ǂGomsa ūhâ tama hâ khoen di ǂgaoga tsâǀkhās

1. Mâ ǀkharaǀkharana ǀnî ǃhūgu ǃnâ ǃkharu ge kurigu ǃnâ ge ī?

ǂGUI kurigan ge ǂgui khoena ǃhūbaib ǃnâ Elobmîs ǃnâ gere ǂgom. Xawe i ge ǃkharu go kurigu ǃnâ ǀkharaǀkharana ge hâ. ǂGui khoen ge ǂgom-e ūhâ tama hâ. ǀNî ǃhūgu ǃnân ge ǂgui khoena ǂgom-en ge ūhâ tama hâ di ra mî.b—Mat. 24:12.

2. Mâ ǃaromadi ǃgaon ǂgui khoena Elob ǃnâ ǂgom tama hâ?

² Tae-i ǃaroman ǂgui khoena ǂgom-en ge ūhâ tama hâ di ra mî?c ǀNîn ge ǃkhūsisa ôas tsî ǁîn ǃgomsin ais tsîna ra ǂgomaiǂnûi. (Luk. 8:14) ǀNîn ge Elob ǃnâ ge ǂgom ǀû. ǀNîn ge Elob ǃnâ ra ǂgom xawe kurusǂans ǃnâs tsîna ra ǂgom. ǁÎn ge ǀnîsi ǀhōsan, ǁgauǃnâ-aon tamas ka io ôaǃnâ-aona ra ǁnâu hîna ra mîna ûib ge ǁnāti ǀgui ge hā di xawen ge ǃgâi ǃaromade ǁnâu tama hâ Elob ǃnâ ǂgomsa. ǀNîn ge ǂgomdi ǁkhāǁkhā-aogu dīxūn xa ǃgâibahe tama hâ. ǀNî ǃhūgu ǃnâb ge ǂhanuba ǂgomdi ǁaxasiga mā-am tama hâ.

3. Nē ǁkhāǁkhāǃâsa tae-i ǀkha nî huida?

³ Jesub ge ge mîmā î da ‘ǃgûǂoa tsî hoa ǁaede ǁkhāǁkhāsabedī.’ (Mat. 28:19) Mati da ǂgom-e ūhâ tama khoena a hui ǁkhā în Eloba ǀnam tsî Xristub di ǁkhāǁkhāsabe kai? ǂAnǃgâ da ge nî khoe-i sida haisi-amsa ra ǃkhōǃoa ǀgaub ge ǁî-i ge kaikhâi ǃkhaisa xu hâ. Khoen hîna Europa xu ra hān sida haisi-amsa ra ǃkhōǃoa ǀgaub ge Asiaba xu ra hā khoen ra ǃkhōǃoa ǀgauba xu ra ǀkhara. Tae-i ǃaroma? Europi ǃnân ge ǂgui khoena Elobmîs xa xū-e a ǂan tsî hoa xūn Elob xa ge kuruhes tsîna. Xawen ge ǂgui khoena Asiab ǃnâ Elobmîs xa xū-e a ǀū tsî kurus ǃnâs tsîna ǂgom tama hâ. Nē ǁkhāǁkhāǃâs ge nî huida i da nē khoen hoan di ǂgaoga Elobmîs amab ǀkha tsâǀkhā, tae-i ǀgui i ǃnân ga ǂgom xawe.

ǃGÂI MÛǂUIBA ŪH RE

4. Tae-i ǃaroma da ǃgâi mûǂuiba nî ūhâ?

⁴ ǃGâi mûǂuiba ūhâ re. Mâ kurib hoaban ge Elob ǃnâ ǂgom tama hâ khoena ra Jehovab di ǀHûǀguitimî-ao kai. ǂGuin ge ǀnai ǃgâi ûi ǀgauga ūhâ tsî ǂgomdi ra dī tsū xūn xa ǃgâibahe tama hâ. ǀNîn ge ǃgâi tama ûi ǀgauga ūhâ tsî dīn ra tsū xūna ra ǃgâiǃgâi ǂgao. Jehovab huib ǀkha da ge khoen hîna “ǀamo ûiba ǃoa ǃkhōǂuibasenhe” hâna nî hō.—ǃNǃkh. 13:48; 1Tim. 2:3, 4.

