Jehovab ǀkha tsēs hoasa sîsen re

1. Mâ ǀgaugu ǃnâ da Jehovab ǀkha a sîsenǀhao ǁkhā?

KURU-AOB ge ra ǂhâba în ǀoasa kurusa ūhâ tama hâ khoena ǁÎb ǀkha sîsenǀhao tsî ǁÎb ǂâibasensa dīǀoaǀoa. Khoen hoan nēsi ǀoasa kurusa ūhâ tama hâ xawen ge ǂgomǂgomsa khoena noxoba Jehovab ǀkha a sîsenǀhao ǁkhā. Aiǁgause, da ge hoa da “Elob di ǀhaosîsenao” ǃgâiǂhôas Gaosib disa da ga aoǁnâ tsî ga ra ǁkhāǁkhāsabedī o. (1Kor. 3:5-9) Xawe ǂâis ǀguisa dī re, tae-i aiǂhanuba da ūhâsa, Hoaǀgaixa Kuru-aob ǀkha sîsenǀhaosa. Xawe aoǁnâ tsî ǁkhāǁkhāsabedīs ǃnâ-ū ǀgui da ge Jehovab ǀkha sîsenǀhao tama hâ. Nē ǁkhāǁkhāǃâs ǃnâ da ge ǀnî ǀgauga nî ôaǃnâ, sida omaris ǁanin tsî ǃgâsan tsîna huis, ǃhaokhoeǃkhōǃoaxasib tsî om sîsengu ǃnâ māsens tsî sida ǃoabasa khoraǂuisa.​—Kol. 3:23.

2. Tae-i ǃaroma i ǃgâi tide sida Jehovaba ra dība xūna nau ǃgâsan ǀkha ǀgopeǀnōsa?

² Nē xūna da ra ǃhoaǃgao hîna tā sadu Jehovaba a dība ǁkhā xūna ǀnî hâ ǃgâsan dī ǁkhān ǀkha ǀgopeǀnō re. ǂÂis ǃnâ ūhâ re kurigu, ǂurusib, mâsib tsî khoe-i ǁkhāsib tsîn ge khoe-e xu khoe-i ǀkha a ǃkharagagu di. Nēsa ǃkhō-ams ǃnâ-ūb ge apostel Pauluba sao ra-e ge mî: “A i mâ-i hoa-e ǁî-i sîsenni ǂhaniba ôaǃnâ, o i ge ǁî-i ǀgui-i tawa koa-e nî ūhâ, tsî nau-i tawa tama.”​—Gal. 6:4.

SADU OMARIS TSÎ ǃGÂSAN TSÎNA HUI RE

3. Tae-i ǃaroma i a mîhe ǁkhā sida omaris ǁanina da ga ra kōǃgâ o, o da Jehovab ǀkha a ǀguiǃnâxasa?

³ Jehovab ge ra ǂhâba î da sida omaris ǁanina kōǃgâ. Aiǁgause, da ge nî sîsen î da sida omaris ǁanina marisise kōǃgâ. ǂGui ǁgûdi ge omdi ai ra hâ, ǁîdi ǀgôana kōǃgâs ǃgao. Kai ǀoa hâ ǀgôan ge kaira hâ ǁgûna ra kōǃgâ. Nēn ge ǂhâbasa xūna tsî Elobmîs ge ra mî: ‘Tsî khoe-i ga ǁî-i din tsî ǀō-aisase ǁî-i ommi dina sâu[kōǃgâ] tama io, o i ge ǁnā-e  . .  ǂgomoǃnâ-i ǃgâ-ai a tsū.’ (1Tim. 5:8) ǁNāti i ǃereamsa da ga ra tani o, o i ge kaise a ǃgom ǁkhā elosi xūn ǃnâ ǀoasase ǁhaosa. Xawe mâǀgai re. Jehovab ge ra ǂkhî sida omaris ǁanina da ga ra kōǃgâ o.​—1Kor. 10:31.

4. ǁGûna tae-i aiǃâ gagasi mîǁguiga ra mâi tsî tae-i ǃnurib ǀkha?

