Jehovab ge ti ‘daogu hoaga ge ǂhauǂhau’

TI ǁGÛRA GE GE HUITE Î TA ǂHANU DAOBA ÔA

Ti ǁgûra ge 1920ǁî kurigu ǃnâ ge ǃgamme. Amaba ra nî hōs aiǃgâ. Tita ge 1939ǁî kurib di tsoatsoas ǃnâ ge ǃnaehe. ǂKham ta a hîna ta ge Englandi ǃnâ gere hâ o. O ta ge ti ǁgûra ǀhaode ǃoa gere sao. Tsî aoǁnâ sîsen-i di skoli tawa ge ǁhao tsoatsoa. Nēsis kōse ta ge ra ǂâihō mati ta ge boksis ai mâ i sa. Î ta ǂnû hâ khoena mû ǁkhā. ǂGuro ǃnāsa ta ǃhoasa gere mā o. ǃNani kurixas ǀguisa ta ge ge ī i. Tsî ta ge ge ǃhuri hâ i. Mû ta ge o kai ǃgâsan ge ǂnû tsî gere kō te ǀgausa.

Ti dadab ge supu xū-i hîna i oms khoe-e nî khomai-e gere xoamâiba te. ǁKhaisa kurixas ǀguisa ta ge ge ī i. ǀGuri ta ge khoe-i di oms tawa gere aoǁnâ o. Kaise ta ge ge ǃgâiaǂgao hâ i, oms aob ge ti karkisa khomai. Tsî “Let God Be True” di hâ ǂkhanisa a ū o. ǃKhoe tsî ta ge ti dadaba sī ge mîba. Aoǁnâ sîsen-i tsî ǀhaodi ge ge huite i ta ǂkhîba ūhâ. Tsî Jehovaba ǀoasase ǃoaba ǂgao.

Elobmîs ǃnâ ta ra khomai xūna ta ge ǀgaisase ge ǀnam tsoatsoa. Ti dadab ge The Watchtower ǂkhaniba a hōba te o. O ta ge hā ra ǀasa ǂkhanib hoaba ǃamkuse gere khomai. Jehovaba ta ge ǀgaisase ge ǂgomǃgâ tsoatsoa. Tsî ta ge ega ǁîba ge mîba ǀamosib kōse ta ra ǃoaba bi ǂgaosa.

Theocracy’s Increase ti hâ dana xoaǂamsa ūhâ kai ǀhaos. Hîna ge New York ǃās ǃnâ, 1950ǁî kurib ǃnâ hâ is. Sa ǃoas ge sida omarisa ge ī. “Missionary Day” di hâ dana xoaǂamsas ge 3 Augustub di Donertāxtsēsa ge ūhâ i. ǁNā tsēs aib ge ǃgâsab Carey Barbera ǁāǁnâs ǃhoasa ge mā. ǁÎb ge ega ge ǂgaeǂguira soros di ǁani kai. ǁNā ǃhoas ǀams aib ge ǁāǁnâhe ra khoena ǀgam dîra a dî toas khaoǃgâ. Ta ge tita khâimâ tsî “î” ti ge ǃeream. Disiǀguiǀā kurixa ta ge ī i, xawe ta ge ge ǂan i. ǂHâǂhâsa mîǁguiba ta ge dīsa. Xawe ta ge tsâsa ta a ǀū amaga ǁgammi ǃnâ ǂgâsa gere ǃao. Ti omeb ge ǁgammi ǃoa ge sao te, tsî ge mîba te hoaraga xūn nî ǃgâisa. Kaise i ge ge ǃhae i. Tsî ra ge ti ǂaira ǁgammi ǃnākaba ge tsânana tama hâ i. ǀGui ǃgâsaba xu nau ǃgâsab ǀkha ta ge ge māhe. ǀGuib ge ge ǁāǁnâ te. Tsî naub ge ge ūǂui te. ǁNā tsēsa xub ge Jehovaba ti daoga ra ǂhanuǂhanu.

