ǀNammi mati a hui da ǁkhā ǀgaub î da ǃaoba dan

1. Mâ ǃaona ǃnāsase ra hōǃâhe?

ǂÂI re ǀnî xūn Jehovaba ra ǃoaba ǃgâsan ge ǃkharuǃnâ na. Nestori tsî ǁîb taras María hâ ra ge ǃnāsase i ǂhâsiba hâba gere sîsen ǂgao.b ǁNāsa dīs ǃaroma ra ge nî ǁkhāǁkhāsen ǀoro mari-e sîsenūsa. Xawe ra ge gere ǃao ǀnîsi ra ǀoro mari-e ūhâs ǀkha ǂkhîba ūhâ tidesa. Sida sîsen-i ǂkhā-e hâ ǃhūb ǃnâb ge Biniama Jehovaba ge ǃoaba tsoatsoa. Tsîb ge ge mûǂan, Elob ǃoaba-ao i aseb nî mâǃoahesa. ǁNās ge gere ǃao kai bi. Xawe ǃnāsaseb gere ǃao i ge ǁîb omaris tae-e nî mîsa. ǁÎb ǀasa ǂgoms xan ga ǁnâu o. Valéries ge ǁgai kankersa ge hōǃnâhe. Tsîs ge ge ǃgombahe i, ǀao-e sîsenū tamase nî ǃkhôasi doktera hōsa. ǁNâuǃāxases ge gere ǃao, ǁō ǁkhās a ǃkhaisa.

2. Tae-i ǃaroma i a ǂhâǂhâsa sida ǃaoba sîsenǂamsa?

² ǁNā ǃaoga hōǃâ tsâ î du hâ? ǂGui da ge ǁnā ǃaoga ge hōǃâ. ǁNā ǃaoba sîsenǂamsa da ga ǁkhāǁkhāsen tama i. O da ge tsū mîǁguiga a dī ǁkhā. Hîna sida ǀhōsagusis Jehovab ǀkha da ūhâsa a khôa ǁkhā ga. ǁNās ge ǁGâuab ra ǂhâbasa. ǁÎb ge ra dītsâ ǁnā ǃaoba sîsenūsa. Î da tā Jehovab di ǂhanuga ǁnâuǀnam. Mîmās ǃgâiǂhôasa aoǁnâs tsîna ǃkhōǂgā hâse. (J.ǂHa. 12:17) ǁGâuab ge a ǁgai, ǀkhom-oǃnâ tsî a ǀgaisa. Xawe du ge ǁîba xu aitsama a ǁkhaubasen ǁkhā. Mati?

3. Tae-e nî hui da î da sida di ǃaoba dan?

³ Jehovab ǀnam dasa da ga ǂgomǃgâ o. Tsîb sida ǀkhāb ai hâsa o, da ge ǁGâuaba ǃao tide. (Psa. 118:6) Aiǁgauseb ge Psalmdi 118ǁî danaǃâs di xoa-aob tsîna, ǃgomsina gere hōǃâ. ǁÎb ge ǂgui khākhoena ge ūhâ i. ǀGapiǃgôahesa khoen tsîna ǃkhōǂgā hâse. (vers 9 tsî 10) ǁAen ǃnâb ge ǀgaisa ǁgâiba gere hōǃâ. (13ǁî vers) Tsîb ge ǀgaisa ǁnamasa Jehovaba xu ge hō. (18ǁî vers) Xaweb ge Psalms di xoa-aoba ge ǁnae: ‘Tita ge ǃao tide’ di. Tae-e ǁnātikōse ǃnorasase gere tsâ kai bi? ǁÎb ge ge ǂan i Jehovab ge ǀgaisa ǁnamasa mābi xaweb. ǁÎb ǀhomsi ǁGûba kaise ǀnambi ǃkhaisa. Psalmdi xoa-aob ge gere ǂgomǃgâ mati ǀguib ga mâsiba ī. Xaweb ǁîb di ǀnamxaǃnâ Eloba, hoaǁae nî huibi ǃkhaisa.—Psa. 118:29.

