Mâ ǀapen hoan hîna Elob ǂans ǃoa-ai hân hoana hîkākā re

1. Apostel Pauluba mâ ǃkhâikhomsa ǂkhauhesa Xristeǁîna ge mā?

‘TĀ DĪ’ tib ge apostel Pauluba ge ǃkhâikhom. Tae-e da tā nî dī? “Tā nē ǃhūbaib ǀkha ǀguiti dīsen.” (Rom. 12:2) Paulub ge nē mîde ǂguro ǁaeb Xristeǁîna ǃoa ge xoa. Tae-i ǃaromab ge nē ǀgaisa ǃkhâikhomsa Jehovab ǃoa-ai ge māǁnâsen tsî ǃanu gagab ǀkha ǂkhauhe hâ i aogu tsî taradi tsîna mā?—Rom. 1:7.

2-3. ǁGâuaba mati ra dītsâ Jehovaba xu ūbē dasa xawe mati da sada di ǂâidi ǃnâ ‘ǀgaisase ǃhanasa’ tsū ǂâide a hîkākā ǁkhā?

² Paulub ge gere ǂâiǂhansen ǀnî Xristeǁîn ge omkhâi tama ǃhoa-ain tsî ǁGâuab ǃhūbaib di ǁgai ǂâiǀgaugu tsîn xa tsâǀkhāhesa. (Efe. 4:17-19) Nēs ge sada di ǀgui i tsîn ǀkha a īǁkhā. ǁGâuab ge a nē ǃhūbaib di ǂgaeǂgui-ao tsî ǃkharagagu ǀgauga a sîsen-ū ǁkhā ǂgaeǂhapu da tsî Jehovaba xu ūbē das ǃaroma. Aiǁgause, ǂhâǂhâsa tamas ka io ǀgapiǃgôahe ǂgao da ga o, ob ge nēsa nî sîsen-ū Jehovaba xu ūbē dasa. ǁÎb ge oms tamas ka io da ge skoli tsî khoen tawa a ǁkhāǁkhāsen xūna a sîsen-ū ǁkhā ǁîb ǀkhāba ǃoa ǂgae das ǃnâ.

³ Sada ǂâidi ǃnâ “ǀgaisa hâǃkhaide” ǃhana hâ xūna da a hîkākā ǁkhā? (2Kor. 10:4) Paulub ge ǃeream ǀgausa kō re: “ǀApede ra hîkākāse, tsî mâ ǀgapib hoab, Elob ǂans ǃoagu ra khâib tsîna, tsî ge ge mâ ǂâis hoasa Xristub di ǁnâuǀnamxasib ǃnâ ra ǃkhō.” (2Kor. 10:5) Jehovab di huib ǀkha da ge nē ǁgai ǂâiǀgauga a dan ǁkhā. Sōǀôa-i tsûga a ūbē ǁkhā khamis ge Elobmîsa a huida ǁkhā ǁGâuab ǃhūbaib di ǁgai sîsenǂuiga mâǃoasa.

“SADU ǂÂIS DI ǀASA KAISIS”

4. Mâ ǂgui ǀkharaǀkharana da ge dī amaba da ge ǂguro a ūǃoa o?

⁴ ǂÂi-oa re Elobmîsa du ge ǂguro a ǁkhāǁkhāsen tsoatsoa tsî ūǃoa tsî a dī ǀkharaǀkharan xa Jehovaba ǃoabas ǃaroma. ǂGui da xas ge nēsa ǁgai xūn hîna da gere dīna ǀûsa ge ǃaroma. (1Kor. 6:9-11) Jehovaba da ge ra gangan nēs ǀkhab ge huida ǃkhais ǃaroma.

5. Mâ ǀgam xūna da Romeǁîn 12:2 ǃoagu nî dī?

⁵ Xawe da ge tā tātsē nî mî ǃaruǀî da ǀkharaǀkharana dīsa ǂhâ tama hâ di. ǁGai ǁorena da ge dī ǀû ǁāǁnâhe da nîs aiǃâ xawe da ge noxoba ǀgaisase nî sîsen i da tā ǁîna ǃoa oa. Nēsa da mati a dī ǁkhā? Paulub ge ge ǃeream: “Î tā nē ǃhūbaib ǀkha ǀguiti dīsen, î du sadu ǂâis di ǀasa kaisis ǃnâ ǀkhara.” (Rom. 12:2) Nēs ǃaroma da ge ǀgam xūna nî dī. ǂGurose da ge tā ‘nē ǃhūbaib ǀkha ǀguiti nî dīsen.’ ǀGamǁîse da ge nî ‘ǀasa kaisen’ sida ǂâiǀgaub ǃnâ.