5. Tae-e ra dī în khoena sida haisi-amsa ǃgâise ūǃoa?

⁵ Khoexaǃnâ tsî ǃgaoǃgâxa re. Khoen ge sida haisi-amsa ǃgâise ra ūǃoa, tae-e da ra mîs ǃgaos ose xawe mati da nē xūna ra mî ǀgaub xa. ǁÎn ge a ǃgâibahe sida ga khoexaǃnâsib, ǃgaoǃgâxasib tsî ǁîn ǃnâ ama ǃgâiǃgâibasensa ǁgau o. ǁÎna da ge ǁgari tama hâ în sida ra mî xū-e ǃgâ. Xawe da ge ǁîn ǂgomdi xa ūhâ ǂâiǀgauba ra ǁnâuǃā. Aiǁgause, ǀnî khoen ge ǀūn a khoen ǀkha ǁîn ǂgoms xa ǃhoa ǂgao tama hâ. ǀNîn ge khoe-e Elob xa dîs ge ǂhanu tama hâ di ra tsâ. Tsî ǀnîn ge ra tao Elobmîsan Jehovab di ǀHûǀguitimî-aon ǀkha ra khomai hînan ga mûhe o. Mâ mâsib hoab ǃnâ da ge ra dītsâ ǁîn tsâsiga ǁnâuǃāsa.—2Tim. 2:24.

6. Apostel Pauluba mati ge ǁgau ǁîb ǃhoa ǀgaubab a dawa ǁkhāsa tsî mati da ǁîba a ǁgae ǁkhā?

⁶ Tae-e da nî dī khoe-i ga “Elobmîs” “kurus” “Elob” tsî “ǂgoms” di hâ mîde da nî sîsen-ūs xa ǃgâibahe tama io? Apostel Pauluba da ge ǁgae tsî sida ǃhoa ǀgauba a dawa ǁkhā. Paulub ge Jodeǁîn ǀkhab gere ǃhoa o, o xoade gere sîsen-ū. Grikegowaba ra ǃhoa ôaǃnâ-aogu ǀkhab gere ǃhoa o Areopagus tawa, ob ge ge mî tama hâ i Elobmîsa xub ge ra ǃhoa di. (ǃNǃkh. 17:2, 3, 22-31) Mati da Paulub aiǁgausa nî sao? Khoe-i hîna Elobmîsa ūǃoa tama hâ i ǀkha da ga ǀhao o, o da ge Elobmîsa sîsen-ū tide ǁîn ǀkha da ga ǃhoa o. Khoe-i ga Elobmîsa i ra khomai hîna mûhesa tao o, o da ge xoade ǀnî hâ ǀgaub ǃnâ a ǁgau ǁkhā, aiǁgause ǀnîsi ǁâǁawab ǃnâ-ū.

7. Tae-e da nî dī i da Pauluba ǁgae, 1 Korinteǁîn 9:20-23 ǃoagu?

⁷ ǁNâuǃāxa tsî ǃgâ re. Sida ra ǀhao-ū khoen ra ǂâi tsî tanisen ǀgauba da ge nî ǁnâuǃā. (ǂKhm. 20:5) Paulub aiǁgaus xa ǁkhawa ǂâi re. ǁÎb ge Jodeǁîn ǁaegu ge kai. Xaweb ge Jodeǁî tama khoenab gere aoǁnâba o, o ǁîb aoǁnâ ǀgauba gere dawa, ǁîn ge Jehovab tsî Elobmîs tsîna ǀū i amaga. Ôaǃnâsa da ge nî dī tamas ka io ǂansa ūhâ ǃgâsan ǀkha sida ǀhaohâb ǃnâ nî ǃhoa, i da sida aoǁnâ ǂharis ǃnâ hâ khoen ǂâiǀgaugu tsî tsâsigu tsîna ǁnâuǃā.—Khomai re 1 Korinteǁîn 9:20-23.

8. Mâ ǀgaub ǃnâ da Elobmîs xa a ǃhoa tsoatsoa ǁkhā?

⁸ Sida mîǁguib ge ‘ǃkhōǂuibasenhe’ hâna ôasa. (Mat. 10:11) Nēsa dīs ǃgao da ge khoena nî ǂgan în tae-en ra ǂâisa ǁgâiǂûisen tsî ǃgaoǃgâxase nî ǃgâ. ǃGâsab ge Englandi ǃnâ khoena gere dî, mati da ǂkhîba ǃgameb ǃnâ nî ūhâs, mati da ǀgôana nî kaikais tsî da mati nî mâǀgaisa mâǃoahe da ga xawe. ǁÎn ǂâiǀgauga ǃgâ toa tsîb ge gere mî “tae-e du nē ǀapemās hîna ge 2 000 kuriga ǃkharu hâse a xoahes xa ra ǂâi?” ǁNās khaoǃgâb ge “Elobmîs” di hâ mîsa sîsen-ū tama hâse, Elobmîs xoade ǁîb ǁâǁawab ǃnâ-ū ra ǁgau.