4. Elob ǀnam dasa da ga ǂgomǃgâ, o da tae-i ǃaoga a dan ǁkhā?

⁴ Jehovab a ǀnam dasa da ge nî ǂgom. Nēs ge nî hui da î da ǃnona ǂanǂansa ǃaoga dan ǁkhā. (1) Omarisa ǂûma ǁoas di ǃaob; (2) khoena ǃaos tsî (3) ǁōba ǃaos. Tsoatsoas ǃnâ hâ xoaǀgoras ǃnâ da goro ǃhoaǃgao ǃgâsan ge ǁîn di ǃaoba ge dan. Jehovab ǁîna a ǀnamsan gere ǂgomǃgâ amaga.

OMARISA ǂÛMA ǁOAS DI ǃAOB

5. Mâ ǃaoba omaris danaba ra ǂâiǂhansen kai? (Tsoatsoas ai hâ ai-īsiba kō re)

⁵ Xristeǁî dana-i ge ǁî-i omarisa kōǃgâs xa kaise a ǂhâǂhâsaba-e. (1Tim. 5:8) Coronas di ǁaeb ǃnâ-i ge omaris di dana-e. ǀNîsi goro ǂâiǂhansen ǁî-i sîsen-e î nî ǂoaǃnâsa. Tsî i omarisa hâǃkhai-i. Tsî ǂû-i tsîna ūhâba hō tide ǃkhaisa. ǀNîsi i ge gere ǃao sîsen-e i ga ǂoaǃnâ. O i ǀkhara sîsen-e hō tidesa. Tamas ka io du ge ǀnîsi, Nestori tsî Marías khama gere tsâ. Hîna go ais ai goro ǃhoaǃgaohe ra. Tsî gere ǂâi ǀoro mari-i ai du a ûi ǁoa ǃkhaisa. ǁGâuab ge ǂgui ǃgâsana Jehovaba xu ge ǂgaebē.

6. ǁGâuaba tae-e ra ǂgom kai da ǂgao?

⁶ ǁGâuab ge ra ǂgom kai da ǂgao Jehovab ǀnam da tama hâsa. Tsî da ǀguri hâsa, sida omarisa kōǃgâs ǃnâ. Nēs xa ǃaromahe hâse da ge ǀnîsi nî ǂâi. Î da ǁkhā da a xū-i hoa-e dī, tsî tā sida sîsen-e ǂoaǃnâ. Tsî da ge sida ǀhōsagusisa Elob ǀkha a ǁgaiǁgai ǁkhā xū-i tsîna a dī ǁkhā.

7. Jesuba tae-i di ǂgomǃgâsiba ra mā da?

⁷ Jesub hîna sada xa ǁîb dadasaba ǃamguse a ǂani, ge ra ǂgomǃgâ kai da. ‘Sada Elob ǂhâba da hân hoana a ǂansa, ǂgan da nîs aiǃâ.’ (Mat. 6:8) Tsî Jesub ge a ǂan, Jehovab a ǂhanusa sida di ǂhâsiga kōǃgâs ǃnâ. Xristeǁî da ase da ge a Elob omaris ǃâ. Jehovab ge a sida omaris di dana. Tsî da ge ra ǂgom omaris danagab dī kai hâ xūnab ra dīsa. 1 Timoteub 5:8 ǃnâ i xoasa khami.

8. (a) Tae-e nî hui da sida omarisa kōǃgâs di ǃaoba da ga ūhâ o? (Mateub 6:31-33) (b) Nau ǃgâsas ǀkha ra ǂûǁae ǃgâsasa da mati a ǁgae ǁkhā?