6. Jesub mîdi hîna Mateub 12:43-45 ǃnâ hâdi ǂâibasensa xu da tae-e ra ǁkhāǁkhāsen?

⁶ Paulub gere ǃhoaǃgao ǀkharaǀkharan ge mûhe ǁkhā ǀkharaǀkharan xa ǀgui ge hâ tama hâ i. Xawe mâ ǃâb sada ûib dib hoaba ra tsâǀkhā. (ǀKharaǀkhara tamas ka io ǀkharaǀkharasen? di hâ boksisa mû re) Sada di ǂâide da ge nî ǀasa kai sada ǂganagab, tsâsigu tsî tanisen ǀgaugu tsîn hoana ǃkhōǂgā hâse. Nēs ǃaroma da ge hoada nî dîsen, ‘ǀkharaǀkharan hîna da ra dīna aisǀkhāb ai ǀgui a mûhe ǁkhā tamas ka io da ǂganagaba xu ama Xristeǁî kai hâ?’ Nē ǀkharaǀkharan ge a ǂhâǂhâsa. ǁÎb mîdi hîna Mateub 12:43-45 ǃnâ hâdi ǃnâb ge Jesuba ge ǁgau da tae-e da nî dīsa. (Khomai re.) ǁNā mîdi ge kaise ǂhâǂhâsa xū-e ra ǁkhāǁkhā da: ǁGai ǂâide ūbēs ǀguis ge ǂâu tama hâ; ǃgâi tama ǂâiǀgauga da ge ǃgâigu ǀkha nî ǃkhōǃkhuni.

‘ǀASAKAISEN RE SADU ǂÂIS DI GAGAS ǃNÂ’

7. Mati da sada di ǂganagaba a dawa ǁkhā?

⁷ Sada ǂâiǀgaub tamas ka io ham da a ǃkhaisa da a dawa ǁkhā? Elobmîs ge ra ǃeream: “Tsî du nî ǀasakaisenga sadu ǂâis di gagas ǃnâ; tsî du nî anaga ǀasa khoeb, Elob ǃoa kuruhe hâba ama ǂhanu-aisib tsî ǃanusib ǃnâ.” (Efe. 4:23, 24) Nēs ǃaroma i ge a ama sada di ǁgai ǂâide da a ǀasa kai ǁkhāsa xawes ge nēsa supu tama hâ. ǃNāsa-e da ge nî dī nē ǁgai ǂâidi tsî tanisen ǀgaugu tsîna xu ǂgōsens ǃaroma. Sada ‘ǂâis di gagasa’ da ge nî dawa. Nēs ge ra ǂâibasen sada di turagu, ǂhâsigu tsî dī ǂgao da ra xūn tsîna da nî dawasa. Nēs ge aiǃgû ra sîsena ǂhâ hâ.

8-9. ǀGui ǃgâsab di aiǁgausa ǂganagab khoesiba ǀkharaǀkharas di ǂhâǂhâsasiba mati ra ǁgau?

⁸ Hā re i da ǂkhabaxa ge i ǃgâsab di aiǁgausa ǃoa kō. Ā ǀû tsîb ge a ǃkham ǀû o, ob ge ge ǁāǁnâhe tsî nēs ǀkha ǁîb ǀhûhâsib khoena ǃgâi aoǁnâsa ge mā. Xaweb ge ǀguitsē ǁāǁnâhe toab hâ hîna ǃgomsib ǃnâ ge hâ i. ǀHoro hâ khoeb ge ǁîb oms tawa hā tsî gere ǃkham-ūbi ǂgao. ǂGurob ge ge ǃkhō-oasen tsî ge ǃkham tama hâ i. Xaweb ge nē khoeba Jehovab ǀonsa a ǃkhāǃkhā o, ob ge nēsa ge tani ǁoa i. Tsî nē khoeba ge ǂnau. Nēsab ge tae-i ǃaroma dī? Elobmîs ge ǁîb ǃkhams turaga ǀûs ǀkha a huibi xaweb ge noxoba ǁîb di ǂâis di gagas ǃnâ ge ǀasa kaisen tama hâ i.

⁹ Xaweb ge nē ǃgâsaba ge ǀûsen tama hâ i. (ǂKhm. 24:16) ǀHaohâb ǃûi-aogu di huib ǀkhab ge ge aiǃgû ǀkharaǀkharana dīsa. Tsîb ge ǀams ai ǁîb tsîna ge ǀhaohâb ǃûi-ao kai. Tsî ǀgui ǃuib ge Gaosib ǀhû-ommi ǃauga ǁkhā mâsib hînab ge ǃkharu ǃnâb ǃnâ ge hâ i. ǀHoro hâ aob ge ǀgui ǀhaohâb ǃûi-aoba gere ǂnau ǂgao. Sada ǃgâsaba tae-e ge dī? Tsaura ǃgamǃgamsenxa dommi ǃnâb ge nē khoeb ǀkha ǃhoa tsî ge ǃnomǃnom bi tsî ǁîb omsa ǃoa oas ǀkha ge huibi. ǃGâsaba tae-i ǃaroma nē ǀgaub ǃnâ ge tanisen? Sada ǃgâsab ge ǁîb di ǂâis di gagas ǃnâ ge ǀkharaǀkharasen. ǁÎb ge ge ama ǃnomsa tsaura Xristeǁî kai tsî nēs ǀkha Jehovaba ge koa.

