Mû ta ge ge ǂgomǂgomsan ge ǃgâiǃgâsa

Nēs xa da ge ge âi, ti ǀhōba ta ge gagasi khoeb ase ǂan tama hâ i ǃkhais ǃaroma. ǁÎba ta ge ge dî: “Satsa tae-e Elobmîs xa a ǂan?” ǁÎb ge ǁnā dîsa ǃkhaese ge ǃeream tama hâ i. Tsîb ge ēga ge mîba te ǁîb ǁgûs a Jehovab ǃoaba-aon di ǀguisa. Tsîb ge ǁîsa xu ǀnî xūna a ǁkhāǁkhāsensa. ǂAn ǂgao ta gere amaga ta ge ǁîba ge mîba îb ǃnāsase ǁgambate.

Sîkham ge hoa ǃuisa nēs xa ge ǁgam. ǁÎb ge ge mîba te Elobmîs, ǁGâuaba ǃhūbaib di ǂgaeǂgui-aob ase ra ǁguiǃāsa. (Jhn. 14:30) ǀNîsi du ge ǁnāsa sado ûib hoaba a ǂan xawe tita ge ǁnāsa ǀasa xui-i ase ge ǁkhāǁkhāsen tsîs ge nēsa gere ǂâi kaite. ǁNâu ta ge gere ǀnamxaǃnâ tsî ǀgora-e ūhâ tama hâ Elob ǃhūbaiba ra ǂgaeǂguisa. Xawe ǁnās ge ti ûib ǃnâ ta gere mû xūn ǀkha ge ǀgui tama hâ i. Tita ge 26 kurixa i xawe ta ge ǂgui xūna gere mû hîna gere ǂâiǂhansen kaite na.

Ti ǁgûb ge Amerikab di toroǂnubisa gere sîsenba tsî anikunide gere ǃnari. ǁNās ǀkha ta ge ǀgôata ge ī xawe ge ǂan-i nuclear bomdi gere sîsenūhesa. Vietnams di torob ge Californiab ǃnâ ta ǀgapi ǁkhāǁkhāsensa ra dī hîna ge tsoatsoa. Tsî ta ge studentan hîna ǂkhîoǃnâsiba ra ǃkhamban ǃnâ ge ǃâ tsoatsoa. ǀAwaǃnamgu ge gere sauru da tsî da ge gere ǃkhoe. ǁÎgu ge xasi ǀkha gere ǀiri tsî î ge nē xas-e gere ǃaroma its ta ǁaeroba ǃgâise mû ǁkhā. Nē ǁaeb ge kaise ge ǀkhomaxa ī tsî māǃoadi xas tsîna ge ǀoahâ i. Polotiks di ǃnandi ǃnâ hâ ǂgaeǂgui-aogu ge gere ǃgam-e. Tsîn ge khoena ǂkhîoǃnâsiba gere ǃkhamba. Mâ khoe-i hoa-i ge ǀnîhâ ǂâiǀgauba ge ūhâ i, ǁî-i ra ǂhâba xu-i ǃaroma. Nēn hoan ge kai ǀkhomaxasiba gere ǃaroma.

Tsî ta ge 1970ǁÎ kuri, Alaskab di Noordes ǃnâ sîsen-e ge hō. Kaise ta ge ǂgui mari-e gere kuru. ǁNāpaxu ta ge Londona ǃoa ī tsî ǃkhuiǃkhuiseba ge ǁama. Tsî ǁnāpaxu suides ǃnâ ge ǃnarimâ tsoatsoa, mâpa ta ra īsa ta ge ge ǀū-i. ǂGui ǁkhâgu khaoǃgâ ta ge Afrikab ǃnâ ge hā. ǃNarimâ ta gere khami ta ge ǃkharagaǃnâgu khoen ǀkha ge ǀhao, ǁîn tsîn ge ūn hâ ǃgomsina xu gere ǃkhoebē ǂgao ǃgâi tama mâsigu ge hâ i amaga.

ǁNās ǃaroma î ge mû tsî ta gere ǁnâu xūna Elobmîs ǀkha gere ǃgûǀhao. Hîna ra ǁkhāǁkhāsa ǀnîhâ khoe-i nē ǃhūbaiba ra ǂgaeǂhapusa. Nēs ge ge amaba te. O Elob ga nē ǃhūbaiba ǂgaeǂgui tama io, ǁîba tae-e ra dī? ǁNā dîs ǃereamsa ta ge gere ǂan ǂgao.

