ǁKhoaǂgaoxa re Sadoki khami

1-2. Sadoka ge ham ī? (1 Kroniks 12:​22, 26-28)

MÛNAN-Ai re 340 000 xa a ǃnāsa khoegu ǀguiba mâ ǀgauba. ǁÎgu ge ǀhao hâ î gu Davida Israeli gao-aob ase ǁgaumâi. Nē khoegu ge ǃnona tsēde Hebrons ǂnamipe ge hâ i. ǁÎgu ge âi, ǁgam tsî koas ǁnaetsanade Jehovaba gere ǁnaeba. (1Kro. 12:39) Nē khoegu ǁaegu i ge Sadok ti ǀon hâ ǂkhamkhoeba ge hâ i. ǁÎb ǁnāba hâsab ge ǂgui khoen tsîna ge ǀū i xaweb ge Jehovaba ǁîba ge ǃgaoǃgâ. Tsî ge ǂhâba hâ i, î da Sadoki ge ǁnāba hâ isa ǂan. (Khomai re 1 Kroniks 12:​22, 26-28 sa.) Sadoka ge ham i?

² Sadoki ge ge Prietser i tsî ǀgapi priesteri Abiatari ǀkha ǀguiba gere sîsen. Jehovab ge Sadoka gā-aisib tsî ǁîb ǂâisa ǁnâuǃās di ǁkhāsib tsîna ge mā. (2Sam. 15:27) Khoen ge gā-ai ǀapemāden gere ǂhâba o Sadoka ǃoa gere ī. Nē aob ge kaise ge ǁkhoaǂgaoxa ī. Nē ǁkhāǁkhāǃâs ǃnâ da ge Sadoki ge ǁgau ǁkhoaǂgaosib xa nî ǁkhāǁkhāsen.

3. (a) Jehovab ǃoaba-aona tae-i ǃaroma ǁkhoaǂgaosiba ǂhâhâ? (b) Tae-e da nē ǁkhāǁkhāǃâs ǃnâ nî ǃhoaǃgao?

³ Nē ǀuniga tsēdi ǃnâb ge ǁGâuaba ra dītsâ, îb sida Jehovab ǃnâ ūhâ ǂgomsa khôa. (1Pet. 5:8) ǁNā-amaga da ge ǁkhoaǂgaosiba ǂhâhâ î da mâǀgai Jehovab, ǁGâuab tsî ǁîb eloxoresa ǃhūbaiba nî dīkākās kōse. (Psa. 31:24) Hā re î da ǃnona ǀgauga ǃhoaǃgao mati da Sadoki di ǁkhoaǂgaosiba a ǁgae ǁkhā ǀgaub xa.

ELOB GAOSIBA ǂKHÂǃNÂ

4. Tae-i ǃaroman Jehovab khoena ǁkhoaǂgaosiba ǂhâhâ ǁîb Gaosiba ǂkhâǃnâs ǃaroma? (Ai-īsiba mû re.)

⁴ Jehovab khoen ase da ge ǂgaoba xu ǁîb Gaosiba ra ǂkhâǃnâ. Xawe da ge ǀnî ǁaegu ai ǁkhoaǂgaosiba ǂhâhâ ǁnāsa dīs ǃaroma. (Mat. 6:33) Aiǁgause, nē eloxoresa ǃhūbaib ǃnâ da ge ǁkhoaǂgaosiba ǂhâhâ Jehovab ǂgaoǀkhādi ǃoagu ûisa. Tsî da ga Gaosib ǃgâiǂhôasa aoǁnâ ǂgao o. (1Tes. 2:2) Nē da ûiǃnâ hâ ǃhūbaib ǃnâ i ge ǂgīǂgōsi ǀgoras tsîna hâ. ǁNā-amaga da ge ǁkhoaǂgaosiba ǂhâhâ î da tā nē xūn ǃnâ ǃâ-e ūhâ. (Jhn. 18:36) Jehovab ǃoaba-aon ge ǂgui ǃhūgu ǃnâ marisi ǃgomsiga ra hōǃâ, ǂgīǂgōsi xūn ǃnân ǃâ tama ǃkhais ǃaroma. ǂNauhe tsîn ge ǃkhōsis ǃnâ ra ǂgāhe.

