ǂHâǂhâsa xūn Israelǁî Gao-aoga xu da ra ǁkhāǁkhāsenan

1-2. Elobmîsa tae-e ra mîba da ǀnî gao-aogu Israels ǃnâ ge hâ i gu xa?

ELOBMÎS ge 40 xa ǃnāsa aogu xa ra mîba da gao-aogu ase gere ǂgaeǂguiga Israeli ǃnâ.a ǁNā ǃnaeǃkhaidi ge ǂhauǃnâse ra mîba da nē gao-aogu gere dī xūn xa. Aiǁgause ǃgâi gao-aogu tsîn ge ǁgai xūna gere dī. ǃGâi Gao-aob Davidi xa ǂâi re, Jehovab ge ǁîb xa ge mî: “Ti ǃgāb Davidi, tita ǂgomǂgomsase ǃoaba, ti mîmāde ǁnâuǀnam tsî ti mûǁae ǂhanun ǀguina gere dīb.” (1Gao. 14:8) Xaweb ge ǁîba ǃgamme hâ taras ǀkha ge ǀai tsî ǁîs ti ǃgamme aoba toroba ǃoa ge sî îb ǁnāba sī ǃgamhe.—2Sam. 11:​4, 14, 15.

² Elobmîs tsîn ge ǂgomǂgomsase ge Jehovab ǃoagu hâ tama i gao-aogu gere dī ǃgâi xūn xa ra mîba da. Rehabeammi xa ǂâiǃgâ re, Jehovab mûǁaeb ge “ǂkhawadīn ǀguina gere dī.” (2Kro. 12:14) Xaweb ge Rehabeammi tsîna ǃgâi xūna gere dī. Aiǁgauseb ge Jehovaba ge ǁnâuǀnam, Jehovab ge mîba bi o îb disi ǃhaodi Israelǁaes didi ǃoagu tā ǃkham tsî ǁîna mā-am in ǀnî hâ gao-aoba ǁhûibasen. Tsîb ge ǁîb tsîna ǂgui ǃāde ǁîb ǁaeb ǃnâ ge hâ i te ge ǀgaiǀgai. Nēs ge Elob khoena ǁîn khākhoena xu ge ǁkhauba.—1Gao. 12:​21-24; 2Kro. 11:​5-12.

3. Mâ ǂhâǂhâsa dîsa hâ tsî tae-e da nē ǁkhāǁkhāǃâs ǃnâ nî ǃhoagao?

³ Kaise i ge a ǂhâǂhâsa sao ra dîsa ǁnâuǃāsa. Israeǁaes di gao-aogu ge ǃgâin tsî tsūna gere dī. Xaweb ge Jehovaba mati gere mîǁgui nē gao-aob a ǂhanu-ai khaisa? ǁNā dîs ǃereams ge nî hui da î da ǁnâuǃā Jehovab tae-e sida ǃnâ ra ôasa. ǃNona xūn xa da ge nî ǁkhāǁkhāsen Jehovab gere ǂâiǃgâna, ǁîba gere huina mîǁguisa gao-aob a ǃgâi tamas ka io ǁgaisa. ǂGurose, gao-aoba ǁîb ǂgaob hoab ǀkha Jehovaba ge ǀnam i? ǀGamǁîse, gao-aoba amabes ǃnâ gere ǃhobasen tamas ka io gere ǃhausen ǁgai xu-eb gere dī o? Tsî ǃnonaǁîse gao-aoba aiǃgû tsî Jehovaba ǂhanu ǀgaub ǃnâ gere ǃoaba?