⁸ Jehovab sida tsî sida omaride a ǀnamsa da ga ǂgomǃgâ. O da ge a ǂgomǃgâ ǁkhā, ǂhâ da hâ xūna da nî ūhâsa. (Khomai re Mateub 6:31-33 sa.) Jehovab ge ra kōǃgâ da ǂgao, ǁîb ge a māxa. ǃHūbaibab ge a kuru ob ge ǂhâ da hâ xūn xa ǃnāsase ge mā da. ǁÎb ge ǂgui xūna ge kuru, î da ǁîn ǃnâ ǃgâiaǂgaoba ūhâ. (Gen. 2:9) ǀNî ǁaegu ai da ga ǂhâ da hâ xūn ǀguina ga ra ūhâ. O da ge ǂâis ǃnâ nî ūhâ. ǂHâ da hâ xūna da ūhâsa, Jehovab ra mā amaga. (Mat. 6:11) ǂÂis ǃnâ da ge nî ūhâ, Jehovab nî mā da xūn a ǀō-aisa ǃkhaisa. Nēsi da ra ǂoaǃnâ xūn xa. Tsîb ge hānîǁaes tsîna ǀamo ûiba nî mā da. ǁNāsa ra ge Nestori tsî María hâra ge ǂanǃgâ.—Jes. 65:21, 22.

9. Tae-e da Nestori tsî Marías aiǁgausa xu ra ǁkhāǁkhāsen?

⁹ Nestori tsî María hâra ge Colombiab ǃnâ îsa oms tsî ǃgâi sîsen-i tsîna ge ūhâ i. ǁÎra ge ra mî: “Sim ûiba ǀgui ǃgubu kai tsîm ge ǃnāsase Jehovaba gere dība ǂgao. Xawem ge gere ǃao ǀoro mari-em ūhâ, amagam ǂkhîba ūhâ tidesa.” Tae-e ge hui ra nē ǃaob ǀkha? Jehovab ge ǂgui ǀgaugu ǃnâ. ǁÎb ǀnamma a ǁgau ra ǀgaub xa ra ge ge ǂâi. Jehovab hoaǁae nî kōǃgâ ra sa ǂgomǃgâ tsî ra ge ǁîra sîsen-e ge ǁnāxu. ǁÎra omsa ǁamaxu tsî ra ge ǃnāsa ǂhâsib, aoǁnâ-aon dib hâ ǃhūba ǃoa ge doe. ǁÎra mîǁguib xa ra mati ra tsâ? Nestori ge ra mî: “Mateub 6:33 ǃnâ hâ mîdi a ama ǃkhaisam ge ge mû. Xū-i di ǂhâsi-em ge ūhâ tama hâ. Tsîm ge nēsisa ǂkhîsa ûiba ūhâ.”

KHOENA ǃAOS

10. Tae-i ǃaroma i a ǁnâuǃāxa khoena ǃaogusa?

¹⁰ Adammi tsî Eva hâra ge Jehovab ǃoa-ai a ǁoresa xu i ge khoena ra tsûtsû gu. (Aoǁn. 8:9) Aiǁgausen ge khoena ǁîn di ǀgaiba ǃgâi tama ǀgaub ǃnâ ra sîsenū. ǂKhabadī-aon ge ǁgai xūna ra dī. ǁOrexa ǀgôan ge ǁîn skol ǀhōsana mîǁgaiǁgai tsî ra ǃaoǃao. Tsî ǀnîn ge ǁîn omaris khoena ǁgai ǀgaub ǃnâ ra hâ-ū. ǁNā-amaga i ge buruxa tama hâ khoena ǃaogu sa. ǁGâuaba mati nē ǃaoba khoen ǃoagu ra sîsenū?

11-12. ǁGâuaba khoesi ǃaoba mati ra sîsenū?

¹¹ ǁGâuab ge ra dītsâ î da khoena ǃao tsî aoǁnâ ǀû. Tamas ka io Jehovab ra ǂgaoǀkhā da xūna dī tama i. ǁGâuab di ǂgaeǂguis ǃnāga gu ge ǂhanuga. Sida sîsen-e ǂkhā tsî ra mâǃoa. (Luk. 21:12; J.ǂHa. 2:10) ǁGâuab ǃhūbaib ǃnân ge ǂgui khoena ǂhanu tama ǂhôan. Tsî ama tama xūna Jehovab ǃoaba-aon xa ra ǃhoa. Khoen hîna nē ǂhumiba ra ǂgomman ge. ǃKhāǃkhā da tsî a ǂnau da ǁkhā. (Mat. 10:36) Buru kaihe î da ra ǁGâuab di ǀgaugu xa? Hî-î, tātsē. ǁÎb ge ǁnā ǀgauga ǃkharu ge ǁaeb ǃnâ gere sîsenū.—ǃNǃkh. 5:27, 28, 40.