KHOEN ǂGAOGA TSÂǀKHĀ RE

9. Mati da Elob xa ǃhoa ǂgao tama hâ khoena a hui ǁkhā?

⁹ Khoen hîna Elob xa ǃhoa ǂgao tama hân di ǂgaoga da ge a tsâǀkhā ǁkhā, ǁîn ǀgūse hâ xū-i xa ǃhoas ǃnâ-ū. Aiǁgause, ǂguin ge kurus xa ra buru kai-e. ǁNās ǀkha da ge sao ra-e a mî ǁkhā: ǂAn du asen ge kurus ǂansa ūhâ khoena, ǀnai a kurusa xūna ra sîsen-ū ǀasa xū-e kurusa. Aiǁgause, microphona ra kuru khoe-i ge khoe-i ǂgaede ra ôaǃnâ nēsa i nî kurus aiǃâ tsî kamerade ra kuru khoe-i ge khoe-i mûde ra ôaǃnâ. Tae-i xa du ra ǂâi kurusǂans xa du ga ǁnâu o? Mî î du nî nēb ge ǀgaib, khoe tamas ka io a ǀnî hâ xū? ǃGaoǃgâxase da ǃgâ toa hâs khaoǃgâ da ge a ǀaro ǁkhā: Kuru-aon ga ǂgaedi tsî mûdi tsîn a kurusa ǀgauba xu ǁkhāǁkhāsen o, o da ge a dîsen ǁkhā, ǁîna ham-e xu ra ǁkhāǁkhāsen di. ǃKharu ge ǁaeb xoa-aob ge mî xū-i ge kaise ge ǃgâiba te: ǁÎb ge ge mî: ‘ǁÎb ǂgaesa ge ǂgāba ǁnâi ǁnâub tide? ǁÎb mûsa ge kuruba ǁnâi mûb tide? . . . ǁÎb ge khoeba ǂansa ra mā.’ ǀNî kurusǂansa ūhâ khoen ge nē mîdi ǀkha ra ǃgûǀhao. (Psa. 94:9, 10) ǁNās khaoǃgâ da ge vidioba a ǁgau ǁkhā hîna, “Interviews and Experiences,” “Viewpoints on the Origin of Life” ǃnāga hâba. (Mû re PUBLICATIONS > VIDEOS.) Tamas ka io da ge sao ra ǂkhanikha a mā ǁkhā, Was Life Created? tsî The Origin of Life—Five Questions Worth Asking.

10. Mati da Elob xa ǃhoa ǂgao tama hâ khoe-i ǀkha a ǁgam tsoatsoa ǁkhā?

¹⁰ ǂGui khoen ge ǃgâi hānîǁaeba ra ǂhâba. Xawe ǂguin ge ra ǃao ǃhūbaib nî dīkākāhe ǃkhaisa. ǃNarimâra sari-aob ge Norwayb ǃnâ ge mî khoen hîna Elob xa ǃhoa ǂgao tama hân ge ǃhūbaib ǃnâ ra ī xūn xa ǃhoas xa a ǃgâibahe. Khoena tawede toa tsîb ge ra mî: “Tae-e du ǃgâi hānîǁaeb hîna da nî ūhâb xa ra ǂâi? Sida ǃâubasensa ǂgīǂgōsi ǂgaeǂgui-aogu, kurusǂansa ūhâ khoen tamas ka io ǀnî hâ khoe-e xu hâ?” ǃGaoǃgâxase ǃgâ tsîb ge xoasa ra khomai hîna ǃgâi hānîǁaeba ra ǁgausa. ǀNîn ge Elobmîs mîmâis hîna ǃhūbaib ge ǀamosib kōse nî hâ tsîn ge ǃgâi khoena ǀamosib kōse nî ûi di hâs xa ra buru kaihe.—Psa. 37:29; Aoǁn. 1:4.

11. Tae-i ǃaroma da ǃkharagaǃnâgu ǀgaugu ǃnâ khoen ǀkha ra ǃhoa ǂgao tsî mati da Paulub aiǁgaus hîna Romeǁîn 1:14-16 ǃnâ xoasa sa a sao ǁkhā?

