ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
MEIB 6-12
ELOBMÎSA XU HÂ ǂÛǂÛSA MÎDI | 2 KORINTEǁÎN 4–6
“ǂKhabuǂâi tama” da ge hâ
(2 Korinteǁîn 4:16) ǁNā-amaga ge ǂkhabuǂâi tama hâ; tsî sige di ǃaugakam khoeb ga ǁgaoǁgaohe xaweb ge ǃnāb diba tsēsa xu tsēs ǃoa ra ǀasa kaihe.
w04-E 8/15 25 ¶16-17
Tsâu hâ xawe ǀûsen tide
16 Sida gagasi mâsiba kōǃgâs ge kaise a ǂhâǂhâsa. Jehovab ǀkha da ga ǀgaisa ǀhōsagusisa ga ūhâ o, o da ge sorosise da ga tsau xawe ǁîba ǃoabasa ǀûsen tide. Jehovab ge ‘ǀhupu hâna ǀgaiba mā tsî . . . ǁnāb hîa ǁkhāoǃnâba [ǂkhabusaba] ǀgaiba ra ǂguiǂguiba.’ (Jesajab 40:28, 29) Apostel Paulub ge nē mîdi amaba aitsama ge hōǃâ tsî ge xoa: “ǁNā-amaga ge ǂkhabuǂâi tama hâ; tsî sige di ǃaugakam khoeb ga ǁgaoǁgaohe xaweb ge ǃnāb diba tsēsa xu tsēs ǃoa ra ǀasa kaihe.”—2 Korinteǁîn 4:16.
17 “Tsēsa xu tsēs” di hâ mîde ǃgaoǃgâ re. Nēs ge ra ǂâibasen Jehovab ai ǂgomaiǂnûisa tsēs hoasa. Sîsabes hîna ge ǂgomǂgomsase 43 kuriga a ǃoabas ge tsau hâse gere tsâ tsî ge ǂkhabuǂâi hâ i. Xawes ge ge ǀûsen tama hâ i. ǁÎs ge ra mî: “Tita ge ge mîǁgui xū-e ta nî dīs aiǃâ aibe ǁgoas hoasa khâimâ tsî Jehovaba ǃoa ǀgore tsî ǁîb mîsa khomaisa. Nēs ge ge huite i ta nēsis kōse mâǀgai.” Jehovab nî hui da ǃkhaisa da ge nî ǂan, “tsēsa xu tsēs” kōse ǁîba ǃoa ǀgore tsî ǁîb ǀgaugu xa ǂâiǃgâs ǃnâ-ū.
(2 Korinteǁîn 4:17) Nē mûsǀapirob ai hâ ǁgâiǀāb âgeb, ǃhaese ra ǃgû-īb ge ǀamo tsî ǃnā hâ ǃgomǀgausa ǂkhaisiba sige ra sîsenba xui-ao.
it-1-E 724-725
Mâǀgais
Kaise i ge a ǂhâǂhâsa Xristeǁî ǃâubasens xa tā ǀūrusa, nēs ge ǀamo ûiba ǁoreba ūhâ tama hâ ǃhūbaib ǃnâ. ǁŌb hîna mâǃoa-aon xa ra ǃaromaheb tsîn ge nē ǃâubasensa a ǀam kai ǁoa. (Rom. 5:4, 5; 1Tes. 1:3; J.ǂHa. 2:10) Nēsi da ra hōǃâ ǃgomsin ge ǁnā ǃâubasens ǀkha a ǀgopeǀnōhe ǁoa. (Rom. 8:18-25) ǃGomsin hîna da ra hōǃân ge ‘ǁaerob’ dis ǀguisa ī. (2Kor. 4:16-18) Khoe-i ga ǂâis ǃnâ ūhâ o nē ǃgomsin ǁaerob dis ǀguisa īsa, o i ge Xristeǁîn ǃâubasens ai nî ǂgomaiǂnûi tsî hoaǁae Jehovab ǃoagu nî ǂgomǂgomsa.
(2 Korinteǁîn 4:18) sige, mûsa xūn ai kō tamage tsî mûǁoasa xūn ai ra kōge; mûsa xūn ge a ǁaeb di, xawe mûǁoasan ge a ǀamo xui-ao.
Gagasi xūna ǀō-aisase ôaǃnâs
(2 Korinteǁîn 4:7) Tsî ge ge nē ǁuiba ǃhūxapadi ǃnâ ūhâ, îb ǃnāǂamsasib ǀgaib diba Elob di tsî sige di tama ti.
w12-E 2/1 28-29
“Jehovaba ǀnom kai re”
David Splaini hîna a ǂgaeǂguira soros ǁanib ge nēsa ge ǃhoaǃgao. (2 Korinteǁîn 4:7) ǁUiba a tae? Nēsa ǂansa tamas ka io a gā-aisiba? “Hî-î” dib ge ǃhoa-aoba ge ǃeream. “ǁUib hînab ge apostel Pauluba gere mîb ge ‘amab di ǂhaiǂhais xa hâ.’” (2 Korinteǁîn 4:1, 2, 5) ǃGâsab Splaini ge ǃgâsana ge mîba ǁnā koro ǁkhâgu hînan gere ǁkhāǁkhāsen gu ge ge hui nî ǀō-aisa ǁgaumâidi aoǁnâ sîsenni didi ǃgao aiǂhomisensa. Nē ǁgaumâidi ge kaise nî ǃgôaǃgâhe.
ǃHoa-aob ge ge ǁguiǃā “ǃkhūxapadi” sida sorode ǃoa ra ǁnaeǁgausa. ǁÎb ge xapas hîna ǃkhūba xu kurusas tsî xapas hîna ǃuniǀuriba xu a kurusas tsîna gere ǀgopeǀnō. ǃUniǀuriba xu a kurusa xapan ge ǁnātikōse sîsen-ūhe tama hâ. Xawe ǃkhūba xu a kurusa xapan ge hoaǁae ra sîsen-ūhe. ǁUiba da ga ǃuniǀuri xapas ǃnâ ǂgā o, o da ge hoaǁae xapas xa ǀgui nî ǂâi ǁuib xas ōse. “Sadu ge hoaǁae sadu xa ǀgui ǂâi ǂgao tama hâ” dib ge ǃgâsab Splaina ge mî. “Sîsaben ase du ge khoena Jehovaba ǃoa ra ǂgae ǂgao. Sadu ge a ǃamku ǃkhūxapa.”