ǂGui ǁkhâga ǃkharu tsî ta ge nē dîs di ǃereamsa ge hō. ǁAeb ǀkha da ge ǂgomǂgomsa-aogu tsî taradi xa ge ǁkhāǁkhāsen. Tsî ǁîna ge ǀnam mû ta ge o, ǁîn mati ǂgomǂgomsase ama Elob ǀguiba ra ǃoaba ǃkhaisa. Mâsigu ge ǃgom-i xawe.

IRELANDI NOORDES—“ǃHŪB BOMDI TSÎ ǁKHADI XA ǀOAHÂB”

Londoni ǃnâ ta ge ǁkhawa a oasī o, o ta ge ti ǀhōb ti mamas ǀkha ge ǀhao tsîs ge ǁîsa Elobmîsa ge māte. Ēga ta ge Nederlanda ǃoa a ī o, ob ge Jehovab ǃoaba-aoba ǃgani (straati) ǃnâ ta Elobmîsa ra khomaisa ge mû. Tsîb ge ǁîba ge hui te î ta ǃnāsase ǁkhāǁkhāsen. Sao rase ta ge Dublina ǃoa ge ī Irelandi ǃnâ. Tsî Jehovab ǃoaba-aon di ǁnâub bēros tawa ge sī. Tsî ta ge dao-ams tawa ge ǃgubu-am. ǁNāpa ta ge Arthur Matthewsi ǀkha ge ǀhao, gā-ai tsî ǃgâi ǂansa ge ūhâ i ǃgâsaba. ǁÎba ta ge ge ǂgan, îb tita Elobmîsa ǁkhāǁkhā tsîb ge î ti ge mî.

Kai ǁkhoaǂgaosib ǀkha ta ge ge ǁkhāǁkhāsen tsoatosa. Tsî ta ge turab ǀkha Jehovab ǃoaba-aon xa māǂuihe hâ ǂkhanide ge khomai. Elobmîs tsîna ta ge gere khomai. Kaise ta ge ge ǁkhoaxabahe i. ǀHaohâb ǀhaodi tawa ta ge ge mû, ǀgôaron ge gā-ai khoen ǂgui kuriga gere dîsen dîdi ǃereamte ǂan isa aiǁgause: ‘Tae-i ǃaroma i ǂkhabadība hâ? Hama a Elo? Mâpa da ra ī ǁō da ga o?’ Ti ǀhōsan hoan ge ge Jehovab ǃoaba-ao-i. Nēs ge ge supu-i ǀgui khoe-i tsîna ta ge nē ǃhūb ǃnâ ǂan tama hâ i amaga. ǁÎn ge ge huite Jehovaba ǀnam tsoatsoasa. Tsî ǁîb di ǂâisa dī ǂgaos ǀkha.

Tita ge 1972ǁî kuri ge ǁāǁnâhe. Kurib khaoǃgâ ta ge ǁnaetisa Aimâba-aose ge ǃoaba tsoatsoa. Tsî ta ge Newry di ǀonhâ ǂkhari ǀhaohâba ǃoa ge doe hîna Irelandi Noordes ǃnâ hâba. Tsî ta ge ǃhomgu xōǀkhā hâ oms ǃnâ gere hâ. ǁNāpa di ge gomate ǀgūse ǃārob ǃnâ ge hâ i. Tsî ta ge ǃhoadi hîna ta gere aiǂhomite ǁîn aiǃâ mâ tsî gere mā. ǂŌrisasen ra ǃgâ khami î ge gere mûsen ǀgânan ra ǁgae hîna. ǀĀpemā te ǁoan ge ī xawen ge ge huite mati ta ǃgâ-aona ǃoa nî kōsa ǃhoate ta ra mā hîna. Tsî ta ge 1974ǁî kuri ǀō-aisa aimâba-aose ge ǁgaumâihe. Tsî Nigel Pitt di ǀonhâ ǃgâsab ǀkha ǀguiba gere sîsen. Hîna ge ti ûi kurigu ǃnâ ǀhōsa îba.