5. Sadoka tae-i ǃaroma ǁkhoaǂgaosiba ge ǂhâhâ i îb Davida mâxoǀkhā?

⁵ Sadoki ge Hebronsa ǃoa ge ī tama hâ i, îb Davidi ǂgaeǂguisa sī tsēdi. ǁÎb ge ǃkham-ū xūna ge ūsao tsî ge ǂhumisa i ǃkhams ǃgao. (1Kro. 12:38) ǁÎb ge ge ǂhumisa i Davida ǃkham huisa tsî Israelǁaesa khākhoena xu ǁkhaubasa. Sadoki ge soldab ase ǃgâi ǂansa ge ūhâ tama hâ i xaweb ge ǁîba kaise ge ǁkhoaǂgao i.

6. Davida mati ǃgâi aiǁgausa Sadoka ge ǁgau ǁkhoaǂgaosib xa? (Psalmdi 138:3)

⁶ Sadoka ǁkhoaǂgaosiba mâpa ge ǁkhāǁkhāsen? ǁÎb ge ǀgaisa tsî ge ǁkhoaǂgao-i khoegu ǂnamipe gere hâ tsîb ge ǁîgu di aiǁgaude xu ge ǁkhāǁkhāsen. Aiǁgause, Davidi ge ǁkhoaǂgaoxase “Israelǁîna torob ǃnâ gere ǂgaeǂgui.” Tsîs ge ǁaesa nēs xa ǁîba māsenxase gere mâxōǀkhā. (1Kro. 11:​1, 2) Davidi ge hoaǁae Jehovab ai gere ǂgomaiǂnûi, khākhoen ǃoagub gere ǃkham o. (Psa. 28:7; khomai re Psalmdi 138:3 sa.) Sadoki ge ǀnî hâ ǁkhoaǂgaoxa khoega xus tsîna ge ǁkhāǁkhāsen. Aiǁgause Jojadab tsî ǁîb ǀgôab Benajab tsî nau nî hâ 22 danaǂgaeǂgui-aogu hîna ge Davida gere mâxōǀkhā ga xus tsîna. (1Kro. 11:​22-25; 12:​26-28) Nē khoegu hoa gu ge ge mîǁgui Davida gu gao-aob ase mâxōǀkhā tsî nî ǁkhaubasa.

7. (a) Mâ aiǁgaudi ǁkhoaǂgaosib xa da ǁkhāǁkhāsen ǁkhā sida ǁaeb ǃnâ? (b) Tae-e da ǃgâsab Nsilub aiǁgausa xu ra ǁkhāǁkhāsen vidiob ǃnâ da go mû khami?

⁷ ǀGaib tsî ǁkhoaǂgaosib tsîna da ge ra hō, naun Jehovab di Gaosiba ge ǂgomǂgomsase ǂkhâǃnân di aiǁgaus xa da ga ǂâiǃgâ o. Sida Gao-aob, Jesub Xristub ge ǀgaisase Satanni ǂgīǂgōsi ǁaxasiga ge mâǃoa ǃhūbaib aib ge hâ io. (Mat. 4:​8-11; Jhn. 6:​14, 15) ǁÎb ge hoaǁae Jehovab ai ge ǂgomaiǂnûi hâ i îb ǂhâbab ge hâ i ǀgaiba māhe tsî ǂhanu xūna dī. Sida ǁaeb ǃnâ da ge ǂgui aiǁgaude ūhâ, ǂkhamkhoen toroba ǃkham ǂgao taman tamas ka io ǂgīǂgōsi ǁaxasigu ǃnâ ǁhao tamana. ǁAeba ǁamaǂûi tsî ǁîn aiǁgaudi xa jw.orgs ai khomai.a