(2 Korinteǁîn 6:13) ǁKhā-e dīdawa-am re, (ǀgôan ǃoas axase ta ra ǃhoa), î du sado ǁkhāti haraharahe!
w09-E 11/15 21 ¶7
ǃGâsa ǀnamgub ǃnâ ǀgai re
7 O sida? Mati da sada a “haraharasen” ǁkhā? Khoen hîna ǀgui khaoǃhūgu tsî ǀgaugu tsîna ūhân ge hoaǃnâ-aixase ǃhaese ra ǀhōgu. Tsî ǁnān hîna ǀgui xūn xa a ǃgâibahen ge hoaǁae xūna ǀguiba ra dī. Xawe i ga sida Xristeǁîn ǀkha hoaǃnâ-aixase ūhâ xūna khoena xu a ǀgora da o, o da ge nî “haraharasen.” Kaise i ge nî ǃgâi dîsensa: ‘ǁAeba xu ǁaeb ǀkha ta khoen hîna ti khaoǃhūba xu ra ǀkharan ǀkha ra hâ ǀhao? Gaosib ǀhû-ommi tawa ta ǁnān hîna go amab ǃnâ ǀasase a ǀkhīn ǀkha hâ tama hâ, ǁîn ge tita ǀkha ǀhōsagusisa nî omkhâi ti ta ra ǂâi amaga? ǂKhaman tsî kairan hoana ta ti ǀhaohâb ǃnâ ra tawede?’
Elobmîs khomai ǃâs
(2 Korinteǁîn 4:1-15) ǁNā-amaga, nēti ī ǃoaba-e ge ǀkhomxaǂgaosiba xu ūhâ amaga ge tsânaǁkhui tama hâ; 2 tsî ge ge ǂganǃgâsigu taotaosaga ge mîǁnâ, tsî ge ge gāxaǃnâsib ǃnâ ǃgû tama, tsî ge ǁkhāti Elob mîsa ǂkhabaǂkhaba tama, xawe ge ge amab di ǂhaiǂhais ǀkha khoen di ǂâis hoas tawa ra mîmāsen Elob aiǃâ. 3 Tsî sige di ǃgâiǂhôas ga ǃgū-aihe hâo, os ge kāǁō ran ǃnâ ǃgū-aihe hâ; 4 ǁîn ǃnâb ge nē ǃhūbaib di eloba ǂgomoǃnân di ǂâide ge ǂgī kai, ǃgāsa ǃnâb ǂkhaisa ǃgâiǂhôas Xristub dis dib ǁîna ǀkhâu-ai tidese; ǁîb ge Elob di īsiba. 5 Sige ge ǁî-aitsama aoǁnâsen tama xui-ao, xawe ge ge Xristub Jesub a ǃKhū ǃkhais, tsî sige a Jesub ǃaroma sadu ǃoabasabe ǃkhaisa ra aoǁnâ. 6 ǁNā Elob, ǃkhaenaba xub nî ǃnâba ǀkhī, ti ge mîmāb, ǁîb ge ǁnāb, sige ǂgaogu ǃnâ ge ǀkhâuǂgāba, ǃnâǃnâs Elob ǂkhaisib ǂans dis nî ǀkhīse Jesub Xristub di ais ǃnâ. 7 Tsî ge ge nē ǁuiba ǃhūxapadi ǃnâ ūhâ, îb ǃnāǂamsasib ǀgaib diba Elob di tsî sige di tama ti. 8 Sige ge hoan ǃnâ ra ǁgâiǀāhe, xawe ge ge ǂkhabuǂâi tama hâ; îganǀgē ge ra, xawe ge ge huio tama hâ; 9 ǃgôaǃgonhe ge ra, xawe ge ge ǁnāxūǃgâhe tama hâ; aoǁguihe ge ra, xawe ge ge hîkākāhe tama hâ; 10 hugaǀgui ge ǃKhūb Jesub di ǁōba sige soros ǃnâ ra tanima, Jesub di ûib nî ǁkhāti sige soros ǃnâ ǂhaiga; 11 hugaǀgui ge kom sige ûitsamage ǁōb ǃnâ ra māǁnâhe Jesub ǃaromao, Jesub di ûib nî ǁkhāti sige ǁōsa ǁgans ǃnâ ǂhaiga; 12 ob ge ǁōba sige ǃnâ, xaweb ge ûiba sadu ǃnâ ra sîsen. 13 ǁKhā gagab ǂgoms diba ge ūhâ amaga, xoamâihe hâ khami: “ǂGom ta ge, amaga ta ge ǃhoa,” ti; o ge sige ona ra ǂgom, tsî ge ǁnā-amaga ra ǃhoa; 14 ǂan raǃâ, ǃKhūb Jesuba ge ǂkhaiǂkhaib ge ǁkhāti sige Jesuba xu ǂkhaiǂkhai, tsî nî sige sadu ǀkha mâi-aiǃâ ǃkhaisa; 15 nēn hoan sadu ǃaroma ra ī xui-ao, ǀkhommi nētikō ǂguin ǃnâ ge sīb nî gangansa ǃnā kaise Elob di ǂkhaisiba ǃoa.
MEIB 13-19
ELOBMÎSA XU HÂ ǂÛǂÛSA MÎDI | 2 KORINTEǁÎN 7–10
“Sida tsūkeǃgâb sîsenni”
(2 Korinteǁîn 8:1-3) Tsî ta ge ra ǂanǂan du, ǃgâsado, ǀkhommi Elob dib, Masedoniab di ǀhaohâgu ge māheba; 2 matib ge ǁîn di ǃgâiaǂgaoba ǃnāǂam ǃkhaisa, ǂgui ǁgâiǀāgu ǀkhan ge ǃâitsâheo, tsî matib ge ǁîn di ǃgam ǀgâsiba ǃnāǂam ǃkhaisa, ǃkhū hâsen nî ǃgâidīse. 3 ǁKhāsiba ǃoa, ǁîsa ta ra ǃkhō-am, ā, ǁkhāsib ǂamain ge māsenxa i;
w98-E 11/1 25 ¶1
“ǃGâiaǂgaoxase ra mā-eb Eloba ǀnam”
Paulub ge aibe ǂgurose Masedonias ǃnâ hâ Xristeǁîn ge tsūkeǃgâb ǃnâ hâ ǃgâsana a hui ǀgaub di aiǁgaus xa ge ǃhoa. ǁÎb ge ge xoa: “Matib ge ǁîn di ǃgâiaǂgaoba ǃnāǂam ǃkhaisa, ǂgui ǁgâiǀāgu ǀkhan ge ǃâitsâheo, tsî matib ge ǁîn di ǃgam ǀgâsiba ǃnāǂam ǃkhaisa, ǃkhū hâsen nî ǃgâidīse.” Masedoniaǁîna nēs xa ǂkhâǃnâs ge ge ǂhâbasa tama hâ i. Tsîb ge Pauluba noxoba ge mî, “tsîn ge kai ǂgaoǀkhās ǀkha sige gere ǀkhoma, nē ǀkhaeb, tsî nē ǃoabas, ǃanuna ra ǃnaebas di amǃnâsa ge nî ǃkhōǃoa ǃkhaisa.” Masedonias ǃnâ hâ Xristeǁîn ge ǁîn tsîna “ǃgam ǀgâsiba” gere hōǃâ xawen ge ǁîna nau ǃgâsana gere hui ǀgaub ge kaise koahesa ge anu hâ i.—2 Korinteǁîn 8:2-4.