ǁNā ǁaeb ǃnâ î ge Irelandi Noordes ǃnâ “kai ǂkhabadība” ge hâ i. ǀNî khoen ge Irelandi Noordesa, “ǃhūb bomdi tsî ǁkhadi xa ǀoahâb” di gere ǂgai. Hoaǁae da ge ǃgângu ǃnâ ra ǃkham khoen, ǂnoa-e hâ khoen. Tsî audo di hîna ge bomdi xa ǃaromhase gere ǃhuin tsîna gere mû. ǃGomsin ge ǃnāsase polotiks tsî kerkhegu ǂgaeǂgui-aon xa gere ǃaromahe. Xawe î ge Protestantnan tsî Katolikan tsîna ge mûǂan Jehovab ǃoaba-aon ǀkhā-e ǁhûi tamasa polotiks xūn ǃnâ. ǁNā-amaga da ge ǃnorasase ge aoǁnâ ǁkhā i. Oms khoen ge ǃnāsa ǁaeba ge ǂan i, mâǁae tsî mâpa i ǂkhabadība nî hâsa. Tsîn ge gere ǃkhâikhomda î da ǁnāpaxū ǂgōsen ǁkhā.

Xawe î ge noxoba ǁkhōǁkhōsa mâsiga ge hâ i. ǀGui tsē-i ge tita tsî Denis Carrigan ti ǀonhâ ǃgâsab hîna ǁnaetisa aimâba-aose gere ǃoababa. Jehovaba ǃoaba-aon a ǀkhai ǃās ǃnâ sī gere aoǁnâ tsî ǁnāpa kham ge ǀgui ǃnās ǀguisa ge sī tsâ hâ-i. ǁNawas ge ǀnî tarekhoesa ge ǀgapiǂgā-am kham Englandi ǃkhē-ao solda kham a di. ǀNîsi kham ge Irelandi khoen ǃhoa ǀgauba ūhâ tama hâ i amaga. ǁNā ǀgapiǂgā-ams ge kaise ge ǃaokai kham. Soldagu ǀkhats ga khoexaǃnâ, ots ge ǂoaǃganhe tamas ka io ǁgoas ǃnâ ge ǂoahe ǁkhā i. ǃAuga kham ge ǃkhaib ǃnâ ǀguri bēba ǃnâu hâ hîna kham ge ra mû. Audos ge ǀgapiǂgā-am kham gere tarekhoes ra sîsen ǃkhais tawa ge sī. ǁÎs ge ǂoaxa tsî 2 khoekha ǀkha gere ǃhoa hîna ge audos ǃnâ ǂnôa ī kha. Tsîs ge sîkhama ǃoa ge ǁnae âi rase. ǁÎkha ge ǃnari ǀkhī tsî bēb di ǀapeǁguib xa dîde ge dîkham. Bēb ge a hā, o kha ge bēb di ǃnari-aob ǀkha ge ǃhoa. Sîkham ge ǁîgu gere ǃhoa xūna ge ǁnâu ǁoa i. ǀNîhâ khoen tsîn ge bēb ǃnâ ǀkhai-i amaga kham ge ge ǂgom, ǀape-i go dīhesa îkham sī ǃās ǃauga tsûtsûhe. Xawe ǁnāti î ge ī tama ge hâ i. Bēba xu ta ra ǁnôa khami ta ge ǃnari-aoba ge dî: “ǁNā mā khoega sîkham xa go dî?” ǁÎb ge ge ǃeream: “Ham go asa ta ge a ǂan tsî ta ge ǁnāsa ǁîkha ge mîba.” Tsîb ge ge ǀaro: “Tā ǂaiǂhansen, ǃnorasa go ge a.”

Tsî 1976ǁî kuri, Dublins ǃnâ ta gea kai ǀhaos tawa Pauline Lomax hîna ge ǀō-aisa aimâba-ao is ǀkha ge ǀhao. ǁÎs ge Englanda xu ge sari hâ i. Nēs ge ǂgomǂgomsa, ǃgamǃgamsenxa tsî ge ǀnamǀnamsa ǃgâsa i. ǁÎs tsî ǁîs ǃgâsab Ray tsîn ge amaba ǁîra ûib hoaba ge ǂan-i. Kurib khaoǃgâm ge Paulin hama ge ǃgame. Tsîm ge Irelandi noordes, Ballymenas ǃnâ ǀō-aisa aimâba-aon sîsenni ǀkha ge aiǃgû.

