Jehovab ǀkhan ge hoa xūna a ī ǁkhā

SORES ǂOASA XU SORES ǂGÂS KŌSE

Tita ge 1937ǁî kurib ǃnâ ǂgari ǃgaroǃās hîna Tokmoks xōǀkhā hâs ai ge ǃnae Kyrgyzstani ǃnâ. Sida omaris ge Kyrgyz khoena xu ra hā tsî Kyrgyz gowaba ra ǃhoa. Ti ǁgûra ge ge ǂgari-ao i tsî kolkhoz ǂgarib ǀkha tsēs tsî tsuxuba gere sîsen. ǂGari-aon ge hoaǁae ǂû-e gere mātare-e tsî mari-e kurib ǃnâ ǀgui ǃāsa gere māhe. Tsî ti ǁgûs ge ǃgomma gere hōǃâ tita tsî ti ǀgam ǂkham ǃgâsa ra kōǃâs ǀkha. Koro kuriga ta ge skola ǂgâ tsî ǁkhabaxu tita tsîna ǀoasase kolkhoz ǂgarib tawa ge sîsen tsoatsoa.

Tita ra hâ ǃhūb ǃnâ i ge ǂgui khoena a ǀgâsa tsî sîsen-e hōs ge a ǃgom tsēkorobe pere-e hōs ǃaroma. Tita ge ǂkham ta ge i o, ûib ǃnâ ǂâibasen-e ge ūhâ tama hâ i. ǂGom tama ta ge ge hâ i, Jehova Elob xa hâ amab tsî ǂâibasens ûib dis sida ûiba nî ǀkharaǀkharasa. Matib ge gaosib amaba Kyrgyzstani ǃnâ a hās ge kaise a ǀō-aisa. Hoa xūn ge ǀapas Kyrgyzstan ǃhūb dis ǃnâ ge tsoatsoa.

ǃKHARU GE ǁAEB ǃHŪSABEN GE AMABA KYRGYZSTAN ǃHŪB ǃNÂ GE ǀKHĪ Ū

Amab Jehova Elob xab ge 1950ǁî kurib ǃnâ Kyrgyzstan ǃhūb ǃnâ ge tsoatsoa. Nē ǀgaub ǃnânge khoena amaba ge ǁkhāǁkhāsen. Nēsa mati ge tsoatsoa? Kyrgyzstani ge Union of Soviet Socialist Republics (USSR) di ge ǂansa i. Jehovab di ǀHûǀguitimî-aon ge USSRs di ǂgīǂgōsib xūn ǀkha dī xū-e ge ūhâ tama hâ i. (Jhn. 18:36) ǁÎn ge khoen xa ra mâǃoahe. Xawen ge nē xūn hoan ǃnâ Elobmîsa ra sîsen-ū khoen ǂgaoga tsâǀkhās ǃnâ. Kai xū-i hîna ta ge ǁkhāǁkhāsen i ge “hoan kom Elob tawa a īǁkhāo.”—Markub 10:27.

Jehovab di ǀHûǀguitimî-aon mâǃoahes ge ge ǃaroma în ǁîna Kyrgyzstan ǃhūb ǃnâ kai. Nēsa mati ge ī? USSRs ge Siberiab di ǀharib di ǃâ ge i tsî i ge ǁkhawa khākhoena ǃhūsabese ge ǃkhō-e hâ-i. Nē ǃhūsaben ge ǃnora kai-e o, on ge ǂguina Kyrgyzstan ǃoa ge ī tsîn ge nauna amaba ge hō. ǀNî ǃhūsabeb ge Emil Yantzeni ge Kyrgyzstan ǃhūb ǃnâ 1919ǁî kurib ǃnâ ge ǃnae. Emili ge ǃhūsaben ra sîsen ǃkhaisa ǃoa ge sî-e tsî ǀHûǀguitimî-aon ǀkha ge ǀhao. ǁîb ge amaba ge ūǃoa tsî ǁîb omsa ǃoa 1956ǁî kurib ǃnâ ge oa. Emili ge Sokulukib ǃoa ge doe sī. Sokuluki ǃnâ i ge ǂguro ǀhaohâba Kyrgyzstani ǃnâ ge tsoatsoa-e ǁnās ge 1958ǁî kurisa.