SADU ǃGÂSANA HUI

8. Mâ ǁaegu ǀhaohâb ǃûi-aoga ǁkhoaǂgaosiba ǂhâhâ î gu ǃgâsana hui?

⁸ Jehovab khoen ge hui gu sa a ǀnam. (2Kor. 8:4) Ama as ge ǀnî ǁaegu ai da ge ǁkhoaǂgaosiba ǂhâhâ nauna huisa. Aiǁgaus ase torob ga tsoatsoa, o i ge ǁnāba hâ ǀhaohâb ǃûi-aoga ra mûǂan ǃgâsan ǂkhâǃnâhesa ǂhâhâsa. Nē ǃgâsan ge huiba ǂhâhâ în Elobmîs tsî Elobmîs ǂkhanina hō tsî ǂûn, saran tsî hâ ǃkhais tsîna. ǀHaohâb ǃûi-aogu ge ǁîgu ǃgâsana a ǀnam ǁnās ǃaroma gu ge ǂhân hâ xūna ra mā nî, ǁîgu ûib ga ǁkhōǁkhōsa mâsib ǃnâ hâ xawe. (Jhn. 15:​12, 13) ǁNāsa gu ga dī, o gu ge Sadoki ǁkhoaǂgaoxa aiǁgausa ra ǁgae.

9. 2 Samueli 15:​27-29 ǃoagub Davida tae-e Sadoka ge dī kai? (Ai-īsiba mû re.)

⁹ Davidi ûib ge ǁkhōǁkhōsa mâsib ǃnâ ge hâ i. Davidi ǀgôab Absalommi ge ǁîba gere ǃgam ǂgao, îb ǁîba gao-ao kai. (2Sam. 15:​12, 13) ǃHaeseb ge Davida Jerusalemsa xu ge ǃkhoebē. ǁÎb ǃgāga ǃoab ge ge mî: “ǂHomisen, î ge Absalommi xa ge nî hāǃgâhes aiǃâ ǃhū.” (2Sam. 15:14) Jerusalemsa xu gu ra ǃkhoe hînab ge Davida ge mûǂan ǀgui khoe-i nî hâǃgausa, Jerusalems ǃnâ î-i Absalommi tae-e ra ǀapeǁguisa kō tsî ǁîba ǂanǂan. ǁNā-amagab ge Sadoki tsî nau pristergu tsîna Jerusalems ǃnâ ge ǁnāxu, î gu ǃkhē-aogu ase sîsen. (Khomai re 2 Samueli 15:​27-29 sa.) Nēsa gu ge ǃgaoǃgâxa tsî ǂanbasen nîse nî dī. Davidi ge mā gu sîsenni ge kaise ge ǁkhōǁkhōsa ī, ǂanǂûihe gu ga o gu nî ǃgamhe amaga. Absalommi ge ǂkhabaxa tsî ǁîb xa ǀgui gere ǂâi, ǁîb ǁgûbab ge ge gāxaǃnâ. ǂÂi re tae-eb ga Sadoki tsî ǁnā pristergu ǀkha dī hâsa ǂanǂûib ga hâ o, ǁîgu Davida ǁkhauba tsî ǃkhē-aogu ase ra sîsensa î gu ǁîb ra ǀape xūna kō.

10. Sadoki tsî naun tsîna mati Davidi ûiba ge sâu?

¹⁰ Davidi ge Sadoki tsî ǁîb nau ǂgomǂgomsa ǀhōsab Husiaba ge ǂgan îb ǀapes ǀkha hui bi. (2Sam. 15:​32-37) Husaib ge Absalommab ra ǂkhâǃnâ khami gere tanisen tsî ǁîba ge ǀapemā îb Davida ǁnāǂam. Xawes ge nēsa Davida ǁaeba ge mā îb aiǂhomisen nē ǁnāǂams ǃaroma. Saorase, Absalommi ge Husaib ǀapemāsa a ǃgâ ob ge Husaiba Sadoki tsî Abiatari tsîna tae-i ge īsa ge mîba. (2Sam. 17:​8-16) Tsî gu ge ge dītsâ Davidi Absalommi ǀapes xa nî ǁnâusa. (2Sam. 17:17) Jehovab huib ǀkha gu ge Sadoki tsî nau pristergu tsîna ǂhâǂhâsa ǃâ-e ge ǀhuru tsî Davidi ûiba ge sâu.—2Sam. 17:​21, 22.