¹² ǁGâuab ge ǂhanugu xa mâǃoahes di ǃaob ǀguiba sîsenū tama hâ. ǀNîn xa i ge omaris ǁaninan ūba hâ ǃaoba kaise a kai, ǂnauhes xa. ǁÎn ge kaise ǁîn omaris khoena a ǀnam. Tsî ra ǂhâba în Jehovaba ǂan tsî ǀnam tsoatsoa. ǁÎn ge ǁgaise ra tsâ ǁîn omaris ǁanin ga. Elob tsî ǁîb ǃoaba-aon xa ǁgai xūna ga ra mî o. ǀNî omaris ǁanin hîna gere mâǃoa dan ge Jehovaba ge ǃoaba tsoatsoa. Sida di ǀasa ǂgoms ǃaroma i ga sida omaris ǁanina. ǀŪxu da o, tae-e da nî dī? Mati da nî tanisen?

13. Elob ǀnam das di ǂgomǃgâsiba ūhâsa mati nî hui da sida omaris ǁanin ga ǀūxu da o? (Psalmdi 27:10)

¹³ ǁKhaeǂgaohe da ge ra îsa mîdi hîna Psalmdi 27:10 ǃnâ xoasa di xa. (Khomai re) Jehovab matikōse ǀnam das xa da ga ǂâi o da ge ǃao tide. Tae-i nî isa sida omaris ǁanin ga ǀūxu da o. Tsî da ge ǂgomǃgâsiba ūhâ Jehovab nî ǀkhae dasa. Mâ ǃkharu da ra ǃkhais ǃaroma. Jehovab ge ǂhâ da hâ xūn hoana nî mā da. Tsî nî hui da î da ǃnomsa tsî ǂkhî tsî ǁîb ǀgūse hâ. Tsî ǁnāsab ge Biniami hîna da go ais ai goro ǃhoaǃgaoba ge hōǃâ.

14. Tae-e da Biniami aiǁgausa xu ra ǁkhāǁkhāsen?

¹⁴ ǁÎn ǃhūb ǃnâ i Jehovab ǃoaba-aona ra mâǃoahesab a ǂan. Xaweb ge Biniama Jehovaba ge ǃoaba tsoatsoa. Jehovab a ǀnam bi ǃkhaisa ǂans ge Biniama. Khoena ǃaos ǀkha hui ǀgaus xa ǂâiǃgâ re. “Mâǃoahe ta gere ǀgaub ge kaise ge ǁgai i ǂâi ta ge hâ is xa.” ǁÎb ge ra mî, “xawe ǂhanub xa mâǃoahes xa ta ge tita ti omaris ǁanin xa mâǃoahesa gere ǃao. ǃAo ta ge gere Jehovab di ǃoaba-ao ta a ǃkhais ǃaroma ta. Ti pab hîna Jehovaba ǃoaba tamaba nî tsâuaǂgao kaisa. Tsîn ti omaris ǁanina, ǃgôasiba ta ūhâba nî tama ti nî ǂâisa. Xaweb ge Biniama gere ǂanǃgâ, Jehovab hoaǁae ǁîba ǀnamna ra tsâbasa. Biniami ge ra ǁguiǃā: “Tita ge Jehovab nauna ǃgom ǁaegu. ǃHao ǀgoradi tsî ǂkhabadīb ǃnâ gere hui ǀgaub xa gere ǂâi. ǂAn ta ge ge i Jehovab ǃoa-ai ta ga ǂgomǂgomsase hâ, ob nî ǀkhaete sa. ǂGui ǃnāte ta ge ǃkhōhe tsî tronkhes ǃnâ gere ǂnauhe o. O ta ge aitsama ge hōǃâ matib Jehovaba ra hui dasa ǂhâbi da hâ ǁaegu ǃnâ. ǁÎb ǃoa da ga ǂgomǂgomsase hâ o.” Jehovab ge Biniami ǃoa ge ama dadasa kai. Tsî ǁîb khoen tsîn ge ge ǁîb omaris di ǃâ kai.