ǁAerobam ge ǃnarimâra sîsen-ē gere dī. Tsî sida ǃgâsan hîna ge Belfast, Londonderris tsî ǀnîhâ ǁkhōǁkhōsa ǃnādi ǃnâ hâ îna gere hui. Sîm ge ǃgâsan di ǂgoms xa ge tsâǀkhāhe hîna ge ǁîn ǂgaogu ǃnâ ǃgamse hâ-i ǂgomdi ǁkhāǁkhādi, ǃhaoǀgoras tsî ǃhuigub tsîna a ǁnāxuna în Jehovaba ǃoaba ǁkhā. ǁÎb ge amase ǀkhae nî tsî ra ǁkhauba nî.

Irelandi ǃnâ ta ge 10 kuriga ge ǁan hâ i. Tsîm ge 1981ǁî kuri Gilead skola ǃoa ge ǁkhauhe îm 72ǁî klasa ǁhao ǃnâ. ǁNāpam ge toas khaoǃgâm ge Afrikaba ǃoa ge sîhe, tsîm ge Sierra Leona ǃoa ge ǁgaumâihe.

SIERRA LEONES—ǃGÂSAN ǂGOMS ǀGÂSAN GE I XAWE

Sîsaben di oms ǃnâm ge 11 ǀō-aisa ǃgâsan ǀkha ǀguiba gere hâ. Sîm ge ǀgui kombuis, 3 ǂkhari-omdi tsî ǀnî xūn om ǃnâ ge hâ în tsîna ǃgâsan ǀkha gere ǀgoragu. Oms di krax-i ge ǃâubasen tama da hâ ǁaeb ai hoaǁae gere ǁnôa. Durudi ge oms di daks ǃnâ ge ǁan hâ i tsî î ge kobra ǀaona oms ǃnāga gere hâ.

ǁAn ǀgaub ge ǃgomro i xawe î ge aoǁnâ sîsenn-e kaise ge ǃgâiaǂgaoxa i. Khoen ge Elobmîsa ge ǃgôa hâ-i tsî ǃgaoǃgâxase gere ǃgâ. ǂGuin ge Elobmîsa ǁkhāǁkhāsen tsî amaba ge ūǃoa. ǃĀs di ǁanǂgāsaben ge tita “ǃGôahesab Robert” tsî Paulinesa “ǃGôahesas Roberts” ti gere ǂgai. ǁAerob khaoǃgâ ta ge ǃnāsa ǁaeba ǁnâub bēros tawa gere sîsen tsî ǀorose aoǁnâ sîsenni ǃnâ gere ǂoa. Tsîn ge khoena Paulinesa “ǃGôahesas Pauline” ti ǂgai tsoatsoa. Titan ge “ǃGôahesab Pauline” ti ge ǂgai tsoatsoa. Tsîs ge Paulinesa kaise ǁnās xa ge ǃgâibahe i.

ǂGui ǃgâsan ge ge ǀgâsa i xaweb ge Jehovaba hoaǁae ǁîn ǂhâsiga gere kōǃgâ. ǀNî ǁaeb ai buruburuxa ǀgaub ǃnâ. (Mat. 6:33) ǀNî aiǁgaus xa ta gere ǂâihō. ǀGui ǃgâsas ge ǂâusa mariros ǀguisa ge ūhâ i, ǂû-e ǁamasa ǁîs tsî ǁîs ǀgôan ǃaroma. Xawes ge hoa marisa ǀaesen ge hâ-i ǃgâsab hîna ge mari-e ūhâ tama hâ îba ge mā, îb Malarias di sōǀôa-e ǁamabasen. Xawe ǁnā tsēs ai ēgas ge ǀgui kaikhoesa ǃâubasen-e tamase ǃgâsas tawa ge sī. Tsî ǃgâsasa ge matare îs ǀûna dīhe ǁkhā. ǁNāti i ǂgui mâsigu ge ge hâ i.