JEHOVABA TA GE GERE ǂGOMǃGÂ

Skola ta ge toa o, o ta ge gere aimâba-ao kai ǂgao. Xawen ge ti ǁgauǃnâ-aona ge mîba te î ta ǀgapi ǁkhāǁkhāsensa ū. ǁÎn ge mî xū-e ǃgâ tsî ta ge universiteitsa ǃoa ge ī. Xawe ta ge ega sī ge mûǂan ǁnapa ta ga hâ o. O ta amab ǃnâ hâ ǀgara tidesa. Tsî ta ge ega ge ǁnāxu. Jehovaba ǃoa ta ge ge ǀgore. Tsî ta ge ǁnapaxu sîǂkhanis ǃnâ-ū ti ǁgauǃnâ-aona ge mîba. ǂGuro kurib ǀams ai ta nî īsa. Jehovaba ta gere ǂgomǃgâ amaga ta ge, ǁnā ǁaeb ǂûb ai aimâba-ao sîsen-e ge tsoatsoa.

Wellingborough di ǀon hâ ǃās ǃnâ ta ge 1957ǁî kurib di Julib ǃnâ aimâba-ao sîsen-e ge tsoatsoa. Londoni di Betels tawa hâ ǃgâsaga ta ge ge ǂgan î gu mîba te. Khoe-i hîna tita ǀkha aimâba-ao sîsen-e a dī ǁkhā i xa. ǃGâsab Bert Vaiseyb ge ǂgui xūna ge ǁkhāǁkhā te. ǁÎb ge kaise ôasase gere aoǁnâ. Tsî ge hui te î ta ǁaeba ǀgoraǂui aoǁnâ sîsenni ǃaroma. ǀHaohâb ge ǃnani kaira ǃgâsadi, ǃgâsab Vaiseyb tsî tita tsîna ge ǃkhōǂgā hâ i. Hoa ǀhaodi ǃgao ta gere aiǂhomisen tsî ǁîdi ai gere ǃeream o. O ta ge Jehovab ǃnâ ta ūhâ ǂgomsa gere omkhâi. Tsî ti ǂgomsa ge ǁgau ǁkhā i.

Toroba ta ge ǃkham ǂgao tama hâ i amaga ta ge ǁaeroba tronkhes ǃnâ ge ǂnôa i. Tsî ta ge ega Barbaras ǀkha ge ǀhao. ǁÎs ge ǀō-aisa aimâba-ao sîsen-e gere dī. Tsîm ge 1959ǁî kurib ǃnâ ge ǃgamme. Tsî mâ ǃkhai-i hoa-i ǃoa ge ī ǁkhā i. ǂGurom ge Lancashire, Englandi noorwestesa ǃoa ge ī. Tsîm ge Januarib di 1961ǁî kuri ge ǁkhauhe îm ǀgui ǁkhâba. Gaosib aoǁnâ-aon skoli hîna Londoni ǃnâ hâb tawa si ǁkhāǁkhāhe. ǃÂubasen tama ta ge ge hâ i skoli ǀams aim ge ǃnarimâra sîsen-e a māhe o. ǀGam wekhekha ta ge ge ǁkhāǁkhāhe ǂansa ūhâ ǃnarimâra mûǂam-aob xa. Birmingham di ǀon hâ ǃās ǃnâ. Tsîs ge Barbaras tsîna tita ǀkha ge hâ i. Tsîm ge ǁnapaxu sîm nî sîsen ǀkhāba ǃoa ge ī. Lancashire tsî Cheshires di ǀkharigu ǃnâ.

JEHOVAB ǃN ǂGOMǃGÂS GE ǃGÂI XŪNA NΠHAU

Sâǁaeb ǃnâm Augustub, 1962ǁî kurib ǃnâ hâ hînam ge. ǁNâub berosa xu sîǂkhani-e ge hō. ǂGanaga i ge Gilead skoli di ǂganamsens di ǂkhaniga ge hâ i. ǀGore toam ges khaoǃgam ge Barbara hama. ǂKhaniga xoaǂgā tsî ǁnâub berosa ǃoa ge sî. Koro ǁkhâgu khaoǃgam ge New Yorki, Brooklyns ǃāsa ǃoa ge garu i. ǁNapam ge 38ǁî Gilead klasa ge ǂgâ. Disi ǁkhâga da ge Elobmîsa xu gere ǁkhāǁkhā-e.