JEHOVABA SADU ǂGAOB HOAB ǀKHĀ ǀNAM

4. Mâ ǃkharagagusiba ge hâ i ǂgomǂgomsa gao-aogu tsî ǂgomǂgomsa tama gao-aogu ǁaegu?

⁴ Jehovaba gere ǂkhîǂkhî gaogu ge ǁîba ǂgaob hoab ǀkha gere ǃoaba.b ǃGâi Gao-aob Josafati ge Jehovaba ǁîb di ǂgaob hoab ǀkha gere ǃoaba. (2Kro. 22:9) Elobmîs ge Josiab xa neti ra mî: ‘ǁÎb khami ī gao-aob ge ǁîb aiǃâ ge hâ tama hâ i, ǁîb di hoaraga ǂgaob, ǂâis tsî ǀgaib ǀkha ǃKhūba gere ǃoababa.’ (2Gao. 23:25) O Salomob hîna ge ega ǁgai xūna gere dīb? ǁÎb ge Jehovaba ǂgomǂgomsase ge ǃoaba tama hâ i. (1Gao. 11:4) Tsî ǀnî hâ gao-aob ǂgomǂgomsa tama ge hâ îb Abiaba, Elobmîs ge ǁîb xa ra mî, ǁîb ge “ǂgaob hoab ǀkha ǁîb di Eloba ge ǃoaba tama hâ i.”—1Gao. 15:3.

5. ǁGuiǃā re Jehovaba ǂgaob hoab ǀkha ǃoabas tae-e ra ǂâibasensa.

⁵ Jehovaba ǂgaob hoab ǀkha ǃoabasa tae-e ra ǂâibasen? Jehovaba ǂgaob hoab ǀkha ra ǃoaba khoe-i ge ǁîba i ǃgam ǀnamma ūba hâ tsî ra ǃgôa amaga ra ǃoaba. ǁÎ-i ge Jehovaba ǁnā ǃgam ǀnammi tsî ǃgôasiba ǁî-i ûi kurigu hoaga ra ūhâba.

6. Mati da Jehovaba ǂgaob hoab ǀkha a ǃoaba ǀgara ǁkhā? (ǂKhoamîdi 4:23; Mateub 5:​29, 30)

⁶ Mati da ǂgomǂgomsa gao-aogu Jehovaba ǂgaob hoab ǀkha gere ǃoaba ga ǁgae ǁkhā? Xūna xu da ge nî ǂgōsen ǃaroma ǁkhā a na î da Jehovaba da ūba hâ ǀnamma tā ǂkhabu kai. Aiǁgause da ge nî ǂanbasen, taena kō tsî da ra dīsa ǁkhoaxa ǁaeba da ga ūhâ o. ǂAnbasen da ge nî tsî da ge ǃgâi ǀhōsana nî ǁhûibasen î da tā ǂâi tsoatsoa mari-i tamas ka io ǃkhūsisa ūhâs ǂhâǂhâsa ti ûib ǃnâ. Mûǂan da ga o xūn hâsa Jehovaba da ūba hâ ǀnamma ra ǂkhabu kaina, o da ge ǃkhae ǁaeb ǃnâ ǃgarise sîsen tsî ǀkharaǀkharana nî dī. În nē xūna tā Jehovaba da ūba hâ ǀnamma ǂoaǃnâ kai da.—Khomai re ǂKhoamîdi 4:23; Mateub 5:​29, 30 sa.

7. Tae-i ǃaroma i a ǂhâǂhâsa î da ǂgōsen sida Jehovaba ūba hâ ǀnamma nî ǂkhabu kai xūna xu?

⁷ Tā da ge nî mā-am îb sida ǂgaoba ǀgorasen. ǂAnbasen da ge nî î da tā ǂâi Jehovaba da ra ǃoaba ǃkhais ǃaroma i ǁgai xūna sida tsâǀkhā tidesa. Aiǁgause du ge ǀnîsi kaise ǃkhai tsî ǂoaxa tsēs ai ǃauga hâ. Oms ai du ra sī khami du ge ǀgamma ra hau masinsa ra ǃam. Nē ǀgamma hui-i nî dao-amsa du ga ǁkhobamsase ǁnāxū o? ǃKhai ǂoab ge omsa ǃkhaese nî ǃkhaiǃkhai. Tae-e da ra mî ǂgao? Nēsa da ge Jehovab ǀkha da ūhâ ǀhōsagusis ǀkha a ǀgōpeǀnō ǁkhā. Jehovab ǃoa ǀgūǀgū da ǁkhā xūn xa da ge ǃnāsa-e nî dī. ǃKhai ǂoaba da oms ǃnâ ǂgâxasa mā-am tide khami da ge tā, nî mā-am î-i ǃhūbaib xūna Jehovab ǀkha da ūhâ ǀhōsagusisa ǂkhabu kai tsî sida ǂgaoga tā ǀgora.—Efe. 2:2.

