge ge ǃnora

ǀGuitsē ta ǃuia kharob ǃnâ ti aob ǀkha ǁgoe hîna, ta ge doma ge ǁnâu ti ǀonsa ǃnona ǃnāte ra ǂgaiba. ǁNapaxu ta ge ge mû oms ǀgawigab ta ǂarisa tsî ǀaexa, ǃgupu xū-i ge ti ǃnāb ǃnâ ge ǁnāǂgâ. Ti aob ge nē xūna ge mû tama hâ-i. Xawes tsîna ta ge ǁgai tsû-e ge hō ǁkhâga ge ti ǃnāb ǃnâ hâ-i e.

ǃNani ǁkhâgu khaoǃgâ i ge dome ǁkhapa ge ǂgai te. ǁNapaxus ge hoa omsa ǁgami ǃnāga ge hâ-i khami ge ī. Kai tūros [ǀaos] ge ǁgam-e xu dū ǂoa tsî ti ǁôab ai ge namisen. ǀGawiǁnâ hōbi tama da ge ge i dītsâ da ge xawe. ǃAo ta ge gere. ǁNās khaoǃgâ i ge ǁgami tsî ǀaob tsîna ge bē tsî ta ge kaise tsûsase ge aoǁnâhe ǃhūb ai. Xū-e ta ge kamagu ǀgaiba ǂan tama ge hâ-i. Dommi ge ǁnās khaoǃgâ ge mîbate i ta gāgāsi ǂgauǂgau tempeli ǃoa oa sida ǃās ǃnâ hâba. Gāgāba ta ge ǁîb ǀonsa dî o, ob ge ǀons nēti ra ǂâibasensa ge māte “ǃkhūsiba ūhâ xawe a ǀgôa-o.” ǁÎb ge ge mîmâibate ǂgauǂgaus ǀgaigu ǃnâ-ūb nî ǃkhū kai te di.

ǀAesen hâ khoen ge ǀgūseba xu tsî ǃnūseba xu gere sī ti tawa. Ti oms ain nî hās aiǃâ ta ge ǀō-aisa mûǃnâ-xūs ǃnâ gere mû nî. Hān gere o, o ta ge ti ǃomǃnāba ǁîn dib ǀkha gere ǀhaoǀhao, tsî tae ǃnôa ǀaeb tamas ka io tae ǃgomsinan ūhâs tsî ǂuruǂuru xūn ge gere ǂhai tita ba. Gāgāb ge gere mîbate matiko marinan nî khoena mātaresa.

Marib tsî ǀkhaexūn ge gere māhe ǂuruǂurus gere ǃgâise sîsen amaga. Tita ge “ǃkhūsiba ge ūhâ i” xawe ta ge ge ǁkhāǁkhāsen ǂâibasens “ǀgôa-o” sis tisa. Mâǁaeb hoaba ta ga ǀgôa-e hō o, o i ge aisa-e ǁōs ǀguisa gere dī. Nēs ge kaise ge tsûtsûsa i. Disiǀgamǀa kurigu hîna ta ge nē gāgāba gere ǃoabas ǃnân ge ǃnani ǀgôan tina ge ǁō.

Elob ǃoa ta ge ge ǀgore tsoatsoa huihe ta nîse. ǀÛs ose ta ge gere ǀgore. ǀGuitsē i ge Jehovab di ǀHûǀguitimî-aona ti dao-ams ai ge ǃguwu-am. Hoaǁae ta gere ǃhaebē nî, xawe ta ge ǁnātsē ge mîǁgui i ta ǃgâ. Sao gere ǃhoaǃâdi ǃnâ ta ge ge ǁkhāǁkhāsen ǁgâua gāgā-e ta gere ǃoaba ǃkhaisa! ǁNapaxu ta ge ti ǂâis ǃnâ ge mîǁgui ǃgai ǀû ta nîsa.

Nē gāgāba ta ge mîba o, ob ge ge ǁnās ǃoa ai ge ǃkhâikhom te. Xawe ta ge ge mîbabi “sats ǀkha ta go a toa” di.

Tsî ta ge hoa sîsenū ta gere xūna ge ǂhuwiǂui. Tsî ta ge Elobmîsa ge ǁkhāǁkhāsen tsoatsoa Jehovab di ǀHûǀguitimî-aon ǀkha, tsî ge Jehovab ǃoaba-ao kai tsî ge ǁāǁnâhe 1973ǁî kurib ǃnâ. Nēsi ta ge koro ǂurusa ǀgôana ūhâ. Ti aob tsîn ge ge ǁāǁnâsa ǀHûǀguitimî-ao kai.—Josephine Ikezus xa-i ǁgamsa khami.

Mûǂuis: Matis ge ǀgui khoesa ǁgâuaga xu ǃnora?