ǀGui kurib khaoǃgâb ge Victor Vintera Sokulukib ǃoa ge doe sī. Ne gagasise ǀgaisa ǃgâsab ge ǂgui ǃgomsina ge hōǃâ. ǃNona ǃnādi kōseb ge ǃkhō-oms ǃnâ ge hâ i, ǂgīǂgōsib xūn ǃnâb ge ǃâ ǂgao tama i amaga tsî ǁkhawa koro kuriga ǃhūsabese. Xawe ne ǃgomsigu ge ǁîba gagasise ge ǀgaiǀgai.

AMAB GE OMS KŌSE RA ǀGŪ

Kyrgyzstan ǃnâ i ge 160 ǀHûǀguitimî-aona ge hâ-i 1963ǁî kurib ǃnâ. ǂGuin ge Duitsǃhūb,Ukraini tsî Russiaba xu ra ha. Duitsǃhūb ǃnâb ge Eduard Vartera ge ǁāǁnâ-e 1924ǁî kurib ǃnâ. Tsîs ge Nasisa 1940ǁî kuri ǁîba ǃhūsaben ǃkhaisa ǃoa ge sî tsîb ge ǁkhawa USSRs xa ǃhūsabese ge ūhe. Nē ǂgomǂgomsa ǃgâsab Eduardob ge nēn hoan khaoǃgâ Kant ti ra ǂgaihe ǃāsa ǃoa ge doe 1961ǁî kurib ǃnâ.

Elisabet Fots ge gagasise ge ǀgaise i khoesa ǁîs tsîn ge Kants ǃnâ gere hâ. ǁîs ge ge saraǂkhom-ao i, ǁîs ge ǁnâ sîsenni ǃnâ ge ǃgâi i. ǁGauǃnâ-aon tsî dokteran tsîn ge ǁîsa sarana gere ǂkhom kai. ǁNâuǃgâǃkhaib di danaba ǃgame hâ khoes Aksamai Sultanalieva ti ǀon hâs ge ǁîs tsîna sarana gere ǂkhom kai. Aksamais ge Elisabets sa ǃoas gere ī o ǂgui dîna gere dî ûib ǃaroma tsîs ge Elisabetsa dîde Elobmîsa xū gere ǃeream. Nēs xa ǃaromahe hâses ge Aksamaisa ge ǃgâiǂhoâs aoǁnâ-ao kai.

ǁNā ǁaeb aib ge Nikolai Chimpoesib, hîna Maldovab ǃnâ hâba ge ǃnârimara mûǂam-ao kai. ǁÎb ge 30 kuriga nē sîsenn-e gere dī. ǁÎb ge ǀhaohâga saris ǀkha ǀgui ge hui tama hâ i xaweb ge ǂkhanina ǁgâis tsî māǂuis ǀkhas tsîna gere hui. ǁÎb gere dī sîsenni ge ǂamkhoegu xa ge ǂansa i. Eduardo Varteri ge Nikolaiba ge ǂkhāǃnâ tsî ge mîba: “ǂAmakhoegu ga dî ǃnâ tsi o,o miba re sida ge sida ǂkhanina danabēros Amerikab ǃnâ mâsa xū ra hō. ǁÎba ais ǃnâ kō. Tā ǃaobi.”—Mat. 10:19.

Nikolaib ge KGB dana gu xa ge ǂkhaihe tsî ge dîhē: “Mapa da sida di ǂkhanina ra hō ǃkhaisa. O ta ge ǁîba ge mîba Amerikaba xu da sida ǂkhanina ra hōsa. KGB danab ge xū-e ge mî tama hâ i. Tsî ge ī kai te tsî ǁkhawa ge ǂgaite tama ha ī. ǀHûǀguitimî-aon ge ǃgâiǂkhôasa ge aoǁnâ ǃkharu Kyrgyzstani ǃnâ. Jehovab xa hâ amab ge ti omaris tawa ge ǁnâusen, xawe ti kaikhoes Mairambubus ge amaba ǂgurose ge ǁnâu.

TI KAIKHOES GE AMABA ǃHAESE GE MÛǂAN

Mairambubus ge Naryn ti ǀon hâ ǃāsa xu ra hā. ǁÎs ge ti ousis omsa ǃoa ge sari, sim ge ǁnapa ǂguro ǃnās ase ge ǀhao 1974ǁî kuri Augustub ǃnâ. Tita ge Mairambubusa ge ǀnam ǂguro mû si ta ge o. Tsîm ge ǁnā tsēs ai ge ǃgame-e.