11. Mati da Sadoki di ǁkhoaǂgaosiba a ǁgae ǁkhā ǃgâsana da ga hui ǁaeb ai?

¹¹ ǁKhōǁkhōsa ǁaeb ǃnâ sida ǃgâsana huis ǃgao i ga huiba ǂganhe, o da tae-e dī tsî ǁkhoaǂgaosiba ǁgau tsî ǁîna a hui ǁkhā? (1) Daoǁgausa sao. Nē ǁkhōǁkhōsa ǁaegu ǃnâ i ge kaise a ǂhâǂhâsa, î da ǁnâuǀnam nēs nî ǀguiǃnâxa kai da amaga. ǁNâub berosa xu ra hā daoǁgaude da ge nî ǁnâuǀnam. (Heb. 13:17) ǀHaohâb ǃûi-aogu ge ǁaeba xu ǁaeb ǀkha tsūkeǃgâb ga hâ, o nî saohe ǀapemāde nî kōǃgâ i gu ǂan tae-i nî dīhesa tsūkeǃgâb ga hā o. (1Kor. 14:​33, 40) (2) ǁKhoaǂgaoxa xawe ǂanbasen. (ǂKhm. 22:3) Sadu ǁnâuǃāba sîsenū re ǁkhā du as kōse dītsâ tsî ǁkhaubasen. (3) Jehovab ai ǂgomaiǂnûi. ǂÂis ǃnâ ūhâ Jehovab ge ǂhâba hâ î-i sats tsî ǃgâsan tsîna ǃnorasase hâ. ǁÎb ge ǃgâsana kōǃgâs ǀkha nî huitsi.

12-13. Tae-e du Viktori tsî Vitalib tsîn ǀkha ge ī xū-e xu ra ǁkhāǁkhāsen? (Ai-īsiba mû re.)

¹² ǃGaoǃgâ re Viktori tsî Vitalib tsîn di aiǁgausa, nē ǀgam ǀhaohâb ǃûi-aokha ge kaise ǃgarise ge sîsen îkha ǃgâsana Ukrainni ǃnâ ǂhân hâ xūna sī mā. Viktori ge ra mî: “Hoa ǃkhain tawa kham ge ǂûna gere ôa, ǂûna kham da ôa hîna kham ge gere ǁnâu khoen ra ǂnôagu ǀgauba ǃabudi ǀkha. ǀGui ǃgâsab ge ǁîb storsa xu ǂûna māsenxa mās ase ǃgâsana ge mā. Nē mās ǃnâ-ūn ge ǃgâsana ǁaerob ǀgaiba ǂhân ge hâ i ǂûna ge ūhâ i. ǂÛna kham lorib ai ra ǃnao hînas ge bomsa 20 meterna sīkham ǀgūse ge ǁnā. Tsēs ra ī khami da ge Jehovaba gere ǀkhoma îb ǁkhoaǂgaosiba māte î da aiǃgû tsî ǃgâsana hui ǁkhā.”

¹³ Vitalib ge ra mî: “Kaise kham ge ǁkhoaǂgaosiba ge ǂhâ hâ i. ǂGuro ta ge 12 īrga ge ǃnari, nē daob hoab ai ta ge Jehovaba ǃoa gere ǀgore.” Vitalib ge ge ǁkhoaǂgaoxa i xaweb ge ǂanbasen hâse xūna gere dī. ǁÎb ge ra ǀaro: “Aiǃgû tsî ta ge Jehovab ai gā-aisib tsî ǃgamǃgamsenxasib tsîna ge ǂgān ǀgara. ǂHanub gere mā-am daogu ai ǀgui ta ge gere ǃnari. Ti ǂgoms ge ge ǀgaiǀgaihe mû ta ge o matin ǃgâsana ǀguiba ra sîsenǀhao ǀgausa. ǁÎn ge daob ǃnâ ge hâ i xūna ūbē tsî ǂûn, saran tsî ǂhâǂhâsa xūna ǀhaobe tsî lorib ai gere ǃnao. Viktori tsî tita tsînan ge ǂû-e mā tsî sâ ǃkhais tsîna gere aiǂhomiba.”