kr-E 209 ¶1
Tsūkeǃgâb sîsenni
NĒB GE 46ǁî kuriba tsî i ge Judab ǃnâ ǃâtsūǀkhāba hâ. Xristub di Jodeǁî ǁkhāǁkhāsaben ge ra ǂgaoǀkhā-e în ǀgapi ǁgui-ai marisa matare ǃhoro-i ǃaroma xawen ge ǁîna nē marisa ūhâ tama hâ. Tsîn ge ǁîna ǃâtsūǀkhāba ra hōǃâ. Xawen ge ǁîna ǀgūǁae Jehovab di ǃomma nî hōǃâ nau Xristub di ǁkhāǁkhāsaben ge noxoba hōǃâ tsâ tama hâ iba. Tae-e nî hā?
(2 Korinteǁîn 8:4) tsîn ge kai ǂgaoǀkhās ǀkha sige gere ǀkhoma, nē khaeb, tsî nē ǃoabas, ǃanuna ra ǃnaebas di amǃnâsa ge nî ǃkhōǃoa ǃkhaisa;
kr-E 209-210 ¶4-6
Tsūkeǃgâb sîsenni
4 ǀGamǁî sîǂkhanis hînab ge Korinteǁîna ǃoa a xoas ǃnâb ge Pauluba Xristeǁîna ǀgam ǃoaba ra xa ge mîba. Paulub sîǂkhanis ge ǂkhauhesa Xristeǁîn ǃoa xoahe hâ i xawe da ge sada Xristeǁîse “nau gūn” ase ǁnā mîde a sîsen-ū ǁkhā. (Johaneb 10:16) ǀGui ǃoabas sada ūhâs ge ‘ǃoabas ǂkhîbagus disa,’ nēs ge sada aoǁnâs tsî ǁkhāǁkhās di sîsenni tsîna ǃkhōǂgā hâ. (2Kor. 5:18-20; 1Tim. 2:3-6) Nau ǃâb ge Xristeǁîn hîna ǂhâsib ǃnâ hâna huisa. Paulub ge nēsa ‘tsūkeǃgâb sîsenni’ di ge ǂgai. (2Kor. 8:4) Nē ǀgam mîra ‘ǃoabas ǂkhîbagus dis’ tsî ‘tsūkeǃgâb sîsenni’ tsîra disa xus ge ‘sîsenni’ di hâ mîsa Grikegowab mîs hîna di·a·ko·niʹa di hâsa xu ra hā. Tae-i ǃaromas nēsa a ǀō-aisa?
5 Hoa ǀgam mîra ǃgao ǀgui Grikegowab mîsa sîsen-ūs ǃnâb ge Pauluba ǀnî hâ ǃâgu hîna Xristeǁî ǀhaohâgu xa gere sîsen-ūhe ga ge ǃkhōǂgā. ǁÎb ge ǂgurose ge xoa: “ǃOabadi ge a ǃkharaga, xaweb ge a ǁkhā ǃKhū tsî sîsenǂuidi ge a ǃkharaga . . xūna hoan ǃnâ ra sîsenna.” (1Kor. 12:4-6, 11) Paulub ge ǀhaohâb ǃoabade “ǃanu ǃoabas” ǀkha ge ǀhaoǀhao. (Rom. 12:1, 6-8) Tsîb ge nēs ǃaroma “ǃanuna ǃoabas” ǂhâǂhâsiba ge mû.—Rom. 15:25, 26.
6 Paulub ge korinteǁîna ge hui mûǂansa tae-i ǃaromab tsūkeǃgâb sîsenna Jehovab ǃoabas di ǃâsa. ǁÎb ǁguiǃā ǀgauba ǃgaoǃgâ re: ǃGâsan hîna tsūkeǃgâb sîsenna ra dīn ge nēsa ǁîn di “ǁnâuǀnamsa ǁguiǁnâs ǃgâiǂhôas Xristub dis” ǃaroma ra dī. (2Kor. 9:13) Xristub di ǁkhāǁkhāde tani ǂûis ǃaroman ge Xristeǁîna ǁîn ǃgâsana ra hui. ǃGâi dīgu hînan ǁîn ǃgâsan ǃoa-ai ra dīgu xab ge Pauluba ge mî nēs ge mîs ǀguisa ī tama hâ xawe “hoan ǃnâ hâ ǀkhommi Elob di.” (2Kor. 9:14; 1Pet. 4:10) ǂHâsib ǃnâ hâ ǃgâsana huis, hîna tsūkeǃgâb sîsenni xa ra ǃhoas xab ge 1 Desemberi 1975ǁî kurib di The Watchtower ǂkhaniba ge mî: “ǂÂis ǃnâ da ge nî ūhâ Jehovab tsî ǁîb ǀGôab Jesub tsîn kaise nē ǃoabas xa ra tsâǀkhāhe ǃkhaisa.” Tsūkeǃgâb sîsenni ge sada di ǃanu ǃoabas di ǃâ.—Rom. 12:1, 7; 2Kor. 8:7; Heb. 13:16.
(2 Korinteǁîn 9:7) A i mâ-i hoa-e ǂgaob ǃnâ i go ǂâibasen khami dī, ǀaraǂams ǀkha tama tsî ǁgarihesa xu tama; ǃgâiaǂgaoxase ra mā-eb Eloba ǀnam xuige.
kr-E 196 ¶10
ǀHû-omgu marisise ra ǂkhâǃnâhe ǀgaus
10 ǂGurose da ge māsenxa māde ra dī, Jehova Eloba da a ǀnam ǃkhais ǃgao tsî da hoaǁae ‘ǁîb aiǃâ ǃgâise’ ra dī ǂgao amaga. (1 Johaneb 3:22) Jehovab ge kaise ra ǂkhî khoe-i ga māsenxase ǁî-i ǂgaoba xu mā o. Hā re î da Paulub mîdi Xristeǁî-i ase mās xa hâde ôaǃnâ. (Khomai re 2 Korinteǁîn 9:7.) Xristeǁî-i ge māsa xu ǃkhō-oasen tama hâ tamas ka io ǁgarihe tama hâ nēsa dīsa. Xawe î ge ǁî-e ‘ǁî-i ǂgaob’ ǃnâ ī ra mîmâi khami ra mā. ǁNās ra ǂâibasens ge ǁî-i mîǁgui tamas ka io ǁkhā-i asa xu ra māsa. Nēti-i mā-ao-i ge kaise Jehovaba a ǀō-aisaba, ǁîb ‘ǃgâiaǂgaoxase ra mā-e’ a ǀnam xui-ao. ǀNî ǂnûiǃkhunis ge ra mî: “Elob ge khoen hîna ra māna a ǀnam.”