ǃHOBASEN RE

8-9. Gao-aob Davib tsî Hiskiab tsîna mati ge tanisen ǁnamahe kha ge o? (Tsoatsoas ai hâ ai-īsiba mû re.)

⁸ ǂGuro xoaǀgoras ǃnâ da go khomai khamib ge Gao-aob Davida ǀgaisa ǁore-e ge dī. Xaweb ge kēbo-aob Natana a mîba bi o, Jehovab ra tsâ ǀgausa ǁîb ǁoren xa, ob ge Davida ǃgamǃgamsenxase ge ǃhobasen. (2Sam. 12:13) Davidi ge Psalmdi 51 ǃnâ a xoa mîdi ge ra ǁgau, amabes ǃnâb ge ǃhausensa dīb ge ǁoren ǃaroma. Davidi ge ǃhausen nî ra khami ǀgui ge tanisen tama hâ i, îb Natana gāxaǃnâ tsî tā ǁkharahe xaweb ge amabes ǃnâ ge ǃhausen hâ i. Davidi mîdi Psalmdi 51 ǃnâ hâ ti ge ra ǁgau, amabes ǃnâb ǃgamse ge ǃhausen hâ isa ǁîb ge dī ǁoren ǃaroma.—Psa. 51:​3, 4, 17.

⁹ Gao-aob Hiskiab tsîn ge Jehovab ǃoa-ai ge ǁore. Elobmîs ge ra mî, ǁîb ge “kaise ǀgapiǂâixa tsî ǃKhūb ge dība bi ǃgâidīb ǂama gangan tama ge i, ob ge ǃKhūba Judab tsî Jerusalems tsîra ǂama kaise ge ǁaixa.” (2Kro. 32:25) Hiskiaba tae-i ǃaroma ge ǀgapiǂâixa tsoatsoa? ǀNîsib ge Jehovab xa ǃkhūsisa māhe tsî a huihe o, îb Aseriaǁîna dan torob ǃkhams ǃnâ. Tamas ka iob ge ǁkhōǁkhōsa ǀaeba xu a ǂgauǂgauhe o. ǀNîsib ge Babilonǁîna ūb ge hâ i ǃkhūsis hoasa ge ǁgau ǀgapiǂâixab ge i amaga. Kēbo-aob Jesajab ge ge mîba bi Jehovab ǁîb ǀkha kaise ǁaixa hâsa. (2Gao. 20:​12-18) Davidi khamib ge Hiskiaba ǃgamǃgamsen tsî ge ǃhausen. (2Kro. 32:26) Nēn hoan ǂam-aib ge Jehovaba Hiskiaba mati mû? ǂGomǂgomsa gao-aob aseb ge ge mûhe, “ǃKhūba a ǃgâibana” gere dība.—2Gao. 18:3.

10. Gao-aob Amasiaba mati ge tanisen ǁnama-eb ge o?

¹⁰ Gao-aob Amasiab Judab dib ge Davib tsî Hiskiab khami ge ī tama hâ i. ǁÎb ge ǃgâi xūna gere dī xawe “ǂgaob hoab ǀkha ge dī tama hâ i.” (2Kro. 25:2) Tae-eb ge ǁîba tsū dī? Jehovab xab ge huihe toa o, îb Edomǁîna dan ob ge Amasiaba ǁîn elona ge ǃoaba tsoatsoa.c Jehovab kebo-aob ge ǁîna a ǁnama, ob ge nē gao-aoba ǃgâ ǂgao tama i tsî kēbo-aoba ge sîbē.—2Kro. 25:​14-16.

11. 2 Korinteǁîn 7:​9, 11 ǃoagu da tae-e nî dī î da ǀûbahe? (Ai-īsiga mû re.)