NIGERIAB—ǀASA ǁNAETIGA ǁKHĀǁKHĀSENS

Sierra Leones ǃnâm ge 9 kuriga ge hâ i. ǁNāpaxūm ge Nigeriab Betelsa ǃoa ge sîhe. Nēsîm ge kai ǁnâub beros ǃnâ ge hâ i. Sierra Leones ǃnâ ta gere dī sîsen-i ǀgui-e ta ge gere dī. Xawe Paulines ǃaroma î ge kai tsî ǃgom ǀkharaǀkharana ge hâ. ǁÎs ge 130 īrga mâǁkhâb hoaba aoǁnâ sîsenni ǃnâ gere dī. Tsîs ge ǃgâi Elobmîs ǁkhāǁkhāde ge ūhâ i. Xawes ge nēsi ǂom sîsenni departements ǃnâ ge ǁgaumâihe. Tsîs ge mâ tsēs hoasa doa tsî ǁai hâ sarana ra gere ǂom. Nē ǀkharaǀkharan ge ǁaeba ge ū xawes ge ge mûǂan, naun ǂgaob ǃgamseba xu ǁîs ra dī sîsen-e ra ǃgôaǃgâsa. Tsîs ge nē ǃēsa sîsen-ū tsî Betels ǃnâ hâ ǃgâsana gere ǂkhâǃnâ.

Nigeriab di ǁnaetigu ge ge ǀasaba mi i tsîm ge ǂgui xūna nî ǁkhāǁkhāsens ge ge ī. ǀGui tsēb ge ǃgâsaba ǀasase ge Betelsa ǃoa a doe ǀkhī ǃgâsasa ti bēros tawa ge sī-ū. Tsî ǁîsa tita ai ge mâi-aiǃâ. Ti ǃomma ta ge ge ǀkhōǂui, î ta ǁîsa tawede hînas ge nē ǃgâsasa ti ǂaidi tawa ge ǃhon. Kaise ta ge ge buru. Tsî ta ge ǃkhaese 2 xoara xa ge ǂâi tsoatsoa, ǃNaeǃkhaidi 10:25, 26 tsî ǂHaiǂhais 19:10 tsîna. ǂHâ ta ge gere, ‘ǁîsa ta nî mîba îs tā ti dī?’ Xawe ta ge ge ǂâi, ǁîs ge Betelsa ai ge ūǃoahe tsîs ge Elobmîs tsoatsoate a ǂan.

Kaise ta ge ge tao nē ǁgamǀhaos ǃnâ. Tsî ta ge ēga nēs xa ôaǃnâsa ge dī. ǁKhāǁkhāsen ta ge ge nē ǃgâsas ge ǁîs di ǃhaos di ǁnaetigu ǃoagu gere tānîsensa. Tsîs ge nēsa noxoba ǁîn ǃhūb ǃnâ gere dīhesa. Aorekhoegu tsîn ge di gere ǃhon. ǁNāb ge ǃgôasib gere ǁgauhe ǀgauba. Tsî ge ǀgoreǀî ǀgau tama hâ i, ǁnāti i aiǁgaudi tsîn ge Elobmîs ǃnâ hâ. (1Sam. 24:8) Kaise ta ge ge gangan ǀgūǃnâsib ǃnâ ta ge xū-e mî tama hâ isa hîna ga ti ǃgâsasa taotaohâ-e.

Nigeriab ǂgui ǃgâsanam ge ge ǀhao-ū hîna ge kurina ǂoaǂamsa ǂgomǂgomsasiba gere ǁgauna. Isaiah Adagbonab aiǁgaus xa ǂâi re.b ǁÎb ge ǂkhamkhoeb ase amaba ge ǁkhāǁkhāsen. Xaweb ge khōb ǀaeba (ǃomamaxa ǀaeb) ge hōǃâ-e. ǁÎb ge nē ǁōsa ge ūhâ i khoen ra ǁan ǃkhaiba ǃoa ge sîhe tsî ǁîb ǀguib ge ǁnāpa Jehovaba gere ǃoaba. Mâǃoaheb gere xaweb ge 30 xa a ǃnāsa ǃomamaxa ǁōsa ūhâ khoena ge hui în amaba ūǃoa. Tsî î ge ǁnāpa ǀhaohâba ge tsoatsoahe.