10. Tae-e da nî dī ǂganagab khoesiba ǀkharaǀkharas ǃaroma?

¹⁰ Nē ǀkharaǀkharan ge tsēs ǃnâ a dīhe ǁoa. Nēsa dīhōs ǃgao da ge “ôasasib hoab” ǃnâ kurina nî sîsen. (2Pet. 1:5) Nē ǀkharaǀkharan ge Jehovaba da ǂgui kurina ǃoaba hâ ǃkhais ǃaroma ǀgui ī tama hâ. Xawe da ge ǀgaisase nî sîsen nēsa īǁkhā kais ǃaroma. Xūn nēs ǀkha a huida ǁkhān ge hâ. Hā re i da ǀnîna ǃhoaǃgao.

SADA ǂÂIS GAGAS ǃNÂ ǀASAKAISENS

11. Jehovaba mati ra huida ǂganagab khoesiba ǀkharaǀkharas ǀkha?

¹¹ ǀGores ge a ǂguro ǂhâǂhâsa ǃâ. Psalmdi xoa-aob khami da ge nî ǀgore: “ǃAnu ǂgaoba kuruba te re, ti Elotse, î ǁaposa gagasa ti ǃnāb ǃnâ ǀasa kaiba te re.” (Psa. 51:10) Sada ǂganagab khoesib ǀkharaǀkharasa ǂhâ hâsa mûǂan tsî da ge Jehovaba nî ǂgan îb huida. Mati da a ǂan Jehovab nē ǀkharaǀkharan ǀkha nî huidasa? Jehovab ge ǃgari danaxa Israelǁaesa Esegieli tsēdi ǃnâ a mā ǂkhâǃnâs ge nî huida: “Tsî tita ge ǁîna ǀguiti-ī ǂgaoba nîra mā tsî ǀasa gagasa . . . tsî ǁganǂgaoba ǁîna nîra mā, [Elob di daoǁgaudi xa ǃgâibahega].” (Ese. 11:19) Jehovab ge ge māsenxa i ǁnā Israelǁaesa huisa tsî sada tsîna nî hui.

12-13. (a) Psalmdi 119:59 ǃoagu da tae-e nî ǂâiǃgâ? (b) Mâ dîde da nî dîsen?

¹² ǂÂiǃgâs ge a ǀgamǁî ǂhâǂhâsa xū. Elobmîsa da ga ǂōrisase tsēs hoasa khomai o, o da ge nēs xa nî ǂâiǃgâ tamas ka io khomai da ra xūna nî ôaǃnâ ǀkharaǀkhara da nî xūna mûs ǃaroma. (Khomai re Psalmdi 119:59; Heb. 4:12; Jak. 1:25) Khoen di ǂâiǀgaugu xa a tsâǀkhāhe ǁkhā xūna da ge nî ôaǃnâ. Tsî da ge nî ǂanǃgâ ǂkhabusasiga da ūhâsa tsî nēsa nî sîsenǂam.

¹³ Aiǁgause, dîsen re: ‘Surixasiba ta ti ǂgaob ǃnâ ūhâ.’ (1Pet. 2:1) ‘ǀGapiǂâixasensiba ta ti ǂgaob ǃnâ ūhâ?’ (ǂKhm. 16:5) ‘Nau khoena ta ra ǃgôaǁnâ tita ūhâ xūnan ūhâ tama hâ amaga tamas ka ion ga ǀnî hâ ǃhao o?’ (Jak. 2:2-4) ‘ǁGâuab ǃhūbaib ra mā xūn xa ta a ǃgâibahe?’ (1Jhn. 2:15-17) ‘ǁGai ǁaxasigu tamas ka io tanisen ǀgaugu xa ta a ǃgâibahe?’ (Psa. 97:10; 101:3; Amo. 5:15) Nē dîdi ǃereamdi ge nî huida mûsa mâpa da ǀkharaǀkharana a dī ǁkhāsa. ǀGaisase ǃhanasa ǂâidi tsî tsâsigu tsîna da ga ǀkharaǀkhara o, o da ge sada ǀhomsi ǁGûb Jehovaba nî ǂkhîǂkhî.—Psa. 19:14.