⁴ Xristeǁî ǁgûn ge Jehovab ǀkha ra sîsenǀhao elosi mîǁguigan ga ǁîn ǀgôan aiǃâ mâi o. ǀNî ǁgûn ǁnāsa ge dīn ge ge mû ǁîn ǀgôan ǀoasase Jehovaba omsa xu ǃnūse ra ǃoaba ǃkhaisa. ǀNîn ge sîsabe sîsenna ra dī, ǀnîn ge aimâba-aose ra sîsen ǂhâsib hâba tsî ǀnîn ge Betels tawa ra sîsen. ǃNūse hâs ge ǀnîsi ra ǂâibasen omaris ǁanin hoaǁae sarigu ǁkhā tidesa, ǂgaon ra khami. Xawe gagasi mûǂuisa ūhâ ǁgûn ge ǁîn ǀgôana ra ǂkhâǃnâ în aiǃgû ǁîn sîsenni ǃnâ. Tae-i ǃaroma? ǁÎn ge kai ǃgâiaǂgaoba ra hō ǁîn ǀgôan Gaosiba ǂgurose ra mâi ǃkhais ǃgao. (3Jhn. 4) ǀNîsin ge nē ǁgûna Hannas khami ra tsâ mî ge sa Samuelas ge Jehovaba a “mā” ǃkhaisa. ǁGûn ge ǁnāti i sîsenǀhaosa ǀō-aisa aiǂhanub ase ra mû. ǁÎn ge nēs ǀnî hâ sîsenǂuiba nî ūhâsa ǁkhore tama hâ.​—1Sam. 1:28.

5. Mati da sîsenǂuiba ūhâ huiba ǀhaohâb ǁani-e a mā ǁkhā? (Tsoatsoas ǃnâ hâ ai-īsiba mû re.)

⁵ ǀNîsi da ga omaris ǃeream i hîna ǁgâi da tama-e ūhâ tama io, o da ge sida ǃgâsana a hui ǁkhā hîna kaira tsî ǃhora hâna. Tae-i xa da ǀhaohâb ǃnâ kō mâ tama hâ, ham-i huiba ǂhâ hâ ǃkhaisa? ǀNîsi da ge ǃgâsas hîna ǁîs kaira ǁgûsa ra kōǃgâsa a huiǂui ǁkhā îs ǁîs khoexaǃnâ ǁhōga kōǃgâ. Tamas ka io da ge ǃgâsa-e ǀhaosa ǃoa ī ū tsî oms ǃoa a hau-oa ǁkhā. Tamas ka io ǁkhā ǁoa ǃgâsa-e ǁamaxūǃkhaib tawa xūna sī a ǁamaba ǁkhā. Tamas ka io da ge ǃgâsa-e hospitals ǃoa a ī ū ǁkhā î-i khoe-e sī sari. ǁNāti dīs ǃnâ-ū da ge Jehovab ǀkha ra sîsenǀhao îb ǀgore-e ǃeream ǁkhā.​—Khomai re 1 Korinteǁîn 10:24.

ǃHAOKHOEǃKHŌǃOAXASIB

6. ǃHaokhoeǃkhōǃoaxasiba tae-e ǃkhōǂgā hâ?

⁶ Elob sîsenǀhao-aon ge ǃhaokhoeǃkhōǃoaxasib ai a ǂansa. Xristeǁî Grikegowab Xoadi ǃnâs ge mîs “ǃhaokhoeǃkhōǃoaxasib” di hâsa “ǃgâisiba ǃhaokhoe-e” ǁgausa ǃoa ra ǁnaeǁgau. (Heb. 13:2) Elobmîs ǃnâ i ge ǁnāti i ǃnaeǃkhaide ǃkhōǂgāsa tsî ǀnamma ra ǁkhāǁkhā da. (Gen. 18:1-5) Mâ ǃēs hoasa da ge nî ū î da ‘ǃgâsana hoaǁae hui,’ sida ǀaokhoe taman ga i xawe.​—Gal. 6:10.

