ǃKharu ge ǁaeb kēbos hîna sida ra tsâǀkhās

1. Tae-eb ge Jehovaba dī, Adammi tsî Eva hâra ge ǁore toas khaoǃgâ? (Genesis 3:15)

ADAMMI tsî Eva hâra ge ǁore toas khaoǃgâb ge Jehovaba. ǁÎra di ôana ǃgâi kēbos ǃnâ-ū ǃâubasensa ge mā. ǁÎb ge mî mîde ge Genesis 3:15 ǃnâ a xoamâisa.—Khomai re.

2. Tae-i ǃaromas nē kēbosa a ǂhâǂhâsa?

² Nē kēbos ge ǂguro ǂkhanis Elobmîs dis ǃnâ hâ. Xawe i ge nau Elobmîs ǂkhanidi tsîna ǃkharagagu ǀgaugu ǃnâ nē kēbos ǀkha ra ǃgûǀhao. Elobmîs di ǃgâb ǀkhab, xoasa ǂkhanidi hoade ra ǃkhōǀhao khami i ge. Genesis 3:15 ǃnâ hâ xūn tsîna, ǀgui haisi-ams ǀguisa ūhâ. ǁNās ge, Elob nî ore-aoba sîsa, hîna ǁGâuab tsî ǁîb di sao-aon tsîna nî dīkākāba.b Tsî ǁnā i ge kaise nî ǃgâi, ǁnān hîna Jehovaba ǀnaman ǃaroma.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Nē ǁkhāǁkhāǃâs ǃnâ da ge saora dîde ni ǃeream. Hîna Genesis 3:15 ǃnâ hâ kēbosa xu hâde: Hamna nē kēbos ǃnâ ra ǂgaihena? Matis nē kēbosa ra dīǀoaǀoahe? Tsî mati da sida ǁnāsa xu ǃgâiba ra hō?

HAMNA NĒ KĒBOS ǃNÂ RA ǂGAIHENA?

4. “ǀaoba” a Ham tsî mati da ǁnāsa ǂan?

⁴ Genesis 3:14, 15 ǃnâ ra ǂgaihen ge “ǀaob” hîna a “suriba” ǀaon diba, tsî taras hîna a “surisa” “taras” disa. Elobmîs ge ra hui da î da ǂanǂui haman asa.c ǀKhī da “ǀaob” ǀkha tsoatsoa re. Ama ǀao i ge tātsē ga ǁnâuǃā tama hâ, tae-eb ge Jehovaba Eden ǃhanab ǃnâ a mîsa. ǁNās ǃaroma i ge Jehovab di ǀgoraǃgâsa gā-ai kurusabe i ǃoagu nî hâ. Ham-i xab ge Jehovaba gere ǃhoa? ǂHaiǂhais 12:9 ge ǃgāsase ra ǁguiǃā, ǀaob a hamsa. ǁNāpa i ge “ǀoro ǀaoba” ǁgâuab tamas ka io Satanni ti ra ǂgaihe. Xawe hamna a ǀaob di suri?

5. Hamna ǀaob di suriba ra kuruǂui?

⁵ ǀNî ǁaegu ais ge Elobmîsa “surib” di hâ mîsa ra sîsenū. ǁNās ge khoe-i hîna ǂâi tsî xūna ǁîn di ǁgû-i khami ra dīna ǃoa ra ǁnaeǁgau. ǁNā amaga i ge ǀaob di suriba ǂgomoǃnâ ǀhomǃgāgu. Tsî khoen hîna Satanni khami īn. Tsî Jehovaba mâǃoa tsî ǁîb khoen tsîna ra mâǃoana ǃoa ra ǁnaeǁgau. Tsî nēs ge ǁnā ǀhomǃgāgu hîna ǁîgu di ǁgaumâisa ǀhommi ǃnâ ǁnāxu ga ǃoa ra ǁnaeǁgau, Noaxi di tsēdi ǃnâ. Tsî ǁnā ǁgai khoen hîna ǁîn di ǁgûb ǁGâuab khami ra tanisena.—Gen. 6:1, 2; Jhn. 8:44; 1Jhn. 5:19; Jud. 6.