Gagasi xūna ǀō-aisase ôaǃnâs
(2 Korinteǁîn 9:15) Tsî Eloba ab ganganhe ǁîb di ǃhoaǂuiheǁoasa mās ǃaroma!
w16-E.01 12 ¶2
Elob di ‘ǃhoaǂuiheǁoasa mās’ xa ǂgaehe re
2 Paulub ge ge ǂan i Elob di mîmâidi hîna Xristub di ǁguibas ǃnâ-ū mîmâihe hâ di nî dīǀoaǀoahesa. (Khomai re 2 Korinteǁîn 1:20.) ǁNās ǀkha nē ‘ǃhoaǂuiheǁoasa mās’ ge ǃgâisib tsî Jehova Elob Jesub ǃnâ-ū nî ǁgauda ǂhauǃnâ ǀnammi tsîna ǃkhōǂgā hâ. Nēb ge kaise ǀō-aisa ǀkhaeb hîna da khoeda ase a ǁguiǃā ǁoaba. Nē ǀō-aisa ǀkhaeba ǃkhōǃoasa mati nî tsâǀkhā da? Mâ ǀgaugu ǃnâ da Jesub ǁōb ǂÂiǂâisens hîna Maart 23, 2016ǁî kurib ǃnâ nî hâsa da ra aiǂhomisen hîna ǃgôaǃgâsiba nē ǀkhaeba a ǁgau ǁkhā?
(2 Korinteǁîn 10:17) Tsî koasen ra-e, a-i ǃKhūb ǃnâ koasen!
g99-E 7/8 20-21
Tsū-e ǀgapiǂâixasiba ūhâsa?
Grikegowab xoadi ǃnâs ge kau·khaʹo·mai di hâ mîsa “ǂnīsasiba ǁgaus, ǀgapiǀgapisen tsî koasens” di ra ǂâibasen. Nē mîdi ge ǃgâi tamas ka io ǁgai ǀgaub ǃnâs tsîna a sîsen-ūhe ǁkhā. Paulub ge aiǁgause ge mî î da, “Elob ǂkhaisib di ǃâubasens xa . . koasen.” Tsîb ge noxoba ge mî: “Tsî koasen ra-e, a-i ǃKhūb [Jehovab, NW] ǃnâ koasen.” (Romeǁîn 5:2; 2 Korinteǁîn 10:17) Nēs ra ǂâibasens ge î da ǂnīsasiba ǁgau Jehovab a sida Elo ǃkhaisa. Nē ǂâi ǀgaub ge nî huida ǁîb ǀonsa ǀgapiǀgapi tsî ǃgâi ǀonsa ūhâsa.
Elobmîs khomai ǃâs
(2 Korinteǁîn 7:1-12) Tsî ǁnāti ī mîmâide da ūhâ amaga, ǀnamsabedo, a da ǁgans tsî gagas tsîra di ǂnaoǂnaosensa xu ǃanuǃanusen, î da ǃanuǃanusensa eloǃaoǃgâsib ǃnâ dīǀoaǀoa. 2 A ge sige sadu tawa ǂgâǃkhai-e hō! Khoe-i xare-e ge ge tôasi kai tama hâ, khoe-i xare-e ge ge ǂkhôa tama hâ, khoe-i xare-e xu ge ge ǃkhūkaisen tama hâ. 3 ǀGoraǃgâ du ta nîse ta ǁîsa mî tama; ǀnai ta kom go mîo, sige ǂgaob ǃnâ du hâ ǃkhaisa, ǀhûpe ǁōs tsî ǀhûpe ûis tsîra ǃoa. 4 Kai ǁkhoaǂgaosib ǀkha ta sadu ǃoa ra ǃhoa, kaise ta sadu xa ra koasen; ǁkhaeǂgaob xa ta ǀoa hâ, ǃnāǂamsase ta ra ǃgâiaǂgao hâǃnâ ge a ǁgâiǀāgu hoagu ǃnâ. 5 Masedoniab tawa ge ge sīo, os ge sige sorosa sâ-e ūhâ tama ge hâ i, tsî ge ge hoan ǃnâ ǁgâiǀāhe ge hâ i; ǃaugaba ǃoab ge ǂnoagub, tsî ǃnāb ǃnâb ge ǃaoba ge hâ i; 6 xawe Elob ǃgamǃgamsensana ra ǁkhaeǂgaob ge sige ge ǁkhaeǂgao Titub di hās ǀkha; 7 tsî ǁîb di hās ǀguis ǀkha tama i, tsî ǁkhāti ǁnā ǁkhaeǂgaos, ǁîs ǀkhab ge sadu ǃnâ ǁkhaeǂgaohe hâ is ǀkha, sigeb ge ǂhôao sadu di ǁkhoreb xa, tsî sadu di āb xa, tsî tita ǂama du ūhâ ôasasib xa; o ta ge ǁnās ǃgâ-ai ge ǃgâiaǂgao. 8 Nau ǂkhanis ǀkha ta ge sado ge ǃoaǃoa, xawe ta ǁîsa nēsi ǃhausen tama; tsî ǃhausen ta ge xawe ta ra mû, nau ǂkhanis ge ǁaerob ǀguiba sado ǃoaǃoa ǃkhaisa. 9 O ta nēsi ra ǃgâiaǂgao, ǃoa kaihe du ges ǂama tama i, tsî ǃhobasens ǃoa du ge ǃoa kaihes ǂama; elosise du kom ge ǃoa kaiheo, sige xu du xū-i xare-i ǃnâ ǂkhôaǂkhôahe tidega; 10 elosi ǃoasib ǃgâiǃōsib ǃoa garu ǃhobasens, tātsē ǃhausenhe tidesa ra sîsen xui-ao; xawe ǃhūbaib di ǃoasib ge ǁōba ra sîsen. 11 Mû, ǁîs ǁkhās, elosise du ge ǃoaǃoahes, ge matikō kai ôasasi-e sadu ǃnâ sîsen ǃkhaisa! ǁÎs tawa: ǃEreambasens, tsî ǀaraǂamsens, tsî ǃaob, tsî ǁkhoreb, tsî ôasasib, tsî ǂgōǀausens tsîna. Hoan ǃnâ du ge nē dīs ǃnâ du a ǃanu ǃkhaisa ge ǁgausen. 12 ǁNā-amaga, sado ta ge xoaba, xawe ta ge ǁîsa ǂkhabase ge dīb ǃaroma dī tama i, tsî ǁkhāti ǂkhabase ge dī-ūheb ǃaroma tama i, tsî ta ge ge dī, sige du ūba hâ ôasasib nî sadu ǃnâ ǂhaiga Elob di ais aiǃâ.