7. Tae-i ǃaroma da !narimâra mûǂam-aoba ǃhaokhoeǃkhōǃoaxasiba a ǁgau ǁkhā?

⁷ ǃHaokhoeǃkhōǃoaxasiba da ge a ǁgau ǁkhā Jehovab ǀkha sîsenǀhaos ǃnâ-ū tsî Jehovaba ǀoasase ra sîsenba ǃgâsana a sari ǁkhā. (Khomai re 3 Johaneb 5, 8.) ǁNāti i sarigudi ge ‘ǁkhaeǂgaogusa’ ra ǂkhâǃnâ. (Rom. 1:11, 12) ǂÂi re, Olafi xa. ǁÎb ge ra ǂâi-oa ǂgui kurigu ǃkharu hâseb ge !narimâra mûǂam-aob hîna ge ǃgame tama hâ îba hâǃkhai-e ǀhaohâb ǃnâ hō tama hâ io. Olafi hîna ge ǂkham îb ge ǁîb ǁgûra hîna ge Jehovaba ǃoaba tama hâ îra ge ǂgan îb !narimâra mûǂam-aoba ǁîn oms ai sī hâ. ǁÎra ge ǃgâi a di ge mî xaweb ge Olafa sofas ai nî ǁgoe di. ǁNā ǀkharaǀkharas ge ǃgâi sîsenǂuiba ge ūhâ i. “ǁNā wekheb ge ge ǂoaǂamsa i” Olafi ge ra ǂâi-oa tsî ra mî: “Tita tsî !narimâra mûǂam-aob tsîn ge ǁgoaga khâi tsî ǂgui ǂûǂûsa xūna gere ǃhoaǃgao ǂû kom nîs aiǃâ. ǂKhâǃnâs hînab ge mā tes ge ge ǃaroma î ta Jehovaba ǀoasase sîsenba.” ǃKharu ge 40 kurigu ǃnâb ge Olafa ǃkharagaǃnâgu sîsabe ǁgaumâidi ǃnâ gere sîsen.

8. Tae-i ǃaromade da ūhâ ǃgâisiba ǁgausa khoe-i ga ǁnāsa ǃgôaǃgâ tama i xawe? ǂKhō re.

⁸ ǀNamma da ge ǃhaokhoena ǂgui ǀgaugu ǃnâ a ǁgau ǁkhā. Nēs ga ǀnî ǁaega mûǂan-e tama ga ra i xawe. Sao ra aiǁgaus xa ǂâi re. ǀGui ǃgâsas Spaini ǃnâ ra hâs ge khoe-e Elobmîsa gere ǁkhāǁkhā xawes ge ge ǃgaoǃgâ nē khoes Yesicas di ǀons hâs hîna Ecuadora xu ra hās ge ǀû tama hâse gere ā. Nē ǃgâsas ge ge dî tae-i ǃaromas ra ā? Yesicas ge nē ǃgâsasa ge mîba Spaini ǃoas ge doe ǀkhī o, os ge kaise ge ǀgâsa i tsîs ge ǀgui tsē ǂûs nî ǂû-e ge ūhâ tama hâ i. ǁÎs ǀgôarosas ge ǁgammi ǀgui-e ge mā ǁkhā i. Yesicas ge ǁîs ǀgôarosas ra ǁomǁom hîna gere ǀgore îs huiba hō. ǁNās khaoǃgâ ra ge ǀgam ǃgâsara hîna Jehovaba ra ǃoaba ra ǁîsa ge sari. Xawes ge Yesicasa nē ǃgâsara ǃgâi ǀgaub ǃnâ ge ǃkhōǃoa tama hâ i tsî māhes ge ǂkhaniba ge doa. “Nē-e ǂû-i hîna ro ti ǀgôasa ra mā ǂgao-e?” dis ge ge dî. Nē ǀgam ǃgâsara ge ǁîsa gere ǁkhaeǂgao xawes ge ǁnāsa ge ūǃoa tama hâ i. Ega ra ge ǂû-e ǁîs dao-ams aisi ge mâiba si. Yesicas ge nē ǃkhais xa ge tsâǀkhāhe, ǁîs ge ge ǂâihō ǁîs ǀgores ǃereams ais ge ǃgaoǃgâ tama hâ i ǃkhaisa tsîs ge ǁgaise gere tsâ. Xawes ge ge mîǁgui Jehovaba ǃoabasa. Nē ǀgam ǃgâsara di ǃgâisib ge ǃgâi ǃnuriga ge hau.​—Aoǁn. 11:1, 6.