6. Tae-i ǃaromas “tarasa” Eva tama hâ?

⁶ Saorase da ge “taras” xa nî ǂanǂui, ǁîs ge a Eva ǁoa. Tae-i ǃaroma? ǀGui ǃaromas xa ǂâi re. Kēbos ge ra mî, taras surib nî ǀaob di danasa “ǂkhūǂkhūsa.” ǃHoaǃgao da go khamib ge ǀaoba a gagasi kurusabe, Satanna. Tsî i ge tātsē ǀoasa kurusa ūhâ tama surib Evas diba, ǁîba a ǂkhūǂkhū ǁoa. ǁNās ǃaroma matib Satanna nî dīkākāhe?

7. ǂHaiǂhais 12:1, 2, 5, 10 ǃnâ i ra ǂoaxa khami î taras hîna Genesis 3:15 ǃnâ hâsa a ham?

⁷ Genesis 3:15 ǃnâ i ge taras a hamsa, ǀuniga ǂkhanis Elobmîs dis ǃnâ ra mîhe. (Khomai re ǂHaiǂhais 12:1, 2, 5, 10 sa.) Nēs ge ǃhūbaib ai hâ tara tamasa. ǁÎs ge ǁkhâba ǁîs di ǂaidi tawa ūhâ. Tsî krons tsîna 12 ǀgammirodi ǀkha ǁîs danas ai. ǁÎs ge ǂanǂansa tama hâ ǀgôa-e ra ǃnae. ǁNab ge Elob Gaosiba. Gaosib ge ǀhommi ǃnâ hâ, ǁnās ǃaroma i ge taras tsîna ǀhomma xu nî hâs ge. ǁÎs ge ǀhomsi ǃâb Jehovab ǀapeǂhumis diba ra ǂnûǁkhaeba. Hîna ǂgomǂgomsa ǀhomǃgāgu xa kuruǂuihe hâsa.—Gal. 4:26.

8. Ham-e a ǂguro suri taras diba, tsî tae-i khaoǃgâb ge ǁnā suri kai? (Genesis 22:15-18)

⁸ Elobmîs tsîn ge ra hui da, î da ǂguro surib taras diba ǂanǂui. Nē surib ge Abrahammi suriba xu nî ǂoaxas ge. (Khomai re Genesis 22:15-18 sa.) Kēbos ra mî khamib ge Jesuba ǁnā ǂgomǂgomsa aob di suriba xu ra ǀkhī. (Luk. 3:23, 34) Xawe i ge nē suriba khoe-i xa nî ǀgaisas ge. ǁÎb nî Satanni hîna a ǁGâuaba ǂkhūǂkhū amaga. ǁNā-amaga Jesub ge 30 kurin ǃnâ hâ io. Ob ge ǃanu gagab ǃnâ ū ge ǁgaumâihe, îb ǀguise ǃnaehâ ǀgôa kai Elob diba. ǁÎb di ǁgaumâis tawab ge Jesuba ge ǂguro suri kai taras diba. (Gal. 3:16) Jesub di ǁōb tsî khâis khaoǃgâb ge Eloba ǁîba “ǂkhaisib tsî ǃgôasib ǀkha ge ǀgapa.” Tsî ǁnās ǀkha “hoa ǁkhāsiba ǀhommi ǃnâ tsî ǃhūbaib ai” ge mābi. Tsî nēs ge ‘ǁGâuab di sîsenga dīkākās’ di ǁkhāsib tsîna ǃkhōǂgā hâ.—Heb. 2:7; Mat. 28:18; 1Jhn. 3:8.

9-10. (a) Haman tsîna ra taras di surib di ǃâ, tsî mâǁaeb ain ra ǃâ kai? (b) Tae-e da saorase nî ǃhoaǃgao?