Januarib 1981ǁî kurib ǃnâs ge Mairambubusa bēb ǃnâ ge hâ i, ǁama ǃkhaiba ǃoa ra īse. Hînas ge ǁîsa nē ǁkhāǁkhāǃâs tsoatsoas ai goro mîhe mîdi ǂgurose ge ǁnâu. Ti kaikhoes ge ǂguina gere ǁnâu ǂgao tsîs ge ǁîsa khoesa ǁîs ǀons tsî hâs ra ǃkhais tsîna ge dî. ǁÎs ge Apuns di ge ǀon ǂgaisen, xawes ge kaise ge ǃnûisen hâ i. 1980ǁÎ kurib ǃnâ i ge ǀHûǀguitimî-aon di sîsenga ge ǂhāsa i amaga. Khoes ge ǁîs ra hâ ǃkhaisa ge mîba da tama hâ i xawes ge sida di hâ ǃkhaisa ge ǂan i. Ti kaikhoes ge oms ai ǂkhî hâse ge oaǀkhī.

“Tita ge ǃgâi xūna ge ǁnâu” dis ge Mairambubus sa ra mî. “Khoen ge ǁkhawa ǁō tide dis ge khoesa ge mîba te. Tsî i ge ǁgai xūna ra dī khoena nî dīkākāhe.” Tita tawa i ge ǁhabos ase ge ī i. “Hā re î da ǃnâu saris das nî tses kōse tsî mîǃāba-e.”

Apuns ge ǃnona ǁkhâgu khaoǃgâ ge sari da tsî da ge ǁkhawa ǁnās khaoǃgâ Kyrgyz gowaba ra ǃhoa ǀHûǀguitimî-aon ǀkha ge ǀhao. Nē ǃgâsa di ge amaba Jehovab tsî ǁîb di ǂâibasens khoen ǃoagub ūhâsa ge ǂanǂan da. ǁÎn ge From Paradise Lost to Paradise Regained di hâ ǂkhanisa ge khomaiba da.a ǀGui ǂkhanis ǀguis ge Tokmok gowab ǃnâ ge hâ i tsîm ge aitsâma sim ǂkhanisa ge ǁgâiǁnâ basen.

ǂGuro kēbos ǁkhāǁkhāsen da ges ge Genesis 3:15 ǃnâ a xoasa. Nē kēbos ge Jesub ǃnâ-ū nî dīǀoaǀoahe, Gaosib di Gao-aob ase. Nēs ge kaise ǂhâǂhasa ǂhôas khoen hoan nî ǁnâusa! Nēs ge ra ǁgari da aoǁnâ sîsenni ǀkhā aiǃgûsa. (Mat. 24:14) Elobmîs di amab ge sida ûiga ge ǀkharaǀkhara.

ǀHAODI TSI ǁĀǁNÂDI TSÎN GE MĀ-AMHE TAMA HÂ

Tokmoks ǃnâ ra hâ ǃgâsab ge ǃgameba ǃoa ge ǁkhau da. Ti kaikhoes tsî tita tsîn ge ge mû ǀHûǀguitimî-aon ǃamkuse ra tanisensa. Xûi-i ge ǃgameb ai ge ǀhai i tsî i ge ǁaxasiba ge ǁkhoaxa i. Nē ǃgameb ge kaise ge ǀkhara i, sida gere sī ǃgamegu ai i ge xûi-e gere māhe tsî ǁgai gowab tsîna gere sîsenūhe.

Sida ge ǀHûǀguitimî-aon di ǀhaos Tokmok gowab ǃnâ hâ di ǃnâ gere ǁhao, nē ǀhaodi ge ǃgārob ǃnâ gere dīhe ǂhoab mâsigu ra mā-am khami. ǃGâsan ge ge ǂan i ǀapaǃnamgu ǁîna ra ǃûi ǃkhaisa. Saob ǃnâ da ge sida ǀhaode gere ūhâ oms tawa. ǂGui ǃnādi kōse gu ge ǀapaǃnamga sida tawa gere hā tsî gere dî sida tae-e ra dīsa. Mairambubus tsî tita tsîn ge Julib ǃnâ 1982ǁî kurib ǃnâ ge ǁāǁnâhe Chüy ǃāb ǃnâ. Tsîm ge sim tsîna ǁnās khaoǃgâ ge ǃnûisen tsoatsoa. (Mat. 10:16) ǃGâsan ge ǀorose ǃgārob ǃnâ gere ǀhao. Gaosib ǁnaetsanasa da ge ǁnae tsî ǁāǁnâs ǃhoasa gere ǃgâ.