14. Tae-i ǃaroma i a ǃgâi omkhâi ra ǀhōsana ūhâsa?

¹⁴ ǃGâi ǀhōsana-ǁhûis ge a ǃnonaǁî ǂhâǂhâsa ǃâ. ǂAnǃgâ ǂgao tama da ga i xawen ge sada di ǀhōsana sîsenǂuiba sada ai ūhâ. (ǂKhm. 13:20) Sîsenni tamas ka io skoli tawa da ge khoen hîna sada Elob ǂâiǀgauba ūhâsa ǂkhâǃnâ tama hân ǀkha ra hâ. Xawe da ge ǃgâi ǀhōsana sada Xristeǁî ǀhaodi tawa a hō ǁkhā. ǁNāb ge ǃkhaib hîna da ra ǂkhâǃnâheba “ǀnammi tsî ǃgâi sîsengu” ǃnâ ǃgûsa—Heb. 10:24, 25.

I DA “ǂGOMS ǃNÂ ǁAPOǁAPOHE”

15-16. ǁGâuaba mati sadu di ǂâiǀgauga ra ǀkharaǀkhara ǂgao?

¹⁵ ǂÂis ǃnâ ūhâ re ǁGâuab ge sada di ǂâiǀgauga dawasa ra ǃkhamba. ǁÎb ge mâ xū-i hoa-e ra sîsen-ū Elobmîs ra māda ǃgâiǂâisa hîkākās ǃaroma.

¹⁶ ǁGâuab ge ra aiǃgû ǁkhā dîs hînab ge Evasa dîs ǀkha Edenni ǃnâ: ‘Eloba amabes’ ǃnâ nēsa ge mî? (Gen. 3:1) Dîn hîna sada ra ǂgom xūn ǃnâ ra ǂgomoǃnâ kai da na da ge ra ǁnâu: ‘Eloba amabes ǃnâ aorese tamas ka io tarese ǃgamesa mā-am tama hâ? Eloba amabes ǃnâ ǂgao tama hâ i da Krismas tsî ǃnaetsēdi tsîna tsēdī? Sadu Eloba amabes ǃnâ mā-am du tama hâ ǀaoba ūǃoasa? ǀNamxaǃnâ Eloba amabes ǃnâ mā-am du tama hâ sadu ǀnamsaben hîna ge ǂnûiǂuihen ǀkha ǀhōsagusa?’

17. Sada ǂgomsa ra ǂgomoǃnâ kai da dîna da ga dîhe o, o da tae-e nî dī tsî Koloseǁîn 2:6, 7 sa nēs ǀamǂoasa mati ra ǁgau?

¹⁷ Sada ǂgoms ǃnâ da ge nî ǂgomǁapo. ǂGomoǃnâsiba ra ǃaroma dîde da ga ǃeream tamase xu o, o di ge sada ra ǂgom ǃnâ xūna nî dîsen kai da tsoatsoa. Nē ǂgomoǃnâsib ge ega nî ǃaroma is sada ǂgomsa ǂkhabu. Tae-e da ǁnâi nî dī? Elobmîs ge ra mî î da sada di ǂâide ǀasa kai tsî ǂgomǃgâsiba omkhâi “mâs a Elob di ǃgâi tsî ǃgâiǃgâibasensa tsî dīǀoaǀoasa ǂâi ǃkhaisa.” (Romeǁîn 12:2) Hoaǁae da ga Elobmîsa ôaǃnâ o, o da ge ǀgaisa ǂgomǃgâsiba ǂgom ǃnâ da ra xūn ai nî omkhâi. Tsî da ge khôahe ǁoasa ǂgomǃgâsiba nî ūhâ Jehovab di daoǁgaudi a ǂhanu-aisa. O da ge hais hîna ǀgaisa ǃnomaga ūhâs khami nî “ǃnomaǃnomahe . . . ǂgoms ǃnâ.”—Khomai re Koloseǁîn 2:6, 7.

18. Tae-e nî huida ǁGâuab di ǁgai ǃhūbaib di sîsenga xu ǂgōsensa?

¹⁸ ǀNîhâ ǃgâsan ge sada di ǂgomsa a ǀgaiǀgaiba da ǁoa, nēs ǃaroma sadu di ǂâisa ǀasa kai re hoaǁae. ǀÛs ose ǀgore tsî Jehovab di ǃanu gagaba ǂgan re. ǃGamse ǂâiǃgâ tsî aiǃgû re sadu ra ǂgomǃnâ xūn a amasa hoaǁae ôaǃnâs ǀkha. ǃGâi ǀhōsana ôa re tsî ǁnān hîna sadu ǂgomsa ǀgaiǀgais ǀkha nî huidun ǀkha hâ re. Nēsa dīs ǃnâ du ge ‘ǀapede ra hîkākā tsî mâ ǀgapib hoab, Elob ǂans ǃoagu ra khâib tsîna.’—2Kor. 10:5.