Gilead skoli ai da ge Elobmîs tsî ǀapeǂhumis xa ǀgui ge ǁkhāǁkhāhe tama hâ i. Xawe ǃgâsan xas tsîna gere ǁkhāǁkhāhe. Sim ge ǂkham i amagam ge nau khoena xu ǃnāsase gere ǁkhāǁkhāsen. Kai aiǂhanub ase i ge ge i ba te i. ǃGâsab Fred Ruski ǀkha ǀguiba sîsensa. ǁÎb ge ge sida ǁgauǃnâ-ao i. ǀGui xū-i hîna ge mâǂoa i ge ǁnamats ga o, ǃgâi ǀgaub ǃnâ ǁnamasa. Tsî hoaǁaegu ai Elobmîs ai ǃgaoǃgaosa ǀgaub ǃnâ. ǃGâsagu hîna ge ǀnî ǁaega sida kladi tawa ǃhoade gere mā gu ge Nathan Knorri, Frederick Franzi tsî Karl Kleini tsîga. Kaise da ge ǃgâsab A. H. Macmillani di aiǁgaus xa ge ǃgâibahe i. ǁÎb ge Jehovab ge mati 1914ǁî kuriba xu 1919ǁî kurib ǃnâ ǁîb khoena gere daoǁgau ǀgaus xa gere mîba da.

ǀKHARA ǁGAUMÂISAM GE GE HŌ

Skoli ra ǀamǃgû hînab ge ǃgâsab Knorra Barbara hama ge mîba. Burundib hîna Afrikab ǃnâ hâsa ǃoam ra sîhesa. ǁNā ǁaeb aim ge Betels di ǂkhaninǁgauba ǃoa ī tsî kurib di ǂkhanis ǃnâ matikō ǃgâsan ǁnā ǁaeb ai Burundib ǃnâ hâsa gere kō. Xawen ge kaise ge buru ǁnā ǃgôab Burundib ǃnâ hâ ǃgâsan dibam ge hō tama io. Aoǁnâ sîsenni noxoba dītsâhe tama ǃhūba ǃoam ge gere sîhe. Tsîm ge Afrikab xa ǀoro xūna ge ǂan i. Kaisem ge ǁnāǁaeb ai ge ǂâiǂhansen tsoatsoa. Xawe di ge ǀgorede ge hui im ǃnomsase tsâ.

ǁNā ǀasa ǁgaumâis tawan ge hoaraga xūna ge ǀasa i. ǂOab di mâsigu, khoen ta tanisen ǀgaub tsî gowagu tsînam ge ge ǀū i. Tsîm ge nēsi French gowaba nî ǁkhāǁkhāsens ge ge ī. Tsîm ge hâm nî ǃkhai-i tsîna ge ūhâ tama hâ i. ǀGam tsēra ǃkharu tsîb ge sim ǀkha ge ǀguiba Gilead skoli tawa hâ i ǃgâsab Harry Arnotta ge sari mi. ǁÎb ge ǁîb ǁgaumâis hîna Zambiab ǃnâ hâsa ǃoa ge oa garu ī. ǁÎb di huib ǀkham ge omrosa ge hō. Hîna ge sida di ǂguro sîsabe om kaisa. Xawe ǃnubuǁaerob khaoǃgâb ge ǂhanuba ge mâǃoa da tsoatsoa. ǁÎn ge Jehovab di ǃoaba-aona ǀū i amaga. Sim ǁgaumâis ǃnâm ǁkhoaxase ra sîsen tsoatsoa hînab ge ǂhanuba ge mîba mi. Sîsen ǂkhanigam ga ūhâ tama io, om ǁnā ǃhūb ǃnâ a hâ ǁoasa. ǁNā-amagam ge Ugandaba ǃoa ge doe.