KENIAB—ǃGÂSAN DI ǃNŪǃNÂXASIB TITA !OAGU

Sîm ge 1996ǁî kuri, Keniab ǁnâub berosa ǃoa ge sîhe. Nēs ge ge ti ǂguro ǃnā-i ǁaerob khaoǃâ ǁkhawa oaǀkhīsa. Betels aim ge gere hâ. ǁNāpa î ge ǂgui ǁaruna (ǀnōran) ge hâ i. ǃGâsadi hîna ge hai ǂûna tani hâ îde xū gu ge gere “ǃnari.” ǀGuitsēs ge Betels ai ra hâ ǃgâsasa, ǁîs kamers di venstersa ǁkhowamsase ge xū. Kamers ǃnâs ge oaǀkhī, os ge ǂgui ǁarun ǀkha ge ǀhao ǁîs ǂûnan ra ǂû hîna. ǁÎs ge ǃau tsî ge ǃkhoeǂoa. Tsî gu ge ǁaruga ǃhuri tsî ǁîgu tsîna venstersa xu ge uri.

Tita tsî Paluines tsîn ge Swahili gowaba ra ǃhoa khoen ǀhaohâba ǃoa ge ǁgaumâihe. ǁAerob khaoǃgâ ta ge ge ǁgaumâihe î ta ǀHaohâb Elobmîs ǁkhāǁkhāsa dī. Xawe ge hâ i ǃkhais ge Swahili gowaba ta ge ǃgâise ge ǃhoa tama hâ i. ǁKhāǁkhāǃâsa ta ge ǁaeb aiǃâ gere khomai tsî ta ge ǁnās ǀkha dîde ge khomai ǁkhā i. Xawe î ge ǃgâ-aon ǃereamde aiǂhomisen ta hâ ǀgauba xu gere ǀkhara, o ta ge xū-e ge ǁnâuǃā tama hâ i. Kaise î ge ǃgâsan ǃaroma ge ǃoaxa i. Kaise ta ge ge ǃgâibahe i, ǁîn ge ǃnūǃnâxasib tsî ǃgamǃgamsenxasib ǀkha nēsa gere ūǃoasa.

AMERIKAB—ǃGÂSAN ǂGOMS ǃKHŪN GE HÂ I XAWE

Hoa kuribam ge Keniab ǃnâ ge hâ tama hâ i. Tsîm ge 1997ǁî kuri, Brooklyn New Yorki (Amerikab) betelsa ǃoa ge ǁkhauhe. Nēsîm ge ǃkhū hâ ǃhūb ǂgui xūnan ge khoena ūhâb ǃnâ ra hâ. Hîna ge ǂgui ǃgomsina ūhâ ǁkhā îba. (ǂKhm. 30:8, 9) Xawe ǁnāti i ǃhūgu ǃnâs tsînan ge ǃgâsana ǀgaisa ǂgomsa ra ǁgau. Sida ǃgâsan ge ǁîn ǁaeb tsî ūn hâ xūn tsîna gere sîsenū în Jehovab di ǀapeǂhomis sîsenga ǂkhâǃnâ ǃhūsiba ǀhaoǀhaos xa.

ǃKharuge kurigu ǃnâm ge ǃgâsan di ǂgomsa ge mû, ǃkharagagu mâsigu ǃnâ. Irelandi ǃnâm ge ǃgâsan di ǂgomsa ge mû, ǂkhabadīb ge hâ i xawe. Afrikab ǃnâm ge ǃgâsan di ǂgomsa ge mû, ǀgâsa tsîn ge ǀguri gere hâ i xawe. Amerikab ǃnâm ge ǃgâsan di ǂgomsa ge mû, ǃkhūn ge hâ i xawe. Jehovab ge ra ǂkhî mûb ga o, matin ǁîb khoena ǀnamma ra ǁgaubisa ǃkharagagu mâsigan ga ūhâ xawe.

Kurin ge ǃkhaese ge ǃkharu, ‘ǂommasins-nali a ǃhae’ khami. (Job. 7:6) Nēsim ge ǀnî ǃgâsan ǀkha ra sîsen Warwick, Amerikab ǃnâ. Tsîm ge ǂkhîb ǃnâ ǀnamgu ǃgâsan ǀkha ǀguiba ra ǃoaba. Kaisem ge ra ǃgâiaǂgao tsî ra dītsâ sida Gao-aob Jesub Xristuba ǂkhâǃnâsa. Hîna ǀgūǁaeb ǃnâ ǁîb di ǂgomǂgomsana nî mādawamba.—Mat. 25:34.