⁹ Jesub xōǀkhā i ge ǀnî hâ surib tsîna noxoba nî hâ. Apostel Paulub ge Jodeǁîn tsî Grikeǁî ǂkhauhesa Xristeǁînab ge mîba o. Saorase haman asa ge mî: “Xristub didu a xui-ao, du ge a Abrahammi di suri tsî du ge hoaraga ǀkhaegu Elob diga nî ǀumi, Elob ge Abrahammi ǀkha dī mîmâis ǃaroma.” (Gal. 3:28, 29) Jehovab ga Xristeǁî-e ǃanu gagab ǀkha ǁgaumâi o. O i ge ǁnā khoe-e ra taras di suri kai. ǁNās ǃaroma i ge nē suriba Jesu Xristub tsî 144 000 ǂgaeǂgui-aona xu a kuruǂuisa. (J.ǂHa. 14:1) Nēn hoan ge ǂâi tsî ra dī ǁîn di ǁGûb Jehova Elob khami.

¹⁰ Nēsisa da go Genesis 3:15 ǃnâ hâ khoena a ǂanǂui o. O da ge nēsi nî ǁkhāǁkhāsen Jehovab tae-e ǀnai dī hâsa, ǁîb di kēbode dīǀoaǀoas ǃnâ. Tsî matis ǁnāsa sida nētsē nî hui ǀgaub tsîna.

MATIS NĒ KĒBOSA RA DĪǀOAǀOAHE?

11. Mâ ǀgaub ǃnâ i ge taras di suriba ǃnôas ai tsûtsûhe hâ i?

¹¹ Genesis 3:15 ǃoagu hâ kēbos ge ra mî, ǀaob nî taras di suriba “ǃnôas ai nâ” ǃkhaisa. ǁGâuab ge ǁnāsa ge dī Jodeǁîn tsî Romeǁîn tsînab ge Elob di ǀgôaba a ǃgam kai o. (Luk. 23:13, 20-24) Ama ǀhapis hîna ǃnôas ai hâs, ǁaeroba khoe-e a tsûtsû ǁkhā khami i ge. Jesub tsîna xū-e ge dīǁoa i ǀhobas ǃnâb ge ǁō hâ i amaga.—Mat. 16:21.

12. Mati tsî mâǁaeb ǀaob di danasa nî ǂkhūǂkhūhe?

¹² Genesis 3:15 ǃnâ hâ kēbos nî dīǀoaǀoahes ga o. Ob ge Jesuba ǀhobas ǃnâ ga hâ ǀgara ǁoa i. Tae-i ǃaroma? Kēbos ǃoagu i ge ra mî ǁnā surib nî ǀaob di danasa ǂkhūǂkhū ǃkhaisa. Nēs ge gere ǂâibasen Jesub nî khâisa māhe ǃkhaisa. Tsîs ge ǁnās ǀguisa ge ī. ǃNonaǁî tsēs khaoǃgâ ǁō toab hâ hînab ge Jesuba gagasi soros ǀkha khâisa ge māhe. Elob di ǂhanu ǁaeb aib ge Jesuba ǁGâuba ǀamose nî dīkākā. (Heb. 2:14) Xristub tsî ǁnān hîna ǁîb ǀkha nî ǂgaeǂguin ge, Elob khākhoen tsî ǀaob di surib tsîna nî dīkākā.—J.ǂHa. 17:14; 20:4, 10.d

MATI DA SIDA ǁNĀSA XU ǃGÂIBA RA HŌ?