Ugandab ǃnâm ge visas ose a sî amagam ge gere ǃao. Xawem ge Jehovab ǃnâ ǂgomǃgâ tsî ge ǃao ǀū. Kanadab ǃgâsab hîna Ugandab ǃnâ ǂhâsib hâba ra aoǁnâb ge ge hui mi. ǁÎb ge ǂhanub tawa ra sîsen khoeb, hîna doemâra khoena ra mûǂam beros tawa ra sîsenna. Sim di mâsib xa ge mîǃgāǃgāba. ǁNapaxum ge ǁkhâroga ge māhe, im ǁnā ǃhūb ǃnâ hâs ǃgao ǂganamsensa dī. ǁNās ge ge ǁgau mi Jehovab sima ra huisa.

Mâsigu nē ǀasa ǁgaumâis di gu ge kaise ge ǀkhara i Burundib xa. ǀNai i ge ǁnā ǃhūb ǃnâ gere aoǁnâhe 28 ǃoaba-aon ǀguin ge hâ i hoaraga ǃhūb ǃnâ xawe. ǂGui khoen hînam gere ǀhao-ūn ge Engelsa gere ǃhoa. Xawem ge ge mû Amabes ǃnâm ga khoena a hui ǂgao o. Om ǀgui gowab khoen diba nî ǁkhāǁkhāsensa. Kampalas ǃnâm ge ge aoǁnâ tsoatsoa. ǁNā-amagam ge Luganda gowaba ge ǁkhāǁkhāsen tsoatsoa. Kuriga i ge ge ū, ǁnā gowaba ǃgâise ǃhoasa. Xawem ge ge mû ǁnā gowaba ǃhoas aoǁnâ sîsenni ǃnâ ra hui mi ǃkhaisa. Sim Elobmîsa ra ǁkhāǁkhā khoenam nî ǁkhāǁlkhā xūnam ge ǃgāǃgāsase ge mû ǁkhā i. Tsîn ge ǁîn tsîna ǂgaoba xu gere ǁgâiǂuisen. ǁKhāǁkhāsenan ra xūn xan ra tsâ ǀgaub xa.

ǂGUI ǃNÂDEM GE GE ǃNARIMÂ

Kaisem ge gere ǂkhî ǃgamǃgamsen hâ ǂgaoba ūhâ khoena hōsa. Xawem ge ǃnarimâra sîsenni di ǁgaumâis tsîna ge hō. Tsî ǁnās tsîn ge gere ǂkhî kai mi. Kenyab di ǁnâub beros di dauǁgaus ǃnākam ge gere ǃnarimâ. Îm ǀō-aisa aimâba-aon a ǂhâbasa ǃkhaide ôa. ǂGui ǃnādi kōsem ge Jehovab di khoena a ǀū khoen xa ǃgâi ǀgaub ǃnâ gere ǃkhōǃoahe. ǁÎn ge ǃgâise gere hâ-ū mi tsî ǂûhân tsîna gere sâiba mi.

ǁNās khaos aim ge ǀnî ǃaromas ǃgao gere ǃnari. Kampalasa xu ta ge ǀgam tsēra trains ǀkha. Mombabsas hîna Kenyab ǃnâ ǁgoesa ǃoa ge ī. Tsî ta ge ǁnapaxu Seychelles hîna Indiab di hurib ǃnâ ǁgoesa ǃoa, ǂgaus ǀkha ge ǃnari. Ega ta ge ǀnî ǁaegu ai 1965ǁî kuriba xu 1972ǁî kurib kōse Seychellesa gere sari. Barbaras ge gere sao te. ǁNā ǁaeb ai i ge ǀgam aoǁnâ-aon ǀguina ge hâ i. Xawe i ge ega groepsa ge kuruhe. Tsî ǁnapaxu ǀhaohâba ge kuruhe. ǀNî ǁaegu ai ta ge ǃgâsan hîna Eritreab, Ethiopiab tsî Sudani ǃnâ hâna sī gere sari.