¹¹ Dītsâ da ge nî ǀhao-ū da ra khoena ǃkharagaǃnâgu ǀgaugu ǃnâ ǃhoa-ūsa. Tae-i ǃaroma? Khoen a ǃkharagagu amaga. Aiǁgause, ǀnî khoe-e a ǃgâiba xū-i ge nau khoe-i xa ǃgâ-e tide. ǀNî khoen ge Elob tamas ka io Elobmîs xa ǃhoas xa a ǃgâibahe xawen ge ǀnîna ǀnî hâ xūn xa ǃhoas xa a ǃgâibahe. Mâ ǃēs hoasa da ge nî sîsen-ū hoa khoen ǀkha ǃhoasa. (Khomai re Romeǁîn 1:14-16.) ǂÂis ǃnâ da ge ra ūhâ ǂgao Jehovab ǂhanu ai ǂgaoga ūhâ khoen ǂgaogu ǃnâ hâ amaba ra kai kai ǃkhaisa.—1Kor. 3:6, 7.

AMABA ASIAB KHOEN ǀKHA ǀGORAGUS

12. Asiab ǃnâ hâ khoen hîna kuru-ao i xa ǂâi tama hâna da mati a hui ǁkhā?

¹² ǃHūbaib ǂhawasen ge aoǁnâ-aona Asiab khoena ra ǀhao-ū, ǀnîn ge ǂhanub Elobmîs ǁkhāǁkhāsa mā-am tama ǂharide xu ra hā. ǂGui Asiab ǂharidi ǃnân ge ǂguina Kuru-aob xa ǁnātikōse ǂâi tama hâ. ǁÎn ge kuru-ao i tsî kurus xas tsîna ǂkhamsisa xu ge ǂâiǃgâ tama hâ i. ǀNîn ge ǃgâiǃgâibasensa Elobmîs amab ǃnâ ūhâ tsî Elobmîs ǁkhāǁkhāsa ra ūǃoa xawen ge ǀnîna ǀasa xūna Elobmîs xa ǁkhāǁkhā-e ǂgao tama hâ. Tae-e da a dī ǁkhā nē khoena huis ǃaroma? ǀNî aoǁnâ-aon ge ge ǁkhāǁkhāsen khoen ǀkha ǃgâi khoexaǃnâ ǀgaub ǃnâ ǃhoas ra huisa tsî i ga īǁkhā o mîba nî re matis Elobmîs amaba ûiǂuisa ǁîna ǁîn ûib ǃnâ a hui ǁkhā ǀgausa.

13. Tae-e khoena a hui ǁkhā Elobmîs ǃnâ ǃgâiǃgâibasensa ūhâs ǃnâ? (Tsoatsoas ai hâ ai-īsiba mû re.)

¹³ ǂGui khoen ge Elobmîs ǃnâ ra hō-e tsoatsoadi xa kaise a ǃgâiba-e.(Aoǁn. 7:12) Amerikab ǃnâ Mandarin gowaba ra ǃhoa khoena ra sari ǃgâsas ge ra mî: “Khoen ǃnâ ta ge ǃgâiǃgâibasensa ra ǁgau tsî mîn ra xūna ra ǃgâ. ǀNî ǃhūba xu ǀkhī hâ khoen a ǃkhaisa da ge ge ǂanǂui tsî a dî nî ǁkhā: ‘Mati du nē ǀasa ǂharis xa ra tsâ? Sîsen-e du ǀnai hō? Hâ du ra ǃkhaib khoena ǃgâise ra hâ-ū du?’” Nēs ge ǀnî ǁae ra hui Elobmîs xa khoen ǀkha ǃhoa tsoatsoasa. Mā-am i ga o, os ge ǃgâsasa ra ǀaro: “Tae-e a huida ǁkhā hâ-ū da ra khoen ǀkha ǃgâise sîsen ǁaresa? Xū-e ta Elobmîsa xu a ǁgau du ǁkhā? Mî ra: ‘ǂNoagus di tsoatsoas ge ǁgam-ets ra ǁkhowa-ams ǁkhās xase ī; ǁnā-amaga ǂnoagus nî tsoatsoas aiǃâ ǁnāpaxū bē re.’ ǂÂi i du ra nē mîdi a huida ǁkhāsa nau khoen ǀkha ǃgâise hâ ǀhaos ǃnâ?” (ǂKhm. 17:14) Nē ǃhoaǀhaodi ge nî huida mûsa hamna da ǁkhawa a sari ǁkhāsa.