ǁŌBA ǃAOS

15. Tae-i ǃaroma i tsū tama hâ ǁōba ǃaosa?

¹⁵ Elobmîs ge ra ǂanǃgâ ǁōb a khākhoesa. (1Kor. 15:25, 26) ǀNam da a khoe-i ga ǀaesen, o da ge a ǂâiǂhansen ǁkhā ǁōb xa. Tae-i ǃaroma da ǁōba ra ǃao? Jehovab ge ǀamosib kōse ûis di turab ǀkha kuru da amaga. (Aoǁn. 3:11) Xawe ǁōb xa ǀnōsa ǃaoba ūhâs ge a hui da ǁkhā. Î da sida ûiba ǁkhauba. Aiǁgause i ge a ǂkhâǃnâ da ǁkhā, î da ǃgâi mîǁguiga dī. Tsî ǃgâise ǂû tsî sorosa ǃgâi mâsib ǃnâ ūhâ. Tsî dokterna xu huiba hō. Tsî sōǀôan tsîna ôa ǂhâbasa i ga o. Tsî sida di ûiga ǁkhōǁkhōsa mâsib ǃnâ mâisa xu ǂgōsen.

16. ǁGâuaba mati sida di khoesi ǃaob hîna da ǁōb xa ūhâba ra sîsenū?

¹⁶ ǁGâuab ge a ǂan sida ûiba da ra ǃgôaǃgâ ǃkhaisa. Tsîb ge ra mî sida ûiba sâus ǃaroma da xū-i hoa-e nî dīsa. Sida ǀhōsagusis hîna da Jehovab ǀkha ūhâs, tsîna da ge nî māǁnâ. Ûitsamase hâs ǃaroma. (Job. 2:4, 5) Xawe ǁGâuab ge ǂhanu tama hâ. ‘ǁŌb di ǀgaibab ūhâ’ amagab ge ǁGâuaba ra dītsâ îb. Sida di khoesi ǃaob ǁōb diba sîsenū, î da Jehovaba ǁnāxu. (Heb. 2:14, 15) ǀNî ǁaegu aib ge ǁGâuaba ǁîb di khoena ra sîsenū. În Jehovab ǃoaba-aona ǁōb ǀkha ǃaoǃao. ǁÎn di ǂgomsan ga ǀūxu tama io. ǀNî ǁaegu aib ge ǁGâuba ra mû ǁkhōǁkhōsa ǀae-e da ūhâsa, tsî ǁnāsa a sîsenū ǁkhā. Doktergu tamas ka io, sida omaris di ǁanin ge a ǁgari da ǁkhā. Î da ǀaoba ra sîsenū ǀaeǃkhōde ūǃoa. Tsî ǁnās ge Elob di ǂhanuga a mâǃoa ǁkhā. Tamas ka io i ge ǀnî khoena a ǂkhâǃnâ da ǁkhā. Î da Jehovab daoǁgaudi ǃoagu hâ tama ǀaeǃkhōna ūǃoa.

17. Romeǁîn 8:37-39 ǃoagu da tae-i ǃaroma ǁōba ǃao tide?

¹⁷ ǁŌ ǂgao tama da hâ xawe da ge a ǂan. Jehovab ǀnam da ǀû tidesa ǁō da ga o. (Khomai re Romeǁîn 8:37-39 sa.) ǁÎb ǀhōn ga ǁō o, ob ge Jehovaba ǁîna. ǁÎb ǂâis ǃnâ ra ūhâ ûitsaman a khama. (Luk. 20:37, 38) ǁÎb ge ra ǁkhōre ǁîna khâisa māsa. (Job. 14:15) Jehovab ge ǀgapi marisa ge matare î da “ǀamo ûiba” hō. (Jhn. 3:16) ǂAn da ge a Jehovab kaise a ǀnam da tsî ra tsâba dasa. ǁNā-amaga da ge Jehovaba ǁnāxu tama hâ. ǀAesen tsî da ga ǁōb ǀkha ǃoa o. Xawe da ge ǁîb ǃoa ǁkhaeǂgaos, gā-aisib tsî ǀgaib ǃaroma ra kō. ǁNāsa ra ge Valéries tsî ǁîs ao hâra ge dī.—Psa. 41:3.