MEIB 20-26
ELOBMÎSA XU HÂ ǂÛǂÛSA MÎDI | 2 KORINTEǁÎN 11–13
Paulub “ǁkhū-e ǁgans ǃnâ”
(2 Korinteǁîn 12:7) Tsî ǃnāǂamsa ǂhaiǂhaidi xa ta ǀgapiǀgapisen tidese, ta ge ǀā ǁkhū-e ti ǁgans ǃnâ ge māhe: Satanni di ǀhomǃgāba, ǃoms ǀkhab nî ǂnau tega, ǀgapiǀgapisen ta tidese.
w08-E 6/15 3-4
ǂKhabusasigu ǂamai ra mâǀgai
Jehovab di ǂgomǂgomsa ǃoaba-ao-i ge ge ǂgan îb Jehovaba ǁî-i ǁgans ǃnâ hâ “ǁkhū-e” ūǂuî, nēs ge ǂhani ra ǃgomsi-i ǀkha ge ǀgui i. Apostel Paulub tsîn ge Eloba ǃnona ǃnāde ge ǀkhomma îb ǃgomsiba xu ǃnora kaihe. Nē ǃgomsib a ǀū-e xawes ge nēsa Paulub ǃoabas ǂkhîba ga ūbē hâ. Nēs ge khoe-i ǁgans ǃnâ khôa ǃgau hâ ǁkhūb khami î-i amaga. Paulub ge nēsa hoaǁae ǁapuhes ǀkha ge ǀgopeǀnō. Jehovab ge ge ǃeream: “Ti ǀkhommi ge ǂâuba tsi hâ, ti ǀgaib ra ǂkhabusasib ǃnâ ǀoa xui-ao.” Jehovab ge ǁgans ǃnâ hâ ǁkhūba ge ūǂûi tama hâ i. Paulub ge nēsa ūǃoa tsî ge ǀaro: “ǂkhabusa ta ka, ǃnubai ta a ǀgaisa xui-ao.” (2Kor. 12:7-10) ǁÎba tae-e ge ǂâibasen?
(2 Korinteǁîn 12:8, 9) ǁÎs ǃaroma ta ge ǃnona ǃnādi kōse ǃKhūba gere ǀkhoma, tita xub nî bēga; 9 ob ge tita ǁga ge mî: Ti ǀkhommi ge ǂâuba tsi hâ, ti ǀgaib ra ǂkhabusasib ǃnâ ǀoa xui-ao. O ta ge ǁnās ǃgâ-ai ti ǂkhabusasigu xa koasen ǂgao hâ, Xristub di ǀgaib nî tita ǃnâ ǁanse.
w06-E 12/15 24 ¶17-18
Jehovab ge “ǃAnu Gagaba ǂgan bi rana nî mā”
17 Elob ge Paulub di ǀgoresa ge ǃeream, mîb ge o: “Ti ǀkhommi ge ǂâuba tsi hâ, ti ǀgaib ra ǂkhabusasib ǃnâ ǀoa xui-ao.” Tsîb ge Pauluba ge mî: “O ta ge ǁnās ǃgâ-ai ti ǂkhabusasigu xa koasen ǂgao hâ, Xristub di ǀgaib nî tita ǃnâ ǁanse.” (2 Korinteǁîn 12:9; Psalmdi 147:5) Paulub ge ǁnāsa amase Xristub ǃnâ-ū ge hōǃâ, Elob di ǀkhommi ge ǁîba a ǁkhauba amaga. Nētsēs tsînab ge Jehovaba sida ǀgorede ǁnā ǀgaub ǃnâ ra ǁnâu-am. ǁÎb ge ǁîb khoena ra ǁkhauba.
18 Ama as ge tenti ge ǀanus ǁgammi tamas ka io ǂoaba xu a ǁkhauba da ǁoa xawe i ge ǀnî ǀgaugu ǃnâ a ǁkhauba da ǁkhā. ǁNās khami i ge Xristub di ǁkhaubas hîna ‘Elob di ǀgaise’ isa ǃgomsiga xu a ǁkhauba da ǁoa. Xawe gagasise ra ǁkhauba da nē ǃhūbaib di ǃgomsigu tsî Satanni di mâǃoadi ǃoagus tsîna. (ǂHaiǂhais 7:9, 15, 16) ǁNās ǀkha da ga ǃgomsi-e ūhâ o hîna ‘bē’ tama hâ-e, o da ge ǂâis ǃnâ nî ūhâ Jehovab sada ǃgomsiga a ǂan tsîb ǁîba ‘ǂgais di domma’ nî ǁnâu-amsa. (Jesajab 30:19; 2 Korinteǁîn 1:3, 4) Paulub ge ge xoa: “ǀNî ǃâitsâ-i ge sado gorose hāǂam tama hâ, khoesi ǃâitsâ-i ǀgui-i: Tsî Elob ge a ǂgomǂgomsa, ob ge ǁkhā du as ǂamai ǃâitsâ du tide, tsîb ge ǃâitsâb ǃnâts nî mâǃkharusa nî īǁkhā kaiba tsî, ǁîsa du nî tani ǁkhāse.”—1 Korinteǁîn 10:13; Filipeǁîn 4:6, 7.
(2 Korinteǁîn 12:10) ǁNā-amaga ta ǃgâiǃgâisen-e ūhâ ǂkhabusasigu ǃnâ, tsî tsūdīhedi ǃnâ, tsî ǂhâgu ǃnâ, tsî ǃgôaǃgondi ǃnâ, tsî ǂōǂōsigu ǃnâ Xristub ǃaroma; ǂkhabusa ta ka, ǃnubai ta a ǀgaisa xui-ao.