13. Mati da nē kēbos di dīǀoaǀoasa xu ǃgâiba ra hō?

¹³ ǁĀǁnâhe hâ ǃoaba-ao du ga o, o du ge nē kēbos di dīǀoaǀoasa xu ǃgâiba ra hō. Jesub ge khoeb ase ǃhūbaiba ǃoa ge ǀkhī. ǁÎb ge ǃamkuse ǁîb di ǁGûb di ǀgauga ǁgae hâ. (Jhn. 14:9) ǁÎb ǃnâ-ū da ge ǂan tsî ǀnam tsoatsoa hâ Jehova Eloba. Jesub di ǁkhāǁkhādi tsî daoǁgaude xu da ge ǃgâiba hō hâ. Hînab Xristeǁî ǀhaohâba nētsē ra māba. ǁÎb ge ǁkhāǁkhā da hâ ǀgaugu hîna da a ûi ǁkhā ga. Î da ǁnās ǀkha Jehovaba ǂkhîǂkhî. Tsî hoada ge ǃgâiba Jesub di ǁōba xu a hō ǁkhā, ǁîb di ǃnôas di tsûba. Mâ ǀgaub ǃnâ? Jesub ge khâisa mā toahes khaoǃgâb ge Jehovaba, ǁîb di ǀgôab di ǁguibasa ge ǃkhōǃoa. Hîna ‘hoa khoen di ǁorena ra ǃanusa.’—1Jhn. 1:7.

14. Khoena ga ǃâubasen hâ îs nē Edenni ǃnâ ge mîhe kēbosa ǃhaese dīǀoaǀoahe? ǁGuiǃā re.

¹⁴ Kēbos hînab ge Jehovaba Eden ǃhanab ǃnâ mîs ge ra ǁgau. ǁNā ǁaeb ais ga ǁnā kēbosa dīǀoaǀoahe tama hâsa. ǁAeba i ge nî ū îs tarasa mîmâihe hâ suriba hō. Tsî ǁGâuaba ǁîb di sao-aona ǀhaoǀhao. Tsî ǁnās ǀkhas tsîna ǃhuiba nē ǀgam groep ra ǁaegub ǃnâ tsoatsoa. Nē kēbosa da ga ǁnâuǃā o, os ge ǁnāsa ra hui da î da ǁnâuǃā. Nē ǃhūbaib hîna ǁGâuab xa ra ǂgaeǂguiheb, Jehovab di ǃoaba-aona nî ǃhui ǃkhaisa. Jesub tsîn ge ǁîb di ǁkhāǁkhāsabega ǁnā i xa ge ǂanǂan. (Mrk. 13:13; Jhn. 17:14) Sida ge ǁnā kēbos di dīǀoaǀoasa ǃâb ǃnâ mû hâ. Tsî ǃnāsase nē 100 kurigu di ǀuniga tsēdi ǃnâ. Mâ ǀgaub ǃnâ?

15. Tae-i ǃaroma i ǃhūbaib di ǃhuiba ǀarosen hâ? Xawe da tae-i ǃaromasa ūhâ ǁGâuaba da ǃaoba tamasa?

¹⁵ Jesub ge 1914ǁî kurib ǃnâ Gaob ase a ǁgaumâihe toas khaoǃgâb ge. ǁGâuaba ǀhomma xu ge aoǁnâhe. ǁÎb ge nēsisa ǃhūbaib ǃnâ hâ, tsî ǁîb di dīkākāsa ǃâu ǀgara hâ. (J.ǂHa. 12:9, 12) Xaweb ge ǁnā ǁaeba xu kaise a ǀhape. ǁGâuab ge ǁaixa hâ tsî Elob khoena ra ǁnāǂām. (J.ǂHa. 12:13, 17) ǁNā-amagas ge ǁGâuab di ǃhūbaib kaise ǃhui da hâsa. ǃAroma i ge a ǀkhai î da ǁGâuab tsî ǁîb di saosaben tsîna ǃao. Xawe da ge sida tsîna ǁnā ǂgomǃgâsib apostel Paulub ge ûhâ iba ūhâ, xoab ge o: “Elob ga sada ǀkha hâo, tari-e kha sada ǃoagu nî hâ?” (Rom. 8:31) ǀGaisa ǂgomǃgâsiba da ge Jehovab ǃnâ ūhâ ǁkhā. Mû da go khami i ge kēbos hîna Genesis 3:15 ǃnâ hâsa ǀnai dīǀoaǀoahe hâ.

16-18. Matin ge Curtisi, Ursula tsî Jessica hâna ǃgâiba hō, Genesis 3:15 sa xu?