MĀSENXASE ELOSI SÎSENGU ǃNÂ ǁHAO RE

9, 10. (a) ǂGurokham ǁaeb ǃnân ge khoena mâ mâsigu ǃnâ māsenxase gere hui? (b) Mâ xūn ǀkha gu māsenxase ra māsen ǃgâsaga ǀhaohâb ǃnâ ra hui?

⁹ ǃKharagaǃnâgu ǁaxasigu ǃnâ i ge Israeli ǃnâ māsenxa sîsen-aona ge ǂhâhe hâ i. (Eks. 36:2; 1Kro. 29:5; Neh. 11:2) Nētsēs tsîna da ge ǃēde ūhâ sida ǁaeb, ū da hâ xūn tsî sida ǁkhāsib hoaba sida ǃgâsan ǃgao māsa. Kaise ǃgâise du ge nî tsâ tsî ǂgui ǀkhaega nî hō.

¹⁰ Elobmîs ge ra ǂkhâǃnâ î gu aore ǃgâsagu hîna ǀhaohâb ǃnâ hâ ga khoraǂuisen aiǂhanugu ǃaroma. (1Tim. 3:1, 8, 9; 1Pet. 5:2, 3) Nēsa ra dī ǂgaon ge nauna hoaǃnâ-aixases tsî gagasises tsîna nî hui. (ǃNǃkh. 6:1-4) ǀHaohâb ǃûi-aoga ge dî du māsenxase du ǀnîsi ǀhaodi tawa kōǃgâ-aose huis, ǂkhanin ǀkha huis, aoǁnâ ǃnâ-e ra ǂharide kōǃgâs tsî ǀhûǃnâ-oma kōǃgâs tsîn ǀkha hui ǂgao tamasa? Nē aiǂhanuga ǀnai ūhâ ǃgâsagu ge kaise a ǁkhoaxabahe ǃgâsana huisa.

11. ǀNî ǃgâsasa mati om sîsengu ǃnâ ǁhaos ǃnâ-ūs ge kuru ǀhōsana xu ra ǀama?

¹¹ ǁÎn hîna māsenxase gagasi ǁaxasigu ǃnâ ra ǁhaon ge hoaǁae ǀasa ǀhōsana ra hō. Margies aiǁgaus xa ǂâi re hîna Gaosib ǀhûǃnâ-omga oms ǃnâ 18 kuriga ra ǁhaosa. ǁÎs ge hoaǁae ǂkham ǃgâsade ǁîs ǀgôadi ase ra ūbasen ǁîdes ra ǁkhāǁkhā hîna. ǁÎs ge kaise nēs xa a ǁkhoaxabahe, gagasise di hoaǁae ra ǂkhâǃnâgu amaga. (Rom. 1:12) ǃGomsigas ra hōǃâ ǁaeb ais ge Margiesa nē ǂkhâǃnâdi xas ra ǂâi o, o kaise ra khoakhoahe tsî nēs ge om sîsengu tawas ge omkhâi ǀhōsana xu hâ. Sadu tsîna māsenxase nē om sîsengu ǁaxasib tawa ǁhao tsâ hâ? Nēsi du ga ǂansa ga ra ūhâ tamas ka io ūhâ tama hâ îs tsîn hoan ǃnâ du tae-e dītsâ tama hâba nēs ǃnâ ǁhaosa?