¹¹ Tae-e da nē aiǁgauna xu ra ǁkhāǁkhāsen? ǃHobasen da ge nî sida di ǁorena xu tsî nî ǁkhaubasen î da tā ǁkhā ǁorena ǁkhāba dī. Mati da nî dī ǀhaohâb ǃûi-aogu xa da ga ǁnamahe o sida ǂkhariro a ti ra ǂâi xū-i ai? Tā da ge Jehovab xa da ǀnamhe tama ti nî tsâ tsîgu ǀhaohâb ǃûi-aoga sida ǃoagu hâ ti. ǃGâi gao-aogu Israels di gu tsîn ge ǁnamahe tsî gere ǂgōǀauhe. (Heb. 12:6) ǁNamahe da ga, o da ge (1) ǃgamǃgamsenxase nî ūǃoa, (2) ǂhâbasa ǀkharaǀkharana nî dī tsî (3) nî aiǃgû î da Jehovaba sida ǂgaob hoab ǀkha ǃoaba. Sida ǁorena xu da ga ǃhobasen ob ge Jehovaba nî ǀûba da.—Khomai re 2 Korinteǁîn 7:​9, 11 sa.

ǁÎGU GE JEHOVABA ǂHANU ǀGAUB AI GERE ǃOABA

12. Mâ ǃkharagagusiba ge hâ i ǂgomǂgomsa gao-aogu tsî ǂgomǂgomsa tama ge hâ i gao-aogu ǁaegu?

¹² Jehovab ge ǂgomǂgomsase ūǃoa gao-aogu ge ǁîb ǂhâba hâ ǀgaub ai ǁîba gere ǃoaba bi. Tsî gu ge Jehovab khoena gere ǂkhâǃnâ în ǁkhā xu-e dī. Ama as ge ǁkhāǁkhāsen da go khami gu dīsāna gere dīsa. Xawe gu ge Jehovab ǀguiba gere ǃoaba tsî ǃgarise gere sîsen îgu ama tama eloga hîkākā ǁnā ǃhūb ǃnâ.d

13. Jehovaba tae-i ǃaroma Axaba ǂgomǂgomsa tamab ase ge ǀgoraǃgâ?

¹³ Tae-i ǃaromab ge Jehovaba ǀnî gao-aoga ǂgomǂgomsa tamase ǀgoraǃgâ? Ama as ge dīgu gere xūn hoan ge ǁgai tama hâ isa. Aiǁgause, ǂgomǂgomsa tama ge hâ i Gao-aob Axab ge ǁnâu o, Nabodi ge ǃgamhesa ǁîb ǃaroma ob ge ǃgamǃgamsenxasib tsî tsûaǂgaob tsîna ge ǁgau. (1Gao. 21:​27-29) ǀAsa ǃādi tsînab ge om tsîb ge Israelǁaes ǃaroma toroga ge ǃkham dan. (1Gao. 20:​21, 29; 22:39) Xawe i ge xū-e ge hâ i Axab ge dī-e, kaise ge ǁgai i-e. ǁÎb di tarasa ǃgâ tsîb ge ama tama ǃoabasa gere ǂkhâǃnâ. Nē-i ǃaromab ge ǃhobasen tama ge hâ i.—1Gao. 21:​25, 26

14. (a) Tae-i ǃaromab ge Jehovaba gao-aob Rehabeamma ǂgomǂgomsa tamase mû? (b) Tae-e gu ge hoa ǂgomǂgomsa tama ge hâ i gao-aoga dī?

¹⁴ ǀNî hâ gao-aob hîna ge ǂgomǂgomsa tama hâ ib xa ǂâi re, gao-aob Rehabeamma. ǀGamǁî xoaǀgoras ǃnâ i go mîhe khamib ge ǁîba ǂgui ǃgâi xūna gere dī ǁîb ǂgaeǂguis ǁaeb ǃnâ. Xaweb ge ǀgaisa gao-ao kai, ob ge Jehovab ǂhanuba ge ǁnâuǀnam ǀû tsî ama tama eloga ge ǃoaba tsoatsoa. (2Kro. 12:1) ǁNās khaoǃgâb ge ǁîba Jehovaba ǃoaba tsî nau ǁaegu ai ama tama eloga gere ǃoaba. (1Gao. 14:​21-24) Rehabeammi tsî Axab tsîkha ǀgui tama ge hâ i kha ge hîna ge Jehovaba ǂhanu ǀgaub ai ǃoaba ǀûkha. ǃNāsa gao-aogu hîna ge ǂgomǂgomsa tama hâ i gu ge ama tama eloga gere ǃoaba. Tsî nauna gere ǂkhâǃnâ in ǁîn tsîna ǁkhā xū-e dī. ǃGāsa as ge Jehovab ǃaroma i ge ǁîba ǂhanu ǀgaub ǃnâ ǃoabasa ge ǂhâǂhâsa ī, îb mîmâi gao-ao-i a ǃgâi tamas ka io tsūsa.