ǀNî soldagu ge Ugandab di ǂhanuba ge dan tsî ǁîga ge ǂgaeǂgui tsoatsoa. ǁNā-amagab ge ǃhūb ǃnâ hâ mâsiba kaise ǃhaese ge dawa. Saora kurigu ge kaise ge ǃgom i. Tsî ta ge ge mûǂan “Kaesara ǁnâi mā Kaesari di-e” di hâ mîde ǁnâuǀnams kaise a ǂhâǂhâsa ǃkhaisa. (Mrk. 12:17) ǀGui ǃnā-e i ge ǀkhara ǃhūga xu ra hā khoen hîna Ugandab ǃnâ ra hâna. Ge mîbahe în ǁîn oms ǀgūse hâ ǀawaǃnamgu beros tawa sī xoamâisen. ǃHaese da ge ge ǁnâuǀnam. Tsērode ǃkharu tsî kham tita tsî ti sîsabe horesaba Kampalas ǃnâ re ǃnarimâ. Hîna gu ge ǀawaǃnamga sikham tawa ge ǀkhī. Kaise kham ge ge ǃhuri. ǁÎgu ge sikhoma ge ǂgari-am ǃhūb ǃnâ ra ī xūna kō tsîkham nau khoena sī nî mîba ti. Tsî gu ge ǀawaǃnamgu di danaberosa ǃoa ge ī-ū kham. Sîsabes ǀguikham a tsî kham ǂkhabadī tama ti kham ge mîba gu xawe. ǀNaikham ge ǀawaǃnamgu beros tawa a xoamâisen ti kham ge mî. Xawe gu ge ǁîga ǃgâ tama ge hâ i. ǃKhōhe tsîkham ge sîsaben oms ǀgūse hâ ǀawaǃnamgu berosa ǃoa ge ī-ūhe. ǁNapa ge hâ i ǀawaǃnammi ge sikhama ge mûǃā. ǁÎb ge ge ǂan i ǀnaikham ge xoamâisen ǃkhaisa. Tsî ge mî i kham xū-e. Kaise kham ge ge ǂkhî.

ǁNā ǁaeb ai da ge kaise ǃgomsiga gere hōǃgâ. Soldagu daob xōǀkhā mâi hâ berodi tawa da gere mâkaihe o. Kai-amse soldagu ge ǃgâu hâ i ǁaegu ai. Mâ ǁaeb hoaba da ge gere ǀgore. Tsî ǃnomsase gere tsâ. Tsî da ge gere ǃkharu kaihe. Xawe i ge 1973ǁî kurib ǃnâ Ugandab ǃnâ hâ sîsaben hoana ge oa kaihe.

ǁKhapam ge ǀkhara ǁgaumâisa ge māhe. Nē ǃnâs aim ge Afrikab westes ǃnâ ǁgoe ǃhūb, Côte d’Ivoire ba ǃoa ge sîhe. ǁKhapam ge ǂgui xūna nî ǁnaeti ge is ge. Khoen di ǁnaetigam ge ge ǁkhāǁkhāsen. Tsîm ge French gowaba hoaraga ǁaeba gere ǃhoa. Tsîm ge ǃkharagaǃnâgu khaoǃhūga ūhâ ǃgâsan ǀkha sîsaben oms ǃnâ gere hâ. Xawem ge ǁkhapa ge mû matib Jehovaba ra daoǁgauda ǀgausa. ǃGamǃgamsen hâ khoen hîna amabes ǃnâ Eloba ra ôan ge ǃgâiǂhôasa ūbasen. Tsî amab ǃnâ ge ǂgâxa. Tsî da ge hoada ge mû matib Jehovaba sida daoga ra ǂhanuǂhanu ǀgausa.