ǃĒSA TA GE GE HŌ AOǁNÂ SÎSENNI ǃNÂ ǃNĀSASE DĪSA

ǀNî ǃgâsab ge 1987ǁî kurib ǃnâ ge ǂgan te îta Elobmîsa ra ǁkhāǁkhāsen ǂgao khoe-i hîna Balykchy ti ǀon hâ ǃās ǃnâ ra hâ-e sī sari. ǁNā ǃās ge kaise ge ǃnū ī. Balykchys ǃnâ da ra aoǁnâ hîna da ge ge mû, ǁnāba i ǂgui khoena Elobmîsa ra ǁkhāǁkhāsen ǂgaosa. Nēs ge kai ǃēs hîna da ge hōsa aoǁnâ sîsenni ǃnâ ǃnāsase dīsa.

Tita tsî Mairambubus tsîn ge ǃnāsa ǁaeba Balykchysa ǃoa gere ī. ǁKhabam ge ǃnāsa sâǁaeba sī gere hâ, aoǁnâ sîsenni ǃnâ ǁhao tsî ǀhaode gere ūhâ. Elobmîs ai a ǃgaoǃgaosa ǂkhaninan ge khoen gere ǂhâba. Sida ge Tokmok gowab ǃnâ hâ ǂkhanina gere ūhâ mishoki ǃnâ, nēb ge ǃaiadi gere ǂgā ǃnâhe ǁgaruba. ǀGam ǁgarugu ǂkhanin ge ge ǂnâu tama hâ i. Balykchysa ǃoa da gere ī o, o da ge sida ǀkha ge ǀguiba gere ī khoena gere aoǁnâba.

Balykchys ǃnâ i ge 1995ǁî kurib ǃnâ ǂguro ǀhaohâba ge tsoatsoa, ǁkhaisa kuriga ǃkharu hâse sida sari toa tsi. Tokmoks tsî Balykchys tsîna ǃoa da gere ī o, o i ge ǂgui mari-e gere ǂgan. Sida ge kai mari-e ge ūhâ tama hâ i, xawe da ge mati nēn hoana dī hō? ǀNî Xristeǁî ǃgâsab ge hoaǁae mari-e gere mā da, î da sida ǂhâsiga ǃgū-ai. Jehovab ge sida turaba ge mû aoǁnâ sîsenni ǃnâ tsî “mûǂuidaodi ǀhommi dide ge ǁkhowa-am.” (Mal. 3:10) Hoa xūn ge Jehovab ǀkha a ī ǁkhā.

OMARIS TSÎ AOǁNÂ SÎSENNI ǀKHA ǁKHAXA DĪSENS

ǀHaohâb ǃûi-aob ase ta ge 1992ǁî kurib ǃnâ ge ǁgaumâihe, ǂguro ǀhaohâb ǃûi-aob Kyrgyz gowaba ra ǃhoab ase. Sida ǀhaohâb ǃnâ i ge ǂgui aiǂhanuga ge hâ i aoǁnâ sîsenni ǃnâ. ǂGui Elobmîs ǁkhāǁkhāde da ge Kyrgys gowaba ǃnâ ge ūhâ i. ǂKham khoen ǀkha da ge ge tsoatsoa, ǁîn ǀgapi ǁkhāǁkhāsensa ra dība. Nē ǂkham khoena xu i ge ǀnîna amaba ge ūbasen. Tsî i ge nētsē ǀnîba ǁnâub beros ǂgaeǂgui-ao tsî i ge nau ǀgamkha a ǀō-aisa aimâba-ao. Khoena da ge sida ǀhaodi tawa gere hui. Sida ǂkhanin tsî ǀhaodi tsîn ge 1990ǁî kurib ǃnâ Russiab gowab ǃnâ ge dīhe tsoatsoa. Xawe i ge ǂgui khoena ǀhaohâb ǃnâ Kyrgyz gowaba gere ǃhoa, ǁîn ǁgûsi gowab ase. Tita ge gere ǂnûiǃkhuni nēs ge ǁîna gere hui amaba ǁnâuǃāsa.