15. Tae-i ǃaromab Jehovaba ǁîb nî ǁnâuǀnamhes tsî mati nî ǃoabahe ǀgaub xa a ǂhâǂhâsaba-e?

¹⁵ ǀGoreǀîsa tae-i ǃaroma Jehovaba kaise ge ǂhâǂhâsaba? ǀGui ǃaromas ge gao-aob ge aiǂhanuba ge ūhâ i, îb khoena hui în Jehovaba ǂhanu ǀgaub ai ǃoaba. ǀNî hâ ǃaromas ge khoen ga ama tama elona ǃoaba on ge ǁgai ǁorena ra dī tsî khoena ǃgâi tama ǀgaub ǃnâ ra hâ-ū. (Hos. 4:​1, 2) Tsî gao-aogu Israels digu tsî Israelǁîn ge Jehovab ai ge māǁnāsen hâ i. ǁNā-amagan ge Jehovab ǃoagun ge ǂgomǂgomsa tama io tsî ama tama elona gere ǃoaba o, gere ǀai tamas ka io gere ǃgamme khôa. (Jer. 3:​8, 9) Khoe-i ga ǀai tamas ka io ǃgamme khôa, o i ge ǁî-i ǃgamme hâ khoe-i di ǂgaoba ra khôa. ǁKhā ǀgaub ai i ge māǁnâsen hâ ǃoaba-ao-i Jehovab di-e ǂgomǂgomsa tamase i ga hâ tama io, Jehovaba kaise tsûtsû tsî ra tsûaǂgao kai.e—Deu. 4:​23, 24.

16. Jehovab mûǁae-i tae-e ǃgâi khoe-e ǁgai khoe-e xu ra ǀgora?

¹⁶ Tae-e da a ǁkhāǁkhāsen ǁkhā? Ama tama ǂgomdi ǀkha dī xū-e ūhâ xūna xu da ge nî ǂgōsen. Xawe da ge hoaǁae Jehovaba ǁîb ra ǂhâba ǀgaub ai nî ǃoaba. Tsî ǁîb di ǃoabas ǃnâ nî ǀhabe. Kēbo-aob Maleaxib ge ǃgāsase ge ǁguiǃā mâ ǃkharagagusib ǃgâi khoe-i tsî ǁgai khoe-i ǁaegu hâsa. ǁÎb ge ge xoa: “O du ge ǁkhawa ǃkharagagusiba nî mû, ǂhanu-ain tsî eloxoresan tsîn ǁaegu, Eloba ra ǃoaban tsî ǁîba ǃoaba taman tsîn ǁaegu.” (Mal. 3:18) Jehovab xa da ge ǂhanu-ai khoe-i ase ra mûhe ǂgao. ǁNā-amaga da ge nî ǂanbasen î-i sida di ǀoasaoǃnâsib tsî dīsādi tsîna ta sida Jehovaba ǃoaba ǀû kai. Jehovaba ǃoaba ǀûs ge a ǀgaisa ǁore.