ǃÂubasen tama da hâ hînas ge Barbarasa kankers ge hōǃnâhe. ǂGui ǃnādem ge Europa ǃoa ge oa hâ i. Is ǁnapa hâ doktergu xa sī ǀaeǃkhōhe. Xawem ge 1983ǁî kurib ǃnâ ge mûǂan Afrikab ǃnâm hâ ǁoa ǃkhaisa. Hoam ge kaise ge tsûaǂgao hâ i.

MÂSIGU GE GE DAWA

Barbaras ge ge ǀaeǂgâ. Tsî Londoni di Betels tawam hâ hîna kankers xa ge tôasi. Betels di omaris ge kaise ge ǂkhâǃnâ te. ǀGui khoe-aogu ra ge ge hui te i ta ǀasa mâsiba ūǃoa. Tsî ǀûs ose Jehovab ai ǂgomaiǂnûi. Ega ta ge ǀnî tsēdi ǀguide Betels tawa ra sîsen ǃgâsasa ge ǀhao-ū. ǁÎs ge ǀnai ǀō-aisa aimâba-ao-i ases tsîna gere sîsen. Tsî Jehovaba kaise ge ǀnam i. Ann ham ge 1989ǁî kurib ǃnâ ge ǃgamme. Tsî ǁnā ǁaeba xu Londoni di Betels tawa ra sîsen.

ǃKharagagu ǃhūga sari tsî ta ge danaberosa ge ǂnûǁkhaeba. Nē sîsen-e ta ge 1995ǁî kuriba xu 2018ǁî kurib kōse ge dī. ǁNās ǀkha ta ge 60 ǀgūse hâ ǃgôab di ǃhūga ge sari. Sari ta gere ǃhūb hoab ǃnâ ta ge gere mû. Matib Jehovaba ǁîb khoena ǃkharagagu mâsigu ǃnâ ra ǀkhaesa.

Afrikabam ge 2017ǁî kurib ǃnâ ge sari. Kaise i ge ge ǁkhoaxa i Annsa ta ge Burundiba ǃoa ǂguro ǃnâs ase a ī-ū o. Tsîm ge kaise ge buru matiko khoen amab ǃnâ ǂgâxa hâsam ge mû o. Tita ge 1964ǁî kurib ǃnâ, omsa xu oms ǀkha gere aoǁnâ ǃnâ ǃgani ǃnâ. I ge īsa Betelsa ge omsa i. Tsîn ge 15 500 xa ǃnāsa ǃoaba-aona ǃhūb ǃnâ ge hâ i.

ǂKhî ta ge ge 2018ǁî kurib ǃnâ ta nî sari ǃhūgu di ǀapeǁguiba ta ge hō o. Côte d’Ivoire ǃhūb tsîn ge ǁnā ǀapeǁguib ai ge hâ i. Danaǃās Abijans ǃnâm ge sī o. O ta ge omsa ǃoa ta ge oaǀkhī khami ge tsâ. Betels tawa ra sîsen ǃgâsan di telefon nomerde ta ge kō o. O ta ge sim hâ ǃnâ kamers ams ai ra hâ ǃgâsab di vana ge mûǃā. ǁÎb ge Sossou di ge van hâ i. Abijans ǃnâ da ge hâ i ǁaebab ge ǃās ǃnâ ra dīhe aoǁnâ sîsen-e gere mûǂgam. Xaweb ge neba ge ǀkhara Sossou i. Nēb ge ge ǁîb ǀgôa i.

Jehovab ge mîmâib ge xūna ge dīǀoaǀoa. ǃGomsigu hîna ta ge ǃkharu ǃnâ gu ge ge ǁgau te. Jehovab aits ga ǂgomaiǂnûi ob ǁîba sa daoga nî ǂhanuǂhanu ǃkhaisa. Nēsisa ta ge ra ǃgû ǀgara ǂgao. ǀAm-e ūhâ tama hâ daob ai. ǁNā daob aib ge ǃnâba ob ra ǀgai o nî ǀgai. ǀAsa ǃhūbaib ai hâ ûib ǃnâ.—ǂKhm. 4:18.