¹⁶ Jehovab di mîmâis hîna Genesis 3:15 ǃnâ hâs ge a hui da ǁkhā. Î da hâ ga ǃgomsi i hoa-e mâǃkharu. Curtisi hîna sîsabese Guam di ǀon hâ ǃās ǃnâ ra hâb ge ra mî: “Xūn ge ti ûib ǃnâ ge ī hâ i hîna ge ǃgom kai hâ ina, î ta ǂgomǂgomsase hâ ǀgara Jehovab ǃoagu. Xawe Genesis 3:15 ǃnâ hâ kēbos xa ǂâiǃgâs ge ge hui te. Î ta ti ǂgomǃgâsiba ti ǀhomsi ǁGûb ǃnâ ūhâ.” Curtisi ge ǁnā tsēsa ra mûǂui, Jehovab nî hoa ǃgomsin sida dina ūbēsa.

¹⁷ Bavarias ǃnâ ra hâ ǃgâsas Ursula di ǀon hâs ge ra mî. Genesis 3:15 sa ǁnâuǃās ge ǁîsa ǂgomǃgâsiba ge mā Elobmîs, Eloba xu hâ ǃkhaisa. Mûs ge ge nau kēbodi mati nē kēbos ǀkha ra ǃgûǀhao ǀgausa. Tsî ǁnās ge kaise ǃgâise ge tsâ kaisi. ǁÎs ge noxoba ra mî: “ǁKhāǁkhāsen ta ge o, Jehovab ge ǃhaese xū-e a dīsa îb ǃâubasensa mā da. Os ge ǁnāsa tita ǁîba kaise ge ǀnam kai.”

¹⁸ Jessicas hîna Micronesiab ǃnâ ra hâs ge nēti ra mî: “ǂÂihō ta ge noxoba ra mati ta gere tsâsa. ǂGuro ǃnāsa ta ge mûǂan o, amaba ta ge hōsa. Kēbos hîna Genesis 3:15 ǃnâ hâs ge gere dīǀoaǀoahe. Hui te î ge ge î ta ǂâihō, nē da ra hōǃâ nētsē xūn ama ûi tama hâsa. Nē kēbos tsîn ge ge hui te î ta ǀgaiǀgai ti ǂgomsa. Jehovaba ǃoabas ǂgui ǀkhaegu hîna ûib ǃnâ hâ ga ǃoa ǀgui ra ǁnaeǁgausa nēsi tsî hānîǁaeb ǃnâ.”

19. Tae-i ǃaroma da ǂgomǃgâsiba ūhâ ǀuniga ǃâb kēbos dib tsîn nî dīǀoaǀoahesa?

¹⁹ Mû da go khami i ge Genesis 3:15 sa nēsi dīǀoaǀoas ǃnâ hâ. Taras di surib tsî ǀaob di surib tsîn ge ǃgāsase ǁguiǃāhe hâ. Jesub hîna a ǂgurob taras di suriba xub ge ǁîb di ǃnôas di tsûba xu ge ǂgau. Tsî ǁnās ǀkha nēsi a ǀgaisa Gao-ao. Xawe nēsib ge Jehovaba ǀnai ǃkhare khoena ǁhûi hâ hîna. ǁÎb di ǀgôab ǀkha ǀhommi ǃnâ nî ǂgaeǂguina. ǂGuro kēbos ǀnai dīǀoaǀoahe hâ amaga da ge. ǀGaisa ǂgomǃgâsiba ūhâ ǀuniga ǃâb, ǀaob di danasa ǂkhūǂkhūs tsîn nî ama kaisa. Elob di ǃoaba-aon ge kaise nî ǂkhî, Satanni ga dīkākāhe o. ǁNā ǁaeb kōse, tā ǀûsen re. Sida Elob ge a ǂgomǃgâhe ǁkhā. Taras di surib ǃnâ ūb ge kaise ǂgui ǀkhaega, “hoaraga ǁaedi ǃhūbaib” didi ai nî ǀkhī ū.—Gen. 22:18.