17. Tae- i ǃaroma da nî ǂanbasen ham-e da nî ǃgammesa da ga ǁhûi ǁaeb ai?

¹⁷ ǃGamme tama du ga io tsî du ga ǃgammeb xa ǂâiǃgâ, o i ge Maleaxib di mîde a hui du ǁkhā î du ǃgâi khoe-e ǁhûi ǃgamme du nî-e. Sao ra xu-i xa ǂâi re, khoe-i ge ǃgâi ǀgauga a ūhâ ǁkhā xawe i ga ǁî-e Jehovaba ǃoaba tama io, ob Jehovaba ǁî-e ǂhanu-ai khoe-i ase ra mû? (2Kor. 6:14) Nē khoe-e du ga ǃgamme o, ǁî-e nî hui du i du ǂgomǂgomsase Jehovab ǃoagu hâ? Nē-i xa ǂâi re, ama tama eloga gere ǃoaba taradi Gao-aob Salomob tidi ge ǀnîsi ǃgâi ǀgauga ge ūhâ i. Xawe di ge ǁîde Jehovaba ge ǃoaba tama hâ i tsî ǁaeb ǀkha Salomoba ge ǂgaeǂkhapu, îb ǁîb tsîna ama tama elona ǃoaba tsoatsoa.—1Gao. 11:​1, 4.

18. ǁGûna ǁîn ǀgôana tae-e nî ǁkhāǁkhā?

¹⁸ ǁGûdo Elobmîs ǃnâ hâ gao-aogu di aiǁgaude du ge a sîsenū ǁkhā, î du sadu ǀgôana hui în turaba omkhâi Jehovaba ǃoabasa. Hui nî re în ǁnâuǃā, Jehovaba gere ǃoaba gao-aogu ge ǁnā gu ǁîb xa gere ūǃoahe ga. Tsî nau khoen tsîna gere hui ga în Jehovaba ǃoaba. Sadu ǀgôana ǁkhāǁkhā re mî tsî du ra dī xūn ǃnâ-ū, în mûǂan xūn hîna ra hui du na î du Jehovab ǀgūse hâ. Aiǁgause, Elobmîsa ǁkhāǁkhāsens, ǀhaode hâǃnâs tsî aoǁnâs tsîn khami ǁnān a ǂhâǂhâsa xūn ûib dina. (Mat. 6:33) ǀGôan ge ǁîn tsîna Jehovab ǀkha ǁîn ǀhōsagusisa nî omkhâi tsî nî ǃoaba bi ǁîn da ǂhâba amaga. Tān ge Jehovaba nî ǃoaba ǁîn ǁgûn ra Jehovaba ǃoaba amaga. Nētin ga tsâ tama i on ge ǂâi ǁkhā Jehovaba ǃoabas ǂhâǂhâsa tama hâ ti. Tamas ka ion ge Jehovaba nî ǃoaba ǀû.

19. Mâ ǃâubasensa hâ ǁnān hîna ge Jehovaba ǃoaba ǀûn ǃaroma? (“Jehovab ǃoa du ge a oaǀkhī ǁkhā” ti hâ boksisa mû re.)

¹⁹ Khoe-i ga Jehovaba ǃoaba ǀû, o i ra ǂâibasen ǁnā khoe-i tātse ǁkhāba Jehovab ǀhōsa kai tide ti? Hî-i, ǁî-i ge ǃhobasen tsî Jehovaba ǃoa oaǀkhī ǁkhā tsî ǁkhāba ǃoaba bi ǁkhā. ǁNāsa dīs ǃaroma i ge nē khoe-e nî ǃgamǃgamsenxa. Tsî ǀhaohâb ǃûi-aogu ra mā huiba nî ūǃoa. (Jak. 5:14) Jehovab di ǀhōsa kais ge hoa ǁgūtsâdi dītsâ da ra di ǂam-ai a ǀō-aisa.

20. Sida ga ǂgomǂgomsa ge ī gao-aogu khami ī ob Jehovaba mati nî mû da?

²⁰ Tae-e da go Israelǁî gao-aoga xu ǁkhāǁkhāsen? Sida tsîn ge ǂgomǂgomsa ge î gao-aogu khami īǁkhā. Jehovab ǃoa-ai da ga ǂgomǂgomsase hâ o. Hā re î da sida dīsāna xu ǁkhāǁkhāsen, ǃhobasen tsî dī-e nîse i ǀkharaǀkharana dī. Tsî hā î da ǂâiho re matikōse i a ǂhâǂhâsasa î da Jehovaba ǁîb ta ǂhâba ǀgaub ai ǃoaba ǁîb ǀguib ama Elo amaga. Sadu ga Jehovab ǃoa-ai ǂgomǂgomsase hâ ob ge sado ǂhanu xūna ra dī khoe-i ase nî mû.