12. Mâ ǀgaub ǃnâ da sada tsîna ǃgâsana a hui ǁkhā?

¹² Tsūkeǃgâgu ga ra hâ ǁaeb ain ge Elob ǃoaba-aona ǁnā ǃēsa ra sîsen-ū ǃgâsan hîna ǂhâsib ǃnâ hâna huisa. Aiǁgausen ge ǁîna marisise ǁîn hîna ǂhâsib ǃnâ hâna ra hui. (Jhn. 13:34, 35; ǃNǃkh. 11:27-30) ǀNî hâ ǀgaub ge ǃanus tsî omde oms ǃnâs tsîna huisa. Gabriela di ǀon hâ ǃgâsas hîna Polanda xu ra hās ge ǁîs omsa ǁgammi dâus ǃnâ ge ǂoaǃnâ xawe kaise ge ǂkhî ǁîs ǃgâsan ge ǃkharagagu ǀhaohâga xu hā tsî gere hui sī o. ǁÎs ge ra mî, “tita ge ǂoaǃnâ ta ge xūn xa ǃhoa ǂgao tama hâ.” “Xawe ta ge hō ta ge xūn xa ra ǃhoa ǂgao. Nē huib hîna ta ge hōǃâb ge ge ǁgaute tita ǀō-aisa Xristeǁîn ǀhaohâba xu hâsa.” ǂGuin hîna ge nē tsūkeǃgâga xu a hui-en ge ra mî ǁîn kaise ǃkhū hâse ra tsâsa nē ǃnaeǃkhais khaoǃgâ. Tsî ǁîn hîna ge Jehovab ǀkha ǀguiba gere sîsenǀhaon tsūkeǃgâb ǃnâ hâna huis ǃnân ge kaise ge ǂkhî i.​—Khomai re ǃNaeǃkhaidi 20:35; 2 Korinteǁîn 9:6, 7.

13. Māsenxase huiba ǂhâ hâ ǃgâsana huisa mati sida ǀhōsagusisa Jehovab ǀkha nî ǀgaiǀgai? Aiǁgau-e mā re.

¹³ Stefanis tsî ǀnî hâ ǃgâsan hîna ge Elob ǀkha ǀguiba gere sîsenǀhaon ge kaise gere ǃgâiaǂgao, ǃhūsaben hîna ge Amerikaba ǃoa a hānan gere hui o. ǁÎn ge ǁîna omde ôa hui tsî ǃgâiǃgâis ǀkha gere hui. “ǁÎn ǃgâiaǂgaob tsî ǃgôaǃgâsib hînan gere ǁgaub ge kaise ge dâ kai da” dis ge Stefanisa ra mî. “Omaridi ǁanin ge ra ǂâi sida ge ǁîna a hui di xawen ge ǁîna sida ge hui” dis ge ra ǀaro. “ǀNammi, ǀguiǃnâxasib, ǂgoms tsî Jehovab ai ǂgomaiǂnûis hîna da ge aitsama a mûs ge ge hui da î da Jehovaba ǀgaisa ǀnamma ūhâba. Tsîs ge nēsa ge hui da î da Jehovab ǁîb ǀapeǂhumis ǃnâ-ū ra mā da xūna ǃgôaǃgâ.”

SADU ǃOABASA KHORAǂUI RE

14, 15. (a) Kēbo-aob Jesajaba tae-i aiǁgausa ge ǁgau da? (b) Matin aoǁnâ-aona Jesajab aiǁgausa a ǁgae ǁkhā?

¹⁴ Jehovab ǀkha du ǃnāsase ra sîsen ǂgao? Māsenxase du ǂhâsib hâba sī ra sîsen ǂgao? Elob ǃoaba-aon xa î ge ǂhâbasa tama hâ ǃnūse doesa khoexaǃnâsiba ǁgaus ǃgao. Xawe ǀnî ǃgâsan ge ǁnā aiǂhanuba ūhâ māsenxase sī ǀnî hâ ǃhūb ǃnâ aoǁnâsa. ǁÎn ge kēbo-aob Jesajab di aiǁgausa ra sao. Jehovab ge dî o “tariba ta tita nî sî, tariba sige nî ǃgûbaba?” ob ge ǁîba ge ǃeream: “Mû, nē ta a, tita sî re!” (Jes. 6:8) Sadu tsîna ǁnā ǁkhāsiba ūhâ nē kēbo-aob khami ǃeream tsî gagasi ǁaxasigu ǃnâ ǁhaosa? Tae-i ǂhâsiba hâ?