ǂGOMǂGOMSASE JEHOVAB ǃOAGU HÂ ǀGARA

14. ǀNam da a khoe-i ga Jehovaba ǃoaba ǀû, os nēsa mati ra tsâǀkhā da?

¹⁴ ǀGui xū-i hîna hoaǁae hoa da a ǃkhomba ǁkhā i ge, omaris ǁani-i tamas ka io ǀgū ǀhōsa i ga Jehovaba ǃoaba ǀû o. (Psa. 78:40; ǂKhm. 24:10) Nē khoe-ets kaise a ǀnam amaga i ge kaise ra ǃgom kai nēti ī mâsib ǃnâ mâǀgaisa. Sadoki di ǂgomǂgomsa aiǁgaus ge nî ǀgaiǀgai du.

15. Tae-i ǃaromab ge Sadoka ǁkhoaǂgaosiba ǂhâhâ i ǂgomǂgomsase Jehovab ǃoa-ai hâs ǃaroma? (1 Gao-aogu 1:​5-8.)

¹⁵ Sadoki ge ǂgomǂgomsase Jehovab ǃoa-ai ge hâ, ǁîb ǀgū ǀhōsab Abiatari ge Jehovaba a ǃoaba ǀû xawe. Nēs ge Davidi di ǂgaeǂguis ǀams ai ge ī. Davidi kaira tsî ra ǁō ǁaeb ǃnâ i ge ǁîb ǀgôab Adoniaba gao-aob ase gere mâisen ǂgao. Jehovab ge Salomoba gao-aob ase gere mâi ǂgao xawe. (1Kro. 22:​9, 10) Abiatari ge ge ǁhûi Adoniaba mâxōǀkhāsa. (Khomai re 1 Gao-aogu 1:​5-8 sa.) Nēsa dīs ǃnâ-ūb ge Abiataba Davidi ǃoagu ǀgui ǂgomǂgomsasiba ge khôa tama hâ i xawe Jehovab ǃoagus tsîna. Mûnan-ai re Sadoki ge tsûaǂgao hâ i ǀgauba. ǁÎb tsî Abiatari tsîn ge 40 kurigu xa ǃnāsase ǀguiba pristergu ase gere sîsen. (2Sam. 8:17) ǁÎkha ge ‘Elob arki’ tsîna ǀguiba tani tsâ hâ. (2Sam. 15:29) ǁÎkha ge ǀguiba Davida gere ǂkhâǃnâ ǁîn gao-aob ase tsî ǂgui ǀgaugu ǃnâs tsîna Jehovab ǃoabasa gere ǂkhâǃnâ.—2Sam. 19:​11-14.

16. Tae-e Sadoka ge hui îb ǂgomǂgomsase hâ ǀgara?

¹⁶ Abiatari ge Jehovab ǃoa-ai ǂgomǂgomsase hâ tama i tsî Davida gaxaǃnâ, xaweb ge Sadoka aiǃgû tsî ǂgomǂgomsase Jehovab ǃoa-ai ge hâ. Davidi ge ge ǂan i hoaǁaeb Sadoka nî ǂgomǃgâsa. Adoniab di ǀapes ge a ǂhaiǂhaihe ob ge Davida, Sadoki, Natanni tsî Beniab tsîna ge ǂgomǃgâ ǁîgu Salomona gao-aob ase nî ǁgaumâisa. (1Gao. 1:​32-34) ǂGomǂgomsa ǃoaba-aogu Jehovab di gu aiǁgause, Natanni tsî ǀnî hâ gao-aogu Davida gere ǂkhâǃnâ gu ǀkhab ge hâ i amagab ge Sadoka ge ǀgaiǀgaihe. (1Gao. 1:​38, 39) Salomonni ge gao-ao kaib ge o, “Abiatari soas ǃnâ Sadoka pristerse ge mâi.”—1Gao. 2:35.