“ǁÎb ra ǀhupu hâna ǀgaiba mā”
8 Khomai re Jesajab 40:30. ǀGapi ǁkhāǁkhāsensa da ga ūhâ xawe da ge sida ǀgaib ǀkha xūna aitsâma dībasens di ǃnubusiga ūhâ. Hoada ge nēsa xu nî ǁkhāǁkhāsen. Gā-aib ge i xaweb ge apostel Pauluba ǃnubusiga ge ūhâ i tsî nēs ǀkha dī ǂgaob gere xūn hoana ge dīho tama hâ i. ǁÎb ǃnubusigab ge Eloba mîba o, ob ge ge mîbahe: “Ti ǀgaib ra ǂkhabusasib ǃnâ ǀoa.” Paulub ge nēsa ge ǁnâuǃā. Tsîb ge ge hōǂui: “ǂKhabusa ta ka, ǃnubai ta a ǀgaisa.” (2Kor. 12:7-10) ǁÎba nēs ǀkha tae-e gere ǂâibasen?
9 Paulub ge ge mûǂan Elob ǀgaib oseb ǂgaob ra xūn hoana a dī ǁoasa. Elob di gagab ge Pauluba ǁîb ra ǂkhabuba gere ǀgaiǀgai. ǁNās ǀguis ose, xawe Elob gagab ge Pauluba ǀgaiba ge mā îb dīhō ǁoasa xūna dī ǁkhā. Sida ǃaromas tsînas ge nēsa a ama. Sida ūhâ ǀgaib ga Jehovaba xu ga ra hā o, o da ge sida tsîna nî ǀgai!
Gagasi xūna ǀō-aisase ôaǃnâs
(2 Korinteǁîn 12:2-4) Khoeba ta ge a ǂan Xristub ǃnâ, disihakaǀa nî ī kurigu aiǃâ (iseb soros ǃnâ ge hâ isa ta a ǀū, iseb soros ǃauga ge hâ isa ta a ǀū; Elob ge a ǂan), ǁîb ge ǃnonaǁî ǀhommi kōse ge ǂgaeǃapahe; 3 tsî ta ge ǁnā khoeba a ǂan (iseb soros ǃnâ, iseb soros ǃauga ge hâ isa ta a ǀū; Elob ge a ǂan), 4 ǁîb ge paradais ǃnâ ge ǂgaeǃapahe tsî ǃhoaǂuiheǁoasa mîde ge ǁnâu, khoe-i nî ǁîde mîsa mā-amhe tamade;
Khomai-aon dîdi
“ǃNonaǁî ǀhommi” hîna 2 Korinteǁîn 12:2 tawa ra mîheb ge ǀnîsi a Mesiab Gaosib hîna Jesub tsî 144 000 ǂkhauhesa ǃgâsan xa nî ǂgaeǂguiheba.—2Pet. 3:13.
Nēb ge “ǃnonaǁî ǀhommi” di ra ǂgaihe nē Gaosib kaise a ǀgapi amaga.
“Paradais” hînab ge Pauluba a ‘ǂgaeǃapas’ ge sao ra xūna ǃoa a ǁnaeǁgau ǁkhā (1) ǃhūbaib-ai nî hâ paradais (2) gagasi paradais hîna nēsi hâ gagasi paradaisa nî gaoǂams tsî (3) ‘Elob di paradais’ hîna ǀhommi ǃnâ nî hâs.
(2 Korinteǁîn 13:12) Tawedegu re ǃanu ǁoa-i ǀkha. ǃAnun hoan ra tawede du.
it-2-E 177
ǁOas
‘ǃAnu ǁoas.’ ǂGurokham ǁaeb di Xristeǁîn ǁaegu î ge ‘ǃanu ǁoasa’ ge hâ i (Rom. 16:16; 1Kor. 16:20; 2Kor. 13:12; 1Tes. 5:26) tamas ka io ‘ǁoas ǀnammi’ (1Pet. 5:14) dis tsîna, nēs ge aorekhoegu tamas ka io tarekhoera ǁaegu ǀgui ge hâ i. Nē ǀgaub hînan ge ǂgurokhamǁaeb Xristeǁîna gere dīb ge Hebreǁîn di ǃhaos di ǁnaetib asen ge khoena ǁoas ǀkha gere tawedegu ǀgaub ǀkha a ǀgui. Elobmîs ge ǁgau tama hâ ‘ǃanu ǁoas’ tamas ka io ‘ǁoas ǀnammi’ dis ǀnammi tsî ǀguiǃnâxasib tsîna ra ǁgausa Xristeǁî ǀhaohâb ǃnâ.—Jhn. 13:34, 35.
Elobmîs khomai ǃâs
(2 Korinteǁîn 11:1-15) ǂGao ta ra, ǂkharirose du nî gâresib ǃnâ tani te ǃkhaisa. Ā, tani te du re! 2 Sadu ǂama ta ra tau elosi tauxasib ǀkha xuige. ǀGui aoba ta ge sado mîmâiba xui-ao, ǃanu ǂkhamkhoese ta nî Xristuba mâi-aiǃâ duse; 3 xawe ta ra ǃao, ǀaob ge Evasa gāxaǃnâsib âb ǀkha ǂgaeǂhapu khami, ǁnās ǁkhās khami di nî ǁkhāti sadu ǂâide ǁgaoǁgaohe ǃkhaisa tsî Xristub ǃnâ hâ ǀguiǃnâxasiba xu. 4 Naub ga hā tsî ǀkhara Jesuba aoǁnâo, sige aoǁnâ tamaba, tsî ǀkhara Gagab, hō tama du ge hâ iba du ga ǃkhōǃoao, tsî ǀkhara ǃgâiǂhôas, hō tama du ge hâ isa, o du ga ǃgâise tani; 5 nēti ta ra ǂâi xui-ao, hoagu xa kai apostelgu ǃgâ-ai ta ǂkhari tamasa; 6 tsî ǃhoas ǃnâ ta a gâre khoe xawe ta ǂans ǃnâ ǁnāti ī tamasa; hoa xūn ǃnâ ge ge hoaragase sadu tawa ge ǂhai. 7 ǁOre ta ge xare, ǁî-aitsama ta ge ǃgamǃgamsen ǃkhais ǀkha, sadu nî ǀgapiǀgapihega? Xū-i ama tama ta kom Elob di ǃgâiǂhôasa gere aoǁnâba duo. 8 Nau ǀhaohâga xu ta ge ǃnari, sîsenamǃnâ-e ūs ǀkha, sado ta nî ǃoabase; tsî sadu tawa ta ge hâ i tsî tôasio, o ta ge khoe-i xare-e ǂhani tama ge hâ i; 9 ti tôasiba gu ge Masedoniaba xu ge hā ǃgâsaga ǀoaǀoa xui-ao, tsî ta ge hoan ǃnâ sado ǃgomǃgomba tamase ge tanisen, tsî ta nî ǃaruǀî ǁnāti tanisen. 10 Xristub di amab ge tita ǃnâ hâ, os ge nē koasensa Axajab di ǀkharigu ǃnâ tita xu ūǁnâhe tide. 11 Tare xū-i ǃaromasa? Sado ta ǀnam tama amagasa? Elob ge a ǂan. 12 O ta ge dī ta ra-e ǃaruǀî nîra dī, koasenǃkhai-e ta nî ǃgaoǁnâse ǁnāgu, koasenǃkhai-e ra ôa-amga, koasen gu ran ǃnâ gu nî sige ǁkhāge khami hōhega. 13 ǁNāti ī ǂkhaba apostelgu ge gāxaǃnâ ra ǃoabasabegu, Xristub di apostelse ra dīsenga. 14 Tsî ǁnās ge buruxa tamasa; Satanni ǂûb kom ǃnâb di ǀhomǃgāse ra dīseno; 15 o i kom kai xū tamao, ǁîb ǃgāgu on ga ǂhanu-aisib di ǃgāse dīseno; ǁîgu ǀams ge ǁîgu di sîsengu khami nîra ī.