14. Elob ǃnân ǂgom tama hâ di ra mî khoenab Taiwani ǃnâ hâ ǃgâsaba mati ra hui?

¹⁴ Khoen hîna Elob ǃnân ǂgom tama hâ di ra mîna ǃoa da tae-e a mî ǁkhā? ǃGâsab hîna gaxuse aoǁnâ sîsen-e ra dīb ge Elob ǃnâ ǂgom tama hâ khoen Taiwani ǃnâ hân xa ra mî: “Taiwani khoen ga mî o ‘ǁîn Elob ǃnâ ǂgom tama hâ di,’ on ge ǃnāsa khoen ra ǃoaba elogu xa ra ǃhoa. ǃKhō-am tsî ta ge ra mî ǂgui khoen aitsama eloga ra dībasensa. Tsî ta ge Jeremiab 16:20 sa ra khomai: ‘Khoeba kha eloga dībasen ib nî Elo tamagu kom ǁîgao?’ Tsî ta ge ra dî: ‘Mati da ama Eloba khoen eloga xu a ǂanǂui ǁkhā?’ ǃGâise ǃgâ tsî ta ge Jesajab 41:23 sa ra khomai: ‘Mîba da ǁnā xūn, ega nîra hāna, î da mûǂan, elo du a ǃkhaisa.’ Tsî ta ge ǁnāpaxū ra ǁgau mâ mîmâinab ge Jehovaba hānîǁaeb xa a māsa.”

15. Asiab ǃnâ hâ ǃgâsab aiǁgausa xu da tae-e a ǁkhāǁkhāsen ǁkhā?

¹⁵ Asiab ǃnâ hâ ǃgâsab ge khoenab ga ǁkhawa sari o, o sao ra-e ra dī. ǁÎb ge ra mî: “Elobmîs gā-aisib, Elobmîs kēbodi dīǀoaǀoas tsî ǃhūbaib ra sîsen ǀgaus tsîna ta ge ra ǁgau nî. ǁNāpaxū ta ge ra mî nē xūn hoan ra ǁgausa ûitsama Elob tsî kuru-aob hâsa. Khoen ga mûǂan tsoatsoa o Elob ûitsamasa, o ta ge Elobmîs Jehovab xa ra mî xūna ra ǁgau nî.”

16. Hebreǁîn 11:6 ǃoagun tae-i ǃaroma Elobmîsa da ra ǁkhāǁkā khoena Elob tsî ǁîb mîs tsîn ǃnâ ǂgomǃgâsiba nî omkhâi tsî nēs ǀkha da mati a hui nî ǁkhā?

¹⁶ Elob ǃnâ ǂgom tama khoena da ga Elobmîsa ǁkhāǁkhā o, o da ge ra hui nî ǂgao în ǁîn ǂgoms Elob ǃnân ūhâsa ǀgaiǀgai. (Khomai re Hebreǁîn 11:6.) Tsî da ge ra hui nî ǂgao în Elobmîs ǃnâs tsîna ǁîn ǂgomsa ǀgaiǀgai. Nēs ge ra ǂâibasen ǀnî xūna da ǀguis xa ǃnāsa ǃnāde nî ǁguiǃāsa în ǁnâuǃā ǁkhā. ǁÎn ǀkha da Elobmîs xa ra ǃhoa ǁaeb hoaba da ge nî hui nî mûsa Elobmîs Eloba xu ra hāsa. Elobmîs kēbodi ra dīǀoaǀoa-e ǀgaus, Elobmîs mati kurus ǂans tsî ǃkharu ge ǁaeb xūn xas ga ǃhoa o, o ama ǀgaub tsî matis Elobmîsa sida ûib ǃnâ ra huida ǀgaus tsîna da ge a ǃhoaǃgao ǁkhā.

17. Sada ǀnamma mâ sîsenǂuiba khoen ai a ūhâ ǁkhā?

¹⁷ Khoena da ge ra hui Xristub di ǁkhāǁkhāsabe kais ǃaroma xawe da ge nēsa ǁîna ǀnamma ǁgaus ǃnâ-ū ǀgui a dī ǁkhā Elob ǃnân ga ǂgom tama i xawes tsîna. (1Kor. 13:1) ǁÎna da ra ǁkhāǁkhā khami da ge ra ǁgau nî ǂgao Elob a ǀnam da tsî ǂhâba hâsa î da ǁîb tsîna ǀnamma omkhâiba. Mâ kurib hoaban ge khoen hîna Elobmîs ǃnâ ǃgâiǃgâibasensa ūhâ tama hân tamas ka io ǀoro ǂansa Elobmîs xa ūhâna ra ǁāǁnâhe, Eloban ǀnamma ra omkhâiba amaga. ǁNā-amaga hoa ǃhaodi khoen ǃnâ ǃgâiǃgâibasensa ūhâ re. ǃHoan ga o ǃgâ nî re. Dītsâ re ǁnâuǃāsa tae-i ǃaroman ǁnāti ra tsâ tamas ka io ǂâisa. Sadu aiǁgaus ǀkha ǁgau nî re Xristub di ǁkhāǁkhāsabe kaisa.