17. ǀNam du a khoe-i ga Jehovab ǃoagu ǂgomǂgomsa tama i o du mati Sadoki aiǁgausa a ǁgae ǁkhā?

¹⁷ Mati du Sadoka a ǁgae ǁkhā? Kaise du a ǀnam ǀgū khoe-i ga ǁhûi Jehovaba ǃoaba ǀûsa, o sadu mîǁguigu ǃnâ ǁgau re ǁhûi du ra sa Jehovab ǃoagu ǂgomǂgomsase hâsa. (Jos. 24:15) Jehovab ge ǀgaib tsî ǁkhoaǂgaosib tsîna nî mā du, î du ǂhanu xū-e dī. Jehovaba ǃoa ǀgore tsî ǁîb ǃoagu a ǂgomǂgomsa ǃgâsan ǀgūse hâ re. Jehovab ge sadu ǂgomǂgomsasiba kaise ra ǃgôaǃgâ tsî nî mādawa-am du.—2Sam. 22:26.

18. Tae-e du Markub tsî Sidses aiǁgausa xu ra ǁkhāǁkhāsen?

¹⁸ Markob tsî ǁîb taras Sidse ti ǀon hâs aiǁgausa ǃgaoǃgâ re. ǁÎra ǀgôara ge Jehovaba ge ǃoaba ǀû. Markob ge ra mî: “ǀGôan ra ǃnae tsēsa xuts ge ǁîna kaise ra ǀnam. ǁKhāts a-i hoa-e dītsâ tsîts ge ǁîna ǁgaiba xu ra ǁkhauba. Xawe i ga ǁî-e Jehovaba ǃoaba ǀû, os ge nēsa kaise ra tsûaǂgao kaitsi.” Markob ge aiǃgû tsî ra mî: “Jehovab ge hoaǁae ra hui da mâǀgaisa tsîb ge ra dītsâ îm ǂkhâǃnâgu ǁkhā. Tsûaǂgao ta ga ǁaeb ais ge ti tarasa ra ǁkhaeǂgaote tsî ra ǂkhâǃnâte î ta ǃgâi xū-e dī. Tsî ta ge tita tsîna ǁkhā-e ǁîsa ra dība.” Sidses ge ra ǀaro: “Sîm ge nēs ǃnâ ga mâǀgai hō tama hâ Jehovab ga ǀgaiba mā mî tama hâ o. Kaise ta ge ge tsûaǂgao hâ i tsî gere ǀhapiǂgā-amsen. Ti ǀgôara ge tita xa ǃaromahe hâse Jehovaba a ǃoaba ǀû khami ta ge gere tsâ tsî Jehovaba tsâ ta gere ǀgauba ge mîba. ǀNî ǃgâsas hîna ta ge ǂgui kuriga mû tama hâ is ge ǁnamǂgāte tsî ge mîbate: ‘ǂÂis ǃnâ ūhâ re, Sidse sas ge ǀhapixa tama hâ.’ Jehovab huib ǀkha ta ge aiǃgû tsî ǁîba ǃgâiaǂgaob ǀkha ra ǃoaba ǀgara.”

19. Tae-e du ra mîǁgui dī du nîse?

¹⁹ Jehovab ge ra ǂhâba în ǁîb ǃoaba-aona ǁkhoaǂgaoxase Sadoki khami hâ. (2Tim. 1:7) Xaweb ge ǂgao tama hâ în ǁîn ǀgaib ai ǂgomaiǂnûi. ǁÎb ge ǂhâba hâ î da ǁîb ai ǂgomǃgâsiba ūhâ. ǁNā-amaga ǁkhoaǂgaosiba ǂhâ hâ mâsigu ǃnâts ga hâ, o Jehovaba ǂgomǃgâ. ǂGomǃgâ ǁkhā du ge a ǁîb Sadoki ge ǁkhoaǂgao i khami sadu tsîna ǁkhoaǂgaosiba nî māsa.—1Pet. 5:10.