18. Tae-e du Valéries aiǁgausa xu ra ǁkhāǁkhāsen?

¹⁸ Valéries ge 35 kurixas a hîna, kaise ǃaoǃaosa kankersa ge hōǃnâhe. Kō re matib ge ǀnamma a huisi ǀgausa, ǁōb di ǃaoba dansa. ǁÎs ge ra mî: “Ti ǀaeb ge sim ûiba ge dawa. Kai ǃkhôasa da ge ge ǂhâ hâ i. ǂGui dokteran ǀkha ta ge ge ǃhoa ǀao-i ose a ǃkhôa ǁkhāna. Xawen ge hoana ge ǂkhā. Kaise ta ge gere ǃao, xawe ta ge Elob ǂhanub ǃoagu ǀao-e sîsenūsa ge ǂkhā. Ti ûib ǃnâb ge Jehovaba ge ǁgaute ǀnamteb a ǃkhaisa. Nēs ge ge ti ǃē i ǁîba ǁgausa ǀnam bi ta a ǃkhaisa. ǁGai ǂhôa-e ta gere ǁnâu ǁaeb hoaba ta ge gere mîǁgui. Î ta Jehovaba ǂkhîǂkhî ǁGâuab ose. Tsî i ge ǀams ai ǃkhôasa ǃgâise ge ǃgûǁnâ ǀao-e sîsenū tamase. Ti ǂurusib ge ǃgâi tama hâ i xaweb ge Jehovaba. Hoaǁae ǂhâm hâ xūna gere mā mî. Aiǁgause kankersa ta ūhâ tim nî ǁnâu ǃuis aiǃâ ge hâ i. Wekheb ǁaegu hâ ǀhaos ai da ge ‘Meeting Today’s Adversities With Courage.’ di hâ ǁkhāǁkhāǃâsa gere ǃhoaǃgao.c Nē ǁkhāǁkhāǃâs ge ge ǁkhaeǂgao mî. Tsîm ge ǂgui ǃnāde ge khomaisi. Nēti i ǁkhāǁkhāǃâdi, aoǁnâ sîsenni. Tsî ǀhaode hâǃnâs, ge ge hui mî, îm ǃnomsase hâ. Tsî ǃgâi mîǁguiga dī ǁkhā.”

ǃAOBA DANS

19. Tae-e ǀgūǁae nî ī?

¹⁹ Jehovab huib ǀkhan ge ǃhūbaib ǂhabase hâ Xristeǁîna. ǃGom mâsiga ge ǃkharuǃnâ tsî ǁGâuaba ge mâǃoa. (1Pet. 5:8, 9) ǀGūǁaeb ge Jehovaba, Jesub tsî ǂkhauhesan. Tsîna nî daoǁgau în ǁGâuab di sîsenga hîkākā. (1Jhn. 3:8) ǁNās khaoǃgâ i ge Elob khoen hîna ǃhūbaib ai ra ǃgauna, khoe-i xa ǃaoǃaohe tide. (Jes. 54:14; Mix. 4:4) ǁNā ǁaeb kōse da ge ǃgarise nî sîsen. Î da sida di ǃaoba dansa hōba.

20. Tae-e nî hui da î da sida di ǃaoba dansa hōba?

²⁰ Aiǃgû tsî da ge ǂgomǃgâsiba nî ūhâ, Jehovab ǀnam dasa. Tsîn ǁîb ǃoaba-aona ǂgomǃgâsiba a ūhâ ǁkhāsa ǁîb ra sâu nî ǂgaosa. Jehovab ge ǁîb ǃoaba-aona ǃkharu ge ǁaeb ǃnâ huis xa ǂâiǃâ tsî ǃhoas ge nî hui da. Tsî da ge ǂâis ǃnâ nî ūhâ matib ge ǃgom mâsigu ǃnâ, sida a huisa. Jehovab di huib ǀkha da ge nē ǃaoba dansa a hōba ǁkhā.—Psa. 34:4.