MEIB 27–JUNIB 2
ELOBMÎSA XU HÂ ǂÛǂÛSA MÎDI | GALATEǁÎN 1–3
“O ta ge mûmûsase ge mâǃoa bi”
(Galateǁîn 2:11-13) Tsî Petrub ge Antioxias tawa sīo, o ta ge mûmûsase ge mâǃoa bi; ǂgōǀauheb nîsab ge anu i xui-ao. 12 Aibe ǀnîgu Jakobub digu ge hās aiǃâb ge ǀūben ǀkha goro ǂû amaga; xawe hā gu geo, ob ge ǂgaedawasen tsî ge khaisen, ǃgaos dina ǃao tsî; 13 tsîn ge ǁkhāti nau Jodeǁî ǂgomsana ǁîb ǀkha ge hîna, Barnabab tsîn ge ǁîn di hînaxasiba xu ǂgaebēhes kōse.
w17-E.04 27 ¶16
Jehovab di mûǂûiba du ūhâ ǂhanu-aisib xa?
16 Khomai re Galateǁîn 2:11-14. Petrub ge khoena ǃaos ǃnâ ge mâǁnâsen. (ǂKhm. 29:25) Petrub ge Jehovab ǂâi ǀgauba ǂan i xaweb ge ǁîba ǃgaosa Jodeǁîn hîna Jerusalems ǀhaohâb ǃnâ hân di mîde gere ǃao. Apostel Paulub hîna ge ǁnā ǀhaos tawa hâ îba 49ǁî kurib ǃnâb ge Petruba ǁîb di ǃaob xa ge mîba Antioxias ǃnâ. (ǃNǃkh. 15:12; Gal. 2:13) Jodeǁî tama Xristeǁîn hîna ge Petrub dīsās xa a tsâǀkhāhena mati ge ǃeream? ǁÎna ge mā-am ǃnôa kaisensa? Petruba ǁîb ǀō-aisa aiǂhanuga ga ǂoaǃnâ hâ nēs ǃgao?
(Galateǁîn 2:14) Tsî mû ta geo, ǂhanusen ǃgâiǂhôas di amab ǃoa ǃgû tama ǃkhaisa, o ta ge hoan aiǃâ Petrub ǃoa ge mî: Sats ga, Jodeǁîts a hîa, ǀūbesi dommi ai ûio, tsîts ga Jodeǁî dommi ai ûi tama io, tarexats ǁnâi ǀūbena ra ǁgari Jodeǁîn khami ûisa?
w13-E 3/15 5 ¶12
ǁNān hîna Jehovaba a ǀnaman ge “ǁgonǁgonǂgao-i xare-e ūhâ tama hâ”
12 Petrub ge khoena gere ǃao tsî ǀnî ǁaegu ai gere ǃnôa xaweb ge Jesub tsî Jehovab ǃoagu ǂgomǂgomsase ge hâ. Aiǁgause, ǁîb ǀHōnkhoebab ge khoen ais aiǃâ ge ǀūxū, ǀgui ǃnās ōse xawe ǃnona ǃnāde. (Lukab 22:54-62) Egab ge Petruba Xristeǁî tanisen ǀgauba ge ūhâ tama hâ i tsî Jodeǁî tama ǃgâsana, ǃgaosa Jodeǁîn ǃnāga gere ǃgôa. Apostel Paulub ge nēsa ge mûǃā ǃhaoǃnâbe ǀgorasab ǃkhai-e ūhâba tama hâ ǃkhaisa. Petrub tanisen ǀgaub ge ge ǃgâi tama hâ i. Petrub tanisen ǀgaub ǃgâsana nî tsâǀkhā aiǃâb ge Pauluba ǁîba ge ǁnama. (Gal. 2:11-14) Petrub ǀgapiǂâixasiba ǁnātikōse ge kai i, ûib aib nî mâǁnâsens kōse? Hî-î. ǁÎb ge Paulub ǁnamas xa ge ǂâiǃgâ, xū-e ge dī tsî ûib daob ai ge hâ ǀgara.
Gagasi xūna ǀō-aisase ôaǃnâs
(Galateǁîn 2:20) Tita ge Xristub ǀkha ǃgâuhe hâ ta; o ta ge tita ǃaruǀî ûi tama, xaweb ra Xristuba tita ǃnâ ûi; o ta ge ǁgans ǃnâ ta nēsi ûi hâsa ǂgoms Elob Ôab dis ǃnâ ra ûi, tita ge ǀnam hâ ib, tsî ǁî-aitsama tita ǃaroma ge māsenna.
w14-E 9/15 16 ¶20-21
Jehovaba ǂgomǂgomsase ǃoaba re ‘ǂgui ǁgâiǀāgu’ ǂamai
20 O mûsen tama hâ mâǃoan? Mati da ǂkhabuǂâis di tsâsiga a sîsenǂam ǁkhā? ǀGui ǀgaub ge xoremarib xa ǂâiǃgâs ǃnâ-ū. Apostel Paulub ge nēsa ge dī. ǁÎb ge khôahe hâse ǀnî ǁaegu ai gere tsâ. ǁÎb ge ge ǂan i Xristub ge ǀoasa kurusa ūhâ khoen ǃgao ǁō tama hâ isa xawe ǁore-aon ǃgao. Tsî Paulub ge ge nē ǁore-aon ǀgui i. ǁÎb ge ge xoa: ‘ǂGoms Elob Ôab dis ǃnâ ta ge ra ûi, tita ge ǀnam hâ ib, tsî ǁî-aitsama tita ǃaroma ge māsenna.’ (Gal. 2:20) Paulub ge xoremariba ge ūǃoa. ǁÎb ge ge mûǂan xoremarib ǁîba ǃoa ra ǁnaeǁgausa.