Mairambubus tsî tita tsîn ge sim omaride gere kōǃgâs ǀkha gere ǁaeǁaesen. Sim ǀgôanam ge aoǁnâ sîsenni tsî ǀhaodi ǃoas tsîna gere ū sao. Sim ǀgôas Gulsayras ge ǁnā ǁae ge 12 kurixa ī tsî ǀhao-ūs ra khoen ǀkha Elobmîs xa ǃhoas xa kaise ge ǃgâibahe i. Sida ǀgôan ge Elobmîs xoade danasa xu ge ǂan i. Nē ǀgaus ain ge sida ǀgôan tsî ǁgūrisan tsîna ǀhaohâb sîsengu ǃnâ gere ǁhao. Hoa 9 ǀgôan tsî 11 ǁgūrisan hîna noxoba a ûisan xa i ge 16 na Jehovaba ra ǃoaba tsî ǁîn ǁgûn ǀkha ǀhaode ǃoa ra ī.

ǀŌ-AISA ǀKHARAǀKHARAN

Nē ǃgâsan hîna ge 1950ǁî kuri Jehovab sîsen-e nē ǃās ǃnâ a tsoatsoan ge kaise nî buru mûn ga ra o sida ge hōǃâ ǀkharaǀkharana. Sida ge 1990ǁî kuriba xu ge mā-amhe, ǃnōrasase aoǁnâs tsî kai ǀhaode ūhâs tsîna.

Tita tsî ti taras tsîn ge 1991ǁî kuri ǂguro ǃnās ase ǀharib kai ǀhaosa ge hâ ǃnâ Alma-Atas ǃnâ, nēsi Almatys di Kazakhstan ǃās ǃnâ a ǂansasa. ǃGâsagu ge 1993ǁî kuri Kyrgyzstani ǃnâ ǀharib kai ǀhaosa ge ūhâ i, Spartaks ǂgās Bishkeki ǃnâ. ǃGâsan ge wehkeba kai ǀhaos aiǃâ ǀnai ǂgāsa ge ǃanu tsoatsoa. Mûǂam-aob ge kaise ge ǃgâiaǂgao tsî ge mî î da ǂgāsa tā mātare.

Kyrgyz gowab ge 1994ǁî kurib ǃnâ ǀō-aisa ǀkhaeba ge hōǃâ, ǂguro ǃnās ase i ge ǂkhanina nē gowab ǃnâ ge ǁgâihe tsoatsoa. ǂKhanin ge nēsi hoaǁae Kyrgyz gowab ǃnâ ra ǂnûiǃkhunihe, ǃgâsan hîna ǂnûiǃkhuni bēros tawa ra huin xa Bishkeks ǃnâ. Jehovab di ǀHûǀguitimî-aon di sîsengu ge 1998ǁî kuri Kyrgyzstan ǃhūb ǃnâ ge mā-amhe. ǀApeǂhomis ge ge kai tsî i ge 5 000 xa ǃnāsa ǀHûǀguitimî-aona hâ. Nētsē da ge 83 ǀhaohâgu tsî 25 ǂnūbide Chines, ǀawaǃao, Kyrgyz, Russiab, Russiab ǃgomme gowab, Turkish, Uighur tsî Uzbek gowagu ǃnâ ūhâ. Nē ǃgâsan hoan ǃkharagaǃnâgu ǃhūga xu ra hân ge Jehovaba ǀguiǃnâxase ra ǃoaba. Jehovab ge nē ǀō-aisa ǀkharaǀkharan hoana ge ǃaroma.

Jehovab ge ti ûib tsîna ge ǀkharaǀkhara. Tita ge ǀgâsa omarisa xu ra hā tsî koro kurigu ǀguiga skola ge ǂnâ. Xaweb ge Jehovaba tita ge sîsen-ū i ta ǀhaohâb ǃûi-ao kai tsî khoen hîna tita xa ǀgapi ǁkhāǁkhāsensa ūhâna ǀō-aisa amaba Elobmîsa xu ǁkhāǁkhā. Jehovab ge ī ǁoa xūna ra ī kai. Ti aiǁgaus ge ra hui te i ta Jehovab xa khoen ǀkha ǃhoa, ǁîb ǀkhan “kom hoa xūna a īǁkhāo.”—Mat. 19:26.