¹⁵ Jesub ge aoǁnâ tsî ǁkhāǁkhāsabedīs xa ge mî: “ǃGaos ge a kai, xawe sîsenaogu ge a ǀoro. ǁNā-amaga ǃKhūb ǃgaos diba ǂgan, îb sîsenaoga sîǂui ǁîb di ǃgaos ǃoa.” (Mat. 9:37, 38) Sadu tsîna ǂhâsib hâba sī aimâba-aose sîsen ǂgao tama hâ? Tamas ka io du nau khoe-e hui ǂgao tama hâ ǁnāsa dīsa? ǂGui ǃgâsan ge ra mî ǃgâi ǀgaub hîna da Jehovab tsî ǀgūkhoen tsîna ǀnamma a ǁgau ǁkhāb ge aimâba-aose ǂhâsib hâba sī sîsensa. ǀGaugu xa du a ǂâi ǁkhā hîna da sida aoǁnâ sîsen-e a khoraǂui ǁkhāga? Kai ǃgâiaǂgaob ge hâ nēsa dīs ǃnâ.

16, 17. Tae-i aiǂhanuban ǁnān hîna ǁîn ǃoabasa ra khoraǂui ǂgaona a ūhâ ǁkhā?

¹⁶ Sado māsenxase Betels tamas ka io om sîsengu ǃnâ ǁhao ǂgao tama hâ ǀoasase tamas ka io ǃkhare tsēsa? Kaise î ge kai ǂhâsiba hâ Jehovaba ǃoaba ǂgaos ǃnâ tsî māsenxase mâ sîsenni hoa-e ūǃoasa. Nēs ge ǀnîsi nî ǂgaoǀkhā î-i khoe-e aoǁnâ sîsenni ǃnâ ǃgarise sîsen, ǁî-i ga ǂansa ǂgui xūn ǃnâ ga ra ūhâ xawe. Xawe nēn hoan ǂam-aib ge Jehovaba kaise ra ǃgôaǃgâ khoen ga māsenxase ǂhâsib hâba sī ga ra sîsen o.​—Psa. 110:3.

¹⁷ Sado ra tura ǃgâi ǁkhāǁkhāsa hōsa î du ǃgâise ǂhomisen sadu ǁgaumâis ǃaroma? Nēti î ga ra ī o, o du ge sadu tsîna Gaosib aoǁnâ-aon skoli ǃnâ a xoaǂgāsen ǁkhā. Nē skoli ge gagasi taradi tsî aogu tsîna ra hui hîna ǁîn di aoǁnâ sîsen-e ra khoraǂui ǂgaona. ǁÎn hîna nē skoli ǃnâ ra xoaǂgāsenan ge nî māsenxa mâ ǁgaumâi i hoa-e ūǃoasa. Sadu tsîna a māsenxa kai aiǂhanuga ǃoa khoraǂuisensa?​—1Kor. 9:23.

18. Tae-e du nî hōǃâ Jehovab ǀkha du ga tsēs hoasa ǀguiba ga ra sîsenǀhao o?

¹⁸ Jehovab di ǃoaba-aon ase da ge ra ǂkhâǃnâ-e māsenxase tanisensa. Nē ǀgaub ǃnâ-ū da ge ǃgâisib, khoexaǃnâsib tsî ǀnammi tsîna nau khoen ǃoagu tsēs hoasa ra ǁgau. Nēn hoana da ga ra dī o, o da ge ǃgâiaǂgaob tsî ǂkhîb tsîna ra hōǃâ. (Gal. 5:22, 23) Sadu mâsib ga mati ga ra ī xawe du ge sadu tsîna Jehovab māxa ǀgauga a ǁgae ǁkhā tsî ǁnās ǀkha a ǁîb di ǀō-aisa sîsenǀhao-ao kai ǁkhā.​—ǂKhm. 3:9, 10.