21 Xoremarib Jehovaba xu sida ǃoa hâ ǀkhaeb ase mûs ge ǂgui ǀgaugu ǃnâ a huida ǁkhā. ǁNās ge ǂâibasen tama hâ sida ǂkhabuǂâixasib ǃhaese nî bē di. ǀNî da ge nē mûsen tama hâ mâǃoade ǀasa ǃhūbaib nî hās kōse nî hōǃâ. Xawe ǂâis ǃnâ ūhâ re: ǁNān hîna ǀûsen tama hân ge nē ǀkhaeba nî hōǃâ. Elob Gaosib ǂkhîba nē ǃhūbaib ai hau tsî khoena ǀoasa kurusa nî mā tsēs ge go ǀgū toa. Mîǁgui re ǁnā Gaosib ǃnâ ǂgâsa, ǂgui ǁgâiǀāga da ra ǃkharu ǃnâ xawe.
(Galateǁîn 3:1) Okha ǁnâuǃāoǃnâ Galateǁîdo, tari-e kha sado ǃgaiǃgam hâ, amaba du ǁnâuǀnam tidese; sadu Jesub Xristuba sadu ǃnâb ge ǃgâuhe hâs ǁkhās xase ǁgaeǁgaemûǃnâhe hâdo?
it-1-E 880
Galateǁîn sîǂkhanis
Paulub ge “ǁnâuǃāoǃnâ Galateǁîdo” di a mî o, ob ge ǀnî khoena ǃoa ǀgui ge ǁnaeǁgau tama hâ i hîna ge ǀapas Galatiab diba xu gere hāna. (Gal. 3:1) Xaweb ge Pauluba ǀnî Jodeǁîn hîna ge ǀhaohâb ǃnâ hâ îna ǃoa gere ǁnaeǁgau hîna ge ǁîn ǂhanu-aisiba gere ôana Moseb ǂhanub ǃnâ-ū tsî ge ǀasa ǃgaeǀhaosa ‘ǂgoms ǃnâ-ū’ gere mā ǂhanu-aisiba gere ǂkhābēna. (2:15–3:14; 4:9, 10) “Galatiab ǃnâ hâ ǀhaohâgu” (1:2) hînab ge Pauluba a xoaba gu ge Jodeǁîn tsî Jodeǁî taman, ǃgaosa Jodeǁîn tsî ǃgaosa taman tsî ǀnî hâ ǃhaodi tsîna ge ū hâ i. (ǃNǃkh. 13:14, 43; 16:1; Gal. 5:2) Hoan ge ǀguiba Galatiab Xristeǁîn ase ge ǂansa i, ǁîn ge ǁan hâ i ǃkhais ge Galatiab di gere ǂgaihe amaga. ǂÂibasens sîǂkhanis dis ge, Paulub ge ǃgâiseb ge ǂan i khoena ǃoa gere xoa ǃkhapagas Romanias dis ǃnâ, ǁîb ge ǀūb a khoena ǃoa ge xoa tama hâ i ǀapas ǃnâ ge hâ îna, hînab ge saris tsîna dī tama hâ îna.
Elobmîs khomai ǃâs
(Galateǁîn 2:11-21) Tsî Petrub ge Antioxias tawa sīo, o ta ge mûmûsase ge mâǃoa bi; ǂgōǀauheb nîsab ge anu i xui-ao. 12 Aibe ǀnîgu Jakobub digu ge hās aiǃâb ge ǀūben ǀkha goro ǂû amaga; xawe hā gu geo, ob ge ǂgaedawasen tsî ge khaisen, ǃgaos dina ǃao tsî; 13 tsîn ge ǁkhāti nau Jodeǁî ǂgomsana ǁîb ǀkha ge hîna, Barnabab tsîn ge ǁîn di hînaxasiba xu ǂgaebēhes kōse. 14 Tsî mû ta geo, ǂhanusen ǃgâiǂhôas di amab ǃoa ǃgû tama ǃkhaisa, o ta ge hoan aiǃâ Petrub ǃoa ge mî: Sats ga, Jodeǁîts a hîa, ǀūbesi dommi ai ûio, tsîts ga Jodeǁî dommi ai ûi tama io, tarexats ǁnâi ǀūbena ra ǁgari Jodeǁîn khami ûisa? 15 Sada ǂūsiba xu Jodeǁîda, tsî ǀūbena xu hâ ǁore-ao tamada xawe; 16 tsî ǂan da a, khoe-i ǂhanub di sîsenga xu ǂhanu-ai kaihe tama ǃkhaisa tsî ǂgoms ǀguisa xu i ra ī ǃkhaisa, amaga da ge ǁkhāti Xristub Jesub ǃnâ ge ǂgom, Xristub ǃnâ ǂgomsa xu da nî ǂhanu-ai kaihese, tsî ǂhanub di sîsenga xu tama; ǂhanub di sîsenga xu i ǁgan-i xare-e ǂhanu-ai kaihe tide xui-ao. 17 Tsî da ga sada, Xristuba xu nî ǂhanu-ai kaihe ǃkhaisa ra ôa-am da ǁkhāti ganupe ǁore-aose hōheo, ǁnâi Xristuba ǁoreb di ǃoabasabeba? Tātsē! 18 Khôaǁnâ da gena da ga ǁkhawa omkhâio, o da kom ǃûǂamaose ra ǁgauseno; 19 ǂhanub ǀkha ta ge tita ǂhanuba ge ǁōǁnâ xui-ao, Eloba ta nî ûibase. 20 Tita ge Xristub ǀkha ǃgâuhe hâ ta; o ta ge tita ǃaruǀî ûi tama, xaweb ra Xristuba tita ǃnâ ûi; o ta ge ǁgans ǃnâ ta nēsi ûi hâsa ǂgoms Elob Ôab dis ǃnâ ra ûi, tita ge ǀnam hâ ib, tsî ǁî-aitsama tita ǃaroma ge māsenna. 21 Elob ǀkhomma ta ǁauǁau tama; ǂhanu-aisib ga ǂhanuba xu hâo, ob kom ga Xristuba ǁause ǁō hâo.